mytongue's Profile

一個人搵野食。本來去咗對面嘅韓式食，坐底後發覺超貴（四百幾 set），行返出嚟再搵下見對面又係韓式，有兩三個排隊，價錢二百樓下，OK。研究完menu 叫咗個比較健康嘅雞湯套餐，$17x，點知。。。我直頭唔想 comment。垃圾。唔得，唔夠字俾唔到喊臉。雞肉無味，雞湯唔識形容。。。 碟“沙律”。。 唉。我7月先去完韓國兩星期，所以我清楚韓國食品係咩料。格硬食咗幾塊雞就走。呢間嘢竟然好意思用雞湯作為招來。餐廳名都叫 Korean Chicken Soup.盲排隊，盲韓嘢。有啲懷疑係唔係真係韓國人開嘅。實在太垃圾。味道我俾 2 分因為始終啲食物可以食到落肚。服務冇乜點。環境普通。衛生唔知，無用佢地嘅厠所。…Read More

我等咗半個鍾，就到門口見到外賣原來只係 58。咁點解要排咁**耐**去入去**迫**又要俾多 $40？有無人明白？份量有分別？嗰 1x1呎嘅枱好有feel？最後我都係放棄去咗附近間咩咩家食日式咖喱雞排算。$66 有埋沙律，可樂，座位有合理空間亦唔會有時間上嘅壓力。當然係快餐味道。至於新景園，下次試下一早電話叫個外賣再同大家報告下。其實半年前試過呢間野，當時叫乾炒牛河，印象中算係咁，但未去到要排大半個鍾咁神聖。當時旁邊個人叫咗咖喱豬扒，攞嚟時我爭啲嘩咗一聲，好大份，佢最後都食剩三分一。…Read More

北角5月新開，當時朋友問我去唔去試下，話有半價。因為無幾耐前先喺深圳食過呢間，覺得味精勁勁重，我本身對味精冇乜反應嘅人當晚食完都覺得勁口渴，油多味精多，不了。當時咁講。6月我喺北角經過呢間嘢，喺外面望入去都幾靚，始終香港呢啲價位嘅餐廳唔會咁落本裝修。後來同我朋友講不如去試下。睇下改唔改到對呢間餐廳嘅既有諗法。當晚未到7點去到攞籌坐住等，大約 10 分鐘有位。安排咗靠牆嘅兩人枱俾我地。叫咗呢幾樣：炒黃牛肉，青椒炒蛋，一罐可樂，兩碗飯炒黃牛肉揀咗少辣。上菜時點著枱面有燃料嘅爐仔將鑊仔放上去熱住。我等個鑊餸有熱力感覺時將牛肉兜兩兜就叫侍應熄火以防牛肉過老同啲辣味太出（個後生女侍應竟然係將個鑊放枱面，跟住抬起個爐用口吹氣熄火 😆，唔知邊度鄉下）。牛肉切薄片，口感唔嫩唔韌，咬到。大量蒜頭惹味，西芹段增香，幼薯仔絲增加口感，仲有辣椒粒，食材就係咁多嘢。其實個底汁亦唔係特別嘢，都係生抽老抽糖嗰種組合。係送飯嘅。味精冇深圳嗰次咁勁。但係唔係嘩好正？唔係。難食又唔係。$138其實叫左個唔知咩炒瓜絲，不過轉頭侍應過來話無晒，咁叫左個青椒茄子（$58），點知上菜後夾咗幾啖來食發覺啲茄子（切片，覺得係煮咗陣先攞去炒）唔夠淋，幾乎生同熟之間。叫咗個侍應來，佢話可以叫廚師再炒多陣。😆 見我面有難色，話可以退。所以後來我叫咗青椒炒蛋呢碟應該唔會有伏嘅餸。青椒炒蛋（$58）用碗上，份量幾多下。但味道冇乜特別，自己炒都唔會差過佢。呢樣食唔晒，朋友將佢同剩餘白飯打包。間餐廳最大特色或者吸引處唔係佢嘅食物而係裝修，掛大量燈籠，辣椒乾果啲，木裝修。服務。個個人話香港服務差，大陸服務好。呢間服務都係睇個別侍應。首先，我見到嘅侍應個個都係大陸人，有啲甚至未必係新移民。例如門口負責叫號碼接待嘅男人佢唔太叻廣東話，電腦叫號，但有時佢都要叫下，叫幾次無人應佢會好大聲有啲失控咁大聲叫，我諗係環境同壓力造成我唔怪佢，適應下會好啲。我哋枱附近用口吹熄火嘅後生女侍應，完全聽唔明廣東話，有啲木，唔係想像中熱情嗰啲。幫我地退炒茄子果個中年女侍應就識講少少，態度 OK。唔知點解呢間餐廳咁多笑臉 vs 0 喊臉。咁喊臉講真又未至於，但笑臉更加未去到，所以比個中臉算。食完之後同朋友嘅結論係：而家有滿200減50嘅優惠。如果呢間嘢唔係掛晒呢啲燈籠嘅裝修吸引人，無晒優惠，就咁憑佢哋餸菜，應該捱唔到一年。…Read More

