中 伏 達 人 's Profile

平時見尖沙咀那家分店大排長龍，沒有九點吃不了。今天6時多在荃灣，見不用等位，便馬上去吃。兩個人點了一碗碎蔥吞拿魚腩魚生飯（$168），一碗特上北海道魚生飯（$158）和一份立脂特上壽司拼盤（$138）。大概五分鐘左右上菜。首先先試的是壽司拼盤。先吃了一舊池魚，無可厚非是賣相很好，而且是飯和魚的比例也很好，池魚肉厚，惟一不好的是沒甚麼魚鮮味，它的味道僅僅是我蘸的豉油和醋飯的味道。再試海膽，味道也是一般。需知道海膽如果是不新鮮，食落會有一陣廁所味。但這個沒有難吃的廁所味，甚至海膽可以整塊夾起而不會散，但它就是沒甚麼味道。吃了壽司再吃北海道魚生飯。賣相真的很好。醋飯是暖的，不過配上芥末同豉油能夠釣出飯味。刺身精緻，不過同樣，我還是吃不出甚麼味道。我想沒有味道，大概是食材本身不算新鮮。其實味道還可以，少了一點滿足的感覺，同樣價錢，區內同樣有其他選擇。…Read More

點了一個蜜糖雞餐轉配磨菇飯外賣，雖說外賣自取九折，但外賣要加3蚊（而我只有兩個外賣盒），已經覺得有點搵笨。但更巨大的衝擊更是接踵而來。先説蜜糖雞，有一塊雞槌和雞胸，份量是足夠的但非常難食。上面的蜜糖塗得滿滿但沒有味道，雞沒有肉汁，咬下去有怪味，怪味是那種放了很久，如果今晚不吃掉，明天就會變臭需要倒掉的那種，非常不新鮮的味道。吃了雞槌已經不想吃下去。所以試試磨菇飯，同樣也是超級伏。磨菇汁非常的鹹，鹹到不想吃。而它的飯，一打開有陣陣飯味，但強調不是飯香味，而是那種感覺閂塊蓋放了很久的那種。當然飯講不上口感，是一塊塊的有些黏黏的有些是又乾又硬的。唯一最正常味只有可樂。其他只可以用難食嚟形容。是不可一不可再的餐廳。…Read More

書局街不算長，走到盡頭你會發現轉角還有一條小巷子。裡面全部都是食肆。午飯時間人流如鯽，其中一家人頭湧湧的，就是這間食肆了。一個人吃飯的好處是，你總能在人龍滿滿的隊列中找到堂食位置。這次也不例外，門外站滿了人，我第一時間就能進去。第一次來，穩穩陣陣就點了一碗麵招牌肉骨茶和斑蘭奶茶。盛惠87蚊。不消五分鐘，菜已上齊，是標準香港速度。湯上來的時候是能渴的溫度再稍熱一些。這點很滿意。味道也不錯，沒有中藥的味道，不過辣度我略嫌不夠，吃得出辣味是來自胡椒，但未至於辣到喉嚨，味道僅在口腔中就消散了。相反排骨就很好吃了。兩大條排骨是吃得出的新鮮。咬落有肉香味，肉汁散溢出來，而骨頭邊沿還有少少骨膠，非常好吃。要說不足的話，配菜有點少。其實這肉骨茶內就只有兩大條排骨和一整棵蒜頭，但我並不生吞蒜頭，所以菜餚的份量略嫌不足。至於斑蘭奶茶，就是拉茶上灑上斑蘭粉，對我而言略為甜了一點。整體來説是算是好吃，下次可以試試咖喱，看店裡還是頗多人點的。…Read More

網上說這是一家fusion 餐廳。我不懂甚麼叫fusion菜，反正menu裡有中式日式的選擇。店裡推介的是籠仔蒸飯，但我看客人點的都是咖哩豬扒飯，於是我也點了一份豬扒定食。豬扒定食有一碟涼拌蒿荀，汁是日式芝蔴醬。配一些雲耳，我想fusion 就在這裡，中式涼拌配日式醬汁，配搭還好，不過蒿荀無味。主食是咖喱和炸豬扒。咖喱不辣，也沒甚麼味道，反而咖喱裡的薯條好吃。如果多點蔬菜會更好。而最好吃的是炸豬扒，食材不怎麼樣，但是炸得很鬆脆。再加一杯奶茶，盛惠$73。午市來說價錢稍高。…Read More

