1437rita's Profile

小朋友放學兩個好似餓鬼上身咁，但呢間甜品舖最好就係有甜品下午茶，可以食甜品加幾蚊有埋飲品，仲可以加埋小食、炸燒賣魚蛋配埋酸辣醬特別惹味，估唔到鹽酥雞同埋蜜糖雞翼都一樣咁好食，難怪見到好多中學生都係呢度食下午茶。我自己就叫咗綠茶麻糬窩夫，新鮮做起外脆內軟，麻糬有拉絲嘅感覺，配埋紅豆同埋煉奶一齊食，份量十足，而且非常好食。小朋友俾心太軟吸引，濃濃嘅朱古力一切開入邊朱古力醬就流出嚟、唔太甜先好味。另外叫咗芋泥椰皇燉蛋白，估唔到咁好食，好香嘅椰青味配埋芋泥好香好滑，再加埋芋圓有好多口感，冬天食感覺零舍滋潤，所以真係唔可以睇小小店，好多都係臥虎藏龍，店舖雖然細，但係食物質素好高值得支持。…Read More

最近天氣開始轉涼，已經心郁郁想食火鍋，咁啱早2日係旺角，就見到近期內地同本港都大熱嘅即開椰子湯底雞煲，立即就入去試吓。餐廳鄰近旺角地鐵站，環境舒適寬敞，完全冇壓迫感；木系風格嘅裝修，用餐氣氛一流，適合一家大細、朋友聚餐。未正式叫野食，就先叫咗一杯百香果香橙水，份量都幾驚人，味道亦相當好，真材實料，有滿滿嘅百香果同新鮮橙汁，解渴一流。當日選擇原味招牌椰子雞湯底，原來採用泰國椰青椰子水做湯底，職員即開鮮椰子倒入鍋中，隨即閒到清香椰子味。及後職員非常熱心，幫忙將文昌雞放入鍋中，利用計時器協助灼熟雞肉。職員先奉上一碗椰子清雞湯，湯底鮮甜美味，一啲都唔油膩，令人想追住飲；雞肉鮮嫩清爽，大人細路都啱食。及後職員再幫忙將竹笙放入椰子雞湯入面，竹笙吸曬椰子雞湯精華，鮮味可口，真係令人食完一片又一片。食火鍋又點可以唔食牛肉呢？當日叫咗特級肥牛，將牛肉放入椰子雞湯中簡單灼熟，牛肉吸曬椰子雞湯嘅鮮甜味，都唔洗特別加醬油，已經一片接一片咁食；湯底加咗牛肉味，味道更為升華，又忍唔住飲多幾啖。而家都市人都追求天然無添加、養生滋補食材，泰國鮮椰青椰子水雞湯，仲唔係「靚雞煲靚湯、營養又健康」。…Read More

沿住海旁行到去酒店附近見到呢間餐廳，樓底好高地方好大，價錢亦都合理，所以我哋就入咗去醫肚，小朋友最鍾意就係食炸雞翼啦，即叫即炸配埋芥末蜜糖醬甜甜地辣辣地，非常開胃。另外叫咗個千層麵，佢比起其他餐廳千層麵特別，因為係用豬肉絲造成，配埋酸椰菜，味道有多種層次，配埋大量芝士，好好味，仲點咗慢煮雞肉漢堡，漢堡份量好大，雞肉亦都好多，要讚一讚餐廳好細心，知道我哋share食，問我哋切四份定兩份，切開食又真係容易好多。食漢堡可以揀配薯條定沙律，小朋友當然係揀薯條亦都即炸，非常香脆。最後見到呢度有幾款甜品選擇，小朋友話好想食窩夫，窩夫配上士多啤梨同埋吉士醬，份量亦都好大份，好好味，唔止小朋友，大人都食得非常滿足。不過餐廳最好係有唔少娛樂設施俾大人同細路玩，大人就可以玩桌球，同埋舊式遊戲機，小朋友可以玩足球機，仲有藍球架俾小朋友食飯之後郁動吓娛樂吓，喺呢間餐廳絕對係有得食又有得玩，開開心心就過咗一個下晝。…Read More

