foodie_cat's Profile

以前講健康飲食，通常推介一星期抽一日食沙律／三文治當lunch。只係坊間嘅沙律／三文治一係就好細，一係好寡，一係好貴，否則就係啲dressing 好肥。Kale 嘅出品價錢相宜，有齊低脂嘅蛋白質，新鮮嘅蔬菜，仲有低GI嘅Carbs，而用嘅調味料都比較低脂同天然，啱晒我呢啲想食好，而非一味食少嘅人。今日就叫咗個Cajun 香料雞胸肉配蕃薯條同羽衣甘藍。份量一啲都唔欺場。雞胸肉切咗條狀，方便進食。Cajun Spice 有少少辣味，令到口感無咁寡。蕃薯條非常香口，無多餘嘅油益味。羽衣甘藍新鮮爽脆，有少少黑醋汁調味，食得健康又滿足。…Read More

喺中環嘅返工日子食晏，向來都係錢同舒適嘅取捨。今日難得一班同事出去食飯，想搵間環境幽美又坐得舒服嘅，就去咗Ole 食西班牙菜，人均約$300。入面擺設同裝潢華美，充滿歐陸風格。同事叫咗個西班牙海鮮飯 share, 呢度嘅Paella 非常足料，海鮮嘅精華都比飯粒吸晒。而飯粒亦冇煮過籠，每一口都係享受。我揀嘅主菜係西班牙烤乳豬。呢度係斬件再燒，雖然份量慷慨，不過皮就稍為唔夠脆，有啲失色。伴碟嘅薯條反而幾好食。…Read More

位於火炭嘅『伙食工業』，地方非常寬倘而且價格合理。加上有啲時候會有不同嘅Live Band 演出，係放鬆心情嘅好去處。步入餐廳，彷彿時光倒流30年。各種充滿溫度的擺設和字句，猶如置身古早台灣。宜蘭蔥肉餡餅，皮同肉餡味道唔錯，不過溫度稍為唔夠熱。台灣菜又點少得鹽酥雞？呢度係雞排版本，炸得外脆內軟，雞肉亦醃得入味，係是晚最滿意嘅一道。牛筋牛肉麵係另一台灣名菜。呢度牛肉炆得夠腍，份量亦夠慷慨，可惜湯頭略淡，未能將牛肉味帶出。魯肉飯配鹵水拼盤，魯肉充滿豬油香，配上白飯當然一絕。鹵水拼盤有雞翼，豬耳同海帶，味道正常。後加嘅新竹米粉，炒得乾身足料。…Read More

咁啱嚟到旺角，見到喺wish list 好耐嘅 90's Lazy 喺山東街有新分店，當然要幫襯下。餐廳環境好好，有好多舒適嘅角落位，啱晒二人世界。用嘅刀叉同碗碟亦都非常精美，適合對食器有要求人士。炸芝士同洋蔥圈，炸粉略厚不過火候剛好，唔會好油膩。水牛城雞翼係是晚重點。雞翼裡面都醃得非常入味，啲汁係香辣兼備，但又唔會搞到隻雞翼唔夠脆皮，絕對係近年食過最高水準！明太子蟹肉忌廉意粉，做到Al Dente 效果，忌廉明太子汁質地濃厚而帶微辣，幾下手勢食個清光。蘆筍大蝦黑松露意大利飯，大蝦大大隻而且燒得好香，墊底嘅意大利飯香口而唔會太腍，幾好味。只係份量略為知精緻。…Read More

今日來到新城市睇戲，睇完都成兩點幾三點，有未食晏。見到主打食牛嘅Top Blade Steak Lab 終於喺沙田開分店，當然要去朝聖。由於疫情關係，檯與檯之間有充足距離，亦放有膠板，地方光猛衛生。由於過咗食飯時間，好好彩walkin唔駛排隊。否則呢個價位喺呢個場應該好受歡迎。一場嚟到，無理由唔試下招牌嘅『平鐵牛扒』，叫咗5成熟。雖然Flat Iron 唔係西冷肉眼等經典部位，但入口肉味香濃，無明顯筋位，算係幾高性價比嘅一個cut。想casual啲鋸下扒，交足功課。中間係肉醬千層麵，做得好好食。有唔少地方為咗慳成本，肉醬慢煮時間不足，就會質地太水，搞到啲千層麵都淋晒。呢度完全無呢個問題，芝士亦落得好慷慨。以一間食牛扒嘅餐廳交到咁嘅水準，有驚喜。薯條亦炸得金黃酥脆，本身都係重點。用佢嚟點晒啲肉醬一流。總結嚟講，呢度可以當係親民版嘅Steak & Frites。每道菜式都有水準，環境舒適唔拘謹。有機會絕對會Encore!…Read More

