艾菲草's Profile

今日出開旺角，想食啲辣辣地嘅嘢，經過見到食咖喱就入去試吓。我叫咗個咖喱五寶麵，平時有食開辣嘅我，加咗中辣嘅辣汁。個麵一嚟到我已經覺得唔對路，聞落一啲都唔香，食落更加係一啲咖喱味都冇…除咗豬皮本身吸咗咖喱汁外，雞翼、魚蛋、連麵筋都勁淡，可以話原汁原味。至於個中辣嘛…連譚仔個10小辣都不如，得啲啲辣，好多枱都問阿姐拎咖喱汁加辣，拎到咁上下，阿姐直頭每碗麵都派多碗咖喱汁…但個咖喱汁好鬼出色！得辣油味，冇咖喱味！仲話喺澳門做咗幾十年…等我仲以為過江龍有幾勁…真係試一次就夠喇……Read More

新年冇團拜，變咗提早慶祝情人節，冇計喇，第五波來勢洶洶，有得食好食喇。今年老公好有心思，搵咗間新開嘅居酒居，有好嘢食之餘，仲有好多自家製嘅特色酒。未食嘢之前，先有杯Wellcome drink，蝶豆花酒好靚呀我改咗佢個名叫紫晶酒。先嚟個喜壽燒二人前，和牛雪花均勻，入口鬆化，但估唔到最大驚喜係隻蛋，好有蛋香，真係靈魂所在。我一定要介紹佢隻蛋！豚肉白湯烏冬好似好簡單，但個湯真係好鮮甜濃厚，我哋無浪費㗎，清晒啲湯。呢個帆立貝啱晒啲芝士怪。牛舌夠厚，口感十足。呢個揚黑豚肉係我最愛，外層香口裡面juicy。燒鰻魚新鮮彈牙、勁好味。諗住叫豬頸肉，點知睇真啲係雞頸肉，咁稀有一定要叫喇！果然冇令我失望，好食！和牛就唔洗講喇，yum yum!嚟得居酒居點會唔叫酒呢！呢度啲酒好特別，如果唔係要揸車，我哋真係想試多幾杯。老公叫咗杯「十侍之森林」，貪佢個名夠威喎～結果係我飲多過佢飲，因為我好鍾意佢個柚子香味。我就叫咗杯Vedre，睇賣相都知好啱女士，個味好清新好提神（雖然我知咁形容酒好怪）。今次叫晒啲啱我自己口味嘅酒，真係唔好意思，鬼叫傻瓜明知去居酒居仲揸車出嚟咩，無得飲唔關我事。飲住酒唔覺唔覺食咗好多嘢，走嗰陣要捧住個肚走。希望個疫情快啲過喇，我好想約班姐妹去多次飲嘢吹水。…Read More

因為沙中線工程嘅影響，土瓜灣一帶變了天，好多商舖都結業，幸好哥登堡仲喺度。一坐低，侍應哥哥就推介牛柳鐵板餐，仲話唔好食可以退錢，咁有信心？我就真係點左黎食，另外再叫多個焗肉醬意粉餐。呢間餐廳嘅侍應真係好快手，又不失禮貌。我落完單轉個頭就即刻有湯飲，羅宋湯比較杰身，味道濃郁，另外餐包暖暖地，亦很軟熟，好味！重頭戲牛柳有成吋幾厚，肉質淋滑，剛剛好5成熟，堅係出色！唔怪得侍應咁有信心！肉醬意粉好夠醬，味道豐富，加上少少烤焦嘅芝士，真係大滿足。最後仲有餐飲同甜品，食晒成個餐真係飽到上心口！…Read More

麥當勞又出新嘅signature喇！今次出手撕雞安格斯漢堡，又雞又牛又蘑菇，好似好得wor～加錢仲可以換黑松露風味薯條，貪新鮮試埋佢！俾大家睇睇先，呢個係廣告照，係唔係好吸引呢～d手撕雞多到～但係現實中我個包係得一條手撕雞！有冇咁過份呀！搞到我以為俾左個蘑菇安格斯我！上次食漬物蝦堡又係，得幾條漬物，完全食唔到果種＂原來同漬物係咁夾㗎＂嘅感覺。但撇除冇雞之外，個醬有少少微辣，係幾好味。咁個薯條呢？登登登登！呢pat野就係黑松露醬，賣相依然hea爆，但最大問題係唔似黑松露，反而似平時食豬肋骨嘅煙燻醬味⋯睇黎signature都係食返蘑菇安格斯最穩陣。…Read More

