精神病被研究小組's Profile

已經好一段時間冇寫食評，但真係忍唔住一定要講番句真心話。如果唔想睇就睇最後一句😂本身見open rice推薦有韓燒放題，正正係呢間(燒肉屋)，單純放題自助餐食多左就諗住自己燒下回復d d 新鮮感d。一行人晚上到場早左，照比早入坐底，一望之下嚇左一跳，無論係六人檯定二人檯，個爐既大小竟然可以一樣得個30Cm x 24Cm咁上下大真係3個扇貝就去左8成心入面第一刻就諗（5，6個人喎？）算！如果個爐猛都唔係唔得，好在火力的確唔錯，食物熟得幾快，當然變相就要好勤力反d食物，搞到一係唔夠食，一係自己無得食。當你諗住爐勁咪得囉，咁多要求做咩既同時，我就會話比你知，呢間野係我第一次放題落單，二十分鐘都唔上食物既地方全程燒個金屬架？！吹左幾次都話睇下睇下，仲夠膽同我講我哋廿分鐘前落既單已經收到，大佬，我叫左天九翅咩，生肉要20分鐘準備嫁？你要出貨先得嫁？吹幾次就出幾舊榴連敷衍下。真係我把火仲勁過個爐好啦，講返啲食物先，食物方面肉類係唔錯嘅，各種醬汁類嘅豬，牛，雞都相當入味，上菜時都冇咩血水同冰結，分量都有保證，選擇亦相對充足加上本人驚人既技術，食感相當出色～海鮮方面就選擇較少，店方推介的白鱔分量就手指公2/3的大小，味道一般。海蝦略為不新鮮，肉質霉霉哋，個別蝦頭仲甩甩下。扇貝就一般，一大舊牛油煮比較滯口，肉質談不上彈牙，好在無雪味。熟物炸物寥寥可數，真係乜嘢都要燒過先食得，炸蝦炸雞薯條大家心裡有數，真係饑荒先會食。🥹特別講下個燒菠蘿，無味唔甜又帶渣，百分百罐頭貨，食過菠蘿心白色嗰部份就知係咩味🤷仲大有個所謂D24榴槤，2位榴槤控朋友食左一舊就冇再食，轉移晒去我度（笑）最後講埋三樣主食，紫菜飯，麻醬烏冬同辛辣麵。紫菜飯一個字，平凡；烏冬一句話，坑；但辛辣麵就係我食過最好味既版本，麵條彈牙軟硬適中，辛辣味帶感，麵身完整冇碎屑，分量仲完全係怕你兩日無食飯咁超大碗！整體而言，食物方面滿意，服務方面收碟幾主動，可惜其間一度全場煙霧彌漫，尤如身處火災現場。最大問題是出食物那份內斂，消極，厚顏無恥的態度，都幾令人嘔心，無能力就唔好搞任食，一班女人可以食幾多？真係大部份等候靠吹水緩解尷尬所以如果你地想試，最多2個人黎，4個人都要分2檯坐，頂多坐旁邊扮巧遇真心！…Read More

因為買蝦蝦既關係又行金魚街，頂住個烈日實在無胃口食飯，路過農米線就決定坐陣嘆陣冷氣醫下肚🌴本身見到店門張貼告示有龍蝦米線異常吸引，但價錢突破百五，令我反思100蚊都買到100隻極火蝦BB，就果斷叫左個麻辣雞肉米線連生菜黑金雞翼小食套餐取而代之麻辣雞肉米線個湯底嘅麻辣味完全係流於表面，只有輕微辣味，而且一啲都唔覺得麻，炸豆卜硬梆梆連吸收湯底都做唔到，主角雞肉更甚，冇乜脂肪之餘，食落去啲肉都好嚡，完全係百份百雞胸肉，米線偏硬味道淡，可能係因為佢品牌賣養生湯底，但係同麻辣就好似相違背。生菜連黑金雞翼本身係要加錢先有嘅，特價$10都幾抵，生菜就正正常常，反而係個黑金雞翼就非常之驚艷，雞翼異常肥美飽滿，表面個醬汁十分入味，帶輕微甜味，10蚊2隻，好食過個麵最後杯咖啡過多奶好甜，失敗☹️仲有店員都有種慢條斯理既感覺，明明店內得4，5個客人都好似應付唔黎，收錢都等3分鐘…Read More

