lhsiu's Profile

座落喺街角嘅小店，門口亁淨企理悅目。去佛教醫院經過幾次，今日中午剛好有時間嚟試吓。入到嚟，中間喺綠色主導嘅酒吧區，座椅落喺兩邊。環境衛生乾淨加上好relax嘅裝飾，舒服寫意。叫咗騸牯牛肉同崩沙腩檬粉，上台時用湯壺倒入滾熱辣牛骨上湯。湯頭帶清甜可口，冇用味精，騸牯牛肉同啲崩沙腩，食到濃濃牛味鮮甜可口，好新鮮，成碗湯冇理人，清晒一滴無剩。個人覺得比油麻地「越發」更勝一籌！叫咗個越南滴漏咖啡，煉奶分開上，細心。佢採用最濃（度）級數嘅咖啡，上嘅時候，店員有提過，個人感覺比一般街外嘅越南咖啡濃烈好多，苦味稍重。喜歡pho的，呢間一定要試！…Read More

是日精選：雞球大包幸存的老店還在經營，上一代的老板已經退休了，現在已由老員工接手。唯獨傳統的點心、手藝還能一直保持住。牆壁上掛了這幾年的米芝連推介證書。還有，每次嚟嘅必食巨型韮菜角！…Read More

喺九龍城想搵間越南餐廳輕食，當然選越式法包配個滴漏咖啡，上OpenRice睇吓，呢間打正旗號叫「越南麵包」，而且like唔少。不過，係必須先調整一下香港人嗰種時間效率觀念丶唔趕時間丶最好有返2個幾鐘buffer，同埋，唔係太餓先好嚟。餐廳係cafe style，幾有心機同舒適嘅佈置。唔講，真係唔似已經開咗八丶九年（最早嘅留言係2014）。坐低，九成抬滿、樓面、收銀丶水吧得一個女仕！叫咗一份法包丶慢煮咖喱牛腩配蒜蓉包，加埋杯滴漏咖啡，前𢓭等咗一個幾鐘先齊嘢，用咗十分鐘就食完。有理由懷疑，個廚房都係嗰位女仕負責。平心而論，佢嗰法包係baguette，唔係豬仔包扮的，暖身脆口，落埋辣椒同芫荽，夠正宗。嗰咖喱牛腩，慢煮睇嚟同平時炆嘅效果，分別不大，都係林。可能怕你滯，牛腩不算多。二個人食完好似唔係咁夠，不過冇時間再等多一個鐘，埋單走人盛惠$444.4。整體嚟講，食物方面係算理想，不過，就要睇吓你識唔識得，用法式金錢同法式時間嚟欣賞佢。…Read More

星期日中午，想食輕便啲，ordered咗「酸辣海鮮湯檬」同埋「香茅牛肉撈檬」，見加$12就可以叫埋個「越南滴漏咖啡」當然唔蝕底，要少煉奶。餐廳每張枱，枱頭擺咗一支「是拉差」辣椒醬同埋一樽粉色透透哋明嘅汁，有啲橙色沉澱物喺底，應該係檬粉汁，比起一啲越南餐廳會加埋辣椒同青檸，賣相就差咗少少。「香茅牛肉檬粉」嘅牛肉，食唔到有香茅味，有少少酸白紅蘿白絲拌喺側跟，加埋啲炸香嘅紅蔥同蒜粒，食落啲檬粉好爽又滑，要用埋匙羹先撈得住。「酸辣海鮮湯檬」，雖然湯上邊飄住少少紅油，不過就完全無辣味同酸味，可能用咗蜆肉嚟餚個湯，飲落非常清甜，檬粉加上脆口嘅洋蔥絲同埋金不換香葉，口感十足。飲開「越南滴漏咖啡」，嗰浸雲呢拿奶香係好令人難忘，加上佢用煉奶做底，好多時都會流於過甜，而少咗咖啡豆嘅甘香，今日叫少啲煉奶，味道剛剛好。如果呢間係尋常街邊小店，我會覺得ok。不過，作為一間專做越式牛肉粉嘅專門店，出品就只可以話不過不失，毫無特別之處。…Read More

