為食小美儀's Profile

上星期見到呢間新開越南嘢，而我又一向鍾意食越南河粉，間嘢又標榜無味精，星期日lunch 一於去試下。可能大家都諗住試新嘢，大約12點幾去到已坐8成滿。叫左個越式葱牛肉飯同生牛肉牛丸河粉，餐飲加錢要左一杯青檸梳打同咖啡。之前到大中間Pho 食，記得咖啡係杯越式滴餾咖啡，令人回味。嗌餐飲時問過店員咖啡係唔係越式滴餾咖啡，店員答一定係（要加$5），一於成交。新裝修環境唔錯。店員有禮貌嘅，態度唔錯。可能樓面得兩個人，我落單時要求俾個碗仔一陣俾阿女食飯，但樓面轉頭唔記得左，提左次都有攞黎。服務方面都ok。啲食物黎喇，中伏！杯咖啡係G7咖啡粉開的味道，都唔係滴餾咖啡嗰個味，仲要係跟餐加$5個牛肉飯似吉野家的日式牛肉飯，牛肉over cook 好乾，偏甜，暖但唔夠熱。最奇怪係啲炸乾葱同無味的酸蘿蔔絲。不過好快到，而阿女又好肚餓，未影相前已食左半碟飯，牛肉太靭係大人食。個河粉黎喇，牛丸有兩粒，唔差。蘿蔔夠淋，唔差。個河粉叫做有味過個飯。湯底偏甜，無魚露的鮮味，唔夠咸，湯係暖嘅唔夠熱。我見唔夠咸又無魚露味，所以加左啲枱面撈蒙粉嘅汁。跟住個湯好奇怪有香茅碎，食入口每啖都有香茅碎，阿女試左啖之後完全唔肯食。唔知係個湯有香茅碎定係枱面支撈蒙粉汁。唯一可取係杯青檸梳打幾好味，有足一個青檸，好香青檸味阿女唔想再食，唔夠飽，嚷著要走。店員問啲食物好唔好味，我話失望。走嘅時候在門口有位似是做廚的阿嬸問我地好唔好食，我都直言講返晒上面嘅嘢。佢竟然話魚露咪放左在枱面囉、唔夠咸係因為無落味精我地食唔慣。我對味精有心悸手震反應的，一向討厭味精。但呢位廚咁答原來唔欣賞佢地嘅食物係我嘅錯咁...總之一句：無下次…Read More

有朋友生日，見好多食評大讚呢間天機棧o的食物好味，尤其心太軟，故此訂位同朋友慶祝生日。環境幾舒服，情調又未至於話好好，一般cafe 的水準。點左一個二人套餐$238，頭盤share 左一個芒果蝦沙律同焗香草扇貝。一食個扇貝覺得好掂，有薯蓉焗，好似食焗田螺咁既味，幾特別的fusion菜；沙律夠凍而且沙律醬份量剛剛好。頭盤俾我的印象幾好，值7分。餐湯有牛尾湯、忌廉湯同羅宋湯，我揀左牛尾湯，好多蔬菜粒，最得意係有薏米，真係fusion。但好可惜o的湯好淡味，冇牛尾味，亦冇蔬菜味。至於忌廉湯，除左有麵粉味外就冇其他味。我只可以俾4分。輪到主菜喇！一個大蝦雞扒同鵝肝燒牛柳(7成熟)。先講大蝦雞扒，大蝦都幾大隻，食落ok，有少少乾，但唔蝦的鮮味好淡；雞扒煎得乾身，沒有油，但好似食雞胸咁冇乜雞肉味。我只可以俾5分。至於鵝肝，薄薄一片放在一片法包上，淋了草莓汁。o的草莓汁好香，但鵝肝完全冇味。燒牛柳好淋，唔靭，亦都剛剛7成熟冇overcook。侍應給了一小碟mustard。mustard 的味頗濃，牛柳好像沒有味的，我還以為mustard 的味太濃而蓋過了牛味。再試一口牛柳，今次沒有配mustard亦沒有醬汁，但很可惜牛味很淡。很令人失望的主菜，只值4.5分。甜品︰心太軟及blueberry cheesecake。cheesecake沒有一粒粒藍莓肉的果餡，只是將藍莓果醬加魚膠粉煮，沒有口感亦不夠香；cheesecake 的texture有點怪，唔濃味亦有o的鬆軟的焗芝士餅，有o的似italian tomato的輕芝士蛋糕，感覺有o的怪，但尚算ok。心太軟就冇預期中好。與市面餐廳提供的一樣，只是將朱古力蛋糕漿唔焗到熟透，令朱古力麵糊由蛋糕心流出來，而非將軟朱古力釀入蛋糕去焗。(因為兩種不同做法所流出來的朱古力漿的口感同味道係完全兩回事的)未食既時候已經有朱古力漿在近底部流出黎。食落只係暖唔係熱，幸好的係夠朱古力味。友人話甜品可以俾7分，但我就只能俾6分。最後就係餐飲，我們叫左熱即磨咖啡，係全個餐令我最滿意的。咖啡夠香亦夠滑，我沒有加糖也很好飲，唔會覺得苦。值7分。整體可以係剛剛合格，但以呢個價錢($238加一)就一o的都唔值，出面仲有好多選擇。可見既將來都唔會再幫襯喇！…Read More

