bananajiulai的個人專頁

看過餐牌，確定有素食套餐才入坐。選了菇菌湯拉麵，估唔到個湯底做得好清澈，同時又非常鮮味！有蟲草花、姬松茸、冬菇、大竹生、紅蘿蔔、粟米，麵底份量也相當多，細食女生可能會吃剩。小食也有素食選擇，點了醋香雲耳，份量也不少，雲耳細細隻，味道夠酸同好開胃，不用加錢配餐飲白桃烏龍茶，茶包茶，但都好香。店員服務亦佳，上菜速度快，主動拿來籃子給客人放置行裝。吃完無口乾、口渴，應該無乜味精！下次可以試另一款素麵，菇菌黑松露拌麵。簡簡單單，已經夠滿足。…查看更多

十三姨直頭有專為素食者而設的菜牌！嘩！好難得呀！仲列埋卡路里係每樣食物上，真係好細心。今次點了炙燒素手撕雞拼脆玉瓜面粉絲米粉，因為好想試瓜湯麵，但又怕唔夠飽，就拼粉絲同米粉，有啲保障。素湯麵以金屬煲仔上檯，非常之滾熱辣！店員上檯時都細心提醒，個煲好熱，小心燙手，服務態度抵讚！湯麵的湯底都幾惹味，唔太油，而素雞絲都有幾分似真雞絲，又有半隻糖心蛋，而麵底份量都足夠，所以都飽肚。想試瓜麵又怕唔夠飽可以咁樣叫。瓜麵的質地係爽口，粉絲又唔會太淋，所以食落口感都正常。我仲叫咗個小食凍桂花蕃茄仔，粒粒都好Juicy，而且冇蕃茄皮，同埋好入味，一凍一熱都幾過癮。冬天食碗熱辣辣湯麵，個人即刻暖哂！而且佢杯茶係幾好飲，店員又會幫你加熱水！好窩心。下次等我試吓佢杯岩鹽咖啡，見到隔籬枱個女仔叫咗，個樣好似幾靚。下次仲可以試下佢素叉燒飯，店員話好好食㗎，叫我下次試吓。再三同店員確認素食餐牌，喺十三姨所有分店都有嘅，唔使擔心冇得食😛我仲見到叉燒飯，可以轉椰菜花飯底，真係幾唔錯。…查看更多

無意中行去睇吓有冇位，門口一個大家庭正在等位，好彩有一張二人檯未有人坐，但對正門口位，人來人往，店員問我哋介唔介意，唔介意的話可即時入坐。反正都係打算食完就走，趕時間，那麼我地就入坐。店內不大，用餐時間限時90分鐘。店內有一道落地大玻璃，非常之開揚。店內很有聖誕氣氛，好多人影相打卡。食了一個素食all day breakfast! 配搭一點也不馬虎！都幾驚喜！all day必有的炒蛋、麵包、茄仔、牛油果、炒菇、沙律，佢都有，樣樣都好新鮮，我睇到廚房續樣整🤭。覺得佢心機配搭係有焗薯批、yogurt, 凍熱咸甜脆的口感都有。當中最驚喜係仲有一條churro! 當你食完一輪主食之後，最後食埋條churro!真係完美句號！大餐一頓，通常都係飲齋啡以減低油膩感，呢杯係正常之作，再有塊Lotus餅仔送下口！甜絲絲，食飽，埋單🥰下次有quota 先試開心果系列，爆肥之作😝…查看更多

Joys cafe重開，簡直叫人期待。純素餐廳經營不易，要大大力支持佢！餐廳環境如玩具店，周圍都係玩具，打卡一流。講返食物，二人總共叫左兩個餐。分別係burger餐、滷水餐。飲品叫左蘋果味水克非爾，外面少見，所以想試。飲落好香甜的蘋果味，少少酸，但必須是冷飲。不喝凍飲的朋友要注意。Burger選了天貝burger加牛油果、薯條。天貝係炸過，但不油膩，亦沒有豆腥味，應該是有醃過。加埋軟綿綿的茄子，口感都配搭得宜。滷水餐叫了菜底。難得可以食多啲菜，所以選了菜底，有椰菜花、西蘭花。愛吃飯也可選飯底、五穀糧底，坊間比較少見。滷水豬腸幾可亂真，亦有木耳、豆腐、花生。下次試主食五穀糧底，因為外面無得食，自己煮亦費時。而檸檬撻可以再酸d, 廚師在上碟時，刨了新鮮檸檬皮，加添了新鮮感。但質地是偏硬的雪芭質地，溫度亦都幾凍。不知道是否要再稍為回溫才較合食用。而因純素甜品不用奶類，吃下去有椰奶同腰果奶的味道。不愛椰子味的朋友要留意。整體用餐經驗都好好，店員服務態度熱誠。上菜速度正常。可以再回頭！…查看更多

