yuchiro's Profile

Non Kitchen本店食過好多次，鍾意佢個自助沙律吧，見開左新分店，地點易搵左就book定枱黎試下🤤新店裝修光鮮亮麗感覺唔錯，坐低後睇睇餐牌，決定點份Set dinner for 2，個餐幾多口味揀喎。⭐Welcome food入座送的餐前小食，賣相幾靚有心思😊⭐是日餐湯及沙律有粟米湯、蒜蓉包同火腿沙律，味道唔錯。⭐咖啡黑椒烤羊架主菜一揀左羊架要七成熟，羊肉嫩滑入口鮮味，黑椒味好香，細細品嚐仲感覺到輕微咖啡味，好食😋⭐地中海香煎比目魚配櫻花蝦乾蠔豉比諾飯主菜二要左比諾飯，其實呢個term第一次聽，個賣相似煲仔飯🤔比目魚勁嫩滑，滿口魚油嘅甘香，仲有啲脆卜卜嘅魚皮。飯入面放左櫻花蝦同蠔豉同煮，香氣濃郁，入口係海產味仲有飯焦口感。其後再加上紅色醬汁，味道即刻有西餐feel😆原味同加醬汁都好好食喎。⭐巴斯克流心芝士蛋糕個餐仲有甜品芝士蛋糕，揀左冧酒提子口味，軟軟滑滑帶酒香，正！⭐凍檸茶個餐仲包餐飲㗎，冷熱同價😆食物好食環境正，朋友聚會又多個好選擇👍…

雞地有名的台灣菜餐廳羅東肉焿番出左新野，是晚就黎試下😋⭐無糖茉莉花綠茶 & ⭐古早冬瓜茶落完單店員好快就送上餐飲，無糖茉莉花綠茶同古早冬瓜茶都係跟餐送唔使額外加錢，冰冰涼涼幾好飲㗎，綠茶無糖好清香，冬瓜茶都只係微微甜啱口味。⭐紅燒牛肉湯麵先來的紅燒牛肉麵，湯頭濃鬱鮮味，牛肉大大件炆得軟腍，麵條有咬口，好食到湯都飲曬😋⭐一口雞魯肉飯跟住係魯肉飯，上面嘅鹽酥雞粒即叫即炸，熱辣辣好香脆👍魯肉肉醬半肥瘦幾香口，仲有半隻滷蛋同青瓜絲。唔好睇個碗平平無奇，原來好深㗎超大碗飯😝好飽呀。⭐玉米蛋餅蛋餅揀咗玉米口味，同樣係即叫即整熱辣辣，個餅煙韌有咬口，入面包住雞蛋同粟米，加埋少少醬汁已經好好味。⭐抹茶QQ麻糬奶酥厚吐司最後出場嘅就係今日嘅主角奶酥厚吐司，揀咗抹茶qq麻糬口味🤤個抹茶味好重好濃鬱，茶香勁正😍麻糬拉絲口感正，厚吐司有嚼勁，整體嚟講係好好食，想試埋其他口味添😍呢餐好多澱粉質好飽喲，食完真係大滿足🤤…

見元朗谷友推介喜樂個梳乎厘班戟，是晚特登嚟試下😋小店主推梳乎厘同雪花冰，仲有多款飲品同鹹甜小食，梳乎厘價錢58蚊起有兩件，都幾親民喎。⭐脆多多朱古力梳乎厘自己點咗朱古力口味嘅梳乎厘，雖然佢要脆多多，但係朱古力粉上面係淋咗黑糖珍珠，哈哈，開頭遠睇我以為係朱古力豆嚟㗎😆美麗的誤會。梳乎厘軟綿綿有蛋香，朱古力粉味濃微苦，正好中和返珍珠嘅甜味👍⭐超滿足奧利奧梳乎厘朋友點嘅oreo口味，上枱時已經有塌塌地嘅跡象😂oreo粉下得好多，整體嚟講微甜，係好食喎！⭐原味煉乳芝士條重點咗份炸芝士條，芝士味唔算好重，但炸得外脆內軟口感好正，點埋個煉奶甜甜鹹鹹咁又真係幾夾幾好食喎。⭐芝芝青提芝士奶蓋好厚有質感，有芝味又夠香滑，正！⭐雪山單樅個名咁詩情畫意但其實即係奶綠，個綠茶味幾幽香，要咗少少甜就啱啱好，茶香奶滑👍梳乎厘有水準值得一試，店內有少許座位可以堂食，梳乎厘嘛～梗係即整即食最正㗎啦。…

