skyhank's Profile

網上彈咗連續四日七折優惠、即刻訂枱食星期日夜晚時段4:30開始。去到午市啲人都未走，明明食評有泰式豬牛雞串燒但係佢話新Menu已經冇咗 ⋯ 煲仔飯手撕雞同埋雞煲都係已經走入歷史如果為咗呢啲嘢就唔使去。冇所謂啦照入去食、優點係三個人都可以一人一鍋即係三個湯底。泰式冬陰功同埋泰式椰汁雞湯都算係比較特別、豬骨湯就好似出前一丁味，叫咗個C餐其實啲肉都OK靚仔。不過出邊啲熟食真係出晒事、可能太早入座除咗隻海南雞係全份放咗喺度。其他熟食基本上係餸頭餸尾、仲要差唔多係六點先開始整出嚟 ⋯ 眼見有菠蘿炒飯、泰式咖喱（點知係魚蛋）同埋另一個見到都唔知係乜嘢嘅熱食。出面啲丸類有啲唔係太新鮮、菜就應該冇乜洗過特別係西洋菜勁多騎哪！飲品就做到足除咗罐裝亦都有泰式奶茶嘅 ⋯ QR code 落單嚟到啲小食全部都孜然味重，完全係大陸 feel 零泰國味道。甜品生果大約五點半先開始擺盤算係最好食嘅、泰式沙律鳳爪嗰啲就非常辣。終於有返啲泰國嘅感覺！最後講埋任撈海鮮、佢唔係大頭蝦而係平時街市嗰啲草蝦同埋蜆，初時落單的鮑魚全部都應該係雪藏貨完全食唔落。好慶幸係七折嚟食否則一定覺得唔抵！環境舒服好坐嘅因為佢完全唔會爆場、應該係亞太中心星期日唯一一間半場都唔滿嘅餐廳。…Read More

平時食開 Lunch 88 越食越流、今次情人節試吓夜晚火鍋 C 餐放題 $328 ⋯ 情人節仲有九折（即係免左加一）同埋送特別雪糕。估佢唔到六點幾已經八成滿，食完嗰陣時仲 Full house 有人等位！今次叫咗「花雕蜆鮮雞鍋」一坐低好快就上、不過得個咸字 ⋯ 蜆就得四隻 😂 呢個湯底麻麻哋，而且越打越咸所以大家可以試吓其他鍋！出去攞小食 ⋯ 夜晚都係春卷咖喱角麥樂雞、但出現咗生煎包、茶葉蛋同埋好食既蛋餅。而且有我鍾意嘅素鮑片同泰式鳳爪！果然係夜晚貴啲多選擇好多。返到位用 QR code 落其他小食同肉類、講真真係光速送上。每次都唔使等五分鐘已經到 ⋯ 鹽酥雞炸魷魚雞軟骨都 OK、炸花枝丸好一般仲有一個炸蝦卷好似未熟，所以掉咗落去打邊爐。佢啲牛肉都唔錯、海鮮就一般 ⋯ 沙白大大粒但好咸，唔知係咪因為我個湯底咸。蝦有時新鮮有時梅但係可以任叫打和！出面拎返嚟既貢丸或者牛丸或者豬肉丸我都覺得一般般。牛柏葉 牛肚 全部都好 un、仲有一個牛骨髓唔係我杯茶！不過就算 Full house ⋯ 佢啲位都真係好坐冷氣夠凍，最重要係個個員工都好有禮貌好客氣、呢間嘢員工態度好過食物。最後甜品揀左是日精選 ⋯ 係韓式魚形三文治、大大件紅豆加雪糕好甜好好味！埋單$328一個人好鬼飽、座位同埋員工我會比一百分 ⋯ 食物就65分、同埋出面嘅糖水得返番薯糖水，我最想食白色西米露又係失左蹤。…Read More