『屋子』系列一門三傑，位於烏溪沙嘅『生活』地方最闊落；大圍嘅『咖啡』聽落以飲品質素作主打（但未試過）。而同於大圍嘅『空間』係一間乾淨企理嘅三層村屋／唐樓，每層地方不大，但以minimalist 北歐風格，營造舒適寫意嘅環境。作為一間輕食cafe，食物以凍熱烏冬同少量甜品為主。Cafe 基本上需要自助落單同攞嘢食，不收加一。首先嚟咗個『山葵麻婆豆腐溫烏龍麵』。由於麻婆豆腐通常都係配飯食，呢個組合都幾有創意。滿滿嘅麻婆豆腐只係帶少少辣度，絕對無睇落去咁重口味，唔係太食辣都頂得順。山葵嘅味道配合得剛好，加添層次之餘唔會搶咗麻婆嘅味。伴碟仲有個溫泉蛋，最鐘意撈落啲烏冬度一齊食。呢個係『關西牛肉溫烏龍麵』。喺冇得去日本嘅日子，呢種味啉加砂糖同豉油嘅組合令人倍感『思鄉』。呢度嘅牛肉炆得軟腍，肥瘦適中，調味偏向少鹹多甜，係我嘅心水。當然牛肉汁入咗烏冬就索晒，所以都十分滋味。Latte 拉花雖然簡潔，但有心機做啲點綴。整體質素甚高。…Read More

今日天氣真係好好，難得出去踩單車，當然要食返餐豐盛早餐打打底。呢間Cafe餐廳位於馬鞍山海濱公園單車徑旁邊，有落地大玻璃窗，環境舒適安靜，又可以睇實單車。早餐價格約$50-60一個set 連果汁，以環境嚟講尚算合理。雖然要自己出去落單，但上菜有侍應代勞，可以休閒kick start 一個美好嘅週末。我哋叫咗個吉列魚柳配炒滑蛋。魚柳炸得外脆內軟，配上他他醬，有午市fish  & chips 嘅質素。加上香滑嘅蛋同烘得微焦嘅多士，幾滋味的。雖然份量無法同街邊茶記比較，但以此餐廳定位還算可以。另一碟係煙三文魚牛油果Benedict，賣相精美，煙三文魚同沙律菜都幾新鮮。蛋方面，benedict 雖然只得一隻，生熟程度恰到好處，Hollandaise sauce 可以再濃厚啲，不過整體都幾滿意。…Read More

今晚嚟到九龍城，晚餐當然係食泰國菜。小曼谷比較出名而且多分店，於是我哋就嚟咗呢一間。但個人一共叫咗三個菜式，兩杯嘢飲泰皇咖喱法包軟殼蟹 👍🏻👍🏻👍🏻一大個法包裝滿住將近滿瀉嘅咖喱汁 🤤 配埋炸軟殼蟹🦀🦀🦀同埋法包個蓋 😂咖喱味好香，有椰汁味又有少少香料味😋軟殼蟹炸得好香口，點啊咖喱汁不得了。法包亦都好有咬口，同樣地同咖喱汁好夾！留意呢一道菜都幾巨型，我哋兩個人食最尾都食淨左接近半個法包...... 🙈 建議大家除非唔嗌其他嘢食，如果唔係就三個人或以上先好叫呢個啦 😂鹹魚炒椰菜苗 👍🏻👍🏻椰菜苗除咗泰國餐廳之外比較少地方食得到。菜葉嘅質地好有咬口，比較厚身少少，而且用鹹魚炒配埋啲蒜香味非常香口！柚子蝦沙律 👍🏻👍🏻幾清新幾清甜，做前菜唔錯！柚子好多，而且配埋有啲花生碎，都幾香口！兩杯飲品都係沙冰 👍🏻👍🏻不論係芒果沙冰定係椰皇沙冰水果嘅味都幾濃，完全唔會淡，飲到尾都依然覺得夠味！ 😊…Read More

