wwong929's Profile

天氣凍就想同老公打邊邊, 佢依家喺火炭番工, 所以等埋佢收工就可以近近哋去呢度打邊邊啦! 我哋差不多8點去到, 基本上都已經坐滿晒人, 而且有好多人等緊位, 不過大部份都係成班人, 本來我哋都諗住放棄等位, 去周圍睇吓有咩食, 但其他大排檔啲o野唔係好啱胃口, 所以都係照等, 好在我哋兩公婆人少少, 所以等到8點半就有位啦!呢度係任食任飲汽水, 老公去攞咗好多o野食, 當然第一樣就係佢最愛瀨尿蝦啦! 啲蝦超生猛, 拎到埋枱仲不斷郁, 有一隻仲睇唔開跳咗落地. 不過老公呢個瀨尿蝦專家話呢啲蝦啲肉唔實又瘦, 不過放湯就可以令個湯好好味喎! 可惜呢晚冇蜆, 如果蜆個湯仲鮮甜呀!金菇、西洋菜、蕃茄、秀珍菇同冬瓜都好新鮮, 雲耳大朵唔會碎濕濕, 芋絲就散散哋, 不過任食嚟講都好好架啦! 而且選擇比其他酒樓任食火煱多, 所以非常滿意.我哋叫咗芫茜皮蛋湯, 其實之前我哋食過一次已經知道個"湯"其實係白開水, 而老公為咗要最後啖湯鮮味啲, 所以放晒啲料去滾, 務求有啖靚湯俾我煮烏冬. 老公真係好細心架!呢晚我同老公一路打邊邊, 一路飲啤酒, 一路傾吓偈, 坐到11點啲人都走晒, 好在老闆好好人冇趕我哋走, 天寒地凍可以喺戶外打邊邊, 真係一大樂事呀! 但夏天就唔得啦! 一定熱死老公啫! 所以呢度對於我哋一定係冬季限定!…Read More

今年屋企少咗兩位成員做冬, 所以我想搞吓啲新意, 等大家開心吓, 所以一個月前已經book定呢度, book位時已經無晒window seat, 不過有位其實都無我哋份, 因為window seat只限2-4人, 我哋大人小朋友總共七個人, 所以與window seat無緣, 可惜:(...不過唔緊要啦! 最緊要一家人開開心心啫!我哋3:00pm入座, 好彩啱啱坐低時唔太多人, 可以走埋窗邊欣賞風景, 維港景色一覽無遺, 而且天色明朗, 如果可以坐window seat享受一餐, 一定更好呀!我哋叫咗兩個Tea Set, 一個兒童餐. Tea set共有三層, 賣相非常吸引, 而且因為臨近聖誕節, Tea set都以聖誕為主題.最頂層係黑醋芝士釀迷你蘋果(Mini apple stuffed with balsamic cheese), 鵝肝慕絲煙燻鴨胸迷你熱狗(Foie gras mousse, pepper smoked duck breast, mini hot dog bun), 忌廉芝士菠菜紅莓瑞士卷(Cream cheese, baby spinach with Cranberry sweet roll)及蘇格蘭煙三文魚夾心菠菜麵包三文治(Scottish smoked salmon, spinach bread). 我食咗三文治同迷你蘋果, 三文治o既三文魚味道唔突出, 麵包唔鬆軟, 一般啦! 而迷你蘋果唔酸唔鹹又冇咩味道, 好奇怪! 老公食咗熱狗, 佢話好好味喎!第二層係栗子聖誕蛋糕(Chestnut bar, spices biscuits), 雲呢拿芝士餅(Vanilla cheese cake), 聖誕乾果蛋糕(Christmas fruits cake), 鳥結杏仁杯(Almond nougat shot)及雜錦聖誕曲奇(Assorted Christmas cookies). 我食咗芝士餅, 雲呢拿味好重但完全冇芝士味, 而且甜到飛起, 所以我食咗一半就俾咗媽咪食, 曲奇餅鬆脆, 不過都係好甜, 始終我都係鹹食主義者, 所以第二層o既o野食都唔啱我胃口.最底層係英式鬆餅及紅莓鬆餅, 山桑子果醬, 鬆餅忌廉(Plan and cranberry scones with belberry jam and clotted cream), 南瓜蛋白奶油(Pumpin meringue creme)及德國杏仁甜麵包(Dresden almond stollen). 全個tea set我最欣賞係個鬆餅, 好香牛油味, 鬆化唔會死實實, 南瓜蛋白奶油有片聖誕葉做裝飾, 好靚, 但我冇試.我叫咗杯蘋果茶, 蘋果味都幾濃, 可惜我唔太欣賞佢係紅色, 好似太人工化囉!呢日做冬最受歡迎唔係個tea set, 反而係個兒童餐, 三色三文治(蛋, 三文魚同火腿)、生果同薯條, 小B只係掛住食薯條, 因為真係好好食, 用新鮮薯仔切條去炸, 外脆內軟, 正! 生果新鮮, 三文治俾屋企人食所以冇試到.呢餐環境食物都幾好, 只係我哋所有人都唔嗜甜品, 所以大家都唔算食得好起勁, 如果下次再搞屋企人聚會, 我一定唔會再去食以甜品做主題o既tea囉! 可以同屋企人一齊開開心心食吓o野傾吓偈, 其實真係好幸福架! 雖然兩位成員唔喺度, 但我哋去102樓, 感覺就好似同佢哋接近啲, 可以一齊做冬咁, 你哋永遠都會喺我心中, 我會一直維繫家人, 令大家開開心心架! 你哋放心啦!…Read More

