peidaan11's Profile

呢間拉麵成日都好多人排隊，難得今日唔洗排隊可以直入就去試下。我叫咗魚介豚骨沾麵($78)，個湯底好濃，啲麵都掛到湯汁。叉燒方面，佢比咗一件半肥瘦、另一件偏瘦既我。半肥瘦個舊真係好好食，肉質好淋、啲肥膏入口即融，但另一舊就有啲韌。溏心蛋都ok。但個沾麵食食下覺得有啲肥膩，好彩有粒青檸，唧咗啲青檸汁落個麵度令成件事fresh咗，酸酸地令個麵無咁油膩。同埋明明我揀咗熱湯凍麵，但上枱個陣個湯已經唔算好熱，食到中途個湯已經變返常溫，食到最後個湯底就凍哂。聽過好多人話呢間既沾麵好好食，但食完真係有啲失望。…Read More

想簡簡單單食少少野，而咁岩又路過人和荳品廠，比啲煎豆腐既香味吸引，所以就去咗食呢間。我叫咗佢地既招牌魚肉煎豆腐($22) 同一杯黑芝麻豆漿($13)。個豆腐正正常常。我見到枱面上有淅醋、豉油、辣醬、甜醬、菜脯，所以就每隻都試下攞黎點豆腐食😂豉油同係最普通既配搭；菜脯就麻麻地，可能我唔係好鍾意菜脯既味；辣醬就有啲鹹，所以點少少已經夠；最令人驚喜既就係配淅醋，因為呢隻醋通常都係落落碗仔翅度，但原來配豆腐都好好食，真係發現新大陸！個黑芝麻豆漿就有啲似無咁杰既芝麻糊，甜度適中，有豆味，可以一試。個豆腐$22/4舊其實有啲貴，又唔可以話好好食，不過未食過既都可以試下。…Read More

平靚正又快既龍津美食真係糧尾救星。啲魚蛋、燒賣、串燒又平又幾好食，$8串魚蛋/燒賣買一送一真係除咗龍津美食之外唔知邊度會搵到。平日都係食燒賣多，今次就試咗雙拼雞蛋仔($13)，原味mix朱古力味。個雞蛋仔超級脆，朱古力個邊又真係會食到啲朱古力味。雖然某啲蛋糕位脆到有少少硬，但整體黎講都好好食，因為食雞蛋仔就係要脆先好食！…Read More

黎得大尾督，梗係要BBQ啦。雖然大尾督有幾間BBQ舖，但我同啲fd次次都係會食同信士多既任食BBQ($185/人)。本身book咗8點，但我地7點幾到咗，而咁岩又有一枱人走咗，所以都可以即時入去食。近排天氣熱，如果仲要BBQ對住個火燒野食真係折磨自己，不過好彩同信士多每張枱都會有個大風扇吹住。食物方面都有好多款可以揀，都係唔同既肉、菜、雞翼、魷魚、厚切麵包、魚類、丸類、菠蘿等等等等，太多不能盡錄。而野飲方面除咗汽水都有竹蔗茅根、菊花茶等無咁熱氣既選擇。個厚切麵包係第一次見到，係麵包既2面搽牛油同蜜糖，再燒到脆一脆真係好好食，有啲似奶醬多。野食野飲選擇多、唔貴又近巴士站，下次黎大尾督BBQ都會食返同信士多。…Read More

黎到葵芳但唔想去掃街，想搵個地方坐低可以同朋友傾下計，於是就去咗呢間Cafe。我同朋友各叫咗一杯野飲同share咗個甜品。迷你棉花糖焦糖哈密瓜窩夫配雪糕 $78個窩夫既擺盤真係好靚！係一片哈密瓜皮上面有幾粒哈密瓜，而每舊哈密瓜上面有一層薄薄地既焦糖，成隻色好搶眼。當我以為哈密瓜窩夫係指個窩夫配哈密瓜既時候，一食落口，原來個窩夫都係哈密瓜味，好特別同埋都幾好食！個窩夫既份量都幾大，所以即使係朋友share咁食都會覺得飽。青蘋果奶昔 $45比起個窩夫，杯奶昔就顯得有啲普通。第一淡飲落口就feel到杯奶昔唔夠thick同creamy，有啲稀。同埋隻青蘋果好明顯係調味糖漿味。我仲以為會係生果加奶打出黎，有啲失望。…Read More

