christy.cheng's Profile

一年四季都鐘意打邊爐 因為烚下烚下 自己鐘意食乜就淥 好自由～ 吞pot一直都是打邊爐既頭幾位選擇。不過一直都未有機會試既花膠魚翅雞煲 今次終於一嚐 好滋味。雞煲一上枱 見到湯底奶白色 已經知道好足料～ 魚翅大大片 花膠又煮得夠腍 再配埋雞件 基本上 兩個女仔 淨係食呢煲湯都夠曬飽。我地兩個女仔 飲左差不多2/3煲湯 先開始打邊爐。手打墨魚丸。識食既 一定食手打丸。彈身有咬口 食到粒粒墨魚 唔係麵粉做既丸。推介！朋友仔唔係好喜好肉類 所以配料都是輕食為主。蜂巢豆腐 索曬花膠湯 口感煙煙韌韌 次次打邊爐都會叫。花膠湯底好足料 唔油膩 所以好適合淥蔬菜類。萵筍爽口 油麥菜鮮甜 夠曬健康～ 鐘意飲啤酒既朋友 好多選擇👍🏻👍🏻順帶一提 7:30前離座或9:30後入座 半價！！岩曬我呢D會早放工既人。抵到爆！…Read More

Happy Friday 喺灣仔食泰國菜，喺openrice搵左呢間好多笑評嘅「新泰」試一試。餐廳佔地都頗大，枱同枱之間空間非常足夠，職員為我地安排左一張靠窗嘅卡位，舒適度十足。小妹食泰菜必定會點一道「泰式生蝦」，生蝦新鮮、彈牙爽口，配上特製酸辣汁，入面有蒜頭紅辣椒青辣椒嘅味道同色彩，色香味俱全，非常開胃，如果份量多返少少就完美了！泰色沙律最常見係柚子沙律同埋青木瓜沙律，青芒果沙律就真係第一次食，食落去口感同青木瓜沙律無乜分別，但芒果嘅香味就比木爪明顯不少，配埋新鮮嘅紫洋蔥同香脆嘅花生，又係另一道開胃菜！泰國咖哩出名，青咖哩更加係泰國嘅特色咖哩，今次叫左青咖哩雞，辣度比想像中輕微，好香九層塔嘅味道。份量好足，雞肉嫩滑，特別鐘意泰國茄子，細細粒夠可愛之餘，口感比傳統茄子更佳！咖哩一定要配薄餅！呢度嘅印度薄餅外皮酥脆好食，但略嫌薄左少少，比較難「掛汁」！蒜蓉炒貴妃苗好香口爽脆，咸度剛剛好！不錯！椰青正常！因為太喜歡椰青嘅香氣，甜品又叫左原個椰青大菜糕，份量超多，抵食！不過兩個人食確實實有點吃力，哈哈哈！味道好清甜，椰子味好出，加上大量椰子肉，口感亦唔會太單一，推！見到餐廳都有好多張大枱，好適合一班朋友聚餐，下次再約埋班朋友試多d其他菜式呢！…Read More

好耐無去旺角，喺潮流特區附近原來多左一楝新嘅大廈「彌敦562」，樓上幾層都係餐廳，喺樓下睇到呢間「explore kitchen」嘅餐牌覺得幾吸引，就決定上去試下！餐廳喺4樓，裝修簡約，走暖系路線，落地大玻璃再加上樓底高嘅關係，感覺好舒服，絕對唔會局促。喺旺角區有呢個環境，實屬難得！由於唔係太肚餓嘅緣故，我地order左兩個小食再加一個主食。原來晚市餐廳會送比每位客人一個「湯」，當日係南瓜湯，南瓜湯香濃之餘唔會太杰身，配埋熱辣辣嘅麵包，正！因為免費嘅關係，就更正！水牛城單骨雞翼甜甜辣辣，非常醒胃。沾滿醬汁嘅雞翼仍然係脆口，表面果層炸粉唔會太厚，又無炸得太乾，能夠保持到一定肉汁，唔錯唔錯！西班牙蛋餅八爪魚，西班牙蛋餅嘅主角並不是「蛋」，而係「薯仔」，但又同我地食開嘅薯餅唔同，似係千層薯仔片咁！呢度嘅蛋餅香口唔多油，唔會話太咸，熱辣辣上碟再配埋一旁嘅新鮮八爪魚，好夾，48蚊實屬「抵食」！牛魔王老公揀左「炭燒美國安格斯肉眼」7成熟作為主菜。肉眼扒大大塊，未食已經聞到炭燒嘅香噴噴味道，切開無血水流出，證明烹調得十分好！內𥚃呈粉紅色好似唔夠7成熟，但食落覺得岩岩好，完全唔覺得有太raw嘅感覺，有咬口之餘牛味非常濃郁，係非常對板嘅安格斯牛！配菜之一嘅焗原個蒜頭亦係一大亮點！唔單止無蒜頭嘅苦澀味，仲帶輕輕嘅甜味，連對蒜頭冇太大好感嘅我都覺得好好食呢！我地仲叫左一杯「薄荷波波」mocktail, 入面超多菠蘿，唔太甜之餘仲有濃濃薄荷味！正！（不過我老公唔鐘意薄荷就覺得麻麻呢！）…Read More

