Zerone2021's Profile

「小小食掂」喺筲箕灣港鐵站對出，主要做外賣生意。雖然舖仔細細，但MENU幾豐富，炒粉麵飯、炸物、滷水同糖水都有賣。老闆娘推薦嘅雜錦滷水好大份，款式亦好多，有牛展、墨魚、豬耳、豬肚…係宜家少見賣滷味賣得咁齊全嘅檔口。炸魷魚鬚用咗吉列皮整，食落脆身啲，仲有麵包糠嘅香味。賣$15好抵食。手撕雞撈腸粉亦都好特別。起初仲擔心腸粉嘅甜醬會同手撕雞唔夾。但手撕雞好重麻油香，同滑溜腸粉一齊食可以減膩，好MATCH。咖喱牛腩飯好值得一試。咖喱濃陏香辣，牛筋牛腩軟腍入味，份量都幾多。整體嚟講食物性價比高，而且店員都戴晒口罩同手套，食得安心放心。…Read More

今日同朋友行過中環，到咗威靈頓街附近，見到除咗一般酒吧同西餐廳之外，有一間走舊香港懷舊路線的飯店，裝潢樸實，牆上的80年代舊海報，卻吸引了不少人在門外排隊入座。論主菜款式，這間店不及其他中環茶餐廳種類多，但就因為專注做好豬扒和豬手的粉面飯，所以特別出色。見到餐牌上蔥油豬扒飯係人氣推介，所以特別點了一客嘗試。豬扒比一隻手掌還要大，而且十分厚身，肉質鬆軟，外皮鬆脆，加上蔥油非常香口。切開豬扒，才見到原來質地乾身鬆脆的豬扒下面，有濃濃的豬扒湯汁，為粒粒分明的白飯添加不少味道層次。另外朋友點了一客話梅花雕豬手幼麵，豬手通常冇咩醬汁，以為撈面會好乾身，但效果又比想像中好喎，面條本身撈左油，所以入口滑嘟嘟，雖然係比較油膩，但偶然一次就算啦，整體感覺好好，話梅香味突出多點就更好。最後同朋友share左一個辣味海蜇，質地爽口彈對面是不錯的小食，而且味道不算很辣，啱幾個朋友齊齊分享。…Read More

今日同屋企人去咗炮台山食越南嘢。西貢越南真味係一間小型餐廳，所以我哋坐咗喺出面食。我哋叫咗一人火車頭鍋粉、半生熟牛肉湯粉、安格斯牛肉湯粉、越式粉包同埋網紋春卷。一人火車頭鍋粉份量非常多，而且有好多餸菜，例如豬什，白蘿蔔，同埋最出名嘅生牛肉。河粉配合餸菜同埋芫荽一齊食，有芫荽嘅爽脆，生牛肉嘅鮮味，同埋河粉嘅幼滑，令到一啖入面有好多口感同埋味道，幾好食。另外，安格斯牛肉湯粉亦係另一個好推介。同其他半生熟牛肉湯粉唔同，安格斯牛肉有一半肥一半肉，所以食嘅時候口感比其他牛肉嫩滑，有入口即溶嘅感覺。除此之外，安格斯牛肉嘅牛味比其他牛肉重好多，各位鍾意食牛嘅朋友一定要試吓。而半生熟牛肉湯粉比安格斯牛肉湯粉價錢較平，但味道亦唔錯，而且牛肉份量多。喺小食方面，越式粉包好似潮州粉果，入面有花生，肉碎同埋蔥花。但係粉包嘅粉皮比潮州粉果嘅粉皮冇咁煙韌，亦冇咁通透。不過未到方便亦唔差，更加可以配合酸辣魚露醬汁一齊食，味道更佳。網紋春卷味道似酒樓嘅炸蘿蔔卷。外皮非常鬆脆，金黃嘅炸皮賣相誘人。而餡料方面，則有蘿蔔絲同肉碎。春卷皮會索曬啲酸辣魚露醬汁，所以一定要配合醬汁一齊食。整體而言，價錢合理，份量不錯，下次經過北角或者炮台山可以走入內街試吓。…Read More