身為一個無辣不歡既人，遇到好食既舖頭就一定要mark低佢，日後得閒可以再去食下。本身我無為意到有呢一間舖頭，係我朋友帶我食過一次之後，川婆婆正式成為「可以再食List」既一份子。今次我叫咗麻辣鴨血($28)同辣汁牛柏葉($18)，麻辣鴨血係我每次都會買既小食。因為佢個麻辣汁真係好正，辣辣地再夾埋已經浸到入哂味既鴨血，真係無得頂。相反，個辣汁牛柏葉就有啲失色，因為佢既辣只係浮於表面既辣，啲汁又好普通，無真正融入啲牛柏葉到。後尾我將啲牛柏葉浸係麻辣鴨血既汁度先好食返啲😂如果你鍾意食麻辣鴨血，可以試下川婆婆！…Read More

上網search 「深水埗 粥 推介」就見到有幾個網站都推薦發記腸粉粥品，於是就去元洲街試下食。網站上面推薦咗幾款粥同腸粉，包括蠔仔粥、雞粥、蝦米腸粉、雞蛋腸粉等。所以我就叫咗鮮雞粥($43) 同香蔥蝦米腸($16) 既外賣。值得一讚既係個粥好綿滑，亦聞到好香既雞味，啲雞肉都好淋。但係食入口就無想像中同埋聞到既咁濃同埋好食。啲腸粉唔知係咪太多層所以個皮有啲啲太厚，食唔到佢個種滑既感覺。我平日唔算係一個成日食粥既人，但係食過既粥之中覺得呢間真係普普通通。一碗唔算特別好食既粥要收$43其實都幾唔值。如果遲啲再係深水埗食粥，呢一間唔會係首選。…Read More

今日行行下突然好想食曲奇，咁岩係油麻地附近，所以諗起呢間舖頭。麥香田係一間香港傳統式既麵包舖，佢有好多種唔同既麵包，亦有蛋糕、甜品、蛋撻、曲奇同埋好多其他款式既烘焙製品。雖然佢間舖頭好細，但麻雀雖小、五臟俱全。佢有幾款曲奇可以揀：阿華田、好立克、牛油、朱古力、合桃味。我最鍾意既就係佢個隻原味牛油曲奇，因為佢就係個種香港舊式餅店，最簡單但最令人懷念既味道。係影相之前我已經忍唔住食咗幾塊，因為真係好食到停唔到口。個半磅曲奇($36)我應該好快就可以KO哂佢。好快又要再去麥香田買過lu~😂…Read More

我平日都好鍾意去試下食唔同舖頭既拉麵，呢一間係我食過咁多間之中既top3!!!第一次食係食中環個間分店，今次就去咗尖沙咀個間，叫咗貝汁鹽味拉麵。未食第一啖之前就會聞到一陣好香好濃既松露味，個湯底濃得黎又唔會好稠同油膩，反而有一種好清甜既海鮮味。麵質同普通既拉麵有啲唔同，但一樣咁彈牙。舊叉燒係半肥瘦，食到肥膏個邊真係入口即化，佢成舊肉都煮得好淋。通常我食拉麵都唔會飲哂啲湯，因為會愈飲愈口渴同埋膩。但呢一個唔會，佢個種清甜又香既湯底只會令你一啖接一啖咁慢慢飲哂佢。米芝蓮一星餐廳，名乎其實！！…Read More

