LaHaMo的個人專頁

星期日諗唔到去邊，近近哋就去西貢行吓，西貢都有唔少餐廳，上OpenRice 搵到依間幾特別嘅茶餐廳食下午茶。我哋一共叫咗五個下午茶餐。………………………………………………炸雞髀配薯條⭐️⭐️⭐️⭐️薯條同雞髀都係即叫即炸，熱辣辣，個皮炸到脆卜卜，薯條炸到外脆內軟，好味道。西多士配火腿奄列⭐️⭐️⭐️⭐️火腿奄列正常發揮，西多士好有驚喜，裏面查嘅唔係花生醬，而唔係咖吔醬，炸之前浸蛋漿浸得幾夠，炸出嚟有啲蛋嘅燶邊，好食，如果淨係計西多士，我覺得達到5星好味。炸雞翼配沙律⭐️⭐️⭐️⭐️炸雞翼好味，但係沙律裏面有啲大粒嘅豆，個人唔太喜歡。西多士配豬扒包⭐️⭐️⭐️⭐️豬扒包餡料好足，有番茄、生菜、豬扒，屋企人表示好味。牛腩河⭐️⭐️⭐️⭐️有牛筋同牛腩，湯底濃郁，屋企人表示好味。凍檸茶 ⭐️⭐️⭐️⭐️茶味幾夠，唔錯。………………………………………………大笑爺餐廳的食物，食得出係用心製作出嚟，而且裝修都幾特別，好有香港懷舊特色，侍應亦都好好服務。…查看更多

十侍-棉花糖A5和牛壽喜燒專門店位於旺角豉油街，要搭升降機上去，入口有少少難搵。不過，少少困難係阻止唔到我哋搵好嘢食嘅決心。因為突發有事要慶祝，所以六點幾先打去book枱。好彩仲有bar 枱位可以Book ，唔使等位。去到餐廳一坐低就落左set $898的鹿兒島A5黑毛和牛套餐，另外可以加$198 要埋串燒拼同兩杯冇酒精飲品。………………………………………………鹿兒島A5黑毛和牛套餐 ⭐️⭐️⭐️⭐️⭐️套餐$898 包括約每人180g的鹿兒島A5黑毛和牛西冷肉眼、前菜、季節野菜盛合、自家製壽喜燒醬汁、日本蘭王雞蛋、讚岐烏冬或日本米飯 同埋 自家製雪糕。⭕️ 鹿兒島A5黑毛和牛西冷肉眼⭐️⭐️⭐️⭐️⭐️⭐️每人有大約180g嘅肉。肉眼會用一個木盒好靚咁樣裝住，仲會有一張由鹿兒島黑牛黑豚銘柄販売促進協議會發出嘅證書。店員會一塊一塊咁幫你煮好夾落你個碟。肉眼油脂分佈均勻，入口即溶，好好味。180g每人有3大片，好食到唔夠喉。⭕️ 自家製壽喜燒醬汁 ⭐️⭐️⭐️⭐️⭐️店員會先製作一個棉花糖，然後將自家製嘅壽喜燒醬汁倒落棉花糖上面，兩者最後溶為一體，十分特別，係屬於關東風嘅壽喜燒。⭕️ 前菜 ⭐️⭐️主要係海帶漬物，味道口感都麻麻地，而且分量好少。⭕️ 季節野菜盛合 ⭐️⭐️⭐️⭐️盛合有娃娃菜、冬菇、金菇、本菇、豆腐卜、豆腐、大蔥、蟹柳等，食材新鮮。⭕️ 日本蘭王雞蛋 ⭐️⭐️⭐️⭐️⭐️店員會將日本蘭王雞蛋打落一個好特別的金屬容器，再將攪勻好的蛋液打成慕絲狀比我哋點牛肉，十分特別，蛋香味濃郁，口感細滑。⭕️ 讚岐烏冬 ⭐️⭐️⭐️⭐️⭐️烏冬好滑好彈牙，用壽喜燒汁煮到甜甜地，好味。⭕️ 自家製雪糕 ⭐️⭐️⭐️⭐️Vanilla 雪糕，好味。串燒 Set ⭐️⭐️⭐️⭐️⭐️一共有五串，包括翠肉瓜、冬菇、秋葵、雞肉同 雞軟骨。即叫即燒，翠肉瓜、冬菇、秋葵都燒得剛剛好，充分保留到水份同蔬菜的口感。而雞皮都燒到脆卜卜，雞肉Juicy。巨峰提子乳酸梳打 ⭐️⭐️⭐️⭐️⭐️餐廳即調的梳打飲品，甜度剛剛好，不過細杯左啲。………………………………………………十侍用的食材都好高質素，製作亦都好用心。不過，我個人比較喜歡關西風的壽喜燒。如果鐘意食關東風壽喜燒，十侍絕對係唔錯嘅選擇。…查看更多

