piglet0903's Profile

區內具質素的食肆屈指可數，歐式餐廳尤乏，惶論歐式小酒館。這店酒單極駭人，堪稱獨步區內。需知Burgundy Wine極其纖幼易損，於亞熱帶氣候保存實在艱難，其濕其熱如香港，難度倍添。先不問個人喜好；竟以 Leroy Aligote 作House white，試問有幾家能、敢去嘗試？單這點已值高度評價。食友最常遇到，美酒當前，惟店家竟開天價，酒興自然全消。這店絕無此弊，Calon Segur 1985 作價HKD1300+10%，其鮮其美，反映酒的狀態其佳。酒友如自攜佳釀，實辜負店家美意。(屬個人意見，食友自行判斷好了) 出品亦見精美，海產家畜無所不包，牛肉生熟洽到好處，值得表揚。菜單為廚師發辦，作價HKD400+10%。菜式皆無名，用餐前、上菜前均會提供出品的主要材料，個人極喜這簡約安排。附照片給眾食友參考。…Read More

是晚一行十人到大漠聚餐去，羊肉湯、 羊鞍、大羊腿超美味。時常因人數不足未能 K.O大羊腿，是次十人小隊分享又覺未夠滿足，超矛盾。首次嚐到燒牛柳，超濃鬱的脂香與香料氣味，外加肉汁豐盈很是彈滑，一吃難忘。問是晚搞手主謀如行訂購，搞手笑而不語，著我低調就好，真神秘。食物出品一以貫之的出色；每次都會細閱其酒水單，是晚又有新款瓶裝啤酒進場。香港啤酒酒款命名很有趣，取本土地名、盛事。大浪灣，口感鮮爽又帶醬香，平衡感極佳的IPA酒款。波爾多紅酒定價合理，是晚取了 CH PONTET CANET 08,單寧酒勁不缺，紅果醬果不絕，好酒一瓶！感覺店主應是愛酒之人，有機會定要向其請益分享。下月再會，以解公務上的不遂煩憂，也藉故多乾幾瓶紅酒。…Read More

惱人的工作依舊，不贅。事後到土瓜灣大漠晚飯去！周遭變化極大。要上樓並以專供劣食馳名（或曰「創新」口味）的壽司店不見了；毗鄰的米其林推介的清湯腩、咖哩飯，裝修工友正忙著清拆還原店面。對街唐樓，食肆、足浴指壓全被市建局回收了！北帝街景物人面皆非，首批食肆唯大漠、金翠存。大漠店內香料味依舊、人聲依舊鼎沸。注意到啤酒選擇多樣化了，泛歐如比利時KWAK也囊括，不俗！點菜；羊鞍，沒刻意叮囑生熟度，反正廚房忙亂，廚子沒空瞻前顧後，點了也是白點！成品沒差，鮮香味美，沒化學小梳打味道，廚工醃味功夫紮實。價位在同區略高，不為過！要便宜去吃花園豉油梳打膠羊扒好了，也百三圓。羊癮起於旺角花園街時，該膠扒也洽作美沙酮止癮！量多嘛！羊叉燒，肥肥肥肥肥！但美！毫不正統卻彰顯港人的能屈能挫；縱觀全場，小屁孩不少，叉燒蜜汁濃甜，「呃細路」多添飯必備最佳配搭。油膏越六成，豐腴滋味，堪配軟滑「淋」。淺嚐可，切忌獨享，否則要去光顧心臟科~牛尾湯，詭異地濃鬱甘香，奇哉怪也！看似一般雜菜湯，偏隱含油膏羶香，詭異地美味。我常戲稱此自瘧滋味，氣味抗拒，卻吃個不停。整天辛勞感覺迅即被小小一碗治愈。單刀赴會，吃飽喝足真心讚！相片不補了，去看網上各食友的就有！小店吃的就是情味，從不奢望有Gaddi's等級接待，要吃的是食物非服務，吃服務來土瓜灣幹嘛？反正合我這鄉野村夫的口胃，要餐紙有餐紙刷嘴，要啤酒有冰碗，還求啥？打比方，我家家傭我也不強求合意，達標何苦求極緻？工地下屬亦不強迫，相敬如賓就是，所謂好來好去嘛！工事不暢兼喝多了，有感！…Read More

