scp915's Profile

近排假期都鍾意過去荃灣行下, 食完LUNCH後去一田買沙律菜🥗($50非常大包, 抵食過惠康好多)同埋壽司🍣(拼盤內不只有魚生刺身, 還加入了生蠔🦪或蟹蓋🦀的選擇, 較為特別), 仲有暫時只見一田有賣的冰鮮豬肉片(食過好多牌子, 呢個最好味肉味最濃)。所以最近都食左好幾間荃灣餐廳, Peko Peko Eatery, Homeland, The BASE nature同Pancake House HoiHoi, 個人最鍾意就係呢間 - Pancake House HoiHoi。我好鍾意食梳乎厘班戟, 時不時ENCORE J.S. FOODIES , 間唔中都會試下新餐廳, 不過前排試左兩間都唔好食 - 沙田既Butlery同旺角既PHI Coffee & Pancake , 佢地既梳乎厘班戟同樣沒有煎熟透, 好大陣生麵粉味。然後就比我遇到呢間可以同J.S. FOODIES媲美既Pancake House HoiHoi。最開心係Pancake House HoiHoi 無 J.S. FOODIES咁多人, 每次去都直入唔使排隊。我地點左芝士漢堡🍔(奉送餐湯和飲品, 我嗌既牛奶咖啡就要另加$18)同夏威夷果仁忌廉梳乎厘班戟。芝士漢堡 - 我估計Pancake House HoiHoi 人氣沒有J.S. FOODIES旺的一大原因是鹹點選擇較少。好彩都仲有老公鍾意食既漢堡可以選擇。Pancake House HoiHoi 的芝士漢堡就是漢堡包中最簡單的那種, 漢堡包夾著漢堡肉, 芝士, 蕃茄🍅和生菜, 就連平時常會見到的茄汁和燒烤醬汁也沒有, 但反而就是這樣簡單的配搭才吃到食材新鮮的味道。漢堡肉的肉汁就是最佳的調味, 加上一塊帶點鹹香的半溶芝士🧀, 令整個漢堡包更添惹味。夏威夷果仁忌廉梳乎厘班戟 - 每次黎親都係嗌呢個。愛上🫶梳乎厘班戟的初期, 都鍾意試下唔同既口味, 朱古力🍫, 綠茶🍵, 焦糖, Tiramisu....但試過幾次之後就發現除左原味之外, 其他味道都太強烈了, 蓋過了梳乎厘班戟本身的味道, 兜兜轉轉, 都係覺得梳乎厘班戟簡單的加上原味忌廉係最好味。而Pancake House HoiHoi 呢款梳乎厘班戟就是這樣的配搭然後再係面頭加上一些夏威夷果仁作點綴, 完全沒有喧賓奪主的感覺之餘更為班戟增加了一點層次口感。牛奶咖啡的質素即不太穩定, 有時會較苦澀, 有時又很香醇順滑。鍾意食梳乎厘班戟而又想同時試到不同款式食物的人, Pancake House HoiHoi會是個很不錯的選擇。…Read More

