applepeggy168's Profile

旺角Hashtag B．千層撻酥到震撼，人氣出品係夠堅！行過旺角見到Hashtag B人龍唔短，專登試佢嘅招牌千層酥皮撻，果然名不虛傳！栗子牛角酥：賣相超級靚呀，打卡一流 栗子味好香，外層鬆化，內藏栗子粒粒，甜度都啱啱好，仲有粒粒栗子肉，口感好豐富。明太子粟米貝果：咸食來說，非常好吃，好多粟米，貝果微酥帶韌、內部紮實有嚼勁，確是鹹香足料，做早餐一流。伯爵菠蘿包：好有茶香，唔錯的 CROSSOVER整體用料實在，款款有心思，難怪長期排長龍。真心推介俾鍾意酥皮同貝果嘅朋友，經過旺角一定要試！麵包店：Hashtag B地址：旺角西洋菜南街1N號兆萬中心地下G1及G2號舖…Read More

韓大叔大排檔．辣炒鰻魚年糕食到舔舔脷最近同朋友搵韓食店，誤打誤撞入咗呢間「韓大叔大排檔」，原本只係想隨便醫下肚，點知食完直接成為近期最愛！環境走街坊大排檔風，坐得舒服唔逼狹，重點係食物質素同分量都超驚喜，抵食夾大件真係冇吹水～未上主菜先嚟三款韓式前菜，簡直係開胃神器！醃蘿蔔絲爽甜多汁，酸辣味調得岩岩好，咬落「唰唰聲」；海帶脆嫩唔會太鹹，帶住淡淡麻油香；泡菜則係經典韓式風味，辣度溫和帶微酸，送飯送麵都一流！飲品方面，「桂花烏龍水果茶」清香解暑，桂花嘅香氣混合烏龍茶嘅醇厚，裡面有西瓜、芒果等新鮮水果，甜而不膩；「荔枝梳打」則荔枝味清甜濃郁，梳打嘅氣泡感十足，清爽解辣，飲完即刻回血！必點呢款「醬油帶子」，每隻帶子都超大隻，肉質飽滿彈牙，完全唔會有「鞋口」嘅感覺！醬汁鹹甜適中，滲入帶子嘅鮮味，連埋底下嘅洋蔥一齊食，香氣十足～ 同樣出色嘅「醬油馬刀貝」，貝肉厚實多汁，醬香包裹住海鮮嘅鮮甜，一口一個根本停唔到口！鍾意主食嘅朋友千祈唔好錯過「炸醬麵」，炸醬濃郁香醇，唔會太乾太鹹，掛汁均勻，麵條彈牙有嚼勁，拌埋黃瓜絲同芽菜，清爽解膩～ 「辣炒韓式鰻魚炒年糕」簡直係嗜辣人士最愛！年糕軟糯 Q 彈，吸飽咗濃郁嘅甜辣醬汁，鰻魚肥美厚實，外層微焦內裡嫩多汁，辣度剛剛好，口感超豐富，我好中意醬汁食到停唔到口！「海鮮煎餅」用料超足，餅身外脆內軟，裡面有滿滿嘅蝦肉、魷魚同洋蔥，鮮味十足，蘸上特製嘅蒜醋醬，解膩又開胃～ 「韓式牛仔骨」炆得軟爛入味，肉質鬆軟唔會韌，醬汁鹹甜帶微辣，連骨都想吮埋，配白飯簡直一流！整體嚟講，韓大叔大排檔食物新鮮、分量十足、味道正宗，無論係朋友聚會定情侶約會都好適合飲品：桂花烏龍水果茶荔枝梳打3款韓式前菜都很開胃：醃蘿蔔絲，海帶、泡菜食物：醬油帶子 醬油馬刀貝炸醬麵 辣炒韓式鰻魚炒年糕海鮮煎餅  韓式牛仔骨 餐廳：韓大叔大排檔地址：銅鑼灣登龍街28號永光中心10樓…Read More

