smallcrown's Profile

登打士街有好多小食飲品鋪，今日天氣非常熱，見到尼間茶飲店有好多選擇，一於買番杯黎試下。2杯飲品都大杯，行街飲一流 。草莓蜜桃沙冰，一飲非常冰涼，涼透心，消暑一流。草莓同蜜桃味非常濃郁，果味鮮甜，可以揀健康甜，更加突出水果既香味。夏夜白桃烏龍，飲落好舒暢，烏龍好清爽，同白桃味非常夾。除左飲品，店鋪仲有個小廚櫃，放左唔少甜品，好吸引 。例如盒子蛋糕、巴斯克等，價錢合理 。楊枝甘露盒子，賣相好靚，打卡都可，亦提供餐具，方便食用 。柚子酸酸甜甜，蛋糕奶油非常creamy香滑，蛋糕輕盈，值得再試下其他甜品。整體，經過店鋪，唔好錯過，飲品或甜品，都一樣有水準。…Read More

行街經過門口見到大大隻既牛油果公仔，而且水果櫃仲放左好多種新鮮既水果，一於叫番杯黎試下。巴旦木牛油果乳酪奶昔，上面鋪左半份牛油果，牛油果咬落好軟糯。乳酪充滿香濃既牛油果味，十分奶滑。加左巴旦木，即係扁桃仁，飲既時候仲可以咬下堅果碎，好有口感，非常濃郁。藍莓牛油果乳酪奶昔，牛油果mix藍莓估唔到都咁夾，味道分明，睇得出用料十足。mix完之後，牛油果既顏色遮蓋左藍莓既顏色，但藍莓味都突出，清爽而不膩。除咗牛油果外，仲有其他水果既奶昔，仲會推出期間限定，今次係雜莓乳酪奶昔添。…Read More

尼間車仔麵最大特色係，可以望住職員姨姨夾餸煮麵既過程。配料花多眼亂，每樣都好吸引。先揀麵底，後揀餸，再配調味料，飲品，再俾錢。之後自己隨便揀位坐。當日晚市，估唔到人流多，好多人食。揀左2碗餸，2款飲品。牛肚超入味，軟冧。豬腸份量多，冇臭味。肉類選擇多。素菜冬菇厚肉，同樣炆得入味。紫菜一大餅放入碗，好少鋪頭有尼個選擇。通菜爽脆。麵類款式比其他鋪頭多，竟然有瀨粉。重點係個湯底超濃郁唔太鹹，香噴噴。要腩汁/清湯都得。另一碗腩肉肥瘦均勻，一層層，肥肉位彈牙，肉冧，炆左好耐。牛筋大大件，口感完全唔韌。麵筋必點，吸哂湯汁，份量又多。而蘿蔔雖大塊，但冇渣，一樣吸湯一流。食完超滿足，又飽肚，坐得又舒服。唔錯既車仔麵選擇。…Read More

餐廳走黑色風格路線，天花垂吊星星燈飾點綴，令環境有情調。餐廳食品都係由韓國店主自己設計，由韓國人烹調，充滿韓國風味。餐牌上既每款食物都好吸引。忌廉海鮮炒年糕($328)，配上炸大魷魚。店員會幫手剪開魷魚，方便享用。魷魚超酥脆，肉彈牙，炸粉唔厚。忌廉唔會覺得膩，拌炒蔬菜、蝦仁、帶子粒，美味。鐵爐邊有紫菜飯，麻油味香。拉絲芝士充滿鹹香味。另外有小香腸、泡菜附送。烤豬梅頭肉($198)，揀左鹽味。以鐵板送上，熱辣辣。豬肉厚切油脂豐富，超多汁。底部燒烘左金菇、洋蔥等，吸盡肉汁，仲有青瓜泡菜添。加配左腸仔年糕串，淋上甜辣醬，炸烤過，完全係韓國小食。飲品叫左藍檸檬梳打，熱情果梳打。2杯飲品都唔會太甜，仲有d啫喱/蒟蒻係底，增加口感。另外有酒提供添。整體，食完好似去左韓國咁，地道韓國菜。尤其口味唔會過重，食完唔會口渴。而食物即叫即整，所以要預時間等候食物。如果多人食，就可以試多d款。等候位置，有彩色鎖扣牆身，仲有免費打卡影相機玩添。無論情侶定朋友聚會，都非常適合。…Read More