呢排夜晚天氣涼浸浸，火鍋同燒烤都係我近期放假首選。今晚約左好姊妹放工聚下，我私心揀左食八鍋堂。自助式調味架應有盡有～任飲啤酒，汽水，果汁，茶～蔬菜類，麵類，丸類等等～自己夾，唔洗等最好～～我地揀左人蔘雞湯+重慶麻辣湯底。哈哈哈哈 好可愛呀～～店員一拎個煲上枱時，我仲諗做咩有咁大舊野係湯入面。原來隻狗狗係湯底雪到變固體，所以可以企係個煲入面～～好得意，好有心思呀！！四個大姐姐見到都咁開心，小朋友一定中意，哈哈。放心，狗仔遇熱就會溶番變正常湯底，可以慢用。八爪魚同榮螺刺身彈牙爽口，都幾新鮮，唔錯。跟住點左d海鮮，冬風螺好鮮甜！！海蝦，蠔，象拔蚌仔都唔錯，好有鮮味，肉質都好彈牙，唔係急凍食材，讚！丸類不過不失，有正常既水準。而且仲有我中意食既萵荀，加分～雪花肥牛又幾好食喎～牛味重，有油脂味但唔膩！我地食一碟岩岩好～仲有蟹子壽司同卷物，size細細，味道好好。食埋個青瓜絲沙律清下口腔，夠哂爽口，正呀～！出面涼浸浸，我就食到暖笠笠，真係滿足！…Read More

第一次嘗試果然有驚喜最近天氣開始轉涼，又到左打邊爐既時節了。有朋友推介我去左荃灣大鴻輝大廈18樓呢間雞煲加打邊爐任食。我朋友話呢間雞煲放題味道唔錯之餘仲要非常抵食，係堅！任！食！一黎到已經見到大大個招牌，個logo只雞都幾搞笑～呢到係雞煲比較出名，不過我最近都食左好多中菜，全部都有雞，所以今餐同朋友就正係打邊爐。電子羅飛，都有d地方比人坐低等。醬油既質素係反映一間火鍋店係咪有誠意既重要指標，畢竟好既醬油會令食物錦上添花。呢度既豉油唔會太咸蓋過食物既鮮味。另外，醬油香料只有炸蒜，蒜蓉，蔥同辣椒選擇唔太多，但勝在非常新鮮，尤其d蔥粒好翠綠，唔似擺左響度好耐咁。另外值得一讚係醬油吧清潔企理，唔會成枱豉油跡。環境唔錯，座位以卡位為主，闊落得黎幾好坐。估唔到呢度都幾大wor!我平日夜晚6點半入座相當多空位，不過食到大約7點就見到差唔多滿座。雖然無食，不過聽講呢度既雞煲係根據人數比分量的，食完就加湯。主角到啦！我地點左胡椒豬肚加雞既湯底，清得黎唔會太滋補。不得不說火鍋既湯料非常多，湯亦都好新鮮，胡椒味好出不過唔會太“kok”喉。呢度既火鍋料係落單點，不過蔬菜就自己羅。我見到一盤盤唔同蔬菜放左響雪櫃，唔似出面d蔬菜要自己夾，感覺整齊同無咁污糟。呢盤西洋菜都幾新鮮，淥完都仲係青bb爽口，連平時唔食西洋菜既我都食左好多。呢度最令我驚艷唔係牛肉係豬肉。豬肉好新鮮同有口感，豬味濃郁。響鈴一睇就知係自家製造，形狀好厚唔係出面買到既盒裝響鈴。口感好正得黎而且唔會太油，我忍唔住食左勁多。呢個價錢真係估唔到有花膠同蜆，仲要任食！我個人就麻麻地花膠所以無食到，不過我朋友都話算腍幾入味。至於d蜆，我怕唔乾淨所以都煮左好耐先敢食，但估唔到d肉仲咁爽。炸魚皮都係心目中必叫。呢度炸魚皮好大塊，香脆可口，重點係唔算太油。咁新鮮既海蝦都係任食！蔬菜類既選擇都非常多，連罕見既秋葵都有。飽到聽日都唔使食飯既感覺～大滿足！作為飯後甜品呢度仲有任食yogurt雪糕添，不過我真係食唔落lu～總結黎講，以呢個價位可以任食雞煲同呢個質素既火鍋，環境仲要唔錯，響香港都算幾難得。出面一d比較有名既任食雞煲火鍋起碼都要$200-$300人均消費，仲要未必好坐。呢度以食物質素黎講未必係最好，但就真係性價比之王。…Read More

