LiWingKinAlfred's Profile

3個男人支持本地經濟唔北上，點知遇到特別體驗。🥲一入去正常招待，係坐低洗野遇著個似賭輸馬既阿伯特別禮貌招呼之外，一心諗住好食就ok啦，係我地唔好累阿伯輸錢。🥲叫前菜白灼魷魚同海蜇頭，食落同喺屋企拎煲滾水自己烚無分別，海蜇頭唔夠爽有少少靭，或者係我地唔識食。🥲之後尼左杏汁菜乾豬肺燉湯，熱辣辣拎出尼，個碗好熱，但個湯係凍，或者又係我地唔啱，我地7點去食太夜，應該4 5點去先啱。🥲跟住咕嚕肉無乜特別，唯一賣點係用新鮮菠蘿，可能佢地以為全港佢地獨有，所以收得價錢較高，btw起碼呢個餸唔會太刺激情緒先。跟住朋友話見佢餐廳名海鮮菜館，就試一試佢，餐牌好多寫左「時價」，我地咪問下幾多錢。一問完之後成晚招呼就好似去左澳牛咁，我地問海中蝦幾錢斤，位女士話「有平有貴，睇你地想點先」，咁我哋就問貴幾錢平幾錢，跟住女士話「貴就600-700蚊斤，平就300-400蚊斤」，我再問清楚平既即係300定400蚊斤，佢即刻話「400蚊」（都唔形容佢面口係咩色同當中對話態度），對於一個食開海鮮既人就會明白個價錢發生咩事，但一心支持本地食店就試下佢，尼到係7隻中size既鬼蝦（都唔計較佢有無一斤），粉絲底好正常係食得既，蝦就有少少過熟咁，或者再次係我地唔啱，食炒食炸咪算囉，學咩人蒸粉絲。🥲食完都無一半飽問朋友仲要唔要加餸，大家意見一致要去拜個神轉轉運先，要趕住走都係我地問題。🥲食食下見到有幾張枱特別好招呼，每個行埋去都好似返左大陸餐廳食野咁好招呼，先發現果幾枱講普通話，原來佢地好貼心比佢地有返家鄉服務，我地港人就有港人服務👍👍🥲或者唔關人地又開酒又食海鮮食幾錢事既，係我地3個唔啱食左1000蚊。🥲埋單走既時候都禮貌地唔該佢地，佢地依然保持澳牛服務，好野👍🥲另外，朋友本身經平台book左枱，佢地會叫你取消就送半份炒蜆，我地見枱枱都係咁，個炒蜆食剩一半有多，或者果日天氣熱我地無乜胃口同蜆應該要有沙先好食，都係我地問題。🥲保障人身安全，淨post一張相證明真實用餐食評。…Read More

睇左好多食評，專程去試。夜晚8點到，諗住食甜品當dinner ，入到去侍應笑容滿面，得一枱情侶幫襯。叫左兩份窩夫，兩杯沙冰，雞翼尖，腸粉魚蛋腸仔。先講雞翼尖，完全唔係辣味仲有少少怪味，或者唔岩我個人口味。腸粉熱辣辣無問題。（不過好多豉油好咸）腸仔唔似係廚師腸，唔知佢係第二隻腸定烚得太耐。魚蛋一咬落去係散既，相信佢都係拎貨唔會係自製，建議搵過第2間入貨。窩夫因個人問題凍左少少先食，正常熱食應該係ok既，凍左都唔算太差。沙冰都正常，有d粒粒果咬下，同埋個益力多沙冰個造型真係幾搞野。成晚最令人反感既係我2個人叫左呢d野食, 都要d時間食架嘛，全程食左你1個鐘，食左$246都唔算話白坐霸住你張枱，如果爆場有客等，你用眼神表情想我快d走都理解，但你又無人等又有吉枱，都要咁樣令我食得唔安樂，仲要埋尼收野一句聲都唔出，其實有d腸粉仲未食完囉。小弟比較少周圍食甜品糖水，但好肯定呢間唔係我覺得最好食既一間，但肯定係我暫時遇過服務態度最差既一間。😤😡😠…Read More

