RubyYung's Profile

為咗就我哋喺荃灣返工嘅朋友，第一次嚟呢度食打冷。   當日一行四人，未人齊一坐低就叫咗個韭菜豬紅(>^ω^<) 。豬紅份量足，味道夠，反而韭菜就唔多。 當日我熱氣唔舒服，但都忍唔住要食個蠔餅！佢係炸嘅，唔係煎，仲熱氣(˶‾᷄ ⁻̫ ‾᷅˵) 炸豬大腸炸完再炸。唔好。蠔仔粥就因為我有啲想搵熱嘢食，但又唔想叫白粥喎(腌尖)，不過佢真係煮得幾好味，一碗夠兩三個人分。  腐乳通菜唔夠腐乳味，但係都係新鮮炒。其實全部嘢都普普通通，不過不失，最差嘅就係炸豬大腸咋。題外話，最驚訝嘅就係因為外面嗌交，當時我哋都好驚，佢哋差啲打交咁滯，地方有啲複雜！…Read More

行咗成個銅鑼灣諗唔到食乜，終於走咗去喺Outback同上海姥姥之間作出選擇 ╮(╯▽╰)╭ 結果我個friend就揀咗食上海嘢(一如以往咁揀中餐🤷🏻‍♀️)。 我哋嗌咗香煎素鵝($36)，蒜蓉炒時蔬($72)，小籠包($43)，仲有上海炒年糕($82)。 食物質素真係幾好，除咗個蒜蓉炒時蔬有啲唔係幾像樣之外，佢有啲鹹，而且佢好似係湯浸青菜咁，煮完就喺上面加咗啲蒜粒就話炒咗 ಠ_ಠ。 而佢個小籠包多肉多汁，甚至比銅鑼灣嗰間鼎泰豐更加好食！ 上海炒年糕都好大份，炒得啱啱好，冇過火，鹹淡度適中。 而香煎素鵝我就揀咗輕盈版，但都有六舊，方便一啲食得小嘅人，或者得兩個人食，可以有多啲選擇。 順帶一提佢哋嘅服務員態度好好，好細心，唔該前唔該後，我覺得係食得開心嘅。 銅鑼灣呢間上海姥姥可以再encore( ´▽` )ﾉ…Read More

本身係想去深水埗長發麵家食佢嘅招牌魚蛋麵，點知佢假日冇開，於是乎行咗過去劉森記，見到冇乜人排隊，於是乎排咗兩張枱就到我哋。 其實我哋排隊見到佢煮麵嘅時候都心知不妙，覺得佢個麵黐埋一劈劈，唔爽口，但係始終都比咗呢次機會佢。 一坐低就夾咗佢哋啲醃蘿蔔，跟住嗌咗蝦子雲吞撈($54)，再叫咗一個雲吞麵($40)同埋腐乳通菜($22)，加一罐可樂($8)。 蝦子撈啲蝦子份量好足，但係啲麵就同我哋之前所講咁太淋，一啲都唔爽口，雲吞(三粒)冇味，啲蝦又唔爽，個湯底好淡。 雲吞麵比較之下仲更加慘烈，因為佢個麵係烚完再浸住嘅湯，完全係冇味╮(￣▽￣"")╭ 醃蘿蔔同腐乳通菜還可以。 一句講晒，唔值得再排隊嚟食！…Read More

今日經過佐敦好想坐低飲杯嘢，於是乎我個friend就帶我去咗呢間老店，話坐低食個下午茶。 入到去一個人都冇，冷氣都冇開，我就知道伏㗎喇，不過算啦，都坐低咗。 我個friend嗌咗沙嗲牛肉公仔麵餐($41+3)，我就嗌咗奶醬多餐($35+3)。 佢個沙嗲牛肉麵完全冇沙嗲(味道冇，外表都睇唔出)，仲要係壞嘅，已經好有問題！跟住嗰塊餐包，用微波爐叮熱，完全係唔新鮮，成個餐可以食嘅只係得個奄列。 咁啱個老細行過嚟拎個多士俾我嘅時候，我個friend同佢講啲牛肉唔得喎，問佢咁都係沙嗲嚟㗎咩？一啲沙嗲都冇。佢態度係，望一望你就走開咗，根本就唔關佢。 我個多士就唔使講，都係隔夜麵包再隔夜。其實除咗杯嘢正常啲之外，全部都係唔正常呢間嘢，真係永不再見！ 佢沒落真係唔怪得人，唔怪得冇人幫襯。…Read More

