buheatsu's Profile

岩岩新開, 好耐冇係香港見過crepe 店就想試一試, 畢竟岩岩係日本番黎, 食左好多想再回味一下. 星期日等左1個鐘先可以取餐 (25張單等左我1個鐘, 明明店內有好多人做緊野), 滿滿既期待點知一咬落去真係好失望. 個皮太薄, 薄得黎又好濕, 好快就痴住張包裝紙, 食落冇乜味. 好食既Crepe 食到最後塊皮又厚又軟又香, 會令你好想再買多個, 但呢個我只係我快d 食完佢走人, 因為同一時間d cream 開始滴出黎了. 見到店員都好忙, d 煎好既餅底就好似一件件未摺好既衫咁堆左係度, 加Cream 果時先好似開面膜咁攤番開吱cream (日本果d 一煎好如果唔用住會一張張攤好疊起), 有d 皮見到一攤番開就已經爛左, 好彩我見到佢整我果個果時係完整既, 如果唔係滴Cream 情況會更嚴重. 可能因為咁, d 皮先唔太好食, 吸番哂d 倒汗水, 變得唔脆唔乾身. 性價比黎講算低, 因為咁既價錢會有期望, 有一刻我寧願俾同一價錢買個性價比高少少既兩餸飯. …Read More

星期六去, 冇訂枱, 有好多人等位, 等左半個鐘等已訂座既人入哂座先安排到枱俾我地, 可能因為附近既另一間同類型既餐廳已經結業, 所以比想像中要多人. 2食品種類係好多既, 但熱門野食 (如手卷) 要等好耐,  叫既數量永遠都俾唔齊, 6個人去食, 叫左12片魚生最後上枱得幾件, 都唔知點分. 因為有d 野食要等好耐, 到最後臨完之前仲等緊果時已經叫你埋單. d呀姐就好勤力咁幫你執碟, 但可能佢地要快, d 碗碟好快就扔落架車度, 有時都會有d 汁彈左埋黎, 隻手套應該唔係成日換, 倒完骨碗後俾番隻碗我地成隻碗邊都濕哂, 真係唔想掂到, 雖然疫情過左, 但咁樣樣真係有少少嚇親. 因為見星期六咁多人, 諗住平日再去食午餐, 訂左枱, 應該冇咁多人, 但因為天雨問題遲左6分鐘, 入升降機時見到有一個來電, 因升降機內收唔到, 所以聽唔到, 去到之後個receptionist話張枱已經俾左人, 話打左幾次電話俾我, 我同佢講, 你只係打左一次, 俾埋個電話佢睇, 得一個電話, 同埋講緊既只係1分鐘內既事, 上到去都冇人排隊, 你俾枱有冇咁快呢? 同埋佢仲要用個好串既語氣咁話我地岩岩開始, 我地full 哂架啦, 你等到就等啦吓~  真係火都黎埋, 我地遲左少少, 都叫做有心理準備要等, 但係冇諗過個receptionist 可以串成咁, 個態度好不可一世, 覺得好似全宇宙只係得番佢一間餐廳咁. 仲要講大話話打左幾次電話俾我, 要屈人都唔駛咁囉. 上次見到訂左枱既, 要等, 冇訂枱, 又要等, 訂左枱遲少少, 又冇左張枱, 即係只有佢地可以遲俾枱你, 其他野你要早到就哂佢地, 真係冇下次. 期待同區有多d同類型既餐廳開, 競爭大d 咁個服務先會有機會變好~…Read More

去完街尾食排骨面, 口痕想食糖水, 所以就試下呢間糖水店, 由於粗身大細所以就唔坐入去食啦, 因為見到佢既位都有少少逼. 叫左一客腐竹蒠米糖水同綠豆沙. 番到屋企當然要即刻試, 腐竹蒠米糖水既味好淡唔夠甜, 而且唔多蒠米, 料唔足, 有少少失望, 而且蒠米煮到都幾爛, 無乜咬感. 個份量亦唔多, 所以唔係話太抵食. 第二日試埋佢個綠豆沙, 都算OK 啦, 但係味道唔太濃, 糖水多過豆... 我諗下次我會試下其他甜品服務方面, 可能因為係外賣既關係, 所以有少少慢, 同埋差少少俾左左我個外賣俾其他人T^T'' …Read More