港匯軒．必食秘製皇子鴿！尋日同老友約埋食晚飯，揀咗尖沙咀一間口碑好好嘅港匯軒，坐低睇 menu 即刻被幾款招牌吸引，點完上菜後簡直驚喜不斷，出品唔錯，水準高企！首先要大力推介呢隻秘製皇子鴿，上台時仲熱辣辣冒住香氣，鴿皮烤得金黃油亮，拎起個時仲會「滋滋」漏油！咬落第一啖就爆汁，皮脆卜卜，肉質嫩到出水，完全唔會乾柴。秘製醬料滲透每一寸肉，鹹香帶少少甜，仲有淡淡的中藥香提味，食完一隻仲想 encore，真係食過返尋味！之後上嘅三蝦乾撈粉絲煲同樣出色！粉絲吸飽咗蝦油同醬汁，乾身彈牙唔會結團，裡面有新鮮蝦仁、蝦米同蝦乾，三重蝦鮮疊加，調味鹹甜適中，鮮味上腦！勁有鍋氣，拌勻後每條粉絲都掛住醬料同蝦香，一口接一口停唔到，最後連煲底都舔得乾乾淨淨。仲有大排檔椒鹽花姿片，魚片切得厚薄均勻，外層炸得香脆，內裡魚肉雪白嫩滑，juicy 到咬開有汁流出！椒鹽調味夠晒惹味，帶少少蒜香同胡椒香，唔會太鹹，完美突出魚肉本身嘅鮮甜。今次同朋友喺港匯軒嘅晚飯體驗真係超正，三道菜各有特色，冇一樣踩雷！1.秘製皇子鴿(1隻)2.三蝦乾撈粉絲煲(例)3.大排檔椒鹽花姿片茶芥 $28餐廳：港匯軒地址：尖沙咀彌敦道63號iSQUARE國際廣場24樓…Read More

竹麓拉麵：中環街市尋寶記行開中環街市，成日都俾入面五花八門嘅美食搞到選擇困難。今次同朋友餓餓哋，畀一間開放式廚房嘅拉麵店吸引住——「竹麓拉麵」。望住師傅喺面前專心熬湯、炙燒配料，個種認真隔住塊玻璃都感覺到，我哋決定入去試吓。店內主打五款拉麵，價錢由$88到$128，仲可以追加配料。另外有七款小食同樽裝罐裝飲品，配搭成套餐都幾抵食。我同朋友各自叫咗個拉麵餐，有麵有小食有嘢飲，滿足感即刻提升！✨ 和牛肉鹽風拉麵一上枱已經聞到濃濃嘅和牛香，湯底清澈得嚟味道好有層次，飲到淡淡鹽味同烘過嘅蒜香，唔會過鹹。麵質係我鍾意嘅類型，粗幼適中，掛湯之餘咬落仲有少少韌度，好過癮。最大驚喜係嗰四片和牛，輕輕一灼，粉嫩得嚟入口即化，同個清湯底出奇地夾！流心蛋亦醃得入味，蛋黃濃稠帶甜，為成碗麵加分不少。✨ 海老味噌拉麵朋友嗰碗湯底係亮眼嘅橙黃色，一睇就知蝦味好出。飲一啖，濃郁嘅蝦鮮味隨即湧上，味噌嘅豆香慢慢滲出，湯身較稠，好似將成碗精華都濃縮埋一齊。配料亦毫不馬虎，蝦肉爽彈，炸魚皮浸一浸湯之後半脆半軟，口感有趣。流心蛋同樣出色，撈埋湯一齊食，真係滋味無窮。兩款跟餐小食都冇失手：🐷 黑豚肉餃子 煎得金黃香脆，咬開肉汁澎湃，豚肉餡調味恰到好處，唔使點醬已經夠好味。🍤 炸吉列蝦 炸粉超薄，食到啖啖蝦肉，點少少檸檬汁同美乃滋，清爽又惹味，食完一條即刻想再encore。最後飲返啖提子汽水同哈密瓜汽水，爽呀！成餐飯食落，感受到師傅對每個細節嘅堅持，由湯底、麵條到配料都係用心製作。雖然鋪頭仔喺鬧市一角，但呢份專注同誠意，令拉麵滿意度提升！餐廳：竹麓拉麵Takeroku ramen地址：中環街市地下G11號舖…Read More