平日少吃炸物的我，突然心血來潮，吃炸雞吧！我只在韓國吃過這間炸雞，登陸香港這麼久卻沒吃過⋯帶著一歲多的寶寶出門，已經打定輸數，可能要抱着她吃飯，來到之後才發現，原來有BB椅哦！太感動了！我6點入座時有很多空位，以為熱潮已過，到6:30時已經坐滿了，所以想吃的請早點來。來這裡當然要點炸雞，本來想點辣醬炸雞，但侍應姐姐說這個很辣，便改了甜辣，拼葱味炸雞。雖然炸雞有泡蘿蔔伴菜，但我不想整餐全是肉，不過menu上的菜就只有2種沙律，一個是牛油果豆腐沙律，另一個則沒有牛油果⋯無得揀之下，還是點了來吃。本身不太愛甜辣炸雞，不過老公話要食就算了，果然吃了兩口便覺得滯。葱味炸雞基本上是原味炸雞加大葱絲喺面，而葱絲亦沒什麼味道，根本是多餘的，反而跟葱味炸雞的汁不錯吃，似日式沙律汁加wasabi的味道。而炸雞本身就中規中矩，淋身但不juicy。沙律其實冇咩好講，沒技巧可言，只係唔明白點解會有2塊炸包，可能係俾陪朋友食飯嘅素食者當正餐。但係呢個有咁多罐頭材料嘅沙律要索價過百，真係太過份喇⋯而且仲俾左舊發黑嘅牛油果我，如果唔係想食得均衡少少，真係唔會叫。梳打玩gimmick多，不夠氣，果味淡，唯一好處是不會過甜。總括而言，過下炸雞癮可以，専程來等位吃就免了。…Read More

今日試左呢間餐廳，諗住喺呢區排名都幾高，點知完全係中晒伏！我叫左2個餐，再加份薯仔沙律。薯仔沙律份量唔少，我諗都有成個薯仔。不過味道好一般，切得太大粒，沾得好少醬，有煙肉嘅咸味，冇沙律味⋯跟餐有個牛角包，佢冇呃你㗎，佢唔係一個牛角酥，所以唔好期望會有一層層嘅酥皮，佢只剩返最深底果層包。餐湯係南瓜湯，正正常常普通貨，係衰在有好多一pat pat嘅cream/粉。黎到主菜喇，叫左個肉眼扒，我叫5成熟，結果黎左塊煎得好唔平均嘅扒俾我⋯重點係呢塊扒起碼8成熟，其中一邊更加係全熟。我唔想浪費食物，所以都照樣食左佢，不過大廚真係要惡補一下，通常去d街坊餐廳，叫5成變7成都算，差唔多全熟真係好過份。諗住扒類失手，意粉應該ok喇，點知呢個先係最伏！呢個意粉帶住淡淡嘅羅勒清香～冇錯呀！真係淡淡！呢個意粉係冇味㗎！我諗除左果少量嘅羅勒醬，大廚真係連鹽都冇落！蝦又用雪藏蝦，加上冇調味，我咬落去時完全唔知自己食緊乜⋯結論係，唔會有下次！…Read More

之前經過見到門口個burger menu好吸引，已經mark左要黎試下。今日去開尖東，特登行過黎食。我地2個人叫左牛油果醬雞扒漢堡同藍芝士煙肉安格斯漢堡,仲加錢轉左飲手工啤，同埋upgrade左個黑松露薯條。藍芝士煙肉安格斯漢堡Blue cheese味唔係好勁，平時食開嘅blue cheese係會濃到有陣芝士臭，但係呢個冇，blue cheese獨有嘅粒粒亦唔多。鍾意果陣芝士臭嘅朋友可能會失望，但係對芝士冇特別喜好嘅人，會覺得幾香。安格斯做嘅漢堡扒中規中矩，唔會乾，但咬落唔會有好多肉汁。套餐仲配黑醋沙律，一齊食可以清一清味蕾，係唔錯嘅配搭。牛油果醬炭燒雞扒漢堡呢個雞扒真係不得了，好厚，又勁多汁！我好貪心咁加左個大烤菇，結果個包高到咬唔到，要咬完個頂再咬底⋯雞扒雖然厚，但配左牛油果醬，味道好清新，食完都唔會好膩。唯一美中不足係完全冇炭燒味，改下個名會好d。其中一個餐轉左黑松露薯條，d黑松露唔係醬，而係係一粒粒咁，好乾身。好處係唔會整淋d薯條，但係壞處係掛唔上薯條，所以d薯條冇乜黑松露味，反而食完就見到d黑松露粒粒跌晒落底。套餐加$25仲可以轉飲手工啤。我見個table stand寫住beer of the month,應該會間唔時轉第二種啤，每次黎都有新野試，感覺都幾好玩。其實呢間餐廳仲有好多選擇，我見隔離枱嘅扒同意粉都好唔錯，下次會再黎試下。…Read More

