Crystal_CP's Profile

每逢到夏天，出親街都係想飲啲又凍又甜嘅嘢飲。茶痴系夏日出左個季節限定 綿芝日本白桃，雖然48蚊吾算平，但系絕對值得去飲。我叫左少冰正常糖，佢嘅四季春茶個茶底都幾濃，所以即使正常糖都吾算好甜，ok。佢嘅芝士奶蓋屬於偏咸奶味較重的，一啖奶蓋，一啖有白桃肉嘅茶，系呢個大熱天時，真系一個字 爽～ 吾知個期間限定做到幾時，要試就真系要早啲去啦。…Read More

今日又要OT，所以去左九展買嘢食。今次食板上，我見佢外賣有88折，橫掂出面有甘多公眾位（類似美食廣場的公眾位），所以就外賣，原價係62蚊，宜家埋單都係55蚊。我買左個雙拼便當加ZERO汽水。便當的餸係5揀2，我今次就揀左醬燒無骨燻蹄加一口牛。除左呢2個餸，仲有中華沙律同粟米。佢的醬燒燻蹄好淋好juice，唔會太大陣豬個種腥味，佢仲有附一盒醬汁，就算我係外賣反寫字樓食都唔怕乾曬。佢的一口牛其實都幾好食，但我自己就覺得有少少韌。所以我比較推薦醬燒燻蹄，入味又好淋，送飯一流。…Read More

今日收左工就去左附近的九展食晚飯，平時午餐時間都冇咩位，一到夜晚就可以行幾圈再揀食邊間都得，唔洗同人逼。我今次揀左香蒜野菌雞肉蕃茄，雙重芝士湯底配螺絲粉加杯凍檸茶嘅全日精選，都係50蚊，價錢都好合理。佢除左螺絲粉仲可以揀公仔麵/意粉/飯。而我個餐無論雞肉定螺絲粉的份量都好多。佢仲有三種湯底可以揀，中意芝士嘅朋友必推雙重芝士，蕃茄湯底唔會太酸，有啲蕃茄蓉係入面，好足料甘，令人想飲晒佢嘅湯，而芝士的份量亦都吾少，仲可以拉絲。不過佢杯凍檸茶就冇檸檬，唔知係唔係佢係水吧一大量咁沖，再等有人叫先倒落隻杯。下一次來可以試下飲其他嘢。…Read More

去到西灣河唔知食咩好， 記得好耐之前同同事過嚟食個午飯，當時叫咗一個湯麵好似都唔錯幾好食。所以再去多次，今次去到見到有啲多人，因為佢堂食嘅位吾多，所以就決定叫外賣，叫咗一個lunch set - set C 乾拌麵外賣，佢嘅麵有三款可以揀，我揀左關廟麵。除左麵佢仲包一杯嘢飲一份小食，我揀左珍珠奶茶同鹽酥雞。佢嘅咸香乾拌麵啲蔥油好重好香，比較偏甜，食落唔會覺得好油膩，本身見佢啲汁吾多，以為會吾夠味，點知又唔會喎。 鹽酥雞即使我係外賣，冇即時食，但食嗰陣時呢都覺得系脆，肉質都嫩口，而且份量都吾少。珍珠奶茶就普普通通，奶味唔夠重但係珍珠嘅分量就好多。…Read More

今日屋企人話想去食一食飯後甜品，所以就帶咗佢地去我平時去開嘅嗰間甜品店-皇室甜品。我哋叫咗一個宇治金時，一個士多啤梨奇冰同一支椰青水。宇治金時係我每一次黎都必食嘅，佢上面嘅雪糕係嗰種奶味比較重嘅抹茶雪糕， 中間嘅刨冰都有啲抹茶嘅味道，有少少抹茶嘅苦味，但係因為佢有啲甜嘅紅豆，所以可以中和翻，成個甜品唔會話太甜，加上有啲小丸子，煙煙韌韌，真系好好食。除咗個宇治金時之外呢，椰青水我都好推薦大家試一試，六蚊一支，個椰青味好重好清甜，應該係冇溝過水/糖，百分百椰青水， 六蚊一支，又唔使去整，真系平過你去買椰青。最後一款甜品系士多啤梨奇冰，個士多啤梨味我就唔係太鍾意，而且系比較甜，可能適合啲好鍾意食甜嘢嘅人。…Read More