是日年初四，心血來潮突然好想食放題，去到銅鑼灣只有呢間仲有位，就馬上book 左。去之前上網米略比較過，比起同區放題，壽司刺身款式少左小小，。而當日無海膽同燒海蝦，價錢183一位未加一，食兩小時，對我黎講都係可以接受。然而首先我想講，並唔係的野好唔好食，而係出菜非常慢，餐廳只坐滿2/3間，約20分鐘先有第一樣野食。我一開波入左四張紙，都係壽司同刺身，壽司三張紙有兩張無黎到，隔左一個鐘左右我問職員係咪漏左單，漏左我就再叫過。點知佢check 完之後覆我話的單係度，不過仲有十幾張排。刺身就不用說，數量唔啱叫左無黎係常見。不過後來我叫左個香蔥吞拿魚軍艦，軍艦無左的蔥。同一張紙劃左五種串燒最後只黎左一樣，仲有的成張紙到我走果時都無到。唔知係上菜真係好慢定漏咗。我諗佢廚房可能真係好唔夠人（可能新年呢）。不過亦因為咁，好多時我都係等而唔係食。另外想講下佢部新既熱水機，相信係因為係大陸買，所以部水機淨係講的好沙既普通話同簡體字。（即係較到勁大聲都聽唔到佢講咩果的）。斟熱水要長按個掣解鎖先禁得，咁啱餐廳有其他外籍人士同長者，結果佢地完全唔識斟水，企左係度好耐。其實係咪可以貼返的Labels，user friendly少少？食物方面，只能說一般。刺身不肥美亦無味。但未至於唔新鮮食唔落。解饞可以但好食就未到。無乜特別令人印象深刻既野食。所以試過就好了。不過如果要數難食，佢既海鮮粥就非常唔建議大家叫。海鮮粥有蟹膏八爪魚元貝，不過碗粥無味。如果腸胃炎食就好適合啦。整體黎講就無乜太大驚喜同印象，不過可能因為食過旺角有間好多好評但極難食既放題，所以覺得呢間還好。但就唔會去第二次。…Read More

朋友生日，本身打算食自助餐。但由於疫情關係，大部分都無開。見open rice 咁多好評，就打算試試。因為兩個人食既份量唔多，為左試多少少野食，所以每款刺身只叫兩件。上菜之後當然數目完全不對，有的更加無出現到。但唔緊要，好多放題都係咁，我不以為意。首先先試佢的蝦，因為見到佢蝦既種類好多。結果全部無味，一的鮮或者甜既感覺都無。你要知道蝦如何唔好食，你除左食到佢滑潺潺既感覺。好嘔心。然後到三文魚，好難食。首先，佢無味，其次，我篤過佢的肉，唔識彈返上黎。即係話條魚死左好耐好耐。咬落仲淋淋地，食落去果種勇氣同食紅豆壽司差唔多。再黎蛋，完全無味。跟住係北寄貝，有大量粗沙夾雜。唯一比較正常既係象拔蚌以及係鮑片，好大程度係因為佢地係罐頭貨。螺同帶子，無黎到。壽星已經係極度失望。我建議不如食下的熟食。結果再度中伏。上菜數量比我地叫既黎多左好多，結果全部都浪費晒。我地叫左一碟炸蝦天婦羅，同樣地，咬落去根本食唔出係乜野，的食材毫無味道。而天婦羅配上既汁都係無味，而且無蘿蔔蓉。極度失望。之後仲有牛仔粒同牛肉火鍋，好難食。雪糕全部都係韓國牌子，貫徹始終咁難食。佢點難食法？就係的雪糕擺左三十分鐘都無溶。我真係唔知我咬落去其實係食緊的乜。結果成餐飯係貼錢買難受。第二日朋友仲肚痛。以後都唔會再黎。…Read More