銅鑼灣希慎越嚟越多野食，b2層仲有間坐得舒又高質的日本餐廳。見到餐廳有個推廣，星期一至四18:00後惠顧二人優越套餐，額外送「吞拿魚中腩刺身2件」，我哋就決定去試一試。入到餐廳座位都好闊落，坐得好舒服，點咗一個魚生飯（海膽吞拿魚蓉三文魚子）同埋一個斧飯（厚切牛脷），呢間餐廳原來係日本米料理專門店，嚴選特A級頂尖日本米種及新鮮空運高級食材，難怪佢啲米飯真係特別好味。魚生飯最緊要係刺身夠新鮮，海膽好香濃，配埋吞拿魚蓉係絕配，最配上醬油漬三文魚子，非常好食。斧飯地方可以食到，厚切牛舌好有口感，飯入邊加咗好多雜菌菇，會食一啖飯都特別香濃。另外點咗一碟大大碟嘅軟殼蟹蟹籽沙律，超大隻軟殼蟹好香脆，蟹籽沙律，最緊要夠多沙律醬，超級好食。最後甜品點左24漬半熟法式吐司，係香港極罕有嘅日式做法，厚切麵包用日本赤卵蛋漿浸泡24小時，吐司外層香脆，內裡好似玉子布甸咁鬆軟，淋上蜜糖配埋豆腐雪糕，多重口味衝擊我味蕾，真係好好味。兩個人食咗咁多嘢，埋單都係七百幾蚊，喺銅鑼灣嚟講價錢都算非常大眾化，原來加入會員仲可以儲分換折扣及現金劵，我梗係唔會錯過呢個優惠啦…Read More

尖沙咀好多餐廳可以打邊爐，不過網上見到呢間餐廳裝修好靚好有特色，一於去試吓。最鍾意呢度係一人一爐，乾淨又衛生，我就叫咗個養生湯，朋友叫咗個花膠雞湯，兩個湯都好香好濃郁，可以先飲兩碗先用嚟打邊爐，花膠雞湯嗰條花膠，有成隻手掌咁大，真係超級足料。因為朋友唔食牛嘅關係，所以今日我哋主打食海鮮，啱啱呢度有二人海鮮拼盤，只係$488有海蝦，筆記背，台山蠔，蟶子，最精彩係有兩隻琵琶蝦，都幾抵食，原來呢間餐廳老闆係做海鮮批發，難怪啲海鮮咁新鮮，見到隻蝦仲係生勾勾，扎扎跳滾熟之後真係零舍彈牙，海鮮每次唔會需要滾好耐，全部都好鮮甜，但我最鍾意都係琵琶蝦，好大隻超級鮮甜又多肉，非常好食。呢度仲有爆檸檸檬茶，見到一塊塊檸檬先覺得呢啲先係香港特色檸檬茶，另外仲點咗啲小食，炸蝦丸同埋椒鹽魷魚，全部新鮮炸起，香脆好味。正！…Read More

以前夜晚食過呢間意大利餐廳，上網見到原來知道佢有做brunch，所以一於同婆婆嚟試吓，前菜有好多超新鮮沙律，煙三文魚凍蝦都係正常發揮，不過最有驚喜係Parma Ham，煙肉好香配埋甜甜嘅蜜瓜真係非常好食，我地係食完一嚿又一嚿，一碟又一碟，最正係可以試到呢間餐廳最出名嘅pizza，仲要任食，意大利餐廳Pizza真係特別好食，呢度嘅Pizza出名非常香脆，前菜雖然選擇唔多，不過每一樣嘢都好好食，高質先係最重要。食完前菜我哋就來點主菜，意大利餐一定要食意大利粉，所以我哋Main course就叫咗個手工意粉，同埋慢煮燒雞。手工意粉真係口感零舍好味，羅勒醬汁好特別又唔溜，另外主菜燒雞外皮燒到卜卜脆，入邊肉質依然軟滑，黑松露薯蓉真係食過返尋味，超級好食，食brunch最好就係慢慢食，餐廳望住維港景，唔經唔覺三個幾鐘真係好快過，食完主菜仲有甜品，一定要食Tiramisu，最後嘆埋杯咖啡，今日真係非常滿足下次有機會一定要試埋其他主菜。…Read More