講堅，真係人仔果時已經聽佢個名，行開呢頭，緊要幫襯吓！潮州店緊要試試鹵水，要鵝腸？冇！要鵝件？冇！鵝片有嘞呱？有！仲好入味𠻹！唔係死鹹，有溫和香料味（如桂片、草果），輔以超入味軟滑鹵豆腐，大滿足！食九肚魚或蠔烙，有點怕其腥臊。簡簡單單嘅蘿蔔烙就最啱心水！熱烘烘、脆咯咯，加白蘿蔔的自來甜。吃得痛快，誠意推介。賢內助話想食鹹魚，見有煎的，就整份試試！望落修係炸唔係煎嘅，算！都叫鹹香。喚侍者多送我白糖一小碟，又鹹又甜咁，越食越想食！白糖送達時，侍者半推薦半請求，話鵝掌湯鮑食得過。不勝其煩外加唔好意思推卻下，就範了！一份試試味；唔差，但好難叫好！原材料問題，試問你想罐頭鮑有幾好食呢？況且收你百四蚊而已，將就將就！濃味肉食放最後，沙嗲醬行貨得很，牛肉也如發泡膠，不贅；芥蘭以薑水灼後少油快炒，苦澀盡除，可口！下回薑汁油鹽快炒可也！再來炒桂花蚌埋尾，好聽就叫「黑松露醬下得恰到好處，不奪豬爽肉、桂花蚌原味。」究其實，唔落好過落，落咗賣貴幾十而已。炒鑊炒功扎實，底味十足；嫌擺盤太玩嘢，竟以草莓味百力支作架；令我懷疑廚房是邊啖零嘴邊作菜不。批曰：鹵水膽有味，味部、廚部功底扎實。茶市點心新鮮熱辣燙口。惜地理位置略欠，同區強手不少，致生意一般！努力加油，勿浪費了多年字號。…Read More

老實，你想自助餐咩味吖？咪又係果D，唔通俾龍肉你食咩！整體算係咁，大佬，要計數㗎，唔通得三十人book預一百人餐咩，唔駛錢㗎預嘢？好正常，係咪？但大哥，凱悅喎，唔係粵海喎，所以樓下話D嘢唔夠款、唔新鮮，就真係罪過嘞！店方要反省反省，知冇？最靚係煲中湯，但都係有味精嘅，點搞？金玉其外就最啱形容呢間嘢，食店最弱嘅係食物，其他如侍者、環境都叫幾好，幾咁反高潮呢你話！美國佬，要搞搞佢嘞。係得個club lounge D嘢叫好少少，唔好咁大細超，唔係個個都住呢度ka ma~要改善改善。我試埋散叫先一次過評食物，咪唔登呀！警醒下D為食物而去嘅食友，做個參考都好嘛，係咪？有恆生白金免加一！…Read More

女友生日，揀左呢度hea兩日。得間cafe 同 呢度揀，揀呢度食第一餐。「先生飲D咩？」五十蚊一盅茶！？鑲金嘅唔通？揀左兩百二一位嘅午餐B，老實講，不過不失。拍青瓜拌燒腩，青瓜汁唔錯，燒腩俾人叮過，叫熱，但唔好食！點心兩味，大路蝦餃，粉果，一般。蘿蔔糕「瓊」乾油先上吖嘛，幾樣衰吖妳話成碟油。唔脆口之餘亦唔好食，店家好似一早知道咁，你想要嘅調味料已經擺哂響枱度！炒蝦球略油，但大隻，四隻蝦叫做唔係賺足你，炒豆角、牛炒飯想像唔到咁大碟，我叫大食，但都幾飽吓！甜品自選三款，上至果盤、下至五糧液雪糕都有，叫做幾特別，名就大於實，亦正常，如果真係五糧液味，想食死𡃁仔乎？實收四百四，有恆生白金吖嘛！記住帶喎！唔係要五舊水㗎。…Read More