去「置富都會」飲茶，通常都會揀「彩福」，第一貪佢開得早，第二啲點心出品，一向都有一定水準。是日幾個點心落肚，打算叫個「合桃馬拉糕」試下。點知嚟到，打開個點心蒸籠蓋，3件糕好似比8號風球掃過，東歪西倒咁瞓低咗，當堂呆咗一呆，原本一個圓軲轆開四份嘅馬拉糕，比咗三份，所以全部瞓低咗。立刻問部長阿姐，話佢知廚房出錯。點知，最吊詭嘅係，阿姐竟然同我哋講「係呀，一向都係咁様三件，好多客都有咁樣問，我哋都唔明點解？」「What?!」當堂黑人問號上身，如果成本貴，可以做細啲，或者收返貴少少，但係點可能一個馬拉糕切開四份，然後，放返三份入點心籠比個客？！…Read More

周未踩單車，做少少carbo loading，就想起有呢間鋪前擺滿各款口味、大過塊面幾倍嘅30吋pizza專門店「Canadian Pizza」。今晚7點多少少嚟到，已經賣到所剩無幾了。還好，重可以叫到：「芝士四重奏」、「松露雜菌」、「瑪格利達」同埋「啖啖肉」呢四款口味。店員問「需唔需要要幫你返熱？」，因為屋企有焗爐，所以婉拒咗。返到屋企，每款薄餅用咗180度爐溫焗12分鐘，熱辣辣攞出嚟食。佢哋嘅薄餅芝士夠曬厚，加上濃郁嘅蕃茄醬，個餅底厚度大概係，介乎於薄同厚批中間，所以個平衡攞得啱啱好。四款口味各有佢哋獨特嘅味道，我哋兩個人一齊share咗三份批嚟食，每份係1/6個批（30吋），已經飽到唔郁得，剩返嗰個只係食咗幾啖。四份批$200有找，比起Pizza Hut宜家大批賣緊$198，唔夠兩個人食！佢哋的確大份又好味之餘，同樣價錢重可以食多幾款唔同味道！…Read More

是日下午去尖沙咀漢口道做嘢，四點幾行過BakeHouse，竟然冇乜人排隊，立即「飛雲」上身，行入去睇下買啲咩做下午茶先？見有隻包叫Bolo Bun？再望吓個外型，兩吋圓形大嘅包，面嗰浸厚酥皮，哦！呢個係「菠」「蘿」「包」！Apple Cinnamon Bolo Bun: 肉桂味夠香，蘋果果蓉仲見到一粒粒，啲餡料塞滿左成個包，最重要係唔會死甜，除咗個size細咗少少之外，冇嘢投訴👍🏼👍🏼👍🏼👍🏼👎🏾。Salty Egg Custard Bolo Bun: 食嘅時候，個包已經凍咗，不過依然唔覺油膩，咸甜恰到好處👍🏼👍🏼👍🏼👍🏼👎🏾。睇嚟BakeHouse可以長期成為人龍店，確係有返咁上下實力嘅。…Read More

紅磡「置富都會」幫襯開嗰兩間酒樓，逄星期六日飲茶，多數難搵位。「景逸軒」喺接壤旁邊「都會海逸酒店」嘅中間位置，酒店ballroom setting，雖然OpenRice上冇乜飲茶食評，不過夠大又唔使等位，行多幾步，又嚟試試到底係龍與鳳。菠蘿叉燒包菠蘿包酥皮略嫌厚，個包咬落去硬刮刮，叉燒餡料一陣油饐味，再望下原來只得幾粒，晶瑩剔透的肥膏。👎🏾👎🏾👎🏾👎🏾👎🏾紅油抄手雲吞皮薄，菜肉餡料飽滿，可惜個「紅油」只係尋常不過嘅蒜蓉甜豉油。👍🏼👍🏼👎🏾👎🏾👎🏾XO醬石鍋腸粉有熱辣辣嘅石鍋慶住，伴住XO醬炒過，仍然保持乾身，無油淋淋。👍🏼👍🏼👍🏼👎🏾👎🏾椒鹽雞軟骨一上碟見到粒粒都咁圓轆轆，落咗太厚炸粉，雖然炸粉啲味調得唔錯，不過食咗幾粒，已經好滯。👍🏼👍🏼👎🏾👎🏾👎🏾鮮蝦腸粉腸粉切成五段，每段都有蝦喺入面，咬落有2/3係粉皮。同一般「皮薄餡靚」嘅做法背道而馳，的確夠另類。👍🏼👍🏼👎🏾👎🏾👎🏾椰汁燉鮮奶怕太熱一早叫定上枱，最後先嚟食。一啖擺入口仍然暖暖哋，滑溜之餘，個蛋白鮮奶滿口椰香，應該係用埋啲椰青水一齊燉。食完意猶未盡，刮埋啲椰青肉一齊食，香嫩滑。最後竟然食出個驚喜，都算係成餐飯嘅反高潮。👍🏼👍🏼👍🏼👍🏼👍🏼如果「景逸軒」個包裝同收費，係一般街坊式酒樓嘅話，又或者佢只主打做高級宴席，咁應該係一啲問題都冇。不過，嚟「景逸軒」飲茶食點心一次就夠了。…Read More