呢日同屋企人去完澳門, 見史生喺FB話想打邊邊同食羊腩煲, 之前史生話呢度羊腩煲好食, 所以番嚟香港就同史生嚟試吓.每次嚟都必有o既前菜三寶-花生、菜脯同鹹酸菜, 花生香脆, 菜脯爽口不太鹹, 鹹酸菜帶甜, 呢三寶做啤酒小食一流!主角出場啦! 我哋叫咗個細煲, 但兩個人食都已經好多, 因為有好多羊腩同支竹, 羊腩汁非常濃郁, 羊腩炆得入味, 肉質唔會過韌, 肉味香濃, 而且唔會好多骨, 絶對超值, 正呀! 唯一可以改善係如果可以加埋冬菇同筍就一流啦!因為個煲足料, 所以我哋只多點芋絲同鮮支竹加入煲, 再加埋飲咗幾支大啤, 已經好飽啦!呢晚我同史生各執己見, 令場面僵化, 但最後放下自己, 唔執著自己, 最終和好, 其實可以同枱食飯係一種緣份, 何必為圍護自己面子而言語間互相傷害呢? 放下自在, 道理就係咁簡單囉!…Read More

同老公好番, 當然要食餐好啦! 老公之前成日都話利得個湯底好好味, 今次終於試到啦!老公知我鐘意飲蕃茄湯, 所以專登叫咗個蕃茄魚湯底, 未落生料去滾前飲一啖, 嘩! 好清甜好濃郁, 絶對唔係味精湯, 所以飲多兩啖都得, 正! 而且入面有好多蕃茄, 好新鮮好大個架!老公叫咗我哋最愛花蛤皇, 好大隻, 同隻湯匙一樣大架! 好新鮮好鮮甜.當然唔少得我最愛貴花蚌啦! 好厚肉好爽脆, 人間極品呀!老公話想個湯底甜啲, 所以叫咗雞腳放埋落去滾, 我哋都冇食到啲雞腳, 可惜, 雞腳作用不大, 因為佢越加湯反而越淡, 我覺得開頭未滾生料前仲好飲啲.呢度有個好處, 所有同價錢o既食物都可以雙併, 令我哋兩公婆人少少都可以食多幾款o野, 非常好呀!總括所有食物都非常新鮮, 湯底鮮甜, 可惜同晚剛剛有兩圍枱係生日, 所以有啲嘈囉! 如果係兩公婆撐枱腳, 呢度未必係最佳選擇, 但我都係好多謝老公同我食咗一餐咁豐富o既邊爐呀!…Read More