長久以來都係大量優惠網站佔一席位，由新開張至今都一直想去卻又未有機會既巴巴串，終於係一個33度氣溫既下午去試一試下午2點鐘到達，現場都其實9成滿，可想而知幾受歡迎，由於本人隻身而來，禮貌地問左店長一人串燒放題serve唔serve，懷住戰戰兢兢既心情得到個滿意既答案，仲要比左張4人卡位我，真係人間有愛雖然如此有愛，但應彈都要彈，現場燒烤引致煙霧彌漫，十足從前網吧有人食煙一樣，抽氣功能無法應付，加埋密閉空間，氣管唔好人士提防氣喘叫左個午市串燒放題，冇另加錢去食多幾種牛，因為加錢都只係包多一種海鮮（甜傘貝）等侯起爐期間行一行自助區，（吸引）既食物種類唔算係太多，但餓餓地都食左d，熟食評價如下:咖喱魚蛋：都係一般硬硬地嘅路邊魚蛋，咖喱味好淡清湯蘿蔔：又軟腍腍又冇渣，而且清湯好入味如果唔係要留返個肚嘅話肯定食好多。燉豬手：十分軟熟, 肉同骨一咬就開，好食過街外一堆同業，推薦辣泡菜，青瓜等：辣汁同蔬菜本身都幾分離，而且唔太辣同惹味咖喱角，春卷，雞寶：完全被保溫櫃抽光所有水份，乾到爆，咬都咬唔開自助串燒區就已經幫你串好晒，方便直接用於特製爐度自轉，最底2層就肉類海鮮，中間雜丸雜腸，頂就菜同菇菇，正常人都只攻下路吧多春魚：就係街外急凍貨，好處係無火水味，快熟，緊急醫肚還好墨魚咀：幾少見到自助燒烤有，燒左好耐先敢食，但好彈牙，而且有特別味道，唔錯啊煙肉片同豬肉片：食落唔太多油，但味度欠奉，好難想像培根都可以冇味，啲豬肉片直程又鞋又硬，味如嚼蠟叉燒：幾令人驚喜，份量唔太大但有肉味，燒到出面燒味店既口感，但甜度接近沒有牛脷：我最愛，厚薄適中，淡淡油香可惜肉味唔太有，唔Juicy，所以只屬一般牛柳粒：2粒牛柳夾住中間一粒小番茄，當日最好味既肉類，沒有之一，單純就係好好食，諗唔到食咩就食佢啦傘貝粒：唔係加錢先有果種連殼既版本，單純2粒急凍貝肉，無濃味醬就真係食唔落青口及蜆：任食2個小時內比人夾晒都冇見再refill過，又唔係貴價貨，我見到幾次d少女走黎想夾但失望而回，再者，燒好出黎又唔係甜，態度同味道都唔合格雞肉串：都係雞柳條所以鞋鞋地，想飽可吃，但請以濃醬配之最後甜品有紅豆冰同芒果小蛋糕，還可以整體而言就70分，有進步空間，最少做好個抽氣同refill動作，（吸引）既食物選擇唔多但勝在爐具火力算勁，但當日我一人一個爐先可以食唔停，人多應該就有排等，但以價錢黎講都算值回票價…Read More