認識驊記糕點屋係因為有一次去元朗行街, 訂左位去食The Yell-Owl Seafood And Grill, 行去餐廳既時候路經驊記, 奇怪點解一間外表平實的舊式士多店有一條長長的人龍。食完飯後, 沿路行返轉頭見條人龍依然都係咁長, 睇黎應該係元朗區內甚有口碑的小食店, 加上咁啱我食糯米糍首選就是花生餡, 所以就決定跟風買黎試下。好耐都未試過為左一間食店排隊超過一個鐘, 自從係好多年前, 湊熱鬧咁排左當時風摩不少香港人的咖啡弄超過兩個鐘後被嚇怕了, 跟住就同自己講, 以後出去食飯要訂位, 無得訂位而到現場見好多人排緊隊既話就轉場。即場手工製作同定價相信係做成人龍的原因。$36一盒6件太良心價了, 老闆娘做到無停手, 水都無飲過一啖, 真係非常敬業, 希望佢有中場休息既時間, 去下廁所, 手腳都可以鬆一鬆。其實我好少買糯米糍黎食, 傳統的中式糕點當中, 我食得最多既係砵仔糕或者馬荳糕。最大既原因係無幫襯過一間層皮係唔厚既, 驊記糕點屋的花生糯米糍令我知道原來糯米糍係可以做到咁薄皮, 以前以為糯米糍層皮咁厚係因為怕餡料太多會穿, 但經過今次可以證實, 就算長途拔涉拎到返屋企, 皮薄餡多的驊記糯米糍係拎上手擺入口嗰刻都無穿。第二個原因係好多坊間既糯米糍都會加入椰絲, 個人覺得花生糯米糍加入椰絲就好似一碟干燒伊麵加入左芽菜咁, 想食伊麵但不斷食到芽菜, 不過呢個係我既個人喜好。而驊記糯米糍就非常啱我口味, 每一啖都是純粹的花生香氣加入少許砂糖點綴, 甜度適中, 大滿足。網上睇到有另外一間有賣花生糯米糍的店舖 - 民豐粉麵行都好多讚, 搵次有機會去試下比較下。…Read More

今日揀左好耐無去過既沙田行街食飯, 主要目標係想買份禮物🎁送比即將做新手媽媽🤰既朋友, 不過最後唔成功, 人太多和SALES太進擊, 都係網上購物比較好, 可以舒服地慢慢揀。之後再去一田, 因為尋晚阿仔話想食士多啤梨🍓, 但同樣放棄左, 沙田既一田好似年宵咁多人, 最後返屋企樓下HKTVMALL買。LUNCH揀左呢間食評唔錯既方叔叔重慶老火鍋。餐廳裝修乾淨企理空間足, 訂座條款說用餐時間兩小時⌛️, 但去到現場, 店員並沒有提及有用餐時限, 最後我地食左兩個鐘, 其間他們也沒有催促埋單的意思。方叔叔重慶老火鍋的鴛鴦鍋其中一邊一定係麻辣🌶, 我地揀左辣度最輕既普通辣, 另外一邊揀養生花膠雞湯。食物方面, 我地嗌左桂花蚌, 牛骨髓, 甜玉米🌽, 嫩牛肉, 美國PRIME牛小排, 現炸豆皮, 潮汕手打牛筋丸, 武隆苕粉, 可樂🥤同水仙烏龍檸檬🍋茶。食物我地全部都嗌半份, 太好了, 希望其他火鍋店也可以效法方叔叔的做法。可以試多幾款食物之餘又可以各自叫返自己最喜歡既食物, 唔怕浪費。我麻麻地丸類, 老公麻麻地海鮮同內臟。方叔叔重慶老火鍋的麻辣湯最唔辣嗰款都唔講得笑咁辣🥵, 建議增加BB辣選擇迎合返香港人口味。我只係將豆皮放入麻辣湯淥1秒再點豉油, 之後用呢個沾有麻辣湯既豉油去點其他食物就已經好夠味。養生花膠雞湯 - 唔係走濃郁味重路線, 偏向平實清淡型, 順口的雞湯味道, 花膠唔太感覺得到。暫時最愛🫶的花膠雞湯鍋是火鍋隨意門, 湯底濃稠鮮甜帶黏口, 滿滿骨膠原的感覺。食物方面, 全部既質素也都令人滿意, 新鮮無怪味。桂花蚌爽口, 牛骨髓滑嫩, 甜玉米鮮甜, 牛筋丸彈牙, 牛小排肉味濃有咬口, 現炸豆皮就是響鈴沒有捲埋一齊既版本, 入口酥脆。武隆苕粉, 外表同薯粉相似, 但比薯粉有韌性好多, 我個人都係比較鍾意薯粉滑溜既口感。方叔叔的嫩牛肉令我唸起海底撈的滑牛肉, 做法類似, 應該都係用左梳打粉黎醃肉來軟化牛肉的纖維, 而方叔叔的嫩牛肉質素比較好, 有肉味之餘, 牛肉亦無經過份醃製令肉質完全失去彈性。不過我私心還是比較推介嗌返無添加的牛肉片黎打邊爐。水仙烏龍檸檬茶味道唔特出, 但勝在非常大杯加冰凍, 嗌黎搭配熱辣辣既邊爐, 身心舒暢。如果唔怕熱氣, 下次去沙田會再次ENCORE方叔叔重慶老火鍋。…Read More