潮．囍薈．親戚飯局好味之選真係好耐冇試過咁滿足咁同親戚食飯！大佬今次真係有眼光，book咗尖沙咀「潮．囍薈」，話要帶我哋試吓正宗潮粵菜。成晚食落，唔單止係味覺享受，更多嘅係一種人情味嘅返嚟。一坐低，個雙冬羊腩煲已經香到震！羊腩燜得夠淋，入口即化，冬菇同冬筍吸晒啲精華，個汁濃而不膩，撈飯真係一流。跟住上枱嘅菊花太史五蛇羹，更加係驚喜！湯底醇厚，蛇肉絲搭配木耳、花菇，灑上檸檬葉同菊花瓣，清香得嚟又暖身，飲完成個人暖笠笠。前菜江南五小拼，每樣都各有特色。川辣爽魚皮真係不得了，超爽脆，辣得嚟又唔會搶喉。雞絲粉皮嘅麻醬香得嚟唔膩，雞胸肉撕得幼細，同粉皮一齊食，滑溜得嚟有層次。拍蒜青瓜同陳醋雲耳就係清爽之選，蒜香同陳醋嘅酸香互相平衡，好開胃。最得意係個宮廷蘿蔔，切到成朵花咁，清甜爽口，睇得又食得。蛇汁唐生菜簡單得嚟見功夫，用返蛇羹嘅湯汁去燜，生菜清甜之餘帶少少鮮味，一啲都唔寡。龍仔豉汁蒸白鱔係我全晚至愛之一，鱔肉厚身，蒸得剛熟，豉汁香濃但唔會蓋過魚鮮，入口滑溜，真係食到舔舔脷。至於個秘製脆皮燒鵝，真係好好食呀！ 皮脆到顛左！一咬落去入面嘅肉汁即刻爆出嚟，鵝味香濃，真係好耐冇食過水準咁高嘅燒鵝。大佬仲笑我食到唔捨得停口。尾聲嘅香芋臘味糯米飯同陳皮紅豆沙，為成晚畫上完美句號。糯米飯香軟，芋頭同臘味嘅油香滲透每粒米；紅豆沙煲到起沙，陳皮香淡淡哋，甜而不膩，食完成個人都舒服晒。成晚飯局，唔止係食咗一餐好嘢，更多嘅係同親戚傾偈嘅溫暖。真係要多謝大佬嘅安排，等我哋可以一邊食好西，一邊 reconnect。呢度嘅味道，同嗰份人情味一樣，會一直留喺心入面。…Read More

京都薈．龍蝦伊麵+三重配抵食到震琴晚去美孚探完老友，佢帶我去咗間街坊熱店「京都薈」食晚飯，呢間酒樓唔單止抵食夾大件，服務仲好好，難怪成日見到咁多街坊捧場。必嗌嘅上湯美國龍蝦伊麵真係無得輸！龍蝦開邊上，隻隻都手掌咁大，啖啖肉咬落去彈牙到不得了，仲要爆晒汁！個上湯完全滲透落伊麵度，掛汁效果一流，我同朋友爭住掃清個碟。重點推介個「晚飯三重配」，300幾蚊有齊三款餸，平到笑！個花膠燒豆腐好足料，花膠厚身又滑溜，豆腐吸盡醬汁精華。斑頭腩煲火候十足，魚肉嫩滑得來唔會散，個汁撈飯真係無得頂。白灼海生蝦足足半斤，隻隻都新鮮彈牙，點少少豉油已經鮮味爆棚。見個斑頭腩煲咁正，我哋忍唔住追加咗個煲仔白飯！飯焦香脆得來唔會燶，熱辣辣咁食真係滿足到喊。最抵讚係班伙計，由落單到上菜都笑容滿面，見我哋碟蝦食得七七八八，主動換碟。埋單個陣仲同我哋吹咗兩句水，難怪水準保持得咁好。今餐人均三百蚊，食到飽飽，仲要個個餸都保持到水準。呢間絕對係我會encore嘅飯堂！上湯美國龍蝦伊麵1隻「晚飯三重配」1.花膠燒豆腐2.斑頭腩煲3.白灼海生蝦(半斤)追加1份：煲仔白飯餐廳：京都薈地址：美孚百老匯街73號美孚新邨4期地舖及1樓…Read More