係觀塘駱駝漆第三座4樓有一間高質但係低調嘅西餐廳，Call Me Chef。廚師有法國藍帶，餐廳環境清幽， service好好。首先，介紹前菜。南瓜湯有極濃嘅南瓜味，但唔會有纖維，口感非常幼滑。而吞拿魚沙律嘅吞拿魚份量絕不吝嗇，每一啖都有吞拿魚肉碎，配蘋果、沙律菜同埋沙律醬，係一個非常開胃嘅前菜。主菜有四碟。第一碟係香煎柚子雞腿肉配香甜蕃茄燴飯。其他餐廳嘅一般燴飯都會用忌廉煮，務求令每一粒飯都有軟滑嘅口感。但係，呢間餐廳用新鮮蕃茄慢煮意大利米，令粒粒意大利飯軟熟之餘，蕃茄清新嘅味道滲入其中，一啲都唔肥膩。另外，雞腿肉多汁鮮嫩，而雞皮就脆卜卜，柚子汁同雞腿肉互相襯托，帶出整碟餸嘅清新主題。第二碟係烤釀明太子無骨雞翼配明太子奶油意粉。明太子唔係便宜嘅食材，但係廚師用咗非常多明太子係雞翼、裝飾以及意粉入面。無骨雞翼係雞全翼，外皮金黃色，入面釀咗超過一湯匙嘅明太子，每一啖咬落去都有明太子嘅鮮甜以及雞翼嘅香味，非常值得欣賞。而意粉份量適中，奶油唔會落得太重手，能夠中和明太子嘅味道之餘亦唔會蓋過味道。整個菜式嘅每一個重點都恰到好處。第三碟係特級手工XO醬拌炒廣島蠔意大利粉。呢道fusion 菜式使用廚師細心手工製作嘅XO醬，每一啖意粉都有濃烈嘅海鮮味，同肥美嘅廣島蠔絕配。菜式上有兩隻廣島蠔。每一隻都有一隻手指咁大，飽滿肥美，切開嘅時候蠔汁一擁而出，香氣撲鼻。由於廚師使用封煎嘅方式烹煮蠔，令鮮汁可以所係蠔肉入面，而且嚎肉鮮嫩，唔老。第四道係經典卡邦尼意粉配63度溫泉蛋及香脆煙肉。卡邦尼意粉醬汁比一般口味較輕，為要配合溫泉蛋汁，睇得出廚師細心策劃。溫泉蛋晶凝通透，一截即破，流出蛋汁。將蛋汁混入意粉一齊食，令意粉更滑，口感一流。而每一啖亦配食到香口嘅煙肉，為菜式增添味道。飲料方面，有柚子蜜及特盛水果茶。柚子蜜唔會過甜而水果茶有一粒粒生果，有蘋果、木瓜、鮮橙。生果浸係花茶入面滲出淡淡果香。而且，水果茶冇落糖，入口清新。最後，甜品有朱古力同綠茶雪糕。朱古力味濃厚，有黑朱古力嘅層次。而綠茶雪糕味道不俗，食完有回甘。雪糕口感又滑，重奶味，值得一試。整體而言，環境唔錯，性價比極高，環境清幽，令人食得舒服，服務質素非常好，下次約人食飯，記得支持呢一間本地高質西餐廳。…Read More