我唸都應該有起碼成年無食韓式🇰🇷炸雞, 因為容易喉嚨痛既我都會將quota留比打邊爐。食過咁多間韓式炸雞, 暫時我地都一致認為大角咀既My Ahjussi 最好味。今日計劃去海港城買生日禮物🎁比屋企人, 所以就順便係海港城搵炸雞食。兩間食評也不錯的韓式炸雞店中選擇, 奇納百川同Terrace in Seaside。老公揀奇納百川, 話因為有景睇。11:30AM⌚️開門, 我地係第二組客人到店, 老公如願地坐到窗口🪟位。(我就麻麻地窗口位, 因為光線太強我會頭痛。)我地點左蒜香🧄蜜糖炸雞, 奇納百川沙律🥗, 菠蘿🍍椰香冰同可樂。蒜香蜜糖炸雞 - 好耐無食韓式炸雞既我地真係比奇納百川既蒜香蜜糖炸雞浪費了一個寶貴既quota, 又乾又唔入味, 麥當勞既炸雞都好食過佢。蒜香蜜糖汁偏苦, 蒜頭落得太多蓋過蜜糖味。奇納百川沙律 - 有餐廳名字冠名的沙律, 心唸應該唔會差得去邊。可惜既係呢個奇納百川沙律就只是將幾款唔同既食物放埋一齊再加一丁點沙律汁, 無講錯, 真係一丁點, 基本上都係食食物既原味, 就係無味, 牛肉最差, 又韌又無味, 點解事先醃下D牛肉都懶。而其實沙律汁本身都唔好味, 太酸, 好似食檸檬咁, 求其係超市買支柚子醋都好味過佢。好掛住cheesecake factory 既SHEILA'S 茜拉雞肉牛油果沙律。菠蘿椰香冰 - 酸, 唔覺有咩椰香味。仲有佢地既服務態度, 無表情都算, 係我地食到最後一啖既時候就遞將單🧾要我地埋單, 基本上係同步, 真係第一次遇到呢個奇景, 飲品都仲有一半未飲。當然, 我地都無理佢, 埋單後繼續飲我地既野, 90分鐘限時麻, 而店員也非常精明地計足90分鐘比我地, 限時一到就趕客, 當時餐廳少過一半入座率。可以將心思放在食物的質素嗎?…Read More

近排因為忙於屋企👨‍🔧裝修, 所以大多數都選擇係屋企附近簡單食。都無特別意欲寫食評, 直至上星期因為約左係佐敦做身體檢查, 完成後到附近一間叫悅麵的小店午餐, 非常有驚喜, 好味, 價錢合理, 員工/老闆態度親切友善, 就後悔竟然一張相都無影幫佢地宣傳一下。所以今日就算都只係好似平時咁放工💼到就近既地方晚飯, 我都決定影定相留定底先。我地點左香辣星洲炒米粉, 咖喱豬頸肉意粉, 凍檸茶同🍍菠蘿冰。送例湯, 味道正常。咖喱豬頸肉意粉 - 難食, 真係每食一啖都忍唔住皺一下😕眉頭, 醬汁是咖喱色加生粉水, 豬頸肉沒有先醃, 意粉也是完全無味, 點解唔落少少鹽調下味呢。香辣星洲炒米粉 - 呢個好丁點, 起碼有味道, 但以一碟正常的星洲炒米去睇, 也是不合格。平時我好少食星洲炒米因為怕辣, 但呢個只有好輕微既辣, 香料份量明顯落得好少, 基本上都係鹽的味道。菠蘿冰 - 呢個最差, 唔係藥水味, 根本就係一杯藥水, 慶幸我沒有叫特飲。老公話呢餐飯唯一可取之處是坐位尚算舒適。食完呢餐, 突然超級掛住紅茶冰室的咖喱焗意粉。…Read More

