fatchuwong's Profile

打邊爐好多時都會去到九龍城搵食，因為呢一帶好多鋪頭打邊爐都好出色，早排見到呢度開咗間新嘅鋪頭，個裝修好特別，所以就約埋朋友嚟呢度試吓！個名好有懷舊色彩，同撈同煲好有香港味道！成個裝修都好有心思，模仿返舊陣時嘅香港！淨係影相打卡都影到手軟！再講番啲食物，今次我就叫咗花雕醉美人鍋！$110連埋半隻醉雞，其實都好抵，而且個湯底好好味，可以就咁飲好多碗，加上佢加湯係真係加返湯，唔會淡左。特級盛牛大拼盤，有手切牛，牛頸脊，牛爽肉，可以試晒幾款唔同部位嘅牛肉，每款都好有牛味，咬口又有啲唔同！其他食材水準都唔錯！響鈴仲有一個甜酸汁俾你點，呢樣係我第一次見！仲有糖不甩同埋啫喱仔餸！糖不甩係金魚樣好得意，仲要放佢落個煲到拾，係好新奇嘅食法！啫哩上面嗰把遮係我細個成日玩嘅！好懷念！…Read More

平時食放題，通常都會揀啲好出名放題嘅日式餐廳，今次特登揀呢間，最主要係睇中佢有得任食生蠔，因為如果啲生蠔新鮮嘅話，咁二百零三百蚊又真係好抵食喎！平時其他放題好少有得任食生蠔，所以今次嘅目標當然係佢啦！先去拎蠔嘅地方嗰邊睇一睇！啲蠔擺晒出嚟俾人睇，都好大隻呀個樣！有師傅喺度即場開蠔！即叫即開包保新鮮！濛咗啲，因為太興奮，只要將呢個牌放喺師傅前面，就可以返埋位得人拎啲蠔俾你！終於有得食喇！隻隻都好大隻好飽滿！唔係果啲低質素瘦弱生蠔！好開心！幾大隻！食落仲好新鮮，有海水味，而且佢啲肉好厚，咬落去好滿足！其他食物都唔錯，刺身都好新鮮！炸物夠熱又夠脆！雪榚仲有movenpick揀！總括嚟講係好滿意又滿足嘅一餐！…Read More

最近工作十分苦悶，見自己咁都捱得住，決定獎勵下自己，食餐好野，見到西營盤呢度，開咗一間新嘅日式居酒屋，雖然價錢有啲貴，不過都試吓啦！門口會有寫當日有咩推介！呢間新嘅居酒屋，裝修好有日本嘅格調，令我覺得自己好似去咗日本食嘢咁，冇得去旅行都可以止下渴！坐得舒服！環境寧靜！我叫咗個壽司一人前，其實餐牌上仲有好多其他選擇，不過呢日真係好想食啲好好味嘅壽司，所以直接叫咗呢個set！前菜有牛膀，醃蘿蔔，同明太子沙律！平時我一定會剩返啲前菜，今次食下食下食晒，因為真係整得好味，特別係正方粒嘅明太子，咬落去口感好正！個湯都係用心製作，唔係平時啲好鹹嘅麵豉湯，清清地，有蜆嘅味道。隻蜆仲要好大隻好好味！主角係壽司，淨係睇個樣都知佢新鮮同用心製作，一個字，好好食，好似喺日本食咁呀，每一啖都勁滿足！甜品係柚子味雪糕，食埋就perfect 喇！…Read More

天氣熱有時真係乜嘢都唔想食，冇乜胃口，所以食日式放題就最啱啦。今次再嚟食極尚大喜屋，因為大喜屋系列係我嘅至愛，食物比較高質，今次食呢間分店，一於睇下佢有冇保持到水準！一攞起張點心紙，第一樣野一定係點刺身，大喜屋啲刺身令我好放心食，因為唔會雪到一浸雪味，比較新鮮，刺身舊肉切得好厚身，咬落去嘅感覺好滿足！油甘魚，吞拿魚，三文魚，都好肥美，蝦都好大隻好鮮甜，赤貝好新鮮好爽口！細細粒嘅創作壽司，一口一啖，可以試多幾款！而且質素非常高！每款都好好食！火灸壽司，燒得好香，尤其是係三文魚同左口魚！一食落去已經feel到啲魚油標出嚟，好香好好味！其他熟食都唔差，天婦羅夠熱同夠脆，串燒都好味！見啲片皮鴨排晒長龍，我都攞咗一碟嚟試下，當然唔夠喺出面食嗰啲好食啦，不過都可以過吓口癮，唔錯！…Read More

