唔知係咪關假期事，今日條小食街特別暢旺，間間都排曬隊買。係雞地悄悄結業嘅阿媽豆腐花，原來搬咗過嚟呢邊，而家仲多咗小食賣添。
⭐凍豆花
天氣咁熱叫返杯凍豆花飲下先，係呀～你冇聽錯唔係豆漿係豆腐花，一杯可以飲嘅豆腐花😋杯豆花本身無糖，你可以要求加黃糖嘅，甜度仲可以自由選擇添。甜甜地又滑溜，咁樣飲豆腐花又幾好味喎。
⭐麻辣魚蛋
仲叫咗份麻辣魚蛋，一份有20粒😋雖然顏色好紅但係食落其實只係小小辣，而且完全冇麻嘅感覺，我覺得叫香辣魚蛋可能會貼切啲。
⭐粢飯
原來佢仲有粢飯賣，咁可以早餐嚟呢度買喎😋粢飯加豆漿咪啱啱好囉。講返件粢飯，都幾大舊㗎，有手掌size。入面包咗油炸鬼肉鬆同榨菜粒，味道正正常常，飯就硬咗少少，不過可能放到三點幾先嚟買啫，早餐時段新鮮做應該會好食啲。
⭐芝麻卷
最後就係芝麻卷，突然間文藝復興多咗好多街舖做呢個失傳嘅小食，呢間個芝麻卷都幾香芝麻味，入口煙煙韌韌滑捋捋，都唔錯呀😋
幾十蚊食到咁多嘢😋間唔中出嚟掃下街，心情都好啲。