通常嚟講如果唔係發咗達，我都冇乜幾可會有去五星級酒店食自助餐嘅概念，更何況喺中環呢個中產區域，但恰巧因為市道唔好而家連文華酒店呢間咁有歷史情懷嘅酒店都推出晚市自助餐優惠，只係需要$400就可以食到平時嘅晚餐自助餐，機不可失之下立即搵幾個朋友仔去試一試，希望可以感受一下有錢人平時食嘅自助餐會係乜嘢口感位於中環皇后像廣場旁邊嘅文華酒店，由外觀到室內設計都有一種傳統古舊嘅感覺，但係室內裝修都算係稱得上富麗堂皇，美其名就有種古色古香既感覺，現實少少嚟講就真係幾老派土氣。準時入到去喺reception排隊，人龍都唔算好多，而且都發現有大部份係透過優惠訂餐。喺度分咗上下兩層，座位離食物區都相當近，但係驟眼睇落去已經感覺食物區好明顯唔係佔咗好大位置，更可以稱得上係幾細，食物嘅款式亦都自自然然唔多得去邊酒店員工安排座位之後我哋都立即出去攞嘢食，睇吓有啲乜嘢富貴食物可以一掃果份不安感🤷相對細嘅食物區主要分咗凍食區：包括海鮮同埋刺身壽司；熱食區：包括中式餐湯同埋中式菜式再加埋少量嘅各國菜式eg.印度菜仲有遠少少嘅海鮮湯區域同埋甜品區海鮮：龍蝦：體積相對細，味道冇乜特別，畢竟大部份自助餐凍海鮮都冇咩味麵包蟹：比較特別啲，但係由於冇乜肉，主要係用嚟食膏再加埋現場嘅蟹膏唔多，唔太吸引長腳蟹腳：都幾大隻，有少少海水味，但係現場嘅份量認真少螺：要回本點會食，留返俾其他人享用蜆：都幾甜，不過不失凍蝦：認真唔掂，又梅又甩甩地頭刺身刺身款式唔多三文魚吞拿魚甜蝦，但係個賣相完全乾痴痴毫無水份，仲要擺到亂七八糟。三文魚又簿又乾，我見到塊吞拿魚厚切諗住食一食一咬落去乾過柴有多筋，完全冇味果斷放棄真係放題都好食過佢.中菜區可以話係最失望嘅區域菜式好少，而且俾人一種好廉價嘅感覺好似係啲兩餸飯店買嘅炒飯，蝦球炒翠玉瓜，咩炆魚，蝦仁炒粉絲，唔係唔好，但係我絕對唔期望係酒店自助餐食啲咁嘅水準嘅嘢餐痛更加唔掂，係啲瓜瓜菜菜湯連基本螺頭湯都冇唯一好食啲嘅就係沙律焗蠔，但係蠔肉丁屎咁大粒，沙律醬就勁多講真行到異國菜個位已經諗唔到食咩好，但係驚奇嘅係啲咖喱燉羊肉啊牛腩啊夾餅相比之下竟然表現得幾唔錯，好食過中菜好多，但係由於好多肉始終食唔太落🤢海鮮湯區，一大煲海鮮煲出嚟嘅湯，畢咗兩啖飲吓都幾淡，有同事講話其實個檔係用嚟俾我哋煮熟啲凍海鮮，但我就心諗有冇咁多餘😅最後去到甜品區，講真款式都幾多下，但係好食嘅絕對唔多，我只推介文華自家出品嘅芝士蛋糕同埋佢哋自己嘅雪糕，非常好食，但係必須要配佢專用嘅雪糕筒，因為我雪糕筒都超級好食，個甜品可以話係成個自助餐裏面最值得食嘅地方（錯晒）總括而言，今次呢個優惠價自助餐我認為絕對唔係我心入邊五星級酒店嘅水平份量少，種類少，海鮮嘅refill速度可以話係驚人地慢，見佢次次都少少少少咁fill，見好多食客出去想攞龍蝦最終都空手而回🤷‍♂️食物水準相當一般，根本唔係酒店級，只係路邊兩餸飯店級，特別係中菜另一點，成個buffet只提供一杯飲品，我簡直O晒嘴，現場仲冇飲品區，唔通要逼人飲嗰啲爛鬼菜湯？最後我想提出嘅一點係：唔知係咪想顯得high class啲,serve我哋嗰位男員工全程用英文講嘢,我哋講中文佢其實聽得明,但係佢偏要講英文，唔知係咪酒店規矩。如果呢個係甜品buffet我會比90分，但整體嚟講我只可以俾佢65分左右,令我呢一次感受有錢佬生活嘅飲食體驗完全落空…Read More

位於太子金魚街入邊嘅一間港式鐵板扒餐餐廳，雖然裏面有唔同類型嘅茶餐廳美食，但既然個名叫做鐵板世家，自自然然需要嘗試佢哋嘅鐵板扒餐，感受吓淋醬汁喺鐵板上面反彈到成身成面成枱都係醬嗰種快感一入到室內就一大浸塑膠餐枱嘅酸酸霉霉味，雖然室內相當光鮮人驟眼睇都好整潔，但係就有嗰種酸酸咪咪嘅味，令人第一個感覺不良好。星期日雖然金魚街佈滿咗內地朋友仔，但呢度依然得一兩台客，坐低準備嗌餐，隻手掂到張枱都有一種痴痴立立嘅感覺，明明店內冇乜客，店員都可以隔兩丈遠大叫幫你落單，唔知點解唔可以行埋兩步細細聲講，總真充滿舊式香港茶餐廳嘅風味。叫左個鐵板西冷配雞扒薯菜套餐，本身叫白湯，嚟到就上紅湯，個年青嘅店員仲好似掉垃圾咁，掉個碗落張檯，五分之一碗湯倒晒落張枱度，同佢講我order既係白沙，佢枱都唔抹就咁攞返個碗走，期後俾返碗白湯比我就算，當然依然唔抹番張檯扒可以選擇熟嘅程度，我選擇medium Rare轉頭返牛扒就上枱，如果單論食物味道嘅話，佢可以話非常之好👍因為塊西冷真係做到medium rare咬開入邊鮮紅而且軟熟程度無懈可擊，雖然塊西冷薄少少得兩cm厚都冇，但某程度上入口即化根本咬嘅力都唔需要相當滿意！相反塊雞扒就有少少鞋鞋地，係雞胸而唔係雞髀肉，不過都比市面上嘅茶餐廳好多，最起碼食得出係雞。整體嚟講飲食體驗還好，如果你有帶耳機嘅話會良好好多，因為現場啲職員係咁大大聲，粗口橫飛；談笑風生，但啲無謂粗口好騷擾，再加埋個別職員嘅態度認真求其，希望將來會有進步…Read More

