jayl2626's Profile

今日約咗媽咪喺沙田行街，喺商場見到呢間係食點心小菜嘅舖頭，見佢裝修現代新式，就兩母女入去撐枱腳。花雕醉蟹：呢個係餐牌上嘅"大廚特別推介"，蟹膏同酒香交集，係味覺嘅享受。小小梨子：得意可愛嘅造型好加分，裏面係黑椒牛肉，外脆內惹味。黑松露野菌餃：每啖都散發住好香好香嘅黑松露味，內餡除咗野菌，仲有蘿蔔同粟米粒，味道配搭得好好。龍蝦肉餃：白裏透粉紅嘅精緻外表，皮薄龍蝦肉嫩滑，"粉紅佳人"，點心如其名。老菜脯海鮮粥：有蝦，魷魚，青口，蠔仔，仲有芫茜嘅香氣襯托，每啖粥都充滿鮮味，正。XO醬蝦腸粉：蝦同腸粉嘅配搭，口感層次豐富，味道又唔會太濃。甜品：桃膠雪耳紅棗；爽，滑，甜，清潤之選。飲品：手打黃皮檸檬茶，杯蓋上面有個噴住煙嘅小茶壺，係別緻嘅亮點；有黃皮嘅甘香加持，舒爽。豐富嘅午餐過後，充滿動力！…Read More

今日約咗朋友去尖沙咀買嘢，經過呢間麵舖，見佢裝修充滿懷舊風味得嚟又乾淨利落，於是就走入去醫肚。雙拼湯幼麵：虎蝦雲吞非常大粒，size係食過咁多間雲吞麵店嘅數一數二！仲好足料，三隻大蝦咬落去好弹牙；騙牯牛肉大大塊，嫩滑又juicy。湯底味道恰到好處，幼麵掛湯食仲伴有蔥香。雙拼蝦籽撈粗麵：上枱已經畀一點點金黃嘅顏色吸引住。蝦籽雲吞香氣撲鼻；陳皮鯪魚球嘅size拍得住雲吞咁大粒，食落仲有陳皮嘅香氣，都幾獨特。多如繁星嘅蝦籽，跟隨住柔和嘅粗麵入口，好有滿足感。甜酸炸雲吞：外皮咬落去好似薯片咁脆，而蝦肉保持住彈牙，配甜酸醬，好快ko。油菜：菜心色澤夠靚，配蠔油係最佳配搭。食完呢餐好有驚喜，果然同餐牌上講嘅一樣，“樣樣招牌”！…Read More

今日同朋友嚟咗旺角呢間越南Cafe食lunch。呢間Cafe以綠色同木色為主題，加上日間窗戶外嘅光線，更顯自然舒服。越式酵茶葉沙律：新鮮食材，配上獨特嘅沙律汁，好特色。脆米紙薄餅：薄餅上面鋪滿青瓜，蘿蔔絲，同埋啲好似臘腸嘅粒粒，配上沙律醬，入口鬆脆同好有新鮮感。扎玉米纸卷：薄薄嘅米紙包住扎肉，配埋青瓜同蘿蔔絲，點埋醬汁，好食。惹火豬頸肉：上枱嘅時候店員會喺你面前用火槍焦燒豬頸肉嘅表面。點醬汁食，入口滋味，配菜菠蘿亦都好甜。“嫲嫲越南湯”招牌金邊粉：有牛腩，牛筋，牛丸同埋生牛河，啱曬啲鍾意食牛嘅人，湯底香濃，金邊掛湯食好爽滑。富國島椰子奶凍：顏色好靚，仲有仙氣(乾冰)襯托，有芒果同埋西米，好青甜。越南滴漏咖啡：滴漏完畢，攪動底部嘅煉奶，再倒落充滿冰塊嘅玻璃杯，入口涼快，咖啡獨有嘅苦澀，越南滴漏咖啡係我第一次見識。凍柑桔檸檬綠茶：甘香嘅味道交集，又唔會好甜，舒心。越式風情, 可以在Encore。…Read More