人生之中總會有幾餐是刻骨銘心的。也許是味道讓你難以忘懷；也許是經歷讓你不敢忘記。不管是驚慄或是感動的餐點，那些都像人生中極快樂或極悲傷的回憶一樣，具標誌性但佔人生很小部分。其餘餐品就像中小學時代學過的知識一樣， 花上了人生五分之一或更多的時間，水過鴨背而不留痕跡。而偏偏這些不曾着跡的食物和知識，又足以決定你的未來和健康。所以像是我這種無飯家庭的人再怎麼胡亂進食，閒來無事也總要預備幾間健康飯堂在手。雖然不一定好味，但起碼要健康。說是飯堂，其實這糙米家還是頭一次吃。餐牌大部分都是主打糙米飯和沙律，再看真一點，其實好像除了糙米和生菜以外，餐單裡還是充斥着肥美的肉香和醬料(致肥的元凶)。感覺好像是和尚進了新式素食店一樣，戒口不戒心。在一番健康與美味之間掙扎後，最後我選擇了名字香口又肥膩的蘋果咖哩雞扒糙米飯，盛惠$47。先撇開味道不談，只講材料的話，糙米的食用價值的確很高，糖含量比白米低之餘，又易產生飽肚感。所以一直受節食人士追捧。而這裡選用的紅米，亦是糙米的一種。份量亦調得很好，白米紅米比例各佔一半，消化能力較弱的人也可試試。說是健康之物，其實與茶記客飯不相伯仲。雞扒的份量和味道與其他茶餐廳一樣又多又濃味，分別只是蔬菜比茶記多而已。而菜味較為原始，只是純燙菜，新不新鮮一吃便知。至於咖哩，它並不像日式或印度一樣甜或辛辣，甚至可以說帶點鹹和甜味。只要你不想像它是咖哩，其實伴飯還是不錯。整體來說，味道是好吃的，但絕對算不上健康，因為份量實在太多。感覺客飯是一碟符合經濟原則的產物，為了迎合市場需要: 客人付了差不多50元，店主的責任就是提供過剩食物......總之要抵食。結果健康的東西味道也開始變調了。不管如何，它還是我吃過最豐富的糙米飯。所謂的份量和熱量，最後還是視乎你的攝取量。要是管不了份量，就控制一下食量。糙米還是比白米好，只要自律一點就可以了。我還是相信那句，吃好東西當然好，但總沒有人願意把山珍海錯變成例行公事天天進行，這只會削減為味蕾帶來的刺激，養成挑食這類都市病，降低末日時生存的機率。當然這是另一個話題了。…Read More

根據openrice官方登記估計，粉麵米線類店舖合共有2464間。要係芸芸上千間米線舖裡突圍而出，絕對需要一碗出色既米線壓場。而成就一碗出色的米線，離不開3種要素: 湯底、米線、配料。我並不算米線愛好者，以不算吃過很多的經驗來說，湯底我認為譚仔的麻辣湯底令人印象深刻，而米線則鍾情於南記幼滑的質感，配料則以唯一雲貴川(荃灣)的腩肉最令人懷念。即使如此，俱備齊三種元素的米線舖，卻是寥寥可數。新近得悉荃灣原來有一間人氣鼎盛米線舖，光是排隊就要用上一小時。雖然我認為排一小時的隊有幾分誇張，但打公仔食飯都頂多1.5小時，這些事寧可信其有。幾番掙扎下，終於等到一個沒有老闆的下午，我誘拐了幾個同事和上司一起同流合污去吃。原來排一小時隊的說法所言非虛。米線鋪開12:00，但其實只是樓面開檔，安排我們坐下來繼續排隊。我們算是早到，從11:50開始排，一直到12:40入坐第一席。店舖屬於小本經營，樓面連廚房合共4人，傳聞爐頭還只有4個，即叫即做，所以上菜並不快。大概等到13:05左右，米線陸續送上。算一算，還真的等了1個多小時。聞說這裡有一種獨特的湯底叫蒙古湯，又有一種米線叫蟲草花雞米線。這些聽起來都非常吸引。但本着比較的心態，所以還是選了麻辣米線，起碼其他店有。配料則選了牛腩和炸雞。一碗$47元。相比起其他店，聽起來價錢確實是貴了一些。但吃起來卻確實是物超所值。別以為價貴就是只賣名氣，其實價錢是賣份量的。相比起其他米線店，它的份量相當於1.5份(後來吃完午餐之後當天再也吃不下晚餐)。湯底濃辣，辣味中帶一點甜，不像譚仔麻辣湯底那樣有強烈的個人特色，但絕對感受到真材實料。米線偏幼身，不是我偏好的幼滑質感，但起碼條條分明，也不是碎米水平。配菜簡直是一賣點。我點的是炸雞球和牛腩，起初以為牛腩像坊間那些只有半隻手指一樣長的牛腩塊。誰知夾出來比我手掌還要長，而且不是只有一條牛腩，是有3條牛腩那麼多。牛腩像台灣的牛肉麵一樣，半肥半瘦，又香又稔，充滿牛味。咬下去還能隱若看見嫩紅色的肉。而炸雞球同樣出色，外脆內嫩，最緊要是炸得剛剛好，既不乾身也不油膩。咬下去還有陣陣雞油滲出。非常juicy。總括而言此餐是非常非常飽足。雖然花了很多時間等待，但還是非常值得的。其實米線和湯底並不算很有特色，可能我還沒試蒙古湯吧。但的確比一般米線店質素好一點。反而配菜則是非常出色，令人一試難忘。總括來說我並不推薦大家去吃，因為要是它再出名一點的話，我又要再排久一點。特別是此店位於舊式街市之中，沒有冷氣和排場，只有熱汗與人龍。空氣亦不算流通。這裡質素比效率來得重要，要來吃米線的朋友，似乎要多點心理準備。場內設每人最低消費$40(好似係...)，建議蚊蠅肚的朋友少米及叫單餸，避免浪費。…Read More

