要食什麼's Profile

要買到呢間人氣烘焙店嘅泡芙，真係唔容易架。每日有兩轉出爐時間，每次出爐嘅泡芙數量有限，好多時未夠鐘已經有人排隊等拎籌。 每人限買四個。 店家會每日在ig 公佈出爐時間同埋口味，今日朋友咁岩經過，買左個草莓乳酪麻糬請我食😝。以泡芙黎講，佢嘅外皮做得不過不失，冇咩驚喜，不過佢嘅出色之處在於，草莓乳酪cream 嘅味道清新，有天然嘅草莓味，粉紅色嘅草莓cream 當中有一粒粒白色嘅乳酪。 另一亮點係：佢真係有好大嚿麻糬！ 整個泡芙嘅底部都係！ 麻糬嘅口感十分討喜，軟糯有黏性，但又有點QQ嘅咬口，唔係珍珠要不停𡁻果種。相信大部份食客都係鍾情這種麻糬嘅口感。順帶一提，由於麻糬嘅分量足，所以吃完整個泡芙後十分飽肚😂…Read More

周日朋友聚餐，由於佢好鐘意食龍蝦，所以用OpenRice search 左呢間餐廳，用app訂位有7折（不過唔包龍蝦類食品），都算抵食。餐廳係樓上鋪，大廈外間有巨大嘅招牌，十分易揾。 餐廳有大量卡位，適合朋友聚會，坐得舒適。入去坐低後，見其他食客好多都點左石鍋烏冬，所以我都點左個叉燒溏心蛋烏冬配龍蝦濃湯，另外叫左個分享盤同朋友share。呢個石鍋烏冬相當有誠意，上枱時，石鍋熱辣辣，食客會閒到龍蝦湯不停蒸發出黎嘅香氣，烏冬十分煙韌，有咬口，食落好滿足，不過湯底經過石鍋嘅熱力蒸發後，變得相當濃稠，相當咸，我食完之後，都飲左兩杯水。 至於呢個分享盤，質素相當一般，相信大部分都係來貨炸熟就上碟，下次唔會再叫。 同場見到唔少人叫龍蝦包食，睇落唔錯，下次再去的話會試😂…Read More

超驚喜丶高質gelato , 絕對值得一試！ 周末咁岩經過西九龍中心，走到又熱又攰，便決定幫襯身邊這間不起眼嘅雪糕小攤檔。 佢有三款冰品選擇，分別是：雪糕、雪芭、gelato 。 雪糕係最平嘅， $10一球、$15兩球、$20三球。雪芭就每球加$5，gelato 就加$7。 雪糕攤檔本身提供免費試食，但係我一見到佢有開心果口味嘅gelato，已經不作他想，即刻叫一球試吓。一試之下，完全有驚喜，冇諗過街坊商場當中一間唔起眼嘅雪糕攤檔，會有咁高質嘅gelato 。 gelato 充滿住肉眼可見嘅開心果碎，顏色天然，入口有濃郁嘅果仁味，而且份量不少，下次經過絕對會再幫襯！ 相信其他口味亦會唔錯。 …Read More

由佢開業得一間鋪果陣已經光顧，一直至佢開分店都有keep 住幫襯，以往佢嘅酸菜魚煮得好好食，湯底唔會死酸，有魚嘅鮮味。可惜最近周末午市時段去，如常點了酸菜魚麵，發現雖然賣相一樣，但魚片用酒醃到冇晒鮮味，湯底變得十分酸及稠，味道令人失望。😓當日所見，餐廳經常接近坐滿嘅狀態，有本地及內地客，生意十分理想，可惜食物質素已不復當初，短期內唔會再食。 …Read More

Weekday 和同事黎左呢間cova食半自助午餐。 300蚊左右有自助沙律吧、主菜、飲品，加上環境舒適，待應的服務一流，在金鐘來說唔可以話貴。 可惜沙律吧的質素麻麻：煙三文魚唔夠肥美；餐包無甚特別；唯一值得讚的是沙律吧的生菜新鮮爽甜，而且各款食物都不停refill。主菜方面，選擇算多，當日我點了個mushroom risotto, 質素真的令人很失望，完全冇蘑菇嘅菌香，亦唔夠creamy, 而且咬落軟林林，完全做唔到risotto 應有嘅al dente。成餐飯最滿意嘅可能係結尾果杯咖啡...…Read More

鍾情濃湯底拉麵嘅朋友，呢間拉麵嘅湯底就絕對岩口味！ 🤤日本拉麵來講，豚骨湯最重口味嘅係日本池袋嘅無敵家，雞湯就係天下一品，而一幻絕對係蝦湯底之最。 週五晚上去，店內座位大概有20至30個，只有零星嘅客人，當晚試咗兩個拉麵，一個係店舖嘅招牌蝦湯拉麵，另一個係香港限定嘅特濃蝦汁叉燒拌麵。蝦湯拉麵一上枱面，已經即刻聞到好香蝦味，只係飲咗一啖成個口腔都有陣蝦味。值得一讚嘅係，佢有得選擇加入一定份量嘅豚骨湯底，令到成個湯底有比較豐富嘅口感。如果唔想個湯底太過濃稠，亦都可以選擇原味嘅蝦湯，唔加任何豚骨湯。至於呢個香港限定嘅特濃蝦汁拌麵，不試亦可，入口冇咩蝦味，而且比較油，真係食緊一個普通嘅叉燒撈咁，但係叉燒粒脂肪比例唔平均，入口好鞋。😓…Read More