上星期五，5個女孩子選了這間pizza express 進行聚會。踏進餐廳，我以為自己身在外國，燈光悠和，裝修很有歐陸的簡潔風格，沒有高格調，但卻有一種舒服的感覺。最令人感到置身於外國的是侍應們是用英語溝通，還有餐廳內有一半的客人是外國人。我想既然這麼多外國人光顧，食物應該正宗。坐下來，我們點了四季pizza、焗磨菇、pizza express salad、italia焗蕃茄、芝士焗菠菜麵卷及芝士雜菌麵包。焗磨菇非常美味，磨菇很fresh很juicy，完全沒有菌類的霉味，碟邊有6粒doughnut，很可愛。個人認為不加漿汁最為美味。(必吃推介)芝士雜菌焗麵包很似香港pizza hut的厚批pizza，味道不錯。italia焗蕃茄配有羊奶芝士、香草汁及火箭菜，蕃茄很fresh，配上奶味香濃的羊奶芝士，令人期待主菜的來臨。(誠意推介)salad的用料新鮮，很清新。pizza是正宗意大利的pizza，不似得pizza hut 出品的麵包。可是今次我們點的四季pizza太咸，大打折扣。芝士焗菠菜麵卷非常特別，而且豐富的芝士令整道菜很creamy。大家也很喜愛此菜。最後到甜品出場的時候。首先的是openrice 的coupon所贈送的朱古力蛋糕。只是普通的朱古力味海綿蛋糕加朱古力漿，不值一提。但伴碟的雲尼拿雪糕很香滑，內含雲尼拿豆莢的籽，雲尼拿味香濃得很。友人喜歡吃tiramisu，故特別點了。此tiramisu的酒味很濃，十足意大利地道tiramisu。最後的香蕉批很香甜，令人有一種戀愛的甜蜜感覺，為我在是次的晚餐畫上完美句號。…Read More

聞名不如見面，假日下午在佐敦行完書室，很想吃糖水，尤其是芝麻糊，於是尋找這間朋友介紹的糖水店。坐下我叫了一碗熱芝麻糊，朋友叫了一碗熱綠豆沙。先講綠豆沙，綠豆味香，但略嫌太水，欠缺臭草，加上內裡有西米，始終不太像綠豆沙。至於碗熱芝麻糊簡直一流，端出來在枱上已經聞到好香的芝麻糊味，色澤黑中帶少許芝麻油所反射的灰色光澤，很夠油潤，足以證明這是生磨的芝麻糊，並非像坊間的用粉開。入口芝麻味香濃，而且稠度適中，很幼滑。吃完後那芝麻的香味仍然停留在口中，我搭了兩個站的地鐵，口中的芝麻味才開始變淡。連我朋友不愛吃芝麻糊的都後悔叫了綠豆沙而沒有叫芝麻糊呢！下次要試杏仁糊及合桃糊！…Read More

近來好想食黑白(芝麻糊豆腐花)，見食評有好多人讚呢間的芝麻糊好香好滑，又聽講話呢間在after 5對面的直街開左新分店，於是黎試下，點知...入到去地方闊落乾淨，坐得幾舒服，第一個觀感幾好的。睇餐牌，咦，呢度唔係淨做甜品的，有飯食，心知不妙喇。如果唔係專做一類食物，通常會因食品種類太多以致質素普通。當我碗黑白黎到時，所有期望都破滅了。首先，碗黑白係有好多芝麻糊，豆腐花只得兩片咁大把，食左4-5匙就冇晒；第二o的豆腐花唔滑，亦唔夠豆香；第三係o的芝麻糊雖然稠度適中但唔香，好明顯係用芝麻糊粉煮出黎的。但以上都唔係致命傷，最致命的係俾我食到煮芝麻糊煮得太耐在面頭凝固的半固體的糊，同埋一細舊煮熟左未溶開的芝麻糊粉。失望之餘亦覺自己有o的黑仔>_< …Read More