朋友生日, 一班邊爐精約埋去牛皇, 一早訂咗VIP房, 本來14人, 但最後只有10個, 所以坐得好鬆動.一班嗜辣朋友必定要叫四川麻辣鍋, 但史生隻眼痛, 所以唔食得辣, 我哋食蕃茄薯仔鍋, 呢個湯底好好飲, 有魚味, 但一加湯就沖淡咗, 而朋友們話個四川麻辣唔夠辣, 後來侍應加咗辣汁, 但都只係鹹而唔辣, 所以下次可以唔試呢個湯底.人多打邊爐有好處, 可以試好多款式食物, 首先係手打四寶丸、豬紅、脆鯇同竹笙, 手打丸彈牙, 豬紅唔太滑又冇咩味, 竹笙吸湯一流, 脆鯇新鮮爽脆, 都幾好.跟住係雞子, 我一向唔食o既, 不過呢度啲雞子比其他火鍋店細粒好多.再嚟有四色餃, 我食咗韮菜餃, 七分韮菜三分豬肉, 比例非常好, 韮菜香, 皮薄, 好味!打邊爐最重要當然係肥牛啦(雖然我一向唔食牛), 其他人都話牛肉好味, 新鮮又唔韌.而我最鍾意就係食急凍烏冬, 一放落鍋煮一陣就得, 好滑呀!呢晚其實仲叫咗好多o野食, 總括食物質素中上, 最重要係有VIP房坐得舒服又唔會俾人騷擾, 所以呢度好啱一大班人嚟打邊爐吹吓水.一班朋友可以有緣坐埋一齊食飯係一種福氣, 朋友間說說笑笑, 可能會有時有啲說話over咗, 但做朋友o既唔需要介懷, 做人樂得自在, 只要一笑置之, 無論自己或者身邊o既人都會開心啲.…Read More

之前同家姐嚟呢度食過覺得幾好, 所以決定同史生嚟挑戰一下麻痺雞o既威力.等埋史生收工一齊搭火車去太和再行過去, 去到差不多8點半, 舖頭外有幾個人等緊位, 我哋兩個人, 啱啱有位, 坐室內就唔駛等, 侍應姐姐話街上位置未必會開, 因為樓上住客會投訴, 需然坐室內局促啲, 但無所謂啦! 我上次食大辣, 真係辣到無晒味覺, 所以今次同史生試中辣. 兩個人有半隻雞, 個煲好多料, 有雞、薯仔、洋蔥、青椒、芫茜、蔥同辣椒等, 只食個煲都飽飽哋啦! 其實中辣都好勁, 唔係因為辣, 係因為好麻呀! 雞唔肥, 肉質實實, 香料味重, 雖然我唔知正宗四川重慶雞煲應該係咩味, 但總括而言都係正架!食晒啲雞之後, 就可以加水打邊邊啦! 任食材料選擇唔多, 每次點o既o野食, 嚟到啲份量唔會好多, 而食物款式同新鮮度都一般, 但始總嚟呢度都係為咗食雞煲, 配料實屬其次, 所以不過不失啦!跟住食到最後, 一定要食紅薯粉, 因為呢個係我至愛, 薯粉唔駛滾太耐, 因為好快稔, 索晒啲味, 又稔又滑, 正! 另外, 我同史生見到樣新o野-厥根粉, 我哋從未見過, 所以決定試吓(橫掂都係任食,無所謂啦!), 原來個樣好似墨魚麵咁, 不過唔係黑色係深啡色, 幼幼哋, 滾咗一陣已經稔晒, 佢同紅薯粉一樣又稔又滑, 但可能因為湯底濃味, 所以試唔到真正味道, 但厥根粉都係好啱我, 因為好滑呀!呢度可以揀任食或單點, 而任食就包任飲汽水啤酒, 我同史生就當然係飲海珠啤啦! 呢晚食得好開心, 食吓傾吓飲吓好快兩個鐘(任食兩小時), 希望以後繼續同史生可以一齊發掘多啲好食o既o野, 畢竟我都係一隻為食豬, 多謝史生陪我呀!…Read More

