phoebe.bebe's Profile

之前聽朋友講話新麻蒲個Lunch好抵食，一直都想試下，但每次唔係早得濟未開，就係超多人喺門口等位，都無一次食到。今日同母親大人出葵芳買野，可能時間尚早門口既然無人等，即刻要試下。可能啱啱開門，門口無人帶位，要等一陣先有侍應見到我地出黎帶位。需然得兩個人，但安排左4人枱比我地，相當闊落。我叫左火山芝士泡菜炒飯加石榴果醋，媽媽叫左韓式豬肉餃子刀削麵加熱柚子茶，飲品先到，石榴果醋飲落個甜多過酸，唔係好似果醋，柚子茶正常。落好單侍應就放低左4碟前菜，有泡菜、芽菜、青瓜同西蘭花。除左西蘭花好難食，其他都正常。好快野食都黎，個炒飯超多，應該有兩碗飯。雖然係泡菜炒飯，但唔係好辣，飯面有芝士，都幾好食。旁邊個蛋超好味，入面都有芝士。個餃子刀削麵啲餸都有幾多蜆，有兩隻餃子，仲有啲好似係油豆腐，不過餃子就煮耐左，一夾就散，反而個麵幾好食，質感似烏冬，幾有咬口，個湯麵都幾好味，好香胡椒同麻油味。兩個餐都好大份，好努力咁食晒個刀削麵，但個飯就食唔晒，認真大件夾抵食。…Read More

身為白桃迷同甜品迷嘅我，喺Facebook見到beard papa's出左白桃泡芙，今日同飯腳們食個快飯，就去Sogo買。原本想拎住一路行一路食，點知同左收錢個姐姐講，但佢好似聽唔到咁將我地啲泡芙放晒入盒:(......唯有嗱嗱聲跑返公司食。返到公司打開盒，好彩啲泡芙仲粒粒飽滿無淋到，急不及待一大啖咬落去，酥皮超鬆化仲有少少脆，而且咬一啖已經見到有滿滿嘅白桃吉士，吉士桃味濃郁而且香甜，但唔會覺得膩，好味!另外，有趣嘅係我地5個人每個人食1個泡芙，只有我同其中1個飯腳食到吉士入面有1粒超超超細粒嘅果肉，大家買黎食時，可以碰碰運氣!…Read More

今日同飯腳們食完飯見仲有時間，又有啲口痕，於是去左買野飲，原先想買芋頭奶，去到發現隔離一直未試過嘅珍煮丹得幾個人排隊，即時轉軑去排珍煮丹。排隊排左10分鐘左右就到我地買，其實餐牌上面有好多款飲品都想試，但最後都係揀主打嘅黑糖珍珠鮮奶(微冰少甜)。沖野飲嘅店員好勤快，不停密密沖，落完單好快已經有得拎。杯上並無黑糖紋，賣相比其他台式飲品舖沉實。味道比想像中好，香酥濃郁嘅奶味中有陣陣香甜黑糖味，而珍珠真係值得一讚，每粒都煮得煙煙韌韌，而且有滿滿黑糖味，即使飲晒啲奶淨返嗰啲珍珠都仍然有黑糖味，真係做得好好，而且珍珠數量超多，珍珠迷必試!珍煮丹，值得一試再試!…Read More

最近，銅鑼灣變成左台式飲品舖嘅戰埸，就喺一條短短嘅渣甸街，短時間內已經開左3間台式飲品舖，而呢3間鋪都係以珍珠奶茶或者珍珠奶做主打，真係有少少悶。就喺今日食完Lunch經過渣甸街時，發現一間用紅紙封住店名，以醋為主打嘅飲品舖，出於好奇 ，就喺店前研究一下Menu，店員就好熱情咁為我哋遞上一小杯青梅醋茶比我地試飲，飲落好又幾好味，望望Menu，竟然有我最愛嘅蜜桃，於是即刻科金買左杯蜜桃酵醋鮮茶，原來茶底都有好多種揀，喺我一片迷惘之際，多得店員指點蜜桃同烏龍茶最夾，於是我就揀左烏龍茶底。好快就已經有得拎，影左1張相，搖幾搖，就急不及待試味，醋味超出超濃，以蜜桃配醋，酸中帶微甜，完全唔嗆喉，恰到好處。而烏龍茶底，真心超驚喜，茶味濃郁，回甘超重。成杯野飲醋、茶同蜜桃比例剛剛好，真係估唔到醋同茶係咁夾，超正，超好味! 一定會再幫襯!…Read More