星期六要去MoKo「新世記廣場」買嘢，順便早少少嚟到食個brunch。咁早開門嘅，「翠園」同「念川居」都係唔錯嘅選擇。回味上次喺「又一城」食過「望月樓」嘅「雪山叉燒包」，今次就幫襯返佢哋間姊妹店「念川居」。10:15am入座，限時90分鐘，即刻落單。「雪山叉燒包」👍🏼👍🏼👍🏼👍🏼👍🏼，墨西哥酥皮入面，叉燒餡料熱辣辣，個包底脆口，應該係焗之餘再煎過嚟。「蘋果叉燒酥」👍🏼👍🏼👍🏼👎🏾👎🏾，以為係焗嘅叉燒酥，原來係用千層絲酥皮鋪上芝麻包住嚟炸，雖然香脆可口，可惜炸物一向唔係 ”our cup of tea”，浪費咗😅。「渝州凍麵」👍🏼👍🏼👍🏼👍🏼👍🏼，凍幼麵簡單伴上青瓜絲、芽菜、淡醬油同蔥花，食落麵質爽口彈牙，花椒味香但唔會搶晒其他味道，蔥花同青瓜絲清新爽口。尋常不過嘅食材，口感、味道不溫不火，平衡得恰到好處。「紅油抄手」👍🏼👍🏼👎🏾👎🏾👎🏾，作為主打川菜，呢個抄手麻、香、辣都唔夠，只係得甜豉油同紅油，相對略遜一籌。「螞蟻上樹」👍🏼👍🏼👍🏼👍🏼👎🏾，估唔到尋常不過嘅菜式，一樣做到水準之上。上完洗手間，碟餸上台攤凍咗一陣，不過啲粉絲依然咁彈口，唔會黐埋一齊，又唔會乾身，最重要唔會油淋淋。是日我哋兩個$470落樓，唔算平，不過，絕對係有水準值回票價，睇嚟呢度，都應該會成為我哋嘅飲堂。…Read More

早兩個星期晚市開放堂食，搵咗間主力做晚市嘅食肆「川味香」串燒嚟解饞。冇想到地踎格局嘅小店，串燒無死重味精，勁鹹，反而靠孜然粉、辣椒粉同花椒等香料醃製作招徠，食完嗰晚返到屋企冇覺得口渴👍🏾。是晚心思思想試吓外賣，咁就可以食得舒適，慢慢品嚐。7:50pm喺店度落單，諗住30分鐘應該可以取，由喺門口等，等極未到，到眨吓眼就變咗八九個Foodpanda嘅賽車手一齊等，心知不妙🥲🥲。期間Foodpanda賽車手不停進出小店，查看訂單情況。最後企喺度，等咗足足1個鐘頭10分鐘先有😭😭。可能，呢個係端午節假期前夕，外賣單特別多，而佢哋嗰廚房又只得兩個人做嘢。「串燒韭菜」👍🏼👍🏼👍🏼👍🏼👎🏾，孜然香口，辣辣地好惹味，唔鹹呢個，贊！「厚切牛舌」👍🏼👍🏼👎🏾👎🏾👎🏾，其他舖頭有佢咁大塊冇佢咁厚，一樣香口，可惜因為等外賣攤凍咗，食嘅時候凍冰冰🥲🥲，大打折扣。「串燒雞軟骨」👍🏼👍🏼👍🏼👎🏾👎🏾，鍾意食雞軟骨，但係通常都係讓以炸嘅為主，串燒嘅好處，就係冇咁油膩，食多幾串都唔怕🤣🤣「川燒馬友」👍🏼👎🏾👎🏾👎🏾👎🏾，見有半條或全條可以揀，見全條$148有啲貴，諗住order半條，落單個阿姐話冇半條賣😳😳，咁焗住叫咗全條。不過even係全條，撩咗好耐，都冇兩啖肉食，雖然味道可以，但係性價比太低。因為鋪位太細，廚房對出就係一個垃圾桶，跟住就係12個迷你卡位到門口，如果可以接受到小店嘅衛生情況，而又唔介意坐得屈質，下次都係喺舖頭食會好啲。…Read More