日日lunchtime都有好多人排隊食臻味冰室，唔想等位所以就叫咗外賣。佢主打酸辣米線，但都有好多唔同款式既餸可以揀。我叫咗大辣既鮮蠔仔酸辣米線($39)。雖然我叫咗大辣，但都唔算係好辣，反而係食落去有啲酸味，之後個口先會感覺到個種麻痺既辣。麵就普普通通，蠔仔既數量都ok。不過都係覺得可以再辣啲xdd。呢間舖既酸雨辣米線多款式揀又唔算貴，想平平地食餐飽既可以試下。插曲：叫外賣個陣見到有舊大黑雲飄緊過黎，又開始行雷，好驚就快落大雨。結果落完單5分鐘之後就有得拎，真係好快😂。…Read More

好少見到香港有緬甸菜式既餐廳，所以興致勃勃咁走去試下。我叫咗個緬甸自選雙拼湯麵 ($56)，揀咗扎肉同魚丸。除咗我揀個2樣餸之外，個麵入面仲有有蛋、豬紅同肉粒。個湯底既色好似叻沙，第一啖飲落去有好濃既椰漿味、甜甜地。但成個湯麵食落去就只係得個甜字，而無其他味。就算我落咗辣椒粉落去都完全食唔出，因為個個湯椰漿味太甜而掩蓋哂其他野。啲餸都似係烚完就咁放入個麵度，完全無味。所以食食下真係覺得愈黎愈黎難食。雖然我未試過呢間餐廳既其他菜色，可能其他野會正常啲。但好肯定既就係呢個緬甸湯麵真係好伏，如果係專程想試緬甸菜既人一定會失望而回。…Read More

放工路過厚福街，諗住搵啲小食醫下肚。結果行行下就見到Ricco，比佢啲香味吸引住，就順便睇下有咩食。一見到炸燒賣就二話不說咁決定要食呢間野。佢係即叫即炸，所以係附近行一陣再返去拎就岩岩好。佢個炸燒賣好脆好好食，上面有仲落咗少少鹽，令成樣野無咁單調。如果路過厚福街又有少少肚餓，搵呢間小食店醫下肚絕對係一個好選擇。…Read More

星期六晚walk in攞飛，等咗個半鐘就有枱，好好彩。叫咗沙嗲湯底，野食方面叫咗金菇、響鈴、豆腐、鴨血、芋絲、公仔麵、手打墨魚滑、炸魚皮。不得不提既係個豆腐真係好滑，好好食。肉個方面其實都唔係好識揀，最後叫咗肩胛翼板、牛朴肉、三花腱。雖然係亂叫，但發現個牛朴肉好好食，好軟，其他肉都係。個湯底好食，基本上唔洗點醬都好夠味。已經係第二次食616，打邊爐食呢一間就一定唔會差得去邊。…Read More

個舖頭雖然唔係好大，但枱與枱之間有足夠既空間，唔會感覺太迫。叫咗刺身、北海卷、泡菜黑豚腩鍋、蒜蓉燒廣島蠔同埋蒜蓉燒茄子。啲餸都上得好快，個三文魚刺身係厚切，好正！個泡菜黑豚腩鍋好多餸係入面，好抵食。另外個燒廣島蠔都好好食。但個燒茄子就略嫌太多油。雖然已經叫咗好多款唔同既野食，但個menu仲有好多野揀同埋好吸引。下次有機會一定會試埋其他野食。…Read More

之前一直都想試下啲特別既菜色，結果就搵到呢間埃及餐廳。一入到去就見到左右兩邊既壁畫，一邊係獅身人面像，另一邊係金字塔，兩邊都好靚。食物方面就叫咗鷹嘴豆泥、中東烤羊肉絲同薯條。個鷹嘴豆泥食落好fresh，配比得飽同薯條一流。個中東烤羊肉絲都ok，不過就唔係好慣啲飯有好多香料。同埋個醬唔知點解食食下有啲苦。成個餐廳都環境都好chill，好適合同friend慢慢食下野、傾下計。…Read More