Simba's Profile

位於The Upper House 頂層嘅Salisterra早前試業，有幸拉到表妹衫尾去試試。用餐前儀式感十足，首先穿過高檔的太古廣場，入到酒店後經過長長的扶手電梯再搭𨋢上到49/F, 一出𨋢就見到呢條彷似去朝聖一般嘅走廊，好似入左去就會抵達另一個國度一樣。穿過走廊，見到一片開揚維港海景，餐廳裝修以大地色系為主，設計好有太古廣場延伸嘅感覺，新穎但不浮誇。氣氛舒服，適合三五知己邊吹水邊享受美食。聽職員講，餐廳原來落左好多功夫減廢，其中一樣就係餐廳內自設濾水設施，除左係現場提供乾淨食水，同時減少樽裝水包裝運輸等嘅碳排放。講完隨即自家製麵包送到，包面用蒜、鹽焗脆，內裡亦都見到不少氣孔，外脆內軟。小弟不好酒精，叫左杯 Horchata, 入口有杏仁奶嘅滑、米嘅醇、肉桂嘅香。前菜有火炙鯖魚，燒過之後去左一啲腥味，燒出魚油香味，加埋醃青瓜同capers，酸甜醒神。另外番茄加上其清湯清新開胃，酸種麵包粒帶黎爽脆口感。意粉試左兩種，貝殼粉配龍蒿同蛋黃、小龍蝦Ravioli。Ravioli 較為特別，做得十分飽滿，驟眼睇以為係鮑魚。主菜一雞一牛。牛仔肉炭燒厚切，搭配羊肚菌同Parmeson，肉嫩味香、一咬即化，加條長蔥食別有一番風味，只係無咩炭燒味，同個名不太夾。燒雞上面有蜜糖豆蘿蔔沙律（不是我口味但處理上是可以接受的），雞肉嫩滑，醃製檸檬去除油膩感，加埋有少少炭燒味（反而寫明chargrilled 嘅牛冇），味道十分平衡。甜品叫左Warm Rice Pudding，可以話係完美地為今餐作結。暖暖rice pudding上有honeycomb, 加左脆脆口感，柑帶黎生果香甜，中間creme fraiche 雪糕就融入冰凍口感，渾然一體，必食之選。成餐飯每道菜式都唔會有一兩種味道特別搶fo, 反而所有材料味道融和，成為自己別樹一幟嘅味道。嘩眾取寵難以恆久，反而呢種踏實嘅功架先可以長青。…Read More

自從去完西班牙做交流生之後，對有西班牙三個字的東西都有特別興趣。之前睇到新聞話海港城地下開咗一間由西班牙廚師主理嘅餐廳，最近終於抽到時間去試試。海港城地點當然方便，而餐廳更可以直望維港夜景睇到幻彩詠香江。餐廳格調帶點年輕，食飯環境輕鬆。食物選擇方面並唔係走傳統西班牙路線，而係大家比較容易接受嘅歐洲菜系（雖然我係好鍾意食西班牙菜）。自家製麵包配牛骨髓（ $138 ）麵包外皮薄，脆得來唔會硬，麵包肉識落鬆軟而且香味充足，就咁配牛油食已經好好味。再上一層樓，就可以用麵包蘸牛骨髓食，牛骨髓燒得香而且味道濃厚，配上麵包剛剛好，很開胃。小蟶子伴西班牙香腸醋醬（ $188 ）蟶子十分新鮮，爽口彈牙，而西班牙香腸食落有啲似臘腸嘅味道，加埋香醋去膩又好味大蜆及海膽西班牙圓米燉飯（ $218 ）海鮮飯賣相有趣，有橙黃嘅海膽加上綠色嘅醬汁（好像是有點薄荷味的醬汁），對比強烈。燉飯的質感一流，是正宗的al dente，每一口都食到有蜆肉，充滿海水的味道。海膽質素其高，入口濃郁。野鴿配時令蔬菜伴味噌西柚醬（ $268 ）鴿肉烹調時間剛剛好，味道鮮美，而且據說營養價值高，更有益於皮膚。配上味噌西柚，香得黎有點苦澀，同鴿肉味道相得益彰。羊奶芝士布甸伴番薯焦糖（ $98 ）個子小小，但係將羊奶味道極度濃縮，有強勁羊羶味，但唔臭，於口中縈繞不散，焦糖甜味更添一份層次老實講價錢唔算平，但計埋地點服務，而且仲係一星姊妹店，物有所值。…Read More