啱啱開張嗰陣時去食、同今日年初三人流都係差唔多 ⋯ 咁當然食返一樣嘅午餐$88、但係上次碗麵勁淡口所以今次揀咗7號脆皮雞扒飯。首先攞出邊嘅嘢食、12點嘅時候係多嘢既 ⋯ BUT 以前有嘅花枝丸、甜不辣、炸番薯同埋滷水雞翼全部失蹤！而家變咗炸春卷、咖喱角、薯角、炒菜、炒飯、魚肉燒賣同埋一個唔好食嘅韭菜餃。好明顯台式不再 ⋯ 不過新年有素鮑片、蛋餅變咗得返塊皮又乾又凍，連茶葉蛋都冇左。攞咗醬料等陣送飯、出面啲小食基本上微暖而且多數唔好食 ⋯ 出面個滷肉飯得返好少滷肉全部都係油，拎咗一碗算係最熱。脆皮雞扒飯到啦、五舊雞扒一啲台灣風味都冇 ⋯ 旁邊嘅滷肉飯同出面一模一樣，雞扒冇味係出面啲粉比較脆、呢度嘅主菜真係唔得！到咗甜品環節 ⋯ 之前食過一個好似椰汁西米露我記得好好食、仲可以自己加紅豆同埋仙草。今日變咗番薯糖水即刻跌 watt、仲要又係微溫 ⋯ 加埋紅豆同埋仙草變咗凍食，我見到有幾隻雪條同埋椰子雪糕、但係個雪糕勁難筆硬到飛起。呢間嘢繼續好坐員工態度好 BUT 嘢食跌曬 watt 雖然價錢一樣 ⋯ 但係越做越差、出面啲小食你睇得出佢 Hea 到不得了！靚靚裝修有啲浪費！…Read More

經過幾次見到夜晚火鍋好似幾貴、今日中午經過見到午餐 Menu $88 一個人再加一！揀一款麵或者飯，入座限時 60 分鐘出面啲小食同埋甜品任食。裏面啲位都幾好坐、但係12:30都冇乜人 ⋯ 我估十個客都冇唔知佢可唔可以維皮，但係裏面啲 Staff 全部都有禮貌既。坐低就可以出去拎小食，有花枝丸炸甜不辣好似仲有鹽酥雞( 拎到一舊）同埋一堆炸地瓜炸薯條等 ⋯ 最後仲有一個蛋餅同埋茶葉蛋。講真啲小食唔夠熱、不過醬料任抖後尾可以用來配牛肉麵食，蛋餅凍左但係裏面啲料好食。嘢飲有花茶、港式包裝飲品、罐裝汽水等，仲有台灣蘋果西打同黑松沙士。食食吓小食蕃茄牛肉麵到 ⋯ 大大碗望落去都多料，不過湯頭好一般冇乜味，牛筋牛肚都有不過有一舊牛腩勁 un 咬唔落、碗麵只可以話一般。最後去食甜品 ⋯ 嗰個熱嘅芋圓西米露出乎意外地好食，仲有雪糕雪條、埋單$97都算滿足。…Read More

十月嗰陣外國返嚟已經覺得奇怪，點解冇咗條長龍喺門口 ⋯ 入到去雖然格局一樣但係班人完全生面口、冇咗以前一家人同你有傾有講嗰種感覺。——————嗰日買左碗三餸銀針粉、D staff 夾餸好似機械人咁完全冇靈魂 ⋯ 牛腩我覺得同以前差唔多、冬菇蝦條亦都冇乜分別，有落唔辣嘅沙嗲醬同蔥花。都算對得住$42三個餸連埋凍飲！——————今日 11 月 23 號中午12點去、員工仲多過客。堂食得兩個人 ⋯ D 餸 presentation 好似差過 10月嗰陣時而且個醬唔湯唔水咁有啲怪！食落去其實唔差但碗車仔麵好似冇咗靈魂咁，的確係冇以前咁「回味」…Read More