是晚係熱刺對阿仙奴，啟德體育園好旺啊😆我地一路行到去三館食越南野Ha Noi。呢間河內越南菜都有好幾間分店，價廉物美係食越南野嘅好選擇。⭐生熟牛肉湯河粉先來碗湯粉，湯頭夠熱又鮮味，再加辣椒同青檸仔提味，湯頭多左酸辣味更正😋肥牛片嫩滑，牛腩片有肉香，河粉滑滑嫩嫩好食。⭐越式咖哩牛腩飯一大碗咖哩汁再配上一大碗飯😆一睇就覺得好飽。咖哩汁幾香微微辣，入面有好幾件牛腩同薯仔，幾足料吖。⭐香茅牛肉三文治好鍾意食越式法包又叫左份，呢：個有少少失望啦，牛肉好少啊🥲但至少個法包夠香脆，塗左厚牛油同食到清新青瓜味。⭐炸蝦餅 & ⭐豬頸肉跟餐加小食有優惠，炸蝦餅香脆但無乜味，要點個酸辣醬先好食。豬頸肉幾好，香嫩有咬口😋⭐椰汁三色冰 & ⭐椰汁綠豆冰跟餐特飲加$12，叫左椰汁三色冰同椰汁綠豆冰，椰汁香甜幾好飲。全店滿坐好多人食，唔知關唔關有活動事呢？啟德體育園都好旺吖。…

建榮熟食市場係去完馬會後最近又最抵食嘅食肆，呢度就算平日都好旺，是晚八點幾鐘嚟到，冷氣房全部坐爆，冇冷氣位都有七成滿坐。朋友話帶我嚟食啲地道嘢就係嚟咗呢個建榮熟食市場，然後我哋食咗間餐廳叫建榮特色桑拿菜火鍋店，其實咩係桑拿菜？🤔先落幾個小炒，飲下茶飲下汽水傾下偈先。⭐瑤柱蛋白炒飯上到枱真係呆咗，大碟到係正常餐廳份量嘅兩倍，即刻覺得今餐叫多咗啦😂飯炒得香口唔油膩，入面有唔少瑤柱鹹鹹鮮鮮好好食，仲放咗啲菜粒增加口感，正喲😋⭐黃金四季豆黎大排檔食黃金嘢冇得輸，個鑊夠紅兜起上嚟特別好食，鹹蛋黃下得多，四季豆爽脆，食曬成碟都唔覺膩😍⭐招牌咕嚕肉顏色鮮亮好吸引，酸酸甜甜啱口味，肉粒外脆內軟咬落甘香，好食👍⭐酥炸牛坑腩一大盤牛腩炸得酥香，牛腩軟腍有口感，半肥瘦好正，不過全碟係肉真係有啲滯，呢碟至少四個人先好叫‼️⭐汽水天氣咁熱飲返罐冰凍汽水，爽！價錢平，份量大碟又好味，唔怪得咁多人黎食喎😋…

朋友介紹佐敦一間抵食嘅印度餐廳，個名叫小印度，喺永安商場後面，地點都幾易搵。坐低後，店員送上水同埋餐前小食，呢份胡椒脆餅都幾香脆😋⭐Lamb samosa 羊肉咖哩角先來份羊肉咖哩角，炸得酥脆。入面係咖哩免治羊肉加青豆，重香料味，好食👍⭐Lamb vindaloo 特辣咖哩羊肉朋友話要挑戰呢個最辣口味嘅羊肉咖哩，成個餐牌得佢有隻辣椒喺隔離，呵呵，睇下係咪真係咁辣先。入口係辣嘅，但配埋烤餅我覺得啱啱好😋入面有唔少羊肉，切塊狀，用上唔少香料，正！⭐Saag paneer 芝士菠菜咖喱另一款揀咗素菜咖哩，個人愛食芝士菠菜，個菠菜蓉好鮮味，再用上茅屋芝士，鍾意佢呢個乾身嘅口感😋雖然外觀睇唔出，但入面真係超多芝士，好正啊😍⭐Garlic naan 蒜蓉烤餅食咖哩點少得烤餅，今次揀咗蒜蓉口味，除咗蒜蓉之外，上面仲有唔少芫茜，入口煙煙韌韌有香口。⭐Banana lassi 香蕉乳酪入口酸甜有蕉香，仲好杰身添，飲一杯好飽㗎😆⭐Masala tea 香料奶茶重點咗印度嘅特色拉茶，上枱時勁熱，又香又滑好好飲！叫咗咁多嘢都唔使400蚊，抵食！…