我今次食第三次，但三次食完其實都唔太明白點解可以有米滋連，openrice 點解笑臉比喊臉多咁多。間嘢好坐，我哋坐圓枱，半圓梳化位，半圓普通座椅，幾舒服，裝修都幾好，聚餐嚟講環境係幾舒服嘅。食物我諗真係個人口味，其中嘅椒鹽跳跳魚，椒鹽惹味但整體真係唔及大排檔或酒樓嗰啲椒鹽九肚魚，有碟好似咕嚕肉嘅嘢，好普通，唔及咕嚕肉，有個海鮮長壽麵，呢個鍾意食麵嘅話都 OK，仲有半價嘅黃花魚，39蚊一條算幾抵，啲魚肉都嫩，一碟類似煎蠔仔餅嘅嘢，好食，但比起食開嘅大排檔煎蠔餅，或者潮州煎蠔烙，我會鍾意前者多啲，但都值得試嘅。總體呢間嘢都係 環境 4.5分，味道 3.5分，價錢 3.5分，服務 4.5分會唔會有第四次幫襯？試過3 次已經確認咗自己唔極力欣賞呢間嘅食物，所以唔會主動安排呢間為飯局選擇。星加坡人好懂得包裝。…Read More

今日下午時間約咗朋友喺佐敦，周圍搵下有咩地方可以坐下食個 late lunch。 門口掃 code 入咗去。入到去無客，我哋喺其中一個卡位坐低，個阿伯（定阿叔）侍應（定老闆）行埋嚟話掃針卡，我安心冇入針卡，因為費事變相實名，所以攞張針紙出嚟比佢掃 code，點知佢話唔得，我話度度都可以，政府都冇規定一定要喺安心app 加入先有效（平靜語氣），點知個阿伯跳制咁（應該係堅實腦殘，好似滿肚子氣果種，莫名果隻），咁我哋知道此地不可久留。後來去咗對面街嘅泰式餐廳食。今次冇食過所以俾唔到食物評論，比唔到笑喊臉。但都想大家知道間嘢有個咁嘅阿叔。大家有興趣可以去體會下。…Read More

週四下晝 5 時。當多數人 wfh 嘅時候我竟然出現喺中環街頭。其實唔係肚餓，但因為政府玩咗 6 點唔俾入店堂食已經有一段時間，所以有個藉口俾自己提早食個“晚飯”。我唔係中環友，所以永樂園都只係去過一兩次。落到去見全場得四五張枱有人。睇咗餐牌，研究一輪最後都係叫咗個貌似鎮店之寶咁嘅熱狗套餐。$39+$3 凍飲。好快包到。本來無期望，原來都可以失望。個包size正常，起碼大過IKEA個隻，笑。質感幾好，外層真係似麵包，入面熱嘅都鬆軟。啲黃色醬幾好味，傳統港式熱狗嘅味道。港式熱狗係只得一條香腸同一劈醬，冇菜，冇瓜。講返條腸，中指咁大咁長咁粗，你接唔接受到？你滿唔滿足到？咁嘅熱狗咁嘅價錢，睇返食評咁多人讚好真係有啲不可思議。香港人係唔係未食過正常熱狗？定係覺得一間望落去好有歷史嘅餐廳嘅食物就一定比返啲同情分？…Read More