其實平時都冇乜幫襯呢一間餐廳，但係今日因為去敏華餐廳買飯嘅時候，佢哋話做唔切，唔做外賣，所以我唯有走咗去呢度，諗住快快趣買完去醫院探爸爸。 入到去一個阿叔招待我，我見到個餐牌寫住窩蛋免治牛飯，我問佢免治牛係咪茄汁免治牛，佢話係，於是我話要煎蛋唔要窩蛋，佢話冇問題，仲有一杯餐飲送添，盛謂$50。果下心諗真係抵到爛，因為敏華都好似要$58/$59。 等咗大約十分鐘，佢就拎住盒飯話係煎蛋免治牛。但我行到一半，從半透明嘅膠袋發現盒飯唔係茄汁嚟，而係一啲啡色嘅芡，而且嗰啲牛肉係細細舊一粒粒一片片，而唔係免治牛。我嬲到爆炸！但係因為我要趕住去探爸爸，唔想返去同佢嘈，唯有去第二間買過。 呢間嘢真係送都唔要！ 不過中肯啲講，佢嘅味道唔係差，不過呢個點都唔會係免治牛囉，商品與說明不符，點都唔會再幫襯。…Read More

我個前同事推介話要試吓呢一間會跳舞嘅烤鴨。 佢哋個個都話好抵喎，一個餐80幾蚊，不過我哋點會甘心淨係食一個餐吖，我個同事話要食兩個餐再加多半隻烤鴨╮(￣▽￣"")╭ 一開始我都擔心食唔晒，於是乎我淨係叫咗一個餐同埋追加咗半隻鴨。 點知嚟到嘅時候，原來嗰個餐嘅主菜好細兜，而且得一個湯唔夠分。於是乎都係再追加多一個餐，結果真係承佢貴言，嗌咗兩個餐再加半隻燒！ 我哋叫咗牛油大蝦伊麵，而嗰個湯羹我哋係要咗粟米海皇羹。一如期望個大蝦伊麵非常好食，蝦爽脆，但細細碗，其實一個人可以食得晒。結果追加左個XO肥牛炆烏冬(不過唔記得影相)，不過不失，不過佢啲烏冬有少少炆到糊晒。 楊枝甘露都算足料嘅，不過唔使期望太大，。Total: $466題外話: 樓面冇乜侍應，叫極都叫唔到人…Read More

呢間嘢我哋成日都嚟，但係自從疫情之後就好似未嚟過，突然之間好想食串燒，於是就約咗我個酒肉朋友一齊去。 一去到，我哋當然就叫咗一杯啤酒，凍冰冰涼透心 ($7X)。 呢間嘢最好食嘅，我一定會推介明太子沙律！佢啲明太子咬落去粒粒卜卜趣，好過癮。我每次都掛住佢，不過唔平㗎，好似要$7X。 我哋又嗌咗辣腸，牛舌，雞泡魚乾，三文魚飯團，同埋雞翼。全部都好好味，雞泡魚乾送酒就一流。 之後叫咗一支清酒，好抵，三百幾蚊。再嗌多咗幾個小食(燒年糕)，但掛住食都冇影相，淨係影咗枝豆。臨尾，我哋都嗌咗一jar啤酒，好圓滿咁結束。 每位$815。…Read More

久仰大名，終於的起心肝提早預約，結果我哋就book咗喺閒日去飲個晏晝茶！ 我哋12點鐘去到，當時都係得兩三枱客，環境靜到蚊飛過都聽到，搞到我都唔好意思要好靜靜咁講嘢 ~\(≧▽≦)/~ 一坐低，為食嘅我見到佢哋嘅餐前小食 ~ 脆合桃，真係好食到停唔到口 ٩(˃̶͈̀௰˂̶͈́)و 我由頭食到尾！ 佢個芋角($60兩粒)非常好味，外層炸得好鬆脆，裏面雖然係暖暖哋，但係食得出好新鮮。 其中我要稱讚一下佢哋做得好貼心嘅，係佢哋可以嗌兩個點心上，雖然餐牌上面佢哋係寫住三件嘅價錢，但佢見我哋兩個人，於是乎主動問我哋有冇需要叫兩件，抵讚！ 我哋仲嗌咗兩件蝦餃($49兩粒)，同埋一個灌湯餃($178)。 其實佢哋兩個點心都好有水準，蝦餃啲蝦好新鮮好爽，個皮做得啱啱好，唔會話太厚。個灌湯餃啲料好足，啲湯好鮮甜，不過佢就唔係用最正宗嘅做法上枱。 我朋友咁鍾意食腸粉，點會放過試佢哋蝦腸嘅機會。佢嘅腸粉皮做得好好，好薄好新鮮，睇得出佢哋好有心，裏面嘅蝦同個蝦餃一樣，好新鮮爽口($140)。 不過，我最最欣賞嘅就係佢哋個叉燒包($60兩個)，食出叉燒包裏面嘅叉燒有啲炭燒味，而我個朋友就話呢一隻叉燒包，就係佢哋細個時食嘅味道，懷念。 燒賣($64兩粒)質素良好嘅，蝦同肥豬肉個比例都好啱，唔會覺得好肥，夾咗埋位先至記得影相。 茶芥收費$84。 盛謂$698.5。 以佢嘅質素同埋服務態度，呢餐飯我覺得食得好抵！ 題外話，之後餐廳好多人，full house，同之前入坐時好唔同，都幾嘈下。…Read More