香港人最鍾意打邊爐，一大班人諗唔到食乜通常都會打邊爐，我呢啲邊爐精最鍾意試唔同火鍋店，今次呢間比較偏辟，但值得嚟食！睇睇餐牌先！好多款唔同湯底選擇，而且好多都好特別唔係度度有，好似蟲草花冬瓜雞鍋，菜膽豬肺等等！好多唔同牛嘅部位選擇，價錢唔平，亦唔算特別貴！其他食物價錢合理！基本醬料配料齊備。今次叫咗菜膽豬肺湯底，諗住冇咁熱氣，味道偏清淡，但越滾越有味！因為乜牛部位都想試，叫個牛皇拼盤就乜都試到喇！最緊要有我想試嘅牛脷托！拼盤份量好多，4個人食差啲食唔晒！每款牛都好有牛味，又好林！牛脷淥完都唔會韌！正！必試！另外推介鵝腸，花膠，黑松露花枝丸同響鈴，都好好味，又夠新鮮！4個人食每人$300左右！絕對可以番啅！…Read More

星期六我間唔時都會去荔枝角，因為呢個地方好適合我呢啲偽文青行逛同打卡。呢日我同朋友行完D2place市集，就緊係要喺附近搵間靚cafe坐下啦！上網睇過呢間cafe應該係開咗冇耐，一於試下新野！間cafe好有田園feel,檯櫈都係木製嘅傢私，而且仲有好多盆栽，樹，仲有啲乾花喺度做裝飾，好清新嘅感覺。而且呢度啲枱枱櫈櫈唔會話擺得好密，有足夠嘅空間感，喺度hea下影下相都消磨左唔少時間。我嚟到嘅時候仲有lunch Menu ,咁當然要試吓啦！我就揀咗個炸魚薯條餐（$88）！餐湯係南瓜湯，食到好濃嘅南瓜味，而且食到南瓜蓉！跟住就係主角炸魚薯條，配埋沙律菜同埋厚薯條！放喺長方形木板上面，擺盤都好有誠意！塊炸魚好厚身，一切落去已feel到炸皮好脆，魚肉好厚好實淨，唔會一切開就散晒，而且好有魚味，幾好！餐飲：熱玄米綠茶👍🏻👍🏻…Read More

呢日約咗朋友喺灣仔伊館睇籃球比賽，睇波之前就喺附近搵嘢食，近近地就去咗灣仔呢間新泰食泰國嘢！冇乜期待之下，竟然有啲驚喜！一上到去就覺得個門面幾好地方好大，俾人感覺比較高級！侍應安排咗我同朋友坐窗口卡位，坐得非常舒適，而且感覺好乾淨，唔似有時去細啲嘅泰國餐館咁迫夾！不過一睇佢個menu,又唔算特別貴，我覺得屬於正常價錢！好多野都想食，不過得兩個人，唔可以食好多！不過諗都唔諗一定要叫嘅一定係泰式生蝦！雖然$98有5隻有啲貴，不過佢都幾大隻同好彈牙，配埋蒜頭辣椒同酸酸辣辣嘅汁，好醒胃，好好味😭另外一樣必食嘅係Padthai! $98，好鍾意佢鋪喺面個層蛋，好靚😂 講番味道，係好食嘅，調味各樣都啱啱好，啲粉唔會太乾或太濕！唔錯！青咖哩雞$78，雖然menu有辣椒樣，但係唔辣，反而有啲甜味，怕辣嘅人都食得！雖然已經飽飽地，但見到個咖哩汁咁正，忍唔住叫多個印度薄餅（$30）食埋啲汁😂份量都多，夠熱又鬆化，撈埋啲汁食下食下食晒咁多👍🏻兩個人埋單$330左右，都可接受，值得番轉頭食多幾次！…Read More