每個禮拜日，屋企人都會想出去食飯。所以，今次去咗一間專賣刀削麵嘅餐廳，晉皇刀削麵。我哋叫咗熱拌牛腩刀削麵配四川擔擔麵醬。首先，牛腩一啲跟腱都冇，所以非常軟諗，一咬落去就散開一絲絲肉絲。而味道方面，五花牛腩異常入味，有淡淡嘅八角以及唔同香料嘅味道係肉絲入面。而刀削麵亦都好好食。麵質有咬口，而且唔會因為一段時間之後而變軟，配上四川擔擔麵醬汁非常開胃，亦好惹味。除此之外，一碗麵嘅份量非常大，可以兩個人食，而且唔係淨係麵多，牛腩每一舊都好大舊。所以好抵食。另外，麻辣雞絲熱拌刀削麵亦都非常好食。麻辣醬本身唔會好似老干嗎嗰啲咁鹹，亦唔會好多紅油，但係味道上比老干嗎牌子嗰啲更加辣，而且更加惹味。大約一湯匙嘅麻辣醬已經可以足夠令我食完之後流鼻水同出汗，係真正嘅麻辣，可以媲美譚仔嘅大辣。所以如果有鍾意食辣嘅朋友，經過天后真係要試一試。仲有，消暑冰刀係一個夏天出街流到一身汗之後好好嘅選擇。啲個冷拌刀削麵有青瓜、雞絲、泰國雞醬。雞絲分量非常多，大概有一隻雞髀嘅肉量。而泰國雞醬同青瓜絲一齊食非常醒胃。除咗刀削麵份量非常大之外，啲間鋪頭嘅小食份量亦唔少。蒜泥燻蹄做得非常出色。燻蹄脂肪同肉做到黃金比例，咬落去脂肪層唔會感到油膩，反而爽口。每一啖都有煙燻嘅香氣以及蒜蓉濃烈嘅味道。每一塊都有手掌心大小，份量絕對唔少。另外，醋椒黑木耳亦係一個好食而又健康嘅選擇。黑木耳非常爽口，食得出係廚師細心過冷河嘅效果。而味道方面，醋汁酸酸麻麻，食得出醋本身有花椒喺入面。總括而言，性價比高，份量非常大，食物質素唔錯，下次經過天后要再試一試。…Read More

餐廳位置便利，座位闊落，無論一大班人定一個人嚟食都OK。摩洛哥雞肉沙律材料好豐富，好colourful。入面有沙律菜、南瓜、紅莓乾、杏仁，雞扒煎過但唔肥膩。串燒香烤牛柳粒一串一啖，食起嚟好方便。醬汁微甜，食落好香。buffalo wings好多地方都有得食，但呢度嘅雞翼除咗用辣椒仔調味，配搭嘅醬料仲係cream cheese同牛油果，兩樣油脂香豐富嘅醬料中和咗雞翼嘅鹹同辣，味道層次豐富。洋葱煙肉流心蛋焗大啡菇面頭有層微焦嘅芝士，厚肉大啡菇吸收晒煙肉嘅油香，流心蛋令大啡菇更滑溜~今餐最特別嘅應該係呢個北京烤鴨漢堡。烤鴨通常都配煙韌嘅麵皮食，呢度配搭鬆軟嘅漢堡包，同樣咁match。烤鴨足足成塊扒咁大，肉厚多汁，鴨油好香。配埋烤鴨醬、青瓜，好有食填鴨嘅感覺，而且大大份，好飽肚。餐廳仲有唔少特飲，例如芒果奶蓋，同埋近幾年嘅大熱—蝶豆花，兩杯顏色都咁靚，打卡啱晒。…Read More

今日同朋友嚟到呢間叫八沢嘅日本餐廳，未入到去已經覺得個門面充滿住日本特色。鋪頭採用QR code 嚟點菜，比較環保，用起嚟十分方便。店內有唔少富日本特色嘅飲品，所以同朋友叫左一人一支野飲， 一支係靜岡抹茶可樂， 一支係富士山柚子梳打。如果鍾意飲酒，舖頭都有好多唔同嘅酒，如蜂蜜、果味酒品俾客人選擇。主食方面， 我哋叫左芥末果醋帶子冷烏冬同埋廣島蠔肉碎烏冬， 兩樣都值得推介。稻庭烏冬非常彈牙，比得上喺日本食嘅質素，帶子爽口鮮甜，廣島蠔亦十分新鮮，份量仲唔少。特別係昆布湯好清甜，飲多啲都唔怕。另外， 我哋仲加咗明太子雞翼， 釀雞翼好惹味， 亦十分足料。總括嚟講，呢個係令人滿意嘅一餐。如果想喺香港食到日本地道嘅風味，不妨嚟呢度一試。…Read More