呢間泰國菜館同隔離馬來西亞菜館其實係同一間舖，所以貪心嘅人有福喇，兩邊menu都order得，不過我目的係泰菜，所以冇試過馬拉菜好唔好食。青咖哩雞好食，咖哩汁香甜，雞同茄子都幾多。馬拉盞炒椰菜苗，椰菜苗冇苦澀味，不過偏咸。菠蘿炒飯好大個，勁多肉鬆，飯夠乾身，唯一敗筆係用左雪藏蝦。蒜蓉包好夠蒜蓉牛油，香脆得黎唔會成塊乾晒，幾惹味。整體黎講都唔錯，不過調味有d重手，咸左d，但都係可接受範圍。價錢街坊，最後仲送左舊椰汁大菜糕，幾抵食。…Read More

沙田友想食乳鴿，問過身邊d朋友有冇推介，幾個都推介津津，住左沙田咁耐，食過咁多唔同地方嘅乳鴿，係未食到去火炭，見都近近地沙田，就一於去試下。我7點前已經到津津，所以人唔多，可以㨂帳篷裡面或外面，坐外面都頗多人食煙，所以唔想食二手煙就記得坐裡面喇。我地得2個人，所以好多野都試唔到，點左一隻乳鴿、雞粥、炸大腸同蒜蓉炒豆苗。乳鴿偏細隻，不過亦因爲未大晒，d肉好嫩好多汁。老闆娘仲好熱情咁走埋黎教我地點食，佢話乳鴿分半好喇，切4件會流走晒d汁。果然，一撕開隻脾，d汁好似小籠包咁流出黎。（食得太快，冇影到相）之前見其他食評話個雞粥唔好食，我都有d驚中伏，不過為左同其他舖比較，我都叫左黎試。煲粥都幾大粥，夠4個人食，粥底好甜，唔似之前有食評咁講似咸雞粥，比起大圍某間所謂出名粥雞好食好多。炸大腸好脆好乾身，配山楂汁中和油膩感，不過我都係鍾意一圈圈果種肥腸，呢個一片片咁唔夠咬口。蒜蓉炒豆苗好滑，咁當然係多油先咁滑喇，自己衡量喇。食緊果陣見到好多枱都有叫椒鹽鮮魷，大大碟又炸得幾靚咁，好想食但食唔落，唯有下次再黎試。…Read More

下午出左尖咀行，諗住食少少野，夜d先食晚飯。行過厚福街見到有幾間甜品舖，呢間明顯冇乜人，不過隔離主要食冰，我大緊肚唔食得，所以揀左呢間食窩夫。入到去坐，個女侍應放低左d餐具就失左蹤，我地坐左好耐都冇人黎落單，收銀位個哥仔又坐定定，唔理舖面，搞到我以為係自助形式買野食，直到我地行出去收銀落單，個女侍應先閃返過黎，原來佢去左吹水⋯好喇，講返d甜品，棉花糖雪糕吐司基本冇咩難度，正正常常又冇咩驚喜咁囉。士多啤梨芝士窩夫都不過不失，士多啤梨雪糕有少少酸味，整體味道都算平衡。可惜食多兩啖就覺得好甜，想問侍應拎杯水中和下，佢竟然話佢地冇水㗎！OMG！想逼人點飲品都唔係咁掛，我食個咁甜嘅窩夫，仲要我飲甜野？！食到中段我已經分唔到自己食緊乜，只有一個甜字⋯果日間舖嘅老細一定唔喺度，事關d侍應成日玩失蹤，又勁玩電話同吹水，當d客透明，我係老細一定炒鬼晒佢地。…Read More

中午食完飯口痕，於是同同事去左食糖水。本身想試第二間嘅，可惜果間裝修緊，雖然天后有好多甜品舖，但係中式糖水唔係間間有，冇咩選擇吓就黎左天后甜品食喇。我地叫左芝麻糊同桑寄生蓮子蛋茶，個桑寄生蓮子蛋茶望落色水唔錯，好似好濃咁，不過事實上係好濃嘅糖味，超級甜，但係冇咩桑寄生味，我食晒d蓮子同隻蛋就停左手，寧願浪費都唔想糖尿病。芝麻糊亦唔見得好好多，我同事都話係超甜，佢食左一半都頂唔順放棄左。雖則話糖水係應該甜嘅，但係點都有個限度丫，我以後唔會再搵條命博。…Read More