餐廳打無味精旗號，$50 以下已經有套餐（前菜、主食、飯同埋飲品），非常健康又抵食。地點位處新九龍廣場對面，都算易搵，不過餐廳唔大，所以座位少，十幾人已經滿座。今日我揀左食紅酒燴牛腩，剛巧有鹹檸檬，所以加$5要左鹹檸七。前菜今日係拍黃瓜，都幾開胃。主菜牛腩好正，又腍又入味，而且份量足，舊舊肉，椰菜紅蘿蔔西芹甜味融入醬汁，鮮甜美味，味道濃而不鹹，我俾滿分！飯可選白米或糙米，供客人多一個選擇。下次再試其他餐～…Read More

經過門外見到寫新張試業，侍應又有禮貌咁介紹餐廳，就決定試下佢。首先門外睇介紹，揀食咩牛肉部位同分量，再入門口售票機買飛，好似日本鋪頭咁。買飛交俾店員入座，等肉期間可以去拎沙律、麵豉湯同白飯，全部自助形式，無限添食。沙律菜都算新鮮爽脆，加左柚子醋汁十分開胃。麵豉湯豆腐好滑，不容錯失。白飯質感同米香都出乎預料地好，加啲紫菜係上面自製牛角飯牛肉上檯，我揀左牛肩肉眼$78，再遲啲多人就唔知仲有無禁抵。檯面有啲細，攞左飯/湯加埋個肉，一張檯擺唔晒。餐廳算貼心，有張紙擋一擋，唔怕一開波彈到周圍都係（雖然食緊時都好易彈到），怕整污糟件衫有口水堅拎，仲有籃可以擺袋。牛肉不太有牛肉味，但質感鬆軟，略有嚼頭，$78黎講真係好抵食。除左檯面礦物鹽外，出面可以拎麻醬、燒肉汁或者蒜蓉醬，任君選擇。可能地點有少許隱蔽，晚市都係得幾檯，希望做得住。…Read More

女人街食飯公司其實係一間打住港式大排擋、充滿舊香港風情既餐廳。裝修做得幾細緻。有得感受返大排擋感覺，但同時地方又舒服企理。佈置有特色當然都適合打卡，伙計都著返大排擋服飾，服務都好快手。今次平日早食都未算多人，黎之前最好訂檯，如果唔係都有排等，越夜越多人。食物種類選擇多連海鮮都有，仲好似酒樓咁有個海鮮corner。曼谷咸魚炒芥蘭，葉都摘走晒，炒起上黎翠綠爽口，有咸香。士多啤梨三度腩排，醬汁甜甜酸酸仲真係有士多啤梨肉，包著炸得香酥既腩排，配啤酒的話幾好。風沙九肚魚肉質新鮮軟滑，外皮炸得香酥又唔會有太多的粉漿，同平時食開既好唔同，質素高好多。薄荷葉紅酒牛尾煲，肉同紅蘿蔔都燉得軟爛入味，醬汁又好送飯，而薄荷味道清新，加埋一齊係出乎意料禁好。今次唔叫白飯要油飯，油飯同想像有少少出入，油香少但香料味重，唔好俾油飯呢個名影響其實都唔錯，份量又多。三個人每人$150 左右，4個餸2個飯，都幾抵食。…Read More