一段時間冇去油塘，最近發現油塘大本型裝修左個Food court，多左好多唔同嘅食店進駐，我同老公左揀右揀，揀左呢間「八幡屋涮涮鍋」！天氣轉涼，難得喺油塘呢個小社區有火鍋兼日本料理放題嘅餐廳，就即管試試啦！每個時段嘅放題價錢都唔同，我同老公去呢個黃金時段係最貴，而每個時段又有分三個價錢，分別在於牛肉質素，依次序最平係美國進囗肥牛、特選牛肉、最貴係澳洲和牛。每個價錢再加50蚊就可以加埋日式料理放題，有刺身、壽司、燒物、揚物等等選擇。目測大部分食客都有叫埋日式料理放題，我地一於「跟」，最後揀左澳洲和牛火鍋+日式料理放題，每位$318，免加一茶芥，另包任飲同埋雪糕任食。湯底有七、八款比你揀，我地揀左大路嘅「豬骨湯底」，味道正常不過不失！澳洲和牛餐仲可以點另外兩款平d嘅牛肉，我地一於叫埋特選牛肉做個比較。美國特選牛肉薄薄地，牛味十足。澳洲和牛脂肪分佈均勻，比特選牛肉更厚身，口感更加滑溜，牛味更濃，呢個更正！火鍋配料除左肉類同海鮮係劃紙落order之外，其他全部都係自己攞，細細個位置擺左好多配料，大路嘅丸類、菇類、菜類果d全部都有，另一邊仲有響鈴、生根、炸魚皮等等火鍋必備炸物，款式好多質素亦不俗！除左火鍋之外，仲有好多日式料理任食，刺身壽司卷物加埋有幾十款，試左三文魚、劍魚腩、赤貝、甜蝦、鮑魚片，最鐘意三文魚，夠鮮甜，總共encore左三次呢！海膽壽司有驚喜，鮮甜冇腥味，唔錯唔錯！另外仲有燒物同炸物，天婦羅蝦同鹽燒虎蝦都好正，雖然唔係好大隻，但係又爽又甜！飲品有十幾款，連「白色」可口可樂都有！甜品有大路嘅啫喱、布甸、泡芙同埋雪糕。整體而言，食物質素同價錢滿意，係油塘區一個不錯嘅火鍋放題喪食選擇！…Read More