自中學時代起，已經是銀咖喱的常客了。學生時代光顧它，無非是貪它便宜 – 一碟香脆味濃的咖喱吉列豬扒飯只售廿幾蚊（陳年舊價），又多肉又飽肚。每次和一大幫朋友打完波去吃一碟，感覺就滿足了。後來投身社會工作後，恃住銀包有幾塊銅板，有一段時間也沒吃它。反而跑去其它薄有名氣、動輒要價$80甚至$100的連鎖咖喱飯專門店，花一小時排隊去吃一碟賣相當精緻的咖喱飯。咖喱飯是好吃，但後來發現其實日式咖喱再怎麼變，來來去去還是離不開同一塊咖喱磚。現在去光顧它，仍然是貪它抵食。雖然它絕對稱不上是上乘的日式咖喱，配菜亦乏善可陳，但味道絕對不輸其他日式咖喱店，而且價錢還只是連鎖店的一半。既然如此，我又何苦慕名花多一倍價錢去吃名氣和環境呢？餐牌上大部分的咖哩飯都吃過了，特別是富士山咖喱飯，份量列明是1.5倍，如果是大胃王，一個人也可來挑戰一下。但對我呢種已過發育時期既人黎講，絕對要夥拍朋友方可體驗。一碟價錢七十幾蚊，有豬扒有芝士有香腸(就是少了菜)。偶爾與伴侶吃到不知要吃甚麼的時候，可以選擇來吃。但我今天不是來吃富士山咖喱飯，所以亦不再作詳述了。這次我是為了咖喱豬扒飯而來的。咖啡吉列豬扒飯，一碟34蚊，飲品另計。當然如此價錢，要求亦不能太高，至少你不能要求咖喱入面有椰菜，紅蘿蔔或者薯仔之類既配菜。咖喱汁就光光只是咖喱汁，幸運的話可以吃到一點點薯仔碎和肉粹。不過沒配料不代表就是不好吃。咖喱的味道非常標準，是典型的日式咖喱。而豬扒同樣炸得外脆內軟，仲要有少少肉汁。如果塊豬扒再厚身少少，已經與其他貴價咖喱飯專門店一樣。但畢竟只是$34，走的當然是平實精簡風格。以果腹為主，沒有多餘的配料或點綴。如果要求有精緻賣相，豐腴的口感，一分錢一分貨，可以選擇多付一倍時間和價錢去排隊吃好一點。如果是吃膩了浮華美饡，或是想另覓平店試平野，亦推薦大家試試。…Read More

