lemhauyin's Profile

呢間燒肉難食到爆炸，啲牛全部係佳寶急凍牛質素，仲難食過翻大陸，同燒肉LXKE完全無得比。醬汁有幾款畀你任擠，但啲汁全部都係伏嘅，燒肉汁係酸的⋯⋯個湯係蕃茄牛肉湯不過不失。食到一半開始超大油煙，成間舖煙霧瀰漫咁。成張枱都有少少油淋淋嘅感覺，未至於好嚴重，但係唔似係一般正常香港食日式燒肉嘅質素。雖然佢唔係好貴，但係真係食到唔想食。。。我嗌咗壽喜燒燒牛扒牛五花套餐好難食⋯⋯另外嗌咗牛舌牛肩肉同澳洲M5牛胸腹套餐都係超級難食。總之冇樣嘢係好食。。。我諗其他人嚟都係為咗食一口價$148任食燒肉，其他套餐都係伏嘅唔洗試了。…Read More

今日同朋友嚟試吓呢間新開嘅餐廳，位於美麗華商場一期，好方便。一入門口已經被裝修驚艷到，算係幾高級嘅地方，好彩今日嚟唔算太多人太嘈，整體環境好舒服。而我哋揀咗坐Outdoor諗住有Feel啲，始終唔係間間餐廳都有Outdoor位咁正～侍應服務態度唔錯，畀到好開心嘅感覺我哋。可能因為餐廳新開，暫時仲未有Dinner Set Menu，而 à la carte menu又唔算好多嘢揀，比起平時食開嘅泰國菜同泰式Cafe嚟講算少嘢食。頭盆嗌咗泰燒汁八爪魚，睇英文menu就知有西瓜，覺得好有趣。不過個人認為八爪魚同西瓜嘅味道唔係好夾，而且調味都唔係咁大眾口味：小食我哋嗌咗炭燒沙嗤拼盤，本身已經喺串燒上面沾滿左沙嗲汁，所以味道都好足夠，色香味俱全。肉質都非常之嫩滑，真係幾好食，但係略嫌貴咗少少：然後就到我哋最期待嘅香茅檸檬葉烤魚。首先香茅檸檬汁調配得非常之好、超級開胃，帶點鮮甜味，配埋烤魚一流！而烤魚嘅魚皮吼得非常之酥脆，肉質保留到鮮嫩感，一啲都唔老，我係我食過最好食嘅檸檬魚！要飲食均衡，梗係要帶返一碟菜啦！馬拉藎炒通菜用咗石鍋上碟，可以保持返溫度，就算坐喺室外都唔會咁快凍，熱辣辣嘅通菜真係好好食！呢個馬拉盞通菜係一啲都唔辣嘅，調味比較鹹少少：菠蘿炒飯嘅擺盤雖然冇乜驚喜，不過都粒粒分明，口感唔錯。而且好特別加咗臘腸，比起平時食嘅泰式菠蘿炒飯多咗一陣港式香味。不過價錢嚟講，我覺得太細碟，又冇整個菠蘿，唔係咁抵食：最後甜品芒果糯米飯同黑糖椰子雪糕，味道麻麻哋。芒果糯米飯冇乜芒果粒反而好多柚子肉，但係啲糯米飯超級硬，唔係咁好食，反而芒果糯米飯送咗兩球香蕉雪糕超級好食，係我食過最好食嘅香蕉雪糕。黑糖椰子雪糕反而有啲驚喜，比較有層次感，值得一試。…Read More

第二次同親戚一齊嚟打邊爐。呢道裝修又好，坐得舒服，服務態度良好，而且上菜都算快。一坐低唔少得嗌翻個鹹蛋炸魚皮同埋炸蝦餅，香口美味！今次嗌多咗啲蒸海鮮，全部都好新鮮好好味！蒜蓉開邊龍蝦: 蒜蓉粉絲扇貝清蒸東星班豉汁蒸鱔 (喜歡食鱔嘅朋友一定要試！邊爐嘅湯頭好正，唔少得手切肥牛、生蠔等，而咁Surprise係佢嘅手打墨魚滑、蝦滑、豬肉滑、鯪魚滑！好好食呀花膠雞湯手切潮汕肥牛大大隻美國蠔超彈牙四寶！全部都好好味！仲未飽嘅話，記得嗌翻個拉麵呀！好好食！！…Read More