迷客夏喺銅鑼灣初開業時，無論Lunch time定放工都超級多人排隊，難得今日食完lunch行過竟然無人排隊，即刻去買黎試下。我揀左珍珠高峰烏龍拿鐵去冰半糖，買完等左2分鐘就有得拎，超快。因為用紙杯嘅關係無得即靚相，係咁二影兩張相，搖渾就急不及待試下。飲落奶味同茶味都係偏淡，但愈飲茶味愈出，仲飲到烏龍嘅甘香，好得意。珍珠有別於其他店舖，係自家整無添加無防腐劑嘅白珍珠，珍珠煮得剛好，咬口唔錯好QQ，而且仲有陣陣甜味。雖然呢杯係拿鐵，但比到人清新嘅感覺，怕奶味嘅朋友都可以一試。下次無咁飽嘅時候要試埋推介嘅芋頭奶!…Read More

首先要多謝Fd子們，因為屋企有啲事遲到，Fd子們就去排定Flipper's等我，我去到大約再等左十幾分鐘就可以入座。我地叫左3款班戟，首先密瓜班戟先送到，班戟上面有成6，7件日本蜜瓜，仲有蜜瓜味忌廉，蜜瓜超級香甜，班戟軟綿綿輕飄飄，配上忌廉一齊食，就好似食緊蜜爪味嘅雲同棉花咁，另外仲有1小杯蜜瓜味雪葩，凍冰冰超清甜，如果大杯啲就好啦！士多啤梨藍莓香蕉班戟，士多啤梨好新鮮，而且份量都唔少，忌廉個味好似有啲楓糖嘅甜味，士多啤梨加忌廉同班戟一齊放晒入口，酸酸甜甜超好味道!榛子朱古力焦糖香蕉班戟上面有半條焦糖香蕉，配上朱古力雪糕同榛子醬，朱古力雪糕帶有苦味，而個榛子醬就好似金莎嘅味道。條焦糖香蕉我個人黎講覺得麻麻地，個味我唔鍾意，所以我用班戟加雪糕同榛子醬一齊食，味道啱啱好，好夾。食完真係回味無窮，每款口味都各有特色，難怪每次經過都總有人龍，一定要再食，下次要試埋其他味!…Read More

今日睇完醫生去到葵芳好口渴，見一芳無人排隊，於是就去買野飲，原先想買溪口甘蔗青茶，但店員話無，於是改左要黑糖粉圓鮮奶茶。買完好快已經有得拎，老實講，因為無黑糖紋喺杯，外表真係唔夠其他店舖吸引，但就睇到黑糖嘅份量唔少。搖渾即刻試下，雖然黑糖睇落好似幾多，但又無估計咁甜，奶味比茶味突出，幾乎飲唔到茶味，似飲緊黑糖鮮奶多啲，有啲失望。粉圓唔錯，夠熟唔會有硬心，口感軟軟糯糯，幾好咬口，而數量亦都好多，多到飲晒啲奶茶都仲有好多喺杯底。店員話黑糖粉圓系列冰同甜度都係固定，無得少冰，好彩今次唔係好多冰，如果唔係一路行商埸一路飲都幾凍!…Read More

突然間好想食喇沙，飯腳就提議去皇室堡食mee，於是一行五人1點即過去皇室堡，雖然預先用App攞位，但去到都仲要等十幾分鐘先可以入座。喺等入座期間已經諗好左要食無骨海南雞喇沙套餐，好快飲品已經到左，過多大約十分鐘食物都陸續送到。先試海南雞，肉質超級軟滑，但唔係霉，雞味都唔錯，皮同肉中間無咩肥膏，連皮食都唔會太油膩。喇沙麵十分豐富，除左麵仲有兩粒豆卜，半隻蛋，仲有芽菜同香葉，湯底亦夠厚身，濃香惹味，而且唔辣，唔食得辣嘅朋友都可以放心食。另外，一定要講下個油鬆餅，係送嘅，喺皇室堡出面有個叔叔派傳單，傳單上面會有送油鬆餅同cash coupon，大家去食前記得搵叔叔拎。個餅唔會好乾，食落都幾鬆軟，個味甜甜地，都幾好食，如果大家食喇沙，強烈建議將個餅浸一浸喇沙先食，因為超夾超好食!唔計個油鬆餅，個餐有雞有麵，有飲品，沙律同甜品，今次嘅沙律係蝦沙律，酸酸甜甜幾開胃，而甜品係一口蛋糕，次次唔同口味。咁多野食成個set只係$78加一，都算抵!…Read More