牛角燒肉部份分店出左個超破格值燒肉定食，德福廣場就係其中一間。定食包括是日前菜、沙律同埋昆布湯，仲可以免費無限追加牛角飯同飲品，都幾多選擇，有汽水、梳打水、蘋果汁、橙汁、烏龍茶、柚子蜜、茉莉花茶。而且仲可以用好優惠嘅價錢追加食物，例如加$3有兩片豬頸肉、加$6有兩片牛舌、加$9有兩片牛板腱。我哋就叫咗一個B餐定番日本國產牛、豚、雞四品燒肉定食，一個C餐燒肉&海之幸定食。………………………………………………B餐：定番日本國產牛、豚、雞四品燒肉定食 ⭐️⭐️⭐️⭐️⭐️有四款肉類，包括日本國產牛肩脊肉、牛頸脊、豚肉燒、日本雞爽肉。國產牛肩隻肉肉味濃郁，豚肉燒肥美香口。牛頸脊同雞爽肉就正正常常啦。C餐：燒肉&海之幸定食 ⭐️⭐️⭐️⭐️⭐️有五款食物，包括牛頸脊、牛五花、北海道豚梅肉、牛油廣島蠔、花虎蝦。北海道豚梅肉幾肥美，廣島蠔同埋虎蝦雖然係冰鮮貨，但係品質係唔錯嘅。牛五花就類似豬嘅五花肉，睇到明顯一層瘦肉一層肥肉。是日前菜、昆布湯、沙律⭐️⭐️⭐️是日前菜係中華沙律，同昆布湯、沙律一樣味道普通。鹽味北海道帆立貝⭐️⭐️⭐️⭐️另外都有用優惠價追加咗一啲牛頸脊啊豬頸肉啊等等。比較推薦嘅就係牛頸脊同埋鹽味北海道帆立貝。牛角飯 ⭐️⭐️⭐️⭐️正常發揮咁好食。牛角提供多款醬汁點燒肉，包括鹽醬、牛角燒肉汁、秘製燒肉醬、特製檸檬汁、辛味醬汁。………………………………………………今次牛角推出呢個定食其實真係幾抵食，不過就只有部份分店同埋部份時間供應。但係就成功令到牛角嘅晚市生意好咗。我哋嗰晚平日星期三 7:00pm鬆啲，都等咗大概10分鐘先有枱。…查看更多

星期六放假冇嘢做，見天氣很好，去咗赤柱行下，依家赤柱嘅舖頭同遊客都少咗好多，不過，赤柱大街啲餐廳酒吧個vibes 都仍然係咁Chill。行完赤柱熱辣辣，就揀咗Bistrocana 食個early dinner。………………………………………………英式炸魚薯條 ⭐️⭐️⭐️⭐️魚柳肉質幾好，外層炸得香脆，但唔係好食到正宗英式個種用啤酒嚟做脆漿嘅味道，不過我個人比較喜歡佢依個味道。薯條炸得唔錯，內脆外軟。辣肉腸薄餅 ⭐️⭐️⭐️⭐️辣肉腸切得幾薄，芝士足料，滴幾滴Tabasco ，好味。炸魷魚圈 ⭐️⭐️⭐️⭐️魷魚唔un, 但係又保留到魷魚應該要有嘅口感，外層香脆。朱古力蛋糕 ⭐️⭐️⭐️正常Brownie ，偏甜。Peroni 啤酒 ⭐️⭐️⭐️⭐️來自意大利的啤酒品牌，口感清爽。………………………………………………餐廳店員都好nice，比左個Happy Hour 價我哋，食飽左飲咗少少啤酒，仲有舒服到恰著左。事後寫依篇食評的時候先知道原來西貢都有Bistrocana 嘅分店，下次去西貢可以幫幫襯下。…查看更多