餐廳位於慶方商場盡頭位置，有大量座位。平日晚上時段，人流不斷。餐牌食物選擇花多眼亂，而且價錢唔貴，份量大到食唔哂，真係有越南菜既口味。美味2人餐($248)，非常抵食。越式菠蘿炒飯，香味濃郁，有大量新鮮甜酸菠蘿粒、魷魚、蜆肉、提子乾等，炒香夠鑊氣，飯粒粒分明，仲有2隻大蝦。2個人都可能食唔哂。2選1沙律選擇左西貢牙車快雞絲沙律，估唔到雞絲量超多，外內都拌勻雞絲。沙律有椰菜、紅蘿蔔絲，超爽脆。亦加入香茅，有助提味。沙律微辣清新，愈食愈開胃。夏天食一流。主食選擇左順化蕃茄牛腩配法包，一客配4件法包片。蕃茄汁濃稠，牛腩炆到軟林，而且大大件，超碼有6件或以上。法包烘到脆身，塗上蒜油，配上蕃茄汁，一流。跟餐有2杯飲品，就連點選特色飲品都唔需要額外加錢。龍眼冰清甜消暑，有龍眼肉、杞子，養生又健康。椰汁珍多冰，甜而不膩。額外再點選小食拼盤，份量多到嚇人。雞翼脆炸後香口，蝦餅炸到金黃，口感彈牙。炸春卷脆口但唔油膩，咬開唔會散。米紙卷外皮煙韌，比炸款會感覺清新健康。仲有越南靈魂美食彈牙既扎肉添。整體，非常豐富滿足既一餐，食物美味有水準，而且價錢真心親民。以尖沙咀既物價黎講，餐廳食物唔貴但好食。吸引超多人黎食。…Read More

烤肉就食得多，但有列車送餐係第一次。餐廳以空中列車送餐做gimmick，夠特別之餘，打卡亦一流。掃qr code落單，肉類選擇多，亦有蔬菜可以選擇，及其他配菜。套餐包括飯、湯或沙律、餐前小菜。唔夠食，仲可以散叫大/小份肉類，岩哂想食多幾款肉既食客。宮崎和牛套餐($188)，有3款和牛級數既肉，其中三角腩少見，肉質係最嫩滑，油脂豐富，入口慢慢溶化。而肉眼蓋就相對結實dd，但都重油脂。另外散叫特級雞爽肉，比平時食既雞肉，分別在於此部位嫩滑好多，而家有爽口感覺。牛小排係最多油脂，一邊烤，d油脂一邊逼哂出黎，肉片變到好焦脆。肉汁多，juicy。汁燒牛舌大塊，調味唔會過濃，肉屬結實。除左可以食日本和牛，仲可以揀韓國出產既牛肉添。韓牛前腿肉，有3大塊，肉味濃郁，肉質唔韌。除左有肉類，更有蔬菜、小食甜品，用列車送餐方便，有睇頭。當日有一家大小黎餐廳食飯，列車吸引唔少小朋友既注意。整體，體驗機械送餐服務，唔錯。不過部分位置冇路軌經過，所以由侍應送餐。肉質唔錯，可以食到唔同部位既肉及肉種類，份量更可調整。食飽仲可以行下商場添。…Read More

屯門有多間燒肉放題，尼間既有燒肉又可以打邊爐，當然唔可以錯過。掃qr code落單，食物好快就送到，值得讚。邊爐湯底壽喜燒，已有菇菌、菜，湯底甜易入口，肉片吸哂d湯汁，超惹味。自助區有各類打邊爐及燒烤食材，可能掃qr code寫已售罄，但其實係出面自助區可以夾到。肉類選擇超多，牛、豬、雞每樣都食少少。其中牛類最吸引，和牛一口牛、和牛牛肩脊肉多汁，鍾意調味可以揀鹽/燒肉汁醃製款。而牛舌唔膩，燒一陣好快可以食。另外，黑毛豬腩肉、豬大腸，屬油脂較重既食物，所以燒烤完好脆口，但注意會大火，燒時要小心。海鮮類，廣島蠔鮮甜，煮完冇縮水，有錫紙兜加牛油燒煮，放入去打邊爐又得。帶子、蜆、一樣鮮甜。而三文魚刺身厚切，紋理靚，即叫珍寶炸帶子、炸海苔魷魚、牛肉餅，外皮超脆，唔會油膩。墨魚仔係咁多款食物黎講，最少見，大大隻燒完會少少爆汁。雪櫃入面有大量調配好既沙律、前菜小食、雪糕、甜品等，其中香港製造既雪糕味道濃郁，飲品種類亦多，可加錢任飲啤酒添。整體，食物質素唔錯，無論肉類或現製食物，種類多花款，值得一食。…Read More

