meow_littlecat's Profile

喺觀塘區返工嘅我地，今晚搵到一間坐得超舒服嘅泰國菜，可以放咗工同同事吹下水，簡直係打工仔放鬆心情嘅好地方 ！🥗 柚子沙律（$88）柚子肉鮮甜多汁，酸酸甜甜之中帶d d 辣，醒胃得嚟又唔會太刺激，係一個完美嘅開胃菜!🍲 椰子雞湯（小）（$138）椰香濃郁，雞肉嫩滑，飲落去有種清得嚟又好夠味嘅感覺，好適合我地香港人嘅口味。🍤 泰式炸蝦餅（4件）（$88）外脆內彈，蝦味濃郁，唔會太油膩，配埋特製醬汁，炸蝦餅係去泰國餐廳必點菜式之一！🥬 泰式蒜蓉炒什菜（$98）炒得火喉十足，蒜香撲鼻，蔬菜爽口。呢道菜睇落簡單，但味道絕對唔馬虎，勁多料同有唔同嘅菜喺裏面，我覺得好有誠意，我好鍾意！🐔 班蘭炙鳳半隻（$188）呢道菜真係驚喜，可以話係全餐飯嘅重點！炙鳳原來即係燒雞，外皮炸得金黃香脆，好似港式炸子雞咁，但咬落去肉質Juicy得嚟又有淡淡班蘭香，泰式風味與港式口感完美融合，我地兩個女仔連雞胸都清埋，可以做到雞胸唔鞋口真係好難得，推！🥤 飲品：泰牛 & 綠牛（各$68）泰牛沙冰香濃滑口，泰茶味突出；綠牛則好清新，茉莉花香好特別。兩款都係消暑佳品，配搭主菜一流。🍮 彩虹椰汁糕（4件）（$50）色彩繽紛，口感煙韌，椰汁味香而不膩，唔甜反而更突顯椰香，係一個好有誠意嘅甜品收尾。🪑 環境方面餐廳裝潢簡約而不失泰式風情，我哋坐咗喺圓形梳化座，座位寬敞，燈光柔和，令人感覺放鬆。無論係朋友聚餐定情侶約會，都非常適合。✨總結：Thai Fire唔單止係一間泰國餐廳，更係一個味覺旅程。每一道菜都見心思，價錢合理，環境舒適，絕對值得一試再試！📍地址：觀塘王子大廈9樓…Read More

如果你問我，元朗有冇小店值得特登走一轉？我會毫不猶豫答你：「有！就係親民街坊 Café—87 Coffee」👀 街坊氛圍滿分一入店，已感受到濃厚街坊情懷。無論係熟客同老闆娘嘅閒聊，定係坐低望住鄰枱街坊互動，一個字：真！完全冇「伏」味，呢啲小店先至令人安心。🍲 龍蝦湯配鬆軟麵包（+$20）是日餐係：龍蝦湯色澤橙紅，湯面灑上香草碎，忌廉花紋勾出一份法式格調。入口濃郁鮮香但又唔會膩，係晚餐完美序章。配埋鬆軟麵包同Anchor牛油，質感鬆化，簡直係湯神最佳拍檔。🍝 軟殼蟹野菌香草忌廉意粉（$138）一落枱即聞到好香，無誇張，連隔離枱街坊都忍唔住傾偈讚好，街坊話我知原來廚師以前都係喺元朗開過意粉店。唔怪之得個意粉咁煙韌彈牙，忌廉醬帶微微野菌香氣，唔會過膩。軟殼蟹炸得乾脆又香，外脆內嫩，幾分鐘我地就清咗碟，正！🥩 紐西蘭一級肉眼扒（七成熟，$198）炭燒香味先嚟個攻勢，入口牛味濃郁，肉質嫩滑兼juicy，七成熟做到剛剛好，切開無血水但又唔乾柴。配菜都唔係求其，睇得出廚師有用心！🧇 朱古力千層窩夫酥配雪糕（$58）脆口程度認真誇張，一咬就「咔」一聲，牛油香好出，朱古力味甜而不膩。食完竟然真係忍唔住想encore一份，仲要只係$58... 呢個小店親民價，真係會忍唔住每人一碟甜品！🥤 飲品 + 環境總結晚餐已經包埋兩杯飲品，整體埋單，呢頓飯性價比真心高。食物有水準，價錢親民，每人$200左右落樓！環境又舒服，87 Coffee係一間令人想再訪、唔捨得唔讚嘅街坊小店！…Read More