今日同男朋友嚟到九龍城大約下午3:15 想食下午茶 喺兩間餐廳之間爭抝咗一陣 最後男朋友聽話 肯排隊食大和堂 🤭🤭其實條隊都幾長我哋差不多排到四點先可以入去 大約排咗九個字 🙈毫不猶豫揀咗最出名嘅雞蛋仔與雞，飲品揀咗大和堂鮮奶咖啡。另外試埋麻辣蛋M5和牛漢堡。雞蛋仔與雞 😋炸雞好香口，而且有五至六大件，有啲似韓式炸雞，好食👍🏻 點埋薑味糖漿都幾夾。雞蛋仔就主要係個薑味糖漿配搭幾特別，但比起街邊雞蛋仔舖頭就爭啲，雖然熱辣辣但係做唔到外脆內軟，整體比較軟身，呢方面略為遜色麻辣蛋M5和牛漢堡 😋比起雞蛋仔與雞 ，呢個菜式更加高分！整體配搭有特色，除咗蛋同牛肉碎幾夾之外，配埋少少辣味，個醬亦都調配得唔錯。牛肉多汁，蛋炒得啱啱好。個漢堡就咁食其實就唔係好辣，有一少杯醬，應該係用嚟點薯角，但係如果覺得個漢堡唔夠辣，搽多少少醬落去個牛肉度，味道層次更加有所提升！😬😛 個人覺得個薯角有少少似就麥樂雞味，不過點完麻辣醬就係另一個感覺。小心⚠️個醬都幾辣㗎 🥵大和堂鮮奶咖啡 😋我本來以為係普通嘅Latte, 杯面除咗有拉花，見到少少茶葉裝飾, 原來係落咗Earl Grey. Earl Grey同咖啡出奇地夾。推介一試 😊…Read More

今日經開旺角中心呢間章魚無雙我想食好耐啦 😍 唔少鍾意食章魚小丸子🐙嘅朋友都推介話呢間好好食我一個人叫咗六粒雙拼大阪原味拼黑松露味 （其實咁樣拼係有少少唔抵，因為用貴嗰個價錢計，但係第一次食又好想試吓原味）章魚小丸子即叫即整大約等咗10分鐘。入口真係熱辣辣，要吹一吹佢先好放入口😅之前聽人講呢間1️⃣好足料，每一粒都係原隻章魚，唔會太多麵粉或者椰菜；2️⃣另外就係話燒得外脆內軟。1️⃣足料的確係👍🏻👍🏻特登影低俾大家睇，真係成隻有腳章魚喺裏面 😂2️⃣ 外脆內軟方面，我就比較感受到內軟同熱辣辣又唔會太多麵粉，外皮的確唔會淋到凹咗落去但係又未至於做到脆，期望過高所以少許失望另外分享黑松露味真係好好食，嗰醬幾濃亦都好creamy。不過如果一次過六粒都係黑松露就應該會覺得太膩，一個人食雙拼三粒啱啱好。下一次如果經過都可能會再試吓其他味道，但係因為外脆內軟嘅少少失望就冇衝動特登嚟朝聖。🙈…Read More

今日嚟到南丫島⛰🏭食海鮮餐以外嘅餐廳仔/Cafe主要集中喺榕樹灣大街一帶，整體氣氛亦都比較悠閒。行咗一陣想揀有一間有正餐食嘅Cafe，就入咗去農舍。餐牌上有得散叫，有早餐午餐Pizza小食，亦都另外有一塊黑板寫咗幾款嗰日嘅Chef’s Special. 我就揀咗Chef’s Special嘅Thai Basil素肉碎手工麵。農舍嘅大部分食物都係素食，而呢一個手工麵對我嚟講我覺得係一款有特色嘅泰式加西式素食fusion菜。送餐上嚟一眼睇就已經覺得賣相非常吸引，似係一款好特別嘅意粉。食落素肉碎好香口，雖然係素，但同平時嘅泰式辣肉碎講唔出有咩分別😆 而且泰式香料亦都非常之足料。至於手工麵就又彈牙又煙韌！成個配搭無比地夾。份量其實都唔細，但因為那六歲好香加埋彈牙嘅意粉，最後唔捨得浪費食晒全部！呢款Chef’s Special我真係極推薦！尤其係鍾意食手工意粉又鍾意食泰國菜嘅人，應該一定會鍾意。Chef’s Special餐牌包一杯飲品，咖啡味道雖然唔算好出色但整體都不錯。媽咪嗌咗一份breakfast set, 當中應有盡有，亦都味道不錯。…Read More

幾個月冇食過譚仔，其實譚仔嘅味道真係有種癮🤣諗咗好耐食三哥酸辣定糊辣好，最後揀咗糊辣湯底。自己揀咗韭菜牛肉，然後說服媽咪試新嘢花膠胡椒雞米線😝 順便自己可以黐幾啖 🤣🤣🤣花膠胡椒雞米線係配糊辣湯底。足料嘅程度幾令人驚喜，雞大約有三四舊，花膠有成五六片。啲雞幾嫩，唔鞋 👍🏻 花膠就唔夠厚身，亦都好似未煮得夠淋。不過譚仔價錢，有呢啲配料，已經值得一讚！👍🏻👍🏻會再自己encore花膠胡椒雞米線。😋…Read More