今日同朋友嚟食呢間法國特色嘅西餐廳。首先佢地理位置少遠，唔係好近地鐵站，如果著高爭鞋會攰死，而且佢唔算係Fine dining，我諗causal啲去食都ok～首先坐底後佢會問你飲Still Water or Sparkling Water，係無免費Tap Water，所以2位朋友就叫咗$30任飲水，我就嗌咗杯Americano (幾好飲。之後就會上包同牛油，嗰塊包真係好硬好韌，牙較少啲力都咬唔到我哋嗌咗牛骨，好特別，可以用嚟送麵包，偏鹹，但都幾好食，有滿滿嘅骨膠原，不過都好肥吓洋蔥湯幾有層次，係焦糖化嘅洋蔥但係完全冇燶味，算係我飲過數一數二好飲嘅洋蔥湯。不過佢真係幾鹹，我自己鍾意食鹹嘢，所以覺得冇乜所謂，但係友人已經覺得太鹹，飲咗兩啖就唔飲。田螺係純粹橄欖油漬嘅調味，個人認為有少少失望。田螺肉好肥好大粒，但係個調味真係太普通，之前食過法國私房菜嘅調味比較特別，所以呢個都比下去。Main Course我地嗌咗鴨肉同八爪魚，詳細有啲咩調味料都唔係好記得，不過鴨肉幾嫩口，但係鴨肉嘅皮整得麻麻地。八爪魚剩係得尾部比較入味，但係個汁都係好鹹⋯⋯有機會嘅話我哋應該揀生牛面頰或者其他款式。最後走到我哋嘅甜品，百香果焦糖燉蛋！真係非常之特別，從來都冇見過呢一個整法，百香果酸酸甜甜，非常之開胃，焦糖做得好脆，燉蛋偏向奶滑口感，值得一試！…Read More

今日晚餐去咗呢間火鍋店食～嗌咗鹹蛋黃魚皮、雞煲、東星班、火鍋～首先小食鹹蛋黃炸魚皮真係好好食，本身諗住冇乜特別冇影到相，但係食落真係好香口好惹味！然後就食咗雞煲先，我地嗌咗小辣，麻辣雞真係好好食好滑！加咗白鱔倍添滋味同口感，個汁好食到要撈飯！之後就食咗條清蒸東星班，好爽滑，本身唔係好鍾意食魚嘅，我都食咗五份一！最後，我哋叫咗個皮蛋芫荽魚湯火鍋，一開頭飲咗啖湯先～好足料超級清甜！之後再加湯，點咗一大份牛頸脊～高質手切牛肉嚟，真係好難喺出邊食到！總括嚟講真係好好食，會再食！…Read More

知道呀Jer開咗Cafe即刻約朋友喺假期嚟試一試。裝修幾獨特有Feel～嚟打卡確實不錯好評：1. 食物質素唔錯，嗌咗和牛多士同卡邦尼意粉，都好好食！2. 飲品好靚，打卡一流！3. 坐得舒服，幾有空間感。改善之處：1. 環境真係好嘈⋯⋯作為一間咖啡店，廚房洗碗聲、收銀機聲、食客吹水聲，全部Trap喺呢個空間，令人難以放鬆，應該有啲隔音牆吸吓音2. 午夜抹茶雖然靚，但抹茶粉一舊舊，應該要隔篩。口感不佳⋯⋯3. Cafe應該畀人坐耐啲，新開張期間話坐90分鐘都可以嘅，但附近NOC畀你任坐，長遠來說難以有附近住嘅Loyal Customer。4. 點解唔畀人直接入去坐？侍應執枱好慢，有好多空枱都要等15-20分鐘先放人入去，好奇怪。希望可以加以改善…Read More

呢排食太多泰、日、中菜，好想睇吓屋企附近仲有咩好嘢食。見到美孚圖書館附近有韓國菜，即刻入去試吓先！價錢唔算太貴喎，晚餐嗌咗個什錦石鍋飯套餐$108，送牛骨蘿蔔湯，好有韓式風味！仲叫咗辣炒八爪魚$190 (有點貴) 同韓式炒粉絲$85，炒粉絲有少少輕微似乾炒牛河嘅味道哈哈～Overall嚟講都幾好食！整體感覺有一種韓式家庭的味道，唔Fancy但好地道嘅裝修，沒太多花樣但具傳統風味嘅韓國菜式。埋單同尖沙咀嗰啲韓國菜價錢差唔多吧，份量都足夠！…Read More