店鋪位於工業大廈地庫，以food court形式經營，座位坐得舒服，唔似其他food court好擁擠。食店主打韓式食品，有炸雞、飯卷售賣添。泡菜湯($68)，即叫即煮，熱辣辣送上。湯底辛辣，大量泡菜烹調成後，酸酸辣辣好開胃。五花肉吸左湯汁，入味，份量亦唔少。而豆腐滑嫩，另外仲有金菇，配有一客白飯，邊食邊飲湯，不知不覺已經飽。配菜泡菜爽脆，單食或者配白飯食，一樣滋味。石頭鍋飯，大量紫菜灑係面頭，超香麻油味。配料有菇片、翠玉瓜片、菠菜等。加配五花肉，醃製後帶甜味，同泡菜湯既肉味唔一樣刺穿煎蛋後，蛋黃流出，拌勻米飯。雖然冇飯焦，但拌飯一樣好味。而且份量足夠，好飽肚。飲品番石榴茶，陣陣番石榴味，底部有少少渣，唔會過甜，清新少見。整體，可以慢慢坐唔急住食，有心思製作韓式食物，簡單係food court都可以解下口癮，想食韓國食物。…Read More

餐廳係轉角位，有大玻璃，邊食邊望住行人行黎行去，寫意。座位有室內、外，室內播放日文歌曲，有feel。每碗份量足，食完飽肚，湯都可以飲清哂～雞白湯黑蒜油($93)，黑蒜味濃郁，食落完全唔油膩，食完亦冇口渴情況。每碗都配有豬肩肉叉燒、慢煮雞胸、雞肉丸等。叉燒大片，雞胸軟嫩，如果覺得唔夠，可以追加配料。味玉流心，一咬即爆醬，如果追加都值得～麵條硬度都可以選擇，如果有唔鍾意既配料，亦可以自由刪走，落單形式方便，自由度高。例如有紫菜/木魚花、竹筍、洋蔥、青蔥。鰹節清湯鹽味($90)，湯底清相對清d，配料一樣不過由紫菜轉木魚花，雞肉丸超juicy好食。免治雞肉棒($32)，一共有2串，外皮少少焦脆，有少少軟骨，增加口感。啖啖肉好juicy。大阪風唐揚餃子($32)，大量木魚花灑係面頭，餃子外皮脆口，肉餡內有粟米，有驚喜。拉麵加配小食，會送一罐罐裝飲品，其餘可以加錢升級。整體，小店風拉麵，係元朗難得有高質既拉麵鋪，又有小食選擇，仲要唔貴，值得食。…Read More

餐廳外邊裝飾好有舊民屋風格，有dd居酒屋feel咁。一入座已經聞到牛肉香味。晚市8點左右入座，等左5分鐘就有位，唔少外國人食緊。入座後qr code落單，除左麵食，餐廳好貼心加入白飯類，可以配牛肉食品湯。手打牛筋丸麵($76)，一大碗有6粒牛筋丸，超彈牙，仲爆汁添。初時見到湯底顏色深，以為會好鹹好重調味。但飲完，好清爽，完全唔油膩。麵底可以揀粗/幼麵，粗麵有咬口，食完好滿足，男/女仔食，都會飽到上心口。麻醬麵($48)，大量麻醬、白芝麻淋上，麵條拌勻後，唔會黏到一patpat。加配溏心蛋，一咬就爆醬。溏心部分甜，蛋黃拌麵，一樣好多。牛三寶拼盤($98)，3款食材堆疊係煎pan上，非常豐富。每款既份量都好足料。牛肋條啖啖肉，大大條，炆到軟，入味，唔鹹。而牛板腱軟身厚切。牛筋夠林，充滿骨膠原。底部仲有滷汁菜，夠誠意。另外再跟餐加配滷蘭花乾，好少聽蘭花乾，原來係平時台灣夜市滷菜入面既豆卜，但切成有紋。滷水少少鹹，但配合一齊食，就ok。好地道既台灣小食～主食配飲品會有優惠價，熱冬瓜檸檬茶，一開始酸酸地，但飲落就係甜既冬瓜茶，愈飲愈好味。而白桃烏龍清新無糖。整體，主打台灣風味既牛肉食品，唔駛飛到台灣都食到出色牛肉麵。值得一提，飯後唔會覺得口渴要不斷飲水，所以係真材實料煲煮既湯底，讚。…Read More

