green tea fever's Profile

星期日早上8點幾，同幾個朋友去灣仔上堂，約埋響呢度試下個早餐。可能太早，居然唔使等位，入去即刻有位。我揀左火腿奄列早餐，跟菠蘿包同熱奶茶，加兩蚊加鮮牛油。另有朋又揀沙嗲牛麵早餐。滿心期待，冷冷的早上吃個熱辣辣的鮮油菠蘿包，約五分鐘後，食物到，睇見個包，心知不妙...點解件牛油唔溶嘅？用手一摸，冰冷的菠蘿包夾著一片冰冷牛油...有冇搞錯！唔望anytime有新鮮出爐的包，都唔該用微波爐叮吓丫...咬落包身又實、又過甜，認真失敗，唯有整走片凍冰冰牛油，勉強食完。再黎睇份火腿奄列，份量ok的，亦冇過熟，之但係，點解咁多油？明明同桌三份奄列一齊上，另外嗰兩份未食就見碟底有灘油，都未夠誇，其中一份唔知係咪最後上碟，直情有2-3mm的油浸住件奄列...食咁多間茶餐廳，真係第一次見！係個熱奶茶叫正常少少，ok香濃，不過係咪真係如傳聞般全港第一？我唔覺囉~~總結係，嚴重名不乎實！坐坐下越來越多遊客光顧，佔超過50%，當然亦有街坊！真係影衰晒HK美食之都個朶，灣仔好食過佢的茶記大把！下次都係行多兩步去華星好過，冇錯人地係貴，係玩gimmick，起碼食物係對辨丫~~…Read More

今次試下好多人鐘意的澳門名物: 蝦籽撈麵平日中午唔使等薑蔥蝦籽撈麵質彈身爽滑，蝦籽好粗粒但稍嫌份量唔夠多，香味一般。配薑蔥豬油增添風味，都算係幾好食，不過都會再去試其他比較下！酥炸鯪魚球有鮮味兼好彈牙，size像炸魚蛋，一口一件剛剛好，蜆介好香，同鯪魚球真係絕配！食鯪魚球最怕被細骨拮到，呢度係完全冇，正！…Read More

唔想再去迫爆的義順，今次試下保健！平日中午，舊式老店坐了兩枱客。不用排不用等，清清靜靜，真好！想食到層皺皺的"奶皮"就記得要點凍的雙皮奶，熱的皮只有薄薄一層！天冷，點了熱的雙皮奶，係正常size，不是別店的縮水版。奶味香濃，甜度適中，軟滑好味！是義順以外的好選擇~~…Read More

雖則KFC有賣瑪嘉烈品牌的葡撻，但香港的KFC連炸雞都做得差過人，真係甚少幫襯...何況，我都係鐘意支持性格小店的！呢類名店都係適合平日去，唔使等仲即刻有位坐添！戶外的桌椅旁種滿鮮黃花朶，好靚！除左著名的葡撻，店內仲有不同的蛋糕、鬆餅、三文治、沙律賣。星期一的早上得五六人排隊，先排隊買票後取撻，熱飲取號有專人送上。幾年前食過的葡撻，今日水準依然，鬆皮香脆、蛋面微焦且香甜軟滑！寒風下咬一口熱辣辣的葡撻，滿足！見有原味、朱古力、藍莓三款鬆餅，選了呈綠色的藍莓，凍的、有藍莓肉，但味道一般...不試也罷！熱朱古力咖啡 $16元一杯，賣相不錯。不太甜，有朱古力香，咖啡味不算香濃，整體ok的。Latte泡不算很細滑，但有homemade feel，不是特別好的咖啡豆，$14蚊都算係咁。見有人捧著很滿的一盤沙律，睇黎很豐富很新鮮，仲有即叫即整的三文治，但天寒地凍，下次熱D再試！買多件細的雲石蛋糕帶返屋企食，份量十足，勁重手！回家切開，牛油味和朱古力味的蛋糕仍能清楚分開兩種口味，像太極圖案，沒有很細緻的揉合成雲石紋。口感比莎莉的更硬實欠彈性，減了甜，多了蛋和朱古力香，很飽肚。見有講英文的華人遊客投訴服務欠佳，話落單的呀姐串咀。人地多客唔憂做，店員係有少少脾氣，但對local風味食店，不抱酒店服務的期望，下次去我都會再幫襯的！…Read More