辛勞咗一日嘅工作，今晚我自己一個孤獨的美食家，選擇咗嚟駱駝漆大廈嘅 🥗DAY ONE CAFÉ🥗 食我嘅晚餐，聽聞呢間餐廳主打係西式健康餐飲，專注於 Low-Carb 及 Keto Diet 飲食路線，今晚我order咗呢d:🥣 餐湯 + 抹茶 Latte 套餐（$38）🍅 是日餐湯係番茄湯呢碗番茄湯濃度恰到啱啱好，飲落去既保留番茄本身嘅天然酸甜，又加入咗奶油點綴，令口感更有層次，湯唔會過鹹唔錯！☕🍵Matcha Latte 小山園抹茶鮮奶呢杯抹茶 Latte 真係令人眼前一亮！白色奶泡巧手拉花成一隻優雅天鵝，綠白對比鮮明，簡直係藝術品多過一杯飲品。拉花線條流暢，證明 barista 嘅技術唔係講笑，同埋係用小山園嘅抹茶粉，濃郁細緻，微甘回甘，奶味同抹茶香融合得幾自然，完全就係日本嘅味道！🥗 升級沙律（+$30）沙律材料非常新鮮，蔬菜爽脆，同埋都幾大份，再配埋煙三文魚花（+$28），味道層次更豐富！三文魚淡淡煙燻，為整個沙律增添優雅鹹香，不錯也。🥩 慢煮澳洲肉配薯蓉（$158）主菜無疑係焦點所在。肉質處理得非常軟嫩，牛扒煎至完美嘅七成熟度，外層微焦，內裡呈粉嫩色澤，刀切即開，肉香濃郁而唔油膩。墊底仲配埋綿滑嘅薯蓉滑如絲，口感細膩，再加埋烤過嘅番茄仔同秋葵作點綴，色彩繽紛，營養兼備，體現廚師精緻嘅擺盤技巧同飲食平衡概念，視覺與口感雙重享受。✨ 主菜總結一句 ：呢碟牛扒無論賣相、火喉、調味都做得好出色，係一碟真正照顧味蕾同健康嘅美食！💬 總結：DAY ONE CAFÉ 絕對唔止係健康飲食咁簡單，而係一種生活態度。無論你係 Keto /低碳/食肉獸 愛好者，定係純粹想食得精緻啲又無太大負擔，都值得一試！加上店內環境舒適、服務親切（一見我隻杯冇水職員就會主動即刻加水），工作辛苦了一整天，喺呢度享受完一餐，絕對係都市人重整身心嘅好地方！！…Read More

同閨蜜約會，閨蜜話想食正宗韓國菜，同事介紹呢間正宗，仲話最緊要係好打卡able!呢間餐廳都幾full, 所以我哋一個星期前就book咗位啦，我哋兩個試咗二人套餐；姨媽二人套餐1：HK$480一入座，最震撼嘅係上菜方式！！成張枱放滿曬嘢食推過嚟，滿滿嘅韓式料理，視覺衝擊感十足，滿滿「皇帝開飯」嘅儀式感👑👑😆😆👨‍🍳 韓籍老闆 Mr. Jung 親自招待老闆超親切，仲親自介紹 雞肉章魚火鍋，教我哋點樣食先至最正宗，感覺好似喺韓國朋友屋企食飯咁溫馨。🥢 韓式12碟小食 Side Dishes每一碟都係精緻又地道，特別推介：- 泡菜 Kimchi：爽脆新鮮，酸辣平衡，完全係韓國味道- 明太子：微咸鮮香，撈飯一流- 其他包括：涼拌菠菜、粉絲、大豆芽、紫菜、茄子、蛋捲、辣炒豆腐、醃白蘿蔔、蛋沙律等，每款都好有誠意！🔥主菜精選- 雞肉章魚火鍋（+HK$230）：超大份！半隻雞＋成隻章魚＋兩隻鮑魚，湯底濃郁，海鮮鮮甜，章魚彈牙、鮑魚滑嫩，雞肉真係有啲似人參雞嘅雞。。連D娃娃菜都索到入晒味，好鮮甜，套餐包埋兩碗白飯，呢個湯餸飯一流！- 風川烤河鳗（+HK$200）：河鳗切件再燒到表面微焦脆口，鋪上薑絲、紅辣椒片同蔥花增加香味同啲香辣感，令河鳗更加有層次，唔單止香口，鰻魚肉夠爽脆，我地用紫菜包住+wasabi 一齊食，口感層次豐富，呢個食到唔停得口 ，絕對值得一試！- 燉牛排骨（小）：肉質燉到好淋，醬汁入味，啖啖肉！🥤 飲品- 甜米釀 x2 ：感覺好似薏米水咁，清甜解膩- Lemon Ade x2：酸甜清爽，配埋辣味料理剛剛好！同閨蜜食咗成三個鐘，最後兩個人，食唔晒隻雞同d小食，要打包，估唔到d份量好多碟，真心對得住呢個價錢，另Mr. Jung 強調佢地嘅食材全部都係韓國進口。整體而言，SONAMU唔止係食物正宗，連氛圍同服務都令人感受到韓國家庭式料理嘅溫度。無論係情侶、朋友定家庭聚餐，都好值得一試！📍 地址：LG/Floor, Phase II Austin Tower, No. 152 Austin Road, Kowloon…Read More

