Henry_Lam's Profile

大埔墟街市對出嘅幾條街巷都有唔少食肆。今晚收工經過大埔，想食日本嘢又唔知食咩好，於是揀左一鳴丼食堂。 其實一鳴嘅舖位係一分為二，一邊係主打拉麵，另一邊廂係食日式丼、刺身同壽司。此外，佢哋重會供應埋串燒。黎到諗唔到食咩唔緊要，入到餐廳可以再度下。😂餐廳因為供應多類食物，所以樓面面積相對較細。光顧當日正值星期五晚膳時間，而我哋係walk in，撇除預約嘅位置，只剩下兩個位置。所以如有興趣一試，建議先行預約。因為係放工去食嘅關係，所以有唔少個人物品。店員見到都主動提供協助，暫時將兩個預約座位暫借畀我哋擺放物品。我哋收左蛋汁吉烈豬扒丼定食同埋魚貝丼定食。定食除主想外，亦包含麵豉湯同埋漬物。餐廳會等所有食物備妥先送上，所以備餐時間大概十至十五分鐘。丼飯飯質香綿帶飯香，而且唔會黐牙。豬扒炸得香脆，唔會太硬身。炸衣厚度適中，而且無散開。丼飯亦有加入洋蔥絲同蔥花，平衡左豬扒嘅油膩感。魚貝丼方面，魚生會同飯分開送上。魚生鮮甜無腥味，當中魚類刺身相對突出，尤其是三文魚肥美無渣。是次用餐經驗唔錯。下次經過大埔墟時會試埋一鳴拉麵質素如何。 👍…Read More

今晚到大埔接老婆，之後直接喺大埔嗰頭食飯。茶舍嘅大埔分店裝修有啲走cafe風，但同啲裝修似西式餐廳，而實則係茶餐廳嘅餐廳唔同，茶舍嘅餐單提供唔少西式或日式食物，例如沙律、pizza同甜品。我哋叫左煙肉凱撒沙律、煙三文魚火箭菜薄餅、忌廉鮮菌天使麵同一杯芒果沙冰特飲。當時大概夜晚七點，正值晚膳時間，但係落左單之後五分鐘，飲品同食物陸續送上，非常有效率。首先上枱係芒果沙冰。冰都打得好好碎，而且芒果味道頗濃，可以一試。沙律方面，同傳統凱撒沙律唔同，餐廳落嘅煙肉量多，令煙肉香相對突出。薄餅餅底係港式鬆厚批底。餅底唔會焗得太乾，用料亦足。火箭菜喺pizza焗好後再放上，為成個主菜味道唔錯。天使麵係最後送上：麵質偏軟，味道喺平均之上。用餐完畢離開餐廳時，門外約六至七人等緊位。如果大家晚巿約七八點到達，堂食嘅話可能要等一等。…Read More

太和人口唔算多，但出乎預期有唔少bar/酒舖。今晚就去左太和嘅Noc Noc搵食。餐廳嘅座位編排唔會好逼，枱與枱之間留左唔少空位。食嘢飲酒傾計黎講係個好地方。如果鐘意飲酒，建議黃昏時間黎，因為餐廳有個啤酒任飲plan。嘢食方面係西式，但種類唔算少。今日叫左牛油果火箭菜沙律、檸檬蟹肉忌廉意大利麵、西班牙海鮮焗飯同埋一杯Gin Fizz。首先送上嘅係杯cocktail，而頭兩樣食物大概10分鐘內送上，時間上唔使等太耐。沙律蔬菜數量頗多，反意大利麵相對地令人印象深刻。麵嘅醬汁啱啱好，上面灑上少量蟹籽，另麵嘅味道層次再提高。麵中加入幾塊檸檬，不妨試下捲起麵起後刷一刷檸檬，加上酸味後整體味道會幾新鮮。海鮮飯需時準備，有意一試嘅話記得先行落單。海鮮飯飯質偏向意大利飯，而且略帶辣味，有別於一般以茄汁為基礎嘅海鮮飯嘅單調。…Read More

今晚唔想煮飯，返工後去左屋企附近嘅豬屋食飯。豬屋店裏店外裝修都貼近日本居酒屋風格。供應嘅食物方面，由串燒、刺身、壽司到日式丼都有。餐廳嘅食物多元化，不過由於係掃QR code上網落單，所以成個餐單都可以一目了然。我哋今日叫左軟殼蟹沙律、福岡便當（豬肉為主）同奈良便當（雞肉為主）各一。餐廳上餐速度頗快，晚膳時間落單後十分鐘內已經上哂所有食物。沙律蔬菜好多，想攝入纖維嘅人必叫。此外，軟殼蟹全體炸得好脆口，尤其是蟹腳部分嘅脆度可謂同薯片差唔多。至於丼方面，飯量適中。不論係豬肉或雞肉嘅飯盒，丼中都有唔同種類嘅小菜，將同一類肉食以唔同口味同烹調方式呈現出黎。當中，吉列豬扒同雞塊粉衣唔太厚，而肉質炸完仍然嫩滑有肉汁。雖然係間民生區小店，但食物質素而言，呢間餐廳值得一試。…Read More