呢間餐廳坐落喺旺角T.O.P.，行完街去食真係好方便！不過最好book定位咁就可以揀卡位坐～地方都幾舒適闊落，裝修一樣好搶眼，啱晒打卡～食物質素方面，比預期中好食～雖然都係創新fusion菜，但非常迎合香港人主流口味～唔洗驚中伏！木瓜蜂蜜花椒奶昔，聽落去好似怪怪地，但入口無想像中咁大衝擊，係夾㗎喎！表層奶蓋好香濃郁芝士味，好正！值得加嘢飲試！炸物拼盤都相當有驚喜！炸豬肉春卷好好食！炸飯波好香香茅/冬陰功味，超開胃，滿滿泰式風味啖啖蟹肉擔擔飯，其實好似花生醬Risotto 幾好食嘅好多蟹肉，但試一次就夠呢個青咖喱石班PIZZA好食到不得了！係今晚Fusion泰國菜嘅MVP！魚好滑，少少辣，青咖喱同薄餅好夾！！但略嫌有少少太油～…Read More

下午茶時間4:00行入舖頭，一個客人都冇，廚房都冇人，我仲以為未開舖～諗諗吓呢個真係唔係食拉麵嘅時候，不過太懷念博多拉麵，餐廳又坐得舒服～就坐底咗空無一人的環境：味噌蝦湯底，超香濃…Read More

今日係復活節假星期六，預咗會排長龍，11:30am Open，11:45am 攞飛，1:15pm入座，足足等咗1.5hours～###環境幾舒適，服務OK，食物質素不錯。不過無乜驚喜～因為復活節公眾假期，今日無午市套餐，冇得平價加配飲品，咖啡一杯接近$50，唯一想試嘅伯爵茶Latte都要$48，放棄了～如果閑日冇咁多人嘅話都值得再來！###值得推介之蒜香蟹肉炒意粉：不過不失之鹹蛋黃薯條：招牌甜品之抹茶梳乎厘班戟：…Read More

喺海港城嘅星期二因為有雙倍優惠Coupon獎賞，真係超多人～但因為太肚餓，而呢間餐廳咁啱唔洗排隊，我地就入咗嚟食午餐。###我地揀咗Outdoor坐，望住海景食午餐真係好享受～順帶一提訂座留位就可以揀到望海景最靚嘅位置啦！不過Outdoor都幾食風，要留意天氣！###我地揀咗午市套餐精選～加咗兩杯Champagne，好享受！咁Luxury嘅午餐啱晒情侶慶祝拍拖好去處！###入口濃郁嘅餐湯：巴馬臣火腿配上香甜蜜瓜：芥末吞拿魚前菜：健康之選蕃茄三文魚天使麵：值得加錢之推介牛扒，真係好好食，有驚喜：甜品～雜莓拿破崙：…Read More

今次同三位朋友嚟到Conrad Hotel食精緻嘅虎年主題下午茶～飲品都幾特別，有新年限定嘅桂花奶茶(熱)同洛神花特飲(凍)。奶茶略嫌細杯咗少少～Scone可能比較啱香港人口味？唔係傳統嘅British Scone，clotted cream做得幾好。新年套餐少不了的「撈起」！係千島醬三文魚沙律～特別推介：鮑魚小點超好食！等嘢食真係等咗好耐，Staff Service都幾好好詳細咁樣介紹有啲咩嘢飲畀我地揀。食物質素作為酒店下午茶來講，都算係幾抵食，fushuion得來相當有創意。其中一個鵝肝蛋糕仔真係幾好食，不過唔記得咗獨立影相～希望將來有機會再嚟食啦！…Read More