今日同朋友喺“金麥泰泰國菜館”食飯，呢一間係位於九龍城其中一間老字號嘅泰國食店，仲有一間分店喺同一條街嘅60號。呢度有好多超值套餐選擇，仲色香味俱全。冬陰功：材料豐富，帶有蕃茄味，非常醒胃。泰式小食拼盤：個人最鍾意嘅係蝦春卷，用春捲皮包住成隻蝦去炸，加埋酸甜醬食，超級鬆脆香口！仲有炸芋卷同埋椰香味濃嘅香葉包雞塊，喺拼盤嚟講較為少有，好有特色。雞肉豬肉串燒：表面微微焦香，入口肉質軟滑，配沙嗲醬食更添風味。菠蘿焗飯：原隻菠蘿上枱，米飯粒粒金黃，帶有菠蘿香，配肉絲，腰果，蝦肉，Yummi。芒果糯米飯：芒果好甜，糯米紫米加上充滿椰香嘅醬汁，香甜煙韌得嚟又唔“漏”，I Like。加埋泰式長青飲品-- 龍眼冰，同埋青檸可樂作结，Perfect！…Read More

今日有咗朋友喺旺角買嘢，未shopping之前一於就嚟“鍋霸”食餐飽先。呢度環境非常舒適闊落，服務又一流。Prime Grade牛肩胛骨+西班牙冇激素豬肉片 120分鐘吃到飽火鍋套餐：揀咗鴛鴦湯底，“藥膳椰子雞”椰香撲鼻；“藥膳養生花膠雞”夠曬滋補。湯底除咗有主題材料之外，仲有粟米，豆卜同雲耳，非常足料。安格斯牛肩胛骨肉片顏色紅潤，肥瘦均勻，入口軟滑，每人食咗4，5盤！豬肉片係冇激素嘅，肉質靚夠，有夠健康。海鮮類方面：游水海蝦新鮮彈牙；脆鯇魚片肉質鮮美；帆立貝鮮甜；手工黑松露墨魚滑，色澤黑亮，入口芳香細滑。其他食材Order咗：炸魚皮，響鈴卷，長蟹棒，腐竹，粟米，雞髀菇同油麥菜，各種食物嘅質素亦都好好。甜品：揀咗Häagen-Dazs嘅雪糕，令豐富嘅一餐更添完滿。飲品方面：我鍾意佢哋嘅桂花烏龍茶，散發住桂花嘅清香，舒心解膩。…Read More

“泰式食”係我其中一間鍾意食嘅泰國菜館，座位擺放寬敞舒適，又有架好靚嘅舊式車做打卡位，侍應服務有夠nice，係同朋友飯聚傾計嘅好選擇。“泰滋味自選套餐”拼盤：有春卷，蝦餅同魚餅。春卷入口鬆脆，餡料味道恰到好處。魚餅同蝦餅咬落軟滑，配埋泰式甜酸醬，令味道更上一層樓。明爐青檸烏頭：上枱已經聞到好香，每啖都品嚐列魚肉嘅嫩滑同埋鮮味，酸菜汁嘅精華，青檸同芫茜嘅芳香，好有層次感。青咖哩牛配薄餅：青咖哩嘅味道調配得相當好。材料豐富，嫩滑嘅牛肉，少有用到茄子做咖哩嘅配菜，非常好食。小茄子同豆角，味道亦相當不錯，配埋薄餅食口感豐富。呢個dinner set喺食物質素同配搭上都有驚喜，Yummi！…Read More

能夠喺香港品嚐到懷石料理嘅餐廳寥寥可數，起源於日本寺廟修行後享用嘅素食菜餚，後來亦逐漸演變成高級料理，今日就同朋友喺數碼港嘅日式餐廳一一细味。前菜--鵝肝脆方：鵝肝香氣四溢，配脆脆嘅多士食齒頰留香。蟹肉果凍同子紫蘇魷魚：將蟹肉製成果凍，口感特別。小杯魷魚混有wasabi，味道好夾；而包住紫蘇葉嘅魷魚肉就非常彈牙，好有風味。清酒煮鮑魚：鮑魚入口充滿酒香，蘿蔔軟糯入味，係非常特別嘅配搭。刺身--擺盤非常靚，仲用到少有嘅玫瑰做裝飾，可見廚師嘅用心專業。生蝦入口散發菊花同青檸嘅清香。帶子伴海膽同魚子，帶有檸檬香，口感豐富。三文魚，吞拿同八爪魚新鮮厚身，點醬油食更見鮮美。酒菜--厚燒玉子配番茄塊：以焦糖包圍住嘅厚玉子；凍蕃茄有芝麻醬嘅加持，甜味各有千秋。青魚伴海老：青魚入口好有驚喜，嫩滑度係少有餐廳做得到咁高質；海老亦夠彈牙。煮物--生薑大蔥豚肉：肥瘦均勻，入口味濃，配蛋沙律食，出奇地夾。主食--蜆肉松茸菇燴飯：用石鍋盛載嘅燴飯，香氣撲鼻，材料比例同飯嘅軟硬度恰到好處，好有暖腹感。甜品--綠茶雪糕：口感細滑，係豐盛一餐嘅完美作結。每款菜式都選材新鮮，烹調細膩，性價比高；懷石料理嘅特色，有幸品嚐！…Read More