本來俾咗訂金終於訂到年廿八 Dinner Buffet、點知又停晚市！好彩可以改到年廿七星期六 Brunch Buffet，但係臨近新年同我原本晚餐差唔多價錢 $638 加一。⬇️準時入座門口甜品部已經好大浸榴槤味，多數啲枱都係一齊坐枱與枱之間其實都好近。攞嘢食嘅地方就集中晒一齊所以拎嘢食就唔算好迫、坐就一般舒服！如果係兩個人多數膠板隔開咁上下傾偈隔離一定聽到。⬇️講真我同朋友都覺得有少少 over-priced、可能貴在任 Refill sparkling wine 定唔知係 Champagne … 但係我哋唔係好飲，雖然有橙汁西柚汁同埋竹蔗茅根任飲、但係唔會飲得好多。⬇️海鮮類亦冇龍蝦冇麵包蟹，有生蠔有小龍蝦同埋我最鍾意嘅長腳蟹同蜆呀青口咁。頭兩輪我食左好多長腳蟹好味既、點知臨走前再食多一轉喊到阿媽都唔認得！魚生都新鮮好食，生蠔都OK不過比較細隻。⬇️沙律水果風乾火腿乜都有但係冇乜驚喜、哈密瓜連埋皮配風乾火腿又有啲煩，不過西瓜好靚起晒沙好味。熱食方面中式響螺燉湯係好飲好甜，仲有一個西式海鮮濃湯似龍蝦湯但就冇乜海鮮喺裏面（自己用凍海鮮加入去食 😂）。⬇️我以為有鴨肝或者北京填鴨但見都冇見過、燒牛肉同羊架都算好食。有一個海鮮粥好似加咗勁多雞湯定唔知味精咁、又係冇乜海鮮既，最後喇沙都唔錯但好普通。⬇️講真全部員工態度都好好、由接待到收碟加水 Refill 香檳全部都好親切，就算係攞食物嗰邊啲廚師都好好禮貌！另外榴槤甜品獲得屋企人讚賞、佢哋話特別係個榴槤蓉好好食。我自己就唔食榴槤所以冇乜掂甜品。⬇️呢間 buffet 想食好耐、又要提早訂又要落訂金而且某啲大日子仲會安排喺 Ballroom 食，訂枱嘅時候喺網頁記得睇清楚、但係三個人食咗二千幾除咗坐得耐冇乜其他想返轉頭嘅衝動。…Read More

今日勁肚餓、11點45分去到新城市。喺春水堂同天天兩者之間做決定，後尾都係選擇食平時都幾多人既春水堂！⬇️12:00開門已經有幾個人排緊、不過密密入座。而且好彩嘅兩個人坐到四個人枱唔會太逼夾，不過落左單食到一半已經見到門口有人龍、所以12:00入座就最化算！⬇️朋友話如果叫麵食可能會唔夠飽、所以我就叫左大大份鹽酥雞翼滷肉飯便當。而佢呢因為女仔就叫左XO醬辣拌麵，另外大家一齊 Share 黃金香酥雞一份！⬇️大家都叫做愛玉檸檬綠茶、$35但係都幾大杯幾好飲！⬇️拌麵先到，講真真係唔係好大 ⋯ 不過啲XO醬都幾香而且有啲肉粒、如果你肚餓應該唔飽。⬇️便當跟住就到、其實我鍾意食鹽酥雞多啲 ⋯ 但係鹽酥雞嘅便當就冇滷肉，為咗滷肉飯所以叫雞翼便當。基本上除咗三隻雞翼同埋少少滷肉，個便當就有大量嘅菜、兩格都係高麗菜 ⋯ 冬菇小棠菜全部都係淡淡地。始終雞翼冇黃金酥雞咁好味，不過食完真係飽嘅！⬇️黃金酥雞都幾好味但係小心佢上面有辣粉真係幾辣、據聞地瓜條都好好食。兩個都係推薦！仲有便當跟咗一碗貢丸湯、個湯係完全冇味 ⋯ 貢丸都OK。⬇️兩個人 Lunch 未去到三百但好食好坐、如果想傾偈耐啲咁可能要去佢隔離嗰間超級三文治啦。…Read More