幾十人包場開P:1. 藥水味鑵頭雜果冇氣punch = 難飲2. 鑵頭雜果+薯仔+低級三文魚沙律 = 唔好食3. cold cut 2款，咸 = 唔好食4. 鑵頭肉醬炒意 = 唔吸引，冇食5. 西炒飯 = 唔吸引，冇食6. 炸咖哩角 + 春卷 = 快餐店貨式，一般7. 日式串燒 (超市現成買到嗰隻) = 唔好食8. 煎雞扒 = ok，一般快餐店貨式9. 雜菜湯 = 淡，唔好飲，仲差過鑵頭10. 多士 = 普通法包切片，仲唔熱11. 椰絲啫哩糖 = 小學生都識整12. 法式焦糖燉蛋 = 焦糖用白糖兼唔夠焦，燉蛋用現成粉開成，唔軟唔滑冇蛋/奶/溫呢拿香，兼且過甜宜家連快餐店都講究食物質素，佢真係差過美心/大快活到會！街邊茶餐廳叫一盤盤食物番黎都係咁上下！預先整定嘅盤裝食物咁好做，都唔肯俾返少少心機同誠意，好差！個場環境好得，夠闊落，圓桌多，有細房，適合幾十人或幾個朋友聚會服務一般，待應唔多醒目，人哋成班人影緊相，居然想去倒晒個客D紅酒，係咪傻架？大佬，收近二百蚊位，仲唔速速改善食物質素，肯定好快摺得！…Read More

同兩位朋友仔打爐，即刻推介呢度！寧記剛開業我已經係常客，天氣凍時一個月都有一兩次，任食火鍋人多人少都啱！但好明顯唔同鋪食物質量係有好大分別，時至今日，由本來四五間鋪得返(好似)三間，畢竟香港人係要新鮮感，新嘅對手小肥羊/譚魚頭等強敵圍攻，加上佢質素唔穩定，係好趕客。之但係，偏好辣食的我覺得佢呢個價其實香港選擇唔多，所以一直捧場，雖然...佢嘅辣...比起剛開業時確係輕手左好多倍！銅鑼灣店搬鋪後第二次幫趁啦，新鋪比舊鋪比乾淨又好坐，夠光猛夠通風，good~~侍應制服更清潔整齊，招呼更細心週到，係有再培訓的，潮流興升呢~~做海鮮酒家，即係有埋晚飯小菜，唔一定要打爐，不過，我冇興趣。七時朋友仔準時到，我叫開台灣麻辣同津白豆腐，一清一濃，朋友仔鐘意香茜皮蛋多D，又得啫！任食黎講呢度係好新鮮同幾多選擇，當中勁推牛展，又淋又入味，索完麻辣好正！一碟八片我一個例掃兩碟！肥牛其實唔肥，但我鐘意，最緊要新鮮！另鮮蝦滑、牛滑同墨魚滑都係任點，彈牙好味！魚片就一般，朋友話唔夠新鮮。牛骨髓好滑，炸魚片鬆脆，菜夠多款又新鮮，玉米五分鐘食得勁爽甜！豆腐夠滑！一般豬肉片滑牛羊肉片鮮雞件鱔片豆卜蘿白茹菇類咩都有。連譚魚頭名物水晶包最近居然都有，冇奶皇但有豆沙、蓮蓉同素菜3款，試咗豆沙，好味！鮮蝦加14蚊有七隻，唔算大隻但爽甜！鐘意嘅亦可以加$$點三文魚、象拔蚌等海鮮，唔算貴。不過今次冇點任何海鮮，剩係湯底加3位人頭茶芥加一每人實收HK$140，我地七點坐到十點，有好多部電視，我個friend仲睇埋劇集至走，夜晚仲有波睇！當晚少少爆場但唔見人等位，冇熄爐趕客(平日呀，假日唔敢講)，咁嘅價錢咁多選擇質素ok招呼唔錯，夫復何求？！雖然冇咗20 coupon送，但我會繼續幫趁，如果任點嗰個菜單可以keep住有新o野就更好！…Read More