成間餐廳嘅裝修都好有feel，真係有少少好似去咗泰國嘅小店咁樣，都幾適合打卡，不過我連lunch都冇食，快快脆點咗幾樣嘢食先，叫咗個泰式拼盤，有雞翼有蝦餅，新鮮炸起非常香脆可口。另外點咗個特別少少茄子柚子沙律，呢碟真係非常有驚喜，茄子一絲絲嘅口感配埋柚子同埋小小蔬菜一齊食，甜甜酸酸加埋有啲辣，真係非常開胃。小朋友見到雞湯就話想飲，見到佢可以嗌細嘅size就一於點嚟試吓，雞尾真係好香濃而且仲有椰香，又係開胃之前，不過對於小朋友嚟講就好似有少少辣，所以結果我自己一個人飲晒。最後蟹肉炒飯都係嚟醫飽我個肚，呢度炒飯真係好出色，係粒粒分明，有蛋香又有蟹肉鮮甜嘅味道，真係好好味，可惜我真係實在太飽，所以食咗一碗仔，都要打包返屋企食，不過第二日炒返熱佢，依然咁好食，小店就係有呢度好，因為份量十足，而且新鮮做起，全部熱辣辣，下次要試埋其他嘢食先。…Read More

將軍澳越來越多嘢食，原來連燒肉放題都有，見到呢間除咗有和牛，最精彩係有原條慢煮極厚切檸檬牛舌，真係點都要試吓。見到Menu真係好多嘢食，快快脆點咗我最想試嘅食物，就出去自己拎醬汁，同埋有得自己整拌飯，超香嘅蝦乾配香脆嘅紫菜，同埋燒肉一齊食，真係太滿足啦。和牛油脂非常豐富，睇吓幾惹火就知啦，唔使燒好耐一啖一口，連續食十塊和牛嘅感覺原來係咁幸福，另外原條牛脷真係好有心思，有計時器倒數，唔會over cook，燒完之後再俾個鐵板你慢慢切，厚切牛脷食入口真係好有口感，超好食。食得太多牛，食返海鮮中和返，炙烤霸王蝦，有鹽蔥·黑蒜油味，再配埋特製醃料，食得出嘅黑蒜橄欖油同清香鹽蔥味，超好味又彈牙，真係要encore多2次。任食可以任飲先正，水果茶，連啤酒同cocktail都係任飲就係爽😎 cheers 🍻…Read More

呢幾日忽然好想食pizza，家姐就帶咗我去灣仔食呢間正宗意大利菜，兩個人食一個pizza，唔好理肥唔肥，每一啖食到滿滿嘅芝士嗰種感覺真係好幸福。正宗嘅意大利餐廳，除咗一入餐廳需要全程講英文之外，就係坐低就會送上一籃新鮮麵包，配上橄欖油同埋黑醋，麵包非常軟熟，配埋我最愛嘅黑醋真係超好食，好開心。因為我哋真係好想食pizza，所以兩個人食唔到太多嘢，餐前小食點咗蒜香辣油大蝦，香香辣辣特別開胃，大蝦好彈牙。主菜就叫咗一碟蝦湯比木魚柳，除咗濃郁嘅蝦湯做底汁，仲有兩大隻鮮蝦，比目魚滲入晒蝦嘅味道，超好味，魚肉質亦都好軟滑，食多幾啖都唔溜。最後當然就係大大大啖食我最愛嘅水牛芝士蕃茄pizza，水牛芝士唔會好溜但好香，真係每一啖都食到好多嘅芝士醬，超級超級好味，正宗嘅pizza就係厚薄適中， pizza邊焗到非常香脆，大量嘅蕃茄醬配埋芝士，真係食得太開心啦。…Read More

銅鑼灣嘅樓上餐廳好多都係臥虎藏龍，呢間私房菜價錢合理，而且餐廳成個感覺都好高級，最正係自己帶走嚟飲免開瓶費，因為聽日要返工所以都係少飲為妙，不過晚餐都係$600左右一位，可以食到一餐環境靚，高質食材嘅Fine Dining，真係覺得性價比高。頭盤我哋叫咗鮑魚同埋鵝肝，鮑魚慢煮入晒味好有口感，仲有我最愛嘅鵝肝，煎到外皮好香脆，但係入邊係好香嘅鵝肝，外脆內軟嘅感覺，再配埋酸酸甜甜蘋果醬，每一啖都有幸福嘅感覺。主菜叫咗肉眼扒，五成熟剛剛好，仲要份量一啲都唔細，重口味而且肉質好軟熟，另一碟主菜叫咗春雞釀大蝦，原來真係成隻大蝦釀咗喺春雞入邊，賣相真係好特別，入口雞肉保持嫩滑，大蝦亦都彈牙。最後食埋甜品，真係非常滿足嘅一餐，下次一定要帶支酒黎，一邊食飯，一邊飲酒一定更加開心。…Read More