行過見有新店咪試下囉，主食桂林米粉。先掃碼落單，米粉可以轉紅薯粉，仲有飯食添，小食選擇都唔少，價格定位親民。⭐肥腸米粉自己就點左碗肥腸米粉，要麻辣小辣。湯底都幾紅，小辣啱啱好，因為有酸筍同酸豆角，個人覺得湯底酸味比麻味更重，都幾好。肥腸處理乾淨，基本上所有肥膏已去除，滷得入味😋⭐肥牛米粉朋友要左肥牛米粉，湯底要酸辣小辣，但佢要走芫茜、走酸豆角、走酸筍，所以食起上黎個湯較似原味。個人覺得咁全走個湯底會變得單調，如非必要，都係保持原有啦😝⭐尖椒皮蛋軟綿綿嘅溏心皮蛋，仲重蒜香，正。⭐燴拌豆腐皮豆皮口感正，拌豆皮嘅油勁香口，店家話係自家秘製煉油，讚呀😍⭐哈爾濱紅腸仲點左份哈爾濱紅腸，哈哈，試下同一般香腸嘅分別嘛。哈爾濱紅腸口左緊實，好有肉感，仲有蒜香添，幾好食喎😋⭐凍奶茶 & ⭐青蘋果梳打凍飲大大杯，跟餐叫有優惠價👍叫左好多野好飽呀，又真係幾好味，值得一試😎…

是晚食左間隱世台灣菜，點解咁講？因爲佢門面係咖啡店，望真啲發覺有珍珠奶茶，再睇睇餐牌，有滷肉飯、牛肉麵等，咁得意就試下佢。小店肉qr code落單，發覺好多野都賣晒🥲好彩想食嘅仲有啫。⭐手工雞絲滷肉香腸拌麵拌麵醬汁調得唔錯，麵條有咬口，雞絲滷肉都下得多，呢碗麵勁多肉😆⭐宜蘭紅燒牛展麵湯頭好濃鬱，鮮味微辣幾正，牛展炆得軟腍，好食👍⭐秘製炸豆腐老板送嘅😆我地點嘅係鴻禧菇，但佢炸錯豆腐，送比我地食喎。豆腐外脆內嫩，辣醬惹味，正。⭐酥炸鴻禧菇 & 溏心蛋菇菇炸得水嫩多汁，加左香料同鹽調味，作為小食真係唔錯。另外喺碗麵度加咗溏心蛋，但原來佢係分開上，好流心好正啊。⭐鹽酥雞呢個真係有少少失望，估唔到啲雞件咁大件，食落去味道比較淡唔太“鹽酥”，但至少炸得香口嘅，而且加咗蝦片好得意，當普通炸雞食合格有餘😝⭐百香果三響炮 & ⭐芝士奶蓋高山幽蘭食台灣野就飲杯台式飲品啦，雖然佢嘅咖啡都好吸引😆百香果叫左少少甜，口味啱啱好，好有果香，仲有蒟蒻同椰果增加口感。另一杯要左清茶加芝士奶蓋走甜，芝士奶蓋鹹香綿滑好正，茶底清香好好飲🤤小店原來收八點，下次要早啲嚟唔好阻人收工啦😝…

母親節前夕訂咗枱同家人慶祝一下，揀咗校長燒肉嘅校友會雞煲，佢新開嘅雞煲可以無限加雞，食完雞仲可以打邊爐，當然出面自助區嘅嘢都係任飲任食啦。母親節前夕$248一位，包雞煲、火鍋、刺身、點心、自助區、甜品任食，飲品區有花茶、啤酒、汽水、清酒、梅酒、水果茶等，真係應有盡有。入坐即送八小碟頭盤，個人覺得辣雞翼尖同酸青木瓜絲幾正，牛肉滑同鯪魚滑爽口彈牙，海蝦鮮甜，牛肉片嫩滑。之後返叫嘅任食肥牛都唔差，兼落單麻煩都可以去自助區夾😋雞煲入味，雞件肉多骨少，無限加雞真係好吸引。哈哈，隔離枱起碼加左四次雞😝食完雞就加湯打邊爐，雞煲汁加湯已經好濃味，嫌唔夠可去醬料區調醬。入坐送嘅1L水果茶，好大杯，甜甜酸酸好飲！如果四位以上送4L裝，成個水桶咁大杯😆最後梗係食埋甜品，雪糕、雪條、布甸、啫哩杯、仙草涼粉、芝麻糊，多到數唔晒，仲唔夠？可加$10 movenpick 任食添呀🤪埋單個陣真係飽到上心口😝嘩嘩，原來樓下好多人等位，好彩一早訂左枱啫。…