今日放工約左奶奶一齊食晚飯.因為佢話俾我知公司附近開咗間新嘅源味開元米線.所以就叫我一齊試吓！估唔到去到呢間餐廳原來唔止有米線食㗎！食物真係好多元化，一睇餐牌除左基本米線外.原來仲有多款烤魚.雞煲同多款火鍋配料！落單嘅店員會介紹一下烤魚嘅款式煮法，同埋佢話廚房入邊有個魚缸養住啲魚架.確保所有食材都係新鮮製作！烤魚除了基本香辣味、鮮青椒味、泡椒味及豆花烤魚..還有可以整唔辣的菌香豆豉味及酸菜蒜香味烤魚.照顧埋唔食辣既朋友！而雞煲都有四款口味啱哂一班朋友嚟食雞煲飲啤酒! 最估唔到有較為小見既酸菜雞煲😬下次一定要試下😬而咁多選擇奶奶選左較特別的豆花烤海爐魚.上枱已經嗅到香噴噴.用上原條烤魚先炸脆但又能保持肉質鮮嫩，配上洋蔥青豆粟米及嫩滑嘅豆腐.真係好好味！食到唔停口😬另外還叫了招牌口水雞.他們是堅持是用鮮土雞去做菜.比起其他店的冰鮮雞.這道口水雞辣度剛剛好.即使有好多醬料.亦食得出雞嘅味道👍飲品奶奶叫了大大杯無添加百香果汁，酸酸甜甜.開胃之餘亦好解辣👍…Read More

平時食粉麵飯多，假日自然會想放縱下，今個星期日經過北角一間新開小食店，見到有唔同款式嘅雞蛋仔，就買嚟試吓。剛到達睇餐牌，老闆娘好友笑容咁歡迎我哋，為我地介紹不同口味的雞蛋仔，細妹鍾意抹茶，我鍾意朱古力，所以揀咗一款抹茶朱古力雞蛋仔。我最怕太甜的雞蛋仔，雖然今次沒有叫少甜，但是甜度適中，朱古力味雖然不是很突出，不過有大量抹茶粉，為整個小食增添清香，而且粉漿調校得幾好，新鮮熱辣辣的這塊雞蛋仔外脆內軟，內裏保持濕潤軟綿綿，質素不錯。光顧小店，必定會順便買幾串魚蛋牛丸墨魚丸，特別欣賞這裏的墨魚丸，口感彈牙，而且又墨魚鮮味，不是用麵粉搓的次等貨，加埋辣醬放入口，很惹味😊👍🏽下次經過再光顧。…Read More

喺西灣河近太安樓嘅街市開咗間新嘅海南雞專門店，可以買切雞或者飯盒，唔啱嘅話都有豬扒雞翼呢啲選擇，$40做到雙拼。佢哋招牌係去骨海南雞飯，另外仲有文昌雞、口水雞...... 鍾意辣嘅人可以試吓佢哋嘅口水雞飯。醬汁比較濃稠，夠鹹夠麻，應該落咗唔少花椒同麵豉，可能同我哋食開嘅紅油or麻醬type有啲唔同，但味道唔錯。雞肉已經調好味，而醬汁撈油飯一流。食埋底下嘅酸紅白蘿蔔可以解辣。飯一律跟餐送mini汽水/例湯。店入面仲有賣唔同小食，例如炸雞球、香茅豬扒、滷水牛筋、豬手...... 款式幾多元化。小食適合屋企飯加餸或者開party。仲見到有撈檬、咖喱飯呢啲比較少喺呢類店見到嘅菜式，想有新意啲都可以try try。…Read More

The Salted Pig 位於港島小蘇豪鯉景灣，以豬肉菜式作主打。餐廳最出色的是環境，客人坐在沙發上渡過happy hour，十分舒適。前菜點了小食拼盤，份量相當大。每款小食配以相應的醬汁，讓你一欸過嘗遍各款前菜。當中以香料雞翼最出色，脆炸雞翼配甜辣醬，十分惹味。拼盤中亦有炸豬皮、脆豬肋骨等豬肉類小食，挺有特色。主菜點了西班牙海鮮飯，配料很多，份量很大，足夠多人分食。這裏的海鮮飯並不走傳統純粹風格，所以配料除了基本的貝類和紅椒，還用上辣肉腸。飯能吸收海鮮湯，但還多了辣肉腸的鹹味，跟傳統味道分別很大。如果想作新嘗試不妨一試，但我仍然鍾情簡單一點的傳統風味。餐廳臨近海傍，很適合happy hour chill一下，客人多半來喝酒，再點些小食。…Read More