係鰂魚涌地鐵站b出口附近，呢間餐廳仲有我想試咗好耐嘅近期超級大熱嘅卷卷意粉。去到餐廳門口睇吓有咩食先啦，原來有晚市套餐，附送餐湯、熱洋甘菊茶，仲可以加錢食甜品或小食。咁我唔使諗啦，就梗係試吓香煎海蝦龍蝦汁卷卷意粉 ，第一次食真係非常有驚喜，除咗味道濃郁，龍蝦汁配埋大大隻海蝦，最正梗係卷卷意粉，好掛汁，而且口感好好，真係食到停唔到口。另外叫咗一碟惹菌意粉，味道比較清淡但好重菇味，不過呢間餐廳整嘅意粉真係好高質，軟硬度剛剛好，我鍾意比較有咬口嘅意粉，真係做得好出色。我哋兩款小食，一款係粟米片，另一款係炸魷魚條，魷魚條簡直係必食，原來係厚厚嘅魷魚圈切成一條條，外脆內軟，香脆好味。去得Cafe點會唔試埋佢杯咖啡，呢度有好多精品咖啡，同埋每個月都有唔同產地嘅咖啡豆到店，杯咖啡真係好香濃，忍唔住睇吓佢期間限定嘅烘焙咖啡豆，下次試吓其他口味之後可以買包咖啡豆返屋企自己慢慢沖。最後有小朋友喺度梗係忍唔住要叫甜品啦，佢就點咗焦糖布甸，好有日式嘅風味，而我點嘅Tiramisu，簡直令我好驚喜，好Creamy有酒香亦有咖啡香，輕鬆食晒一整杯，今餐真係非常滿足。…Read More

飯氣攻心最啱就飲返杯咖啡提一提神，呢間咖啡店嘅咖啡同事話俾我知，比起大型連鎖店味道更加濃郁，佢哋每人一杯黑咖啡，不過我鍾意甜甜地，就點咗杯咖啡加上蜜糖配燕麥奶，成件事真係非常夾，啱晒我口味，超級好味，開心開心！同埋成間cafe 好有工業風，坐喺度慢慢傾偈，真係幾relax。 我哋幾個同事坐喺度傾偈，都可以唔經唔覺傾咗成個鐘坐得舒服之餘店舖雖然唔大不過亦都有好多位置俾我打卡。餐廳仲有好多唔同種類嘅咖啡豆售賣，我有同事都買過返屋企自己試吓沖，大贊呢度揀嘅咖啡豆真係好高質，等我下次去睇吓揀唔揀到一包返屋企先。#噓上環皇后街30號地舖…Read More

之前已經聽過撈海鮮，不過香港區好似等咗好耐都未見，上星期朋友話我知喺堅尼地城終於可以食到，我哋早早就book咗枱去食呢間西城水產海鮮火鍋，真係好彩有book枱，講真喺香港已經好耐冇見過一間餐廳咁full，全場滿座，出面仲有長長嘅人龍，果然真係超級受歡迎。去到餐廳見到好多水缸，入邊嘅海鮮全部都好生猛，我哋仲可以坐窗口卡位，坐得特別舒服，我就急不及待點咗湯底就諗住去撈海鮮，原來呢度係一人一鍋，我覺得好貼心又衛生，食得零舍安心，另外呢度都有成8款特色湯底咁多：例如藥膳麻辣鍋、金湯花膠雞鍋，我哋就叫咗花膠雞鍋，見到湯底都好濃郁，不過重頭戲就梗係去撈海鮮啦，自己撈完自己食真係請勿特別好玩，除咗撈海鮮之外仲可以任食和牛，同埋唔同肉類、丸子、蔬菜，熟食炸物、酒水甜品全部都可以無限任食，仲要雪糕\飲品全部都係大牌子，連1664 生啤同埋Sapporo 都係啤酒任飲，真係太高興呀。水缸入邊有好多唔同嘅蜆殼類，仲有蝦，鮑魚，東風螺，聖子等等，全部都係超新鮮，不過最精彩都係有大大隻花蟹，撈起之後就可以拎去俾職員清洗，之後就正式開餐，蜆真係大隻又爆汁，蝦有羔，鮑魚夠鮮味彈牙，但最推介真係要食蟹，我同朋友足足食咗六至七隻，未計其他海鮮已經回本啦。隻蟹真係超新鮮又多肉，肉質勁鮮甜，食得非常滿足，我諗只要係鍾意食海鮮嘅人，嚟到呢度一定好開心，同埋只係三百幾蚊真係冇可能唔回本。真正飲飽食醉，買單嘅時候店員仲話俾我知原來餐廳有獨立包廂可以坐8-20人，啱晒我哋同一大班朋友或者公司團體聚餐來。晚市優惠，真係啱晒我呢啲早食飯人士，所以我決定下個月一定要再同老公再嚟食過，真係太抵食，又真係好好食。…Read More