周日晚約 6：30 喺銅鑼灣搵嘢食，去某app 睇折頭餐廳搵到呢間印度嘢，呢個時段有 7折。book 7點，我哋 6：45已經到咗，入到去成間餐廳吉嘅，鋪咗白色枱布嘅餐廳盡入眼簾。水吧入面有個女人，樓面有另一個女人，判斷唔到咩國籍。有個印度男人應該係老闆。隨便坐，坐咗係中間靠窗梳化位。叫咗 chicken masala 同 lamb korma, 2份 plain naan，老闆問要唔要多個白飯，諗咗2秒，要喇。好快有脆餅奉上，仲有兩細碟類似薄荷醬同果醬以供點用。chicken masala 比想像中有啲辣，但都好味。lamb korma 唔辣嘅，好味。整體份量適中。肉唔算特別少。好飽，飽到半夜嘔咗啖胃酸上來。埋單（7折+原價加一） $206，細看之下有個 white basmati $38，白飯。唔怪得之問我要唔要加多個白飯。兩份naan先係$38。不過折頭之下係抵食嘅。整體服務幾好，有水有紙巾，地方企理，就算個印度人都幾好。用餐時聽到兩個女人用廣東話傾偈，或者係香港大嘅南亞人。同印度老闆就講英文。…Read More

2019年11月14日去咗呢間當時人氣高企嘅茶餐廳嘅炮台山分店，結果出乎意料。老闆表現得夠黃#我本來幾鍾意，所以特登去拜訪下，好（彩）容易搵到個位坐低，叫咗個雞扒返。#最新消息竟然話 71後話餐廳脫黃碟飯來到（大半年之前嘅嘢我都要睇返相先記得），就係一碟飯碗倒出來嘅白飯，旁邊有一塊雞扒。飯上淋啲豉油，雞扒上亦灑啲蔥花。賣相一般。心諗個雞扒會唔會類似榮式嗰啲呢？切開一睇，x 咗一聲，喺心入面。除咗層皮之外，入面係全生嘅喎，咁都得？懷疑佢未徹底解凍就攞去煎，而且時間關係仲要大火煎到外皮轉色就上碟。咁有個問題，究竟佢哋有冇醃過啲雞扒呢，定係全部都係解凍後直接落鑊煎就完成？？後來當然係要求換過個。後來換咗來，外表正常，味道一般，冇得同榮式比。食剩少少先記得影相。結論係雖然係黃店但我唔會再幫襯，而家脫黃，更加與我無緣。…Read More

理論上係要做會員先可以去嗰度，唔知係唔係牌照所限。坐低侍應都喺咁意叫你填啲嘢跟住俾張會員證你。食物只可以話 ok 咁喇，我諗你去印尼當地嘅普通印尼人幫襯嘅食肆都係咁上下嘢。唔好諗住會係印尼華僑開嗰啲，嗰啲係印尼都唔係基層人士幫襯嘅餐廳。老實講，當所有客人都係印尼外傭/南亞人，得你一兩個係香港人時，其實都幾古怪。但抱住獵奇心態想試下香港另類餐廳嘅人都可以一去嘅。仲有20個字就可以用笑喊臉，容許我寫埋。剛好。 我應該係 18年頭咁上下去嘅。…Read More

其實一兩年前同屋企人去完愛群道嘅社區活動中心後過嚟呢度飲茶時，坐低後有個阿姐（態度麻麻）行埋嚟問我地係唔係回教徒，話呢到只開俾回教徒我當時覺得係唔係啊嘛，網上資料亦無講，餐廳內外都冇寫。幾日前再去（又係因為愛群道得佢一間食店），確定大家如果唔係穆斯林（回教徒）嘅話唔使再去喇，因為而家寫明招待穆斯林，英文係 “is reserved for Muslims”。其實都明嘅，咁多慕名而去嘅人，真正回教徒尤其係去完禮拜嘅人想去食個清真飯食都冇位用。情況好似香港。。。 總之明架啦。今次俾嘅評分係根據上次去嘅飲茶經驗而定。…Read More