一聽到旺記冰室，就諗到叉燒滑蛋飯 。假日下午茶時段6點前到，平dd享用到滑蛋飯 。除左最出名既蛋飯，每日都會有精選餐 。餐廳內既座位隔離闊落，仲有卡位，坐得舒服自在 。自家製叉燒日本滑蛋飯($60)，必食，熱烘烘送上枱 。叉燒厚度適中，配上豉油食，更惹味 。炒蛋夠滑，唔會過熟，飯量足夠男仔食有多添 。每個茶餐亦配一杯飲品 。旺記魚介醬炒公仔麵($64)，新品特色下午茶 。魚介醬非常香，配公仔麵食，夾 。公仔麵硬身，唔會炒到軟林林，夠鑊氣 。加入火腿絲、仿鮑絲、熟蛋，滋味 。份量足夠2個人食添，好抵食 。紅豆西多士，西多士外層炸得夠脆，內層麵包鬆軟，紅豆餡唔會過甜 。雖然食完好邪惡，但值得一食 ～整體，食物價錢親民，份量又多，抵食 。無論午/茶/晚，都有叉燒滑蛋飯食 。…Read More

居酒屋每日都有推介新鮮食材既食物，亦有酒放題。旺角分店特別在於有夾公仔機，好易夾中波波換取食物。仙台厚燒牛舌($148)，必點，牛舌厚切成粒，第一口好爽口，之後係軟林口感 。師傅係日本學師後，再按香港人既口味，調製特色醬汁。牛舌放耐食，一樣好juicy，配搭既漬物清爽。一客份量足料添。炎～壽司盛8件($128)，4款壽司每款2件，用長碟送上，好壯觀既感覺～其中，左口魚邊充滿魚油香，爽甜。鰻魚厚身，啖啖肉冇骨 。金龍卷($68)，一客6件每件都卷得實又靚。炸蝦非常脆，唔油膩。放耐食一樣keep到。牛油果配千島醬，加上蟹籽一啖入口，口感豐富。串燒方面，鹽燒雞腎串、鹽燒日本雞心串各有千秋，雞腎爽，細細粒一口，佐酒小食一樣。雞心有咬口，燒得香口。吉列廣島蠔($42)，廣島蠔鮮甜，炸衣好香口，炸得乾身，食完唔覺得膩。三文魚親子丼($88)，三文魚刺身好肥美，每塊都厚切，而魚子大大粒，一咬口腔充滿海水鹹鹹地既味。一大碗足料飽肚。自家製免治雞肉棒($38)，雞肉棒燒完外層脆脆地。醬汁鹹甜，攪拌雞蛋後配搭雞肉，嫩滑。另外，仲加左3%酒精青提子氣酒，入口清甜，果香味濃，好易入口，唔係死甜。用靚靚酒杯飲酒，成餐飯食得好開心。期間仲做promotion，優惠價買酒送杯添～好抵，送禮自用都一流。整體，慢慢嘆日本菜，環境舒服亦夠大，價錢亦合理。值得再去～…Read More

餐廳環境寫意簡潔，午市有西式lunch set，晚市有主菜、飯意粉、dinner set 。店舖有2層，今次坐地面一層 。小店打理，但食物質素佳，擺盤有心思，食物足料 。主食可以加錢升級做set，今日餐湯菇菌意式湯配麵包 。菇味非常濃郁及濃稠，打碎後仲有微粒，令口感更豐富，而麵包一咬，有陣蜜糖味，有驚喜 。另外再加set，沙律醋提味，特別在於灑有松子仁，更香口，芝士鹹香惹味 。主菜紐西蘭一級肉眼($168)，超大塊肉眼扒，配以薯條及煎翠玉瓜 。翠玉瓜煎完都爆汁，薯條食完冇熱氣既感覺，亦唔油膩 。香煎後邊邊位帶有少少焦脆，肉厚多汁，五成熟剛剛好，食完好有飽足感 。燒汁另上更貼心，鍾意淋上去食/自己蘸醬又得 。黑松露牛肝菌意大利飯($108)，尼個飯不得了，大碟之餘，啖啖都係菇味及黑松露味 ，愈食愈上癮 。意大利飯濕潤稠密，超香黑松露味 。飽住個肚都想繼續食～甜品香蕉焦糖牛角窩夫配雪糕，打卡一流 。切開窩夫好驚喜，超級脆 ，同焦糖食絕配 。香蕉、藍莓新鮮，必點甜品～餐後飲果茶，蘋果檸檬玫瑰果茶，加錢升級 。先焗3分鐘左右，意想不到，第一啖帶檸檬淡酸味，清新解膩 。之後有陣陣玫瑰花香味 ，估唔到同檸檬片既味道會夾 。跟餐玫瑰普洱茶，普洱濃郁，帶有玫瑰花味，鍾意飲濃茶既人，值得一試 。整體，難得可以慢慢嘆西餐，完全唔會趕，令食客可以慢慢享受食物及環境 。食物美味，而且飲品選擇多，多款果茶 。跟餐茶飲亦有提供，讚 。…Read More