得知水佬榮喺香港開分店, 我同史生都未試過澳門水佬榮, 所以決定試吓.星期日我喺佐敦番學, 史生訂定8點鐘位, 我一放學就九秒九跑去水佬榮, 3至5樓都係水佬榮o既, 我估5樓係VIP房, 我哋就坐4樓.因為我唔係特別鍾意食蟹, 所以叫咗個花蛤煲小辣, 個煲好多料, 除咗有好多花蛤之外, 仲有好多雜菌、芫茜、蔥同西芹等, 好豐富, 個湯底好濃郁, 辣味來自胡椒, 我同史生都覺得如果唔要辣個湯會更加清甜. 侍應提我哋要先食花蛤先, 因為花蛤滾太耐會老, 所以我哋不停口咁食, 花蛤數量都幾多, 但我本人較鍾意食花蛤皇, 所以覺得呢度o既花蛤唔夠大隻, 但勝在夠新鮮.食晒花蛤之後, 就開始打邊爐啦! 叫咗我最愛貴花蚌, 好厚肉而且唔會梅, 好鮮甜好好味呀! 金菇都好新鮮, 不過份量少啲, 預咗啦! 萵荀都好新鮮, 厚度適中, 灼大概3分鐘就又爽又脆, 好味! 我冇食魚蛋, 因為呢樣係史生最愛, 我冇問佢好唔好味, 但睇個樣都幾彈牙o既!最後有一盤西洋菜, 新鮮而且唔會太粗所以唔會老, 灼完索晒啲湯真係好好味呀!呢度有露台, 可以行出去呼吸一下新鮮空氣, 望住佐敦道車來人往, 真係幾寫意架! 呢晚同史生有傾有講, 感覺好舒服好開心, 呢餐價錢中上, 我哋唔需要日日都大魚大肉, 只要間中出去食餐好o既已經會好滿足, 希望以後我哋可以開開心心去唔同地方享受美酒佳餚啦!…Read More

呢篇食評隔咗成個月有多先寫, 因為同史生有啲事發生, 所以冇心情寫, 但近日好番啲, 所以又開始執筆啦!史生之前份工做得唔開心, 所以決定辭職轉工, 佢好快就搵到第二份工, 其實佢真係好叻架! 所以我決定請佢喺佢番工前請佢食番餐好o既! 我哋7點到, 因為好早所以唔駛等位. 史生鍾意食蟹又鍾意食辣, 所以第一時間叫避風塘炒蟹先, 而佢同我都鍾意食花甲, 所以點都要試吓, 而因為我唔多食蟹, 所以叫番個雜菜煲俾自己.首先花甲上場, 好大隻呀! 雖然份量唔多, 但好鮮甜, 不過略為過火, 所以老咗少少, 而湯底有少少胡椒, 粉絲吸晒啲湯, 好好味呀!跟住係雜菜煲, 嘩~ 好多菜好豐富呀! 魚湯底但應該唔係鮮魚煲o既, 但都好好味, 所有菜都好新鮮, 呢個煲絶對抵食夾大件呀!主角出場啦! 我唔記得隻蟹幾重, 但其實無論幾大, 史生都可以一個人解決佢架! 隻蟹俾金蒜山活埋, 金蒜同其他避風塘炒蟹o既唔同, 呢度加咗麵包糠, 所以比一般金蒜乾身, 我就比較喜歡呢種金蒜, 所以忍唔住叫咗碗白粥嚟送金蒜.史生食得好開心好滋味, 而我睇住佢食得開心, 我不自禁回心微笑, 其實"你快樂所以我快樂"呢個道理就係咁簡單囉!…Read More