餐廳地點方便，由地鐵站出口行幾步就到，餐廳專做素食，食物款式眾多，惟晚市每位最低消費$200大家要留意返。我就揀左懶人最愛dinner set,煩少好多野。套餐包羅萬有，有前菜、手卷、湯、主食同甜品。前菜有醬燒菇山藥伴黑豆、奇亞籽紫薯蘋果薯仔同埋凱薩沙律。醬燒百靈菇味道香，菇菌彈牙，藕片炸得脆，開胃確係唔錯。蘋果薯仔就較清新，苜蓿芽亦令味道帶點草青。沙律最特別係有素煙三文魚，唔止味道似，連口感都相近，十分驚喜。湯我揀左黑松露椰菜花忌廉湯，我覺得配椰菜花係幾襯，取其香同黑松露可算相得益彰。手卷就係蘆筍素香鬆苜蓿芽，香鬆為素菜加添層次，紫菜亦脆口。等上菜期間仲可以睇教學學煮餐廳素菜。主菜係牛肝菌粒粒意粉酥皮盒，開頭望落以為酥皮會好硬，點知原來係非常薄，有酥皮鬆脆，但唔會太厚搶左內餡焦點所在，又唔肥膩。牛肝菌經常用於意粉同意大利飯，香氣一絕，意粉既澱粉質同汁料融合，加埋酥皮盒底下既茄醬一齊食真係唔錯。伴碟有焗釀蕃茄同苔菜三絲脆卷。脆卷其實係炸脆晒既蔬菜絲。意大利黑醋甜香，配炸野又別有一番風味。太太既青醬意粉亦都高質，青醬羅勒松子香味突出，撈埋溏心蛋十分滿足。另外加左個脆鱔，口感同賣相都好似真鱔，後來一問原係係冬菇邊，剪落黎再炸，真心佩服發明菜式既人。Oreo 曲奇乳酪蛋糕同埋抹茶緣起，oreo 就普通啲，抹茶就加錢都值！而且仲係銅鑼灣店限定。抹茶緣起茶味香，但又完全唔膩，無平時好似食左好多cream既感覺。…Read More

利源西呢間 Chotto Maki 專做卷物，都有啲魚生飯可供選擇，如果嫌卷物唔夠飽（其實唔大食都夠），可以加廿蚊烏冬。裝修係西式日本野，唔買外賣即場食環境都唔錯。卷物有啲係set好左，唔洗諗配搭，另外有種就係自訂，跟住個表自己剔。有選擇困難既朋友就好似我咁，叫啲set好晒既就最方便。因為夜晚去游水，叫埋晚餐，要左6+7。揀好落左單之後現場睇住店員即叫即整，睇住等既時候都唔會覺得等得耐，係幾好既方法。6號 sea monster 一盒四大件，有蟹柳炸蝦青瓜，口感爽爽的，特別在灑左炸蒜同櫻花蝦，為卷物加多點變奏，要揀的話我會推介下面既7號仔多啲。7號 black magma細細舊有八件，有帶子，蔥吞拿魚，天婦羅脆脆，配以黑芝麻汁。料係好食既而且新鮮，最聰明係加左脆脆，帶多一重唔同既口感。外賣盒幾特別，拎出黎黎可以變做一個大碗咁，幾有心思，唔怕個開口太窄唔知點樣夾，心思滿分。有時食下呢類創新卷物都唔錯，又食到日本野，又食到新口味。…Read More

好多年前黎過紅煮意 re-u, 唔經唔覺都已經過左禁多年，今日接太太黎到附近，見佢仲係度，就上去食飯。餐廳就係油麻地電影中心隔離，睇戲前後食都算方便，今日平日7:30pm，唔多人，得兩三檯。餐廳應該算樓上cafe類，有board game玩，原來逢星期六晚仲有live music，因為地點比個入，同地鐵站又有少少距離，比較少人識去，應該都唔會好爆，晚餐都係一個好選擇。餐牌豐富，亦有素食選擇。晚餐加$22變餐，會有麵包、湯/沙律同埋飲品，都幾抵，加埋晒$90-$120左右，以地點計有啲貴，但上面見我講禁多野，就知肯特係性價比ok,如果唔係都廢事打禁多字。我就叫左個安格斯牛肉烤菇漢堡，加左餐。沙律都新鮮，麵包係超乎預期，口感鬆軟，帶點微酸，完全唔係一般貨色。後來問係咩包，店員話個麵包係自家做，但師傅唔係成日得閒，禁岩今轉先有自家飽，我地真係算好彩。廚房點睇都係得一個人，我地三個人三個餐，有漢堡有意粉，但出菜都出得幾爽手，唔止一個接一個上，而且係新鮮整好，熱辣辣！我個漢堡十分巨型，我都要慢慢切開食。Portobello 烤到香噴噴，外表乾身但內裡多汁，邊切邊見到啲精華流出後，要即刻搵包索返黎食。牛肉又係好正，肉味香，實淨同時鬆軟帶彈性，原來漢堡扒又係屬自家出品。同時食到晒蕃茄、芝士、牛肉、菇、生菜同麵包就最正，味道豐富平衡，牛肉油香加菇既精華，配上蔬菜爽甜，正。薯角香脆，唔會軟林林同油膩，係熱氣啲，食左個沙律當抵返條數。 野飲就叫左杯荔枝玉露。總括味道係高分之作，都幾好坐，又有電視睇愛回家，無野好彈。…Read More