好耐冇食過茶木, 難得見到唔駛等位所以入去食番餐. 因為係晚市既關係, 所以有晚飯套餐, 是次晚餐有4個人食, 所以叫左4個晚飯套餐, 有菠蘿鮮果酸甜肉, 牛腩, 鹵水拚盤同酥炸蠔餅再加多個豬排肉燥飯. 菠蘿鮮果酸甜肉好特別, 因為可能平時食開中式既咕嚕肉, 無諗過鮮果入面有荔枝, 藍莓, 火龍果同士多啤梨, 個味都算係夾. 豬肉唔係太肥, 口感亦唔錯. 個牛腩煲好較滑唔太肥, 幾入味. 鹵水拚盤味好香, 而且好多唔同既種類. 豬排肉燥飯就比較想像中油少少, 而個炸豬排唔係太特別. 唔太香脆亦比想像中薄.  到最後既酥炸蠔餅真係好油呀><!!!!! 個邊全部都係吸左油既炸粉, 一塊蛋都搵唔到 :(! 到最後要食到去中間先有, 而且個蛋量亦好少, 感覺似食緊成團油淋淋既炸粉, 下次應該都唔會再叫了.野飲方面, 叫左珍珠奶茶同芋香奶茶, 珍藏唔係太Q, 無乜咬感. 亦比較甜. 甜品要左黑森林蛋糕同小茶木劇場蛋糕, 黑森林算係普通, 無乜車厘子味. 而茶木小劇場蛋糕夠硬身, 朱古力味好濃, 值得一試. 而服務都算OK, 可能因為今日唔多人, 所以可以俾坐多過90分鐘. …Read More

成日坐小巴都會經過呢間排骨面店但一直無機會試, 今日的起心肝入去試下. 入得去當然係叫佢最出名既菜膽雲吞排骨面啦. 最先上既係排骨, 已經忍唔住食一舊先. 排骨好酥脆而且唔肥. 而後上既菜膽雲吞面真係好好味, 面好軟 (有少少似米線), 而且個菜膽都好甜, 用黎送面真係一流呀! 而個湯底真都好好味, 忍唔住差唔多成碗飲哂. 同時亦叫左煎餃子, 餃子煎得夠鑊氣而且多汁又香, 係必食之選. 平時經過都知道食飯位好多人, 今日揀左9點幾先幫襯, 都仲係有好多人, 要搭枱. 服務方面算OK, 野食亦上得快. 會再次幫襯試埋其他美食=v=~…Read More

不嬲都對上海野食情有獨鍾, 特別係水餃同鍋貼. 夜晚放工行經呢間餐廳見到有哂呢兩樣野食當然要入去試下啦. 叫左一碗韭菜水餃, 好大隻, 而且好足料, 肉味亦夠濃, 最估唔到既係碗水餃入面加左榨菜, 而且同水餃一齊食真係好夾, 值得一試. 個湯底反而無乜味. 同時亦叫左碗菜肉雲吞豬排擔擔面, 擔擔面既醬有驚喜, 好香, 而個面質亦適中, 唔太軟. 塊豬排算係普普通通啦, 唔係太特別, 調味亦唔係話太濃. 而且有骨. 下次會試下佢個魚腐或炸雞翼. 叫左兩客鍋貼, 上到黎果時見到好多油, 可以因為剛剛煎好, 未吸好油啦, 但係真係唔係太想放入口, 因為目測真係太油啦, 到最後要用水餃既湯底洗洗佢先可以食. 鍋貼咬落口係脆口既, 但係味道一般, 可能因為鍋貼只有鮮肉沒菜去帶出肉既鮮味 :( 所以下一次都未必再叫. 服務果面, 鍋貼可能太受歡迎所以等左好耐. 但其他方面都唔錯既. …Read More

去開西灣河呢頭買送, 見到3點3, 又係時間食個下午茶, 因為想食西多士所以行左幾間唔同餐廳最後揀左呢間小廚. 見到餐廳出面已經有好多野揀, 因為好少可會有鹽焗雞配米線而且仲係做下午茶, 所以入去試下啦=v=! 鹽焗雞唔太咸, 但係肉少骨多  不過以下午荼既份量都算ok 啦. 個米線好軟, 但比想中好食. 而且吸左個湯底真係好入味! 而同時亦叫左西多士配吉列豬排, 西多士既鬆軟度剛好, 加埋個蜜糖真係好正~ 又唔係話太甜. 而薯條既脆度算係剛好唔太油. 但係份量黎講就少左d, 如果可以多少少薯條就好了. 而服務黎講, 以茶餐廳黎講算係咁, 上野食夠快, 衛生ok~…Read More

今日行開油麻地, 有幾間海南雞飯店, 見到呢一間唔駛排隊又未食過就去試下啦. 要左兩個午餐set, 海南雞飯份量唔算多, 一個女仔食完都係仲有少少餓, 而且個汁同其他既海南雞飯唔同, 期待既醬汁變左做酸辣汁同甜豉油  因為唔係太食得慣酸甜汁點海南雞, 所以最後都無用到個醬. 而另一個set lunch 係黃咖哩石班飯, 魚塊有炸過, 個汁亦好香咖哩味, 但同樣地份量亦唔算多. 最後見到有炭燒豬頸肉就要左一點試下啦, 唔係話太油膩但調味唔係話太濃, 所以要靠醬汁去吊一吊個味. 價錢方面都算係平民, 而且唔駛等位, 快lunch 之選.  …Read More