查實而家食日式放題，來來去去講得出嘅都係嗰幾間(乜乜喜，乜喜乜），上網search嘅又係嗰幾間，個個YouTuber做埋同一樣嘢，單純唔同地區，真係自己去試過先明白個個都係坑，全部係演技與其係咁就只好逐間逐間去試，撇除晒最大嗰啲虛有其名嘅連鎖店，今次就試吓呢間御滿屋，雖然已經唔算新店舖，但又確實未試過，剛剛網上平台有優惠價免費升級，可以任食西冷牛扒同Häagen-Dazs雪糕任食，仲要平咗$30So～比卡超，I choose you由於早鳥優惠，本身需要5:30先得，我哋一行5:15已經到咗，問問店員佢竟然好親切都話冇所謂，照樣食到7:30，差少少姐嘩！真係諗唔到仲有慷慨都可以早啲俾人入，而且又唔會立即開始計時嘅日式放題店咁我哋一於厚顏無恥咁開始入去食嘢入口附近就係一大堆嘅任食冷盤自助吧，特別推薦第一張圖最右下角嗰隻好似麻油菇片咁既東西，超好食。試咗其中一小部份嘅冷盤食物評價如下：青口：冇水冇冰浸住比較乾身新鮮程度有限一般般白蜆仔：好多殼都碎碎地，雖然唔影響味道但感觀唔靚，感覺唔新鮮，其中幾隻腥腥地但絕大部份都還好嘅海蝦：可以算係呢間放題店，我其中一樣唔滿意嘅嘢就係佢所有蝦系列嘅食品肉質都霉霉地、無論熟生都係🤢刺身方面不過不失，一般款式都有，但蟹柳都竟然放入刺身行列都係第一次見。不過都係果句，蝦真係唔得👎其他食物就只推薦我特別喜歡果幾種；蒜蓉烤蠔：我起碼食左1x隻，微辣，蠔身非常飽滿多汁，係隻隻都可以挑成大粒肉出嚟既，唔係得層皮，真心好食全系列壽司:大小做得剛剛好，唔洗一口一隻但唔會令人覺得小氣，更什者係味道相當討好，有芝士果幾種更加吸引，日式放題之中（壽司）最正係呢間麻辣龍蝦仔：意外地好味，個汁十分惹味，龍蝦仔果d d 肉都吸收晒啲辣汁，食極都唔厭！西冷牛扒：作為特別優惠先有既美食，理應有佢特別之處，但完熟既佢就恐怕會浪費左大家個胃，除左連住肥膏果part香口少少外，絕對有更好選擇雪糕櫃有多種選擇，但有Häagen-Dazs在場根本冇眼睇其他嘢，畢竟任食Häagen-Dazs食幾杯都回到本，但慘在佢得士多啤梨味一隻咁大把，都正丫同場仲有清酒梅酒任飲，入口幾順口，酒精成份都唔係好高，唔想飲啲狗屎垃圾汽水可以同我一樣全程飲住佢哋😘總括而言，二百零蚊嘅當晚非常滿足同埋重點係食完之後冇口渴，係冇口渴！係真係冇口渴！？我諗唔到有邊幾間放題可以做到唔口渴，五百幾六百蚊自助餐都食到口乾到死，冇落味精真係好重要。將來絕對會再試，希望之後再有優惠…Read More

呢間充滿香港特色，又將招牌菜融入店名既灣仔米線店一直都想幫襯，終於搵到日覆診後去試一試主打花膠同雞肉，名符其實有雞有花膠，湯底雞湯相當濃味，單單湯底已經足夠食晒碗米線，竹苼同菇都吸收晒d湯汁，就似牛雜入面既蘿蔔一樣，令客人多左一個感受湯汁既額外口感配料十分滿意但主角花膠同雞反而就無咁吸引，一來花膠沒有軟琳加上雞湯沒有被吸收，基本上入唔到味，單純存在，但沒有融入菜式之中雞肉也比較鞋身，雖然沒期望像海南雞那般嫩滑，但只比茶餐廳燒味白切雞好一點的口感也有點失望最大問題就是上檯時的湯底溫度不高，如果有個小火滾住就絕對加分不少…Read More

