Willow Yellow's Profile

嚟呢度食生日飯，一定令你稱心滿意，滿滿的儀式感，步入餐廳，當服務員帶到去張枱，已經成枱都係生日佈置👍🏻生日Menu 寫明日子同埋人客名稱，令你有個好好嘅紀念，再加上佢哋嘅即影即有生日卡，實在令你full of birthday memories 🥰嚟到當然要試佢哋嘅牛扒，我哋叫咗Porterhouse Steak，二人份量絕對足夠，甚至乎食唔晒添。牛扒煮得好香，好有肉味，大滿足。頭盤龍蝦湯夠濃，另外好想稱讚嘅就係佢哋嘅甜品platter ，整得好靚，又好味，令一個生日飯畫上一個完美嘅句號。…Read More

喺度食咗lunch，感覺真係好壞參半。一坐低服務員就送上一壺熱茶，唔記得咗問係乜嘢茶，但幾好飲。叫咗兩個set lunch，包括「少爺海南雞飯」及「海南椰子雞湯米線配雞扒」。海南雞飯好味嘅，淨係個飯都好有雞油味，啲雞都算多，肉質都算幾好，屬於正常發揮。但係個米線好唔掂，個湯好淡，椰子冇味可言，雞扒炸到冇雞味。Set lunch 再配餐飲，凍奶茶凍檸檬茶唔需要額外加錢。餐廳裝修其實都算係咁，望出去仲有落地玻璃，視野都幾舒服。…Read More

呢間麵檔真係歷史悠久，細細個已經跟屋企人去食。佢喺熟食中心入邊，唔係有人介紹，相信一般人唔會搵到佢。雖然地方平庸，其實佢哋嘅服務都好好，事頭婆仲認得大部份熟客，唔使講就已經知道你食乜。佢哋嘅餸包括豬紅、蘿蔔、大腸、魷魚、冬菇、豬皮、魚蛋、同埋菜。你可以揀粗麵、幼麵或者米粉。仲可以加辣汁，佢哋都幾辣㗎，其實一般小辣就已經好夠辣㗎啦。由於佢哋係撈麵，就唔會有湯，佢哋嘅豉油汁撈埋啲麵同埋啲餸好好味，最推介就係佢哋嘅蘿蔔，同埋大腸，煮得好入味好腍。如果你唔想諗嘅，就叫個雜麵，就乜都有得食！佢哋只提供紙包或者罐裝飲品，如果你想飲其他，例如凍檸茶、奶茶，隔離嘅茶檔可以叫過嚟飲，好方便。…Read More

一行5人，首次光顧，訂咗3樓。去到當然好欣賞佢哋嘅裝修，有古色古香嘅感覺，但唔係霉霉舊舊，好乾淨，感覺好似入咗個懷舊嘅博物館。當日每位夥計哥哥都好有禮貌，仲同我哋有講有笑，又推介嘢食俾我哋。我哋叫咗叉燒包、牛肉球、豬潤燒賣、荷葉飯、蒸排骨、蝦餃、棉花雞、鹹水角、仲有煎堆。當中最欣賞係個鹹水角，佢哋同一般酒樓唔同，冇芝麻喺面，有啲似莎翁嘅皮，但係個餡都係煙煙韌韌，好特別。另外個荷葉飯，大到不得了，5個人都食唔晒。好欣賞佢哋嘅懷舊設施，例如仲有筷子套，同埋佢哋有一個爐warm住啲熱水，不斷幫我哋加水保持茶嘅溫度。啲夥計哥哥仲提供好有溫度服務，知道我哋點心係share嚟食，每次都會幫我哋剪開5件方便我哋食。…Read More

甚少去土瓜灣，唔熟路，間鋪又隱蔽，所以搵咗都一陣先去到。去到個商場，仲未搵到間鋪個位置，不過個鼻開始聞到香味，好快就到達。店舖細細，店主一人主埋，一腳踢又好有禮貌。二話不說我叫咗個心形蛋糕仔原味，即叫即整，所以都要耐心等候。雞蛋仔嘅味道唔可以話驚天地泣鬼神，但係夠香脆，熱辣辣，蛋漿都整得好，佢比傳統嘅細雞蛋仔係細粒少少，我估係因為就心形個形狀，所以食落去個口感可能就冇咁多蛋漿，口感有啲分別。店主會為每一客雞蛋仔加上一個心形嘅牌仔，真係so sweet🥰…Read More