上年黎呢間試過o的野食幾好味，上半年差唔多每個月都有幫襯。最鍾意食呢度的火灸壽司，系列中的火灸帶子壽司最得我心。但唔知點解下半年冇左，結果少左幫襯。上星期五同教會o的朋友食飯，我向佢推介呢間，發現火灸壽司回歸。(但好可惜我的最愛火灸芝士忌廉汁帶子壽司冇左，由火灸牛油帶子壽司頂上。)當晚我地都食左好多野︰火灸牛油帶子壽司(推介) -- 帶子好鮮甜，火灸的時間掌握得唔錯，但質地淋身的帶子配牛油黎火灸就較為膩，都係配芝士match，扣少少分，我俾佢8分啦。火龍卷(必食) -- 炸蝦的壽司卷，炸蝦好香，值9分。炸雞軟骨-- 好香口，但比以前好左好多油，退步左，值7分。五味炒飯-- 普通日式炒飯，落左五味粉炒，味道ok，我俾6分。軟殼蟹三文魚壽司卷-- 用料新鮮，好味！8分蟹籽沙律-- 以前好大碗又好多蟹籽，但而家少左1/3，冇咁抵食。6分九州拉麵-- 拉麵同湯只係普通，不過有驚喜，就係俾我遇到溏心蛋(平時出面食的拉麵只係半隻烚熟的雞蛋)，可以加分。7分燒魷魚-- 有魷魚香，但仍屬普通貨色。7分魚生飯-- 魚生新鮮，但切得唔夠厚身。7分(友人話富山的魚生飯好味o的)三文魚壽司-- 長長的拖尾，三文魚新鮮，唔錯！(但厚度只係山林道的大勝的出品一半。)8分鹽燒三文魚頭-- 最後意猶未盡先至嗌，見係特價($22)。對我黎講反而係全晚的高潮，估唔到咁好味！外表燒得好脆，內裡的肉質嫩滑加甘香的魚油，超正！10分今次冇食到甘蝦壽司添！佢地o的甘蝦係比出面的大隻架，而個蝦頭有好甘香的羔添。唯有下次再食過。今餐食得好飽，每人只係$72蚊，好抵食，亦好好味，好滿足啊！…Read More

次次去長洲玩都一定會黎食紅豆糕同魚蛋。大大粒的魚蛋加左價$5.5兩粒，爽口有魚肉的鮮味。o的糕都加左價，$12 三件，但仍然好大件頭，都算抵食。今次揀左紅豆糕、奶皇糕同芝麻糕。紅豆糕保持一貫的傳統風味，夠香滑；奶皇糕起初食時好味，但食多兩啖就有o的漏；芝麻糕今次失晒水準，以前食係好香濃芝麻味的同時亦清甜，但今次食好似冇落到糖咁，仲食到芝麻本身的咸味。大失所望。…Read More

入到長洲天氣愈來愈凍，因而放棄食海鮮轉而黎食小菜。睇過食評，一心黎試下咸菜胡椒豬肚煲($40)。等左大約5分鐘，終於有得試喇！個煲都唔細，有成7碗咁多，個湯好夠胡椒味，食到底有唔少碎胡椒粒添，夠晒驅寒！個煲好多豬肚，豬肚唔腥，好味！唯獨o的咸酸菜煲得太淋，好似煲完湯既西洋菜咁淋。如果o的咸酸菜爽返o的，份量又加多o的就perfect！同朋友兩個人食，所以點左個沙拉骨($40)送飯同埋炒時菜($40)。沙拉骨新鮮整起時夠晒鑊氣，好夠沙律醬，酸酸味味，送飯一流！可惜天氣凍，加上兩個人食唔晒，所以凍左就覺得有o的膩。至於炒時菜，我未試過食小菜可以有咁多時菜的選擇。可能係因為多人打邊爐，連帶炒時菜都有白菜仔、菜心、芥蘭、蓎蒿同西洋菜選擇。點左個蒜蓉炒蓎蒿，食落發現都幾大碟，而且好清冇乜油，非常好味！尾聲黎杯檸樂煲薑($13)，估唔到佢地用平時凍飲的大杯去裝，好驚喜！唔單只大杯，連料都多，檸檬有4塊，薑都有3大片，夠晒出味添。旁邊好多人都打邊爐，傳來陣陣既沙爹湯底香味，遲o的要黎試下打邊爐。…Read More