約咗朋友喺旺角，因為佢話想食蛋糕，自然去咗朗豪坊，呢間野嘅蛋糕佢聽聞好食（我聽都未聽過），但真心覺得貴，不過佢請我食，so money is not a problem la.呢個蛋糕 $68。唔知你覺得如何？ “好食咪得囉，有幾何啊，又唔係餐餐食！咪咁孤寒喇” 恭喜你，你好切合香港呢個高度崇尚消費主義嘅社會。其實我打咁多嘮叨字都只係為咗湊夠 200 字可以加笑臉。冇錯，係笑臉。呢個蛋糕係放喺一個硬咭紙盒內，有別於一般餅店嘅軟咭紙盒，分別在於。。 精美高貴d，無咁容易壓爛入面件餅囉。仲有一個靚靚嘅紙袋載住，朋友話包裝都值 1 蚊，我話 10 蚊都喺包裝上。冇喺餅舖範圍內食，走咗去以前MOS burger 嘅室外空間，舒適自在。打開包裝：放入口，好味。特別好嘅地方：表面同內裡包住嘅忌廉鮮美，呢個應該係呢間餅舖嘅賣點（？），表面嘅薄脆口感唔錯。其他例如蛋糕本身或者上面粒士多啤梨就普通貨色。整體好味。同場加影同係朗豪坊而且係同一層嘅 Italian Tomato 🍅 買返黎價值 40 蚊嘅士多啤梨蛋糕（唔打算為佢另寫食評），確係明顯被比下去。結論：貴。好食程度不致於我會花68蚊嚟再食一次。當然，個個人嘅喜好都唔同。…Read More

講起台灣料理，自然會諗起荔枝角/長沙灣工業大廈嘅程班長，或者西營盤嘅阿元來了，因為兩者連台灣群組嘅人都會介紹俾初到貴境嘅台灣同胞，證明佢哋實在有一定嘅地道風味。今日有事去旺角，五點幾諗住不如趁下午茶時段來個 early dinner。啟動 openrice app 嘅找附近餐廳搜索，一直轆落去幾版都未決定到去邊間。故事一跳，去咗附近一間叫鐵牛嘅台式料理，35蚊起。店外寫住下午茶餐去到 5:30，還有10分鐘，即刻入座。入面竟然冇乜人，揀咗角落嘅梳化卡位，舒服。畫紙叫餐，每個餐分 A，B，C 三部分，A 為主食，B 為小食可選三款，C 為飲品。快速填完後順利於 5:30 前交俾收銀兼付款。飲品同食物都上得好快。先上飲品：幾好。食物陸續上來：滷肉雖然只係一小匙，但搭配小食絕對對得起個價錢，份量亦足夠。而家夜晚11：49寫緊食評，仲飽緊。不過利申我食量算少而且消化得比常人慢。小食用心設計，值得一試，或兩三四試，讚。其實 d 食物上枱時侯發覺原來之前喺尖沙咀食過另一間分店，當時嘅印象都幾好，不過一直遺忘咗，今次好有故友重逢嘅感覺。而且呢間人少坐得更舒服。今次食評共 500 字，如果計 5 毫子一字都有 250 稿費，可惜冇，不過開心。…Read More

之前自己嚟過呢間食，後來同屋企人嚟食過一次，都係食焗飯，結果都係 。。其實唔算話特別好食，又不至於劣食咁。因為來咗幾次，儲埋 $5 coupon 共三張，加上 openrice （笑臉：喊臉）比例好高，所以懷疑係唔係之前錯過咗d咩美食，所以決定比多一次機會呢間新森林。大約 6:15 入到去冇乜人，揀咗靠牆卡位坐。今次唔叫焗飯，叫咗個番茄海鮮烏冬煲（$74），同埋軟殼蟹石頭鍋飯（$68）。兩個都跟餐湯+餐包（+$8 x2）餐飲叫熱華田同可樂（+$3）。先嚟餐湯同餐包。典型茶餐廳紅湯，味道唔係特別出色，其實唔使特別加錢叫。跟住來咗個加熱爐架，睇燃料應該只可以燒幾分鐘就熄嗰種，適合加熱之用。海鮮煲，烏冬。呢鍋食物唔太出色，有少少劣/伏嘅邊緣。首先飲咗啖個湯底，有啲奇怪嘅味道，但又講唔出點怪法，總之你唔想大啖大啖咁飲落去。煲內有幾隻蝦，味道正常。其他海鮮有魷魚，唔記得個味道/質感係點，（好似）仲有魚肚。最特別嘅係相中浮面嘅方塊嘢，望落唔知係乜，有兩三塊。咬落去嘅知道係好多細孔嘅結構物，以前應該食過類似嘢，但叫唔出係乜嘢，甚至唔確定係海鮮定合成嘅食材。唔好食。煲嘢食到 6677 時再食咗啖方塊嘢，終於覺得湯底奇怪嘅味道係源自呢塊嘢，輕微嘅油益味，即係應該儲存不當（例如存放太耐，環境潮濕等原因）而變壞咗，尤其係中間嘅油份益咗。當堂覺得好核突，但因為只有輕微嘅益味所以食煲中其他食材時唔太感覺到。烏冬正常質感，唔係超市幾十蚊一包嗰啲亦唔係10蚊一包唔使雪藏嗰啲。呢個軟殼蟹石頭鍋飯好食，軟殼蟹新鮮炸其實都唔會差得去邊，佢個飯底亦做得好美味。今餐74＋68＋8＋8＋3=161， 減15 coupon = 146。計埋小朋友，本來人均 53，減完coupon 每人 $49.會再來嗎？如果唔係又幾多兩張 5 蚊coupon應該就唔會，或者可能自己去食多餐石鍋飯。竟然寫咗 777 字，為自己拍掌。…Read More

