hkfoodie_lifestyle's Profile

火鍋店開到成巷成市，有特別裝修的火鍋店或許比較容易吸引到人注意。呢間位於旺角嘅火鍋店，下午6點前係冰室，6點後開始做火鍋，店舖由外到內都充滿著濃厚的懷舊氣氛﹗餐廳門口裝修成舊式戲院咁，十分搶眼，離遠就已經望到其招牌﹗店內的裝修、擺設、餐具等等，都令人感覺好似回到去70-80年代。呢度嘅雞煲火鍋套餐係半放題形式，即部份食材係可以任食。先嚟頭盤前菜及秘製辣雞煲，雞煲香辣而不膩，夠晒惹味﹗食完雞煲就到打邊爐，湯底我地揀咗番茄濃湯拼招牌沙嗲湯。番茄湯底有啲驚喜喎，估唔到個湯裡面會有蟹﹗個沙嗲湯底就比較淡，沙嗲味唔算好突出。基本上火鍋配料除咗海鮮拼盤、手切頂級本地肥牛及手切西班牙黑豚豬之外，其他都可以任食，包括響鈴、生根、炸魚皮、牛丸、墨丸、貢丸、魚蛋、炸魚片、豬肉條、雲吞、水餃、魚皮餃、蟹柳、芋絲、公仔麵、烏冬及蔬菜。最後甜品嚟個懷舊雜果涼粉紅豆冰。美中不足的是，飲品方面個套餐只係包咗汽水1罐，或者每位另加$38無限添飲凍檸茶﹗…Read More

同一大班朋友出去食飯，打邊爐就係最正最唔使煩，又可以叫到成枱都係餸，感覺亦特別熱鬧﹗今次我同十個八個朋友仔嚟呢度食台式火鍋，麻辣湯底走唔甩架啦﹗另外再配搭咗個「美人鍋」，用上桃膠、烏雞、杞子、南棗及金華火腿肴製，聽講好養顏。大家都幾餓吓，所以個鍋未嚟之前，我地叫咗個招牌卥水拼盤咬住先。拼盤包含牛腱、牛肚、牛筋腩及豬大腸，都幾入味。麻辣鍋加咗鴨血同凍豆腐，可以揀大中小3種辣度，我地揀咗小辣，開頭覺得無乜辣味，不過後尾滾耐咗啲味愈食愈出，正呀﹗個美人鍋其實幾清甜，對比起麻辣鍋就會覺得幾淡吓。打邊爐有兩樣嘢係唔少得嘅，一樣係牛肉，另一樣係響鈴﹗呢度啲牛肉除咗好食之外，擺碟都幾有心思。響鈴係鮮炸嘅，相當脆口﹗嚟得食台式火鍋，梗係要食鴨血啦，事關香港地唔太多地方有鴨血食。呢度嘅鴨血有波波紋，好攪笑，口感Q彈爽滑，超愛﹗呢度啲丸類同餃類都唔錯喎﹗芝士牛肉丸、梅菜豬肉丸、鵝肝墨魚丸、黑松露蝦丸、自家鮮製水餃同鮮蝦雲吞等等都幾好味。最後我地仲叫咗碟炸午餐肉。午餐肉真係熱架，唔係一早炸定，就咁食都好正﹗…Read More

作為榴槤控嘅我，就係衝住個榴槤雞煲而來！榴槤呢樣重口味嘅嘢，當然要約埋重口味嘅朋友一齊去食啦。個雞煲望落顏色有啲似芝士鍋，攪兩吓真係見到有一舊舊煮到半渦嘅榴槤肉！真係急不及待要試下。雞肉好嫩滑，無乜雪藏味。榴槤味無預期中濃烈，但係雞肉就渗出淡淡嘅榴槤香氣，味道偏向清甜嗰種。或者唔太好榴槤嘅都可能接受到！我地就叫咗香辣味，食得再辣嘅可以叫麻辣味。海鱸魚都幾大條，燒過嘅魚皮特別香口惹味。魚肉都幾嫩滑，辣味愈食愈有，不過又唔會遮蓋咗魚嘅鮮味。…Read More

喺佐敦行完街步行過去尖沙咀搵食，經過山林道就望吓有無嘢想食。好想食日本嘢，尤其係刺身，見到呢度門面都唔差，就入嚟試吓啦。呢個特上刺身拼盤，有牡丹蝦、三文魚、吞拿魚、劍魚腩、海膽、油甘魚、帆立貝及深海池魚。厚切刺身，整體亦幾新鮮。油甘魚同牡丹蝦我就最喜歡！本身唔係好肚餓，食完個刺身拼盤差少少就夠飽，所以叫多客火灸三文魚腩壽司。三文魚腩油份超多，魚香濃厚。…Read More