今日有事到大圍嘅顯徑一帶。該區食肆主要係小炒茶餐廳比較，反而近年興起嘅cafe就較少。今晚食嘅Dr. Cow，環境似cafe，但主打係牛肉相關嘅料理。餐廳亦有賣急凍牛肉肉食。餐廳由東主兩人經營，所以有別於連鎖店，菜單款式多元。我哋今晚叫左辣味麻醬日式牛肉烏冬同菠菜汁大蝦意大利麵，再加熱朱古力同一杯柚子咖啡。餐廳人手少，當日又係晚膳時間，但落單後唔夠十分鐘飲品已經送上。熱朱古力甜度啱啱好，飲落唔覺太甜或者太膩。隨後送上嘅係意大利麵。帶子烹調得啱啱好，唔會韌。菠菜汁調味恰到好處。麵質煙韌之餘唔會硬。最後嘅辣味麻醬日式牛肉烏冬，牛肉唔會韌，又有牛味。但一定要趁機食。第一次食辣味麻醬烏冬，比想像中要夾。不過唔太食得辣嘅人可能要叫店主輕手啲 😂…Read More

今日同同事放工後一齊黎到喺銅鑼灣新開嘅貓cafe。對Catio嘅第一印象係餐廳對衛生非常重視。Cafe入口當眼處放左消毒搓手液。進入餐廳前亦要穿上一次性鞋套。雖然係一間貓cafe，但入到去地上唔係點見到貓毛，打掃方面做得好仔細。餐廳開業無耐，所以人手唔太多，但餐單選擇上，數量可以接受。是日叫左免治豬肉意粉同桂花烏龍茶。落單後約十分食物就送上。意粉質感上唔會煮過龍，意粉醬汁比西式餐廳偏甜，貼近香港人口味。作為貓cafe，貓嘅數量同食物同樣重要 😂Cafe養有13隻貓。食客消毒雙手後可以觸摸貓隻。餐廳亦有提供貓玩具畀客人同貓貓互動。Cafe貓隻性格各異，不過都有部份貓隻比較親人，有啲甚至會跳上客人大腿上要人摸。是次係我第一次光顧貓cafe。對愛貓者而言應該係唔錯嘅消閑去處。…Read More

今日到銅鑼灣唱完K後搵食，突然想食下東南亞菜，上網就搵咗呢一間餐廳。當時係平日嘅晚膳時間，由於早到所以都仲有位坐。但無耐後面嚟嘅客人都無位坐，只能排隊或買外賣，可見呢間餐廳非常受歡迎。食飯途中見到唔少印尼姐姐都會喺呢度買小食或者外賣，相信就印尼人口味而言，餐廳質素應該有保證。有興趣嘅食客或者事先預約會比較好。我哋今次叫咗一個印尼小食拼盤，峇里燒雞，同埋巴東斑蘭尖塔飯，再加上兩個飲品：椰青同埋黑糯米特飲。首先送上嚟嘅係飲品。椰青體積大，而且侍應亦送上匙羹畀客人挖下椰青肉，連埋椰青水一齊飲。黑糯米質感類似紫米，甜度恰到好處。即使啲冰開始融化，仍然非常有味跟住著上枱嘅係小食拼盤，當中炸豆腐同炸雞塊有驚喜。炸豆腐豆味香濃，而炸雞仍然保留著雞嘅肉汁，令到雞塊非常鮮嫩。而佢哋點炸物嘅甜酸汁 比坊間酸味較為突出。其後上枱嘅係巴東斑蘭尖塔飯 。有別於坊間一般做法，佢哋先將鹹魚仔剢碎混入班蘭飯當中，令鹹味均勻混入飯中。另外班蘭飯嘅香料味非常濃郁 ，加上伴以香茅同檸檬草 製成嘅醬汁嘅蔬菜，令成個飯嘅味道平衡之餘有層次。最後上枱嘅係烤雞。同炸雞塊一樣非常鮮嫩，猶如白切雞一樣。但係烤雞上面搽咗醬汁再燒，部分皮嘅位置有薄脆口感。相比以前食過嘅連鎖東南亞餐廳，呢間餐廳舖面細細但味道上佳。鐘意東南亞菜嘅話絕不能錯過。…Read More