好耐冇寫過食評，但係呢一餐好值得寫低佢 😬😋趁住restaurant week, 男朋友就book咗Wolfgang’s Steakhouse食好西。Set dinner大約六百幾蚊一個人，有齊starter, main course, side dish同埋甜品。最值得記錄嘅一道菜，就喺呢度嘅招牌Porterhouse for two 🥩 男朋友話呢個招牌菜set menu食得到算係幾難得。For two嘅份量其實非常之大！又大塊又厚身。T bone一邊係牛柳, 一邊係西冷。牛扒外脆焦香，上啲嘅時候依然聽到啲油吱吱聲😛 我哋揀咗medium rare, 裡面啲肉好粉嫩嫩滑。Porterhouse for two係dry-aged T bone steak，今次係我初嘗乾式熟成牛扒 😆首先試咗牛柳嗰邊，已經覺得同平時食嘅牛肉好唔同，牛味香好多。之後試埋西冷嗰邊，wow 牛味好濃郁！😮 嗰種味似係風乾肉嘅感覺。簡單講係聯想起ham, 不過今次係牛 😆 真係未食過咁濃嘅牛味，原來dry-aged就係令到啲牛味再集中啲。至於前菜，我哋揀咗crab cake同埋龍蝦湯。Crab cake好足料，每啖都係絲絲蟹肉。點埋個醬食亦都好夾。龍蝦湯都好飲，不過如果比起酒店級數就爭少少，未算係好香濃龍蝦味。去到甜品Tiramisu, 估唔到竟然係咁大份 😂 符合美國餐廳嘅份量 😛 好彩啲side dish冇揀到薯仔，如果唔係真係過飽。甜品味道都唔錯，只係個人比較鍾意酒味濃啲嘅，所以唔算係最喜歡嘅版本。呢度嘅裝修好classic好大體, 氣氛唔錯，而且好闊落。節日嘅晚餐食係幾好嘅選擇。…Read More

今日咁啱嚟到屯門呢一度，男朋友揀咗一間有窩夫同梳乎厘pancake食嘅小店比女朋友 - 有料案內所。連個名都好有日本感，啱晒小港女 🤣🇯🇵我哋叫咗一個窩夫 lunch set，70幾蚊包一杯飲品。另外散叫咗一個梳乎厘 pancake同蝶豆花芒果梳打。珍珠奶茶伯爵窩夫🧇窩夫好鬆軟！完全唔會硬，好食！啲cream亦都有茶香味，配埋珍珠亦都好夾。仲有少少芋圓伴碟。焦糖梳乎厘 pancake：軟綿綿而且好有蛋香 😍 有梳乎厘嘅空氣感，但係感覺好足料，唔係食緊空氣😂上網睇返，啲人話佢係用日本蛋同北海道牛乳，唔怪得味道咁香濃！佢嘅蛋香味比起日本連鎖店嗰啲更加香濃，鍾意蛋味嘅朋友值得一試！至於飲品就麻麻地，芝士奶蓋四季春味道有啲淡，冇乜芝士味，茶底亦都唔濃，可能因為我哋叫咗少甜，成杯野感覺更加淡🙈而蝶豆花芒果梳打就好飲啲嘅。不過整體來講，因為食物真係高質，都值得俾笑面 😋 而且喺屯門嚟講都算係隱世小店，值得推介 👍🏻…Read More

同事推介，Lunchtime就去咗銅鑼灣食船皇。湯底絕對係個精粹所在 好濃郁 🤤🤤 麵底有幾款唔同嘅選擇，我試咗河粉，係好寬大嘅一條條，亦都好滑。有同事叫咗金邊粉味道都不錯。而叫咗蛋麵嘅同事就話唔單只彈牙，份量亦都好多，睇嚟下次我都應該叫蛋麵。豬皮亦都好脆，浸落湯食或者就咁當小食都好好味。有同事叫咗和牛船麵，只係加一蚊，佢哋對和牛讚不絕口，下次再嚟一定要加。飲品方面我叫咗熱奶茶，其他人就叫咗凍奶茶、水果茶、龍眼冰，凍飲會用一個金屬碗裝，可以保持到個溫度冰涼而又唔會溝淡，個金屬碗都幾特色，又有泰國嘅味道，下次一於唔好咁養生飲下凍飲😂…Read More