新年流流想放任一下，本想book帝京那間最新分店，個個YouTuber講到要幾好有幾好，可惜成個新年期Full晒，只好選擇就近一間，都有一段時間既雅蘭中心分店，黎個新年豐足晚餐。一行6人浩浩蕩蕩到達，由於book左位，一到門口店員通個對講機叫工作人員準備位置，拼六個位出黎，咁我就好安份咁係門口等佢安排帶位，點知5分鐘都冇話準備好，等我問幾時入得佢先話入得嫁啦，真吹脹晒我時間！本身黎呢度既其中最大原因都係為左個任食蟹腳，呢度好既地方係叫幾多真係黎幾多冇好似一d叫20黎6既垃圾店一樣，但講真係偏細隻，一半剪開得牙籤咁幼，真係剪既卡路里都補唔番，最慘既係愈食愈咸，第三round黎果d咸到爆粗，根本食唔到，沖水都頂唔順，放棄壽司類就好壞參半，熱壽司味道賣相都好好，但凍既就差d加上冇咩味，好似個花之戀，包到勁求其，爭鮮都靚過佢熱食就十分滿意，包括新年應景既花膠鮑魚小碟相當入味，烤蠔大隻又多肉，起碼食左十幾隻，凡立貝就時好時差，一般都正常係有幾粒食橡筋，咬都咬唔開。d燒物串燒如牛舌同雞軟骨都無咩汁又乾，不推介😪燒大蝦就直頭d肉梅梅地，失望呢個烤榴連就係噱頭黎，但幾位榴連愛好者都話佢食落唔似係榴連，似係一堆落左榴連香油既cream個乳鴿係特別菜但上檯都凍凍地，我相信如果熱會好食好多，60分啦🫠d刺身都合格既，厚身但肉質沒有新鮮的口感，乾身左d，d蝦最唔掂，同熟蝦一樣梅梅地。總體黎講會比70分，有冇人地講到又抵食又好食就見仁見智，畢竟唔會有樣樣都好食既放題。。。有！但唔係香港，北上大把。最令我感到冇其他食評講到天花龍鳳既位置係。（食完好口渴！好口渴！！好口渴丫！！！）係咪真係唔落美味素就唔開得門口做生意？個個朋友事後都話勁口乾，諗起個蟹腳既咸度真係唔推薦。明明已經係香港日式放題既代表品牌都搞成咁, 相信都唔會再幫襯…呢間分店…Read More

旺角身為旅遊勝地，美食潮流店舖比比皆是，但要好食又抵食可能未必間間都係，打卡滿分但食物質素參差佔大多數，所以本地朋友仔都會去食d性價比高d既餐廳，呢間意房菜絕對係其中一間店舖位於豉油街多嗰間路邊露天攤檔嘅後方，基本上冇咩遊客會行啲咁嘅兜痞地方，但識食既本地人就無呢個問題。店面主打一個陰陰暗暗既黑玻璃，店外餐板都殘殘舊舊，入到店內都勁暗加上空間狹窄，檯面黐立立既感覺還是老樣子叫了一個套餐「意式芝士海鮮飯」，外加酥皮湯，有野飲仲有布丁甜品都係7x，邊度搵？「意式芝士海鮮飯」，隔住個mon就咁睇都已經色香味俱全，配料有墨魚圈青口，蜆蟹柳棒，仲有極大量嘅芝士忌廉，個飯熱辣辣仲要勁creamy，青口同蜆都冇雪味，雖然稱唔上新鮮，但依然味道良好，肉質軟熟冇橡筋口感👍但我可以好肯定咁話俾你知最好食嗰部份一定係個飯本身，撈勻晒啲芝士，啖啖都有芝士嘅香味，即使冇餸我都可以就咁食晒成碟飯脂肪膽固醇代表，酥皮忌廉湯😂忌廉湯就當然係罐頭忌廉湯，不過重點係個酥皮，雖然等咗成三四個字先有得食，但就咁浸落去滿滿香氣四溢嘅牛油味，只係跟餐加$10就有，值！喺Menu上面可以選擇嘅飲品裏面個名最為正常青蘋果綠茶，但飲落去一刻立即糖尿病三期，甜到飛天遁地最後上嘅朱古力布甸，你問我我覺得比東海堂嘅$24.蚊1個嘅牛奶布甸好食😌甜度適中，朱古力味亦都濃。整體而言95分嘅午餐，主要扣分點係啲嘢飲太甜，加埋間地方陰陰暗暗有少少令人覺得污糟嘅感覺，不過見到店內唯一一位店員，店面一腳踢竟然一啲甩漏都冇，語調客氣。假設同佢一樣咁忙嘅話，一般其他餐廳除咗無視你同西面之外，我諗唔到有咩反應最令我感動嘅係，我本身諗住起身俾錢嗰陣時，佢仲提醒我話我仲有個甜品未食，服務態度非常好工作能力又高，冇得頂…Read More