紅磡谷友介紹新開張台式小店，見順路今晚就過黎試下。店門口都幾黑唔太顯眼，好在有熟路街坊帶路😆小店約十幾個位，入到去有客食緊，餐點望落唔錯喎。⭐秘製豬頸肉飯朋友點左豬頸肉飯，即叫即煎，煎得外面焦香，肉質肥美香口，一碗份量都幾多👍⭐香醋菠蘿豬軟骨飯自己點左豬軟骨飲，用黑醋汁炆的，炆得相當軟腍，軟骨位都唔使點用力咬㗎，入口酸酸甜甜幾特別，仲有一圈菠蘿，即刻個賣相靚晒。⭐麻辣珍珠餃麻辣汁正！珍珠餃一口一隻，嬌小可愛😆⭐生煎鍋貼鍋貼煎得香脆，有附上辣醬的，但個人較喜愛上邊個麻辣汁，哈哈，一齊點唔好晒。⭐千層胡椒拉餅 & ⭐千層紅豆拉餅仲叫左拉餅，朋友想食鹹，自己就想食甜，咁叫晒兩塊啦😆前得香脆，油酥感十足。⭐薏米水 & ⭐夏枯草小店有健康飲品揀，薏米水好濃味仲勁多薏米。是日涼茶係夏枯草，微甜啱口味。叫左好多野食得好飽，味道唔錯價錢親民，小店加油💪…

放工又到左公司附近的米線芳華食野，鍾意佢個湯底啱口味，份量亦比另一連鎖品牌大碗😋坐低即刻用qr code落單，咦咦～多左新野鮮肉餃子喎😋⭐四川麻辣湯米線點左麻辣湯要小麻小辣，餸就點左麻辣餃、魚皮餃同牛丸🤤呢個湯底嘅麻度同辣度都啱我，大大啖連湯都飲埋。麻辣餃都幾好食，肉鮮帶麻辣感覺，大大隻夠飽滿，下次單點一碗餃子先🤤⭐麻辣蕃茄湯米線朋友就點左麻辣蕃茄湯，麻辣得黎又帶酸味，但呢隻酸味又同酸菜唔一樣，都幾好味喎，等我下次都試下呢個湯底先🤤佢係食肉獸，餸就揀左腩肉同肥牛，腩肉厚切肥瘦間隔，正🤤⭐口水雞仲叫左口水雞，雞件嫩滑口水汁香口，下層的青瓜爽脆，正！⭐炸墨魚棗炸物即叫即炸熱辣辣，墨魚滑彈牙，點下口水汁仲正😆⭐楊枝金露朋友不喜甜話唔試，我覺得飲嘅楊枝金露幾正喎，酸酸甜甜，西米同芒果肉有口感，飲一杯好飽㗎🤤呢間米線真係好啱口味，幾時先開分店呀？…

唔講唔知雞地開左間新麵店，是晚行過見到先知，新店叫夏記粉麵。除左麵食，仲有小食同飯食。有十幾二十款麵食，諗左好耐先落單，哈哈，選擇困難呀😂⭐腩肉米線先來碗腩肉米線，好大碗，勁多腩肉同冬菇，炆得好入味，勁好食喎。米線爽口彈牙，湯頭微辣幾惹味，正！⭐新鮮豬雜米線另外叫左豬雜米線，湯底本身唔辣，入口係濃濃的豬骨味。仲附上一碟蒜蓉辣椒，鹹鹹辣辣好正。豬雜有豬心、豬腰、豬潤、豬肉，爽口鮮味。好好味，湯都飲晒唔好晒🤤⭐蒜香雞翼併滷蛋飯仲叫左碗飯試試，有三隻雞翼同一隻滷蛋，雞翼煎得香口，入口重蒜香味。滷蛋滷得入味，滷水汁香口。⭐涼拌豬耳又叫左份小食豬耳，意外地大碟喎。有紅蘿蔔絲、青瓜絲等同拌，入口清爽有口感，好味😋⭐凍檸茶 & ⭐可樂食辣野就梗係要飲凍飲，呢間個凍檸茶茶底好特別，味道有啲涼茶feel，又幾得意喎😆好味好味，食飽飽好滿足。…