週末嘅中午時段去到呢間蠔吧，可能時間都仲算早，成場得三兩台客。我同朋友分別叫咗兩個午市套餐，生蠔方面，當日有5、6款揀，我地由最少金屬味嘅開始食起。順帶一提，餐廳嘅Menu好細心，將蠔嘅味道由淡至濃上以下排列，方便食客選擇。由於同朋友兩個人都係鍾意食蠔，所以當日要嘅都係大size嘅0號。一共encore左兩round, 職員完全冇托手踭，服務態度良好。每一round 嘅蠔都洗得好乾淨，完全冇蠔殻,而且味道鮮甜，好新鮮！值得為咗食可以再去。講咗咁耐完全冇提到當日所食嘅午市套餐，係因為質素完全不值一提。😅所以下次再去只會食蠔，其他主食一概唔會考慮。…Read More

週末想搵個地方同朋友食餐好嘅，相約到Pacific place 4樓嘅the continental, 餐廳分為兩個區域，有室內同室外，由於當日天氣比較熱，所以就揀咗坐室內涼冷氣。（不過當日見到唔少外籍人士都揀咗戶外區域😅) 坐低想食比較清新嘅嘢食先，所以就叫咗兩隻生蠔同香檳。當日餐廳供應兩款生蠔，經侍應推介，揀咗海水味較淡，味道比較鮮甜嘅Kumamoto . 研究左餐牌一輪之後，都冇咩心水，就問下侍應有咩推介，當日負責招呼我哋嘅侍應態度良好，而且對菜單十分熟悉，經佢介紹後order 左：前菜tuna tartare，主菜whole grilled sea bream 同埋Bolognese pasta . Tuna tartare 嘅調味都算可以，用料尚算新鮮，切得粒粒分明， size適中，整體而言口感清新。呢條sea bream 獲得朋友嘅盛讚，因為佢係先烤完之後再焗，肉質保持鮮嫩，而且裏面嘅大骨已經去除，食起嚟好方便。調味方面為咗保持魚嘅鮮味，廚師只係簡單用鹽同檸檬香蒽帶出魚嘅鮮味。如果想要有一些調味，亦可點附上嘅蕃茄香料醬汁。而我嘅心水推介就係呢碟肉醬意粉，雖然好多西餐廳都有賣肉醬意粉，但係整得好食嘅真係唔多，呢度嘅肉醬調味有層次，而且配上左小粒嘅水牛城芝士增加口感，最正嘅係意粉煙韌有咬口，唔係好多餐廳做到。總括來講，餐廳嘅食物有水準，而且服務一流，係同朋友相約聚會嘅好地方。…Read More

原本約左朋友對太子食餃子，但係去到已經大排長龍，大熱天時又唔想曬住排隊，惟有轉移視線揾其他餐廳。周邊行嘅時候發現，太子站D出口一出就見到呢間志記飯店，見門口有好多雜誌推介嘅報導就入左去，當時啱啱開始午市冇咩人。問老闆娘推介叫咗正宗生炒糯米飯同埋金銀蛋莧菜。因為餐廳面積唔大，所以聽到廚房嘅火爐好大聲，鑊氣十足。啲飯一上枱，就見到糯米飯粒粒分明，煙韌有咬口，臘味嘅香氣撲鼻而來，油光分布平均，但碟底唔會有油，功架十足。而金銀蛋莧菜亦十分足料，金銀蛋同炸蒜粒鋪滿在莧菜上面，莧菜煮得較軟，啱晒老人家人食。總括來說，好開心誤打誤撞食到一家功架十足食物美味嘅老飯店。 🥰…Read More

難得唔洗OT太耐，差不多7點放工，當然要約阿爸阿媽去晚飯，見YOHO MALL 新開張有simplylife，就拉埋父母去，食下西餐，但當晚的水準真心唔得，可能是因為新開張，QC冇做足。餐前奉送的餐包已經呈涷僵狀態，相比另一連鎖西餐廳Outback 每次都有微温香軟餐包，simplylife 過早切晒餐包，亦未有妥善放置，令餐包冇晒香味，同涷冰冰。當晚點左牛排，黑松露意粉，同埋牛肉漢堡。三款當中，只有意粉維持到其他分店的水平。牛排好薄同略為唔夠熱，調味不足。牛肉漢堡上枱時，真係’’出乎意料’’，漢堡旁邊疏落地有幾條薯條，真係。。得幾條。。。。薯條的味道同其他分店一樣好食，但得幾條，除了賣相唔好之外，亦唔夠食。…Read More

為了避免中環午飯時間大排長龍，與同事12時正，便齊齊出office，黎到the night market 時還有些空位。餐廳有兩層，分別是6樓同7樓，按觀察，一般6樓會先爆滿，所以我和同事通常會直奔7樓。同事是這間餐廳的忠實粉絲，所以我也陪佢吃過好幾次。佢每次都必點沙茶牛肉飯，因為鍾意食同沙茶牛肉炒埋一齊的通菜。每次黎佢話覺得通菜變得粗糙，牛肉略為老身。而我差不多每次黎都會點唔同菜式，覺得餐廳的招牌炸豬排冇想像中好食，亦較為乾。反而左宗棠雞則有驚喜，醬汁酸甜度適中，而雞本身油泡程度剛好，做到外脆而肉仍多汁軟身。但係每次點親左宗棠雞都。等。。超級耐。。。尤其係其他同事的餐都上晒，冇理由要其他同事等埋我先開餐，所以叫佢地食先，我等左差唔多15分鍾，隻左宗棠雞先施施然黎到。 :( 我食過左宗棠雞三四次，今次黎真心失望，依舊等15分鍾先有得食，醬汁依舊，但雞本身雖然熱，但毫無口感，應該係炸的時間略為不足，過早混入酸甜醬。如無意外，之後會找機會食多次，但如果水準冇回彈，就真係冇下次。…Read More