bearris's Profile

米子燒肉家位於美林邨粉紅色冬菇亭，入面座位闊落，坐得舒服。餐廳有火鍋、燒肉提供，最後我同朋友吃了燒肉放題，平日去只是$218再另收加一，非常抵食。放題的食物選擇眾多，牛肉有牛舌、安格斯皮腱同牛五花等，最推介的是牛舌及安格斯，油香十足。另外亦推介豚五花和雞肉，前者肥瘦適中，後者肉質鮮嫩。海鮮有蝦、魷魚鬚、鯖魚等，幾款入面最喜歡魷魚鬚，彈牙爽口。蔬菜點了雞髀菇、翠肉瓜和菠蘿，每款都鮮甜多汁。最後還有飲品同埋甜品任食任飲，多款選擇，總有一款合心意！…Read More

蟹仙有幾間分店，依次嚟到九龍城嘅分店，套餐揀咗尊貴海鮮套餐，樣樣海鮮都非常新鮮，可能真係同老闆做海鮮入口有關，而且全程都有侍應幫手較好每樣海鮮嘅蒸煮時間，全部都蒸得啱啱好，唔需要驚太老或者唔熟😋海蝦嘅蝦身飽滿，肉質厚實，就咁蒸就突顯到佢原始嘅鮮甜，奄仔蟹嘅蟹肉本身已經夠清甜，蟹膏豐腴甘香，相當新鮮👍🏼野生琵琶龍蝦嘅肉質緊緻，鮮味被完美鎖住，入口爽彈，唔需要任何調味，非常之甜!青口、蟶子、元貝都處理得非常乾淨，鰻魚嘅魚皮帶煙韌，而魚肉係獨有嘅結實口感，可以點下豉油去提味。除咗蒸海鮮，個套餐仲包括南非乾鮑配冬菇、蔬菜籃同埋粟米芋頭粥底，粥底份量都幾多所以好夠飽，最後仲送咗個椰汁雪燕甜品！…Read More

今日午餐食咗「媄」一人前鐵板餐，食得出食材嘅質素唔錯，醬汁嘅配搭亦有驚喜！茶碗蒸有好多蟹肉，鮮味十足🦀北海道帆立貝煮至半熟，口感柔軟，同底下嘅日本冬瓜莎莎海苔忌廉汁相當匹配🍴跟住嘅稻草鰹魚配咗豆乳醬同羅勒油，同樣有西日fusion嘅元素，有新鮮感！海虎蝦只係以簡單嘅調味去帶出食材本身嘅鮮味，蝦肉非常爽口彈牙👍🏼煎鮟鱇魚肝係一個較少見嘅菜式，幾有新意蒜香薄燒和牛十分惹味，和牛油脂分布平均，依道菜仲配搭咗幾款醬汁，有黑松露汁同埋山椒醬，令到層次上多點變化，至於茄子蓉就可以配埋大啡菇、南瓜、翠玉瓜去食😋炒飯方面，師傅一開始將白飯煎香成飯餅咁，之後再炒返鬆佢，所以食落係粒粒分明又有飯焦般嘅香脆🍚最後嘅甜品係開心果雪糕🍧…Read More

依晚同朋友叫咗 4 course dinner set，starter同main嘅選擇都好多，餐湯有法式花膠濃湯或者甘筍湯，兩款嘅味道都唔錯。前菜揀咗焦糖法式燉鵝肝同埋乾式熟成澳洲和牛他他，燉鵝肝口感幾滑，脆脆嘅焦糖減低咗少少鵝肝嘅膩感。見到周圍嘅人好多都有叫生蠔，所以喺套餐追加兩隻試下，兩隻蠔嘅size都唔細，爽口而且略帶海水味，質素唔錯，後尾發現除咗有包6隻蠔嘅tasting menu之外，網上有啲平台仲有做緊任食生蠔套餐嘅優惠，難怪有咁多人食生蠔。主菜揀咗法式鵝肝牛柳同埋冠軍鮑魚伴法式鴨肉薏米飯，鵝肝好大塊而且充滿油香，牛柳雖然無得揀幾成熟但係生熟度都好合適，至於薏米飯較普通米飯更有咬口，中間夾雜住好多鴨肉絲，鮑魚咬落去散發住酒香。最後嘅甜品揀咗原隻海膽雪糕。…Read More