好耐無返過元朗行，今日決定返去走一圈，搵下好野食，順手約下朋友食飯。中午朋友介紹去了漁吉食日本海鮮丼，元朗廣場/千色行過去5-10分鐘，門面企理，壁畫都幾有特色。最特別係檯上有壺麵豉湯任斟，行到過黎口乾乾就岩晒。湯味道甜甜地，有別於平時既麵豉湯，飲飲下又幾好飲，飲左兩碗。雖然話專做海鮮丼，但其實海鮮都有好多種類可以選擇，而且仲有小食。呢度外賣自取同埋like Facebook都有9折，百幾蚊個飯9折都平幾多，記得唔好蝕。期間限定油甘魚都吸引，但我最後揀左漁吉特選丼同埋赤城金栗可樂餅。特選都真係幾多配料，有三文魚、油甘魚、比目魚、星鰻、海膽、魷魚.......多到唔識數。除左有應該係鮮磨既山葵，仲有青檸，平時較少見，而配丼飯既玉子都係關東風，甜甜地。魚生係大大塊厚切，食落好有滿足感，咬落去油脂爆出黎真係好正。比目魚、帆立貝同海膽都輕輕用火燒過，焦香味唔錯，減輕一下肥膩感，海膽新鮮味道濃郁，唔腥臭。星鰻香口無骨，太太都少有地表示鰻魚ok。食左幾啖後發現魚生下埋藏勁多蝦子，仲有勁多飯！我好耐都未試過食到禁飽。性價比黎計漁吉係好抵食。兩個人胃口不太大的話叫個豐富啲既丼再加兩款小食，嗌埋飲品，可能同食兩個飯差唔多價錢，但可以試多好多野，不妨試下。可樂餅炸好切開再加啲沙律醬，味覺豐富，栗子我以為會打爛晒，但原來特地留返啲大大粒既搓入去，食出口感。栗子甜度高，加左沙律醬味道多左層次，更易食多幾舊。總括黎講價錢質素都唔錯，坐得都舒服，可以再戰。…Read More

有時兩公婆夜晚真係唔知食咩好，今日忽發奇想，諗諗下不如食串燒，唔食飯好似無禁肥（好似），所以去左蘭桂坊既Grill。Grill位置唔算多，黎過一次食晏，當時多人到不得了，不過香港平日晚上去食串燒係比較少人，所以今日黎買野完全唔洗等，正。餐廳一邊做串燒一邊做餐廳，有海南雞飯、木瓜沙律、青咖哩牛腩飯之類。串燒選擇都多，大約十幾蚊一串，算係幾相宜。今次因爲決定唔食飯，叫左都幾多種類，有豬牛雞、白鱔、菠蘿、細粟米、露荀同埋魚餅。叫完串燒可以見到姐姐即刻幫你燒，睇佢地求求其其咁，但其實個個都係高手。肉類燒完仍然多汁，豬牛雞都正，肉味香又易咬開，雖然用熊熊烈火燒，但肉質柔軟真係意想不到。個人就最喜歡豬頸肉，爽口，點一點沙爹醬更惹味。沙爹醬味道甜，岩晒食唔到辣既小弟。白鱔肉厚又香，$60係有少少貴，但第二度又真係食唔到禁厚肉而且惹味既食法，各位試的話小心魚骨，因為始終都係會有魚骨。蔬菜類唔多講，好難出事/標青。魚餅因爲辣既，食唔到，俾晒太太食。菠蘿就真係要提，自己燒菠蘿會原隻慢慢燒，見佢切粒仲擔心會燒到乾晒，誰不知佢香甜多汁又無渣，唔叫堅會後悔。有時諗住Grill係中環會貴，但計落其實抵食，偶爾食一餐串燒都唔錯。…Read More