俗語有話: 飯要吃硬的，麵包要吃軟的。但由細到大，吃開的麵包都是空心的。雖然菠蘿飽、雞尾飽，麥飽都香甜美味，但吃起來總感覺像棉花糖一樣虛無縹緲。往往要吃夠2個才有果腹感。漸漸也開始偏向吃比較實在的麵包，例如日式麵包或是法式麵包。當然，吃麵包通常也只是早餐limited，嘴裡說挑食其實也腳也不聽使喚，總在巴士站附近隨意買個包吃完就算。那當然只限早餐，晚餐辛勞了一天，自然想吃好一點。今晚適逢周末晚市黃金時間，稍微有點名氣或裝潢的食店都大排長龍。唯獨是這家店，空桌子比坐上客還要多。平日也不曾經過此店，一直未試過它的麵包。雖然餐牌上的選擇並不多，但今晚不餓，更不願意排隊。於是一家人抱住好壞通吃既決心試試新菜。餐牌上只有9個餐，主要以麵包為主，而且麵包樣式大概只係餐包款，例如蒜蓉包或者是宜家傢俬熱狗款。價錢卻由65-80不等，這下已完全解釋了為何此店人流較少。我們抱住一試試晒既心態，叫了2款麵包餐同一個意粉餐。我們選擇了卡邦尼意粉，套餐$70附送迷你麵包及餐湯，味道不算很好，但份量就非常足夠，感覺像是吃1.5碟意粉一樣，配料主要是煙肉、洋蔥和磨菇。賣相的確是很好，但味道太淡，似是分開先將意粉煮熟，然後再澆卡邦尼汁上去。而汁亦沒太大特色，味道像金寶湯罐頭煮成的汁一樣，而且有點稀。感覺比茶餐廳的意粉西式一點。還是那句，對於熱愛健康飲食的人來說再適合不過了。而且特別係發育時期既朋友，份量的確非常充足。如果細食的話一個餐絕對可以share食。雖然如此，但我認為意粉餐的重點並不是意粉，而是隨意粉餐附送的迷你麵包籃。味道讓人一試難忘。麵包像是是日精選一樣，沒有特定的包款，但有刻意配搭過。蒜蓉包主打脆，外邊鬆脆香口，包餡蒜蓉味濃；白色的應該是莓子麵包，主打香軟，另一款則是打煙靱，三款的口感全然不同，卻又好match. 無論你偏好哪一款包，都絕對啱口味。紫蘇海鮮鄉村多士餐($68)，紫蘇味道不算很突出。但麵包就非常搶味，多士烤得恰到好處，外脆內軟。多士上既海鮮則是不過不失。配菜有典型日式沙律、凍薯蓉同涼拌甘荀，味道正常，食材都算新鮮。作為麵包餐而言，份量就很足夠，以一個完成發育既胃黎講，係非常飽同滿足，而且算係比較健康。另一款熱狗餐($60)，配菜一樣，熱狗麵包同樣滿意。其實熱狗並不算大個，差不多約8寸左右。上面既芝麻非常搶味，麵包是熱的，口感軟熟得黎又帶點QQ。加上脆皮腸同芝士做餡，芝士味不重但非常好吃。當然價錢上，一個餐要價60，我仍然認為是偏貴的。畢竟我們都帶點種族歧視認為漢堡以外既麵包都叫小吃和早餐。同區內另有一檔位於橫巷的熱狗小店，同樣款式賣$25-$35。餡料有司華力腸同其他醬料選擇，單論麵包是否飽肚當然是輸了；但此店麵包跟餐配湯及配菜，麵包亦較為新鮮和健康，食完亦唔會似食漢堡或其他熱狗一樣又膩又滯，取而代之既係飽肚而又清新既感覺。…Read More