自細喺深水埗長大，兒時幫襯開嘅食肆，剩返「合益泰」、「公和」同埋「合成」等幾間，買少見小。不過，「合成」就好多年前就已經搬咗去九龍城，喺舊址「清真牛肉館」旁。今晚嚟「清真牛肉館」食晚飯，好想食嘅咖喱牛腩竟然沽清，意猶未盡，想起隔兩條街嘅「合成糖水」，順路探訪。「合成」賣嘅係潮式糖水，佢哋有一種潮式糖水料叫清心丸，喺外面嘅糖水舖較少可以搵得到。清心丸呈方糖大小嘅透明形狀，咬落口感非常煙韌，喺嚟「合成」必叫嘅選擇。基本上，所有嘅糖水湯底及配搭嘅糖水料，已一早分開煮好盛起，待客人落好單，再合併成各種口味嘅糖水，所以，我成日諗，間舖頭名，係咪由此而來？今晚叫咗兩款糖水，分別係清熱百合綠豆清心丸👍🏼👍🏼👍🏼👍🏼👎🏾綠豆沙加咗臭草，好清香微微帶甜，食落感覺好下火，加埋煙靭嘅清心丸，完美配搭。冰花蓮子雪耳西米👍🏼👍🏼👎🏾👎🏾👎🏾落單時，侍應姐姐問落唔落奶同埋冰？原來啲冰係用冰粒，冰粒略大，如果可以改用沙冰，可能效果會仲好啲，而奶就用上咗花奶。可能煮蓮子嘅糖水，落得重手咗，食落略甜。幾羹過後，竟然撈到蚊螆一小隻。其實老式食肆好多時，味道未必會係好特別，我們更多的是慶幸，喺時代巨輪下，還偶有機會可以回味的一份兒時回憶。當然，衛生情況就必須與時並進嘅。…Read More

作為一個芫茜控，行過見到有呢個「芫茜蓉米線」即刻對眼發曬光；更重要嘅係芫茜「蓉」而唔係純芫茜「湯」，令件事更吸引！盛惠$53大元，米線同湯底分開上。米線丶皮蛋丶芫茜丸，同大大塊嘅嘅炸豬扒裝埋一碗，芫茜蓉湯另上。急不及待將啲芫茜蓉湯倒落米線入面，撈一下啲米線擺落口… 嘩，真係好得呀，芫茜味喺口腔爆發出嚟，一啲都無欺塲！可能放湯淥耐咗，啲芫茜丸就淡口好多，食落冇乜肉味估計係豬肉丸，如果佢比粒山竹牛肉，可能會正好多。塊炸豬扒大就大啦，不過冇任何味道之餘仲好乾身，好似食緊條柴咁。總括嚟講$53蚊，有好大程度係俾咗落，一塊好掂嘅豬扒度，雖然芫茜味夠，不過真係唔值呢個價錢！芫茜蓉湯米線：👍🏽👍🏽👎🏽👎🏽👎🏽後話，個餐會跟埋芫荽味可樂，不過呢個真係仲未接受到。…Read More