淺月行過幾次都唔見佢開，今日七點尾見到佢開，即刻睇下有無位，岩岩好兩個坐得落。其實當晚係有啲攰，諗住求其食快快搞掂佢，但老婆好想試淺月，我就諗住算啦照去，好彩有去，唔係我就錯過晒啲美食！話說店主 one-man band，等候時間真係耐，而且聽說店主堅持一份份煮黎保持水準，建議大家一係做第一檯，一係就再晏啲八點尾先黎，可以等少啲。睇完menu自己寫落單紙俾老闆，小心眼闊肚窄，因為食物都幾大份。隔離個男仔叫黑咖喱漢堡扒加薯餅，睇落幾好味，所以我都諗住叫。見佢食完都唔走住，原來係等緊炸雞，正當我諗緊佢點解禁好胃口，佢應該feel到自己太飽食唔晒，問如果分幾件俾我同太太介唔介意，梗係唔介意啦！好人哥哥仔一番好意，另我試到我人生中食到最好味既炸雞。皮好薄又香脆，有少少七味粉調味，雞肉嫩滑多汁，應該話係超多汁！好食到不得了！所以唔記得左影相lol咖喱本身應該唔辣，不過加左七味粉就帶返少少刺激，我雖然唔太食得辣，但真係忍唔住係咁食。漢堡扒應該係牛豬混合，裡面亦加左啲洋蔥粒，漢堡扒實淨唔會一夾就散,兩面煎香而入面仍然juicy鬆軟。薯餅寫明用日本男爵薯仔，澱粉重，薯仔甜味突出，而且又炸得剛剛好，記得慢慢食，因為肚餓加上剛炸好，狼吞虎嚥一黎浪費，二黎就好似我咁會辣親個上顎。連飯同蛋都照顧到好detail, 飯同蛋面都有少許調味，唔會話因爲飯有蛋蓋住，而蛋又有咖喱汁就求其做。飯質唔錯，軟硬適中，有日本飯果種黏濡口感。另外跟餐要左個麵豉湯，知道有櫻花蝦，但無諗過係成碗都係！味道唔死鹹，又有蝦香味，唔錯。出街食飯真係好耐無試過如此滿意，雖然係有排等，但一切都係值得既。…Read More

隨住利奧坊XX落成，大角咀慢慢就要俾人打造成西九soho。將來有幾soho就唔知喇，但有次經過又真係見到有間幾靚既餐廳，格局幾chill而且又有live band, 本來諗住平平地黎食tea,可惜就唔到，唯有放工黎食晚飯。餐廳外牆係玻璃，但又有窗簾遮擋住，後來先知係live show 時會好似真正音樂show咁，暫停入場，非常尊重表演者。環境靚，感覺高級，餐廳中間係食飯位置，飲野食tapas就有旁邊的bar area，但舞台鼓手未有間隔，怕嘈的就唔好坐太近喇。另外音響設備好似都幾pro。講返野食，menu 覆蓋率都高，咩種類都有啲，tapas多啲更好，更適合黎食下小食同聽歌。前菜叫左布袋芝士，外層實淨而內餡非常creamy,有少少似mozzarella。旁邊清新既提子同蕃茄仔（冰冰凍凍），加埋意大利黑醋同橄欖油，更加開胃醒神。墨西哥餅都穩打穩紮，包住芝士同提子食又另一種食法。法式熱融蜂蜜芝士配法包，記得黎到要即刻食，因為凍左芝士會硬返做唔到拉絲。硬左之後就變左第二個食法，就係切一塊芝士放上法包食。用法包點個汁，芝士微鹹配甜甜蜜糖，味道有層次，食食下就食晒，真係多幾件法包都唔會厭。今晚既紙包魚係鱲魚，非常好食。好食在魚煮得剛剛好，肉質嫩滑，魚味香濃。底部有豆角同煎香左既薯仔片，另外仲有刁草添香，連太太都大讚。價錢較其他食物高，但煮法同手法都值回票價。油塊雞脾兩食，兩舊大雞脾都幾飽肚。上脾煎香而下脾以鴨油煮，係經典法式手法，油香味優雅慢慢滲出，肉質煮到十分鬆化，每啖香味都好豐富。伴碟薯仔粒都唔馬虎，外層香脆。呢度上菜會就住食野速度，亦見得到配菜處理認真，整體用餐都好滿意。…Read More