源自日本北海道嘅Tokachi Milky ，現時係中環同尖沙咀有分店。星期五夜晚去完PMQ，落返中環嘅時候經過見到依間裝修好靚嘅雪糕店，就決定入去幫襯。………………………………………………開心果朱古力雪糕杯 ⭐️⭐️⭐️杯底舖左一層開心果仁碎同開心果醬，再放北海道牛乳雪糕，然後頂部再加開心果醬同開心果仁碎，仲有蛋捲碎，賣相好靚好吸引。不過，雪糕唔算好重牛奶味，開心果醬亦都唔夠濃味，底部又太厚實，整體味覺同口感都麻麻地。唔係難食，但係普普通通唔值$58。………………………………………………開心果朱古力雪糕杯係期間限定嘅產品，如果有機會都想試下其他產品，例如藍天蜜乳，都係限定產品，睇圖片覺得好靚好吸引。…查看更多

難得平日可以同屋企人午餐，想搵間有lunch set 嘅日本餐廳試下。見到究極堂係OpenRice 有好多好評，就去試吓啦。我哋4大2小，叫左4份午市定食，都包埋麵豉湯、沙律，亦都可以用優惠價加購魚生、小食。………………………………………………火炙壽司拼盤配烏冬 ⭐️⭐️⭐️⭐️有鰻魚、三文魚、帶子、蝦、左口魚邊等等嘅火炙壽司，味道正常。烏冬軟硬程度適中，味道正常。芝心吉列豬排蛋包飯 （咖哩汁） ⭐️⭐️⭐️蛋包飯個蛋好嫩滑，日式咖哩嚟講依個咖哩汁算偏辣，吉列豬排就麻麻地，整體味道一般。漢堡扒蛋包飯 （番茄汁） ⭐️⭐️⭐️蛋包飯個蛋好嫩滑，但係漢堡扒就好乾，整體味道一般。究極炎之丼⭐️⭐️⭐️配料有火炙過嘅帶子、蝦、左口魚邊、油甘魚、吞拿魚蓉等，飯底加咗醋同埋少許嘅飯素。面頭仲有一層奶白色嘅醬，食落似蒜蓉醬，另外亦都有一啲炸蒜粒。其實頭幾啖幾好味，不過食多幾啖就開始覺得，好似成個丼飯都係同一隻醬嘅味道，而且仲蓋過魚生本身嘅鮮味。越食越覺得麻麻哋。三文魚（2片） ⭐️⭐️⭐️⭐️優惠價$16 加購左2片三文魚刺生，幾肥美新鮮，性價比唔錯。………………………………………………究極堂嘅午市定食其實價錢唔貴，而且魚生質素都唔錯，各樣食物賣相亦都唔錯，但係整體味道，我覺得究極堂真係只係達到”ok 啦” 嘅水平。…查看更多

細個係慈雲山讀書已經知道毓華街有間茶餐廳叫嘉豐茶餐廳，不過從來都無幫襯過。 見YouTube 有 Vlogger 專訪，就試吓啦。我地外賣左咖喱豬扒飯、雪菜肉絲豬扒上海麵、凍奶茶。………………………………………………馳名豬扒飯 (咖哩汁) ⭐️⭐️⭐️豬扒唔錯，幾林幾入味，咖喱汁就普通啦。豬扒上海麵配雪菜肉絲 ⭐️⭐️⭐️上海麵好粗，湯就比較清淡，亦都唔掛麵，雪菜味道都一般，可能切得比較大粒，唔係太出味。而豬扒其實就幾林，幾入味。凍奶茶 （少冰少甜） ⭐️⭐️⭐️普通水平。………………………………………………餐廳可能主力做學校午市生意，營業時間每日都係去到黃昏6點，如果想試下要留意營業時間喔。不過餐廳嘅食物我覺得只係達到OK啦嘅水平。…查看更多