輕時光這間飲品店🥤一直都在我的口袋名單內, 因為佢地主打我最愛💯喝的smoothie呀。香港的飲品店開到成行成市, 最近比較常買既有Comebuytea, 木衛二鑄茶所同NUTTEA 。但可能因為對🇦🇺boost的情意結吧, 加上香港真係好少賣smoothie既飲品店, 所以smoothie還是我心目中第一名愛喝的飲品。間唔中去餐廳食飯既時候, 見到drink list有smoothie可以揀都會嗌。但多數味道都令人失望, 有藥水味。同埋發現香港既smoothie多數都會以沙冰既方式呈現, 唔係我最愛既yogurt加生果, 所以宜家都好少再嗌smoothie黎飲。天后位置唔方便我, 所以今日我專登為左輕時光BOOK左間位於天后既💆🏻‍♀️按摩店。我嗌左芒果🥭優格果昔 - 就是新鮮芒果加優格的味道, 啖啖香濃滋味, 絕無偷工減料更無藥水味, 我認為優格果昔是夏天的最佳飯後甜品, 既消暑☀️又健康。私心有個建議, 我覺得可以效法boost咁加入香蕉🍌落杯果昔度, 令層次更豐富之餘又可以增加天然甜味, 糖都可以落少D甚至唔落。香港可以有更多賣優格果昔的飲品店一直都是我的願望。…Read More

因為屋企裝修👨‍🔧要買瓷磚家品, 所以近排多左黎旺角LUNCH, 今日揀左呢間位置好方便, 食評好好既餐廳食晏。我們二人被安排坐在窗邊🪟四人枱, 可能坐向問題, 既可以享受充足的日光但又唔會刺眼, 整體環境頗舒適寬敞。星期六都有午市套餐供應。我地嗌左兩個午市BBQ SET。和牛上肋肉燒烤定食同和牛牛舌特選。另外嗌左兩杯飲品 - 荔枝梳打同提子🍇特飲。最想要讚既係佢地既免費餐前小食 - 泡菜。選用新鮮大白菜入口脆嫩清爽。辣中帶甜, 非常開胃惹味。仲要份量超級多。和牛牛舌特選 - 套餐內有肉眼上蓋(Hanwoo Boneless Rib), 和牛上肋肉(Wagyu Rib Finger), 和牛牛舌(Wagyu Ox Tongue)同名品牛小排(Prime Chuck Tail Flap)。我們一致認為柞木炭家所揀選的所有肉類質素甚好, 肉味香濃, 肉質鮮嫩厚實。第一眼望到Wagyu Rib Finger既時候, 見到有一半都係肥肉, 仲有D失望, 但燒熟之後卻非常有驚喜, 入口軟嫩得黎又有D咬口。相比於上兩個月, 係銅鑼灣食既牛角, 牛肉質素真係差天共地, 都唔好提肉質如何, 最接受唔到就係牛角的每一款牛肉都有一陣騷味, 好唔新鮮既感覺。最後送上一碗柞木韓牛飯作結, 柞木炭家就算連呢碗用黎填飽肚既牛飯也一D都唔馬虎。牛肉味濃, 醬汁調味適中份量足夠, 加入生蛋黃更是加分, 令白飯口感順滑, 更添美味。而佢地既飲品都唔錯, 清新解渴, 無藥水味。而老公嗌既和牛上肋肉燒烤定食, 他同樣讚賞有加, 除了食物質素, 佢讚得最多既就係話呢餐飯真係好抵食🧾。百幾二百蚊既價錢, 無論環境, 味道, 份量都物超所值。之後我地有再幫襯多一次, 今次可能因為節日既關係無套餐提供, 我地嗌左燒肉, 雪梨水冷麵同牛肉紫菜包飯。好鍾意韓式紫菜包飯的淡淡麻油味, 米飯軟熟, 食材新鮮足料, 推介。而雪梨水冷麵就麻麻, 唔建議嗌, 麵質偏淋, 湯底無味。…Read More