平日要工作，假日又忙住去玩。往往都錯失左好多飲茶既機會同時間。久而久之，去酒樓飲茶幾乎變左不可能既事。但係香港人鍾意飲茶，呢樣習慣係永遠都改變唔到既。所以每隔一段時間，都需要去點心舖止一止癮。今晚晚餐就到左地鐵站附近既夜茶店試下晚茶點心。點心舖最大特色係無須加一服務費，不過茶位就位位照收$9蚊。只係陸羽茶包茶。點心相對酒樓黎講貴1-2成，圍番加一其實價錢唔差得多。不過點心舖始終係點心舖，點心質素就可靠一的。最起碼如果我要一籠馬拉糕，你唔會擔心佢係果的的倒汗水整到濕晒既馬拉糕。整體黎講，呢間點心點食物質素唔算差，但就少左一款招牌主打既點心。味道好但少左一份令人一試難忘既感覺。我地一行三人，共叫左九籠點心:燒賣 ($28) - 1粒燒賣2粒蝦，味道正常，有少少雪味，以價錢黎講唔算抵食煎堆仔 ($20) - 炸得唔算油，香口但未令人驚艷。黑松露野菌餃 ($29) - 黑松露本身味道濃郁，配番清新少少既菇菌類，非常好味。唯一美中不足係一蒸完馬上拎出黎，當時皮太軟，口感差左少少。如果攤多一陣，等佢硬番少少，就非常好吃了。糯米雞 ($29) - 有點失望。以29蚊來說，我期望入面有雞翼。但係配料不足，僅糯米豐富。味道亦不見出色。土魷肉餅飯 ($24) 個人認為係眾多點心之中比較好吃的一碟，味道較濃郁，亦都比較肥膩。馬拉糕 ($18) 自細就好喜歡食馬拉糕，只要佢唔係濕，我都覺得好好味。生煎菜肉飽 ($19) 香口好吃，美中不足是個人偏是好菜多於肉，而它恰恰相反。總體黎講，店舖食物並唔算非常好吃，食材亦唔算新鮮。而點心款式亦唔算多(因為無雞札)。以價錢而言略微貴少少，所以晚市黃金時段人流唔多，坐得舒適之餘侍應亦招呼周到。若然是食開味淡要求不高的人，此店仍不失為一個選擇。…Read More

自從囍帖街變成了歐陸風情的利東街後，很久很久也再沒有來過。變天後，看到歐陸陽台佈景板，總感覺被人摑了一巴一樣--丟了我們幾十年積累下來的歷史建築，換成一塊塊沒有個性的仿歐洲佈景板，然後當成是景點一樣在旅遊網站介紹出來，實在有點羞愧。算了吧。反正這是我第一次來，也不妨做次遊客，在陌生的地方裡尋寶。尋寶當天，剛好有個小攤檔，推銷免費小咖啡。只需要在facebook裡like page，留email即可免費試飲。我沒有甚麼個人資料可出賣，如果能換杯咖啡，就把它當成收入吧。賣完資料，職員給我一個杯子，讓我到地下商場內的主店換咖啡。免費咖啡有三款，cappuccino, latte同 espresso。我選的是cappuccino。感到欣慰的是，雖然是免費咖啡，但每杯還是客到後再沖，不像某便利店想當年免費派咖啡一樣，未到時間就先沖好。拿到手上已涼了。不過，這杯咖啡到手的時候也沒如我想像中熱，個人偏好燙口(不良習慣)，而這杯喝起來並不算暖胃。至於咖啡味道，個人認為很好喝，但未至於出色，相較於大型咖啡連鎖店，咖啡味道較濃郁，但份量比較少，只有一個紙杯size。而作為cappuccino，個人認為它的奶泡比較薄，可能是遷就份量之故吧。唯一完勝連鎖店的，就是它的拉花，非常工整漂亮。值得花時間欣賞。…Read More

港女其中一項特徵，就係三不五時就需要進食魚生補一補。當然，好少人會認自己係港女，但同時亦都好少人拒絕食魚生。今日，我和我的港女朋友就係漫無目的之下，撞下撞下撞左入去有刺身食既既手打烏冬店。店內主打既係壽司同烏冬。我地去既時候正值中午，有set lunch同烏冬套餐。set lunch主要係定食，價格大約70-100左右。而烏冬套餐約50-80左右，附加三件壽司。我地揀左兩個麵餐，一個係吉列炸蠔拉麵($56); 一個係餃子烏冬($60)。麵餐每份附送三件壽司，三件味道賣相都很好，特別係三文魚，充滿肥厚圓渾既肉感，而飯量只佔魚生既1/5，食落剛剛好; 加州卷則不過不失，始終反卷以飯為主，好難整得有驚喜; 另一件名稱不詳，都算好吃，不過怕腥的我對腥比較敏感，我覺得佢有的腥，朋友就完全唔覺腥。首次試新店，我當然要試下主打既餃子同烏冬。2款主打果然無令人失望。餃子皮薄煙靭，雖然係煎但都唔算油，肉菜比例為5:3, 咬落有少少肉汁，稱不上juicy 但好味唔膩。湯烏冬為清湯底，味道清淡，同餃子香濃既味道啱啱相反，一濃一淡剛剛好。烏冬煙靭，唔會斷到一截截。整體而言非常滿意。朋友與我評價就剛剛相反，佢點既係炸蠔拉麵，炸蠔味道很好，啱啱炸起就上，熱氣程度爆錶，我試食左一舊馬上出痱滋(其實本身熱氣)。但拉麵失望在湯底。好似食即食麵咁，個人認為拉麵同公仔麵一樣，靈魂在湯底，應該要濃味少少，偏偏此拉麵湯底同烏冬湯底一樣清淡，失分不少。…Read More