如果你唔需要花巧嘅餐廳設計，要求特別嘅打卡位，呢度打邊爐就最實際。地方唔算好大，但係坐得舒服，唔逼夾。湯底唔會淨係得啲貴價選擇，有平有貴，就算平嘅湯底都已經包粟米同埋蘿蔔，幾大眾化。牛肉有好多類型嘅選擇，可以嗌拼盤又得，或者係專攻某一種都可以，價錢真係唔算貴。海鮮拼盤二人前都係二百幾蚊，好新鮮，包兩隻大花竹蝦，彈牙好味；兩隻大蠔，兩隻大鮑魚，鮑魚上枱嗰陣時仲郁嘅，另外仲有六隻肥嘟嘟嘅蜆，勝價比高👍🏻。人手方面明顯唔足夠，但係啲夥計都好有禮貌，服務都算好。…Read More

食飽晚飯想食甜品，離遠見到呢度大排長龍，一於就去試吓。多人等位，但係啲食客都算走得快，只係大約等咗10分鐘。食物方面有好多選擇，無論係傳統中式甜品、沙冰、台式芋圓，通通俱備。另外有好多甜品佢哋都係配合咗開心果，總有一款啱你。我哋叫咗個「一碗大滿足」，一次過可以食到芋圓、桃膠、蓮子、西米等，真係超滿足！另外就食咗個「芒多多楊枝甘露雪花冰」，啲芒果真係好好味，大大粒，好fresh 嘅感覺。佢哋啲份量都係偏大，好難食得晒。…Read More

每次嚟呢度食嘢，都要醒醒定定，打醒十二分精神先至敢入去。唔使排隊，即刻安排咗卡位，當然只可以坐埋一邊。食咗$58大元的茶餐，一開口想叫嘢飲，已經比夥計叫停，話之後會幫我哋落，食咗嘢先，因為張枱冇位擺，搞到我朋友一向要一路飲嘢一路食嘢嘅都冇得選擇😂茶餐每一樣食物都好到位，多士烘底好香，同埋唔係細細件，煎蛋都整得好靚，蛋黃冇穿。好懷念嘅叉燒湯意粉，好鍾意佢哋個湯底，一定要加胡椒粉食，好好味。嘢飲我就叫咗茶走，佢哋嘅茶底一向都係好味嘅，好滑溜，肥都冇辦法，忍唔住都要飲。其實一向以來我都唔係覺得佢哋冇禮貌，只不過係好有速度，可能令到有啲人覺得唔舒服，埋單走人，嗰個夥計都會同我哋講拜拜。…Read More

喺銅鑼灣未夠鐘食dinner，想搵個地方飲咖啡，行行吓發現希慎basement food court 原來有好多餐廳，其中就發現咗呢間coffee shop。店舖非常之細，得十分少量嘅位，初時諗住仲要等好耐，點知發現原來希慎嘅food court係有好多位俾你坐，只要你係food court 任何一間餐廳買嘢食就坐得，唔需要一定要坐喺買嘢食嗰間餐廳啲位，所以都幾flexible 。簡簡單單叫咗一杯 hot Americano ☕️ ，味道絕對有水準，同埋都幾大杯，我鍾意佢好夠熱，如果你想加糖，佢仲會另外攞個杯仔裝起，擺得靚靚，儀式感滿滿👍🏻…Read More

呢度出名燒春雞，特登嚟朝聖吓，果然名不虛傳。平日嚟好多打工仔都嚟呢度lunch，大約12:15nn 嚟到都仲可以即刻有位唔使等，如果唔係嘅就要去出面排隊。茶餐廳嘅格局，當然亦都係茶餐廳嘅節奏，快靚正，一坐低已經即刻有人問你食乜嘢，落咗order後眨眼隻燒春雞就會出現喺你眼前。燒春雞熱辣辣，皮脆肉嫩，餐廳可以Offer膠手套方便食，但收取$1一對，不過我覺得真係需要嘅，值得豪爽啲。一路食啲雞油不斷滴出嚟，隻燒春雞真係唔細隻，首先一定食咗隻雞髀先，怕肥嘅都冇辦法所有雞皮都要食晒，跟住就食雞翼，去到個雞胸，我已經飽到食唔到落去，不過我都試咗兩啖，雖然係雞胸，佢都唔算太嚡。配菜我就揀咗薯條，脆卜卜好好味唔係腍啤啤嘅。都講吓佢嘅服務，茶餐廳水準，但係都有啲窩心，服務員見到我攬住個大袋，特登拎張圓凳擺喺我隔離俾我放袋，值得一讚👍🏻…Read More