Tonkichiとん吉・獨食盛宴  女仔一個人食飯都要有儀式感！今晚收工決定對自己好啲，獨自嚟到Tonkichiとん吉享受「一人前的晚餐」。推開木門就感受到濃濃日式風情，特別鍾意佢哋嘅沙發卡座，私隱度十足，對面仲有掛住和風窗簾嘅小桌，浪漫到呢～未食嘢已經俾個環境治癒咗！店員姐姐溫柔介紹枱上三款醬汁：中間係靈魂豬扒汁，要將磨香嘅芝麻混入去；兩邊仲有紫菜汁同清新柚子汁，專俾無限添加嘅椰菜絲點嚟食。椰菜絲爽脆清甜，蘸柚子汁真係開胃到停唔到口！叫咗個寓意好意頭嘅「步步高升壽司組合」，九件壽司件件新鮮到發光！金目鯛鮮甜、吞拿魚濃郁、三文魚肥美，入口瞬間彷彿去咗趟日本旅行。重點推薦吉列廣島生蠔同吉列炸豬柳，生蠔咬落「咔嚓」一聲，外脆內爆漿；豬柳香酥多汁，真係香港難得一見嘅高水準！跟足日本人儀式感，親手磨碎芝麻混入豬扒汁，層次感即刻昇華～食完炸物再嚟碗熱稻庭烏冬，滑溜嘅烏冬吸滿鰹魚湯精華，溫柔地中和咗油膩感。連小食日式蒸蛋同銀魚仔沙律都做得一絲不苟，蒸蛋嫩滑到似食緊茶碗蒸！今餐真係由頭滿足到尾，已經約定姊妹下星期再嚟encore。女仔們，偶爾獨食都要食得精緻，呢度絕對係寵愛自己嘅首選啊！「吉列炸豬柳」！真心多汁又香軟的炸物呢度搵到！我一定要帶朋友再來幫襯！餐廳：Tonkichiとん吉  丼吉日式吉列豬排專門店地址：尖沙咀彌敦道100號The ONE 4樓L401號舖…Read More

河內越式料理．牛三寶河粉超好食！ 原來油麻地有一間驚喜爆燈嘅越南菜——「河內越式料理」話說我同屋企人諗唔到食咩，行過油麻地撞手神入去試，點知食到個個豎起大拇指！先講佢哋嘅冰鎮凍奶茶同凍越南滴漏咖啡，真係一上枱就贏晒！奶茶唔係普通冰飲，係成杯坐喺冰碗上，由頭飲到尾都係咁冰凍茶濃，奶同茶比例啱啱好，飲完個喉嚨涼浸浸又唔會「削」。至於滴漏咖啡呢，有正宗越南咖啡香氣，加埋煉奶後飲落甘醇到呢！主食方面，極品牛三寶湯河粉絕對係靈魂之作！個湯底一飲就知落足心機熬，牛骨味濃到黏嘴唇，飲完唔會口渴。牛腩、牛筋、牛丸全部炆到淋滑入味，河粉索晒湯汁，食到連湯都清埋！另外越式咖喱豬扒飯亦係黑馬，咖喱椰香夠晒惹味，豬扒炸得外脆內軟，撈飯食真係忍唔住「啜啜聲」咁清碟。小食更加係驚喜連環爆！越式豬頸肉燒到微微焦香，咬落爽彈又多汁，點埋佢哋特製魚露，酸酸甜甜超級開胃。越式炸蝦拼嘅蝦餅同春卷即叫即炸，彈牙勁脆口，脆到「索索聲」又唔油膩。最正係芒果牛油果鮮蝦米紙卷，透明米紙包住大大隻鮮蝦，夾住芒果同牛油果，食落清新得嚟又有層次！整體嚟講，河內越式料理真係做到價錢合理又有heart，每道菜都感受到師傅嘅功夫。食左乜：飲品：冰鎮凍奶茶 + 凍越南滴漏咖啡主食：極品牛三寶湯河粉 +越式咖喱豬扒飯小食：越式豬頸肉越式炸蝦拼芒果牛油果鮮蝦米紙卷餐廳：河內越式料理地址：油麻地彌敦道554-556號寶聲大廈地下A號舖…Read More