本身係沙田人，沙田d餐廳都差唔多食到爛，見呢間韓國餐廳喺openrice排名幾高，而且開左咁耐都未試過，就決定去見識吓。1.菠蘿冰唯一正常嘅野，原個菠蘿上，自拍一流。2.原味炸雞Menu上推介食原味，所以我都有d期望，炸雞表面都算乾身，脆度一般，肉汁欠奉，肉質都叫軟滑嘅⋯不過真係好一般，以為原味會有佢獨家嘅調味，但係除左咸咸地，真係食唔到有其他香料，真係唔值得推介。3.泡菜煎餅呢個勁呀！脆過炸雞！似食緊好厚嘅薯片。煎餅本身冇咩味，所以有碗豉油跟上，但係點左豉油又只係食到豉油味，完全唔知自己食緊d乜。4.春川炒辛辣雞呢個雞係最不知所謂嘅一樣野，首先阿姐拎左一個窩出黎，裡面有雞、雜菜、粉絲，雜菜起碼佔半窩，粉絲份量都好多，雞得好少，最精彩係d水多到不了，完全唔係我認識嘅春川炒辣雞，唔講真係以為自己叫左雜菜粉絲煲。最好笑係煮到一半時，阿姐知道太多水，走去拎隻湯碗黎裝走整整一大碗水（圖中嘅炒辣雞已經係裝走左水，不過都仲係好多水），裝走辣湯後，阿姐又怕唔夠味，拎左支辣醬黎加落去⋯第一次見咁亂黎嘅炒辣雞，呀！唔係炒，係水煮！因為太難食，我冇食晒就走，轉場去第二度食糖水。真心唔明點解咁多正評，屋村食店黎講真係偏貴，又做唔出水準，仲要只收現金，完全唔值得再食，冇下次！…Read More

車公廟站附近一向冇乜野食,秦石邨d餐廳又出名難食,呢間魚米家都係冇選擇下嘅選擇。我叫左“家常豆腐”同“三杯酒炆雞球”。家常豆腐普普通通,有少少蔬菜燴返d炸豆腐,豆腐都滑嘅,不過d豆腐炸得唔多好,好多都散開幾舊。三杯酒炆雞球完全貨不對辦,menu中的葱頭,紅洋蔥通通消失,味道亦不對味,明明係三杯,但係個汁嘅味同豆腐嗰個汁係一樣嘅…下次黎魚米家,我都係唔好對d小菜咁有期望……Read More

行完姨媽傢俬有d肚餓,見呢間餐廳開左一排都未食過,於是入去試下。叫左個雪糕多士同炸雜菜條。雪糕多士材料豐富,香蕉同朱古力永遠都係最夾嘅組合,加埋綿花糖,都幾好食。成日食薯條冇咩新意,所以order左雜菜條,點知中伏,由於每種蔬菜需要炸嘅時間都唔同,好明顯師傅未掌握到時間,基本上只有炸芋頭係叫做正常,其他雜菜條都係又淋又濕,最核突係南瓜,只可以用一pat野黎形容。呢間集團式嘅餐廳有好多分店,平時我都有食開,咁難食都係第一次,希望遲d會有改進。…Read More

呢幾日個胃都唔多舒服,所以要食得清淡d,食粥就最唔傷胃喇。呢間心粥館同魚米係相連嘅,所以2間舖嘅野食都叫得,選擇都幾多,當然我都係叫左粥食。叫左肉丸粥,鯇魚腩粥,齋腸粉同鹹肉糉,共$99。先黎左個糉,味道正常,如預期中冇料,有一粒咸蛋黃同一舊肥豬肉。之後黎個腸粉好硬,好明顯係買現成嘅返黎蒸下就算。講返2碗粥,冇味精係好,但係好似連鹽都冇落,d粥同d材料嘅味好分開,真係說不出嘅古怪味道。最後要提嘅係呢度service真係好差,除左個收銀,其他侍應成日全部唔見人,走晒去後場,然後舖面仲要聽到傾計講笑聲。我入左去坐左好耐都冇人理,店裡面好幾張枱都冇人清理…我仲聽到後面枱客話個阿姐扮睇唔到佢叫落order…呢d真係扣晒分。…Read More