呢間叫 BOON 嘅餐廳，喺舊舖食到佢轉埋新舖，無論係味道、火喉、擺盤，甚至食物之間嘅配搭，都帶住一種精緻又樸實嘅魅力。今曰同事仔生日，我哋又試咗幾款菜式，每一道都見到廚師嘅心思：🥗 薯仔蛋希靈魚沙律｜清新與鹹香之間嘅平衡希靈魚本身有濃郁鹹香，配上蛋香、薯仔嘅粉糯同埋沙律菜嘅清爽口感，層次分明，唔會膩口。🥒 青瓜雞丸沙律｜夏日解膩小清新青瓜脆口又爽，雞丸有肉汁又夠滑，整體係一道輕盈得嚟又唔失滿足感嘅沙律。🔥 炙燒左口魚糖心蛋鐵鍋炊飯｜煲仔香魂召喚左口魚炙得好香，邊位微脆、肉質仍保留住嫩滑感。糖心蛋拌飯一流，再加上鐵鍋帶出嘅焦香飯焦，實在太有「煲仔飯靈魂」啦。💯🦪 廣島蠔鐵鍋炊飯｜滿滿的海鮮味一上枱賣相勁靚，鋪滿咗廣島蠔，蠔肉飽滿，混埋炊飯一齊食，鮮味爆棚！🥩 鯉魚熟成封門柳｜嫩滑與牛香的完美融合封門柳熟成得宜，medium rare 火喉掌握得剛剛好，好似慢煮過咁嫩滑。牛香突出，係肉控必試。🦐 大蝦海膽醬寬管粉｜濃郁creamy一流海膽醬唔腥，帶點甜味，完美包裹住寬管粉；大蝦爽口彈牙，成道菜有質感又唔會heavy。🍕 風乾火腿黑松露香草麵包薄餅｜香氣襲人嘅驚喜之作麵包底薄脆，火腿鹹香、黑松露香氣撲鼻，香草作點綴，啱晒配一杯清酒或白酒。🧀 小食追加：吉列芝士蝦球｜拉絲與酥脆的交響樂蝦球外層炸得金黃香脆，入面芝士流心得嚟又唔會漏油，好邪惡但好滿足。🥟 小食追加：雞皮餃子｜意外嘅創意爆點雞皮代替餃子皮，令口感更香脆多汁，咬落去爆汁又有雞味，十分驚喜。🍵 西村宇治抹茶｜回甘有層次抹茶香濃不苦，帶微甘，口感順滑，解膩一流，甜品前來杯啱晒。🍌 焦糖香蕉千層窩夫酥｜甜品控不能錯過每層酥皮都焗得香脆，香蕉焦糖化得啱啱好，唔太甜！總結：BOON 唔係賣弄華麗，而係用心將簡單食材提升，每一道菜都令我地有驚喜，繼續列入飯堂名單！😋😋😋😋…Read More

今晚約咗朋友喺觀塘食下飯聚下，朋友介紹咗呢間NATA Steakhouse，佢話平時Happy hour放工會嚟呢度飲返兩杯傾下計, 重點係可以食到超好食嘅梳乎厘pancake！估唔到真係有驚喜! 成餐飯由頭盤到甜品都好有水準，唔錯吖！🥣 蘑菇松露忌廉湯（$58）一嚟就相當精彩！侍應一放低呢杯嘢，我仲以為係一杯特大嘅latte，一上枱只見到綿密嘅泡泡，將忌廉打到幼滑，個湯超creamy，松露味好香濃，蘑菇香味好出，令人一啖接一啖咁極速飲完，好想再飲多碗！🥗 田園沙律（$78）田園沙律用咗牛油生菜，夠新鮮爽脆，份量都啱啱好，醒埋蕃茄仔同橄欖油醋，帶點果香酸甜，作為前菜非常好！🥩 澳洲150日穀飼黑毛安格斯牛西冷（七成熟，$278）呢塊牛扒真係有驚喜，七成熟處理得好精準，外面燒得焦香， 炭燒味撲鼻而來，一上枱已經聞到肉香中滲出一股濃濃炭燒嘅煙燻味，入口肉質富有嚼勁，但又唔會韌，油花分佈自然，只需要點礦物鹽就夠，基本上唔需要醬汁都已經夠味。🥩 美國1855 安格斯肉眼（七成熟，$298）呢塊肉眼就更濃郁嘅炭燒香味，油脂較多但燒得恰到好處，外面脆脆，入面仍保持粉紅色嘅嫩度。咬落有肉汁，層次感強烈，肉味又夠晒濃郁，兩者各有千秋，睇你偏好，我就覺得兩款都要食！🍹 芒果冰茶（$40）飲品我叫咗杯冰涼嘅芒果冰茶，夏天真係夠晒refreshing！果香自然唔造作，冰粒啱啱好唔會沖淡味道，天氣熱飲返杯真係消暑一流。🥞 Cobber伯爵茶忌廉配蜜瓜梳乎厘班戟（$118）壓軸甜品絕對係亮點之一，朋友仔極力推介必須試嘅甜品！！！Pancake做到綿滑鬆軟，好fluffy，空氣感十足，又有蛋味，再配埋伯爵茶忌廉同蜜瓜，唔係好甜，啱曬我，有層次得嚟又唔膩，簡直為呢餐飯畫上完美句號！朋友仔話平時Cobber 嘅Pancake 係要排大隊都食唔到，今次有幸可以喺steakhouse食埋咁好味嘅甜品，實在太開心了！🖇️總括嚟講， *NATA唔止係主打牛扒咁簡單，由頭到尾都照顧得週到，最難忘莫過於牛扒嘅炭燒香，同超好味嘅Pancake，令人食完仲想再encore一次。餐廳環境雅致，啱晒朋友聚餐或者情侶浪漫一晚，平日星期四晚喺觀塘區仲可以全塲Full House，證明堅有實力，會列入飯堂list 🤗🤗📍 餐廳位置：觀塘巧明街#NATA #觀塘美食#巧明街#香港牛扒 #Steakhouse #香港美食 #食好西#hkfoodie #炭燒牛扒…Read More