朋友生日，出邊天氣太熱佢話想食日本嘢，我地都想食餐好，但又要滿足我哋鍾意打卡嘅要求，呢間餐廳見到IG好多人強烈推薦，今個月日本伊勢龍蝦刺身仲做緊優惠，只係三百幾蚊就食到，諗住同朋友生日去試吓，但可惜原來要預先book，我哋去到門口見到個魚缸有好幾隻好生猛嘅龍蝦，可惜原來已經俾人預留左，冇機會食到雖然有少少唔開心，不過見到餐廳其他食物價錢真係非常合理，半打生蠔都只係百幾蚊，仲要超鮮甜好肥美，真心勁抵食。另外我哋重點咗吞拿魚蓉海膽丼飯套，除左當飯大大碗之外，仲另外有一碗烏冬，餐都只係二百幾蚊，碗飯真係勁足料，最鍾意係將吞拿魚海膽撈埋一齊食，再配埋隻蛋加埋一齊，味道更加突出。因為啤酒又係做緊優惠，只係$34杯，所以嗌咗少少串燒送下酒，雞腎好有咬口，燒吞拿魚，同埋燒銀鱈魚，唔同魚有唔同嘅魚香，但用嚟送酒真係好夾好好食最後當然唔少得食蛋糕環節，點咗個開心果芝士蛋糕，今次我醒啦，預早講明要生日畫花蝶，真係冇令我失望，麵包超人畫得超級可愛，餐廳仲俾埋生日帽，俾我哋瘋狂打卡，走嘅時候千祈唔好錯過門口位置，因為亦都係另一個打卡點，有我朋友最鍾意嘅chiikawa ，又飲又食又打卡，仲要笑過不停，成餐飯不經不覺食咗幾個鐘，埋單$1000有找食到高質日本菜，真係幾優惠，下次再有朋友生日一定會再嚟。…Read More

我成日帶小朋友周圍食野，點知原來小周董話我知佢咁大個都未食過日式串燒，我諗諗吓都可能係，因為每次食串燒都係會飲返幾杯，所以早幾日就揀左呢間餐廳同佢去試下。呢間餐廳就係登龍街永光中心上邊，地方好方便，我之前都試過同朋友嚟食，覺得佢啲串燒價錢唔貴又好味，今次叫咗鹽燒雞腿肉，啖啖肉，當然唔少得點牛舌、雞腎仲有雞軟骨串，今次試吓啲新嘢，點左2款小食，都超級好食。見到有個咖喱手抓餅，估唔到超級有驚喜，手抓餅新鮮香脆，咖喱夠香辣，簡直食到我停唔到口。另一個小食係墨魚滑紫菜大蝦，上枱嘅造型已經好靚，成條龍咁，唔止賣相好仲好好味，墨魚滑加蝦滑食入口都好彈牙，配埋紫菜增加口感，正！另外小朋友鍾意食香口嘢佢點咗蝦多士，鰻魚燒飯團，佢都食到舔舔脷，不過佢最鍾意竟然係燒菠蘿，佢一個人食咗四串，酸酸甜甜，面頭有少少脆，你見佢食咁多就知佢真係好鍾意啦。兩個人食到飽到上心口都係幾百蚊，兩個都食得非常滿足，今晚又要做運動先可以瞓覺啦。…Read More