八仙餅家據說起源於上世紀60年代嘅一間酒樓嘅唐餅部，記得佢啲月餅近年都幾出名，見經過深水埗見到就決定買少少試吓啦。………………………………………………老婆餅 ⭐️⭐️外層酥脆，餡料係用糖冬瓜做，不過口感太林，而且太甜，麻麻地。蛋黃酥 ⭐️⭐️⭐️餡料係蓮蓉同咸蛋黃，都係偏甜，質感比較厚實。………………………………………………八仙餅家嘅優點主要係懷舊同大件。產品嘅種類都幾多，行過望吓都覺得目不暇給。而且個包裝盒設計都好傳統，好有風味。因為我無食過八仙嘅餅，所以我都唔知道八仙嘅餅以前係咩味道。只係知道依家嘅出品確實唔係太啱我口味。而且價錢唔平，除咗食情懷，真的不推薦。…查看更多

上星期六先同朋友一齊食左一次王林記，見星期三平日11點幾係港島區得閒，又專程搭車去筲箕灣食多次魚蛋粉。今次又做孤獨的美食家，自己一個叫咗魚蛋鮮蝦雲吞河、凍奶茶。………………………………………………魚蛋鮮蝦雲吞河⭐️⭐️⭐️⭐️⭐️雙拼嘅魚蛋雲吞河一樣都有白魚蛋同炸魚片兩種嘅，一樣彈牙有魚味，今次食到陳皮味比上次更加重。河粉一樣都係好滑，軟硬程度適中。湯底有魚嘅鮮味，一樣偏濃味。今次唔同嘅係叫咗鮮蝦雲吞，雲吞皮薄餡靚，餡料有大大截蝦肉，爽彈鮮味，好有驚喜，好好味。凍奶茶（少冰少甜）⭐️⭐️⭐️凍奶茶嘅茶味偏重，普通水平，王林記嘅飲品係要散叫，所以我覺得唔值得另外叫。………………………………………………今次落咗王林記自家製嘅細辣辣椒油，唔會好辣，好味。另外，今次枱面冇放到冬菜，原來有需要可以自己問店員拎。…查看更多

安娣瑪萊係一間東南亞菜餐廳，主打「精緻而風味正宗的馬來西亞菜及精選東南亞美食」，屬於 DRC Group旗下嘅餐廳，集團旗下仲有正宗泰國餐廳 Nara Thai Cuisine 、Lady Nara、元朗嘅車仔麵名店永年等知名餐廳。………………………………………………脆蝦片 ⭐️⭐️⭐️⭐️⭐️入座的時候會有一碟放係枱面，埋單先知原來要$12，不過真係幾好味，香口得嚟又唔會油膩，價錢都算合理。香脆芝麻豬頸肉 ⭐️⭐️⭐️⭐️⭐️⭐️依個豬頸肉好好味，肥美甘香，有肉汁，係我鐘意食嘅個種豬頸肉，配埋泰式酸辣汁，真係好好食。招牌火山排骨 ⭐️⭐️⭐️排骨份量都幾多，配菜主要有紅蘿蔔、白蘿蔔，上菜的時候會有火慶住，個泰式酸辣汁都幾好味開胃，不過排骨肉質類似煲湯肉，蘿蔔亦都唔入味。所以整體就麻麻。馬來黃咖喱牛肋肉（+$40） ⭐️⭐️⭐️⭐️椰汁味香濃，牛肋肉都幾林，整體就正常。印度薄餅（2件）⭐️⭐️⭐️賣相幾靚，但係食落口感有啲痴牙，唔鬆脆。泰式肉碎煎蛋飯 （少辣）⭐️⭐️⭐️⭐️因為有小朋友所以揀左少辣，豬肉碎大細適中，肥瘦比例適中，撈飯都幾惹味，煎蛋都有燶邊效果，不過就略為太熟。香脆蝦餅（3件）⭐️⭐️⭐️⭐️⭐️外層炸粉酥脆，蝦餅爽滑彈牙有鮮味，好食。上湯蝦米肉未浸娃姓菜 ⭐️⭐️⭐️娃娃菜軟硬程度適中，但味道普通。班蘭咖椰多士⭐️⭐️⭐️⭐️⭐️⭐️食得出係新鮮製造，個多士鬆脆，咖椰醬有好香嘅斑蘭味，裡面仲有適量嘅牛油，賣相都好靚，同一般嘅咖椰多士好唔同，我覺得係餐廳最好味嘅菜式！茶位 ⭐️⭐️⭐️⭐️⭐️茶位要比$8一位，不過餐廳提供的茶係荔枝紅茶，我哋一致同意個茶幾好飲。………………………………………………安娣瑪萊果然都係馬來西亞的菜式比較出色，係海港城嚟講價錢都算合理，而且質素有保證。Join DRC Group 會員仲有得儲積分同優惠卷，我就用優惠卷免費換多左一份班蘭咖椰多士返屋企食啦。…查看更多