前菜有三款，賣相精緻，視覺同味覺上都好豐富，茶碗蒸用咗個小鐵盒裝住，上面有北海道雪場蟹肉同埋黑魚子，右上嘅脆卷都好食，係用紫蘇葉包住黑松露鮮蝦膠，好有層次感跟住到餐湯，侍應會即席將湯倒入碗度，幾特別，帶子白甘荀楓糖啤梨忌廉湯同埋干邑龍蝦湯都唔錯主菜叫咗烤焗澳洲BB羊里脊，羊肉煮到7成熟保留住肉汁，薄荷乳酪醬好清新，焗薯同埋底下嘅菠菜都幾好食，另一個主菜係柚子鹽火炙龍蝦枝豆野菌意大利飯，龍蝦啖啖肉，枝豆同埋野菌提升咗個飯嘅口感甜品同樣有三點，又係可以樣樣都試到啲，非常豐富，顏色上以粉紅色為主調，櫻桃花水信玄餅最靚，晶瑩嘅水信玄餅中透出花瓣，另外兩款係烏龍茶白桃蛋糕同薰衣草檸檬梳打飲品方面都幾有心思，月桂•梨係將梨砌成一朵花咁放喺茶杯中，令人賞心悅目…Read More

喺香港可以食到好多唔同國家嘅菜式，但係食中東菜嘅餐廳依然唔太多，今次搵到間喺土瓜灣嘅中東菜餐廳，有其他枱都同我地一樣book咗位首先係roasted cauliflower，烤過嘅椰菜花好淋，好容易就可以用叉拮開，完全係一個新嘅口感，再用咗啲檸檬同芝士去調味平時食雞心通常係喺日式串燒度出現，依個french chicken heart又係另一個煮法，幾獨特fresh spaghetti sojuk嘅配料有手工製嘅土耳其牛肉腸，對比起平時啲香腸少啲脂肪，食起嚟比較扎實同埋多咗啲香料味，意粉嘅醬汁係蕃茄汁，所以食落去酸微微，頗為開胃甜品叫咗cake el tamir，即係蜜棗蛋糕配雲呢嗱雪糕，上面嘅脆餅同埋果仁碎為成個甜品增加咗脆卜卜嘅口感…Read More

麵包條好香香草味，麵包烘得夠脆火炙半熟三文魚伴紫蘇莎莎三文魚四邊輕輕火炙過，充滿油香，上面個醬汁好開胃。香辣蕃茄汁花甲天使麵天使麵好掛汁，啖啖都有蕃茄香，而且唔會太辣，怕辣既朋友都食到。澳洲羊架羊架總共三大塊加一小塊，兩面都煎得好香，羊肉味一啲都唔蘇，而且所有伴菜都用牛油煎香，欣賞佢個薯仔個樣好似帆立貝咁，擺盤好有心思。熱水果茶水果茶以玻璃水壺裝住，入面加左啲水果，餐廳好貼心用蠟燭熱住，飲到後面都仲係暖暖地。精選芝士蛋糕最後以巴斯克芝士蛋糕作結尾，蛋糕好軟滑。…Read More

今次食咗$1198鳥海山鐵板二人套餐，連加一大概$700一位，以晚市鐵板燒嚟講唔算太貴，一樣有龍蝦、鮑魚、鵝肝等鐵板燒常見嘅高級食材。首先有沙律同埋刺身，刺身係3款鯛魚同埋三文魚，石鯛、真鯛嘅肉質有彈性，而三文魚十分肥美。第一樣嘅鐵板燒係活鮑魚，簡單以牛油煎香之後係活龍蝦，加$80可以加大龍蝦，就咁肉眼望未必見到個分別，但係一食就知比平時大隻，因為唔只係龍蝦頭，連平時好少會拆嘅龍蝦腳都有肉食，師傅將龍蝦尾起肉再用龍蝦膏、醬油炒香，肉質非常鮮甜又彈牙，係咁多道菜入面最喜歡嘅一道食完海鮮就到鵝肝多士，鵝肝入口即溶，底下多士都有用牛油煎香牛肉薄燒裏面係炸蒜同埋香蔥最後有炒椰菜、炒飯同埋面豉湯…Read More

季節前菜三點京都豆腐栗子(右下)，蟹肉拼沖繩水雲(左下)，鮟鱇魚肝鱈魚片。上菜既時候師傅會介紹食材同埋食法，豆腐豆味濃郁，中和咗栗子既甜味，蟹肉鮮甜，水雲酸酸地好開胃，鮟鱇魚肝用咗慢煮既方法烹調，口感軟滑，味道香濃。白松露油櫻花鯛魚薄切每一片都厚薄適中，配以白松露油，再灑上淡雪鹽，味道好有層次大池魚壽司同鰈魚壽司食材非常新鮮，鰈魚都灸燒得岩岩好，油香十足野生生猛龍蝦師傳先煎香龍蝦，然後起肉用龍蝦膏炒熟，口感爽口彈牙，味道惹味。三文魚籽配北海道帆立貝帆立貝兩邊煎到岩岩好，三文魚籽餐廳自家醃製，甜甜地幾好味。美國牛柳、牛肉卷可以配以鹽、洋蔥、炸蒜片等，牛肉juicy最後仲有櫻花蝦炒飯、炒什菜、魚湯同埋抺茶布甸，十分滿足。…Read More