真心講句，一直以來本人都對呢間私房菜放題非常之感興趣，但礙於價錢關係遲遲都冇辦法的下心肝去試一試，但咁啱得咁蹺，最近推出咗個優惠plan,兩小時任食二百幾蚊可以食原價五百幾蚊嘅放題真係天助我也，冇辦法唔去試一試,但亦再一次更新咗我對私房菜放題嘅觀念既上早到左少少但店員依然好有禮貌比我地早啲開始，本身有3碟前菜都係咸咸濕濕既小食，份量激少所以都係先上個任食雞煲醫醫肚先店員比左個沙漏⏳計時，講得好清楚，仲要見到我哋成班懶過狗唔太炒d雞仲會睇唔過眼幫手炒、服務態度真心冇得彈；話時話雞肉都真係幾嫩滑，由於叫左小辣，雞肉無比辣味蓋過反而更惹味，由於經驗教訓，擔心火鍋會伏所以足足食左3鍋先雞煲完結進入火鍋環節，湯底叫左最有特色既熊仔冰南瓜蜆湯，打卡成份佔多，畢竟對南瓜都冇乜興趣但由於個鍋身勁大又厚身，再加埋熊仔冰同爐具火力有限，個湯底勁耐都滾唔起有見及此，店員好醒目咁上左刺身等我地唔洗玩手指🥹就大家所見，除左生蠔，其他刺身都係一次性，可見份量真係幾少，一人每款一小片得啖笑味道就不過不失。當我哋戰戰兢兢咁問個生蠔🦪係咪要滾左先食得，店員話係刺身級黎仲可以任叫，我同朋友眼神交流一番後半數人放棄，我抱住「有食唔食罪大惡極」既原則試下，點知食落發覺比自助餐更飽滿厚肉，海水味同金屬味冇乜但入口油滑又幾好食，前後食左10隻，但再叫d品質好似開始下降，愈來愈腥就放棄刺身食完返番去火鍋，搞左3，4個字都未滾，任食既拼盤就上係度，有黑毛牛，一口牛，金錢展，和牛後腿肉同埋鮑魚。除咗一口牛比較韌多筋咬唔開之外，其他肉類都係還好，冇嗰種新鮮牛嘅感覺，鮑魚都幾煙靭，不過滾咗兩輪之後已經成個鍋都係脂肪喺個面度，真係冇乜胃口粘糊糊咁，再加埋望埋嗰個一般火鍋配料名單，講真真係冇咩係令人感興趣嘅嘢食最後草草了事就算數，臨走前埋單嗰刻諗住食埋啲菜，點知原來仲有個咁大嘅驚喜喺最後用湯底淥咗兩輪都依然係好生猛，感覺為呢一間店畫上完美句號。恐怕冇下次。…Read More

公聯會蛇宴已經參加過幾年，一直都係深水埗樓上小店，今年轉左尖沙咀呢間德興酒樓，由豆膶咁大，手肘撞手肘但卻無比溫暖，人情味滿瀉既小店變到舊式酒樓，味道究竟會有否分別？畢竟是酒樓提供的餐飲，相信也能反映酒樓的功力經過根本沒人聽的主持人真情表白後正式上菜先來太史五蛇羹，明明寫著一人三碗，現實中一人兩碗已是極限，看似足料至極，實際是否百分百蛇肉真的難說，和蛇店吃到的味道不同，當然比不上蛇店，但單論味道也算不錯👌🏿百花蛇丸外帶蝦餅若干，我只能說，這蝦丸炸得很香口，蝦片都暗示了一切，名字恐怕是意思意思，味道呢，香口彈牙就是了。海味大拼盤。大家明亮的雙眼看到多少海鮮我的舌頭感覺到蠔豉，魚肚，冬菇，生菜和腐竹，份量依然不多，生菜佔了六成半，醬汁就是蠔油味，叫海鮮拼盤也同樣是意思意思，味道ma，一般🫠終於到了我參加公聯會蛇宴的唯一原因，三蛇湯，一上檯藥材味就撲面而來，油亮的湯色，滾熱的湯汁，相當暖胃但藥材味太重，烏雞味被壓下去，毫無甜味，感覺和以前飲的不是同一個味兒，明明之前可以飲3碗這次一碗停手🤔講真餐飲至此，理應有點飽腹感，但現實中絕無此事，一人半隻乳鴿實為救命稻草，味道跟外間的燒味店一樣，肉汁久違，肉質卻不錯，不過份量還是那一點點蒸鱔，不吃魚的我由同事口中得知，鱔肉太肥，油味過重，而且有點不夠新鮮羊腩煲，真心全晚最好食既一味餸，羊腩相當軟滑，馬蹄腐皮都同樣入味，有著點點的膠質口感，非常好吃蛇汁生菜⋯早前的（海鮮拼盤）就一堆，再來一盤真是無話可說同時臘味飯也上場，炒得相當乾身，食味很好，煙韌入味，加上最後的幾片冬天當做西瓜？蛇宴也畫上句號😯整體黎講真是吃氣氛，餐飲體驗相當一般，總感覺前幾年的公聯會蛇宴更好吃，再加上早前蛇店蛇宴太驚艷，真是沒比較沒傷害。吃完腹中依然空虛，回家路上又要去便利商店了…Read More