呢度嘅carbonara 真係冇得輸，好味到不得了。佢有兩款選擇嘅，一款係「胡麻醬溫泉蛋卡邦尼意大利粉」，而另外一款就係「法式龍蝦汁溫泉蛋卡邦尼意大利粉」，我哋就食咗前者。唔識好仔細形容有幾好味，總之個意粉食落去軟硬度好適中，個醬汁真係調校得好好味，初時見到咁大碟驚食唔晒，因為平時出邊食嗰啲會好漏，但呢度唔漏不特止，仲吸引到你好快想再食，直至清晒佢為止😂，我同朋友都比高度評價，讚不絕口。另外我哋叫咗個「野菌燒汁和牛漢堡蛋包飯」，又係好大份量，個漢堡扒好厚肉，啲嘢菌燒汁撈埋落啲飯度，係真係會令你食晒成個飯，好味嘅，不過相比之前個意粉，呢個就輸咗少少。佢哋嘅嘢飲都整得好靚，有打卡位。甜品就選擇咗「伯爵茶慕絲蛋糕」同埋 「抹茶芝士蛋糕」，兩個都好味，呢餐飯好滿足，仲要一啲都唔貴，性價比好高，值得推介👍🏻…Read More

長假期特登嚟試吓，地方不大，座位有限，所以都要喺門口等一段時間，加上佢哋唔會叫客人走，就算有人飲完咖啡坐係度唔走，都冇辦法。最後差不多等咗20分鐘，就可以入座。我同朋友分別試咗The Salty and Wet 同埋 Bubble Black。朋友話Salty個杯幾特別，至於我杯bubble我就覺得好似係凍嘅black coffee 不過就加咗啲氣，都OK嘅，咖啡飲落去都好飲。食物就試咗 Crème Brülée 同埋 Earl Grey scone ，Crème Brülée 質感同平時嘅差不多，不過呢度係冇咁甜嘅，至於個scone 就有啲失望，質感呢就到位嘅，但係佢寫明係 Earl Grey 呢，就真係完全食唔到嗰種味，俾多咗幾蚊，但同食緊普通嘅 scone 冇乜分別。…Read More

朋友介紹，佢冇講錯，呢度環境好舒適，客人真係可以隨便坐，坐幾耐都得，服務員唔會打擾你。佢哋分開兩層，樓下係cashier 同埋少量嘅座位，樓上就比較舒適，同埋比較靜。食物選擇方面就同一般Cafe差唔多，亦都有走健康嘅路線。佢哋唔係做好特別嘅食物造型俾你打卡，比較低調、簡單，配合cafe嘅形象。食物質素到位嘅，唔使擔心。試咗佢哋嘅三文魚扒set，三文魚都幾大塊，煎得好香，尤其是個三文魚皮，但係又唔會好油膩，再配合藜麥，中和咗三文魚嘅肉感，不過如果可以多啲藜麥就更加好。此外提供不同類型嘅咖啡選擇，包保有一款啱你心意。服務員都好有禮貌，問佢哋嘢，個個都好細心講解，令客人好舒適。…Read More

今晚突然間想食甜品，於是乎就去試吓新餐廳，一去到門口已經嚇親，因為見到門口一大堆人，原來佢哋係等緊外賣，好彩入到去啱啱有一張二人枱即刻坐低咗。首先叫咗佢哋其中一個signature 「開心果雪燕西米露」，跟住再叫咗個「木瓜桃膠雪耳」。開心果嗰個有滿滿嘅開心果味嘅，我亦都見到服務員倒咗好多開心果喺面，入邊仲有芋圓，亦煮得好味，好多西米露，不過我就食唔到雪燕嘅味道。至於個木瓜就正正常常，唔係甜到漏嗰隻，桃膠大大粒，都有幾粒，不過就冇咩味道。我見到好多客人都食「原個臺農芒果雪糕」，賣相好吸引，可以打卡，下次可以試吓。服務就一般般啦。…Read More

難得喺土瓜灣，搵到優質嘅日式串燒店。我形容呢度嘅食品質素唔會令你哇哇聲，亦唔係天花板系列，但亦都絕對到位，性價比高！店員介紹特價海鮮，就試咗佢哋嘅扇貝，同蟶子，以咁嘅價錢，真係算係咁，唔算細隻，食落都新鮮嘅。另外再叫咗鹽燒雞翼、味醂魚干、秋葵、同埋粟米🌽。最欣賞嘅就係個鹽燒雞翼，其次就係粟米🌽。至於個味醂魚干就比較硬身咗啲。想讚一讚佢哋上串燒嘅時候，每碟都會免費送上少量牛蒡，整得好好味。講到服務，服務員會不停幫我哋斟水，適當嘅時候亦都會幫我哋換碟。總括嚟講可以再嚟。…Read More