繼第一蟹幫趁老字號上海老三陽後，見廣隆行亦有不少捧場客，姑且一試！實行買一公一乸，自己同自己撐檯腳...店員一邊在柜旁邊為剛到貨的蟹乸噴水，店前都有三四個揀緊蟹。多數人買280-260一斤嘅，但見價格由$100 /3隻，至最貴$360一斤都有，店員話係太湖嘅貨。一於對自己好D，買$360一斤的蟹皇試試先！請店員代勞揀一公一乸，佢揀完攞出黎俾我睇，見D蟹凍到眼仔唔係幾識郁...但腳仔仲好有反應，總值二百六，隻公有成七両，ok啦...紫蘇、醋、紅糖同薑例牌係送嘅。收現金EPS或credit card，半籮以上有平，俾錢其間亦聽到有客人由沙田打黎訂蟹，好似仲有得送貨添！名片後有教蒸蟹方法，不外乎係洗淨反轉連紫蘇，隔水蒸20分鐘，冇乜技術。返到屋企即刻蒸，佢送嘅紫蘇好香，一蒸起真係香到全屋都聞到。先蒸試隻乸，個肚唔白嘅(淺黃色)，但肉幾香，唔算好甜。膏ok多但唔爆，都好甘香。至於隻公，肉ok香甜，亦十分多膏，透明膏幾多但較實，不黏口，香味普通，味甘。合格啦！食得好慢...一隻食足成個鐘...係時候煮薑茶啦！佢俾嗰舊薑細到...仲細過一隻雞蛋...咩事咁孤寒？薑好貴咩？上海老三陽俾嘅紅糖係淡橙色，佢嗰D好深色，直情係啡黑色煮起好淡...唔夠薑又唔甜...奇怪...下次...我都幫趁返上海老三陽…Read More

一早想試下自己蒸大閘蟹，事前上黎睇睇大家有咩推介，見老三陽評價最高又近我。好！就去買幾隻同老豆擦餐飽。揀東太湖出品$320一斤，幫我揀蟹嘅老伙記話依家嘅蟹最靚，其實唔使點揀。兩公一乸索價$300，點計都抵過出街食！最爽係提供埋紫蘇葉、薑、蟹醋同紅糖，$15買埋套蟹剪，perfect！返到屋企同蟹蟹洗白白，佢地隻隻到好乾淨，仲眼斬斬，果然生猛！老豆寒底加上年時漸高，食一隻！哈哈，我有兩隻！先開左隻大成兩個碼嘅公，唔，未至於爆羔，但都好靚好金黃，對辨！由於上週開始轉涼，透明羔開始多，十分甘香！掛住食，完全冇留意老豆嗰隻咩環境，但佢話都可以。我同老豆兩個密密手食蟹，一言不發，食素嘅媽咪對住個雜菜煲，全程俾我地悶死。公嘅KO後，轉戰待至微涼的蟹乸，細隻好多，但反而爆羔！橙紅色結實注滿蟹蓋蟹身，甘香的軟羔加上結實的硬羔，正到爆！跟手煮好驅寒暖胃的紅糖薑茶同老豆媽咪分享，完美的一餐！對於冇咩廚藝可言的我，也能輕鬆應付，我以後都會多D買返屋企同朋友家人分享！…Read More