踏入店內，氣氛與別不同，時間走得慢啲、步伐放慢一些、有一種安寧的氣氛，播著輕鬆的音樂, 店內亦提醒要輕聲說話。今日點了鹹班戟、vegan 抹茶cheese cake。鹹班戟做得出色，一盤味道、口感皆非常多元化之作。班戟雖不夠熱，但軟熟，以純素來講，無蛋，這個是高質之作。腰果醬粟子蓉好好味，好香、好滑，有少許蜜餞洛神花來畫龍點睛、個人最喜歡是炸芋絲，唔油膩，而且有少少鹹香。黑豆正常發揮。日本柿份量不多，配搭剛好。但奇怪是椰菜花，吃下去像是raw的，帶有草腥味，爽的，是涼的。與班戟不太夾。感受到廚師的創意。可改進的地方係鹹班戟溫度不夠熱，因不是raw food, 我 expect 是熱的。而椰菜花是raw 的，可以在餐牌上說明。因為我吃raw food 腸胃是有點不適。跟餐的minini rockit 令人好開心。而加點的蛋糕是是好食，上面紅豆蓉配綠茶，食完好滿足！…查看更多

Weekend去食早餐，一早決定食肥pancake burger. 但作為素食者，我心中有啲忐忑，因為好想食pancake, 但又唔食豬柳同煙肉，唔知店家肯唔肯配一下我嘅需要呢？🤨去到櫃檯點餐，我表明好想好想好想食pancakes, 但素食的我，可以走豬柳同煙肉嗎？友善的女店長，話好呀，可以俾多啲南瓜同粟米我！嘩！正呀，肯tailor made 之餘，仲補返d食材俾我，非常素食者friendly!新鮮整的早餐，需要多少少等候時間！上到檯非常之吸引！pancakes 好鬆軟，熱辣辣，糖漿自己想點幾多就幾多。南瓜同粟米、沙律菜係用芝麻醬撈成。煎蛋個燶邊蛋，芝士炒蛋好滑。熱浪味薯角好好食，夠熱、好脆！唔油！真係熱浪味，真係食到一件不留！我一個人食到清哂碟！整體食完超級滿足！素食版的pancake burger無豬柳同煙肉，可能少咗啲咸香的味道，但三塊pancakes、又有薯角，完全滿足到食慾，而且少咗油膩感，無咁難消化同滯肚。非素食者可以考慮吓轉素食版！…查看更多

呢間係同場南豐紗廠Yau 游bistro的另一間餐廳，主打美式漢堡包。點了classic burger同bacon burger. 每款burger 都係有素牛肉。小店慢工出細課，用心做，店內播住懷舊英文歌，配合美式懷舊裝修，空間感十足，節奏立即放慢，時間彷彿停頓了。見到每個Burger都係新鮮做。食落口感真係似牛肉，素牛肉也juicy, 包內有番茄，沙律菜，酸瓜，加上茄汁、mustard, 而素煙肉係炸，外表係彷真的煙肉，咬落去係脆卜卜，整體配合得好perfect! 食得出素牛肉非買現成貨，應該係店內自己搓同調味。店內還有milkshake 同sundae 、香蕉船等供應，但怕肥的我就點了lemonade走糖漿。combo set叫左椰菜沙律。甜品都係留返下一次再食。見到有一位帶著小女兒的媽媽幫襯，點餐時同店員講想將素牛扒煎得熟一點，因為女兒還細個，怕腸胃不適。店員表示可以。我杯lemonade 又記得走糖水，可見店員好細心，抵讚。…查看更多

星期日中午茶非常多人，而且樓面人手嚴重不足，需要耐性等待落單、加水等。食物質素一向都屬中上。今次有叫炒飯、叉燒、點心。牛油果炒飯即炒，好食。點心都係熱辣辣上檯，菠菜餃最好食。而叉燒比較失色，其一失敗之處係淋左個汁上面，唔識形容乜味，怪怪地，其實可以唔落汁。而質感就未做到外面乾身有蜜糖甜甜地嘅質感。咬落去係似麵筋質地。在場比較多長輩、上年紀的顧客，似乎呢度係上一輩喜歡飲茶的地方。…查看更多

平日下午茶，唔使卜位都有位坐。環境算係寬敞，幾舒服，招呼都唔錯。下午都幾抵食，食物水準不錯。最鍾意食蜜汁叉燒。其他點心都熱辣辣上檯，是日點了素蓮藕餅、棗皇糕、水餃。下次想叫錦滷雲吞，見到隔離檯點了，新鮮炸起，好脆！…查看更多

耐唔耐想食下古祖味蛋糕。路過麥蛋糕，雖然非黃昏的特價時段，但都想黎同屋企人開心share.見佢少甜有小麥胚芽味就試吓，店員仲問我要切幾多件，可以切6件或8件。回家沖杯咖啡食件蛋糕就好滿足。蛋糕夠鬆軟，同埋真係少少甜，好適合老人家同怕肥人士食，面頭有些少小麥胚芽，其實就冇乜味嘅。但整體都好好食，食唔完，放雪櫃兩日後再食，質感都ok，係乾左少少啦，但我覺得可接受。凡買蛋糕都送一張$10coupon, 下次再買！…查看更多