今日計劃好午飯過後到位於太子的煤氣公司睇煮食爐同抽油煙機, 所以揀左附近呢間食評不錯的米線哥LUNCH。我地嗌左藥膳麻油雞米線, 辣肉燥, 香辣豬頸肉牛肉酸辣湯米線, 凍檸百事同凍檸茶。首先湯底方面, 味濃, 不其然令我將佢同譚仔比較, 大家同樣是味精頗重, 而藥膳麻油雞湯的薑放太多, 蓋過了其他食材的味道。肉類方面, 雞, 豬頸肉同牛肉同樣不甚新鮮, 沒有肉味, 肉質也偏乾硬。辣肉燥的調味很單一, 一丁丁的辣味和很重的豉油味。成碗麵覺得最好味既係D圓肉即係龍眼肉, 大粒又甜。老實講, 覺得譚仔都要比佢好味, 雖然都係味精湯, 但譚仔起碼有D層次, 配上質素穩定的土匪雞翼, 簡單快捷的一餐。…Read More

咁多年黎只去過青衣兩三次, 並不是我平日的活動範圍, 放假行街🛍食飯都唔會唸起佢, 最近因為朋友住係度探佢既關係黎左兩次, 第一次去左食意樂餐廳, 意外地覺得質素不錯, 食物溫度夠, 肉質也嫩滑JUICY, 調味剛剛好。最加分係隔離有個兒童遊樂場🛝, 啱曬一家大細去食飯然後輪流陪小朋友出去玩下, 我覺得可以將青衣呢間意樂想像成好似一間親子餐廳咁。長沙灣都有一間意樂, 去過一兩次就沒有想再幫襯的意欲。今晚再黎到青衣, 揀左呢間全是好評的小店。我地嗌左一碗鮮蝦🦐炸雲吞, 厚切午餐肉紅薯粉豬骨湯, 一碗柱侯金錢肚, 蜜汁叉燒, 酥炸雞球米線酸辣湯小辣, 甜酸齋, 可樂🥤同豆漿。湯底不錯, 味濃, 無偷工減料。餸方面除左蜜汁叉燒麻麻地其他都好味。叉燒肉質有點乾同有輕微雪藏味。柱侯金錢肚惹味又入味。酥炸雞球炸得香口有肉汁。厚切午餐肉來貨也是有質素, 之前食過一間係大窩口叫樓下冰室既午餐肉就好難食, 肉質乾硬味道又怪。甜酸齋要讚, 食車仔麵我時不時都會叫甜酸齋, 呢間係我食過最好味, 酸甜味道足, 唔會話偏重⚖️一邊, 最重要係麵筋入口軟滑, 係我最鍾意既口感。鮮蝦炸雲吞我認為是必點, 蝦肉新鮮彈牙雲吞皮炸得酥脆。最後, 豆漿質素就有待改進, 溝得太多水。我覺得初心比起好多出名的車仔麵還要好味, 如果我住附近, 會不斷ENCORE佢地既甜酸齋, 酥炸雞球同鮮蝦炸雲吞。…Read More