將年近晚，大街小巷都充滿內地旅客，想搵間靜少少既店舖都唔係咁易剛剛到花墟買肥料，肚內蛔蟲急call，路過呢間外表恬靜既大馬館，食評顯示清一色負評，但反正open rice評價自覺可信性有限，眼不見不為實，先試為快一直以來既原則都係有海鮮就唔食肉，有菇類就差包剪揼決定。所以毫無懸念地試下個馬來西亞海鮮飯，由於中英文都冇寫咖喱喺個菜名度，所以一度擔心會出現就咁海鮮放白飯面，還好有驚無險，該有的還是有🥹本想以為馬蹄爽同清涼爽係馬來西亞特色飲品，但好在眼角望過去個雪櫃度竟然係香港罐裝馬蹄爽，立即Pass,轉個椰青壓壓驚🫠個飯真係熱住上呢點抵讚，畢竟街外得果十幾度，飯凍絕對會負評，咖喱方面有啲日式咖喱嘅感覺，偏甜；椰奶同咖喱味都欠奉，但甜甜地味道依然算唔錯，海鮮方面有青口帆立貝同埋蝦份量比我想像中多帆立貝就係一千零一粒，不過幾大粒，兩啖先食得晒，唔入味但最少冇其他食評所講嗰啲雪味。青口，我某程度上仲覺得幾好食，可能係好運食唔到人哋所講嗰啲酸味青口。蝦：完全無蝦味，肉質鬆散有點削削霉霉，冇腥味所以都收貨，意料中事附送一碗冬瓜湯，如果無視沈底果d不明黑色粉粒，絕對稱得上好飲最後食埋椰肉飲埋椰青，如果唔係伙記斬開個頂時手勢唔太好，搞到一堆殼既碎片入左去影響飲用口感外都算清涼好飲。總括面言絕對冇可能係得果一星，食物中規中矩咁啦，不過服務的確係有進步空間，畢竟下午茶時段全店2檯客，3個店員都躲進廚房，大叫了三次唔該落單先施施然走出黎，完全唔休做。…Read More

講真係現今香港，你唔做番咁上下廣告，人地上網Search火鍋除左某D連鎖集團店外，有幾可會搵到d又值食又好食既店仔？一堆牛X已經擋左幾版，所以都唔個點解比我search 到呢間唔出名，仲要座落係旺角小巷內既富盛火鍋，仲要神推鬼㧬咁睇到菜單，2百幾有任食海鮮仲要去到象拔蚌級別，好難唔心動去試試😌登打士街行到傷心酸辣粉大大個招牌底轉入去嘅小巷就會見到呢間店面門口好細，但係實際上樓之後空間異常廣闊嘅富盈火鍋，以一間任食黎講佢真係勁大空間，手肘撞手肘完全不存在基本上兩人已經比到1檯2爐既狀態。都唔知係心地好定生意唔好😂😂😂叫左個3號餐無限任食，但由於7:30前埋單可以有折頭關係，所以貪小便宜，最尾只係食咗兩個鐘，但如果閣下都想嘗試嘅話我奉勸你都係唔好貪小便宜，一定食盡佢因為其實真係兩個鐘頭唔夠時間食咁多嘢先上個無限任食嘅麻辣雞煲，本身有女士在場，所以叫左細辣，雞肉絕對稱唔上嫩滑，有d鞋但幾惹味。由於今日嘅目標係海鮮，所以雞煲淨係食咗一個就放棄，免得浪費時間，以上圖片裏面嘅食物都係任叫任食，由扇貝到鮑魚到生蠔到石班塊到鰻魚到象拔蚌到紅蚌片到生海蝦真係任食，而且叫幾多上幾多，絕無漏單本身係超特惠，但係某程度上其實啲食物品質上相對一般，食落就明白，唔腥唔臭但就似雪藏海鮮，冇咩味。如果對食物品質味道上冇特別要求嘅話，佢嘅份量足以滿足你要求，如果你係一班佬，諗住嚟隊啤酒食海鮮嘅話更加係推介😂自助bar位置亦都相當多選擇，即使有啲嘢攞晒，轉個頭就再fill返出嚟,速度快過自助餐一百倍，絕對唔怕你大食；最怕你唔黎食有菜有肉，仲有蘿蔔牛腩，碗仔翅講真味道真係唔錯，只係二百零蚊就可以任食咁大堆頭既食物，出面d賣晒廣告既放題我唔信做到，唯一嘅缺點就係味道方面的確比較平凡左d😅再加埋個燒烤爐感覺力水唔太夠，燒烤方面都慢啲啲，如果你係食肉類牛嗰啲就好快，海鮮貝類嗰啲就有排等。加分點係爐面用左即棄油紙，成件事乾淨好多，污糟咗立即同你換張新既，服務相當唔錯👍總結而言，你要大量吸收營養嘅話就相當推介，但係如果寧願食高品質靚嘢嘅話可能仲有其他更好選擇啦同埋唔好貪佢個7:30前埋單優惠，請盡情食到佢傾家蕩產…Read More