餐廳主打心形pizza，有多款特別既口味，另外，仲有皇牌炸/烤雞、小食。假日晚市到餐廳，好多人親臨買外賣/外賣apps落單。餐廳裝修新潮坐得舒服，qr code落單，有lunch及tea set添。曼克頓pizza($73)，餐廳賣點必叫心形pizza，如果情人節食會好有feel。pizza細細個但餡料爆多，大量雞肉、青椒、洋蔥。芝士鹹香，一定滿足。細細份，就可以叫多幾款試～雖然細款只可以係厚批，但批底唔會硬到咬唔郁，仲鬆軟，同埋香口唔乾身。讚。黑椒無骨豬手拼香草腸($168)，製作要30分鐘，但邊食邊等，時間好快過。送上枱熱辣辣，豬手皮脆卜卜，超香。豬手已起骨，一大塊，食個陣，自己切開，肉嫩，唔會烤到硬。而骨膠原非常黏，完全唔膩，食肉獸必點。香草腸有3條，香烤過後，外皮脆，爆汁。而薯條炸完唔會油。檸檬惹味烤雞($21)，外皮烤完脆脆地，切開嫩滑，充滿肉汁，有蜜糖甜味。建議加錢食雞脾位，會更加惹味及滿足～～小食拼盤($92)，唔駛諗可以一次過試哂幾款，另有美式拼盤可以選擇。雞翼甜甜惹味，一樣多汁，而炸物就算放耐左食，都一樣好脆，咬落去，chopchop聲。餐湯足料，大量蔬菜中和食完炸物既罪惡感，湯底香辣，值得叫。整體，價錢親民，食物即叫即製，熱辣辣食，而且用心煮，尤其pizza餡多，肉類處理出色，開party叫外賣/人多一齊食，jeng。細pizza就適合胃細既人～…Read More

新興韓國菜餐廳，一入去好有電子感及機鋪feel。由門口至餐廳內整個環境打卡一流，邊食邊聽k-pop音樂。入座後，掃qr code落單。侍應會送上餐前小食泡菜，香香辣辣。霹靂炸豬腳($258)，必點。香港韓國餐廳少有炸豬腳，豬腳超級超級大件。拳頭咁大之餘，仲要件件都超厚肉，一客6大件。外皮炸粉完全唔厚，豬皮滿滿骨膠原，配醬食，更滋味。單食都唔覺得膩，可以配搭包生菜一齊食。原味芝士蛋卷($108)，拎上手好聚手，feel到有重量，面頭大量茄醬蛋黃醬。一切開，芝士拉絲，好治癒。啖啖都食到芝士，而且蛋味香濃，蛋卷夠厚，蛋嫩唔會老。就算好多芝士，都冇膩/食濟既感覺。另外仲有其他口味既蛋卷添。黑松露瀑布芝士炸醬拉麵($98)，一送上枱，就有陣陣黑松露香味。刺開蛋黃，與芝士拌勻拉麵，超邪惡。拉麵唔會煮得過軟，炸醬甜甜地，愈食愈上癮。第一次見啤酒配刨冰，韓國啤酒清新，刨冰口味有3款。荔枝味帶甜，開胃。刨冰溶化於啤酒後，令啤酒入口甜，唔鍾意啤酒濃味既人，飲尼個就岩，有水果甜味中和，容易入口。打卡一流添～整體，食飽後，仲可以係餐廳外面打卡影下相，走廊裝飾都有心思。食物份量多，食到好滿足。調味唔會過鹹。無論朋友聚會/情侶拍拖黎食，都非常適合。…Read More