又到秋風起嘅日子，天氣開始轉涼又到打邊爐嘅好時候。今日同老公走左去將軍澳，openrice左呢間好多「笑評」嘅火鍋店試下。由地鐵站行過去大約10分鐘左右，舖頭唔算好大，簡簡單單嘅裝修，整體感覺整潔舒服。先order左一渣「洛神花茶」，味道濃郁，但又唔會太甜！唔錯呢！係汽水啤酒之外另一個好好嘅選擇！睇左openrice嘅食評，order左好多人推介嘅「黃金雞湯」。打邊爐湯底好緊要呢！呢個湯底非常足料，有雞件、花膠、鮮淮山同埋蟲草花，份量一d都唔少。雞肉結實彈牙有雞味，花膠頗厚、囗感亦唔錯，特別鐘意鮮淮山，食落粉粉地，因為吸哂d雞湯所以好鮮甜！未落配料之前飲左碗湯，好鮮甜，果然真係好有「家的味道」！個湯底真心覺得有誠意！大推！「隔離飯總是香的」，後來見到隔離枱order左個「麻辣雞鍋」賣相好之餘仲香噴噴，心思思又想試下，唯有等下次吧！配料方面，點左醬爆手打丸拼盤，有柚子墨魚丸、芥末芝士蝦丸、花膠冬菇豬肉丸同埋黑松露牛肉丸四款，個人最喜歡芥末芝士蝦丸，流心芝士帶有淡淡芥末味，但又唔會太辣或者太嗆囗，配合彈牙嘅蝦丸，很夾吧！另外花膠冬菇豬肉丸亦非常吸引，花膠同冬菇都切得頗大粒，所以有咬囗之餘亦食出味道。呢度嘅名物有「芝士炸響鈴」，可惜老公唔「好」芝士，所以唯有改叫「炸響鈴」。等左頗耐都未黎，一度以為係漏左order，殊不知原來係即叫即炸嘅緣故，所以比其他配料等得耐！新鮮熱辣炸起脆卜卜，唔使講都知一定好食，浸完湯之後仍然脆卜卜，唔怪得見到枱枱客人都有叫啦！打邊爐唔可以唔食菜，叫左碟油麥菜，最怕d餐廳洗菜洗得唔乾淨，呢度ok，洗得乾淨之餘無見到有爛葉！本來打算叫個稻庭烏冬，點知已經飽到反肚！哈哈哈！結果飽得滯，埋單之後要喺popcorn行返陣先可以落到「格」呢！…Read More

做完瑜珈 在朗豪坊搵食。間間餐廳都排長龍 一於食food court最好。揀完一輪 被燒鵝瀨粉吸引左。姐妹話食燒鵝點可以唔食脾 我就鐘意食鵝胸 貪佢啖啖肉。燒鵝燒得幾香脆 皮脆肉甘香。鵝胸啖啖肉 伴碟既菜心都好甜。燒鵝配瀨粉 識食梗係咁食啦。鐘意鵝脾既朋友 食到lum lum 脷 脾位肉質仲滑 而且隻鵝唔會太肥 yummy:) 义燒都唔錯 蜜味夠 肉質幾腍。記得飲爆檸茶 咸檸、青檸、檸檬 誠意之作 好開胃。如果唔係太飽 好想試黑松露蔥油手撕雞飯 睇落好正～ 呢間店都幾有特色 下次經過可以再試～ …Read More

每星期的日文堂之前 都會在佐敦尖沙咀搵食。今日搵到去Let’s Jam 之前在西貢想試 但是人太多。Let’s Jam的自製果醬都幾出名 好多菜式都會加入唔同既果醬作調味 其實都幾特別。野菌忌廉湯&意大利菜湯。足料 開胃之選。玫瑰蘋果醬單骨雞翼。單骨雞翼真是好適合女生 方便食用。雞翼甜甜地 第一次係配果醬食 特別得來都算match 唔洗成日蜜糖雞翼咁悶。黃金蟹肉軟殼蟹意粉。咸蛋黃炒意粉 真是第一次食。又幾夾架喎。啖啖蟹肉和蛋黃 好豐富既口感。軟殼蟹都幾脆口。慢煮黑毛豬扒配肉桂蘋果汁。Presentation不錯。豬扒軟熟 幾juicy。肉桂蘋果汁好特別 淡淡肉桂味 唔會太搶風頭。配菜有蘆筍薯仔 健康。英式鬆餅配丁香香橙果醬。鬆餅🥞尚算鬆軟 最出色係果醬 真材實料 啖啖果肉 又唔會太甜 自然的果糖香～再配上Gem’s of Africa~ perfect match! …Read More