終於都有機會食尼間被形容為平民版Godiva的雪糕店！平時成日經過都係肚餓未食飯唔想食雪糕，今次係食咗正餐先經過，唔諗太多，就叫我喜歡嘅朱古力味。雪糕都算幼滑，不過以soft serve Gelato嚟睇，軟綿度就略為不夠。雪糕朱古力味道還可以，但唔算十分濃郁，比較喜款上面的朱古力醬，而個cone係幾脆嘅！整體上廿幾蚊隨便食吓過吓癮亦無妨呀。…Read More

先叫咗兩杯Panna Cotta Frozen，分別係香蕉朱古力同抹茶紅豆。香蕉朱古力嗰杯底部有新鮮香蕉肉同奶凍，抹茶嗰杯就有紅豆同奶凍。厚切麵包夾住火腿片，用咗Parmesan、Mozzarella同Cheddar三種芝士整，唔單止三文治裡面有流心，就連面頭都一樣有濃厚嘅一層芝士㗎 見到啲芝士咁流法，我唯一諗到嘅就係「想快啲放佢入口」囉！除咗流心芝士令人賞心悅目，食落先發現原來裡面仲有啲芥末味嘅醬汁！食到輕輕嘅芥末香味，配起芝士又幾夾喎。香蕉同朱古力不嬲都係perfect match，無乜幾多個會抗拒！配搭埋pizza一齊食都一樣咁吸引。Pizza上面鋪咗香蕉片同唧咗朱古力醬，仲有一球朱古力雪糕喺中間，賣相吸引。薄餅口感有少少煙韌，有啲似印度鬆餅咁。而且沾上咗半溶朱古力雪糕，嗰種冷暖交融嘅感覺，好易食唔停口:yummy izza都算幾大個，啱晒幾個人一齊開心share。輕輕用匙羹一敲焦糖片層，已感受到脆裂感。燉蛋口感幼滑而不甜膩，先感受到伯爵茶香味，而又無遮蓋到背後的蛋香，十分對版。…Read More

由於買嗰陣盒抹茶大福職員係由冰箱度拎出嚟，所以買完就即刻閃返屋企，免得大福逗留室溫太耐會出水。返到屋企我就即刻放返盒大福入雪櫃，食之前從雪櫃拎出嚟室溫慳慳佢，流心效果會更佳！一盒有8件大福，每件都有透明紙包住。估唔到雪住嘅日本大福，糯米外皮都可以咁軟綿煙韌 中間心的抹茶牛奶忌廉亦好濃郁creamy 再加上全粒大福都沾上宇治抹茶粉，由外到內都嚐到濃濃嘅抹茶味 尼個係我暫時食過最好味嘅抹茶大福喔！…Read More

彩虹咁嘅顏色，賣相望落係幾靚嘅，好有夏日feel 刨冰並唔係好似椰絲咁樣嘅雪花冰，而係一粒粒好細粒嗰種，口感亦算幼細入口即溶，但口感就無雪花冰咁棉滑。面頭有啲鹹檸檬碎粒，感覺幾fresh幾開胃，若果食要多一球雪糕，額外加$10就會有。刨冰應該唔同顏色係有唔同嘅味道，但係食落唔明顯，主要食到較重牛乳味，所以整體除咗顏色上其他無乜特別嚕。…Read More

終於入咗去大埔，順路比我食到尼個金莎格仔餅喇！夜晚8點左右去到，好彩唔太多人等，10分鐘左右就整好有得食。朱古力格仔餅外層微脆，內裡亦軟熟，但朱古力味唔太濃。流心嘅榛子朱古力醬就幾正，夾住花生碎粒，整體又唔算太甜，值得一試。…Read More

對上一次嚟Kala 都已經隔咗一段時間，今次同朋友再嚟就係為咗尼款期間限定的紫薯吐司啦 意外地無乜人等緊，所以等咗5-10分鐘就有得食。餡料份量都幾足，搣開明顯見到紫薯餡，紫薯味道都幾出，配埋芝士拉絲，食得又睇得 今次個吐司亦比上次食嘅改進咗好多，無咁油膩而且口感比較脆口，尼點絕對要加分 …Read More

一直從朋友口中都有聽過關於尼間餐廳的抹茶出品的評價，好壞各半，唯有只相信自己的味蕾，親身去試試。見到Menu寫住尼個抹茶芝士撻係新推出，就一於試吓！除咗抹茶芝士撻之外，仲配有抹茶雪糕同佢地自製嘅抹茶貝殼蛋糕，都算幾豐富，賣相亦見得花心思。下面黑色嗰隻唔係碟，而係個盒嚟㗎！裡面放咗乾冰，上枱嘅時候係會有冒煙效果。由於效果比較短暫，所以影唔到......講返個主角抹茶芝士撻，確係流心嘅 一拮開啲抹茶餡就即時流出嚟！不過抹茶同芝士味道都唔突出，撻皮OK唔會太鬆或者大實。抹茶雪糕口感尚算軟滑，抹茶味卻一般，奶味較重。金色嘅醬除咗甜味之外，食唔出有咩特別。抹茶蛋糕質地就有啲粗嚡，亦無乜抹茶味，反而覺得嗰塊插喺雪糕度嘅薄薄芝麻糖脆片幾好食。以抹茶甜品來說，味道方面其實只係好一般 :)…Read More