今日收工有啲夜所以決定喺附近食咗飯先返屋企，平時返工經過呢都已經聞到佢陣香味，今日收工又見到都幾多人買外賣出來， 有咁多人買佢即係證明佢啲嘢都幾好食啦，所以我就去試下佢啲嘢。44蚊一份海南雞油飯連湯。海南雞好滑， 本身唔食皮嘅我，今次真係連皮都食曬，但系雞的份量就有啲少，搞到我意猶未盡甘。油飯的份量就ok, 加上佢枱面有海南雞飯的醬，唔似出邊淨係得少少醬，可以自己任加，用來點雞同送飯真係一流。佢個餐仲有杯湯送，裏面有啲瑤柱絲，飲落都足料的。…Read More

星期五收工經過，見到原來I love戟星期五有優惠，十蚊就有杯香蕉奶昔，啱啱好有啲口渴嘅我就買咗杯黎試下。雖然係優惠價買到，但係同平時嘅水準一樣，香蕉同牛奶味都夠濃。 我叫咗少冰少甜，都夠甜，系香蕉本身嘅甜味。十蚊買到一杯香蕉奶昔真系幾抵下，大家星期五行過可以試一試。…Read More

今日約咗啲舊朋友出去食飯，揀咗一間有特色嘅印尼餐廳。我哋嗌咗三款唔同嘅飯（雞髀飯，豬肋骨飯埋炒豬肉飯）， 一個嘴刁小食同一條魚。 嘴刁小食嘅份量比較少，而且食物都冇咩特別，所以吾系太建議叫。我覺得最好食嘅係雞髀飯同炒豬肉飯， 雞髀好大，啲肉唔會乾身，上面有啲汁好好味，送飯一流。 而炒豬肉飯，如果本身鍾意食香料嘅人， 一定會好鍾意，因為佢落咗唔同嘅香料，好夠味。最後就係條魚啦， 第一下聞到條魚嘅時候會覺得佢有少少臭， 但係食落就會發覺好好味，條魚炸得好脆，啲醬汁又鹹香鹹香甘，不過條魚啲肉吾多，四個人完全唔夠分呀～嘢飲方面，就冇咩特別，我試咗杯青檸梳打，感覺一般般，完全係得梳打水嘅味道冇青檸味亦都唔甜。…Read More

復活節假期梗係要同屋企人周圍去飲飲食食啦，今日嚟到荃灣嘅滿屋食午市定食。我哋11點45分嚟到呢已經好多人喺度排隊，好彩入面個場都幾大，夠位畀我哋去食。 我叫咗一個58蚊嘅三文魚雙色蝦丼，一杯熱奶茶。佢嘅定食除咗包一個主菜外，仲可以出去任食佢嘅自助吧。主菜整體ok，三文魚同蝦都夠新鮮。 至於自助吧有凍海鮮（今日有凍蝦同埋貝殼類）， 幾款熟食（ 炸春捲，燒賣，麥樂雞）， 前菜（ 有泡菜，螺肉， 中華沙律，海蜇，飛魚子->可以攞嚟撈飯），沙律， 甜品（ 一杯杯嘅哈密瓜mousse 最為推薦）， 水果（好甜嘅蜜瓜）。唯一唔推薦嘅係佢嘅熱奶茶，奶茶比較淡，冇茶香， 所以大家口渴可以自己斟熱水沖玄米茶或者煎茶。…Read More

啱啱去完沙灘經過鑽石山巴士站，費事周圍行於是就去鑽石山荷里活廣場裏面食，見到甘味有吾少人排隊，有人排隊姐代表佢ok啦，所以我就決定食呢間。我叫咗一個60蚊嘅鹽燒豬頸肉讚岐手打烏冬。佢嘅豬頸肉呢唔會太肥，上面有一啲甜甜地嘅醬汁，與其話佢係鹽燒，我更加覺得 佢似醬燒豬頸肉，不過都系好味嘅，大約有五六舊豬頸肉嘅份量。 至於讚岐手打烏冬要讚嘅地方係佢嘅湯底，唔會太鹹，清清地，系個種會令人食到最後不知不覺飲曬啲湯汁嘅湯底。…Read More