最近剪頭髮同髮型師傾閒偈，佢竟然有餐廳推介，擁有敏銳好西雷達嘅LaHaMo一聽就知單嘢唔簡單。第二日就即刻去睇吓有咩咁好食。放工去到大概6:30，得返2張2人枱，即刻入去坐低先。叫完嘢食望返出門口已經開始要等位。我哋叫左 海防蟹膏海鮮湯檬粉、河內奧巴馬拌檬粉、越式炸蛋 、牛油果沙冰、招牌咖啡沙冰。………………………………………………海防蟹膏海鮮湯檬粉 ⭐️⭐️⭐️⭐️⭐️配料好豐富，有一pat 蟹肉蟹膏鮮蝦、扎肉、魷魚、番茄、青口、蔥 等等。湯底好有鮮味，蟹膏味突出，檬粉軟硬程度適中。整體唔錯。河內奧巴馬拌檬粉 ⭐️⭐️⭐️⭐️⭐️奧巴馬粉其實就是烤豬肉粉，因時任美國總統奧巴馬到訪越南河內時曾經食過而得名。烤好的豬肉連同肉汁、魚露汁 同 醃菜放喺碗內，旁邊就係乾檬粉。酸甜嘅魚露汁撈檬粉好開胃好好味，烤豬肉都多汁好味。越式炸蛋 ⭐️⭐️⭐️炸過嘅蛋，我覺得質感係介乎白烚蛋同煎蛋之間，加上酸酸甜甜嘅汁，都幾開胃，不過我個人就麻麻地依個口感。牛油果沙冰 ⭐️⭐️⭐️⭐️質感好厚，有清香嘅牛油果味，不過飲完會好飽。招牌咖啡沙冰⭐️⭐️⭐️⭐️咖啡味好濃，有越式咖啡嘅椰子味。………………………………………………1986嘅菜式選擇都幾多，價錢亦都好合理，$80 一碗的蟹膏海鮮湯檬粉 ，咁多餸，湯底又有蟹膏的鮮味，性價比其實已經好高啦。…查看更多

去完主教山前配水庫參觀之後，身水身汗，熱辣辣，決定要搵間懷舊啲嘅茶餐廳食個下午茶，休息一下。新金寶茶餐廳位於石硤尾邨，睇個裝修都知道有返啲歷史。下午茶叫左沙爹牛肉公仔麵餐 同 西多士餐。………………………………………………沙爹牛肉公仔麵餐⭐️⭐️⭐️公仔麵麵質唔錯，有麵香味。牛肉份量都多，但味道普通，而湯都只達一般水平。西多士⭐️⭐️⭐️⭐️厚薄都算適中，炸到金黃色，熱辣辣，中間查左花生醬，整體唔錯。凍奶茶 （少冰少甜） ⭐️⭐️⭐️茶味稍為偏重，普通水平。…………………………………………………查看更多

WOWDON 位於啟德sogo 14樓，主要食韓式烏冬，寬條烏冬更加係限定商品。我地當日星期五下晝大概5:15嘅時間去到餐廳，已經見到排晒長龍，原來食寬條烏冬要等5:30 先安排入座。店員會逐一問排隊嘅顧客食唔食寬條烏冬，但係可惜問到我哋嘅時候已經無晒寬條烏冬。不過往好的方向唸，我哋可以早啲入座。………………………………………………酥脆吉列豬扒泡菜鍋烏冬⭐️⭐️⭐️⭐️⭐️吉列豬扒雖然唔係另外上，而係放喺湯麵上面，但係邊位都脆口，肉質鮮嫩多汁，吸左泡菜湯反而更惹味。湯有酸酸辣辣嘅泡菜味，好開胃。而烏冬都好爽滑彈牙，好味。韓式牛肉辣湯烏冬⭐️⭐️⭐️⭐️⭐️配料係韓式牛肉、海帶絲、蔥。湯底同泡菜湯都有少少類似，但係就少咗泡菜嘅酸味，個人比較喜歡依種辣湯，好韓式。麥茶 ⭐️⭐️⭐️⭐️餐廳免費提供麥茶，幾好飲，店員都密密幫我哋加茶。前菜 ⭐️⭐️⭐️⭐️前菜係醃蘿蔔同醃青瓜，份量唔多，但係口感爽脆，味道偏酸。………………………………………………WOWDON 嘅主食都過百蚊一份，雖然價錢唔平，但係佢份量好夠，如果唔係過好肚餓，叫一份烏冬，一份炸餃子/小食 share 食，其實都會夠飽。…查看更多

