st_hymn's Profile

烈日曝曬之下，見新開左間全白咖啡店，忍唔住要番杯冰咖啡解下暑。望落個menu 其實選擇幾多，原本想試下精品手沖曼特寧，不過我時間有d趕，就試下杯iced mocha。品落係偏甜既，不過係易入口既朱古力甜，唔太死實，飲落係順喉易入口既，女生應該會更受落，我偏苦既口味唔太岩。咖啡味道就唔太品到，不過個滋味對得住個價錢既。…Read More

羅麥記幾年前都多d分店，而家買少見少，入黎真係貪佢係銅鑼灣食lunch 時間，少有一定有位既食肆。佢個餐牌係有d衰，佢既set 係冇咩招牌菜，要散叫自製茶餐廳常餐，芝士豬扒撈公 + 炒蛋多士。講真，食物質素係好既，芝士 汁夠濃味，豬扒又有肉地，唔乾身，份量又足，冇得投訴。個多士普通，不過炒滑蛋的確水準以上，對得住個價位。我最like 食炒蛋，必須將熟未熟，仲有3成蛋汁，7成岩岩凝固，中心流心既蛋，佢係做到既。如果位置係地鋪，餐牌組合再好d, 真係會有翠華既人流。…Read More

去大角咀食火鍋不嬲都去開出名嗰間，不過個人有少少潔癖，實在唔想食野個環境太嗱咋，於是行左入黎。佢係成條埃華街食火鍋個環境最光猛企理既，環境我會俾5星。食火鍋個重點不嬲係食材鮮唔鮮，靚唔靚，例牌叫個手切本地黃牛，再叫店家推薦海鮮，之後點左白鱔，翠玉鯇，海膽同鮮蝦刺身，加大量魚滑，店家又推一個鹽燒鮑魚，估且一試。先到既係刺身，擺盤賣相好麻麻，以為中伏，點知一食落個海膽，非常鮮甜，拍得住omakase 供應嗰d. 之後燒鮑魚到，食落非常鮮嫩多汁，真係一啖食完想啜埋個汁。剛好今日老闆現場打骰，問一問先知日賣二百隻以上。之後食墨魚滑同魚鯇，都好鮮同有滋味。最後，我地一行6人係食唔哂肥牛同丸，海鮮真係啪哂。牛其實都好食，不過我會揀更難得既海鮮，呢個質素唔多見。…Read More

滑蛋xx飯真係一世人食過上百碟，順興點解出名呢樣，就係因為佢既滑蛋唔係水泡泡加少少蛋絲嗰進，係實打實幾隻蛋一碟既炒蛋飯，類似係澳牛俾你食嗰種炒蛋。你可以揀既配料有好多，吉豬，叉燒，牛柳等等，不過叉燒真係最Match。上菜既時候蛋仲有少量蛋汁喺表面流動，底完全冇焦糊或者熟透既跡象，師傅工多藝熟，火候真係岩岩好。豉油係另上既，食落唔咸但唔算有味，落少量即可，飯底係正常茶餐廳出品，肉都四平八穩，贏既真係個蛋，你見天寒地凍得塊帆布遮頂既大排檔格局，都人多到要排隊等入座就知唔野少。…Read More

溫野菜長期要排隊等位，難得午飯時間早黎到，好快就有位。午飯唔食得豪，分別只係叫左個百零蚊既套餐。 有野菜盛合，美國牛肋骨肉，丹麥豬肉各一，湯底我就加少少錢叫左個月見壽喜燒湯底。火鍋底不宜太濃味，而咁多選擇入面，得壽喜燒汁係有日本風味，只能揀佢。上菜嗰刻我係感覺份量超多，不過食落真係只係剛剛好，野菜盛合極薄切，要三四片入口先有少少口感，感覺上唔夠喉，好在肉係好實在，唔算多，每盤都有番幾條俾我恰下恰下，肉類我見menu 寫足5.6種，剎有介事，但係我同fd互食對方唔同既肉類品種，味覺上真心分唔出咩特別。配菜就正正常常，如果白飯有得添就好，咁先會飽。…Read More

鳥華亭當年仲叫鳥華既時候已經食開，當年一試極上雞白湯已經驚艷非常，完全唔同豚骨，魚介既鮮味令我一星期都走去食一次，次次bottom up個湯。咁滄海桑田，到左而家，湯頭既濃厚程度，比以前少左一半有多，鮮味都係，以前雞香四溢，而家靠近先聞到。姑勿論個前後對比，齋講雞白湯拉麵都只此一家，第二度都好難食到佐料係露筍同炸蓮藕片既拉麵。雞白湯配既拉麵係幾與眾不同既，唔係太濃太肥，食落有種滋潤感既，好易入口，選擇能掛湯既捲麵為佳。而且，不得不提，佢既叉燒係雞肉叉燒食到係雞腿肉，走肥冇骨，非常好食，未食過我會建議一試的。…Read More