YouTuber 介紹呢間 $498 加一有火鍋有大閘蟹任食但係就兆萬 😂 死唔順伏去左食。⬇️訂枱電話長期唔聽、最終搵到個9字頭號碼訂到枱食4點鐘( 因為可以坐到7點 )。上到去見佢哋一時聽電話一時由佢響 ⋯ No wonder⬇️準時上到去不停話訂左枱佢都話自己揾位坐、隨便坐 ⋯ 因為怕迫寧願坐入D，明明 YouTuber 係坐卡位但原來食大閘蟹你坐唔到卡位。因為蟹要自己蒸，卡位得一個爐你剩係蒸蟹就唔洗火鍋囉（果然 YouTuber 贊助係唔同D人地蒸俾佢食同拍片 )、咁就要坐返佢平時兩個爐頭既枱。⬇️坐低左叫你揀湯底就乜都冇講、好似當你熟客乜都知道咁。好啦揀左花膠雞鍋，個哥哥仔落左單又不停問食唔食雞煲 ⋯ 見枱面有兩個爐頭就問可以食埋雞煲架？佢答你究竟要食花膠煲定雞煲呀！妖 ⋯ 我真係好亂，之後又放底個蒸鍋、原來食蟹要自己蒸，另一邊要留返火鍋用。唔明佢狂問我地食唔食雞煲做乜 🤷🏼‍♂️⬇️跟住個哥哥就放四隻大閘蟹落蒸爐、叫你自己計時廿分鐘，但又唔教你點用個爐原來要開大火、好彩有個女既員工 Nice D 敎我地。佢上埋花膠煲裡面有半隻雞，即場幫我地剪埋再煲多陣。個湯係甜味道唔差、因為我麻麻大閘蟹所以自己 QR code 加單開始火鍋。⬇️第一輪蒸蟹夠鐘、自己上碟但原來要話佢地知等佢地再拎四隻俾你自己蒸，其實佢哋應該講解下流程 ⋯ 初時食真係一頭霧水！大閘蟹第一輪有羔但唔算多，味道一般般，去到第二輪又好似大隻 DD 羔多 DD 咁。交剪手套同浙醋佢地都有提供 ⋯⬇️之前介紹有天婦羅可以叫、一早落左終於黎。好厚粉好厚粉，唔可以話難食但又唔係好食 ⋯ 而且冇汁冇醬乾食好難頂、出面有任拎汽水同雞腳或者咖喱魚蛋，魚蛋係好食既、仲有個拍青瓜一味係辣。⬇️至於火鍋 ⋯ 啲嘢都好快上，有蝦有肉有是日海鮮（四隻蜆）、果啲蜆啖啖沙 ⋯ 係我人生食過最多沙既蜆而且超咸 （ 全部吐返出嚟）而蝦望落唔差但唔知係咪雪完又雪，係冇乜鮮味！至於肉、一般肥牛都冇乜味但牛肉粒就好食D似新鮮貨，最差就係個火鍋豉油一味得個咸字。⬇️最後大閘蟹都食到四輪16隻、如果正常計就可以每人8隻但真心細隻。啱啱好兩個鐘頭我哋就冇蒸落去，我相信你食到可以繼續 ⋯ 朋友對於蟹嘅形容詞係「一般同OK」但問佢會唔會再去、佢就話未必！⬇️至於係咪真係可以食到7點、又真係大把吉枱佢冇趕我哋走。但坐低咗個半鐘個 QR code 就會自動截單令你落唔到 Order、但你同班姐姐講佢哋都肯人手幫你上你想要嘅野。$498 再加一冇隱藏消費，但就欠缺資訊教你點落單點 Self service。出面有清一色同一個牌子嘅雪糕 ⋯ 試咗伯爵茶都OK香、至於我自己就食完餐飯肚痛（不過我腸胃一向差嘅），痾左兩三次就冇事不過我係冇乜食大閘蟹。⬇️而我食大閘蟹嘅朋友就冇肚痛 😂 所以蟹係安全既。講返嗰度嘅座位 ⋯ 如果四個人一齊坐都有啲窄而因為唔係卡位其實麻麻地好坐，而且係你面前蒸蟹其實都有啲熱、最搞笑係佢哋冇提供垃圾桶俾你 ⋯ 我哋係自己用火鍋料個盤去裝大閘蟹拆出嚟嘅手手腳腳、可能半個鐘先有人收一次咁。早食冇乜人都 OK，走嗰陣七點都唔算多人 ⋯ 去唔去食就自己諗啦！…Read More