等一隻貓咖啡係一間流浪貓cafe，除咗照顧店內貓仔，亦會將收益用喺流動貓義工隊上。Cafe採用和風設計，座位寛闊，貓咪同客人都有足夠活動空間，又唔會overload貓仔。入座後店員好清晰咁介紹收費同規則。Menu比起網上見到嘅豐富咗唔少，而且食物飲品賣相同味道都比網上評價好，睇嚟店員都有心搞好Cafe。推介牛肉漢堡餐～漢堡夠juicy，煙肉唔會過鹹，配埋蕃茄生菜夠晒經典。加上非油炸薯條好大份，兩個人share都ok~店內亦有唔少蛋糕選擇，唔洗加錢嘅飲品款式都好多。最熱賣嘅一定係Oreo 朱古力，因為有靚有邪惡。但我覺得最有驚喜嘅係蜂蜜咖啡，飲落順喉，咖啡香滑。兩三點大部分貓貓都會瞓個靚覺，係影睡顏嘅好機會！！…Read More

唐記包大家就食唔少，不過你又知唔知有一間同唐記同一集團嘅中式快餐呢？冇錯，今日就介紹巧手製作。首先介紹一下鹹蛋肉餅飯。肉餅份量頗多，都有手掌心咁大塊。二肉餅入邊有其他配料例如馬蹄同埋少少蒜頭味。通常出去食嗰啲肉餅都係好油，但竟然今次就有驚喜。肉餅唔油之餘但仍然能夠保持肉汁。而鹹蛋亦唔會過分油，有啲油澤，一食得出唔係乾爭爭嗰嘅鹹蛋。除咗肉餅之外，各位注意健康嘅人士都可以放心，因為有三份一個飯盒都係椰菜。跟住我哋就講下馬拉糕。馬拉糕質地鬆軟，而唔會過甜，份量幾大，有一隻手掌咁大，高度有至少五至六cm。我本身諗住買咗當早餐食，點知食咗第一啖之後，覺得有啲好食，所以夜晚就當左甜品食晒成舊。除咗馬拉糕之外，就當然唔少得茶樓都會有嘅香蔥蝦米腸粉。蝦米都好多，每一條腸粉都有大概10粒蝦米🦐。而腸粉都幾滑。總知係一條高於正常水平嘅腸粉😂。最後，就講下金錢肚。金錢肚唔會好韌，質地軟熟，有別於一般酒樓。調味適中，唔會好鹹。整體黎講，價錢適中，係突如其來想食酒樓嘢嘅好選擇。…Read More

位於銅鑼灣嘅磯野水產位置好方便，MTR出行幾步就到。呢度菜式好多，但最出名嘅都係刺身。想一次過豪食多款海鮮刺身就可以點呢個磯野海鮮盛合，入面有大隻龍蝦、鮑魚、扇貝...每一樣都肉厚、鮮甜，完全冇腥味，反而係啖啖海水味。磯野壽司盛合八款每款壽司都唔同，例如三文魚、吞拿魚、甜蝦...啱晒心大心細嘅人。最吸引嘅就係充滿海水味嘅海膽壽司~最後點咗個鐵板炒野菜清清腸胃。雖然係菜，但用鐵板炒夠晒火候同香～～～…Read More

Mokumoku Yakiton係間日式豚肉串燒專門店，除咗常見嘅部位，連日本人好鍾意嘅內臟都有得食。特別推介以下幾樣：日本產青椒芝士豬肉卷係一個幾新鮮嘅配搭。半溶芝士加豬肉油香十足，但會有啲膩，而家加埋清甜青椒就夠晒fresh，中和咗成個味道。月見免治豚肉串建議沾生蛋黃食，肉串入面仲有軟骨，咬落口感豐富，香濃滑溜。日本蕃薯仔雖然好多地方都有，但呢度燒得唔乾，用嘅蕃薯仔又夠甜夠香，所以都值得當甜品咁食架。…Read More