三田一開業既時候，其實已經食過一次沾麵，嗰次感覺好平庸，之後真係冇再去食。呢晚咁岩喺附近，就再去多次俾下機會，今次係食拉麵。講真三田個麵係好得既，彈牙，夠韌度，亦都好有蛋香麵香，掛湯力不錯，質感唔粉又實，我食落都好鍾意。之但係個湯頭真係好普通，遜色個麵幾籌，今次拉麵都係，湯味唔係濃郁到令你覺得一湯都係精華，又唔係清新到好有鮮味，不過不失係個恰當評價。其他佐料無論叉燒同溏心蛋都係ok ge, 不過都係唔出彩，可能下次真係要再食沾麵評估下先得。…Read More

太平道係一個旺中帶靜既社區，交通方便又難得有個地方可以好舒適咁飲下咖啡，放空心情，所以食物質素過得去我已經收貨。Black sugar coffee店內位置有十多個，而且佈置骨子，真係可以坐喺入面工作溫書放空兩三個小時。店名有life style 既原因係店內有販賣生活家品，有咖啡沖泡器具，有旅行用的東西，非常不錯。我係叫店員推介有咩好食的，佢就話餓既就食egg benedits. 原本我都好疑惑，正常egg benedicts 好細份，點知一上檯，真係大份過我塊面麵包係好大份既酵母麵包，有質感唔會食完一陣風咁唔飽肚。上面鋪一層煙三文魚，再有兩個egg benedit。份量足夠大，滋味亦都唔錯，切開個蛋，蛋漿可以覆蓋整個麵包，醬汁酸酸甜甜，食落開胃。雖然講唔上精緻同有幾重口感，不過平常食個brunch 放空下係一流。呢到d咖啡都唔錯，超多人take away , 點左杯Mocha 慢慢歎，咖啡個性唔強烈，口感順滑，係收貨既。…Read More

店名開宗明義話做超級丼飯，期望當然高。見食評都多，就搵日一支公坐吧枱飯食個佬丼。餐牌選擇比較少同大路，左思右想之下就揀左最中價既火焰三色丼黎食。丼飯賣相非常不俗，左口魚，三文魚同吞拿魚各據一方，率先食左口魚，一入口就覺唔對路，唔係魚唔鮮，而係油份好少，正常炙燒過既左口魚豐腴油多，食落滿口魚香，呢次味道唔出，可能係魚生品級較次。再食三文魚同呑拿魚，非常正路既味道，不過成150大元一個丼我會expect more . 魚既炙燒我覺得做得唔好，火槍既火候始終不能均勻炙燒表面，搞到魚件半生熟。而且丼飯魚塊數量不多，魚同飯，佐料都好分離，冇一個味道上既整合。呢個價位咁食法就好冇癮了:(…Read More

街坊小食店難得有賣德國豬手，當然要遠渡而來試一試。原本想食佢個秘製蜜糖黑啤豬手，不過已經一早沽清唯有轉戰個德國豬手加香腸拼盤。$188 呢個價錢唔會要求咁多，拼盤上既香腸係大路野，唔特別，唯一寄望既係隻豬手。豬手size 有兩個拳頭大，減去舊豬骨，肉既份量都好多，不過肉質好實好難咀嚼，大概30%肉係唔會食，反而近骨位既肉有帶脂肪同煮到冇咁實，嫩口好多，食落個味係ok 的。問題係，豬手係原隻上，餐廳方面幫你𠝹左幾刀，由於豬手皮厚，肉質又偏硬，普通刀具切落好費力，女士們可以話無從下手，一定要店家幫手切。我作為力水大既男士都要慢慢庖丁解豬半個鐘，建議店家提供更鋒利既刀具。…Read More

喬屋認真係私心推薦之選，中價又好食，係三五知己聚餐吹水既一流選擇。同友人天都未黑齊就去到喬屋，成為第二檯客人。黎得喬屋，一定係飲sake食串燒，點左牛小排，汁燒糯米雞肉棒，牛肉小松菜卷，鵪𪂹蛋，田樂茄子燒等等慢慢歎。先上既係肉類串燒，牛肉非常juicy , 醃得入味又燒到外脆內嫩，口感非常好。牛肉小松菜卷係當中最正既，小松菜吸收哂d肉汁，外面再包住一層靚牛肉，真係食落有味道有層次。雞類以雞皮同汁燒糯米雞肉棒最好，火候剛好，食落夠熱夠juicy. 而蔬菜類首推田樂茄子燒，真係非常之美味，茄子切片，表面加上醬汁再連同茄子肉表層一齊烘烤到焦糖化，食落係有茄子既香同醬汁既惹味一齊喺口中爆發，真係太好食…Read More