之前一路有食開佢o的日式紅豆餅，一向都比出面的多餡料、外皮香脆裡面軟熟。今次黎長洲玩，第一樣食既野就係紅豆餅，可惜係預先整好存在保溫箱內，唔夠新鮮之餘外皮亦已經焗淋左，口感欠奉，味道都有少少刺口，同時亦令到賣相欠佳(好似俾其他餅壓到變左形)。食落仍然好多紅豆餡，紅豆餡的水準保持到，甜度o岩o岩好，唔會覺得漏。如果可以的話，我情願等耐o的去買一個新鮮熱騰騰的紅豆餅，好過買一個即時有但焗淋左的紅豆餅。…Read More

經過兩日一夜在長洲的假期，臨離開前諗住食個lunch先去搭船。呢間張記的魚蛋粉在長洲已有50年歷史，可以話係老字號，店舖的裝修好有以前香港的感覺。食左一個魚蛋米($17)，米粉略嫌硬左少少，可以烚多1分鐘，份量比出面少，但對keep fit緊的女仔黎講夠食；魚蛋細細粒，魚味鮮甜而且夠彈牙，但魚片就切得好薄，唔知係咪游說人去食片頭粉($20)；湯好鮮味冇味精，單飲就好好味，但浸米粉黎食就令o的米粉唔夠咸。同朋友share左一碟油菜($14)，只得生菜，阿姐幾細心問我地要蠔油定係腩汁。不過淋腩汁的油菜o的腩汁味怪怪地，唔似牛腩味，又唔似豉油味。整體黎講不過不失。…Read More

情人節，本來想同個fd去旺角o的cafe 食飯，點知心儀的cafe天機棧fully booked，心血來潮想食煲仔飯。上網見好多人都大讚呢間雲興隆小廚o的煲仔飯，結果放工之後就去試。夜晚7點去到牛頭角下村，沿住第14座行左大半個圈，終於搵到。幸好我地7點就到，遲3個字就冇卡位坐，如果7點半到的話，直情連位都冇。o的人在情人節通常都會去o的環境靚靚有情調的地方食飯，估唔到呢度都有咁多人黎食喎。我地其實食左好少野，只係嗌左一個咸魚魚腩煲仔飯同埋瑤柱扒豆苗，加兩杯咸柑桔蜜。先講煲仔飯，咸魚係梅香，一掀起煲蓋已經香氣撲鼻，用筷子一夾就散開，入口唔會得個咸字，齒頰留香；魚腩好滑，個飯仲要有成4塊魚腩，好多料；o的飯焦薄薄的一層好脆口，唔似外面的煲仔飯一係冇乜飯焦，一係就太厚而好硬。特別一提的係佢地個豉油咸味同甜油適中，唔會令人覺得太咸或太多糖/味精。豆苗冇乜特別，一般的小菜類，不過要撈勻o的瑤柱獻汁先好食，因為o的汁都頗咸。另外嗌左兩杯熱咸柑桔蜜，都幾好味，有o的似阿媽浸的咸柑桔咁。不過唔知係唔係中途叫野飲，走左之後發現張單好似冇計飲品錢。值得一讚的係o的服務態度好好，好寬容親切，切合晒平民路線。趁仲係冬天會約多幾個fd一齊再食過。…Read More

去完老坑火鍋打邊爐，我地有o的意猶未盡，想坐低傾下計，見食評話紅磡有間糖水舖幾好，於是問路後黎到傳聞話好掂的糖水舖芝麻綠豆。行到門口，咦，有兩間打孖o既？原來都係同一間的，於是我地點左出名的芝麻糊蛋白燉奶、合桃糊、西米露同糖不甩。我自己就食左芝麻蛋白燉奶，面頭有蛋白燉奶，碗中間有一點係芝麻糊，原來有大約1/4碗的芝麻糊在碗底。蛋白燉奶都ok滑，甜味就稍為甜左少少，但質感有o的似許留山的出品，只係比許留山滑少少。之後食中間的芝麻糊，可能因為食過燉奶所以唔覺有甜味，有o的膩的感覺，芝麻味唔夠香，似沖的芝麻糊多過磨的味道。兩者撈埋一齊食，可能係蛋白燉奶的口感較豆腐花滑，反而令人覺得有o的膩。雖然話係自創，但始終都係黑白(芝麻糊搭豆腐花)好味o的。糖不甩就so far so good；聽友人講西米露同合桃糊都算係好味，但只屬一般，沒有留下特別好的印象。整體講，我會覺得呢間唔及大埔間甜品舖rainbow好味，不過價錢就平過rainbow。不過順帶一提，原來我坐的一間舖係冇toilet，要行去隔離間舖。舖內只有兩個獨立的toilet，可惜其中一個維修，結果兩間舖share一個toilet用。…Read More