天氣開始乾燥轉涼，相信懶過狗既香港友除左被竇之外，另一種會諗起既野就係食蛇，變相就係拍左1年烏蠅既食蛇業終於發市既日子來臨，但網上有一大堆雜亂無章既蛇宴推薦，實在難以得知邊間好食，邊間出色😞所以反正唔知去邊，個人就一定選擇去蛇店，因為絕大部分酒樓既菜單都係得1至3味係同蛇有關，其餘都係d咩羊腩煲，鱔，感覺真心想食蛇宴就應該味味都係同蛇有關先最過癮有見及此，今次就同同事去左位於旺角既食蛇老店《蛇王業》去試下60年不倒既手藝🐍先來蛇羹，講真就咁睇都見到十分足料，熱辣辣簡直救人一命，蛇肉同菇既比例剛剛好，份量仲要位位3碗仲有剩，老字號絕對唔洗擔心食緊以雞代蛇既蛇羹七彩炒蛇絲，蛇既份量差少少，椒絲幾多，加埋唔知點解存在既炸脆脆，扣分不少，但單論蛇絲就依然好味🤤椒絲同西芹單單帶來清爽口感炸蛇丸，估唔到只係半席都做到人人2粒，仲要唔細粒嫁喎，加埋你都睇到吸油紙都冇咩油，食落彈牙又味濃，一食就知冇味精，絕對唔係街外d濫竽充數既爛鬼蝦丸囉椒鹽蛇骨腩，當到呢一秒都仲擔心緊自己係咪真係食緊蛇肉既傻豬豬們終於可以放心，成舊蛇骨放你面前本身以為要「輪」骨，但一咬落去原來好多肉，簡單好似食緊豬仔骨咁啖啖肉，勁惹味咬開肉質絲絲分明，真係估佢唔到，真心推薦🥰🥰本餐第二最愛生扣蛇骨腩，全晚最愛😻！一眼望落去以為食火鍋炸魚皮，但原來塊蛇皮好似骨膠源咁彈滑仲要其實好多肉係入面，汶到好淋又冇骨，成舊食真係超級滿足，必食🤣🤣蛇汁時蔬，沒什麼特別，但我喜歡食菜加上成晚都係肉，硬生生一個人食左7成😙清清腸胃到左尾聲，再上蛇汁貴妃雞，當時都飽到反轉，食左1件感覺比較（鞋），但就同酒樓燒味差唔多，不過不失😗蛤蚧湯，不得了，姐係果d好似壁虎🦎既野味湯，藥材味幾重，有dd 甘但又幾好飲，飲完成個人暖起上黎，雄風都番埋黎🔥🔥🔥🔥🔥糯米飯，炒得幾乾身，又唔會痴到一大舊，上味唔錯冇話面果d先有味。煙煙韌韌寫上完美句號🤡🤡🤡其實中間仲有味燉山瑞，姐係水魚果d，但由於一下子就比人夾晒，我連食既機會都冇，相信味道都應該唔會差得去邊，大補之物失之交臂🥹總括來說，完美的一餐，過往係酒樓，公聯會既蛇宴完全同佢冇得比，加埋d店員好鬼親切有講有笑，仲要送左支50度既蛇膽酒，一飲立即(wing)但又好鬼好飲，行氣活血男人味出晒黎🥴將來齊腳絕對會再幫襯…Read More

早幾日食完馬六，轉個頭又想回味一下馬來風情，但食極同一間又冇對比無進步，所以就行過2個街口既呢間「芽籠」去睇下會唔會有更高既味覺享受由店外到店內，個人感覺芽籠係富麗堂皇得多，木製裝備更有異國風情既味道，光線柔和得黎比人一種相對舒服既感覺食物方面就比較吸引眼球，飲品選擇都唔少，因為太花多眼亂，選擇困難症，所以就直頭叫左個（芽籠蝦麵）,有個店名仲唔係招牌菜？實冇死再外加新鮮椰青一杯5分鐘上菜，第一印象就係估唔到真係椰子成個上，本身諗住係玻璃杯椰青水加2片椰肉就算有得飲仲有得食，比埋隻匙羹慢慢食椰肉，抵讚到番個麵，其實就係油麵米粉兩溝既麵底，兩重口感，湯底就好重蝦子味，有點咸但有椰青就balance番。成個麵都重口味, 腩肉片軟硬肥瘦適中，但d軟骨咬唔係好開，浪費。糖心蛋幾重醬油味夾creamy；d蝦睇落有3隻，實際舊舊得半塊加埋得1.5隻蝦，有點小氣，畢竟呢個level既蝦唔算係貴野加埋d一啖就食晒既蝦米仔，睇落大大碗但一下就食晒，佢唔係下午茶餐但份量個人認為女性向多d，唔太夠飽，加埋現場10枱客9枱都女士，可能真係預左d客唔大食既麵加飲品九十零蚊，話平唔平話貴唔貴，環境幾好但現場唔算靜，同朋友黎吹水可以一試，想食清淡d既可能未必如意🫠…Read More