嗰日同我個朋友喺銅鑼灣行街，於是乎就諗起走去食我哋之前都食過，覺得好好味嘅鰻魚飯( ´▽` )ﾉ 曾經我俾過佢幾好嘅評價，但係今次真係極度失望ಠ_ಠ 我嗌咗個照燒雞鰻魚丼，而我個朋友就嗌咗個雙層鰻魚丼。 其實不嬲我都唔係好鍾意食鰻魚，因為我根本唔好魚🐟，不過上一次食過，都覺得佢有少少嘅炭燒香味，所以今次就揀咗個鰻魚拼雞扒。 一上到嚟，佢個漬物同埋碗湯係分開咁樣一個一個拎過嚟，而唔係好似之前咁一盤連埋個飯上枱，個賣相display真係好差，完全覺得好似自己好似走咗入茶餐廳咁。杯送嘅綠茶(熱)都仲要係自己沖，完全真係。。。冇嘢講。 唔緊要啦，心諗希望個鰻魚飯合格啦。點知，個鰻魚拎到嚟完全冇炭燒嘅香味，碗飯同條鰻魚完全係微暖，溫度完全錯晒！ 我同我個friend真係好後悔，早知走去灣仔街市食強記車仔麵啦╭(╯^╰)╮ 不過唔緊要，都係嗰句，如果咁差，就冇下一次。盛謂$235，雖然有加一，但原來好似有九折。 P.S. 環境其實欠佳，因為啲枱距離好近，感覺唔良好。…Read More

呢間舖前前身係恒香，我之前都有寫過佢哋嘅食評(非常差，人手嚴重不足)。 最近留意到佢哋好似轉咗兩次手。結果，呢日又喺諗唔到食乜嘢嘅情況下，上咗去飲茶。 我哋呢啲窮人，第一時間梗係睇吓有咩優惠點心٩(˃̶͈̀௰˂̶͈́)و，眼見佢個蝦餃$9.8三隻，而且個牛肉球都係$9.8 (不過因為假期嘅關係，兩樣都要加多$3)。 除此之外，我哋呢啲大食積，兩個點心點夠啊？嗌多咗一個鮮蝦腐皮卷，小籠包，同埋一個點心拼盤。 問佢個點心拼盤有啲乜，個侍應竟然同我哋講話好睇過師傅點執😅佢都唔清楚喎。咁得意？我哋咪試吓囉╭(╯3╰)╮其實啲嘢都幾好，有燒賣，有粉果，up to standard。不過最衰嘅係個拼盤裏面竟然有兩個甜點(馬拉糕同埋薑汁糕)，好少會咁囉，而另外嗰舊白色嘅其實係一舊冇皮嘅饅頭，裏面冇餡㗎。 之後佢個蝦餃同鮮蝦腐皮卷都好喜出望外，蝦餃好大隻、腐皮卷即炸熱辣辣。不過最令人驚喜嘅，其實就係嗰個牛肉球。 牛肉球食得出佢裏面只係撈咗好少肥豬肉，所以你會食得出隻牛肉球好結實！而家好少酒樓會做到咁重牛肉嘅比例。 佢個小籠包細細隻都OK，普普通通唔好要求咁高。 呢間嘢嘅價錢抵之餘質素都睇得出有用心，所以我覺得可以再encore。 盛謂$124。…Read More

日日出街食飯，你估真係好想出街食飯咩。 等如日日煮飯，你估真係好想食住家飯咩。 眼見元朗有好多嘢食，其實有好多嘢食都唔代表你會想食，或者係好食。 呢日搵嘢食搵到頭痛，於是乎是但走入吉野家解決肚餓就算。 其實自己不嬲都唔係好鍾意食吉野家，不過好耐冇食就算啦。 我家姐揀咗和風牛肉丼(大盛)，我就揀咗玉子蔥煎雞丼。 我個煎雞丼($38)其實好平平無奇，我本來就係衝住個玉子先會揀呢個飯，OK啦，玉子都唔會有啲乜嘢失手，但係個雞真係難食到嘔，完全係食到雪雞味(雖然我知佢係雪雞)。 我家姐個牛肉丼($48.5)就不過不失(主打牛肉冇理由整得會差過個雞飯啩)，啲牛肉份量好多，完全係唔會食得晒囉！作為一個女人仔，我唔明點解佢要揀大盛╮(╯▽╰)╭ 除咗個雞飯係難食啲之外，我諗我唔會再幫襯嘅原因係因為嗰度嘅環境真係好差！燈光唔足夠，昏昏暗暗，啲枱啲櫈好舊，其中一個corner位啲枱仲要疊起晒，完全係好似半執笠狀態。感覺好唔舒服。 完~…Read More