寫食評前稍稍望過其他食評，見到評價都麻麻。唔知係已經換左一批人，定還是真有改善，我去食既時候體驗到既係親切又驚喜既服務質素，同以往既大相逕庭。侍應由我入門口一刻開始已經好好招呼，落order一叫即到，上菜果時仲會叫你小心熱，慢慢食。非常親切。而食物方面，最令人驚訝既係食物既份量。我叫左一個傷風感冒餐，內容係一碗蕃茄通同一杯熱菊花薑蜜。未見食物之前，以為係一個改得懶係親切既普通常餐，上到黎先發現根本係二人份量既常餐，茄通份量大得可怕，足足有2個頭咁大，而且配份量都非常足，有火腿，雜豆同羅宋湯配料，即使只食一碗根本都食唔晒。味道方面就偏濃，而且帶點黑椒辛辣味。健康的人當然頂得順，不過如果真係病左的話就要考慮清楚，因為辣度絕對唔係一個病厭厭既人可以承受到。千祈唔好俾佢個名呃到。至於菊花蜜，如大家諗既一樣，開菊花薑蜜調配，味道還是偏濃。如果接受唔到，可以叫佢俾杯水你。…Read More

假日去元朗，肚子特別開懷，好想放任盡情食刺身。奈何自己係烏蠅肚，俾2百幾食得果十幾塊刺身，最怕係為左抵食的食得太飽，帶住對食物果份恐懼咁出番黎，實在不划算。所以今日就想去試試一的散叫既刺身。店鋪位於教育路繁忙地段，店面不算大，好容易就走過了。入去前鋪以外賣壽司為主，款式以三文魚居多，不算吸引。但足夠俾人誤會佢無堂食。其實店內仲有上層，同埋詳盡既menu可供選擇。午市仲會有午餐推介，不過我就只想食刺身，所以以散叫為主。2個小腸胃，叫一碟刺身拼盤，希靈魚刺身，2碟壽司，1客牛油果軟殼蟹卷同一碟炸蠔。送到黎果時感覺好似唔係好夠，但原來食落係非常飽...刺身拼盤，其實只要新鮮，又切得厚，就已經係好好食架啦。碟仔細細，裝住26塊，款式都係大路款，有三文魚，甜蝦，吞拿魚，北寄貝同帶子，咬落去啖啖肉，帶子有天然既鹹鮮味，一流呀…希靈魚刺身，並非我所愛。叫佢，因為朋友好喜歡吃，原因是新鮮既希靈魚好甜，但係只要有少少唔新鮮，都會變腥。朋友話魚帶點腥先夠滋味，我不是太懂欣賞，我怕吃魚皮，更怕吃腥，一點都受不了。所以....1客5塊，都歸我朋友。而根據朋友食完之後幸福既臉部表情黎講，碟希靈魚應該攞滿分。牛油果軟殼蟹卷，相對而言就比較失色了。我期望軟殼蟹會係香脆豐腴，但事實係腍既，亦不算有味道。而牛油果可能不是當造，所以未熟透，有點硬之餘果味唔算濃郁。水準就只能算一般。壽司其實就同其他壽司店既睇齊，無乜留下深刻感覺。個人黎講覺得腐皮壽司好好味，因為我鐘意食。炸蠔，油分恰到好處，唔算太油又非常香口，炸皮厚薄得宜，唔似其他放題咁皮粗肉少。蠔肉肥厚，感覺一流。整體而言，由於抱住吃刺身放題既心態去食，所以覺得好便宜。而且呢個價錢，食到比放題更高質素既刺身，又唔使食爆個肚，好抵食！…Read More