今日飲茶去到 I square 廿六樓拎飛、等咗幾張枱就到但係佢叫你落廿五樓同集團嘅酒樓開枱。⬇️環境真係唔錯、平時應該係做宴會或者婚宴不過係細細個場地 ⋯ 樓底唔算高，但係冷氣抽風唔錯。就算差唔多全場爆都唔覺得侷促！⬇️兩個人叫咗一碟炒鴛鴦米、另外加咗三樣點心，茶位每人$15。鴛鴦米炒得好乾身好多料$98真心覺得好味抵食，仲食剩要打包做晚餐！⬇️鮑魚燒賣$35三粒大大粒一啖一小鮑魚、新鮮熱辣。⬇️千絲春卷$33脆卜卜嗰啲千絲好好味。⬇️最後流沙包新鮮蒸出嚟$30真係流沙要小心食。⬇️加一埋單$251、起碼唔會逼你食一碟花生酸菜。環境好坐得舒服，炒粉麵真係抵食好味記得要叫！…Read More

第一次喺將軍澳食海底撈、佢個位置係商場一樓盡頭轉角位都要少少時間搵。11點半入座安排窗邊位置卡位，兩個人黎講真係坐得舒服。⬇️跟住有個叫君君既侍應好有禮貌咁介紹午市套餐、無限暢飲$15一位有甘桔、酸梅湯同埋無糖熱豆漿。揀咗兩客午餐 Set 都係牛小排、之後揀兩個拼盤！湯底就要另外每個加錢，揀左大骨湯同蕃茄湯、每個湯底$32-34。⬇️朋友想食滑牛肉另叫、君君仲提醒我哋有會員積分可以免費換，咁就慳返$49。午市套餐包左出面三款水果同三款涼菜任食，其實你一坐低佢都會整一碟俾你。出面仲有一個雞肉菇菌湯但唔夠熱唔好飲、另外有一個糖水就冇試！⬇️湯底嚟到幾好飲、蕃茄嗰個好濃仲有新鮮蕃茄粒。大骨湯就感覺好化學味，但係用嚟烚菜同肉就冇蕃茄湯咁搶晒食物嘅原味。⬇️牛小排、滑牛同埋拼盤仲有出前一丁同滷肉飯都到齊。除咗拼盤嗰個冬瓜我覺得冇咁新鮮之外，其他嘢都唔錯可以慢慢嘆火鍋同埋傾計。⬇️順帶一提 ⋯ 佢哋好似有整指甲服務、亦都有叫我朋友 Book 體驗下結果我哋係第一個。不過佢出去睇完就冇整 😂 星期二 Weekday 黎完全唔會趕你走，因為間餐廳大冇人等位仲有吉枱！我哋傾傾下埋單已經坐左差唔多四個鐘頭。⬇️⬇️講真服務好、冇人等枱唔會趕你走又坐得舒舒服服。不過甜品就弱少少，每人一粒芝麻味雪米糯同一粒糖！埋單兩個人$407、如果你淨係叫一個湯底其實三百幾蚊就可以，另外醬料錢每人收$18不過佢哋唔會硬性人人都收呢樣嘢做得幾好。水果就剩係試左哈密瓜、另外嗰個係小蕃茄同好似係西柚 ⋯ 如果有西瓜就好啦！…Read More

朋友仔食開外賣幾欣賞、咁大家一齊試吓堂食。四點鐘仲有下午茶，但係得一個細細Don飯、我哋兩個都未食 Lunch 所以決定叫返「美人框飯御膳」每份$188加一。⬇️Menu 感覺幾吸引、可以揀兩個框飯！全部自己 QR code 落單，所以唔係上菜你都唔會點見到侍應。冇問題既，落咗單每人一份小沙律先、飲品都黎喇 ⋯ 咖啡係香既！⬇️兩份餐都一齊到、上面又有一個刺身沙律。連埋第一份小沙律都算幾多菜，麵豉湯唔係好啱口味 ⋯ 沙律就係沙律，上面有兩片刺身！兩份都揀咗唔同小食、天婦羅好一般而炸雞係比較好食。⬇️講返個飯 ⋯ 細細個糯米飯做底、上面啲料我自己覺得淡而無味，好自然想落豉油但枱面乜都冇。成份餐都唔知係咪因為健康為主、我自己就覺得好淡好一般，豆腐蟹肉都係淡口。⬇️本來自己冇諗過加甜品、但係我真係唔夠飽。一個本身加咗午餐$40加配甜品後上、我就加返原價$68抹茶紅豆糰子冰淇淋。⬇️甜品我覺得好食嘅 ⋯ 個糰子係熱辣辣燒返熱上面加返抹茶雪糕同紅豆、食完就真係飽晒啦！⬇️埋單五百幾、我就覺得可以有更好選擇。臨走之前見到佢地Set定晚市每個位一張Tissue Napkin … 但個姐姐跌咗幾塊落地、執返起繼續放喺位 😂 可能係正常事、但係我自己見到就衛生扣分啦。…Read More