其實響炮台山要食上海嘢，我有得揀第二間咩？？燻蛋有淡泊的煙味，引人嘅地方反而係溏心黃，好睇但食味一般！醉嘢做得麻麻，唔入味之餘支紹酒亦認真麻麻，我叫嘅係醉鴿，斬得好仔細，呢點係唯一堪提之處，你話幾可悲呢！反而燻魚就食味認真唔錯，濃淡得宜，一食而知唔係坊間𡃁仔九撈調味，出師傅手筆也！但魚件多骨，要小心呀！再黎黃魚羹，我好質疑佢地點揾到黃魚，野生嘅係天價，養嘅係染色嘅，越諗就越……噢，好有魚味，係魚腥味呀！搞鬼在佢落青豆，兩舊水嘅就咪鬼落啦，好降呢㗎雪藏青豆！知嘛？唔受得油就咪食上海嘢！入得嚟就預咗！鱔糊、爆牛肉都係咁油，好味道，心血管亦頓覺塞塞地，冇打緊，好味就得，繼續食！埋尾嘅炸銀絲卷、擔擔麵，係陳總為飽而加嘅，一般貨色而已！我心諗食多個油膩餸好過啦，係心諗，你咁勁，你唔同陳總講！？…Read More

一次過行勻全部尖嘴新場，於 i sxxxxx~望到彌敦道T.G.I. Friday's嘅廣告牌，就上去HEA吓啦！仲有SPECIAL MENU~就叫咗漢堡、六安牛扒，跟多個雞菜沙律先！頭盤可改水牛城辣雞翼，係用十蚊磅嘅孬種雞翼，極細，就算有用牛油煎過，調味唔差都要扣分。三安漢堡件牛煎燶咗，件頭再大都要失分！係得個六安扒好少少，叫有牛味又冇乜俾食粉強暴過，百七蚊想點先，係咪？沙律就唔多得，沙菜水都未倒淨，就撈醬嘞，有水喉水味之餘，濕爆𠻹，唔得！雞肉都唔多得，有翻煎燶味，收百三蚊，要俾少許誠意好喎！哦，原來有添飲嘅，唔出聲呀咁都，都冇寫過響餐牌度啫，有古古惑惑想做少D之嫌！食就真係好一般，但叫做個場夠大，空間感十足咁！坐多陣都唔怕焗促！…Read More

與陳總、許公子小聚並慶生，取道銅鑼灣分陀~軟性飲品一價任劈，抵！沙律並無出現食唔完之勢，但頭盤可謂絕對唔夠分。煙三文蝦卷，四件一客，甩色㗎，我唔怕死食多件，免得過就咪食嘞各位。火腿金瓜，三件，件瓜有尾指--------指甲咁大件，襯下欄火腿，嗯，好飽！芝士帶子，兩件，指公咁大伴以小量沙律菜，一言評之曰-----清新！主菜時間，可幸主菜份量、味道尚可：烤牛肋，大大碌，燒烤醬味為主而肉味欠奉，即係咩味？燒烤醬味薯片咁既味，味精味囉！派咳牛扒十安士，安得利貨色，都叫做有牛味，最值叫算呢道嘞！哩汁春雞，好輕手嘅鬆肉粉味，算有良心嘞！百七蚊食半隻春雞？係呀，有景睇嘛大佬，隻團個老闆都好有景！埋單記得用匯豐，七折呀，咪笨實呀，ok?…Read More

是晚宵夜，取道盛八。以貨論貨，唔差，但就偏貴嘅，過百一碟肉，得7、8片。認真奢侈。成舊水八片肉，大家試吓帶你阿媽去，佢必定話好那利！所以我剩係帶我老婆去囉！哈哈。佢D牛肉絕對係食得過，貴還貴呀！如果你/妳傻仔，俾六十食佢D雞呢，我真系要話你有錢兼識食.佢D海鮮、熟食點？咪傻啦，人家賣燒肉㗎，你唔好去魚檔買豬肉。況且廚房成班0靚仔對手洗乾淨未都成問題啦，何況叫佢地煮俾你食！煮個出前一丁好冇食都成問題啦佢哋！我費事又要食又話人地唔好食！話時話班0靚仔真系亂黎，D野食未上，就拎張單黎叫我地埋左先，趕客都唔駛比面嘅。偶爾去豪吓唔係問題，但要當佢中價嘢餐餐都去呢，我不去留返D錢揾間靚中菜食吓海味好過！…Read More