中環返工食晏一向難，平野有排排，貴野又無錢食，想要方便快捷就要幫襯外賣店。除左一般連鎖餐廳，利園東街幾間鋪都多人食，而當中既「頹飯」名字已經夠晒玩味，味道價錢亦都合理。我試過豬扒，去骨雞腿同薄牛肉，有平有貴。豬扒雞腿可自選醬汁，有黑椒汁/茄汁/咖哩汁。溫馨提示：我見鋪頭真係即叫即煎，等候時間較快餐長（人多都約10min)，最好先打電話或用app （好似叫Oopsie) 叫定餐，咁就唔洗點等。三個餐中，以下兩款食物我較欣賞：一口鬆軟豬扒飯（茄汁） $43名字係一口，但其實唔係一口牛果種一口，而係一整塊。豬扒鬆軟入味，煎得幾香。豬扒已經剪開左，方便進食。蕃茄汁我十分欣賞，唔係大x樂焗豬果種人造茄汁味，食落帶鮮甜又有新鮮蕃茄，而且唔會杰到一pat pat。招牌薄牛肉飯 $60價錢較高端，最緊要值。牛肉唔係日式牛肉飯果種薄，而係厚多少少，食到牛肉味又有咀嚼肉類既滿足感。牛肉配上燒汁送飯一流，燒汁酒味同甜味較平時食到的多少少，用牛肉點一點再配飯食就fit 晒又唔怕食太多醬汁。伴碟有栗米同蕃茄仔，感覺健康啲。$50 內有交易，而且即叫即做既小店，值得支持。…Read More

放工滂沱大雨都無阻今晚要試蔡瀾Pho既決心，因為難得有時間，點都要試下呢間蔡瀾押上自己名字既越南粉。地點高檔，裝修新潮，所以普通一碗粉都$68。場內仲見到不少香料香草，同埋媒體都有介紹既自家製粉機。平日7pm已開始排隊，想食就要早啲黎啦。Menu 簡單直接，我同太太都直接落筆，佢一碗生牛河，我就黎個金錢腱牛筋河，不忘叫返個香茅豬頸肉同埋蝦醬炒通菜。提提越南粉是可以refill的。越南粉少不了伴隨的香草同芽菜，墊檯紙上亦有一一介紹，唔怕牛𡁻牡丹。粉一到，咩都未落就先試一口湯，牛味香、偏甜，絕對唔係味精湯，如九層塔香味強多少少仲正。落香草有一種叫鵝芥，都係今日先識，會添上一點青草味，𡁻多兩啖味道更出，青新解膩。芽菜肥嘟嘟有咬口，爽甜。牛肉、牛腱、牛筋都試左，排名同我寫既次序一樣。牛肉味香肉稔，牛腱紋理漂亮肉質軟稔，牛筋走爽口路線不過可以再入味啲。越南粉自家製，米味突出咬口都唔錯，可能因無加添加劑，整體較細碎，自己造麵呢個心機值得欣賞。豬頸肉多汁，切得較薄，有種入口即化感覺，可惜太太更喜歡厚切。伴碟的醃菜可以稍稍清一清味蕾。香港好粉一碗難求，環境又舒服，不枉一試。…Read More

放工後到旺角同太太行旅行社，睇下年尾旅行有咩著落，之後就黎到街坊cafe食飯。餐廳地點方便，就係廣華附近，而且近登打士街街口，唔難搵。平日7:30pm去到，人流開始多，好彩早左少少唔洗等位。裝修幾有特色，牆上有關於香港的壁畫。座位都唔迫，唔洗好似同隔離檯一齊食飯咁。打開menu，主打西式料理，有牛、黑毛豬、龍蝦等。比較特別見到龍蝦可配沙河粉，咁當然要試一試啦。叫左兩份set dinner, 包埋湯同飲品。蘑菇湯唔會一碗粉漿水咁，有好多菇菌碎，味道香。我就比較喜歡碗仔翅，多料好味又夠香港。波士頓龍蝦海鮮龍蝦汁河粉材料豐富，龍蝦、青口、蜆、魷魚、乜都有。龍蝦汁點綴河粉，香氣淡淡的，配上河粉中西合璧，又意外地夾，河沙有咬口又索汁。法式鵝肝雞肉黑松露意大利飯黑松露味香，而且每口都可以拉絲，應該有不少芝士。最正係真係啖啖雞肉。鵝肝比想像薄，煎到表面香脆，加埋飯食都唔錯。街坊cafe算係貼近港人口味西餐，價錢比西餐又更可親，加埋地點就腳，都係幾好選擇，一大班人可考慮叫幾份二人餐，多人share幾抵。…Read More