次次經過薩莉亞啲分店，門口總係人山人海，今日黎荃灣Aeon行街，呢度間分店已經開左，時間尚早又唔係好多人，一於試下。拎左飛等大約5分鍾就入得，都幾多選擇，價錢亦都唔貴，由於唔算好肚餓，於是叫左3樣野食同加左13蚊飲品吧任飲。野食都好快到，首先係水牛芝士pizza，pizza熱辣辣，批底香脆可口，唔好睇佢無餸，但有雙重芝士，每一啖芝士味超濃郁，芝士迷必食!跟住黑松露野菌忌廉意大利粉，黑松露味夠香，野菌份量亦好多，但個汁嘅味就普通左啲，唔太特別。跟住係芝士焗薯角，個汁比意粉嘅汁惹味同香濃，有超多芝士，食落甜甜地，配合薯角一齊食超夾，再加埋煙肉片一齊食多左種鹹香，又另一種風味。至於個13蚊自助飲品吧都幾多選擇，凍飲有部汽水機有各式汽水，仲有檸茶同蘋果綠揀，熱飲就有部咖啡機，咖啡奶茶朱古力都有，仲有各式各樣茶包可以自己拎黎沖，真係可以滿足唔同嘅需要。熱飲加冰變凍飲亦得!值得一讚，鋪頭係㩒掣叫侍應，侍應都好快過黎，唔洗舉到手都軟都無人理你，同埋呢間鋪啲侍應都幾好禮貌，做野仲好勤快，唔錯。價錢平，食物質素同招呼都唔錯，難怪成日行過門口都超多人等位，可以再幫襯!…Read More

睇名都知道丸作係以珍珠為主打，初營業時已經幫襯過，當時試左推介嘅黑芝麻珍珠綠拿鐵，完全唔係我杯茶。今日因為有同事last day, 同事以丸作散水茶代替散水餅，由於麻麻地丸作嘅珍珠，於是平平地叫左琥珀鐵觀音就算。原先都無咩期望，但收到時有少少意外驚喜，因為茶色比平時飲開嘅鐵觀音深色，非常漂亮。再試試個味，雖然今次甜度同冰都係正常，但鐵觀音味十分香濃，並無比甜味蓋過，亦都無比冰溝淡，茶味除左香濃亦十分甘香，飲一啖整個口腔充滿回甘，而且久久不散，所有野都十分配合，茶控必試。…Read More

最近銅鑼灣又再掀起一埸黑糖風暴，最新加入戰團嘅係幸福堂。今日有親愛嘅飯腳一號1:00出去排隊買比我飲，真心好幸福!我同其他飯腳們大約1:20左右陸續去到幸福堂，飯腳一號已經排到第3，終於1:32成功落單，竟然喺1:35飲品已經到手，真係意料之外! 員工做野快手又好禮貌，抵讚!我叫嘅係焰遇幸福黑糖珍珠鮮奶，杯身有滿滿嘅「幸福紋」，打卡一流。奶蓋夠厚身，可以中和返加冰後變稀嘅感覺，令整杯鮮奶可以保持creamy,，由於奶蓋同奶底都奶味起濃，所以奶味無比黑糖味蓋過，兩樣味道都飲到，唔錯! 但有啲可惜奶蓋面嘅黑糖燒得唔夠時間，欠缺焦香。另外值得一讚珍珠嘅口感，口感十分特別，一開始係軟綿綿（但絕對唔係糊口，係出色嘅軟綿綿），唔知點解飲到底竟然有QQ嘅感覺，有趣。幸福堂嘅噱頭都幾多，例如求籤同店員即埸炒黑糖，都幾吸引到人，而黑糖鮮奶亦都做到內外兼備高水平，睇得係有心做好野飲嘅，下次再試下menu嘅其他野飲，因為其他有嫲多都好吸引!…Read More