嗰日去行街，行到攰。於是乎5:30pm就入座，意料之內咁完全唔使等位😆😆😆 四喜烤麩($58)，比起一般其他嘅舖頭，我略嫌佢整得有啲太甜。 四川酸辣湯($52)，辣到飲唔到ಠ_ಠ，結果我飲咗兩啖就由我朋友包辦晒！不過食到辣嘅佢，都話覺得係有啲太辣。不過佢都有讚個酸辣湯好足料。 上海小籠包($43)，普普通通啦，小籠包留得到啲肉汁，冇話一拎起佢就穿，咁樣係好重要‼️ 百步香葱油餅($36)，還可以，略嫌佢唔夠鬆化。 鮮肉鍋貼($48)，唔知係咪食得太多肉，嗰日我食呢幾隻鍋貼，完全係好唔想食。不過我又講唔出佢有乜嘢問題。 不過不失，埋單$291.5…Read More

之前嚟過三次，感覺都幾好，於是乎今日又再比一次機會佢哋。 點知發覺佢哋嘅質素每況愈下，其實有陣時就係咁㗎喇，你間餐廳點樣做死自己，點解冇客，就係因為你哋嘅質素明顯下降，啲客係睇到㗎。好似塊多士吖，又淋又韌，完全唔係即刻烤，但係諗一諗喎，我哋喺佢哋開門冇耐就入去幫襯，咁代表咩？代表佢哋個廚師懶囉，一次過做定晒放喺度╮(￣▽￣"")╭ 其實之前幾次佢哋啲多士係熱辣辣咁上枱㗎，所以我覺得佢哋質素仲可以，點知今次。。。 個沙嗲牛麵我朋友話OK，雖然個賣相不佳。但我嘅雪菜肉絲麵啲雪菜就勁鹹，啲肉絲黐埋一堆堆，撩到撩唔開🤦🏻‍♀️ 反而佢杯嘢飲都唔錯，唔會好似其他餐廳咁啲檸檬🍋冇味，而我杯阿華田都唔會話沖到好淡。 除咗塊多士，質素服務普普通通，$33一個早餐算係咁。…Read More

第一次幫襯，不過應該都係最後一次，因為佢哋好六月二號就結業(租約期滿)。 本來想要粗麵，但原來佢哋得幼麵咋，唔緊要。 不過我哋明明話走蔥，佢竟然成羹蔥拎過嚟。都唔緊要，我哋可以自己「不」走。因為第一次食幫襯，以為佢哋嘅豬扒係炸嗰隻，點知原來只係輕輕拖一拖油，冇用炸粉。又唔緊要啦，OK好味就可以。 以份量計算，佢係幾抵食嘅(原價$35，我哋加咗$10雪菜)，碗麵都好大(男士都應該夠食)，塊豬扒雖然得一塊，但係我覺得冇偷工減料。 我欣賞嘅係佢杯豆漿唔係好甜，雖然我飲唔出係咪自家製╮(￣▽￣"")╭…Read More

我個friend本來係諗住行前啲同我去食粥，點知經過呢間燒臘店，就俾佢外面嘅乳豬吸引咗。。。 結果後悔莫及(/ω＼) 入到去最犀利最令我反感嘅唔係張枱笠痴痴，而係個地板滑潺潺，好似溜冰咁，點知我個friend已經坐底咗，仲要一面開心咁睇Menu，所以我都唔好意思走人。 我個朋友嗌咗個例湯，同埋一個乳豬飯。 例湯還好，有好多菜，感覺唔係太味精湯。 但係佢嘅乳豬飯就真係難食到不得了。乳豬皮唔脆不特止，乳豬嘅肉完全係冇味。佢話以佢食燒味嘅年資，完全未食過咁難食咁淋嘅乳豬皮。個飯嘅份量係好大，不過唔好意思，唔好食幾大碟都冇用。 我嗰個叉燒瀨粉，第一啖飲個湯完全係覺得係例湯溝淡啲，湯底非常之唔正常，我講唔出嗰個感覺，總之係同個叉燒瀨非常之唔夾！不過我叫肥叉燒，佢上枱嘅叉燒正正常常唔係話難食，但係啲湯真係令到個瀨粉有陣up味。 可憐嘅人必有可恨之處，冇人幫襯係有原因嘅！…Read More