一直都知道臺坊呢間餐廳嘅存在，但因為舖頭店面面積比較細，午膳時間多數爆滿，所以一直都未有機會去食。早排因為夜晚要踢波，所以要早啲食晚飯。咁啱前幾日見到同事喺臺坊外賣自取，賣相幾吸引，於是今日特地去餐廳食飯。臺坊嘅套餐係會全日供應，而好似珍珠奶茶等嘅台式飲品加八蚊就有。相比特地叫一杯嘢飲，呢個配搭相當廉宜。今次叫咗個鹽酥雞肉燥飯，再加珍珠奶綠。首先鹽酥雞炸得非常鬆脆，但炸皮唔會硬，凍左都唔會覺得摻口。肉燥比起市面上其他食店唔會太鹹，比較適合香港人口味。肉燥當中亦都加咗少少菜脯，為肉燥增添口感。珍珠奶綠方面，珍珠有咬口之餘唔會太韌，唔會出現咬到咀軟嘅情況，甜度亦啱啱好。奶茶茶底茶味足，即使冰塊溶哂，嘢飲仍然好有味。今次食飯經驗唔錯，有機會要試下其他菜式。…Read More

今日到沙田圍一帶，到晚飯時間搵食時先發現附近一帶食肆唔多。最後揀左光顧和氣食堂。是日平日加上早食晚飯，一去到就有位坐。叫菜後大概六七分鐘開始上菜，速度正常。首先送上係軍艦同刺身拼盤。壽司飯體結實唔會散開。材料新鮮無腥味，當中三文魚同魚子尤其上佳，鮮味突出。其後上枱嘅係鐵板煎牛舌。牛舌切得好厚身，但火喉掌握得啱啱好，以致牛舌仍然非常柔軟。而牛舌亦充滿牛味。牛舌下方鋪有洋蔥，吸收牛肉肉汁後極為惹味。隨後送上嘅係主食黑豚肩燒丼。肉質唔會粗嚡，飯質軟熟，但相對燒肉而言味道會淡一點，所以熟食中建議先食。最後送上係石狩鍋豬骨湯。豬骨湯之上加上煎香左嘅三文魚頭同三文魚骹煮起。豬骨湯中唔覺有味精，而且同三文魚嘅味道意外地配合。總結餐廳水準頗高，難怪用餐期間不時見到有其他食客買外賣。…Read More

早排平日喺銅鑼灣一帶踢完波後已經係晚膳時間，上open rice search食咩好時見到Dodam Chicken有分店喺呢區。以前去過觀塘分店印象唔錯，最後決定去銅鑼灣分店食。Dodam Chicken其實比較建議晚巿去食，因為餐廳舖面設計喺一般F&B加bar，夜晚光顧更有情調，而且晚巿有酒精飲品供應。今次點左韓國冷麵、蜂蜜豉油香蒜脆雞，加上一杯cocktail。當時係接近七點入座，坐低無耐整間餐廳將近滿座。有意特登試下呢間餐廳嘅朋友最好先行預約。因為食客多，出餐要大概五到十分鐘時間。先上枱嘅係Corona Rowberry，係士多啤梨同冰打碎後再混以啤酒。士多啤梨嘅甜、啤酒嘅微甘同碎冰嘅口感令成杯飲品好有層次。而飲品造亦好適宜用黎打卡。隨後送上係冷麵。侍應奉上味醂同芥末，但個人覺得湯底完全夠味。麵質煙韌有咬口，湯入面有梨片帶黎清新感。最後到嘅係炸雞。雞件炸好無耐，拎上手有燙手嘅感覺。原本有啲擔心豉油會搶左蜜糖嘅甜味，但餐廳嘅配方令甜同鹹味平衡做得好好。炸雞表面嘅蜜糖用量啱啱好，成功造到脆脆口感。雞肉炸到啱啱好，juicy得黎又鮮嫩。總結餐廳令我好有驚喜，不過獨食真係會好飽 😂建議同幾個親友一齊食，可以試下唔同食物開心share。…Read More

聽名可能覺得風車係一間cafe，實際上佢係一間食西餐嘅酒吧。當時正值晚巿，但時間較早，進入餐廳嘅時候侍應都問我哋要唔要揀啲冷氣無咁大嘅座位，服務方面有質素。我哋叫左頭盤前菜各一，再加上兩個主食。食物等左幾分鐘開始送上。先上枱係頭盤嘅三色多士。多士底部嘅麵包脆身但唔硬，一次過試哂火腿、煙三文魚同咸牛肉，送酒或做前菜一流。跟住上枱嘅係前菜炒大蝦。廚師炒香煙薰香腸，以腸嘅鹹味做基底炒大蝦同配菜，加上少許沙律菜以清新做平衡，味道恰到好處。主菜之一嘅黑松露意粉，意粉上有配以芝士焗嘅大啡菇。大啡菇焗得啱啱好，香味濃郁之餘切開更有大量汁液。而意粉用上唔少嘅松露醬，拌以炒香嘅蒜片，味道香濃。而意粉本身亦煮得啱啱好，唔會過軟或過硬。最後送上係紐西蘭肉眼扒伴焦糖菠蘿。牛扒比想像中大塊，並按要求嘅五成熟烹調好。扒身無筋，而且食得出好濃嘅牛肉味。菠蘿比較少作為牛扒嘅配菜，不過當日所食嘅菠蘿香甜多汁，清新嘅味道出奇地平衡返濃味嘅牛肉眼扒。風車嘅主菜份量比其他西餐廳平均為多，落單時可能要稍為留意。…Read More