今日出咗旺角，行過呢間粉麵店，就決定入去醫肚。一碗粉麵，跟餐加$8蚊有埋嘢飲，凍熱飲品都係同一個價錢；油菜都係$13蚊，好鬼抵，所以座無虛席！南乳豬手河粉$38：豬手好大舊，咬落軟腍腍，有夠入味，幼身河粉掛湯食夠爽滑，份量又夠多，真係好抵食。雙丸河粉$38：湯底濃，每啖河粉入口都散發住蔥香。手打牛丸肉味香，好有咬口感；自製魚蛋彈牙，仲有胡椒香，幾特色風味。蠔油菜心：份量都多，菜心新鮮色澤靚，點蠔油食一流。腐乳通菜：葉同菜“框”都好翠綠, 腐乳醬汁亦多，一啲都唔孤寒，性價比高。食物質素好，價錢又親民，喺旺角粉麵店嘅好選擇！…Read More

間中都會行過呢間土耳其食店，今晚就一於試下外賣做晚餐。全程都係由一個女店員一手一腳包辦，薯條同埋肉卷嘅材料都係即炸即炒即整。All Day Set 烤雞肉卷+薯條：薄薄嘅餅皮包住烤雞肉，相當足料，配搭製醬汁相當惹味，夾雜埋蔬菜中和返冇咁heavy，正。薯條金黃脆身，食完一條又一條。套餐附加嘅炸雞塊：外脆內軟, 點埋個三色靈魂醬汁，令人愛不釋手， Yummi。牛肉辣肉腸Pizza：脆脆嘅薄餅皮，加上餡料份量同芝士底嘅比例恰到好處，每啖微微辣風味，一試愛上。土耳其風味Very Nice，會再Encore!…Read More

今日朋友仔帶咗我嚟呢間有開揚海景嘅店舖嘆點心。呢度地方相當闊落舒服，仲可以帶寵物嚟。侍應服務細心週到，老闆娘有時間嘅話仲會過嚟介紹每款美點，仲中途幫我哋加熱返個點心，呢種體貼真係加曬分呀！👍👍👍粉葛章魚豬骨湯： 非常足料，絕無味精，每朝七點就開始製作，湯味濃，好有住家感覺！蝦多士：咬落非常鬆脆，蝦肉彈牙，配埋個沙律食，口感層次豐富。蘿蔔絲酥餅：外皮酥脆，蘿蔔絲餡軟滑青甜，高質。焗叉燒包：每日攞新鮮叉燒即製，皮薄餡靚，叉燒口感鬆軟，嗰種甜味又唔會好“漏”，正。懷舊臘腸卷：臘腸夠曬大條，配軟軟嘅包皮食，味香又夠juicy。懷舊豬潤燒賣：大大舊嘅豬潤配足料嘅蝦肉香菇燒賣，真係好少地方有，味道交融得恰到好處。陳皮普洱入口順滑，茶味香又解膩消滯，嘆住茶欣賞海景，舒心。😚😃…Read More