較早前食吉野家時有d coupon，今日用得著。原價27 嘅牛肉烏冬+茶一杯， coupon 減3蚊，只係$24，yeah。味道同份量都合符預期，只係個湯底鹹咗少少。不過都冇投訴。原來200字以上先可以俾笑/喊臉，唔怪得咁多人嘅食評會寫好大段字寫入餐廳前嘅心路歷程，前因後果。我又寫下先：今朝一早起床，為了幫媽媽報瑜珈班，8:40去到報名中心，見人龍去到lobby地下嘅後樓梯，好彩中心喺2樓，經過細心評估，我前面大約有20人正在排隊。9:00開門，陸續進入中心，有職員派籌，我係第15號，過程尚算流暢，約 9:30完成。步出中心所處的商業大廈，驚覺自己還未吃早餐，即時想起較早前d吉野家優惠券，故勇闖3分鐘路程外的吉野家，途經今早新聞提及57歲外婆狠心勒死6歲患過度活躍症的外孫的案發酒店，不過沒有被影響心情。來到吉野家，發覺沒有置放早餐餐牌，叫了一客牛肉烏冬+熱茶。…Read More

唔係佢，我都未必有機會喺間餐廳倖存期間試到佢哋嘅美食。講少少呢位餐廳嘅 marketing director喇。。 話說有日 lunch time 喺駱克道覓食，忽然耳邊傳來（其實唔記得左內容，話記得都呃你喇。。總之係落力推介），只見路旁坐住一位大嬸姑娘，右手高舉宣傳紙牌，左手揸住疊傳單，話一樓就係，我唔知點解深深俾佢感染，而真係聽佢講上左去。。行上一層，原來只係 level M，要再上多層。去到餐廳門口上方掛住個 members only 嘅紙牌，唔知係唔係避免d咩牌照嘅原因咁做。入面自己搵位，坐低自己出去攞餐具，自己斟水。枱面冇menu，自己出去望完塊座地式餐牌，直接同收銀order食物，巡例問你飲唔飲咖啡，十蚊（咋），跟住俾完錢再行返自己座位等。lunch menu 最平嘅沙律 5x，其他大約都係 7x咁上下，每款都附送餐湯同沙律仔一碗。今次叫左麻辣手撕雞，70蚊。唔算有太大驚喜。麻同辣其實都未到位，都係鍾意食口水雞多啲，嗰啲起碼有個麻辣汁可以撈飯食，呢隻雞就係雞同醬融為一體，無多餘嘅醬汁留喺碟上。但如果你唔當佢係麻辣雞嘅話，佢味道其實幾好嘅，雖然未至於嘩wow嘅地步。食物加上地方舒適闊落，我會俾個笑臉。呢間餐廳我先後去過3次，食物暫時係keep得住嘅，只係發覺佢d menu變化唔算太大，今次食手撕雞都係因為之前menu好似唔覺有。最後，如果你係餐廳老闆，或者識得餐廳個老闆，記得好好咁獎勵下樓下嗰個咁勤力招客嘅市場部總經理啊。佢大可以hea做hea坐hea派hea講白逗人工，但佢為咗你地餐廳使出一團火。。啊…Read More