我家四大長老之一係好鍾意食牛排既, 對牛排要求都好高, 係AEON買野既時候見到呢間餐廳有和牛斧頭排食, 咁就提議不如試下啦. 一坐低睇餐單見到有set dinner, 就叫左一份比目魚配松露野菌汁加錢升級配龍蝦湯. 比目魚都好軟滑, 但我都係鍾意同碟上面既菜多d, 豆煎得好軟而且保留到豆本身有既汁. 之後上既蕃茄海鮮意粉好好食, 意粉無overcook 到, 仲係好硬身, 意粉吸收左蕃茄汁更加吊到味. 而伴碟既菜本身無諗住食, 但原來廚師好細心咁加左酸酸地既沙律汁, 係好開胃既情況下就清哂啦~ 去到主菜啦, 就係澳洲M5和牛斧頭排啦, 本身叫左5成熟, 有少少overall, 食落似7成熟, 但係塊排既肉質好好, 所以就算係7成都唔錯, 有好多肉汁, 而且脂肪分佈得好均衡, 一塊斧頭排可以切到8 - 10 片, 所以share 就最好不過啦. 四大長老之一都好滿意~食完當然唔少得甜品啦, 見到有baked alaska 即刻心心眼了! 因為唔係有好多地有得食既, 酒係由服務員加上去既, 可以揀濃唔濃, 我地加左兩次酒, 但個味都唔係太濃, 個蛋白打得好滑, 入面包住既係水果同雪糕. 而個底係蛋糕底, 非常軟, 加埋雪糕真係好夾~最後服務方面, 唔係話等左好耐先有得入座, 但上菜比較慢, 落單後等左45分鐘都未有上菜, 但如果同朋友一齊gathering的話都ok既~…Read More

同朋友出去食飯好多時都係揀食日本料理放題, 今次就試下韓國燒肉放題, 因為市面上係比較少餐廳係做新式既韓國放題. 一上到去見到有好多人排緊隊等入座, 雖然有訂枱但都都要等一等. 餐廳播住K POP歌都算係有氣氛, d音樂唔算大聲, 唔會話太大聽唔到又或是太細只係聽到隔離枱講野. 個位似係一個大筒咁, 坐墊下面可以俾你放你既物品, 但個坐墊有頗多油漬, 建議都係自己抹一抹先好坐落去. 一開始叫左海鮮, 俾既份量算多上菜快, 但之後個上菜既速度開始有少少下降. 肉類選擇都算多, 個人鍾意牛肋骨, 因為比較嫩同入味, 反而普通牛肉係薄少少, 要快燒快食如果唔係好易爛. 海鮮我地叫左帶子同蝦, 蝦比較好食, 但因為本身海鮮既鮮味唔係太濃, 所以都係要靠佢既醬汁. 醬汁可以係出面既醬汁bar 度拎, 都有好多選擇, 我就比較鍾意原味醬味, 因為咁先試到野食本身既味道. 而野飲選擇都算多, 由普通既汽水到韓國果汁飲品都有. 甜品可以揀蜜瓜或者芒果雪條. 兩者都唔係太甜, 而且燒完咁多野食食番條雪條就好滿足. 下次同朋友搵地方聚腳又可以多一個選擇啦~…Read More

記得以前細個果時都係幫襯街邊檔既雞蛋仔, 因為個火侯夠, 但隨住街邊檔買少見少, 好多雞蛋仔檔都入哂舖用哂電子爐. 個味道點都會差少少. 食左咁多間雞蛋仔, 都係呢間最好, 佢係即叫即整, 保証新鮮製造. 所以亦需要等5 - 10分鐘. 整好後又會攤一攤涼先俾你, 保証脆口. 雞蛋仔本身用既粉醬夠蛋香, 而且整既過程落既份量適中, 食落唔會有'食左成團粉' 落肚既感覺. 用黎做下午茶/消夜都一流呀~ 今日揀左下午黎幫襯, 可能因為未放學放工所以人比較少, 平時星期六日, 晚飯時間都會比較多人, 試過有幾次都等左差唔多半個鐘. 呢間舖頭除左有雞蛋仔又點會少得格仔餅, 同一個粉醬但做出黎既口感好唔一樣, 加上佢既醬料真係好好食. 係一間值得推介既小店. …Read More