王子牛腩牛雜粉麵專家．推介地道牛三寶今次食到一間好值得幫襯嘅小店——「王子牛腩牛雜粉麵專家」。講到香港地道美食，唔少得一碗熱辣辣、用料十足嘅牛雜粉，而呢間舖頭價格與出品都唔錯，好值得一試！清新配搭：冰凍檸檬茶食濃味嘢，飲返杯港式冰凍檸檬茶就最正！檸檬味超香，茶底夠濃唔苦澀，甜度適中，解膩一流。京都炸醬麵：傳統風味重現炸醬麵勁好食，好傳統佢哋嘅炸醬真係做得勁正宗，鹹香中帶少少甜，醬料濃郁但唔會死鹹，撈埋幼麵最好味，傳統功夫保留得好好，而家好少地方食到呢種風味啦！必食招牌：牛三寶河粉一上枱已經聞到濃濃嘅牛骨湯香，牛三寶包括牛腩、牛筋同牛肚，每樣都處理得恰到好處。牛腩軟淋得嚟唔會散，仲保留咗少少嚼勁；牛筋入口即化，膠質豐富；牛肚清洗得乾淨，完全冇異味，吸盡湯汁精華。最驚喜係河粉，一啖食落去「米味」好出，質地滑溜又唔易斷，同湯底完美融合！小食雙寶：炸雞中翼＋炸蝦餅炸雞中翼外皮香脆到一個點！咬開肉汁爆出，乾身得嚟唔油膩，醃得夠入味。炸蝦餅更加係誠意之作，厚度十足，咬落彈牙，蝦肉鮮味突出，仲要炸到金黃香口，食到停唔到口！另外，佢哋嘅油菜一定要加蠔油同腩汁，蠔油鹹香，腩汁濃郁，淋喺爽脆嘅青菜上面，簡單卻令人回味。最貼心係舖頭引入咗充電寶，對於我哋呢啲手機唔離手嘅人嚟講真係超方便，食飯叉電一氣呵成，唔使驚冇電搭車返歸！總括嚟講，王子牛腩牛雜粉麵專家無論係味道、用料定人情味，都保留咗香港地道小店嘅精髓。如果嚟香港玩，想試吓真正嘅街坊美食，呢間絕對係唔可以錯過嘅選擇。支持小店，就係留住香港嘅味道！餐廳：王子牛腩牛雜粉麵專家地址：尖沙咀樂道23號地下B號舖…Read More

今次同朋友去咗灣仔一間主打健康素食同身心靈療癒嘅餐廳「素某SO'N」，真係驚喜處處，食完之後成個人好似被溫柔療癒咁，絕對係我目前最中意嘅素食餐廳！餐廳嘅晚餐係自選形式，一人前套餐包羅萬有，小食、沙律、餐湯、天婦羅拼盤齊晒主食、甜品同飲品可以按自己口味揀，自由度極高，而且每樣食物都感受到店家嘅用心同誠意。一開場嘅席前小食係牛蒡同蟲草花高湯，味道清甜又養生，飲完成個人暖笠笠，即刻打開咗胃口。跟住嘅晚餐沙律用咗好新鮮嘅蔬菜，加咗少少甜酸汁，清爽開胃，食得出食材本身嘅鮮甜。餐湯係香濃菇菇湯，一上枱就聞到濃郁香氣，熱辣辣咁入口，菇味十足，口感順滑，飲完成個人都好滿足。天婦羅拼盤絕對係亮點之一！野菜天婦羅炸得金黃香脆，外皮薄薄一層，入口完全唔油膩。最正係南瓜天婦羅，點少少梅粉，酸甜中帶出南瓜嘅天然甜味，真係食到停唔口！主食方面，我同朋友試咗兩款：燒大啡菇配山藥慕絲，大啡菇烤得恰到好處，一咬落去爆汁，配上滑溜嘅山藥慕絲，口感層次豐富，配菜的烤菜菇菌嘅香氣同山藥嘅清淡互相襯托，好入味！另一款係素魷魚、素蝦配貓耳朵粉，全素但食落居然有海鮮嘅彈牙口感，仲帶微微泰式風味，酸酸辣辣咁，好開胃，貓耳朵粉吸盡湯汁，每一啖都滋味十足。甜品方面，麗楓秋栗用咗時令栗子，香甜綿密，食完飽足感滿分；而茉莉菊花雪梨凍用荷葉上台，視覺同味覺都充滿清新感，雪梨凍入口即化，帶住淡淡花香，食完成個人好似被清風拂過咁舒服。飲品我揀咗安逸草本拼搭（熱），香氣獨特，飲落去餘韻悠長，令人心情放鬆；朋友嘅拿鐵（冷）帶果茶花香，清新得嚟又唔甜膩，真係超中意！成餐飯食落唔單止滿足咗味蕾，更感受到身心靈嘅療癒。餐廳：素某SO'N地址：灣仔謝斐道254-272號杜智臺地下9-10號舖…Read More