約左一班義工朋友一齊團年同gather一下，見近兩個星期咁凍，決定去打邊爐。睇見食評大讚呢間火鍋店，一於試下。第一次黎食，冇訂位，幸好老闆娘好nice，在外街開左一圍俾我地。我地一行9個人，決定要一個蕃茄蟹湯底($200)，湯底有一隻大蟹、蕃茄、薯仔、蜆仔、芫茜同蔥。當o的湯滾起，我地每人飲一碗，真係好甜，值9分。經老闆娘的介紹，我地點左o的菜︰皇牌肥牛--超正，雪花牛肉，由於手切，所以肉身較美國肥牛片為厚，更好咬口，食落甘香鬆化，值10分。豬喉嚨定--外貌似牧童笛，幾爽脆，值8分。豬潤、豬腰--刀工好有水準，但我個人唔食的。友人話好新鮮。鮮粉腸--好靭，唔得。珊瑚蚌--好爽，值8分。雜菌--吸左湯底，好甜，值8分。椰菜餃--期望過高，只係一般，值5分。鮮四寶丸--正！味道鮮甜，丸的肉質好彈牙，值9分。鱔片--我個人唔好白鱔但都覺得好甜。刀工好好，每一塊都灼幾下就食得，肉質好脆。值8分。其他仲有生根、粉絲、雜菜(西洋菜、生菜、蓎蒿同油麥)。整體黎講，大家都食得好滿足，值得推介。之後我地去左附近的糖水舖芝麻綠豆食糖水。至於糖水的質素如何？請收睇暖笠笠團年飯之延續篇。…Read More

昨日去灣仔開完會，行經呢間雞蛋仔檔，知道係北角雞蛋仔的分店，有人排隊但又唔算多人，見肚餓，所以就買一底雞蛋仔食。佢o的雞蛋仔好就好在邊位好脆，而雞蛋仔粒粒夠鬆軟而又有咬口，唔似旺角街頭賣既淋淋既粉漿；不過我略嫌蛋味唔夠濃，而且雞蛋仔粒粒只係一半有粉漿，另一半係脆皮殼，中間係通空的，每一口咬落去時都會被脆皮"慘"口，食左半底後我既口都損晒。至於店務員，其態度係可接受既晦氣，可能我冇expect 佢地要好有禮貌啦。總括黎講，呢間的雞蛋仔都ok，但唔突出，在灣仔區可算係一個唔錯既街頭小食的選擇。…Read More

前兩日約左朋友夜晚7點幾去睇戲，心想睇戲前食碗麵填下肚。記得以前曾黎過呢間標記樂園食十蚊碗麵，終是我同朋友一人嗌左碗粉同一碟油菜。但有一個阿姐落單寫錯晒野，而且態度勁差︰1) 我地因為咳而嗌熱菜蜜，個阿姐應完之後俾左兩杯凍菜蜜。我地話要熱唔要凍，佢而家先至話只有凍飲冇熱飲賣。(下，竟然冇熱飲賣？算喇，咁但係冇理由我地落單要熱飲時話唔講只有凍飲。)2) 我嗌左碗香菇豬肉丸米($10)加炸魚皮($3)，點知黎左碗雙併米香菇豬肉丸加魚皮餃米($15)。同個阿姐講我唔係要魚皮餃係炸魚皮，個阿姐仲要發惡話我講唔清楚。幸好我朋友嗌的雙丸河加紫菜同油菜走油就冇事。原來唔止我遇到咁慘既遭遇，隔離有人嗌左雲吞麵就寫錯左做唔記得乜；同枱的男人話要牛腩，佢就猛話牛丸。唉！講真對十蚊碗麵既味道冇乜要求，佢地o的麵既味道都尚可以入口，但個阿姐好似冇聽野，不停落錯單，仲要話個客講錯，以後我都唔再幫襯。…Read More