週末早上想去食豐富的早餐同最緊要飲杯靚咖啡☕️。海之戀早上沒有太多餐廳供應素食。HABITU係僅有嘅選擇。素食all day breakfast 真係超級大份,食完連lunch都唔使食。個早餐係即叫即整，夠新鮮，沙律菜好靚，而且配搭都好完整。車厘茄有輕輕煎過，酸種麵包係焗熱上檯，仲有南瓜、鮮菇片、炒蛋、粟米、牛油果半個，加埋杯黑糖薑咖啡，好滿足。如果餐廳可以用植物奶沖咖啡就更好啦！…查看更多

是晚係因為有mum veggie 晚餐crossover solight 甜品， 一箭雙雕可以食哂兩間店的菜式。主食由mum負責，mum搬離香港仔後已多年沒有幫襯，今晚終有機會再嚐。選了五穀飯配4餸。素菜天婦羅、蘿蔔冬菇車麩關東煮、信田卷、浸煮高野豆腐勝瓜。信田卷是甘荀、豆角、粟米仔用腐皮包著拎去蒸再加上芡汁。整體上，味道偏向清淡為主，是本人的喜好。喜歡濃味者，需注意。每道菜也有家的味道。尾中不足有兩點：1. 飯不夠熱2. 天婦羅沒有汁配搭但整體上，味道、賣相都很好。Solight的甜品則非常驚喜，非常之高質素的純素甜品中，無一般純素甜品的椰子味、豆腐味、腰果味、食完無漲胃。…查看更多

餐廳裝備簡約，有空間感，座位也舒適。店員服務親切，有問有答，好好。我點了一個套餐，揀左小食、主菜、甜品。小食：煙燻白玉鮮竹卷主菜：蜜汁叉燒黑松露拌素蛋+黎麥飯甜品：生機黑芝麻蛋糕煙燻白玉鮮竹卷：好juicy, 好香煙燻味，將鮮竹包著金菇木耳。蜜汁叉燒黑松露拌素蛋：熱辣辣、香噴噴的叉燒香味，一上檯就好吸引！叉燒仲要係脆邊，外層有甜甜地的蜜糖味，內裡又軟又滑！嘩！好驚喜！似足半肥瘦真叉燒！而炒蛋，憑我個人估計，其實係薑黃粉扮炒蛋的顏色、將腐竹弄碎，濕炒而成。口感滑嘟嘟，配黑松露，也很搭配。生機黑芝麻蛋糕：味道很好，好香芝麻味，應該有用椰子、椰棗、腰果、開心果做材料。如果不接受椰子味道的人，就唔好揀啦。唯一可惜係上檯時太凍，質地稍嫌硬了一點。總結，呢餐飯，無可挑剔，絕對可以再去同介紹俾朋友去食～另外，餐廳內有些素食乾貨，如麵條、醬料、果仁，亦有凍櫃出售素料。想買就記得帶定環保袋/雪袋，雪種。提醒一下：餐廳位置在康蘭居入面，好隱蔽，可先whatsapp店員查詢路線圖，就避免行冤枉路。…查看更多

跑完步路過見佢全間店係做全素外賣，好奇之下試一試。叫左$56佛陀碗外賣。廚師係個後生仔，係廚房好自在同專心咁煮我盒外賣，一定好新鮮。返到屋企，一打開個盒，咁大盒嘅，賣相好靚，但食完至記得無影相🥹！入面有我好想食嘅金平牛蒡，牛蒡好香，又配上甘筍絲，再灑上炒香的芝麻，畫龍點睛，味道好好，好好食。仲有黃薑粉炒碎豆腐，扮蛋扮得好似🤣。另外仲有紅菜頭，酸酸地。食完盒飯，好飽，仲要無味精，腸胃無負擔。下次再試佢嘅滷水飯！…查看更多

Root vegan係一間純素餐廳，所有菜式都無肉無蛋同奶。帶著非素食友人去試，連佢都覺得好味！叫左細泰式拼盤(選了魚餅、春卷)，魚餅好好味，有少少檸檬葉，好清新。紅咖哩天貝配酸種包，可以配飯/麵，或加$30轉農夫包，我地揀左酸種包。紅咖哩小小辣又好惹味，又多汁，點包食好鬼滋味！另外，再叫左泡菜漢堡，可以揀素牛/素豬/大啡菇，店員告知素豬係佢哋大廚自己搓，唔係買現成的，所以試吓。食第一啖，就「嘩」一聲！好好味！素豬雖然用吉烈制法炸左先，但入面唔乾，又做到有真肉的口感，再配上泡菜，少少辣好惹味！仲有番茄、苜蓿芽，配蛋黃醬，成件事真係好夾好好食！再有薯條同沙律菜。甜品叫左焙菜柿子葉cheese cake, 由於無蛋奶的甜品，外面比較難搵到，所以幾飽都要試吓，食落口同正常cheese cake分別不大, 但真係唔會滯住個胃同唔會消化不良。尾中不足係晚餐時段不設咖啡供應，哭....我喜歡食甜品飲咖啡.....店員們都好年青, 好有活力, 同好FRIENDLY~很樂意及很有耐性介紹每一款菜式, 係一間有心的餐廳。…查看更多