今日心思思想食火煱, 而家好多地方都有得食火煱放題, 難得係世貿既呢間牛涮鍋星期日都唔多人唔駛排隊所以一定要入去試下. 入到去同其他火煱放題餐廳一樣, 可以揀唔同既類型既牛, 有美國牛肉, 澳洲同日本和牛. 今日叫左美國特上牛, 因為同時可以試埋美國進口牛. 美國特上牛比較肥, 但肉質比較嫩. 而美國進口牛就冇咁肥, 但食落就比較硬, 所以試左兩碟美國進口牛之後就全部叫哂特上牛了. 同時亦可以叫豬肉同雞肉, 雞就無咩特別, 唔會再追加. 而豬肉就係丹麥豬肉, 好軟好好味. 除左食牛肉之外, 火煱點少得配菜呢~ 丸類唔太多, 最普通既魚蛋, 牛丸龍蝦丸欠奉, 有鴨肉丸, 但係無乜鴨味, 同場仲有蟹柳丸同芝士丸.蟹柳丸可以一試, 但芝士丸煮完發到好大, 試左一粒之後就無再拎了. 菜既選擇唔多, 有油麥 , 娃娃菜, 金菇, 冬菇同粟米但我自己就好鍾意佢個沙律區, 因為可以食少少凍野, 唔洗煮. 而佢個日式沙律汁真係好好味!! 放題既沙律區有呢個水準真係好難得!而飲野方面, 佢有汽水同果汁 (提子, 蘋果同橙), 果汁同平時係超市買既有少少唔同, 本身以為係有氣點知原來係無既. 不過都好好飲. 最後甜品方邊都有驚喜. 朱古力曲奇蛋糕夠軟夠香, 芒果/朱古力大福個皮好軟, 入面既夾心唔太甜, 忍唔住食左好多個!!整體黎講係唔差既, 甜品野飲比起其他火煱放題餐廳多同好味, 亦都唔駛等位, 服務好, 上肉加湯都好快手. 菜同丸類方面如果有多少少選擇就好啦~…Read More

呢排成日去西環, 聽講呢區有好多甜品店, 行行下見到呢間糖水店就心郁郁想試下. 一黎個價錢好抵, 份量大, 二黎我比較鍾意幫襯傳統糖水店, 因為果份人情味. 前幾日其實已經去過, 試左佢既綠豆沙, 好足料, 好沙. 之前亦有試過芝麻糊, 好濃好香好滑, 一食就知係即磨芝麻糊. 今日想再去買綠豆沙清下熱, 點知5點鐘去到已經賣哂啦! 好多款糖水都賣哂, 只剩下腐竹蛋糖水同紅豆沙. 所以就買左碗試下啦, 唔係太甜, 腐竹因為煲左好耐所以大部分都已經溶哂. 隻蛋相對地大, 無乜特別, 所以下次再叫我會叫佢走蛋飲多幾啖糖水~呢間糖水店係係橫街, 所以細心少少就會搵到架啦! 老闆人好nice, 外賣會包得好穩陣. 服務態度好, 已經mark 低左行過都要買d番屋企~…Read More

一直想搵好食既酥皮蛋撻因為而家有好多面包店都係做曲奇餅底既蛋撻 行過灣仔見到有間餅店出面排哂長龍就去八下啦. 嘩! 原來係有酥皮蛋撻賣呀, 見到佢門口貼左好多人名人推介, 就心動買左半打黎試下. 排隊果時仲見到有其他餅點, 有菠蘿包, 椰撻. 所以買多左個菠蘿包試下, 咁岩原來菠蘿包新鮮出爐, 即買即食, 真係好正!! 個包好軟而上面既菠蘿包皮亦好鬆化!! 真係好後悔只係買左一個!! 個包size 算大, 但真係好好好好好好食!!番到屋企再試個蛋撻, 個酥皮好酥, 唔似其他餅店咁吸哂倒汗水黏埋一齊. 個蛋漿好香蛋味亦好濃, 一食已經知道係好足料! 第二日焗番熱剩低既蛋撻食, 味道同質感一樣無變, 價錢亦好街坊. 就算佢唔近地鐵站我下次都會特登過去買!!…Read More

夜晚8點幾去開附近聽完講座就想食野, 心血來潮想食肉燥飯, 但又唔想去大型連鎖店食, 就揀左呢間. 因為見到佢加多$10 就可以有珍珠奶茶飲都算係咁啦. 入到去想叫鹵水豆腐肉燥飯點知賣哂. 唯有轉食米線啦, 叫左個米線想配普通豆腐加水餃. 點知連普通豆腐都賣哂. 好失望呀!! 點解連咁基本既食材可以8點幾就無貨架. 最後只好退而求其次叫豆卜啦. 上野食既速度算係咁啦, 都得左10 - 15 分鐘. 可能因為好多人入黎/打黎叫外賣唔得理堂食既人掛. 米線算大碗, 餃子大隻足料, 但豆卜就麻麻. 個湯底味唔算太濃, 但有少少咸. 杯珍珠奶荼ok啦. 成個set 加埋50令蚊度, 但係有少少失望既, 之後再行過油麻地想食野都無入去呢間了. …Read More