呢間響晒朵，被譽為全港最好食既咸牛肉炒蛋，難得閒日唔洗番工可以有緣去試食，門口排晒長龍，最正咁岩係獨食即刻有位比我入去✌️坐低見到差唔多陣一大半人都食咸牛肉炒蛋同公仔麵，於是有樣學樣試食下😎蛋牛例牌咸牛肉一食就知番唔到轉頭，終於明白點解咁出名，味道唔會太咸，夾起亦唔會太散，仲可以用多士夾埋一齊食，唔會太dry.豬扒公仔麵個麵底唔會好淋，有少少硬身，岩我個人口味，豬扒亦都出乎意料地出色，唔會太硬，下次想試埋個雞翼。…Read More

下午茶試食，意想不到既驚喜。呢度雖則都幾幾隔涉，好少人會專登尼搵食，機緣巧合揸車經過又有位泊就試下。呢間元朗幾十年老字號而家喺呢個新位置假期都好好生意，都要等十幾分鐘先有位。叫左下午茶餐公司三文治同杯凍檸茶。價錢就一定比普遍茶記貴少少，杯茶正常無失望，茶味同甜道都好合理接受。最想讚個公司三文治，真心講句而家間間茶記冰室d公治都係好公式化，無新意加無心機製作，但呢度個公治食得出用料有誠意，同埋唔覺油膩，絕對對得住價錢，下次翻轉頭都會再叫😋👍👍…Read More

之前睇介紹，呢間招牌清湯腩原來暗藏兩大孖寶，於是我分兩次去一嚐佢有幾出色。海南雞飯（$48）加六蚊要脾位，附送老火清雞湯,加多幾蚊有杯野；雞肉既質感絕對無問題，非常滑,雞皮帶少少膏；飯夠香，絕對無用黃薑粉，但比較乾身同硬，建議食之前試一兩匙個湯去撈一撈，口感會更加好同埋食落更香泰式豬脾飯（$50）附送老火清雞湯,加多幾蚊有杯野；豬脾入味，肉質夠晒淋,食落唔會鞋口鞋面；個汁幾好，非常適合送飯。個人認為豬脾比海南雞更出色，另外要讚隨湯附送既大舊蘿蔔夠淋又無渣。呢間食店如果喺呢區同類食店尼講，應該屬於頂級。…Read More

呢幾年香港好多新食店專做肉餅，但早喺四五年前就已經聽個間肉餅店用生果一齊做肉餅，仲要做到大受好評，出晒位。事隔幾年慕名而來，不過就無試佢招牌既生果肉餅，叫左個薑蔥蠔豉煎肉餅。份量絕對夠食，豉油任你自己落，仲要都多菜，唔會話齋食肉餅咁油膩。佢飲品方面跟飯都係加幾蚊，另類d好似飲咸檸七就加$15，都非常合理。最重要塊肉餅方面，煎得岩岩好，夠香口又唔會過份油膩，肉唔會剁得太爛而無咬口，仲有入面都好多蠔豉，唯一建議改善既係d蠔豉肉硬左少少。好在係閒日下午茶時間，朋友話星期六日假期果d好多人排隊。…Read More

本人自問都係一名牛精，見到呢間前米豬蓮，就慕名去試食，以下食評純粹個人口味意見。先講環境，店舖都唔算細，就只有細枱，4人以上就要分枱坐，衛生方面都算唔錯。服務方面都幾好，態度友善同唔會一食完就逼人走（可能未到爆棚時間）。食物方面，佢個清湯牛腩麵有分大($52)/小($38)，叫左個小，份量同一般粉麵舖相若，甚至仲多少少，大食者就未必夠食，同埋可以叫肥腩等要求，尼到真係件件肥，同埋唔會有菜，得蔥同一大舊蘿蔔。湯底幾好，非常清，一d都唔渴喉，個人建議可以再加少少牛骨淆湯會更好。牛腩賣相非常好，但肉質絕對唔掂，肉比較鞋身，食落都幾硬，難咬得爛，食到痴晒牙，同埋牛味方面爭少少。（本人早前曾對灣仔某一麵店作出食評，果間麵店令我明白到好既牛腩就算咩位，都可以做到唔硬唔痴牙）蘿蔔清甜無渣，我一向不太食蘿蔔都覺得幾好食。喺專頁見到佢招牌菜炸鯪魚球，就叫左個蜆芥鯪魚球試下。首先個蜆芥汁完全不值一提。鯪魚球比較細粒小小都唔緊要，食落唔彈牙，每粒鯪魚肉料都爭少少，同埋食到有骨仔，好難理解佢話係招牌菜，可能佢另外個鯪魚餅會好少少。真心認為好多未拎過米豬蓮嘉許既牛腩麵店比佢更出色。其實米豬蓮真係試過晒所有店舖？定係只會喺旺區旺街果d試食？…Read More