今日(9 Oct )瞓醒就已經係8號波、本身已經book咗今日食早場$200一位再加一。打去問佢哋依然有開門仲早到有4:45pm開始，本身訂咗三個人臨時減一個變咗兩個人就一定坐返窄到貼住隔離既枱。⬇️去到走嗰一刻都係半場滿、都明白餐廳盡量留多啲枱可以做多啲 Walk-in但係你真係絕對聽到曬隔離左右枱嘅所有對話！呢樣嘢係比較美中不足。⬇️今日4:45入座去到6:30先Last order七點一定要離座所以打算慢慢食、拎咗出面啲小食同埋嘢飲食完先開始用 QR code 落單。第一次出面咁少人 ⋯ 蟲草花湯堅好飲仲有碎螺頭同好似花膠、冷盤就有青口同埋蝦仲有鴨胸同埋一大堆嘢，熱小食有蝦多士小丸子同埋雞翼。試左既都唔錯 ⋯ 但聽到隔離枱話唔知乜嘢有沙、唔知乜嘢好腥 ( 真係好近隔離個師奶好似同我講一樣 😂 ）。⬇️開始落Order榴槤炸彈勁臭但朋友不停再叫。天婦羅今次最新鮮出晒煙好好食、手卷亦都好食細細隻紫菜亦都脆有再叫！醉鮑魚好香、自己拎出面冷盤蝦整埋醉蝦好食到飛。雞軟骨如果可以選擇冇醬會開心啲。⬇️跟住叫咗少少刺身、講真最早呢個時間黎第一輪嘢食全部都正，刺身好新鮮既感覺不過嗰個唔知乜嘢海蜇唔好味好硬。⬇️之後先叫芝麻雞翼、燒海蝦燒菠蘿同牛舌 ⋯ 牛舌有啲un其他燒物都正常好食，今日嘅扇貝我覺得唔好食好彩只係每人叫咗一隻。第二輪開始天婦羅勁厚粉D嘢食開始跌watt、佢食物嘅質素好似有啲飄忽！⬇️食到六點已經甜品時間、佢哋亦都會叫你埋咗單先。繼續用 Tap and Go 都係要自己出去Cashier 俾錢，出面有熱嘅椰汁唔知乜嘢仲有好多蛋糕或者雪糕雪條。我食咗一隻馬拉芋頭椰汁雪條幾香，亦都食咗一隻阿波羅提子味雪條 ⋯ 佢嘅香味同廁所嘅香味好鬼似 😂⬇️$440 兩個人食飽飽 ⋯ 啲員工都幾有禮不過枱太近落錯咗兩三次野去隔離、同埋其實佢哋都冇乜漏單，真係建議食完一輪先再叫否則你張枱真係太多嘢會食得好急。⬇️6:30已經搭緊地鐵走人 ⋯ 原來8號風球佢哋都照常營業、好似話10號風球先唔開。不過佢哋 D staff 淨係可以坐的士返工 claim $ 真係辛苦晒，想食放題5/F呢間都會繼續幫襯既 ⋯…Read More