今日放工後到位於上環的律師樓簽📑文件, 完成後係附近晚飯, 上OPENRICE 見到呢間餐廳評價唔錯, 仲即時網上訂位, 有全單9折(即係免加一)。還未到5月, 晚上的天氣已十分悶熱, 再加上放工後趕過去律師樓更加出曬汗🥵兼攰, 此時能夠被安排坐近窗邊寬敞舒適的四人枱同有一杯凍冰冰既可樂加持, 頓時令心情輕鬆愉快了很多。我地點左2人餐。首先上餐包同沙律🥗, 餐包正常水準, 鬆軟也有麵包香, 如果可以烘熱少少個包會更好。刺身帶子沙律好味, 尤其沙律菜, 十分爽甜新鮮。炸魚薯條 - 魚和薯條🍟同樣炸得金黃酥脆, 炸魚尤其十分美味, 好少食到肉質咁嫩滑既炸魚, 仲要一D雪藏味腥味都無, 炸漿薄薄一層, 完全做到外脆內嫩的效果, 之前食過The Salted Pig 既炸魚薯條, 唔好味, 外皮又厚又硬。蘑菇湯 - 味道不錯, 頗香濃, 入口順滑。美國頂級牛柳裙邊 - 富彈性而帶點嚼勁, 只是略嫌牛味稍遜。我反而想特別提下佢地伴碟既粟米仔, 一直以為粟米仔之所以叫粟米仔係因為佢個樣有D似粟米🌽, 但其實同粟米無關, 因為入口又硬又無味, 絕對唔會主動買黎食, 見到都會避開。但原來粟米仔係可以咁爽脆清甜, 味道同一粒粒既新鮮粟米一樣。黑松露意大利飯 - 濃郁creamy的醬汁搭配有一點硬度的意大利飯, 好味。其實未開始食個飯已經8, 9成飽, 呢個2人餐太豐富了。甜品有兩款選擇, 百利甜酒燉蛋同朱古力慕絲杯, 我地各自嗌左一款黎SHARE。朱古力慕絲杯推介必點, 就咁睇個名以為就係一杯簡單既朱古力慕絲, 而望到實物更嚇親, 好似一杯非常杰身既朱古力漿咁, 心唸一定會好甜好滯, 點知食過第一啖之後就停唔到口, 入口輕盈軟滑既朱古力慕絲內藏雪糕🍦和布朗尼, 甜度適中, 層次豐富。見到隔離枱三位客人都係嗌呢個朱古力慕絲杯, 應該係熟客仔。而燉蛋就麻麻, 口感不甚幼滑也欠缺蛋香。 Green Orange 環境寧靜舒適, 食物質素不錯, 最重要是沒有用餐時限, 是一個適合跟朋友聚會的好地方, 客人可以坐得舒舒服服咁慢慢傾, 慢慢食, 放慢腳步, 舒緩一整天的緊張生活。…Read More

原來億利工業中心內, 靜俏俏開左間新食店, 見食評不錯又有我愛吃的滷肉飯, 決定去試下。大約11:50AM到達, 被安排坐在窗邊🪟位置, 正常黎講一間餐廳既窗口位置會比其他位置較為舒適開揚, 但黑布小巷的窗口位有個問題, 就係正上方有一排射燈對正坐係出面既嗰位客人, 好刺眼。還有另一個問題, 出餐時間⌛️慢, 我地12點前落ORDER, 等左超過半個鐘先有野食, 究竟係MISS左我地張單定食物真係要煮咁耐就唔太清楚, 因為我眼見好幾枱遲過我地既客人都食緊, 所以先問下店員我地張單既情況, 而店員既回覆係下一個就到我地, 又真係喎。我地嗌左台式肉蛋🍳芝士吐司, 古早味手工滷肉飯, 花枝丸配淮鹽, 桂花烏龍同冬瓜茶。台式肉蛋芝士🧀吐司 - 使用全瘦豬扒, 扁扁的一塊也較乾身, 入口肉質扎實而鬆化, 一D都唔韌, 豬扒新鮮沒有雪藏味。平時鐘意食半肥瘦豬肉的我都覺得好味, 推介。搭配流心蛋同濃厚的半溶芝士, 是非常邪惡😈且討人喜歡的組合, 亦絕對夠飽肚。而醬汁更是我最鐘意的部分, 香港好少食到, 曾經係台灣🇹🇼民宿的早餐食過一次類似既味道, 甜味較重的沙律醬的味道, 這是台灣特有的滋味吧。古早味手工滷肉飯 - 好鍾意食滷肉飯, 半肥瘦的帶皮豬肉切成丁配合香氣十足充滿膠質的滷汁, 非常適合撈🍚飯, 黑布小巷做得好好味, 只是略嫌有白飯太多滷汁唔足夠既情況。花枝丸配淮鹽 - 花枝丸肉質爽口彈牙, 不錯。桂花烏龍同冬瓜茶味道同樣清新解渴。推介黑布小巷的台式吐司比掛住台灣早餐店的人。…Read More