一位為食朋友推介呢間o既雞煲, 所以約埋8個人去試吓. 因為呢度舖頭好細又冇得訂位, 所以我同老公喺大陸按摩完就搭火車番大埔搵定位先. 我哋六點九去到, 舖頭真係好細, 好勉強先可以容納二十個客, 但我哋去到時已經有4枱客, 好彩早到可以坐室內, 遲咗要坐室外o既話, 大熱天時你都咪話唔熱呀!為食朋友同女皇一齊到, 佢哋特別去大埔街市買咗花甲王嚟(自來食物要加$20), 但真係多謝為食朋友, 因為老公呢幾日好想食花甲王, 佢見到時對眼發光架! 啲花甲王又大隻又新鮮又冇沙, 真係一絶呀! 花甲王萬歲~~首先係奇味雞鍋(中辣,一隻雞), 其實想試大辣, 但怕其他人食唔到, 所以叫中辣先, 個鍋有洋蔥、唐芹、尖椒同紅椒做配料, 一上枱時已經好香, 好似啫啫雞煲咁, 香料味非常強烈, 正! 隻雞唔肥唔大隻但好有雞味, 唔會有雪味, 係新鮮雞先有咁o既效果, 我哋好快就食晒啲雞, 跟住朋友食提議加個烏冬去炒, 吸晒啲精華先再加湯做鍋底, 嘩! 個烏冬吸晒所有香料同雞味, 真係超好味呀! 食得辣o既一定要試大辣, 因為連我呢個初級辣人都覺得中辣唔太辣, 我下次同老公嚟一定試大辣架!為咗唔食辣o既朋友, 專誠叫個胡椒豬肚雞鍋, 呢個鍋有鹹菜、豬肚同鮮雞, 好多料, 雞同樣鮮味, 豬肚好入味, 不過我覺得胡椒唔夠多, 所以冇咗胡椒豬肚o既精髓, 不過朋友仔話可以加胡椒架! 下次可以叫佢加多啲再試一次~~火鍋料點咗手切肥牛、金菇、午餐肉、腐竹、雞子、豬潤、雲吞、韮菜餃、豬紅、豬皮、竹笙同魚腐, 其實所有材料都好新鮮, 但我只係食鍋本身o既材料都已經好飽啦!飲吓食吓, 坐咗兩個鐘, 出門口先發現原來室外坐咗4、5枱啦! 呢個奇味雞煲絶對係大埔o既雞煲好選擇!…Read More

老公夜晚要比實, 我就做佢同佢嗰隊o既最強啦啦隊, 所以收工等埋老公搭地鐵去尖沙咀食少少o野先. 好耐冇去星林居, 所以決定同老公去食. 由佢$21個小鍋米線食到依家$24, 但依然捧場, 因為佢個湯底真係令我無法抵擋.我點咗小鍋米線, 中小辣, 普通酸, 久煮, 少米線, 走肉, 多蔥、多莞茜、多芽菜、多韮菜, 冇叫餸, 因為我之前食過咁多次都知淨米線已經好大碗, 而且成個米線靈魂係個湯同啲配料, 所以咁o既配搭已經好足夠. 湯底味道依然濃郁, 酸同辣都平衡得好好, 食過好多間名牌米線舖頭, 但我始終覺得佢個湯底比其他舖頭優勝, 最重要係湯底同配料都可以按個人喜好而改變, 彈性比其他米線舖大, 呢個就係我一路支持佢o既原因.老公上次同我食過中小辣, 今次佢決定挑戰高幾級o既大辣, 湯底走酸, 多蔥、多芽菜、 多韮菜, 仲叫咗蘿蔔、豬皮、豬紅、魚旦(米線變車仔麵), 所以好大堆頭呀! 我試咗一啖個湯底, 嘩! 真係好辣, 佢唔係麻辣, 辣味源自辣粉同辣椒, 走咗酸, 原來好好味, 我下次都要試走酸先得, 我試咗一舊蘿蔔, 好入味, 老公話豬皮唔太入味, 豬紅就太"鬆泡泡"唔夠實淨, 但佢好鍾意個湯, 因為佢冇走肉, 所以個湯比我嗰個更濃郁更惹味, 佢食晒碗米線之後我都忍唔住飲埋佢啲湯呀! 不過飲完湯要即刻飲番啖凍檸樂降溫囉!食飽飽之後就慢慢行上諾仕佛臺, 睇老公比賽, 大聲為佢喝采! 老公比賽真係好charm, 好pro架!…Read More