申子居酒屋．高質驚喜同時上映講起居酒屋，好多人都會諗起貴同埋份量少，但今次同朋友去咗銅鑼灣嘅「申子居酒屋」，真係有驚喜！由頭食到尾，每道菜都感受到師傅嘅心思，價錢合理之餘，味道仲要好有層次！第一道係「吞拿魚春菊沙律」。一上枱就見到粉嫩嘅吞拿魚粒，鋪滿新鮮火箭菜，撈勻一齊食，吞拿魚嘅鮮味同火箭菜嘅微苦出奇地夾，非常開胃，即刻打開咗味蕾！跟住係「滋養蠔」。呢道菜真係養生又好味！大大隻蠔肥嘟嘟，蠔味香濃，仲有舞茸菇同蒜片一齊煮，蒜香同油香逼晒出嚟。最特別係帶點酸酸哋嘅口感，唔會膩之餘，仲更加突出咗蠔嘅鮮味，食完成個人暖笠笠！第三道係「牡丹蝦脆脆」，絕對係皇牌級好食！牡丹蝦肉鮮甜彈牙，一啖咬落去，裡面有松子、脆米、魚子醬同三文魚子，口感豐富到爆！配合住極度香脆嘅魚片，脆卜卜同軟滑蝦肉形成完美對比，真係食到停唔到口！之後試咗「特製茶漬鯛魚」。鯛魚半生熟，肉質細緻，厚薄切得剛剛好，咸香鮮味之餘仲一啲骨都冇！再點一D wasabi帶出魚香氣， 好正！最後以「黑松露雞肉芝士雜炊」作結。一上枱已經聞到濃郁黑松露香，芝士拉絲效果一流，雞肉嫩滑，同飯粒撈勻一齊食，芝味香濃，每一啖都係滿足感！餐廳：申子居酒屋地址：銅鑼灣渣甸街50號渣甸中心9樓…Read More

講起香港美食，點可以唔提大排檔小炒？今次專登去咗銅鑼灣食大排檔小炒呢度嘅環境就係典型嘅港式格局，嘈嘈閉好氛勢！一坐低就已經聞到隔離枱傳來嘅陣陣鑊氣香，未食已經流晒口水。首先必點嘅當然係啫啫滑雞煲！一上枱就「啫啫」聲，熱辣辣香噴噴，蒸氣同香味一湧而出，真係無得頂。雞肉醃得夠入味，肉質嫩滑到不得了，仲要係啖啖肉，一啲都唔鞋口。醬汁濃郁得嚟唔會過鹹，啲蒜頭同薑蔥嘅香味完全滲入晒雞肉裡面，撈飯食真係一流。我同朋友忍唔住一啖接一啖，瞬間清晒成個煲！跟住係豉椒炒大蜆，蜆肉大大隻，份量十足，一啲都唔孤寒。豉椒嘅味道炒得啱啱好，鹹香中帶少少辣，非常開胃。最緊要係啲蜆肉鮮甜得嚟又無沙，咬落去爆汁，個汁仲要鮮味十足，用嚟點蜆肉或者撈飯都係絕配。鑊氣夠，火候掌握得恰到好處，蜆肉完全唔會老，真係食到停唔到口。再嚟就係豉油皇海虎蝦，一上枱就已經俾佢嘅賣相吸引住！海虎蝦大大隻，炸得金黃酥脆，連蝦殼都香脆到可以食埋。豉油皇嘅味道香濃得嚟唔會蓋過蝦嘅鮮味，蝦肉爽口彈牙，真係新鮮到不得了。食落去仲有淡淡嘅焦香，證明師傅嘅手勢同火候控制得好好，每一啖都係享受。最後叫咗兩碗白飯，簡單嘅白飯，但係配上呢啲咁正嘅餸，真係天衣無縫。每一啖飯都吸盡啲餸汁，令人食到好滿足。啫啫滑雞煲豉椒炒大蜆豉油皇海虎蝦白飯2碗餐廳：大排檔小炒(銅鑼灣分店)地址：銅鑼灣駱克道405 419號華發大廈地下A及B舖…Read More