自從幾年前食過百樂小館的滷水鵝之後, 隔一段時間就會搵唔同既潮州菜館試下比較下。食過佢地同一集團的陳儀興牛什粉麵, 印象不錯, 今日就試下佢地既潮州菜。同陳儀興牛什粉麵行完全唔同既路線, 陳儀興尚潮樓位於一幢改建了的歷史建築物內, 裝修採用了跟外牆連貫的風格, 帶有一種老香港的懷舊味道, 佈置簡約典雅。我們被安排坐在二樓的4人座位更是舒適。我們點了鵝片, 香酥帶子, 富貴自選套餐 - 潮州紅燒鮑翅加糯米釀雞翼。鵝片- 首先, 擺盤整齊精美令人食欲大增。選取偏瘦既鵝肉但肉質一D都唔韌, 富彈性又有咬口, 肉味十足。舖底的豆腐質地軟嫩又入味。陳儀興的滷水汁做得好好, 香味濃郁, 甜鹹味道適中有層次。荔芋香酥帶子 - 就是荔芋香酥鴨的帶子版。外皮嗰層蜂巢同芋蓉係我最愛吃的組合, 所以平時飲茶如果見到有芋角都是必點。陳儀興有荔芋香酥帶子呢款菜色, 實在太好, 本來仲煩惱緊同時嗌鵝片和荔芋香酥鴨會唔會太單調同太多肉。香酥帶子外皮酥脆而不油膩, 充滿空氣感。芋蓉質感軟滑真材實料。唯一挑剔的部分是帶子因為厚薄不一的關係, 切得🔪比較薄的帶子炸得略嫌過熟, 口感偏硬。潮州紅燒鮑翅 - 湯底熬得十分出色, 味道鮮美, 濃淡適中。魚翅也處理得很好, 入口軟糯滑身。糯米釀雞翼 - 食到呢到已經好飽, 只是淺嚐兩口。也是有水準之作, 香口惹味, 糯米煙韌啖啖肉。今餐潮州菜體驗甚好, 優質的食物, 精湛的廚藝🧑‍🍳, 搭配舒適寧靜的環境, 讓我們的週末假期有一個美好的開始。…Read More

認識常溫是因為剛開業時有朋友推介它們的蝴蝶酥。店舖位置對我黎講相當隔涉, 可以話每次都係專登去幫襯, 買完即閃(因為附近實在都無野好行)。雖然朋友介紹它們的蝴蝶酥, 但我每次必買的卻是常溫另一款受歡迎甜點 - 拿破崙。也有食過佢地既戚風蛋糕, 同樣高質, 蓬鬆輕盈的戚風蛋糕入口鬆軟濕潤, 清新無負擔的滋味。一段時間無幫襯, 突然之間想食的原因是最近試左一間位於屯門的蛋糕店 - igatti, 令人失望的拿破崙, 酥皮既唔香又唔脆, 吉士醬又太甜膩。所以我又掛住常溫了。古法拿破崙 - 跟一般在市面買到的拿破崙不同, 中間夾層不是吉士醬而是牛油忌廉和合桃蛋白餅。酥皮香脆, 牛油🧈香氣濃郁, 夾層的合桃蛋白餅鬆脆得來又帶點煙韌, 合桃也毫不馬虎, 焗得脆身, 充滿新鮮果仁香, 牛油忌廉為整個拿破崙帶來順滑口感, 這絕對是一款層次感十足的甜點。   常溫的古法拿破崙暫時係我最鍾意的拿破崙, 食過咁多次都依然保持水準。定價💰合理, 不過對比起宜家好多既蛋糕店就可以話係唔合理........地平。記得igatti一件要$50+, 梗有一間係左近既美心西餅都要$20+一件, 無論價錢如果, 唔好食就算幾平都係浪費。…Read More