米芝連有星既拉麵感覺好高大上，咁岩見店外未有長龍就去試下。點知店外冇，店內剛好滿座，等一輪都要廿分鐘蔦係先點餐，後上座既格局，拉麵選擇並不多，所以先點個醬油味玉拉麵試下。拉麵好食與否，多過50%係因為個湯底。坐喺位置上可以清晰見到師傅點整個拉麵，而一大煲湯底就正正係個靈魂，未上菜已經有濃濃既香味飄過，係有期待既之後見師傅分工好細緻，一個整麵，一個上湯，一個擺碗上叉燒同蛋，流水線咁整出黎。拉麵上到檯面，第一個感係好細碗麵好少份量，唔叫多份替玉根本唔夠食，湯頭就不負所望係好清甜既，黑松露我覺得加一點點就好，全部落哂個湯到會變左食西餐，完全掩蓋湯既鮮味:(最後我食完個麵都不斷飲個湯既。叉燒就無話可說的少，而且不特別，薄切無風味，食之無味 棄之可惜，似係蔥蒜一類的佐料，用黎提升味道層次，唔係俾你品嚐。味玉就整得好好，流心又有醬油味，算係為碗拉麵挽回唔少分數。總括黎講，清新既湯頭係令人眼前一亮，不過整體不是頂級質素，米芝連粒星如果係呢個質素都幾令人失望。…Read More

水木居酒屋裝修骨子，以木為主要材質，配上昏黃既燈光背景，坐得非常舒適。加之餐廳特別有射燈照住用餐既檯面，唔會暗到睇唔到食物睇唔到人，非常好既setting。午餐試左個燒銀鱈魚定食，魚係西京燒既做法，份量夠大，有男性手掌size, 厚厚地身而且肉嫩多油份, 師傅煮既時間拿捏得幾好，魚皮仲係外脆內韌。朋友食左個三色丼飯同滑蛋吉列豬扒丼，魚生部分都新鮮好食，無論吞拿魚蓉同海膽都對得起個價錢。吉列豬都多汁肉厚，加埋前菜三寶，茶碗蒸，沙律同麵豉湯，足夠飽肚。另外，茶碗蒸要點評係整得幾好食既。…Read More

今次係諗唔到有咩食，做次白老鼠上黎新開既塩玉居酒屋試下。開初以為改得呢個名，一定係串燒有不同種類既鹽俾你揀，或者玉子有神奇既地方，點知，係冇既打開menu, 價錢係喺永光中心入面係最實惠既檔次，咁新開張要試下師傅手勢，一定係叫串燒同壽司。串燒賣相ok, 不過食落你會知道食材個質素唔夠top, 而師傅既手勢同火候未能彌補到呢點不足，於是食落就係大眾口味冇特別。咁我覺得芸芸串燒入面，雞類既都燒得不俗，雞尾，雞皮，都燒到外而脆皮，入面唔乾身，一d特殊串燒，好似紫蘇葉包大蝦燒，都幾有新意。壽司都係食材問題，未夠鮮味，師傅手勢都麻麻，壽司飯好易散到一地都係，食左幾貫唔同種類既壽司，整體來說要改進既地方幾多。咁新開既餐廳，質素未穩定都情有可原，期望之後可以食到更好既質素。…Read More

風雲丸不嬲大排長龍，好唔容易遇到午市一輪空檔，即刻貢入去食番個沾麵暖下胃。點左個石燒豚骨魚介沾麵，麵我覺得可以免費揀100到400 gram, 非常體貼到女性顧客需要。我當然揀到最大，上到黎好大份，足足係隔離檯兩倍size，但係麵質好麻麻，唔夠煙韌，亦唔係硬身爽口，反而好粉質，唔算好食。個沾麵汁就非常濃郁，唔太膩口，不過榨幾滴檸檬汁落去會好食好多。味道係魚介為主，豚骨味唔太搶，我覺得係ok ge。叉燒好大塊，都唔薄身，肥瘦兼備，我覺得係水準以上。最尾試埋碗香鬆飯，用黎撈汁，點知米唔係全日本米，有溝泰國米，之後份量又細碗，確係有少少失望既…Read More