今次試咗openrice訂位嘅鐵板燒套餐，原價$1380減到$880，前菜係自家製醬汁煮南非鮑魚，煮得非常入味。之後嘅3款剌身有真鯛、池魚同埋吞拿魚，吞拿魚用tataki嘅方式去處理比較特別，肉質柔軟，吞拿魚腩手卷以鬆脆嘅最米餅餅皮做底，中間係壽司飯，上面係軟滑嘅吞拿魚腩蓉，口感豐富！鐵板燒前仲有一個海鮮茶碗蒸，蛋味香濃。鐵板燒打頭陣嘅係龍蝦，龍蝦大大隻，龍蝦肉爽口彈牙，以龍蝦膏、牛油、醬油調製嘅醬汁更加突顯食材嘅特色，調味自然，唔會太重口味之後有香煎鵝肝多士美國牛肉做咗厚燒同薄燒兩種食法，厚燒牛柳鎖住肉汁，薄燒牛肉捲住香蔥同炸蒜，各有千秋淡麗嘅蜆清湯鮮味滿載最後有煙肉香蒜炒飯同埋炒芽菜是日甜品係白桃啫喱…Read More

餐廳兩排主要係卡位，中間既位置都有半邊卡位，座位寬敞，枱與枱之間都有足夠空位，坐得都幾舒服。餐廳提供街頭小食、湯粉、撈檬、飲品等，選擇豐富。特式綜合牛肉湯河粉有生牛肉、牛腩片同埋牛肉丸，生牛肉厚薄適中，湯夠熱，所以浸熟咗啲牛肉就岩岩好，牛腩片煮得好淋，幾重牛味，湯底仲有啲香料、炸蒜、芽菜同埋洋蔥，份量十足。西貢三色撈檬三色指蝦餅、扎肉、胡椒豬肉串，配料有大量既青瓜絲、蘿蔔絲、生菜絲等，蝦餅食落去彈牙，而佢既扎肉同坊間唔同，入面有豬耳好有咬口，加埋醬汁酸酸甜甜，食落去好開胃。…Read More

圍方有唔少餐廳，依間烏冬店話係日本名古屋嘅過江龍，1925年開店傳到依家第五代，選用日本小麥粉同埋全人手製作正宗嘅烏冬，睇落好似唔錯，而且店外都有人龍。湯底有老店傳統味噌、黃金鰹魚清湯同埋招牌咖哩三款，今次揀咗親子煮烏冬，亦即係雞肉同埋雞蛋，落單嗰時侍應會問嗰隻係生雞蛋o唔ok，烏冬唔係用普通碗裝住，而係用砂鍋上，所以一路食都好夠熱，烏冬算係彈牙，不過鰹魚湯底飲唔到鰹魚嘅鮮味，淨係得鹹味，當烏冬索咗啲湯就會越食越鹹，湯底有待改善。…Read More

相信依度嘅牛肉餅無人不曉，就算平日夜晚8點幾嚟到都座無虛席，一路食都繼續有人入嚟，證明咗佢嘅人氣。牛肉餅一份兩件，望落大大個，表面有啲焦香，咬落去熱辣辣，而且真係好爆汁，食嘅時候一定要搵個碗同埋匙羹盛住先得，皮薄餡多，食得出係好足料，真係難怪有咁多人提及依度嘅牛肉餅。…Read More

放假去到西貢行下，揀咗小巴站附近嘅一間cafe，樓底高加上簡約嘅裝修，感覺幾舒服。今次食咗pulled pork benedict，pulled pork堆到成座山咁高，份量十足，調味比較濃味，適合配埋sourdough一齊食，面頭有啲青蘋果絲，食完濃味嘅豬肉再食啲蘋果可以清新一下。雖然食物嘅價錢唔算平，但係考慮到係喺西貢區，而且食物份量頗大，所以都可以講算對得住佢嘅定價嘅。…Read More

提起新疆菜就會諗起巴依餐廳，餐牌嘅選擇唔算多，菜式就只有前後兩頁紙，主要就係唔同羊肉菜式。烤羊腿超級大份，可以3-4個人share嚟食，就咁望落好似好普通，但係味道唔錯，層皮烤到好似餅乾咁脆，皮下嘅油脂都迫晒出嚟所以食落唔會好肥膩，羊肉嘅口感好嫩滑，感覺仲係有肉汁、帶點濕潤，即使唔係連住皮嘅羊肉部分都係好食嘅。…Read More