今晚加班後，自己食自己，就試下新開無耐嘅呢間喺安寧路嘅好到底水餃雲吞麵，因為好想食好耐冇食嘅蝦子撈麵！最後入到嚟坐低叫咗：🦐🦐🍜🍜 蝦子撈麵 $66嘩，一上枱好大碟，成碟麵都係鋪滿蝦子，完全毫不吝嗇！一睇就知麵夠晒乾身，啲麵黐滿曬蝦子，入口每啖都充滿濃濃鮮蝦子香，麵爽口又彈牙，簡直停唔到口！加埋蔥花提鮮，層次升級，真係老饕至愛！🦐🦐🥟🥟 細淨雲吞（5粒） $27雲吞皮薄都算滑溜，一啖咬落去能食出鮮味，蝦仁爽口、豬肉無豬肉騷味，湯頭明顯有大地魚嘅香味，每一啖都暖胃又好食，有啲後悔嗌咗細碗。。。下次要嗌大碗食多d先夠皮！🥬🥬 蠔油生菜 $22 (改咗腩汁） 生菜爽脆得嚟仲掛滿腩汁，輕輕一咬就食到濃郁肉香，清一清蝦子味，絕配也！🍋🥤熱檸水 最後嚟杯熱檸水，微酸微甜，要讚一下熱檸水好大杯，食完呢餐真係覺得人生圓滿咗！整體嚟講，呢餐冇得輸，每樣都好有水準，夠哂令人回味無窮！如果你都鍾意呢啲傳統風味，又唔使去澳門先食到，就可以喺元朗試試！😋😋😋…Read More

一直都好想試觀塘出名嘅人氣店 Cobber Noodle and Waffle！但無奈長期排長龍都未食到，最近發現佢喺巧明街99號開咗分店 Cobber Noodle and Mochi，新開暫時唔使等好耐，即刻約同事去試吓佢！首先餐廳環境行溫馨格調，書架設計簡約又溫暖，加埋整體燈光嘅設計令到整個氛圍令人有種寧靜舒適嘅感覺！呢度一入坐就包咗自由斟無限暢飲，免費特飲好多選擇，今日有台南四季春烏龍茶，巨峰提子伯爵茶，鴨屎香檸檬茶，蘋果微炭酸，西柚特調，我total飲咗四杯，全部都唔錯！Lunch套餐 我哋揀咗：(A)+(B)+(C) 餐包+餐湯+沙律餐湯係南瓜忌廉湯同 黑松露蘑菇湯選擇，我地都揀咗南瓜忌廉湯，餐包係牛角包，鬆軟香脆，沙律幾fresh，南瓜忌廉湯夠濃郁香滑，呢碟前菜組合已經滿豐富滿足，讚！主菜1）黑松露忌廉蘑菇雞肉燉飯呢碟黑松露忌廉蘑菇雞肉燉飯賣相吸引！忌廉汁濃郁香滑，黑松露帶嚟獨特嘅香氣，提升晒整體味道層次。蘑菇同雞肉煮得啱啱好，嫩滑入味，飯粒充分吸收忌廉汁，每一啖都掛曬啲汁喺上面，呢碟燉飯算出色！主菜2）和風火炙帆立貝意粉呢碟和風火炙帆立貝意粉更吸引！帆立貝有火炙過，表面微焦，散發陣陣誘人嘅香氣，口感鮮嫩彈牙。意粉充分吸收濃郁嘅和風醬汁，每一啖都帶有醇厚嘅鮮味，最令我哋覺得印象深刻就係，意粉嘅口感能夠做到手工意粉咁有彈牙嘅質感，唔怪之得本店成日排曬長龍，我諗好多人都會為咗個排隊，係值得嘅！呢碟意粉可做到色香味俱全，驚喜！小食：脆炸阿拉斯加鱈魚手指配他他醬炸魚柳炸得夠脆，配埋他他醬係完美地提升咗炸魚柳嘅風味！甜品1）：奶茶雪糕麻糬拿破崙奶茶雪糕麻糬拿破崙非常打卡able!!!賣相超靚唔捨得食, 兩片酥皮夾住麻糬同奶茶雪糕，口感豐富又好有層次。奶茶雪糕帶嚟淡淡茶香，配合麻糬嘅煙韌，食落去絕對係味蕾嘅享受！糖霜輕輕點綴，令賣相更加精緻，視覺同味覺都充滿幸福感。呢款甜品真係絕對值得一試！甜品2）：開心果巴斯克芝士蛋糕開心果巴斯克芝士蛋糕，上面鋪滿晒爆多嘅開心果仁，為整體增添咗香脆口感蛋糕質地綿密，開心果味濃郁，配上香脆嘅開心果粒，口感豐富，每一口都充滿驚喜，真係令人回味無窮！價錢方面，人均消費約 $250，以食物質素同環境嚟講，屬於合理範圍。如果你係麻糬迷或者鍾意日式風味，相信呢間餐廳會合你口味！整體而言，Cobber Noodle and Mochi 係一間值得一試嘅餐廳，特別適合鐘意特色意粉同甜品嘅朋友。下次再有機會，一定要試埋其他款式。…Read More