難得約到舊同事聚舊 搵個打邊爐烚烚下 最高興～ 呢間去過幾次都是旺角分店 第一次試油麻地。環境一樣唔錯 有大玻璃 可以睇到鬧市中的日落。湯底我地揀左簡簡單單的香茜皮蛋拼沙嗲～ 因為再叫雞煲 我地怕三個女生KO唔曬～ 簡單既湯底 但都有好豐富既材料。好多雜菌 豆腐 芽菜等等 唔係只係清湯咁簡單。醬料都好多選擇 生蒜炸蒜沙茶醬等等 好齊全。特級美國肥牛～ 打邊爐點可以冇肥牛呢～ 幾大碟 雖然唔係最高價位個款 但勝在都幾濃牛味 唔會太肥 肉質都唔錯。開心樂園餐。笑左。其實係腸仔 蟹柳 餐肉 芝士腸 講特別就冇架啦 不過勝在係拼盤 每樣少少 又滿足到我樣樣都想食。自製爆芝響鈴 我覺得必食～ 好正 香脆 每層都好脆好薄 中間會爆出芝士 口感好豐富 就咁當小食或者淥2秒都正斗～ 蔬菜雜菌 新鮮又有幾款選擇 兩三個人揀呢種最好。手打四寶丸 值得試～ 全部新鮮 又夠爽口彈牙。真材實料 我最鐘意蝦丸 粒粒蝦肉。環境唔錯 食物夠新鮮 價錢都合理 下次可以再翻兜～…Read More

亞仔想食咗好耐，但係次次都排哂長龍，所以今日提早去食。六點就去到，果然呢個時間唔駛等位，非常好😂😂太多選擇，花多眼亂，樣樣都想試～～最後一人叫一個餐再加個小食。首先到嘅係火鍋。我叫咗泡菜湯底。個鍋有幾片厚厚的牛，雖然厚，但一啲都唔韌，仲好香牛味。配菜都唔少，有隻大大隻嘅冬菇。本來跟飯，我加錢配烏冬。基本上我一個係唔會食得哂😂😂鐵板牛～（同牛有仇😂😂）牛好淋，配菜有啲特別，唔係薯角，而係炸茄子。茄子真係外脆內軟，唔係講笑。幾好，唔錯。餐跟碗白飯同沙律。炸雞球，超大粒。個餐已經食唔哂，再黎幾粒大大粒嘅雞球，好飽。但係係飽飽地嘅情況下，都覺得個雞球好味。估唔到一啲都唔乾，入面軟滑，仲好多汁。當食到好飽，但主角往往都係最後出場。亞仔嚮往嘅就係佢地🤣🤣甜品呀甜品呀！雲尼拿軟雪糕加士多啤梨雪芭配寒天。酸酸地嘅士多啤梨味加埋清新嘅寒天，雖然唔會消濟，但都唔會覺得好飽唔想再食。雲尼拿軟雪糕配蕃薯跟紅豆蓉。啲蕃薯口感唔錯，係蓉夾住蕃薯粒，唔太甜，係熱嘅上面放住雲尼拿雪糕。溝埋又熱又凍，好得意。今日好滿足，飽到加零一。最緊要係正餐加埋甜品，價錢都唔貴。係一個唔錯嘅選擇！…Read More

帶外國返黎既朋友行完旺角 大包細包 諗住求求其搵間近近地既餐廳～ 見到街坊cafe甜咸都有 一於入去抖抖～ 晚餐選擇都幾多 見到人人都食碗仔翅 原來係出名話足料 即刻試下呢種港式風味。確實幾足料架。啖啖餸 木耳絲 雞絲 冬菇等等 濃度適中 唔錯。水牛城雞翼。炸粉唔算太厚 水牛城汁調得唔錯 酸酸辣辣 幾惹味。蟹籽大蝦墨魚麵～ 大蝦幾新鮮 都算彈牙爽口。墨魚汁唔會太腍 有咬口。鐵扒肉眼扒～ 份量唔少 牛扒都頗厚。肉質都唔會太鞋 配上港式黑椒汁 都唔錯。配菜既薯條係厚切 正～最後加個甜品 綠茶吉士雞蛋仔～ 雞蛋仔即叫即製 外脆內軟。配埋綠茶吉子 幾有新意。…Read More

旺角臭臭鍋推介之選。先講環境真是值得一讚 光猛企理乾淨。店員友善又有笑容 未食已經開心左一半。記得試下小店推介既完美醬料比例 幾惹味～臭臭鍋有9種選擇～ 我揀左招牌臭臭鍋 湯底唔會太油膩 有淡淡的沙茶香 微微辣。配料好多架！牛肉片 豬腸 貢丸 鴨血 米血糕 臭豆腐等等 好足料。臭臭鍋 仲會配上粉絲/公仔麵。如果兩個女生 我就覺得可以一個鍋 再加配料。好多台灣地道小食 我地揀左酥炸花枝丸 正～ 香脆惹味 夠曬彈牙又粒粒花枝 yummy:)飲品 必試！滿杯紅柚子 好清新 絕對係夏日之選。唔會太甜 香香的西柚味 配上臭臭鍋 有解膩既作用添～ 我下次經過麵要外賣其他招牌飲品 好像好正 哈哈～ …Read More