「1935 壹玖叁伍」是一間家庭式經營的高級渝川菜館，為紀念婆婆(婆婆出生年份）而命名嘅餐廳。Two headed spear (右）- Signature cocktail 👍👍👍👍以茅台、威士忌、苦艾酒、生薑、青檸和檸檬調制而成，酒味偏濃。上枱時會以火燒杯酒，散發出清香嘅 rosemary 和橙味，視覺效果一流。Chu Veh Ching（左）👍👍👍👍竹葉青、Gin、苦艾酒、桃、開心果、青檸、斑斕葉調製成，賣相一流。陳年黑醋肉👍🏾👍🏾👍🏾👍🏾炸粉唔多，新鮮熱辣香脆可口，用咗陳醋中和油膩口感之餘，又唔會似平時啲咕嚕肉啲酸味咁攻鼻丶搶口。螞蟻上樹👍🏾👍🏾味道正宗，不過用咗較粗嘅薯粉，掛汁嘅能力差咗，略顯得冇咁平衡。花雕話梅雪糕 👍👍👍👍👍花雕味香醇中帶少少甜，清甜中又帶有話梅肉酸，味道有點複雜，但回味無窮，很驚喜！餐廳Cocktail同甜品很有特色，必試之選！…Read More

呢幾日聽新聞報道，西環「星月樓」有群組感染，覺得個名咁熟悉，先醒起呢間，又係早排爆發疫情丶同樣叫「月樓」嘅九龍塘「望月樓」。抱着獵奇嘅心態，今日去呢間試吓。其實位處「又一城」呢啲高檔次丶大型商場嘅食肆，衛生唔會差得去邊，所以，只可以講呢隻病毒嘅嘅傳播力真係好得人驚。餐廳嘅裝修，燈飾都採用咗較深色現代中式嘅格調，走少少Fine Dining路線，主打川丶粵菜系。茶壺用上仿古銅式，比較容易燙到手。再睇睇嗰張點心紙，一入眼有個「麻辣小籠包」，記得之前喺「新世紀廣場」嘅「念川居」見過，望埋落去原來張點心紙同「念川居」嘅係一模一樣，應該係同一個集團。咁嘅情況下，點返一丶兩款之前喺「念川居」食過好味嘅點心比較一下。雪山叉燒包😋😋😋😋😋：新鮮熱辣，墨西哥酥皮重帶少少脆口，叉燒餡料唔肥，塞滿整個包，雖然唔大，不過絕唔會有，喺外邊食叉燒「空氣」餐包嘅感覺。鮑魚煎糯米雞😋😋😋😋：糯米雞煎得香脆又唔油膩，鮑魚就梗係罐頭嗰隻，只係噱頭，令成件事Grand啲啫。京式叉燒包😋😋：見餐牌上有叉燒包同呢個「京式」，不過就有啲失望，因為貴咗$10喺包個頭「開口」同唔「開口」嘅分別，其他無論餡料丶麵粉嘅口感味道，完全一模一樣。虎皮尖椒😋😋😋😋😋：大大隻嘅青椒煎到起皺紋，再加豆豉丶蒜蓉回鑊爆香，神來之筆係落埋醋，中和左油膩感，開胃之選。鮮蝦腸粉😋😋😋：腸粉分段切開，每一段都包住一隻蝦，不過不失。今次就冇點上次喺「念川居」嘅辣嘢，原來佢哋嘅粵菜點心都有一定水準，可以再嚟。…Read More

荃灣西Bamboo Thai 初開業嗰陣，比門口張巨型「肉骨架」相吸引住。奈何幾次想試，都比條人龍嚇怕咗，今日就趁佢哋未12點開門就喺門口等。「冬蔭公」撈咗一陣搵到一隻中size蝦，可以擺上面比相機食。個湯底酸辣度略嫌不足，有點失望。還好，香茅同新鮮泰國檸檬葉香味好特出，幫了一把。鎮店之寶 -「火山排骨」叫咗細份不過依然咁巨型，排骨上鋪滿生蒜粒丶香葉丶青指天椒，個汁就酸酸地。排骨應該係用咗脊骨，或許預先整好嘅關係，配料同個醬汁喺上碟前一刻先落，所以骨架食落有陣油膱味，而醬料亦未能中和到肉嘅油膩感。「青木瓜蝦沙律」可能食完前面兩個餸再食個沙律，感覺欠缺酸辣，淡而無味。正當我哋考慮加單時，waiter哥哥已經好快手收曬我哋枱面啲碗碟🤭🤭 。整體來說：五分為滿分冬蔭公 👍👍👍 火山排骨 👍👍👍青木瓜蝦沙律 👍👍…Read More