今晚老公嚟接放工喺觀塘揾飯食！想試下中菜，喺openrice見呢間係top 3，就嚟試試佢，無book位，但我地18：00就入坐，當時餐廳唔算多人，但過咗半個鐘，已經full house, 唔估到好多家庭同一大班好友飯局都book呢度食，咁應該無伏了。兩口子叫咗呢啲食，價錢都幾實惠，難怪會爆塲：蒜蓉粉絲蒸蟶子 $48/隻蟶子都算大隻，夠鮮味，肉質爽滑，勁多蒜蓉同粉絲，粉絲入晒味，既香又唔會搶去蟶子嘅原味，正，算抵食！菠蘿酥炸大腸 $98/碟超級邪惡嘢，屋企唔會整嘅菜式，真係食到停唔到！大腸炸到啱啱好！外皮微焦帶勁脆，大腸裡面處理得幾乾淨，無咩肥膏，夠晒香脆，配埋酸甜汁加菠蘿絕對係完美結合，不過兩個人清一碟真係有d多，但都忍唔住口食晒，今次真係肥仔了！！！！紅燒乳鴿 $52/隻乳鴿外皮都算酥脆，肉質細嫩，有濃郁嘅燒烤香氣， 控制得唔錯，正常水準。拍蒜菜心（蒜蓉炒菜心）$78/碟呢碟蒜蓉炒菜心簡單得黎又好味，菜心炒到鮮綠爽脆，蒜蓉又夠香完全滲入晒菜度，食完真係滿足！呢道菜嘅賣相都好靚，白色碟襯住翠綠嘅菜心，上枱好整齊，個廚都幾細心，加分！姬松茸燉老雞湯 $48鍾意飲老火湯嘅我，一定要叫嚟試下！首先係勁多材料，勁多雞髀肉，仲有雞腳同勁多姬松茸。。。姬松茸係呢個湯底嘅靈魂，姬松茸滲透每一口湯，帶有淡淡嘅菌類甘香味，飲落去令人舒暢整，呢碗湯不但味道鮮甜，仲好滋補，特別適合想要溫補但又唔會太燥熱嘅朋友仔。如果你鍾意飲老火湯，呢個姬松茸燉老雞湯絕對係值得一試嘅，$48抵飲！整體嚟講，呢間食肆真係非常值得推薦，無論係味道、服務定係環境都交足功課，絕對會再嚟光另外，餐前小菜有黑木耳同超大碟嘅炸花生。。食唔晒～～而服務方面，店員好積極，上菜速度亦都十分迅速，呢間餐廳價錢方面亦都屬於合理範圍，性價比高，會再嚟番炒！…Read More

Happy Friday嘅Tea Time, 由於有嘢做，嗰日請咗半日假，返到元朗已經係下午兩點幾，想揾間舒適啲嘅café坐下食個brunch.... 獎勵自己一下辛苦咗一星期嘅辛勞！誤打誤撞入咗呢間 Days in the Sun café！入到去，見到café 環境好chill 同幾舒適，木質嘅枱櫈加埋窗邊嘅陽光，感覺令入可以放鬆到極點。每張枱上面仲好有心思咁放咗小花樽插咗一d粉紅同紫色嘅新鮮玫瑰花，真係好relaxing，非常適合同朋友聚會或者自己一個人享受寧靜時光。最難忘嘅係兩位高大靚仔嘅職員喺度，服務態度一流，真係加添咗整體分數！至於食物方面，當日我order咗以下幾款：1. Veggie All Breakfast HK$93 (Lunch)配埋意大利香醋沙律，材料新鮮健康，非常豐富，有黑松露炒蛋、烤蘑菇、車厘茄、烤粟米、沙律菜、牛油果，仲有兩塊鬆餅再配埋焦糖香蕉片、藍莓同士多啤梨，份量大大碟之餘，擺盤仲超靚，真係令我胃口大開，推介，性價比高！2. Original Honey Butter Madeleine HK$28從來都唔太吸引我嘅Madeleine，今天店員推介咗佢地Homemade 嘅Madeleine, 所以就試下，原來Madeleine係外脆內軟嘅。。。而且夠香，少少甜而不膩，仲散發住好香嘅嘅牛油味！裏面好鬆軟，細細件但每一啖都充滿幸福感！推介，下次經過都想買外賣返屋企俾家人試下！3. Matcha Latte HK$45 呢杯抹茶Latte 一上枱，就驚喜萬分，首先係見到咖啡師嘅高超技藝，靚靚嘅狗仔拉花圖案，完全係視覺同味覺雙重享受，抹茶味道濃郁，帶有淡淡嘅苦澀，配合奶泡嘅香滑口感，真係一大享受，而奶嘅比例非常好，口感順滑，暖胃又治癒！次要係，Latte 上抬時仲有張手寫嘅心意卡，寫住：「coffee or tea or me...」嘩！真係令人心動。。。完全好浪漫同好幽默感呢！心意卡仲印住「days in the sun happiness is a piece of cake」真係俾人一種生活簡單愉快嘅感覺。。。好好嚟呢度嘆杯latte 食件Madeleine，生活可以咁樣就滿足了!另外，見到其他客人order佢地嘅自家製餃子都好似唔錯，menu上見有黑毛豬豚肉、香木耳等，我決定下次要試下！總括嚟講，「Days in the Sun」無論係環境、服務定係食物飲品，都令人十分滿意，特別推薦俾鐘意靜靜地品嘗咖啡、享受悠閒時光朋友仔，仲有靚靚打卡位，一定會再嚟！…Read More