久仰大名，夜晚11點幾，都仲係有人排隊買飛，一街三舖都坐滿人真係不得了，本人對車仔麵一向無乜興趣，最主要坊間好食果d都係辣或咖哩而出名，但本人係少少辣都食唔到。呢間米豬蓮車仔麵，d餸既數量選擇真係冠絕全港，佢多之餘仲要係有水準，好多朋友推介蘿蔔同牛腩，但我今次就試左瑞士汁油麵3餸：豬手，豬油渣，瑞士雞翼麵好正常，份量正常，大食者一定唔夠。瑞士汁好掂，唔會甜過龍，同埋最緊要唔會食完好口渴。瑞士雞翼夠入味，唔會硬身鞋肉，唔會太細隻，食完真係想再添食。豬手兩大舊入味，佢一舊等如其他店既兩舊，肉不多，但非常抵食。豬油渣方面一定好過前少少間老字號油渣麵，同埋佢d油渣都幾大條，但個人認為d油渣可以有少少肉會更正(本人係英記粉絲) 。最後加支蔗汁，正常無特別。呢間車仔麵非常適合唔食辣人士，性價比極高，價錢同坊間相若，但餸既味道同選擇已經贏晒所有車仔麵店。唔好期望坐得舒服，因為好多人流量快同埋係搭枱，店員見食晒就好快手收野，食飽就好快d走，唔好阻住食友食好西。😊…Read More

本人身為pizza粉絲，睇完生果報介紹，一心去試下佢有幾咁正宗同埋個餅底可以點樣食得多都唔會滯。店鋪位置唔難搵，但入面座位唔算太多，繁忙時間就可能要等位。首先佢會比menu你入去坐，然後再出去買飛，之後就坐定定等佢送尼。兩個人淨係order左一個13吋pizza, 無記錯係Canadian(因為係朋友出去買飛) ，先講配料，個茄汁真係好得，同佢介紹講得一樣咁無得輸，肉方面都好合理，佢總共有10款pizza揀。之後真係要講講餅底，脆就一定，同埋佢烘到小小燶個味道真係食番以前喺外國食到既味道，同埋佢喺介紹度講過d麵粉發酵好耐，食落唔頂胃唔會滯，果然無誇大，真係食左半個都無頂住頂住既感覺，非常值得要翻食。見到隔離枱叫左d意粉，賣相都好好。唯一建議改善係個pizza可以再熱辣辣d就更好，佢送到枱都係微熱。…Read More

今時今日，聲稱自己無味精而生存到既粉麵店真係買少見少，咁岩今日喺灣仔，就專誠去証實係咪真無味精。差唔多4點去到，魚蛋魚片果d已經沽清，就試左筋腩米，問佢可唔可以轉肥腩，佢話無晒，只係賣淨d瘦腩位，仲保証唔會硬到食到鞋口鞋面，講到咁就緊係試下有幾出色。份量方面適中，大食者最少食2碗先飽。牛筋唔會夾起軟到爛咁，食落爽口同好淋👍雖則本人不太喜歡瘦腩，但真係好淋，同埋食完竟然無痴牙👍最重要任務係試下佢個湯有無味精，雖然有腩汁喺入面，但一飲竟然無渴喉感覺，飲左五六啖都完全無頸渴。另外仲叫左油菜，個蠔油唔會太咸都幾正。下次希望試到佢個龍躉三寶。…Read More