最近疫情轉差, 取消曬已經計劃好的假日活動, 也沒有外出用餐。今日放假帶呀仔去剪頭髮💇‍♂️, salon位置好近長沙灣壽司郎🍣, 好想食呀, 經過門口都見到好多人等位, 不過呢排都係謹慎D好。一早上網睇好左幫襯呢間有段網上📺短片介紹過既餐廳, 餐廳位置有D隔涉, 唔近長沙灣地鐵站亦都唔近荔枝角地鐵站, 難得今日到附近剪頭髮, 就決定買外賣返屋企做午餐。買左招牌海南雞油飯, 古早鹵水元蹄油飯同生煎瑤柱鹹魚肉餅油飯。每個飯都包一碗湯 - 南瓜🎃粟米湯。我最愛飲的煲湯之一(另一款是蕃茄薯仔🥔湯) 估唔到出面餐廳都飲到。 好飲, 料多味濃, 有住家湯既感覺。海南雞油飯 - 米飯粒粒分別唔油膩。海南雞肥瘦適中, 件件無骨厚肉, 肉質爽口彈牙又入味。鹵水元蹄 - 對上一次食到好味豬手係可可豬海南雞專門店, 其餘時間我都避免嗌豬手的, 食到肉質乾硬無味又或者豬皮過厚無肉食既機會好大。但因為網上短片對雞仔的鹵水元蹄高度讚賞所以試下。質素果然不錯, 元蹄外皮燜得軟綿綿, 入口即化, 肉質嫩滑入味。生煎瑤柱鹹魚肉餅 - 雞仔的海南雞, 元蹄同呢個鹹魚肉餅都有個共通點, 就係好厚肉, 真材實料, $54 一個飯連住家湯可以說是超值。個人意見, 覺得雞仔既鹹魚肉餅可以再煎耐少少, 咁就更香更惹味。覺得雞仔去骨海南雞專門店啱曬住附近既居民買外賣返屋企加餸, 抵食又好食。…Read More

12月尾是我家小朋友生日🎂加聖誕節🎄, 所以節目特別豐富, 美食當然也不會少。跟親朋好友幾次的聚會過後, 呢個星期要比腸胃休息一下, 食返少D肉。所以最近都係簡單食, 幫襯過既有 - 唯一雲貴川風味 , 米亭, 蘇山雞飯同圍威喂, 感覺都係麻麻地, 食過一次就夠。而今晚呢間係近期食過最滿意的一餐。其實原本係唸住幫襯佢隔離嗰間十三姨, 但大約5:45pm到達既我地發現原來佢地有中場休息, 6點先再開, 所以轉移陣地食呢間食評也可以的天園餃子。我地點左西洋菜豬肉餃, 白胡椒雜菌🍄豬肉餃麵, 椒鹽脆豆腐, 手工檸茶同可樂。西洋菜豬肉餃 - 餃子大隻足料, 皮大塊不過很滑溜。西洋菜鮮嫩清香, 豬肉肥瘦適中, 新鮮彈牙。白胡椒雜菌豬肉餃麵 - 加$15轉酸辣湯。奇怪, 酸辣湯無酸味, 似一碗加左辣既碗仔翅。如果唔當佢係一碗酸辣湯咁去睇係好味既, 料多濃郁。餃子同樣鮮味高質, 白胡椒味非常突出, 只食得少辣既我食左一啖就再挑戰唔到落去。椒鹽脆豆腐 - 呢個必點, 電話📱落單揀左多椒鹽, 太開心喇, 唔使爭食, 鬥快夾多D椒鹽嗰件。即叫即炸熱辣辣, 每一件都做到外香脆內嫩滑。手工檸茶 - 好飲, 甜度剛好, 有著出面飲唔到既獨特茶香。食完出黎, 見到隔離既十三姨同對面既甜記大排長龍, 下次如果大家唔想排隊既話, 天園餃子也是一個好選擇。…Read More