之前食過JK Brother，覺得呢間嘢唔錯， 於是星期六介紹屋企人去食。今次我地揀咗68蚊任食肥牛嘅午市套餐，68蚊加一可以任食肥牛、火鍋配料、炸物、熟食、甜品、嘢飲品等，我相信出面冇邊幾間可以做到呢一個價。我揀咗壽喜燒湯底， 佢比出面嘅壽喜燒湯底較為甜， 用佢嚟配牛肉係冇得彈。68蚊嘅肥牛肥膏會比較多，如果想食好啲瘦啲可以加少少錢食128蚊個套餐。除咗肥牛之外，佢仲有啲韓國餃子，台灣丸類同埋花膠都好吸引， 因為花膠比較硬身，所以要一早就落咗，煮到最後先食就最正啦。炸物嗰度都夠熱同夠脆。 熟食通常會俾四款度， 今次有一款係牛肉嚟，好好食炆得好林， 佢仲有啲泡芙豆腐花雪糕雪米糍各式各樣嘅飲品。…Read More

今日中午同同事去emax度食飯，我哋去咗一間叫做casa luca嘅餐廳。 餐牌上嘅食物 平均價都係六七十蚊 包一杯嘢飲（凍飲加3）。我叫咗一個B4 經典和牛漢堡加咗杯凍檸茶。 第一眼睇落去以為個漢堡好細會食唔飽， 點知原來都夠飽喎，佢塊和牛都幾厚， 食完個包已經開始飽飽地。 成個套餐屬於中上水準，塊和牛唔單止厚又有肉汁， 薯條係厚切嗰種，好有薯香味，凍檸茶就中規中矩啦。 同事話佢嘅招牌黑松露雜菌意粉都好好食，下次可以再去食多次…Read More

今日同男朋友諗唔到食啲乜嘢好，所以就去咗大家樂，見到有個二人餐只係需要89蚊， 就有一隻雞，兩條粟米，一盒意粉同兩杯紅豆冰，堂食同外賣都得，睇落好似好抵。隻雞啲皮燒得好脆，外皮有少少甜甜地，肉質都好juicy，隻雞畀我嘅時候應該係啱啱焗嘅，所以擺咗一陣都仲係好熱， 一直系甘冒煙。 粟米呢應該係搽咗牛油，所以有少少鹹鹹地。肉醬意粉唔係焗嘅肉醬意粉，偏酸， 佢係有個外賣盒裝住，食唔曬呢可以打包返屋企 ，唔會浪費。至於兩杯紅豆冰就正正常常啦。…Read More

今日屋企人收工時話經過bakehouse難得見吾多人排隊就即刻買盒egg tart翻黎做飯後甜品。盒egg tart一打開已經聞到好香， 焦焦地嘅顏色好吸引，佢比一般嘅egg tart厚，食落好滿足。雖然拎翻屋企時已凍左，但完全無阻酥皮嘅牛油香，蛋餡濃郁嘅蛋香和焦糖香，外酥內軟滑，甜味適中，真系令人想食完一個又一個。 …Read More

網上見到唔少人都話樂天大喜屋好抵食， 今日同男朋友經過旺角就去試一試佢嘅定食半自助餐。 雖然大喜屋係12點先開始營業， 但系我哋11點45分去到時已經有好多人排隊，所以想食嘅朋友最好預早少少到。我哋今次叫咗一個48蚊嘅芝士吉列蝦卷配湯烏冬同一個60蚊嘅海膽角切魚生飯。 吉列蝦卷嘅蝦十分細隻，湯烏冬反而吸引過蝦卷。 海膽角切魚生飯啲魚生嘅份量亦都吾少。自助區嘅熟食推薦章魚小丸子和蠔皇薯仔牛肉。 章魚小丸子裏面有大大粒嘅章魚十分有咬口， 薯仔牛肉就炆到好淋好入味。我個人覺得大喜屋嘅甜品做得更為出色，十分推薦terimisu，朱古力布朗尼同木糠布甸。大喜屋最吸引我嘅地方係佢嘅甜品同嘢飲都係任飲任食，單單係啤酒已經有好幾款。 五六十蚊有呢一個咁樣嘅質素已經冇咩好講。…Read More