老公生日想喺觀塘地鐵站附近揾間西餐廳慶祝，上openrice見呢間喺裕民坊YM² 嘅Plato Cafe好似唔錯就提前打電話book位慶祝。嚟到YM²上平台層，原來好多餐廳，同埋都環境都幾舒服，下次有機會試埋YM² 其他餐廳先得！講返正題，嘅間餐廳環境舒適，卡位又舒服，坐低我地就叫咗個至尊二人套餐$546，配是日餐湯同另一碗加咗$38升級做法式蟹肉龍蝦湯：法式蟹肉龍蝦湯 +$38呢碗法式蟹肉龍蝦湯畀想像中大碗，成碗湯嘅顏色係深橙色，一放低已經聞到一陣濃郁嘅鮮味，飲落去真係堅有龍蝦&蟹肉味，口感算豐富，鮮甜！湯仲加咗d香草調味，提升咗層次，大大碗，一碗都已經足夠我地兩個人飲，唔錯！風乾火腿伴哈蜜瓜沙律：呢個沙律前菜賣相勁吸引。首先，風乾火腿切成薄片，色澤紅潤有光澤。哈蜜瓜切成大大件厚件，夠新鮮。沙律中包括咗沙律菜、生菜、黃瓜片、紫洋蔥絲同埋番茄仔等等，色彩繽紛，擺盤勁靚，睇到都好開胃。風乾火腿嘅鹹香同哈蜜瓜嘅爽甜係絕妙嘅對比，每一啖都充滿咗層次感，淋喺面嘅汁濃郁而不搶味，為整體風味增添咗一層細膩嘅味道。呢碟「風乾火腿伴哈蜜瓜沙律」唔單止喺味覺上令人滿足，視覺上亦非常吸引，係一道非常值得推薦嘅前菜，勁有誠意!澳洲肉眼牛扒： 肉眼扒我地叫咗五成熟，牛扒上枱嘅外表呈現出金黃色嘅燒烤紋理，睇落吸引。切開後睇到內部係粉紅色嘅，正正係五成熟嘅完美狀態。牛扒肉質鮮嫩，燒烤得恰到好處，配上濃郁嘅汁，味道更加豐富，每一口都能感受到肉眼扒嘅柔嫩！呢塊扒無論係視覺or味覺上都令人滿足！另好欣賞佢地每道主菜旁邊都配有大量沙律，沙律菜新鮮爽口，為整道菜增加咗一層清新嘅口感同可以分解油膩！仲有一個用錫紙包住嘅焗薯，加埋d蛋黃醬同啲香料，唔錯同幾可以飽肚。西班牙黑毛豬鞍：呢道黑毛豬賣相都樣好吸引，一樣係豬鞍烤到金黃色同埋表面有香脆感。旁邊有樣配上大量色彩繽紛嘅沙律菜同焗薯，我鍾意！而西班牙黑毛豬鞍肉質都算嫩，表面煎得香脆，內裡唔鞋口，豬鞍肉有少少豬香，豬鞍底仲配咗d 蘋果蓉，再夾埋豬鞍肉一齊食又解膩又可以吊出豬鞍肉嘅好味，不錯！牛角窩夫伴雪糕 + $28我地加咗$28升級咗其中一個甜品做呢道甜牛角窩夫伴雪糕 ，真係又睇得即又食得。因為老公生日，一早book位時通知咗餐廳幫我喺甜品碟上寫字，點知又驚喜有埋蠟燭送上，店員又好醒，最後神秘地送上甜品到我老公眼前，有心思！牛角窩夫嘅質感外脆酥軟，應該就係牛角包壓為窩夫，每一口都係脆卜卜，好味過普通傳統嘅窩夫。雪糕嘅冰涼同窩夫嘅暖熱產生咗一種獨特嘅口感對比，加埋士多啤梨醬嘅酸甜味形成咗完美嘅對比，我地食完一口又一口，一分鐘清咗呢個甜品，讚讚讚也，無論係味道定賣相都令人好滿意，推！芝士蛋糕：而跟餐嘅芝士蛋糕賣相都吸引，芝士蛋糕味道唔太濃，有奶香，紅色嘅微酸果醬平衡咗芝士肥膩，同碎果仁同d 卜卜脆粒一齊食增加咗一層脆口嘅感覺！另餐飲叫咗冰果茶 & 熱嘅抹茶鮮奶就結束嘅個豐富嘅晚餐啦。總括嚟講，餐廳環境舒適，員工服務態度勁好之餘仲又勁有禮貌，而食物價錢都性價比高，喺觀塘絕對係一個唔錯嘅選擇，下次會同其他朋友再嚟食👍🏼👍🏼👍🏼👍🏼…Read More