本來老公訂咗7點枱, 但同老公喺大埔游完水, 搭車出到佐敦都未夠6點半, 所以提早去食, 因為早所以未滿座, 如果夜啲多人都幾迫架!我哋好開心咁剔咗好多o野, 侍應姐姐問我哋要咩辣, 唔知咩環境, 都係叫住中辣先, 跟手叫埋支青島, 食串燒點可以少咗啤酒呢個好朋友呀!首先係涼伴青瓜上場, 呢樣係老公至愛, 未食已經聞到好香麻油蒜頭味, 見佢咁多辣油, 仲以為好辣, 但一食落口又唔覺得辣喎, 凍凍哋酸酸哋, 好開胃, 不過老公唔鍾意食酸o既青瓜, 所以始終最愛麻辣王o既青瓜!跟住係燒韮菜, 之前去大尾督巴蜀自己燒過嚟食, 已經一試愛上, 今次呢度燒得專業好多, 冇燒乾, 而且韮菜又嫩, 辣粉又香, 真係越食越想食呀!再嚟就係田螺, 老公超愛呢個, 因為個汁香濃又夠辣, 田螺又入味, 只係略嫌田螺唔夠肥, 但都有95分, 正!燒尖椒微辣, 一樣燒得啱啱好, 唔會乾, 仲好juicy, 正!跟住就係幾款串燒, 我最愛羊肉, 羶香加埋香料簡直係一流, 而且又juicy, 真係遠遠好食過大陸嗰啲新彊羊肉串架! 雞腎同黃喉都係燒得啱啱好, 不過我覺得黃喉唔多夠味, 如果多少少鹽會好啲, 魷魚係老公最愛, 所以我冇試, 但佢都話好好食.到燒露筍啦! 同燒韮菜一樣, 夠嫩又唔乾, 正!最後就係秋刀魚, 佢同我平時去日本餐廳食o既差不多, 因為秋刀來貨都係一樣, 只係呢度用咗香料去燒, 肉質結實外皮香脆, 加檸檬汁一流, 不過如果我下次嚟未必會再叫, 因為唔太特別.全晩最可惜係漏咗花甲王, 不過全晚可以同老公嘆住啤酒,食咗咁多樣好味o既o野, 我都已經覺得好幸福啦! 多謝老公為我安排一餐幸福溫馨串串燒呀!…Read More

老公約埋成班朋友去打邊邊, 佢一早訂咗十位, 仲有房坐, 老公真係叻啦!因為唔係人人食辣, 所以叫咗一個四川麻辣鍋同一個蕃咖薯仔鍋. 四川麻辣鍋唔係好辣又唔係好麻, 係為咗迎合香港人口味而調較, 我覺得一般囉!我哋全晚叫咗好多o野, 實在記唔晒.丸類包括手打蝦丸、手打牛丸、手打墨魚丸等, 所有都好新鮮, 好好味!餃類有蕃咖餃、菠菜餃等, 餃o野味道唔突別, 一般啦!素菜類有雜菌、蘿蔔、冬瓜、竹笙、蜂巢豆腐等, 所有食材都新鮮好味.肉類包括手切牛肉(大肥)、脘魚腩骨、黑栢葉、午餐肉等, 手切牛肉佢哋所有人都話好新鮮, 所以第二round再叫多碟, 但因為呢晚牛肉太好賣, 所以冇咗大肥只有中肥, 中肥真好韌, 侍應哥哥換過一碟但都係咁, 但佢服務態度一百分, 所以我哋都唔介意第二碟牛肉o既質素, 如果下次去, 佢建議我哋一早訂定牛肉先, 咁就肯定質素一致啦! 第二轉佢哋叫咗田雞, 我平生最憎食田雞, 所以冇試, 碟田雞嚟到時啲肉仲彈吓彈吓, 好恐佈, 但肯定勁新鮮, 所以鍾意食田雞o既朋友可以一試.飯後甜品係送o既, 一上枱, 嘩! 超靚, 甜品併盤包括朱古力慕絲、芒果慕絲、牛奶慕絲、芝士餅同啫喱, 樣樣都好睇又好食, 正!呢晚我哋食咗好多o野, 又飲咗差唔多十支大啤, 侍應哥哥仲同我哋有講有笑, 傾吓食吓笑吓又一晚, 真係好開心.…Read More