媽咪鐘意打邊爐，我地就成日周黎試唔同既邊爐。今次就訂左位去佐敦尚鮮。上到去，地方唔算太大，但枱與枱之間一啲都唔迫挾。見到有兩張大圓枱，如果一大班人去都非常適合。我地叫左*油甘魚刺身*好新鮮，甘甘甜甜 份量絕對足夠4位食。*火鍋湯底*姬松茸冬瓜湯 拼 血池麻辣湯（小辣）雖然我地叫左小辣，但味道愈食愈麻辣。但火鍋要有辣先夠過隱。見到menu 上面仲有養生燉湯，都好有興趣，下次一定要試下* 海鮮拼盆 *有蟶子，蜆，蝦，魚。每人都有一份。唔誇張，當中蟶子，蝦，魚都好好味。蟶子肥美多肉；蝦大隻好爽口；魚脆又鮮甜。推介* 牛肩脊 *打邊爐點可能冇牛。牛味好重，肉質柔軟。食多幾塊都唔怕油膩。仲有牛柳粒，大粒但唔覺韌，反而幾爽口。正*鮮打四寶丸 *有墨魚丸，豬肉丸，蝦丸，牛丸。粒粒都超彈牙，手打係唔同d，特別爽口。*即整响鈴卷*侍應特別提醒我地盡快食，因為即整既。當然我都即刻食啦。一啲都唔油呀，好味*菜蔬野菌盒*蔬菜當然都唔少得啦。勝左咩都有啲，菜呀，粟米呀，冬菇金菇都有。*日本葛絲*我本身打邊爐比較鐘意食寬粉，但呢間火鍋店就冇既。見到日本葛絲，唔知係咩黎。於是即刻上網查下，話Q彈。同我鐘意既寬粉一樣Q彈。當然要叫啦。黎到放落個湯底煮，果然冇令我失望。真係Q彈，本來我都食到抱住個肚走，但忍唔住食下一條又一條，最後俾我KO左呢個葛絲。最後提一提，火鍋店既侍應們服務超好，令到我地食得開心又滿足。…Read More

人人都話倫哥好食，點解？🤷🏻‍♀因為真係好食兼抵食🤤👍🏻佢而家做緊個無限時任食海鮮火鍋，每位都只係$318！鷄煲+海鮮喎大佬！前菜有麻辣雲耳、青瓜同埋刺身，刺身不是hea既，有三文魚、北寄貝、帆立貝、牡丹蝦、八爪魚！食完之後上左碟生果，清清喉嚨，然後第一主角要出場勒 - 鷄煲！焗20炒—>快炒—>焗20秒—>快炒—>焗20秒—>快炒—>焗20秒—>食得！我唔算食得好辣，揀左個小辣，👌🏻，不過略嫌唔夠刺激😂，下次挑戰中辣！鷄煲真係好香好惹味！啲鷄堅唔鞋！食鷄煲既精髓係紫洋蔥！入哂味！🤤三扒兩撥我地已經KO左個鷄煲，跟手亞姐擺低左碗咁既野落黎，話俾我地洗下條👅先打邊爐。原來係透明涼粉！而家興透明呀😂透明奶茶透明可樂d fd😂第二主角出場勒！留意番湯底係冇得揀既，得一款生果湯底😂😂一聽到生果湯底我地都打左個突！點呀？生果點做湯底🤷🏻‍♀但上枱果一刻已經聞到鮮味，有啲似阿媽煲既鷄湯，係落埋海鮮更加鮮甜😋介紹番個海鮮盤：海蝦、蟹、聖子、帶子、龍躉魚片、鑽石蜆、鮑魚！個人最所賞龍躉魚片，魚肉彈牙，encore左4次！仲有呢盤牛頸脊，有牛味，唔係雪藏野，我老公食左半盤🤪其他打邊爐料仲有雲吞、餃子、各式丸類、響鈴、炸魚皮、蔬菜盤⋯個肚唔爆都算係咁~臨尾食埋個燕窩燉蛋白，完美既句號！媽呀，我好飽兼好滿足🤩…Read More