今日係我同老公嘅結婚紀念日，老公安排book咗呢間喺元朗叫Diamond西餐廳慶祝，初初仲唸點解唔去出去尖沙咀食？元朗都有浪漫高質西餐廳咩？去到餐廳門口，已經俾餐廳外觀徹底吸引咗，好似去咗外國嘅餐廳咁，感覺好華麗！入到去坐底咗，環境舒適 ，牆壁係淺色磚牆，配合柔和嘅燈光，仲有一幅砌出嚟嘅瑪莉蓮夢露畫像，營造咗一種溫暖嘅氛圍，無論係設計定係擺設都充滿咗細節位。餐枱上嘅薄荷葉水樽，一個小瓶插住一朵新鮮紅玫瑰，水晶燈設計嘅台燈，給人一種溫馨而精緻嘅感覺，成個環境同氣氛真係真心要讚！仲留意到餐廳設計不僅注重功能性，更注重氛圍嘅營造，每度菜嘅擺盤都睇得出十分講究， 做得到睇得又食得！今次我地嘅晚餐就order咗呢D:我哋嗌咗兩個晚餐套餐，除主菜外，仲包括咗麵包籃、是日餐湯、茶或咖啡、甜品。首先，嚟咗一碗南瓜湯同埋一碗羅宋湯，我飲嘅南瓜湯，有龍濃厚嘅南瓜味，加埋忌廉同麵包糠，呢個係絕配，好飲！另外我add on咗1份“焦糖核桃雜菜沙律+$48”，呢盤沙律色彩繽紛，份量好大份，足夠我同老公兩個人食，沙律入面有唔同種類嘅生菜、紫色沙律菜同埋堅果，上面仲淋有一層醬汁，焦糖合桃好食，沙律擺盤精緻，充滿健康感，唔使幾分鐘我地就清咗碟！主菜我揀咗“蘋果木煙燻帶骨豬鞍配蘋果蓉-紅酒浸蘋果” $268首先，賣相非常吸引，店員將豬鞍上枱嘅時候，連埋個蓋一齊上，喺我哋面前揭開，濃濃嘅煙燻味出曬嚟，好有儀式咁！豬鞍賣相色澤金黃，表面有明顯嘅燒烤炭燒紋理，顯示出經過精心烹調，豬鞍上面放咗一枝新鮮嘅迷迭香，增加咗香氣同美觀度，配上埋一小碗嘅蘋果蓉用嚟配搭豬鞍肉食用嘅，係perfect match嘅配搭，整體擺盤簡潔而高雅，令人食指大動。呢份蘋果木煙燻帶骨豬鞍切開肉質鮮嫩多汁，煙燻味恰到好處，帶嚟獨特嘅風味。煙燻嘅香氣滲透入埋d配菜度，好特別，我好欣賞！而蘋果蓉嘅甜酸味道同豬鞍肉嘅鹹香形成咗完美嘅對比，令味蕾得到極大嘅滿足，整體嚟講，呢道菜色香味俱全！仲有一個細緻位需要讚揚一下，因為蘋果溶真係太好食，我好快就食曬個兜蘋果溶了，問店員可唔可以畀多少少蘋果溶，佢而話不說就叫廚房重新整過一兜俾我，拎出嚟嗰陣時仲熱辣辣㗎。而我老公揀咗嘅主菜就係：炭燒美國PRIME牛肩胛扒 $298 我哋嗌咗七成熟，呢碟牛肩胛嘅色澤非常吸引，燒得啱啱好，表面呈現金黃色的燒烤紋理，內裡保持粉紅色，剛好七成熟度，牛肩胛扒被切成幾塊，每一塊都做到鮮嫩多汁，唔錯！配菜一樣都係有幾粒烤番茄，烤翠玉瓜同西蘭花苗，豐富咗整道菜嘅口感同少少解膩。旁邊仲有一小撮岩鹽&一小撮芥末醬，增添咗不同嘅風味，不過本人就覺得只需加岩鹽&三色胡椒就已經足夠了！呢碟牛扒無論視覺上定係味覺上都是一個享受！另外，仲叫咗一杯右邊係一杯寶石水果茶 Diamond Fruit Tea 飲品，呢杯寶石水果茶份量非常足夠，杯入面包括咗橙片、檸檬片、薄荷葉、西柚片同其他水果，裝係一個花紋嘅玻璃杯入面，令成個餐桌更添色彩同生氣！甜品方面，原本套餐配嘅甜品係可以揀奶凍同乳酪，我哋揀咗一份乳酪，乳酪唔甜，健康好食！另我一份甜品我哋就加錢轉咗做佢地嘅signature法式多士配雲尼拿雪糕-$68原來老公喺book枱嘅時候已經講明係慶祝週年紀念，所以驚喜地係呢個法式多士甜品碟上面寫咗 Happy Anniversary 🎉 🎉 🎉 開心驚喜！法式多士都係呢次餐點中嘅一大亮點，酥脆嘅麵包配上甜美嘅糖漿，最配上雪糕，口感豐富，每一啖都好滿足，甜而不膩，為呢頓餐點畫上完美嘅句號。整體嚟講，呢次嘅用餐體驗真係非常豐富，好滿足同好滿意，各式各樣嘅菜色都令我哋大飽口福同眼福。每一道菜品都有其獨特嘅味道同風味，令人回味無窮。加上華麗而舒適環境，值得推薦俾大家，下次有屋企人/朋友生日都會帶佢地嚟食！…Read More

剛剛去完日本旅行返嚟，約咗閨蜜見面，想食中菜之餘又要揀一間坐得舒服，唔太嘈，環境又寬敞嘅酒樓，閨蜜推介咗同book咗呢間喺尖沙咀麼地道75號南洋中心嘅尚苑!最初打算普通聚餐無唸住要寫食評，但因為我地食咗佢嘅一個菜式....所以都忍唔住想分享下好嘢俾大家！登登登。。。凳！就係佢地嘅“新鮮菠蘿拔絲咕嚕肉"($148)，呢碟拔絲咕嚕肉真係令我地覺得好驚艷。首先，拔絲咕嚕肉賣相一上枱已經幾靚，因為有整邊新鮮菠蘿切得靚靚咁一齊上，賣相一流，咕嚕肉一夾起，見到好多拔絲效果，絕對無渣流灘！一咬落去，外皮鬆脆，內面卻保持住肉質嘅鮮嫩同多汁！每一口都能感受到嗰種甜而不膩俾糖漿包信舊肉嘅感覺，我地兩個忍唔住襯熱狂食！這個拔絲咕嚕肉嘅火候掌握得恰到好處，切要讚一下師傅，真係估到，我哋原本以為呢度主打嘅北京填鴨 or 樟茶鴨先係signature 菜，但原來呢碟“新鮮菠蘿拔絲咕嚕肉”先係代表作，被北京填鴨/樟茶鴨耽誤咗嘅咕嚕肉！！！😅😅😅😅Anyway，呢個咕嚕肉極高的水準，絕對值得一試同對得住呢個價位。仲有係叫咗兩隻蒜茸粉絲蒸大元貝（$28/隻）, 呢個價錢性價比高，扇貝的鮮美同蒜蓉完美結合，蒜蓉嘅調味恰到好處，不會過於搶味，反而提升了扇貝嘅鮮。蒸煮嘅時間也控制得好，扇貝口感都係嫩滑，沒蒸過熟嘅感覺，唔錯！最後當然有叫到佢地嘅主推嘅菜式“尚北京填鴨”(半隻)（$268）....片皮鴨的皮做得好得酥脆，每塊塊食酥脆卜卜聲，正常水準，但份量如果多返d就更好。總括嚟講，呢間酒樓嘅新鮮菠蘿拔絲咕嚕肉真係高水準，加上酒樓環境舒適，我地會為咗個拔絲咕嚕肉再返嚟嘅！…Read More