星期六等老公收工去南Y島玩, 搭船前去醫咗肚先, 之前老公話要同我一齊去生記, 但自從佢轉咗工由上環去咗油塘番工, 一直都冇機會, 所以今次專程去食.老公叫咗細魚滑米綫, 我叫咗時菜米綫 (呢款得一個size).上次自己嚟已經食過, 但上次時菜係勝瓜, 今次係生菜, 但總覺得魚湯配勝瓜襯啲, 魚湯奶白色, 有魚肉喺湯入面, 第一啖都幾有魚味, 但我覺得有啲水汪汪, 結果越食越淡, 可能米綫吸咗啲味啦! 老公覺得個湯底幾重魚味, 佢食麵總係要加辣椒油, 佢話啲辣油唔夠辣又唔夠香, 但始終呢度係主打魚湯, 呢點可以原諒o既. 魚滑我冇試, 但老公話好味喎!總括嚟講, 呢度o既魚湯米綫都算真材實料, 而且廿幾蚊大大碗, 喺上環都算抵食又好味啦!食飽飽之後就慢慢行去碼頭, 可以同老公一齊完成食生記米綫o既心願, 再去南Y島hea吓, 真係人生一大樂事呀!…Read More

星期日老公一早入大埔陪我去游水, 跟住我哋去食啲o野先去大陸按摩, 住咗大埔咁多年都好少去大埔街市食o野, 所以今次決定捉老公陪我去食.一上到熟食中心, 超多人, 真係人山人海, 去到東記, 啱啱見到大人食飽諗住走, 我就一個箭步衝埋去坐低, 老公就叫o野食, 之前見到啲食評講得咁好食, 所以特別期待. 可能太多人o既關係, 所以等咗廿分鐘先有o野食.首先嚟到o既係麵先, 我叫咗炸菜肉絲併豬扒幼麵, 一心諗住係上海幼麵, 點知係鹼水麵, 原來呢度只有上海粗, 真係有啲失望, 因為我最怕食鹼水麵, 老公話同我交換, 但算數啦! 老公鍾意食上海粗, 我又點會奪佢所愛呢! 所以我都係照食, 不過, 真係唔好食, 雖然冇咩鹼水味, 但冇彈性, 鍾情鹼水麵者可以唔試, 湯底冇特別, 普通味精湯底囉! 而炸菜份量都幾多, 而且唔太鹹, 幾好!老公叫咗雞翼麵, 佢食麵一定要加辣椒油&渣, 佢話呢間辣椒油好香, 我試咗一條上海粗麵, 粗幼軟硬適中, 唔錯! 始終東記都係上海麵較優勝o既!主角出場啦! 好大份豬扒呀! 豬扒1cm厚, 外層炸得酥香熱辣辣, 肉質柔軟又juicy, 果然係名不虛傳呀! 咁怪得咁多人買豬扒外賣啦! 正!到雞翼啦! 外層一樣炸得酥香熱辣辣, 真正即叫即炸, juicy唔乾身, 同豬扒一樣咁好食呀!食咗兩碗麵加支可樂都係60蚊有找, 真係等吓都抵呀! 食飽飽就行去火車站北上按摩, 可以同老公有健康悠閒o既一日, 真係好幸福呀!…Read More

之前一晚老公個朋友生日, 飲多兩杯, 第二日冇咩精神又冇咩胃口, 所以決定簡簡單單食碗粉先去打波.我叫咗紫菜河同油菜, 但侍應姐姐話只得生菜, 星期日四點幾咋喎, 咁早賣晒其他菜? 定係冇入貨先? 算數, 生菜照殺, 老公就叫咗魚旦河同凍檸茶. 河粉一到, 嘩! 好大堆頭呀, 紫菜比一般出面食起碼多兩倍, 河粉又多, 試試啖湯先, 普通味精湯囉! 不過好在夠熱, 紫菜有沙真係唔得啦! 河粉厚身又唔滑, 食到一半都差唔多吸晒啲湯, 所以呢碗河粉未能達到本人要求囉!老公嗰碗魚旦河都大堆頭架, 有魚旦、魚片同炸魚皮, 老公話啲魚旦一般, 河粉評價同我差不多, 辣油夠辣但唔夠香, 所以佢都只覺得呢間啲質素麻麻地.總括而言, 呢度o既河粉係價錢平又飽肚, 但對於有要求o既人就唔係首選啦!食飽飽去練完波先比賽, 雖然最後都係落敗收場, 但總算攞到經驗呀! 真係好謝老公一直支持我架! 希望明年我哋都可以打得好啲啦!…Read More