喺佐敦行吓行吓，見到逸東酒店地下有間Cafe，下午茶有甜點選擇。圖片海報相當吸引，所以就行咗入去嘆翻個Tea Time～原本下午茶只有甜食，當日巴斯克芝士蛋糕(二人份)已售罄，Pancake同蘋果批又唔係好啱我食⋯⋯最後就揀左All Day Menu嘅蟹肉南瓜意粉同招牌海南雞飯，嗌咗一杯凍朱古力同凍抹茶牛奶。一上菜，不得不題佢嘅擺盆餐具都幾吸睛！兩杯嘢飲都唔錯，走塑無飲管㗎～抹茶牛奶十分香濃，係細杯咗少少⋯⋯凍朱古力就冇乜特別～嚟到咖啡室必備嘅西式主菜：蟹肉南瓜意粉蟹肉份量還好，都夠蟹味，偏鹹。南瓜忌廉汁冇乜南瓜味，唔算香，但意粉質感唔錯，偏粗身。整體來講都幾好食而招牌海南雞飯：擺盆好靚，但份量真係好細！！！海南雞OK，飯味超香濃，好好食！雞湯冇落味精，飲落都覺得幾健康。整體評價還好吧，價錢唔抵。…Read More

成日經過藍田地鐵站，第一次特登行去啟田商場拜訪呢間咖啡店。呢間咖啡店同隔離麵包舖係連舖式經營嘅，不過坐嘅位置都幾舒服，因為啟田商場算係好多人，開放式cafe都幾舒適唔會好騷擾。不過因為坐位有啲少，得三四張枱，我唔夠膽坐咁耐。價錢來講佢都幾合理，係affordable嘅。我嗌一杯cappuccino同一份牛油果車厘茄包+煙三文魚。佢杯咖啡比較細杯，但係白咖啡來講細細杯已經夠飲啦。而我都好鍾意佢嘅擺盆同餐具。咖啡偏奶多，Creamy，奶泡比例啱啱好，咖啡唔酸唔苦，如果想品嚐咖啡豆就嗌翻black coffee會好啲。份三文治真係好好食，好鬆軟嘅麵包偏甜，非常鬆軟，牛油果都好新鮮，好多連鎖咖啡店嘅牛油果餐點都係有種「整定」嘅感覺，但佢呢個真係好refresh。沙律菜都幾多調味Dressing。我平時好憎食醒同埋呢種生菜沙律，但係佢呢個有個好refresh嘅感覺，我食得津津有味非常之滿足！而且咖啡師哥哥幾靚仔😂又好nice，加分…Read More

呢間拉麵店開左咁耐我一直都冇機會試，但今次入嚟食絕對有驚喜，我亦都會帶朋友同屋企人過嚟試吓！同其他過江龍拉麵店一樣，睇佢餐牌嘅名係唔知咩拉麵嚟，不過佢都好貼心咁有大餐牌Key左拉麵圖同簡而精嘅說明。我揀左因為我想食重口味少少，有蛋，又唔想要咁多肉，就揀左黑蒜熟成濃湯拉麵。首先佢個湯底飲落去層次感真係好豐富。碗麵有蒜片、蒜蓉、香蔥、菜(應該係菠菜?)、雞蛋、$1叉燒、柚子皮。睇返佢餐廳嘅介紹先知原來佢係由東京渋谷傳過嚟㗎，融會咗全日本名拉麵派系嘅特色，研製出佢哋有多餘沙地到口味嘅新派。湯底味道非常之有層次感好特別，相對地冇咁似平時食嘅單純豬骨湯底拉麵、鹽湯、醬油、味增，而係一個fushion版。我睇其他留言話食落去有浸鹼水味，不過我醒起喺日本九州由布院一間小店食個拉麵都係有呢隻味，相信係因為咁啲麵質特別爽口彈牙又吸晒啲湯汁！可能因為香港人平時食開嘅味道唔係咁，所以有啲接受唔到。我覺得佢嘅味道比較似東京，所以可能會有令人諗起出前一丁嘅味精味，但係其實係出前一丁仿製東京拉麵嘅湯底喎！另外佢枱上面嘅味增醬好正。不過我更加鍾意佢嘅柚子胡椒，真係exactly同九州食嘅模一樣。因為我個人係唔食梅子嘅我就冇試到梅子醬，不過我相信值得一試嘅！但係帶返個頭盔，拉麵湯底間間都唔同，唔係符合所有人嘅口味，尤其是喺香港食開嘅拉麵都唔係呢種湯口，所以可以抱住一個嘗鮮嘅心態去試！…Read More