元朗區食炸魚皮，鄭洪記真係唯一一間做得出色。以前食開佢既牛筋腩(餐牌無寫牛筋)同墨丸牛丸，見到佢即場包d雲吞幾靚，今次就叫左碗雲吞墨丸米($35)，再加個細魚皮($12)。魚皮唔洗多講，照舊咁出色，1個人食個細都有少少over(大都只係比多$4) ；墨丸彈牙仲有粒墨魚咬下，好滿足；個雲吞並唔係傳統雲吞，佢個餡料就好似雲吞加水餃，味道仲唔錯，一個雲吞滿足兩個願望，值得一試。餐牌唔記得影，但麵價錢主要分別$29/$31,雙併只係加$4, 仲可以加錢轉伊麵撈麵同加底，汽水好似都係$5-6，想試炸魚皮但唔想咁多既，可以加$4，都有三四大塊。雖然環境同衛生唔係太好，同埋唔好預會坐得舒服，但味道仲保持得到舊有水準，區內麵家老店都已經所剩無幾，加上價錢唔貴，食完飽肚又滿足，囉唆都要再講必食炸魚皮。…Read More

以前喺元朗都聽過好多人推介呢間餐廳，但一直都未有機會試到，今日終於喺荃灣試到呢間心機小店。小店座位唔多，眼見室內2枱，室外3枱。無揀到招牌既三鮮麵，叫左個紫菜四寶麵（四寶：福州魚丸，墨魚丸，豬肉丸，豬肉餃）。墨魚丸同豬肉丸都唔錯，大細適中，彈牙，絕對唔似凍肉舖大大粒果d。豬肉餃塊皮好薄，唔怕食皮都食到滯。福州魚丸係爆漿丸，入面個肉餡個人認為油左少少同咸左少少，唔係太岩本人口味。至於個湯方面，未食前好大期望，試左啖真係有點失望，本身諗住會好清，點知唔清同埋感覺無乜特別，或者三鮮麵個湯會好好多。值得一讚佢係用豆苗做配菜。價錢唔算太貴，份量亦非常足夠有凸，小店製作有心機，值得大家試一試。…Read More

本人好鍾意食傳統糕點，睇過好多宣傳同推介，於是慕名而尼幫襯，坦白講有點名大於實，但份量同價錢算係正比，每件都大大舊，好飽肚。買左 砵仔糕($8/件) 真心覺得好普通，唔太甜，無乜特別。白糖糕($8/件)怕酸既食友就千其唔好試，本人都知正常係酸酸地，但都比想像中酸得多。馬蹄糕(約$10/件，佢係按重量收費，但件件差唔多大小)味道好清甜，同埋佢質感比坊間果d更Q彈，好似啫喱咁，值得一試。芝麻糕(約$10/件，佢係按重量收費，但件件差唔多大小)個人認為最值得一試，味道真係好似即磨芝麻糊又唔會太甜，鍾意食芝麻糊既朋友要試下！…Read More

二人堂食，等左唔夠5分鐘就已經有位，坐得唔舒服就必然，但坐喺度食總好過喺門口同後巷企喺度食。腸粉（比普通腸粉檔好，幾滑，好齊整同無咁易爛，仲可以自己任落醬同芝麻，花生醬就係佢加比你）魚蛋（係以前腸粉檔大大粒果d）蘿蔔（無渣同埋都幾淋） 豬皮（呢個就真係無乜特別，同一般舖頭差唔多）燒賣（係豬肉燒賣，仲要有冬菇馬蹄，好好味，必食！）粉果（個人認為d香料比較重，唔岩本人口味，同埋最大問題係佢本身穿左）豆漿（無乜特別，個人認為幾好，唔會太甜）…Read More

大埔街市附近行左好耐都諗唔到食乜，但又想飲杯茶，最後去左搵華輝，有睇紅Van套戲既朋友都唔會對呢間茶記陌生。尼到一定必試佢個蘋果批或雞批，我個人係蘋果批fans同埋對雞批無乜興趣，每次去到都必點蘋果批。如果繁忙時間點，記得叫佢幫忙叮熱，皮酥脆再加蘋果蓉同蘋果粒，好彩既仲會有提子乾喺入面，味道好夾。餐蛋麵都係舊式茶記款，麵唔會淥得唔會太淋，少少生有d咬口，唔好期望佢塊餐肉會好厚，但都唔會好薄。仲有一個我幫襯既原因係熱飲係用玻璃杯。都係果句，食野口味好睇個人，但我本人唔會話味精野係無味精，酸既野係甜。…Read More