假期到了啟德新地標行下，啟德零售館有三期，食店確實唔少，轉了一圈決定食“茶東西”。店內幾濶落，環境不錯。兩點多來到，午餐還供應，亦快有下午茶了，心大心細唔知點咩好添。⭐雙色芝士咖哩牛腩煲仔焗飯朋友先點了一個咖哩飯，原個煲仔焗，上面嘅芝士香噴噴，而下面嘅飯亦有飯焦嘅焦香，咖哩汁唔辣的，牛腩軟腍，飯炒底，整體唔錯喎。⭐北海道男爵薯餅跟餐加配嘅薯餅，以為一份得一塊，原來一份係兩塊嘅😋即叫即炸外脆內軟，有薯仔香，好好食。⭐茶記鹹牛肉炒蛋熱狗配德國薯仔沙律再嚟叫咗個熱狗包，上面嘅炒蛋又嫩又滑勁正喎，條腸仔仲有芝士拉絲添🤤薯仔沙律個人覺得偏淡，可以落返少少黑胡椒調味。⭐芝士安格斯牛肉漢堡配美式炸薯角另外點咗漢堡包，入面夾住牛肉漢堡扒、蕃茄、生菜同芝士，醬汁係千島醬，咬落多汁又鮮味，好食喎🤤差唔多全場嘅人都係嗌漢堡包下午茶餐，睇下佢幾受歡迎就知好食啦。⭐雪糕西多士最後就係share食嘅雪糕西多士，西多士厚身，中間夾咗吉士醬，上面仲淋咗大量朱古力醬，加埋溶咗嘅雪糕又香又甜好好食。不過都真係幾甜，個人建議兩個人以上share食會好啲😆⭐凍檸樂 & ⭐即磨咖啡凍檸樂係原罐上加檸檬冰底，即磨咖啡啡香奶滑，好飲！食下野傾下偈，再去新場館打個卡先😎…

是晚又來到街坊價良心外賣店尋味買晚飯，一家四口子點左三份炒野加兩樣小食，由於外賣人數眾多，店家話要等等先有，可以到附近商場hea一hea先返黎拎。大概半個鐘左右就有啦，拎上手熱辣辣，啲雞翼香到現場就想啪一隻🤤⭐招牌炒米粉必食炒米粉，炒得又香又乾身，放漏左都唔會一盒油！大盒又足料，好多餸一齊炒㗎。⭐咸魚雞粒炒飯想食重口味就要點咸魚雞粒炒飯，同樣勁香，鹹魚落得多勁惹味，好正！⭐揚州炒飯因為鹹魚太香，最後先打開盒嘅揚州炒飯就無咁香🤣鹹鮮霸度嘛。揚州炒飯絕對唔差，甜叉燒小朋友勁鍾意食。⭐手打牛肉餅呢樣又係無得輸，真材實料牛肉餅，爽口彈牙好好食。浸住嘅豬骨湯重蒜重芫茜味好正，湯都唔晒飲哂呀。⭐炸雞中翼即叫即炸雞中翼，大隻又香脆，食落有啲似越式牛油雞翼，總知就係正啦🤤不得不提個辣椒醬，超辣！爽！四口子都食唔晒三盒炒野，留低帶飯聽日食唔好晒😆…

是晚來到形點的堅信號食晚飯，同朋友選了靠後的一張二人枱坐，店內客人唔少，幾乎全店滿坐。用qr code落完單就慢慢等食，意外地上菜快喎，一落完單就有得食😆⭐蟲草花花膠雞配白飯自己點左份暖心湯飯，雞件很多花膠數塊，味道還可以，撈飯食唔錯呀。⭐秘製豬扒菜飯再來有豬扒飯，個豬扒甜甜地，有啲似叉燒嘅感覺，菜飯香口，幾正。⭐鹵水溏心蛋 & ⭐涼拌小雲耳手拍青瓜溏心蛋綿綿滑滑好食，青瓜雲耳酸酸地夠開胃。⭐堅信號生煎包最期待的生煎包來了，熱辣辣咬落爆汁，小心食呀呢個又香又脆又鮮味，真係無得輸😋⭐灌湯小籠包小籠包又係正，皮薄餡鮮又多湯汁，好食。⭐蕉氣十足包仲叫左呢個造形好真實嘅香蕉包，個樣真係勁似bb蕉😆聞落好香蕉味，入面仲有甜甜嘅餡，得意又好食。⭐凍豆漿 & ⭐熱茉香綠茶飲品都幾多野揀，凍飲加三蚊都合理啦。食唔晒包走左，聽晚加餸啦。…