上星期四初試小辣椒挑起辣根，趁星期六晚男友得閒，捉佢再戰雲貴川！一早上黎OpenRice 印地圖，貼心的功能，抵讚！七點零鐘去到，得四張枱仔十六個位，要等。咁唔起眼嘅鋪，居然爆到咁，仲車輪轉咁有人買外賣，等兩張桌啫...好！我等！十幾廿分鐘後，入去坐低，見同枱對面兩位小姐流食到眼濕濕，鼻塞塞咁...哈佢地碗米綫係清湯黎喎，加碟青椒皮蛋同口水雞就搞成咁？真唔真呀？青椒皮蛋咁吸引，點都試試，加個大辣口水雞、大辣水煮牛肉同埋三絲冷麵...但做川菜居然冇蒜泥白肉，奇！等左十五分鐘，口水雞先上碟，好餓請去第二間，因為聞其他食客言外賣一樣要等，呢度慢工出細貨。35蚊居然近半隻雞，份量十足，對面兩位小姐個口水雞明顯唔係大辣，因為雞肉上面唔似我哋咁多花椒辣椒...佢兩個食著其他完全唔辣嘅野都咁感動...等我試試先...雞幾滑，汁勁麻勁香，好入味。食左5分鐘，男友開始頂唔順，越食越麻。對面小姐們睇到眼都突埋，哈，唔理，繼續食！青椒皮蛋上枱，同之前食評D相見到嘅一樣，晶凝通透，唔辣，但隻隻溏心，好味！兩個人食幾漏，不過都差唔多清晒！中途對面轉左另外兩名女子，剩叫兩碗粉，一個清湯，一個考慮一輪決定勇試「小」辣，唔明，怕辣做咩要幫趁呢度？三絲冷麵四川版原來係冇麻醬嘅？冇理由...唔怪得問我要幾辣，同上海鋪食到嘅做法唔同，呢個要咗小辣，有火腿同芽菜但係點解冇雞絲？咁咪唔係「三絲」囉？都係鐘意上海式麻醬好味D！同枱女子目睹跟住上枱水煮牛肉，嚇到傻！佢碗「小辣」米綫下場係勁咳，要加3蚊倒左D湯換清湯...水煮牛肉35蚊同樣係大堆頭！比上星期四食小辣椒，肉嘅份量多三倍！不過...賣相唔係幾對路...平時食開水煮牛肉，個汁係深紅油帶透明，浮滿花椒指天椒剁椒。佢個汁係橙色嘅一層油，唔透明，牛肉還牛肉汁還汁，熱，少少辣，但冇乜味，唔麻唔滑，失望！份量超大但呢質素個係唔合格！:( 男友食口水雞的麻辣未散，試完一件都覺得唔多辣，又唔好食。本住唔想浪費嘅原則，儘量食，男友勁冇義氣，唔多肯食，反應同食小辣椒爭住夾完全相反！反而杯凍奶茶好得呀，茶香奶滑勁冰凍，解辣一流，散叫10蚊一杯，飲完一杯再encore！坐就一定唔係舒服，上菜好慢，有個兩個侍應其中一個超級遊魂，完全唔知做緊乜！論價錢係抵，埋單一百四十幾，好飽！不過食物方面，我覺得小辣椒好D。口水雞我認為咸左，不過男友勁讚，可以再食不過唔會再叫水煮牛肉囉！其他枱有人叫夫妻肺片話得，主打自選料配米綫/紅薯粉/擔擔麵，哈哈選配擔擔麵嘅聽講唔係用擔擔麵湯底，只係用同一種麵。真係要担担麵要講清楚，不過...如果真係做担担麵...冇理由冇麻醬！同場加映辣到嘔：隔離枱有位中年女士，帶十幾歲嘅女同得幾歲嘅仔食黎，睇唔到佢叫左咩，但個仔食到走出門口嘔，真係辣到嘔...唉，個仔咁細，呀媽居然等佢嘔完留佢喺門口坐，自己入去繼續食，搞錯！…Read More

上星期四晚上十點幾，同男友一齊試食小辣椒。銅鑼灣滿江紅冇咗，港島區似樣嘅川菜實在難求！唔係住北角，地點有小小難搵，好彩男友識去。好多野想試，先叫左招牌水煮牛肉同埋蒜泥白肉，加個靚仔！水煮牛肉確係正！一上桌見紅紅的辣椒辣油花椒，香氣撲鼻！一入口，夠香、麻、熨、滑！辣就一般。88蚊份量偏少，唔夠喉！個汁非常惹味，牛肉十分鐘內極速清晒，連入面嘅小棠菜都食埋。係，小棠菜比較奇怪，不過都好味。蒜泥白肉35蚊，唔夠蒜泥，味道ok，唔算太肥，亦夠香！份量亦唔算多，每人三片左右，不過墊底有索滿蒜香辣汁嘅粉皮，又係幾分鐘清晒！「雀」一聲食完兩個餸，但個飯未食晒，男友再order口水雞。又係35蚊。雞幾入味，不過亦係唔算大份，輕易KO！最後加多個豆沙窩餅，新鮮炸起唔算好油，外皮夠脆但豆沙唔靚，失敗！早知過隔離食甜品好過。環境富祖國風味，侍應同其他桌客人同聲同氣，係大陸同胞。洗手間清潔程度尚可，有電視，夜晚唔多人招呼ok啦。埋單一百七十幾，同男友都覺得ok，可以約嗜辣朋友ENCORE。香港食川菜真係冇乜選擇，呢間都可以接受。下次要試下水煮桂花辣子雞、麻辣火鍋...開到零晨5點，宵夜或者夜食飯唔怕HEAVY都幾正！…Read More