今朝到大圍明星飲茶。基於係屋邨附近嘅酒樓，所以對於食物以致服務質素，都控制左自己嘅期望，點知都係同預期有落差。我哋叫左八樣點心，不過當中蝦餃同鍋貼皮好厚。尤其是鍋貼，皮厚令到脆口嘅口感都唔突出。我哋一開已經叫左個蒸飯，但兩次催促下都要九個字後先送上。蒸飯質感過濕，感覺上好似將電飯煲蒸好嘅飯再翻蒸。除左食物質素有待改善，樓面明明有好多人，但舉手有唔少侍應就咁行過，好耐先有人過黎。早茶黎講，呢間餐廳應該下不為例。…Read More

今日去左太和，見一排無食泰菜想試下。本來以為可能要去其他區先有得食，上網search過就決定去木屋。到達餐廳後，餐廳職員好友善咁帶我哋去分配左嘅座位，同時介紹而家做緊咩嘅set menu。我哋叫左個二人餐，再加一個馬拉盞炒通菜，飲品就叫左青檸檬梳打。最先上枱嘅係梳打。飲品杯入面已經有少量青檸檬汁，就泰國入口嘅樽裝梳打倒入去都己已經夠味。當杯入面嘅冰融得七七八八，可以篤下啲青檸。咖哩花甲同蒜蓉包都好快上枱。咖哩香味濃郁，而薯仔都頗為入味。更難得係薯仔係焗/炸過，入口唔會淋哂。蒜蓉包有驚喜，熱之餘夠香脆，包上面蒜蓉醬更令人回味無窮。之後送上嘅係馬拉盞炒通菜。有別於一般泰式餐廳，菜係用熱嘅砂煲上。咁樣令菜更加乾身爽口，亦將馬拉盞香味進一步揮發。最後上嘅係泰式拼盤同炒金粉。啱啱食完啲濃味食物，泰式拼盤嘅青木瓜沙律酸酸甜甜，正好平衡返。而炒金邊粉就味道正常。離座時見到餐廳滿座。所以如果呢間餐食晚巿，都係建議先訂位。…Read More

今日同同事約好食飯，但天氣不似預期，所以揀左距離公司比較近嘅意式餐廳食lunch。餐廳lunch供應two course同three course，有六樣主菜可供選擇。落單後，侍應先送上一籃麵包。麵包係凍嘅，質感偏硬而且無咩麵包香味。之後送上嘅係廚師沙律。有別於一般嘅擺盤，餐廳係將所有材料分開咁放上碟，而唔係先將食材混和。咁除左可以食到唔同材料本身嘅味道，食客更可以混和唔同材料食出更多嘅味道配搭。最後上枱係螺絲粉，相比起黎最為出色。醬汁煮得好濃郁，而螺絲粉就煮得啱啱好，有咬口得黎唔會硬。用餐後落大雨，店員好有善、主動同我哋講可以經另一通道離開餐廳到行人天橋。餐廳環境係坐得舒服，方便客人傾計。然而，餐廳設有露天嘅可吸煙嘅座位，煙味會飄入室內，唔食煙嘅食客可能要留意。…Read More

今日同事請食飯，由同事拍辦揀左呢個餐廳。事前已經被告知餐廳平日午時好多人幫襯，餐廳午時又無得預約，所以十二點已經去攞位先。結果到大概十二點半時餐廳將近滿。餐廳午時主打日式湯烏冬，或有刺身、丼飯等可供選擇，而午時套餐會跟飲品同軟雪糕。我自己揀左雞肉湯烏冬，配上壽司。烏冬口感滑溜彈牙，即使食到最後都唔會淋哂。撇除胡椒嘅調味，湯自身味道偏淡，因而食得出菜蔬配料嘅味道。但上述嘅胡椒味有啲搶左湯嘅味道，過份突出。壽司方面魚生正常有鮮味。而最後軟雪糕反而有驚喜。雪糕係連碟一齊放入雪櫃保存，所以唔會溶得太快。雪糕呍呢嗱味濃郁，食完湯麵做甜品確實唔錯。套餐份量多，商業區黎講呢個價錢算抵食。餐廳午巿非常忙碌，食午巿要有心理準備要等少少時間先有侍應過黎。…Read More