早排男朋友生日，同佢食生日飯，想喺交通方便嘅尖沙咀搵西餐食，於是就揀咗K11呢間餐廳。喺得K11我以為會好貴，但原來唔係，呢個龍蝦餐超級抵食!而且餐廳環境都唔差，同男朋友撐檯腳一流!餐廳入面環境都幾舒適!介紹番個餐先!鵝肝caesar salad! 鵝肝煎香過，配埋沙律唔驚肥膩!幾好!一人可以揀一個湯，我地分別揀咗龍蝦湯同周打魚湯，個人鍾意龍蝦湯多啲，濃味啲! 如果個包焗脆啲就更好!主菜可以揀兩樣，我揀咗慢煮德國咸豬手配薯角，同埋西班牙黑毛豬頸肉意粉!德國咸豬手D皮好脆，而且煮得好入味，好好食，不過就好大碟，兩個人真係食唔晒要打包!黑毛豬頸肉意粉啲肉唔會好鞋，仲幾juicy，不過意粉就乾咗DD。當然唔少得主角龍蝦，揀咗蒜蓉味! 龍蝦嚟到果陣都嚇一跳，都幾大隻!龍蝦鉗好大隻，啖啖肉，而且好彈牙!張餐紙好貼心地教你點食龍蝦!餐飲仲可以揀紅白酒~甜品就普通D，不過成個餐埋單都係$700左右，我同男朋友都好滿意!…Read More

黃埔新開左9號水產咁耐，我都未去過，今日心血來潮想去逛一逛，睇下佢有咩買，行咗一輪之後，就係隔離嘅餐廳食下野，見呢間鋪頭有正餐食之餘，仲有甜品，可以一次過滿足我嘅願望。睇完餐牌，我諗都冇諗就揀咗一個迷你三彩丼定食，因為乜都有，而且全部細細碗，可以試晒唔同嘅嘢。三小碗，送埋沙律，野飲同小抹茶蛋卷，做緊推廣價，都係＄148 ,好抵食！沙律正常發揮。吞拿魚碎魚生飯，呢個價錢食到咁好質素嘅吞拿魚碎飯令人好滿足，吞拿魚入口好滑，咬兩口就自動滑入喉嚨，好味，份量多啲就正喇！鰻魚飯都好出色，啲鰻魚汁好香，但仍然食到啲鰻魚味，正！海藻烏冬，食完兩個飯，有一個烏冬平衡番，而且個烏冬都好特別，比平時嗰啲係幼身啲同滑啲，唔錯！加錢飲個培茶奶，好滿足！…Read More

有陣時食野都要講緣份，睇下間餐廳合唔合眼緣先會行入去食，畢竟一星期只有兩日假期，休閒地食個午餐嘅機會好珍貴，要小心挑選！呢日我嚟開荃灣，見到呢間小店個名都幾得意，而且又係新開，就行入去試下！入到去見到裡面啲裝修都好有誠意，地方都算闊落，唔會好有壓迫感！有一啲大自然裝飾，樹葉牆拍照一流，上面仲吊咗啲樹幹！食物方面，lunch menu的選擇都算多，不同種類都有，如意粉，鍋物，壽司等，而呢間係日式料理，我就試下啲壽司質素如何！午餐仲送一個小沙律！呢碟壽司拼盤餐$88，入面有三文魚，劍魚柳，吞拿魚，北海道帶子，大赤蝦，海膽，同小卷！壽司質素有驚喜，唔係劣質薄切切刺身，魚生同帶子好新鮮同鮮甜，而且夠厚身！赤蝦鮮甜爽口，而海膽軍艦上面啲海膽份量足，食得出係高質鮮甜，唔會有腥味同苦澀味，非常滿足！餐飲仲有玫瑰花茶！…Read More

難得平日放假，當然唔可以浪費，要食一個令自己happy嘅早餐開始呢一日，於是就嚟咗呢度食個靚早餐！隔離係街市，好多人都鍾意坐窗口位望出面個景！影相打卡應該幾靚！裡面嘅裝潢佈置都幾靚呀！講番食物，今次嚟食早餐，我揀咗個煙三文魚英式鬆餅！有水煮蛋跟薯粒！我開頭以為自己會食唔晒啲薯粒，但係佢有啲調味幾好食，食下食下唔小心食晒！因為隻蛋唔同一般嘅egg benedict, 有啲似烚半熟蛋咁。呢個餐可以加錢叫啲side dish, 我加$38叫咗個pandan pancake! 正！如果個餐可以加錢配野飲就更好啦！…Read More