有個慣性，就係二個人叫三個餐、四個人叫五個餐，如此類推，可以試多D丫嘛！同細佬兩打友，叫三個 set，正路丫！炸雞扒係雪雞，正常，冇咩雪味，雞味亦然，但就太厚粉勒，加少少味就可以更好，好過剩係食個汁撈生菜絲丫嘛！甜麵醬吉豬就真真係唔差，起碼唔係街邊套餐味丫！要試就試呢個啦！藍鰭吞拿飯？我會聽你鬥噏至奇！照試，食落粉粉地咁，去貨慢啦實係，咪試呀！「佢放凍烏冬個木板盒有冇洗㗎？」一日過百客，阿姐洗兩洗就算㗎啦，咁都仲問？「佢哋D衫咁『巢』嘅點解」落場亂擺件衫入櫃，趕住煲煙攔街嘛！「幾平喎，飲埋茶啡三舊水唔駛！」呢句就真勒，飽到上心口都係二百八！…Read More

老實講，宵夜邊爐百鬆D蚊響銅鑼灣唔算過火！佢個鍋底要自己散叫，冇問題嘅！大圍都係咁做，要圍皮吖嘛！佢汽水、啤酒由得你任飲，仲想點先？最值得提嘅，係佢D生料，唔係你屋企附近果D富臨，揾嚟餵狗嘅生料，人家手打四寶丸呀，唔係機啤四寶丸呀；肥牛係肥牛，唔係肥糕呀，真抵讚。又冇話無呢樣料就亂塞其他垃圾俾你，認真唔錯！以後各位兄弟去食火鍋，知去邊間啦？…Read More

一點去到食午市，半場有人，唔爆。叫個九十八嘅餐，頭盤枝豆，包豬、牛肉共一百克並伴以蔬菜，四十圓以下串燒一串，烏冬半餅，餐飲及雪米糰。老實，全無技術可然！魚湯、sukiyaki湯底，倒味精汁出黎溝嘅！豬肉你話係黑豬我都冇計，你話係咪係囉！肉叫做冇入到雪，冇異味！咁樣收九十八呢，實有一半係俾咗業主啦！豬肉包蔥串收四十，抵呀！好在跟餐姐！唔判你死刑住，食埋你個晚市睇下你俾咩我食，食水深唔深先再講！食午餐呢，就食佢個六十八就得，賺唔到你好多㗎佢，幫下手交租囉大家！…Read More

本篇起將就土瓜灣、天后、銅鑼灣為主力推介。土瓜灣篇之一一字記之曰抵，充饑者首選，惟質素平平。常聞該店南乳炸雞何等卓越，仔口味而已！僅堪與爺爺雞記平手！南乳加糖撈酒水即成，何秘之有？費解！玉露何處無售？惠康百佳大量供應源源不絕，不值一哂！著眼處應為份量而非味道，進內者不費三十大圓即能飽腹，何求？小店經營，力抗大業主逆市加租壓榨，可敬！故使味道平平亦應以腿行動支持，以保生存空間！縱觀此區，受沙中線概念所傷之經營者甚眾，易後再易！批曰：特色了了，銀根短缺者首選，味精過盛，宜手下留情，以保客人小命。麵食優於飯類，與茶記較之略勝！…Read More

誠意點心，值得推介。市面充斥大量劣質點心，大可盡錄。觀乎魚翅城，則盡顯其誠心！以燒賣為例，坊問多以胡蘿蔔、人造蝦子作topping。該店則不吝以元貝碎飾之；蝦餃以吹彈可破之澄麵裹以，內裡蝦肉若隱若現，何其誘人？反觀坊間，爆皮、即叮、來貨者甚眾，何以茶樓酒家淪喪至此？三時入座，理應為落場時候，其間侍者雖顯心焦，亦未遇不禮對待，可喜！批曰：客人如遇落場時候，自應識做，切忌賴死，如犯慎之！ 非主打項目亦如斯出眾，可見飲食業何其難撈，共勉之！ 反觀上市集團出品日見差劣，應起聲討之！切勿姑息！…Read More