10/1 紅日就試吓App排隊拎二人飛 ⋯1:12pm拎A40嗰陣時先叫到A28、幾個字之後A30再過10分鐘已經叫到過埋40。10分鐘內出現可以補飛而現場佢已經叫到A48，唔知點解勁跳而啲人唔知去咗邊度！2pm啱啱好入座。⬇️佢可以散叫 Set 或者揀任食任飲放題、最後揀咗和牛任食有早割價$388加一任食90分鐘。基本上ABC放題嘅嘢都可以飲叫、全部用QR code而坐低會先上兩盤牛肉雞肉一口牛同牛舌俾你燒住先。⬇️叫咗一堆肉同沙律仲有牛角飯、都好食嘅但係唔知邊隻係和牛 😂 因為落 Order 嗰個唔係我 ⋯ 牛角飯冇我想像中咁好食。⬇️基本上 QR code 落單啲嘢唔使10分鐘已經到齊、就算紅日都唔覺佢哋慢。上枱速度係快到有點驚訝 ⋯ 係收碟收盤因為要等專人收碟員黎所以慢少少、但係佢一出現就會同機械車默默地狂清枱面上嘅碟同埋盤。⬇️海鮮淨係叫咗海老、啲蝦勁大隻。不過食到一隻個頭臭既 ⋯ 但都爽口！⬇️食咗一個鐘已經好飽、而且燒烤有啲熱好攰。戰鬥力下降，呢個時候燒下菠蘿非常好味 🍍忍唔住要 encore！⬇️過嚟叫你埋單嗰陣就會上一人一杯雪糕、係咖啡味同Summer berries & Cream。⬇️⬇️兩個人食咗八百幾、可以用消費券 Tap & Go 埋單！…Read More

新蒲崗廣場出面街鋪已經轉手咗幾次、今次由台式變咗日式餐廳！就即管試咗兩款午市便當 ⋯ 分別係D餐同埋E餐。⬇️上面係D餐、冷麵你要揀辣汁或者麻醬。配埋雜錦壽司$55一份唔包嘢飲！講真係好普通 ⋯ 啲壽司普通到好似食緊爭鮮但大舊D、冷麵雖然有麻醬但係感覺太乾。下面就係E餐，價錢$65唔包嘢飲！呢個餐比較好食、黑松露沙律醬撈埋魚生都幾好味，嗰個加州卷燒得幾香、玉子燒就比較普通冇乜味。⬇️性價比唔算高、中午12點幾都多人因為得三四張枱，外賣就可以提早落單自己去拎。仲有佢嘅外賣Wasabi太搶喉 ⋯…Read More

9/13 Staycation 包埋 Dinner Buffet ⋯今次就係因為想食長腳蟹所以揀尚廚。下面係平時嘅價錢：⬇️今晚海鮮有長腳蟹 螺 蝦 青口仲有生蠔、我淨係一心想食長腳蟹，一時超大隻一時又細細條 ⋯ 不過唔會太咸好好味、有時可以成條扯出嚟食，而且都會不停 Refill 食到飽。⬇️魚生都正常、不過吞拿魚有根定唔知係渣，其他壽司就乾爭爭特別係太圈。⬇️熱食就真係好少選擇、燉湯去到一半先開始有 ⋯ 出面就有一中一西湯任飲，同埋出咗一次鵝肝新鮮熱辣幾好味。試咗燒牛肉同埋一舊燒鴨都唔差、最後食一碗豬骨湯烚菜加丸丸就八成飽。⬇️甜品有 H 字頭雪糕、仲可以配埋新鮮整嘅雞蛋仔 ⋯雞蛋仔脆邊好味。仲有細細件蛋糕 芒果拿破崙 全部都幾好味、仲有見到豆腐花不過冇試！⬇️生日送咗一個 Blueberry Cheese cake 仔幫你點埋蠟燭不過冇名冇字小小心意。⬇️講真嘢食真係少過之前、好彩唔係 Full house 否則可能唔夠人搶 😂 佢有得自己沖凍檸茶同埋凍奶茶，不過去到一半已經冇杯、問極佢哋都 Refill 唔到杯。之後冰都冇曬 ⋯ 亦都冇再加、我唔知 Buffet 有冇包咖啡茶，但係冇晒杯俾人哋沖凍檸茶凍奶茶都幾搞笑。⬇️收碟嘅速度都快 ⋯ 不過侍應似炒散、所以好多嘢都唔知道、問佢攞餐巾或者濕紙巾都唔知係邊有，但係佢哋態度都係好嘅。⬇️如果冇長腳蟹我一定唔會黎、但係因為供應充足我已經好滿意。…Read More