王林記潮州魚蛋粉麵，屹立於筲箕灣多年，由山邊檔口做到依家有2間分店，睇返老闆娘十多年前嘅專訪，先知道原來王林記又係一個香港獅子山精神嘅故事，係一個為左養大仔女堅持每日手打魚蛋嘅暖心媽媽。前排又經歷完500年一遇嘅黑雨，適逢大潭水霸排洪，路過筲箕灣搵食，決定試吓筲箕灣東大街嘅地區名物。我哋叫咗魚蛋河、牛腩撈粗、牛腩幼麵 同 炸魚皮。………………………………………………魚蛋河加腩汁⭐️⭐️⭐️⭐️⭐️魚蛋分別包含白魚蛋同炸魚片，兩種都彈牙有魚味，仲有少少陳皮味。河粉係比較幼個種，好滑，軟硬程度適中。湯係魚湯底，有魚嘅鮮味，偏濃味。牛腩幼麵 ⭐️⭐️⭐️⭐️牛腩係清湯腩，唔算好林，幼麵爽滑彈牙。牛腩撈粗 ⭐️⭐️⭐️⭐️牛腩可以揀清湯腩或者炆腩，半筋半腩，幾入味但係腩位唔算炆得好林，撈粗麵個汁同麵都好味。炸魚皮 ⭐️⭐️⭐️⭐️⭐️王林記會特別提供一碗湯俾你浸炸魚皮嚟食，炸魚皮好香脆，好好味。………………………………………………王林記仲提供自家製嘅辣椒油，分咗大辣同埋細辣。另外，仲可以加炸蒜 同 冬菜，依家有提供冬菜嘅粉麵舖已經買少見少啦。不過，王林記味道係偏濃味，我都偏好食濃味食物，所以我覺得好好味。…查看更多

今年香港七、八月成日都唔係雷暴就落大雨，見好天就去咗摩士游泳池游水，游完水就梗係要食返餐補充能量，所以就去樂富廣場搵嘢食啦。游完水食馬來西亞菜真係啱晒，而且蒲羅又有午市套餐，啲嘢飲又消暑。所以好快就決定咗要幫襯蒲羅。………………………………………………越式烤豬頸肉湯檬粉⭐️⭐️⭐️上枱嘅時間豬頸肉會放左落湯，面頭有啲蔥同埋炸蒜，整體都一般。蒲羅蝦麵⭐️⭐️⭐️⭐️蒲羅嘅蝦麵係用摻摻作為主食，即係米粉同埋油麵兩溝，不過佢嘅兩溝就唔係一半一半嘅，而係油麵嘅比例少好多。配料有蝦、幾片腩肉豆角、豆腐卜、半隻蛋，蝦肉幾爽彈，不過腩肉就麻麻。而湯底就有好濃郁嘅鹹味，我覺得唔錯。斑蘭咖吔多士⭐️⭐️⭐️多士冇咩溫度，似乎係預先烘定嘅，亦都唔夠鬆軟，咖吔就正常，但係就冇咩斑蘭味，牛油亦都夾得唔係太平均。椰汁仙沙冰⭐️⭐️⭐️⭐️用椰汁嚟做沙冰，再加咗啲綠色嘅啫喱，椰子味香濃，又唔會過甜，好消暑。………………………………………………蒲羅假日嘅午市都幾旺場，我哋大概12:45去到都等咗大概5分鐘先有枱。蒲羅嘅菜式選擇都幾多，價錢亦都算合理，食物質素都OK！…查看更多