炎炎夏日，凍冰冰的kakigori亦係消暑嘅最佳選擇之一。同朋友夜晚10點左右去到，成村人喺小店門外等緊位......最後等咗40分鐘先能夠入座。一絲絲刨冰口感輕盈幼細，今次用上抹茶忌廉，取代糖漿，抹茶味更甘香突出 完全滿足到抹茶控嘅我 頂部嘅焦糖脆脆，再加埋內裡嘅曲奇餅碎同焦糖糖漿，更有口感之餘，食到落底都唔怕無晒味。總算等位等咁耐都係值得嘅呢！…Read More

今次襯住有買Rainbow送Sakura優惠，終於下定決心走一轉，食到尼度嘅Rainbow啦。4色彩虹是次配搭為波子汽水(藍)、牛乳(白)、抹茶(綠)及櫻花(粉紅)，加埋個黑色竹炭cone，顏色對比強烈之下，賣相真係幾鬼靚！波子汽水偏甜，櫻花味酸酸地有啲似梅嘅味道，4隻味當中最好味最突出反而係抹茶喎！不過雪糕溶得真係幾快，再加上4圈雪糕其實都幾多，我要用極速KO佢先勉強追得上佢溶化嘅速度 因為食得太急，所以食完嗰刻感覺好飽。…Read More

前排Sweet Monster同fingercroxx 合作攪crossover推出尼款抹茶口味雪糕，作為抹茶控梗係要去買杯試吓。其實食之前自己都無抱咩期望，諗住平平地試吓，若果唔好食又唔會肉痛！哈哈~牛乳雪糕加上抹茶脆脆同抹茶醬，比我預期中對版喎牛乳雪糕奶味濃，質感亦幼滑creamy。雖然本身牛乳雪糕係偏甜，但夾埋綠茶脆脆一齊食，就覺得甜度剛好而且口感比起配搭爆谷更佳。綠茶醬係尼杯雪糕的靈魂所在！綠茶味好香濃仲帶少少甘苦，但份量略為唔夠，若果再多啲綠茶醬就更加好，咁就可以每啖雪糕都食到抹茶香味呢…Read More

香港人真係好鍾意打邊爐烚吓烚吓，我自己都唔例外！最近知道旺角726新開咗尼間食雞煲+火鍋店，點可以唔嚟試吓。第一眼見到尼間嘢個名叫「吞POT」，即刻有少少罪惡感 雞煲有4款比你揀，分別係花雕藥膳雞煲、米酒雞煲、胡椒豬肚雞煲同重慶麻辣雞煲，四款一律同價都係$118(半隻) / $198(全隻)。我女人唔太好酒煮，而我就唔太好麻辣，所以就揀咗胡椒豬肚雞鍋。醬料費本身每位收$10，新張期內免收最初頭覺得好似無乜胡椒味，滾多一陣收咁啲汁，胡椒味就出了。雞件唔會斬到太細，唔會煲到縮晒水無肉食。另一重點係豬肚唔會有臭味，食到胡椒味但又唔會好搶，調教得啱啱好。我地兩個人只係叫咗半隻雞份量，當然有原因啦，要留肚打邊爐吖嘛！！食完雞煲，梗係食住上打埋邊爐先過癮啦叫咗頂級肥牛、海中蝦、桂花蚌、自家炸響鈴同手打墨丸。打邊邊又點少得肥牛呢！而家新張期間，仲有$1碟美國雪花肥牛益街坊雖然份量會比正價order嘅細少少，但點計都so啦！而頂級手切肥牛份量唔算多，但勝在油脂部份比例上唔會過多，分佈亦算平均，入口牛味亦濃。海中蝦用竹簽串住咗，上枱嗰陣都仲係咁郁緊㗎，勁生猛桂花蚌好爽口鮮甜，記得唔好淥咁耐，20秒左右就OK，太耐會縮晒水手打墨魚丸亦打得唔錯，口感彈牙，每粒墨魚丸裡面實實在在咬到一粒粒墨魚肉。響鈴係店定自定製，本身好鬆脆，輕輕淥一淥，外軟內脆勁！每晚9點半後仲有全單8折優惠添，夜鬼so爆啦！…Read More