我又去食韓國雞喇，今次食呢間係已經係香港開咗好耐嘅Goobne Chicken,開咗咁耐我先係第一次食，同其他炸雞唔同，呢度係烤雞，俾我感覺冇咁熱氣😂都係果句，食親炸雞或者烤雞，我一定會叫無骨雞，今次就食咗鐵板芝士甜辣無骨烤雞，芝士做到拉絲效果，啲雞肉好滑好多汁，個甜辣醬好開胃，好好味，成個配搭令人食完一件又一件停唔到口。今次叫多咗其他小食，一個係炒辣年糕，一個就係砂鍋魚糕湯，辣年糕辣度剛剛好，唔會太辣，年糕夠入味，魚糕湯就可以中和下食咗咁多辣野😂😂特別一提呢個野飲好好味，係藍莓韓式米酒，酒味唔係好濃，味道好似藍霉smoothie 咁，好好味！…Read More

其實我好少食印度菜，點解我會起個題係超正宗印度素菜，因為一入到去，見到好多印度人都會喺度食，就好似佢哋嘅飯堂咁，即係代表佢啲食物係好正宗嘅印度菜。平時已經好少食印度野，亦都好少食素，今次真係第一次食印度素菜，感覺好新鮮！今餐最主要都係食個印度餅，再加啲醬點嚟食，而且主要食材都係用扁豆，感覺健康啲。見到佢有一啲印度套餐，不過同朋友兩個人食，驚食唔晒，所以叫咗其他！呢個係印度班戟，我揀咗番茄洋蔥味，感覺會香口啲。呢啲班戟會跟三種酸辣醬，同埋一個辣豆湯，但係其實嗰醬同啲湯都唔係辣嘅，反而食到啲豆味，尤其是個湯，飲落係傑身啲，好似豆蓉咁！另外緊係要試下印度咖哩，揀咗咖哩芝士，呢個咖哩係有啲洋蔥同印度香料嘅味，再加茅屋芝士，我以為印度咖喱會好辣，但原來係好似一個汁咁，點番個naan食真係好夾！最後仲叫咗個masala tea,佢好似奶茶咁，不過有啲香料味同埋有陣薑味，幾特別！…Read More

去台灣旅遊果陣，間唔中都見到有鋪頭食臭臭鍋，我果陣好好奇，究竟臭臭鍋係咩，點解話明臭臭，都有咁多人食。見到香港都開咗間臭臭鍋，即管去睇下係乜東東。原來臭臭鍋裡面有臭豆腐，大腸，豬紅等重口味野食，所以形成咗臭臭鍋味，我就冇揀重口味，反而揀咗台灣人都成日食嘅黑麻油雞鍋，貪入面啲餸清淡啲同養生啲！入面有准山，枸杞，雞肉，老薑，米酒等等，見到都覺得好補！首先試下個湯，我以為麻油鍋會好油，但原來唔係，仲飲到陣薑味，又幾清甜。啲雞又唔會拾到好鞋，如果雞味重啲會更好！值得一提係鍋入面仲有啲台灣特色食物，米血糕同台灣面線，感覺好似真係喺台灣食緊咁！另外我仲加錢叫咗魯肉飯，好香好好吃，不過真係飽到痴線，建議兩個人share,因為個鍋已經好大鍋！最後叫咗個巨峰提子梳打消消滯，好在唔太甜，幾好！佢仲有好多台式野飲好似珍珠奶茶，沙冰等，選擇都算多！呢間值得再嚟，下次我會挑戰招牌臭臭鍋！…Read More

對於韓國野食情有獨鍾嘅我，又去食韓國野喇，今次係食炸雞，呢間餐廳位於利舞臺高層，入面都幾大，啲位唔會迫迫夾夾，坐得舒服！電視當然都播韓國節目，等你好似去咗韓國咁😂😂講番重點嘅食物，叫咗一個招牌甜辣芝士無骨烤雞，其實我食親炸雞都係叫無骨，唔使lur骨啖啖肉嘅感覺最正，呢個雞甜甜酸酸好開胃，一次過食好多嚿都得，啱晒唔食得辣嘅人！裡面重有啲年糕，唔使另外叫一碟年糕又食唔晒！芝士又做到拉絲效果，重點係真係好大碟，食極都仲有！另外推介小食，就係黑松露薯條！薯條係兩隻，一種係蕃薯仔，一種係普通薯條，蕃薯條唔係度度都有，呢度仲炸到熱辣辣，加埋啲黑松露勁香，又係停唔到口！另外仲有啲party food都唔錯，好大盤，啱晒一大班朋友嚟食！我仲叫咗杯strawberry yogurt smoothie 飲，平衡番啲熱氣！好味！…Read More