同母親大人去荃灣濕平，由於早左出門口，好多鋪頭未開，所以決定醫左肚先，母親話想食意粉，於是就去左Euro go go。可能時間尚早嘅關係，一去到就搵到位。由於我唔係好餓比較想飲野嘅關係，於是就叫左個蘑菇粟米鮮茄汁意粉同1個煙肉芝士薯皮share食，我另外就叫左杯熱嘅蜜桃茶。等左一陣侍應拎左蜜桃茶同餐具過黎，順便問佢拎左兩杯水，侍應都好有禮貌咁回應同好快拎黎比我地!先試蜜桃茶，濃郁茶味中帶有香甜蜜桃味，茶入面仲有3片黃桃肉。由於食物係即叫即造，等左15分鐘左右，意粉同薯皮都先後送到。先講意粉，煮得剛剛好，軟硬適中，與其話係鮮茄汁，不如話係鮮茄蓉，內裡仲有超多蘑菇同粟米，配合調味，整個汁惹味，酸中帶有粟米清甜，配合意粉一齊食啱啱好。再講薯皮，焗得香脆，面頭亦鋪上大量芝士同煙肉，切開時芝士仲可以拉絲，食落滿口芝士香同煙肉香，好味。價格親民而具質素嘅西餐，值得再幫襯!…Read More

最近天氣真係熱到不得了，食完lunch陪飯腳去times買野，行到去真係身水身汗，結果飯腳去買野，我就去左city super嘅Cha Cha買雪糕。去到見到有限定嘅桃味軟雪糕，但記得之前食過，酸味過重，考慮左一陣，都係揀返宇治抹茶軟雪糕。值得一讚店員招呼一流，見我喺店外徘徊，會主動遞menu比我，同向我推介一下新口味，即使最後我唔揀比較貴嘅桃味都唔會黑我面，抵讚!雪糕好快就有得拎，店員仲為我遞上紙巾，真係好貼心。講返個雪糕，質地綿密軟滑，唔會太重冰感，食一啖，成個口腔都充滿抹茶嘅回甘香味，但又唔會苦澀，真係超好食。另外唔要cone轉cup唔洗加錢，抵讚!（我試過其他鋪要加2-3蚊𠺢!）下次黎開times都要再幫襯!…Read More

落雨落到個人好悶，剛好lunch time細雨左，一於出街食，雖然喺銅鑼灣扮工扮左一段時間，但一直都無食過喜棧，於是同飯腳去試下。黎之前已經上網睇定有咩食，因為喉嚨有啲痛，於是決定食蝦子鮮蝦雲吞麵。可能兩個人嘅關係，唔洗等直入，坐底即叫，講野都未講到兩句麵已經到，真係快過搭火箭，雖然上枱快，但夠熱，讚。先講雲吞，唔係迷你仔，成粒放入口食超有滿足感，皮夠薄，肉饀食落口唔會油膩，仲食到有蝦，超級爽口彈牙，而且仲有陣陣嘅麻油香，正!麵都唔錯，條條分明，彈牙但有啲硬，蝦子亦夠鹹香，可惜不多。喺唔係雲吞麵店嘅地方食到咁嘅質素嘅雲吞麵簡直喜出望外，可惜淨係食碗麵都要$42無野飲真係有啲貴。…Read More

今日約左人喺青衣城食飯，一出閘就見到賞茶，最近香港嘅台式飲品店都牽起一片點糖珍珠風，賞茶亦加入左戰團，不得不讚張poster非常吸睛。由於未夠鐘食飯，雖然每日限量100杯，但可能2點先開始供應，6點九都仲有得賣，個人黎講講比較鍾意奶茶多過鮮奶，於是揀左黑糖波霸奶茶，價錢只係$25，價錢比其他黑糖鮮奶或者奶茶，抵飲。等左唔洗夠5分鐘已經有得拎，影完相即刻試試，雖然甜度固定，但飲落唔算好甜，波霸珍珠依舊無令我失望，軟綿綿得黎夠煙韌，奶茶奶味香濃，茶味都可以嘅，但整體黎講個黑糖味差左少少，如果黑糖味可以濃返啲就更好，但整體黎講係唔錯嘅，下次試埋奶蓋黑糖波霸鮮奶先。…Read More