FireBird．抵食大檢閱！$498食到火燒雞比+火山壽司今次同朋友去咗東薈城嘅FireBird試吓佢哋個豪華二人套餐，呢個套餐CP值好高：豪華2人套餐： HKD498 超抵食！呢間日式餐廳裝修幾有格調，食物質素高企首先飲品方面，柚子蜜梳打同Mango-bar de Mocktail都唔錯，前者清甜解膩，後者芒果味濃，似食緊芒果布丁咁，唔會死甜。火山熔合鮭魚卷個賣相已經贏咗，真係好似火山爆發出嚟咁，上面淋滿橙色醬汁（我估係辣味沙律醬），中間係三文魚同青瓜，口感豐富。先上精選刺身拼盤，有齊蝦、魚、帶子、三文魚同三文魚子，擺盤靚仔之餘，食材真係幾新鮮！帶子鮮甜得嚟夠厚身，三文魚肥美，最正係爆汁三文魚子，咬落「卜」一聲成口鮮味。以套餐附送嘅刺身來講，絕對收貨有餘！跟住個溫泉蛋慢煮日本雞肉凱撒沙律都令人驚喜！慢煮雞肉嫩滑到呢，一啲都唔「鞋」口，撈埋流心溫泉蛋汁同新鮮沙律菜，個感覺即刻高級咗。海老天婦羅，一上枱就知無偷工減料。炸粉薄脆脆，咬落「咔嚓」一聲，入面隻蝦仲係爽彈彈，唔會炸到乾爭爭。點少少蘿蔔蓉醬汁，清新唔油膩，開胃啱啱好！跟住係重頭戲——FIREBIRD名物火燒原隻雞比！店員拎過嚟嗰陣仲吱吱聲，仲即場用火槍燒一燒表面，皮脆到好似燒乳豬咁，但入面啲肉竟然keep到肉汁！醃得夠入味，唔使點醬已經好正，兩個人分一隻，啖啖肉超滿足。忍唔住追加咗炙燒牛舌飯同脆炸薯條。牛舌厚度適中，燒得香口，個飯用咗珍珠米，淋咗少少燒汁，撈飯食一流！薯條即炸，粗身脆口，灑咗少少調味粉，邪惡但停唔到口。甜品方面，跟套餐嘅雨滴餅口感得意，似食緊啫喱版水信玄餅，透明剔透，點黑糖漿食幾清爽。另外單點嘅抹茶蕨餅配黑蜜係我至愛，蕨餅軟糯煙韌，抹茶味甘香，同黑蜜簡直係絕配！總括來講，套餐性價比高到爆炸，款式多、份量足，人多的話，追加幾個精選菜式，都夠晒豐富。餐廳：FireBird 地址：東涌達東路20號東薈城名店倉B1樓B13號舖…Read More