今日同friend喺太子嘅東京街食lunch。店舖有好多食物種類選擇，串燒，炸物小食，拉麵，魚生丼餐，壽司定食等等。我哋order咗啲小食，壽司盛，同埋壽司定食。辣味螺肉份量夠多又夠入味，好扺食。滋味嘅帆立貝充滿牛油嘅香氣。天婦羅蝦，配沙律醬食，外脆內鮮，令人一口接一口。炸煉奶芝士年糕，非常煙韌，點煉奶食同芝士內餡相當match。海膽盛，海膽非常鮮甜，再配大赤蝦，帶子，魚籽3種唔同嘅食材，各有風味。火灸壽司定食，有9款唔同嘅壽司，蒸蛋，菜沙律同埋麵豉湯。壽司材料豐厚大件，當中嘅火炙醬油三文魚壽司，三文魚嘅新鮮同醬油嘅獨特香氣結合，漁脂渗發，令人愉悅。別外火灸油甘魚，外層微微焦香，肉質緊實，鮮嫩，好有驚喜；配件食物亦都好水準。全部食物都係質素之選，享用咗鮮美嘅一餐。…Read More

上星期同friend喺粉嶺嘅名都冰室食tea，諗住呢間嘢新開咗冇幾耐就試下啦，地方大，座位闊落，仲有啲萬聖節嘅裝飾。環境都幾嘈雜，落單侍應幾次都聽唔到我哋講嘢。炸雞髀配沙律，凍檸茶：雞皮脆得嚟有啲位置係比較硬，口感覺麻麻，雞肉唔算嫩滑，普普通通。份鮮果沙律就約略嫌細得滯啦，味道中規中矩，我覺得份量可以多啲囉。煎豬扒配湯烏冬，熱奶茶：豬扒質素一般，個烏冬一入口略帶酸味，應該係家為廉價嘅烏冬，係咪可以用隻入口冇酸味嘅烏冬？！而熱奶茶入口亦都有啲澀，唔知係咪茶膽問題。…Read More

上星期同friend去咗美麗華嘅無印良品買嘢，就順便食埋個lunch。牛油果醬蝦肉蟹肉開面三文治$118不論係蟹肉配菜多士，同凍蝦配牛油果醬多士，味道配搭都好fresh，你都夠新鮮，薯條就正常收貨，總算對得住呢個價錢。四品料理套餐$118 南瓜茄子漬，南瓜就ok啦，不過其一次就冇乜味。百香果醬沙律有西柚，蝦，蜆肉，配埋沙律菜同醬汁，Yummi。醬油燒比目魚，皮香脆，魚肉滑。唯一不足嘅就係梅子醬豚肉，一咬落去...凍嘅，同待應講佢都馬上換一份新嘅畀我哋，再食落口，勉強叫做暖嘅，都係唔夠熱囉。至於份蔬菜清清地都ok，但都係唔夠熱度，成個觀感即時扣咗分，熱嘅食物係要夠熱入口先會舒服。…Read More

今日嚟咗土瓜灣呢間上海小店度食晏，店舖地方橘子簡潔，客人陸續入座，越見熱鬧。食物方面有冷盤小菜，包點小食，小籠包，餃子類，各式蔥油拌麵同陽春麵，菜飯類，糖水，以供選擇。呢度嘅蔥油餅厚薄適中，外皮酥脆，啖啖蔥香撲鼻，香脆嘅口感，好快ko。蟹粉小籠包餡料豐富，裏面嘅湯汁非常香濃。粢飯嘅色澤好靚，不論係糯米飯黏牙嘅口感，油炸鬼嘅軟硬度，肉絲，炸菜鹹味配料嘅配搭味道都恰到好處。煎韭菜豬肉餃，咬開係滿滿嘅韭菜，外脆內渗肉汁。甜品係枸杞銀耳百合羹，味道清淡唔會過甜，平衡返整餐嘅油膩感。…Read More

今日去佐敦買完嘢，經過廟街，見到間餐廳係食泰式同緬甸風味，因為之前冇食過緬甸餐，於是就入去試下。店舖裝修簡潔，牆壁上掛咗泰國同緬甸嘅風情畫，天花亦都掛咗唔同顏色嘅紫傘，好特別。我哋order咗個緬甸咖哩牛肋條配薄餅，特別講咗要最細程度嘅拿辣。有保溫器皿keep住熱度，對於唔食辣嘅我嚟講，辣度可算接受到。牛腩同牛筋都好大舊，份量好足。牛肉肥瘦比例恰到好處，入口即溶化，好入味。而牛筋滑得嚟仲feel到有膠質感。咖哩煲入面仲有蕃茄，紅椒同埋青檸，配埋薄餅食，近增添特色。另外仲有嫩滑嘅雞肉串燒，配埋沙嗲醬汁同花生碎，有另一番風味！…Read More