今晚OT完，獨個兒外出走走，想揾餐靚餐廳嘆杯latte去慰勞自己一下...食個簡單又滿足嘅一人晚餐。選擇咗去光尖沙咀 K11 musea 睇睇，經過一番挑選後，最後入咗呢間喺3樓 THE COFFEE ACADEMÏCS。。。原因係先畀佢哋嘅餐廳環境吸引咗，個感覺好Relaxing， 睇睇個menu，仲有dinner set, 絕對符合一個人晚餐budget!🤩☺️Dinner set 包括咗：沙律 + 主菜 + Coffee主菜最後我揀咗；Baked Halibut Fillet with Lemon Garlic Aioli烤焗檸檬香蒜比目魚扒 +$30🐟🐟比目魚嘅營養價值勁高，有豐富嘅Omega-3，佢裡面含嘅不飽和脂肪酸易被人體吸收，仲有助降低血中膽固醇，增強體質，所以本人勁鍾意食！呢碟比目魚一上枱賣相就已經唔錯，有兩件大大件，肉質細嫩又潔白，肥美肉嫩，一條骨都無，啖啖啖肉，裡有好似加咗檸檬汁蛋黃醬嘅sauce, 更吊出魚香味，另伴碟嘅配菜全部都好食！CP 值高也！！！！而沙律都係正常發揮🥗🥗。另佢地個dinner set menu仲有‘炒椰菜花飯...絕對啱曬我地呢d低碳低醣飲食嘅女仕！😻😻餐飲我就叫咗我至愛的；Matcha Soy Latte 宇治豆奶抹茶🍵🍵宇治抹茶又稱係京都抹茶，勁濃嘅抹茶粉加上豆奶係一個絕配！！！本人對宇治抹茶都有少少研究。。。佢地嘅兒茶素含量高，兒茶素係一種天然的抗氧化，抗發炎嘅，有助於對抗自由基，預防細胞損傷，幫助增強免疫系統，所以抹茶絕對係豐富的抗氧化劑，各位一定要飲多d....總括而言，估唔到呢晚亂打亂撞就揾到間咁舒服嘅Coffee Cafe, 杯Latte 香濃之餘，食物質素都高，會列入飯堂list 中！🤩🥳…Read More

喺粉嶺住咗幾十年，我唸無人會唔識聯和墟嘅聯和舊街市（聯和市場）😎😎，不禁令人會即刻唸起套港產片《每當變幻時》，當時陳奕迅楊千樺就係坐喺街市頂嗰度拍㗎啦，呢個聯和市場就係電影中的拍攝地點！🎥📽️🎬🎥📽️🎬政府近幾年都不停活化呢度，為咗要保留原貌外，更可令街坊們留下不少深刻的回憶。而今年就成功將呢度改為一間據有特色的Wake up bristro 餐廳！🤩🤩今日星期六就陪媽咪嚟試下佢地嘅Lunch, 我哋分別試咗；燒澳洲安格斯肉眼扒 (180g) HK$138 🥩🥩我叫咗7成就，嚟到熟度煎得剛好，而兩塊牛扒都有一定嘅厚度，牛扒煎到焦脆外皮，中間粉嫩不帶血水，rest得夠，唔錯！另外要讚一讚伴碟嘅side dish，配有紫薯條/蕃薯條/芋條/蕃茄仔/西蘭花/翠玉瓜。。。🍅🥦🍠🥔其中紫薯條/蕃薯條/芋條係超食吃，又香又甜又脆，我哋見到menu 上面有特登mark咗餐廳係用本地時令蔬菜同埋come from 蔬菜統營處，唔怪得知D配菜咁好食啦，推介！🥦🥒🥬🫛🫑🥕🍆另我哋升級加餐湯 @$5.0，係蘑菇忌廉湯嚟而湯都夠熱。🍄🧉而媽咪就叫咗個；雙重芝士焗海鮮飯 HK$86 🧀🧀🦑🦪🦐🐟🐚個海鮮飯上一枱仲“sss”"sss ”聲，熱辣辣，香噴噴！海鮮飯夠足料，有青口，蝦，魷魚，蜆肉，魚柳同double chesse, 個chesse 幾香唔錯！媽咪話D料仲多過飯，佢食得勁滿足，呢個價錢算性價比高！另我地要加咗兩份甜品；🥞🍌🍨🧇焦糖香蕉朱古力窩夫拌日本雪糕 @$50.0香蕉配上焦糖面，燒得脆卜卜，加埋朱古力醬, 呢個配塔係無得輸嘅！椰子雪芭 @$48.0 🥥🍨🍦椰子雪芭唔冼多介紹，喺d日本餐廳經常食到，係我至愛甜品之一，仲有菠蘿口味都好好食㗎！總括呢間餐廳除咗嚟食味道之外，最緊要係嚟感受一下舊街市嘅回憶情懷！P.S.: 另餐廳的open area 嗰邊仲有個outdoor pet friendly zone, 歡迎寵物狗狗內進同主子一齊共進午/晚餐添....主子可以留意下啦🐕🐕…Read More