牛站(駅)麻辣火鍋放題．SRF和牛+乳鴿+大頭蝦性價比爆燈嘅放題之王！真係好耐好耐冇去「牛站(駅)麻辣火鍋放題」打邊爐啦，搞到心思思，終於的起心肝同朋友去銅鑼灣分店烚吓烚吓，補償返個肚仔！今次兩個人去，二話不說就揀咗個「SRF肩胛肉眼餐」（每位$308），諗起可以瘋狂食肉，個心已經興奮到砰砰聲跳！我哋揀咗個「花膠雞湯底」做開局，一上枱，嘩！個湯底金黃色，睇見都覺得滋補。滾起之後飲咗啖湯先，雞味好出，仲有陣陣花膠嘅膠質口感，又唔會太油膩，真係一流嘅選擇。講到主角，當然係佢哋嘅 「SRF美國極黑和牛片」 啦！啲肉嘅油花分布得好靚，好似大理石紋咁，放入湯底輕輕烚幾下，一入口，嘩！真係不得了，個種油脂嘅甘香同肉質嘅軟嫩，瞬間喺個口裡面融化開，食完成個人幸福晒！呢個質素嘅和牛，喺放題任食，真心覺得抵到爛！除咗和牛，我真心要大力推介佢哋兩款「皇牌必食」！第一，就係 「即叫即炸脆皮乳鴿」 。我本身唔係特別好乳鴿，但呢度嘅真係做得好好食！個皮炸到微脆，咬落去「索」一聲，但裡面嘅鴿肉一啲都唔嚡口，仲好細嫩，保留到肉汁同濃郁嘅鴿香，我同朋友都忍唔住encore咗兩次！第二款必殺技，就係 「冰鎮大頭蝦」！啲蝦大大隻，擺喺自助區度任拎，非常搶手。我拎咗幾隻試吓，蝦肉真係冇得彈，超級彈牙，而且鮮甜到不得了，完全冇雪藏味，食得出好新鮮。鍾意食海鮮嘅朋友，淨係攻呢樣已經可以回本！至於其他嘢食，選擇多到眼花撩亂！自助區有齊小菜、水果、炸物、糖水、台式肉燥飯、蔬菜、丸類，甚至連 「麻辣小龍蝦」 都有得任攞！我試咗少少麻辣小龍蝦，味道都唔錯，夠香口，唔會太辣，好惹味。飲品櫃嘅選擇都多到嚇親人，由珍珠奶茶、啤酒、燒酒、清酒，到椰青水、果汁同汽水，樣樣齊全，絕對唔會揀唔落手。最後，當然唔少得用 Häagen-Dazs雪糕 做完美總結啦！佢唔係得一款味揀，係有成個雪櫃嘅雪糕、雪條、雪米糍、大福、蛋糕仔等等任你拎。我食咗3條雪條兩杯雪糕，自製雪糕咖啡！真係飽到上心口！總括嚟講，「牛站(駅)」無論係食材質素、種類、定係整體體驗，都絕對係我同朋友心目中數一數二嘅火鍋放題。餐廳：牛站(駅)麻辣火鍋放題地址：銅鑼灣駱克道463-483號銅鑼灣廣場二期11樓…Read More

今次專登走入青衣城同朋友試嘅順德菜，呢間餐廳叫「大榕樹下」個名都幾親切。古色古香既氛圍，未食已經加分。順德豉味碌鵝上莊｜鵝油香勾魂奪魄一上枱就俾佢個陣勢嚇親——原煲用蠟燭仔熱住，滾住啲濃稠豉汁，鵝皮燉到半透明咁，筷子一篤就感受到嗰種鬆化。揀咗上莊部位，肉質特別嫩滑，鵝油同豉汁癡纏埋一齊，撈飯真係可以連吞三碗！最正係燭火一路保溫，呢份細心抵讚。古法鳳梨咕嚕肉｜酸甜平衡似返舊時而家好多酒樓嘅咕嚕肉都求其炸粉漿，但呢度真係跟足老派做法！外層脆漿薄到透光，咬落「咔嚓」聲，鬆化唔黐牙。酸甜汁仲有鮮鳳梨肉吊味口感非常好！乾炒牛河｜鑊氣衝破玻璃幕牆睇色水就知功力——河粉炒到均勻啡色，零油漬喺碟底。牛肉大片又醃得鬆軟，最緊要係嗰陣焦香！食到尾仲有銀芽同蔥段嘅爽脆，如果喺大排檔食到呢個水準唔出奇，但商場店keep到咁猛火候，真心難得。順德撈雞半隻｜撈起食出儀式感上枱成個拼盤咁，雞件、炸芋絲、花生、酸薑、蔥絲分開擺，自己撈勻個過程好治癒。雞肉應該係用咗龍江雞，皮爽肉滑，雞味濃到似返鄉下食到嘅走地雞。撈埋啲脆料一齊食，口感極之豐富！甜品雙重奏｜老派糖水畫完美句號大良雙皮奶面頭層奶皮皺得靚仔，舀開見到似布甸咁duang duang震，奶香醇厚唔會得個甜字。古法馬拉糕仲厲害，氣孔幼細到似蜂巢，入口有種蔗糖天然甜味，鬆軟到好似食緊雲朵，絕對係師傅手對好！菜式：1.順德豉味碌鵝* 上莊2.古法鳳梨咕嚕肉3.乾炒牛河4.順德撈雞-半隻甜品：1.大良雙皮奶2.古法馬拉糕餐廳：大榕樹下地址：青衣城1地下G01號舖…Read More