beancurdying's Profile

由舊店食到黎新店，每晚都坐無虛席。新店更大坐得闊落，食物質素更勝舊店，多左小菜，樓面請多左人更好招呼。食物質素不需過份說明，睇相由擺碟就知一間餐廳對食物出品既要求如何。醉鴿 — 片到咁薄都知師傅刀功利害。汁入面啲桂花落足料，味道好似舊鋪既upgrade版鵝肝 — 我會稱佢為神肝。滷水墨魚片鵝肉 — 下面仲有啲豆腐，係佢自己炸。想講平時出面啲青瓜伴碟唔會食，但呢片到咁薄，吸埋啲汁，又幾好味其他自己睇相，樣樣都精緻新派潮州手工菜，用心，抵食，性價比無得輸，完。…Read More

宜家啲日本餐廳，將壽司逐件上就叫omakase，明明係普遍lunch set，但收你omakase價錢。高級omakase又貴得太離地仲要等幾個月，不了。呢間係老公食過覺得性價比幾高就帶我黎食，今次已經係第二次食仲帶埋朋友黎。- 魚類：多元化，食時令，唔係好行既魚。- 味道：好味新鮮，有衝擊。睇相你會知味道配搭係濃味撞落去，睇個人喜好。份量材料闊綽，有用心。食完滿足。ps. 手卷真係好好味- 服務：好，係book師傅個震後生女職員初頭話要自己聯絡師傅book(??)- 氣氛：環境舒服。師傅上每道菜之前會介紹。氣氛唔係日式拘謹，較輕鬆，都唔影響用餐平民價錢中級質素，冇野好投訴。呢個質素出面應該收你至少$500/600 up加一。想推但唔敢大大力驚以後book唔到枱食。…Read More

以身試伏Burger餐廳開到成行成市，但有幾多間係有心做，又有幾多間純粹為左食正個熱潮？知道有新餐廳就去試下，幾廿蚊如果唔好食既可以警世又無妨。星期日5:30去到，睇價錢都幾親民，$28就有beef burger食，但驚薄切切，要食就食signature，叫左Bobby Burger，double beef patty諗住食落都冇咁寡，再加$25轉餐。一開個包盒成張紙都係油，拎起個包啲汁就滴晒出黎，未食已經好呢hea。一咬，個味咁似曾相識既...？———原來係老麥既味道啊！牛肉連啲醬都係一樣味😂喂我唔係要貴版麥記漢堡包餐喎炸薯粒好似普通超市冷凍薯粒貨，自己氣炸可能仲炸得好食過佢😂 好彩有杯凍（+$5）朱古力下下火。性價比高？大家個味蕾係咪壞左😂食過嘉寶未…Read More

訂左Petrus Lunch為同行慶祝生日, 但今年失策, 遲左少少book所以冇窗口位, 想坐窗邊既朋友記得至少要一個月前預訂.出席之前有聽聞餐廳既酒藏量係香港黎講算數一數二, 只係心諗靚酒都未必輪到普通人可以飲得起.Set Lunch簡左3 course, 再另加紅蝦. Petrus值得你每個course都wine pair, 我地由主菜開始先配酒, 有點後悔太遲先開始pair.Wine pairing 三個價錢豐儉由人, 而我地只係簡最入門既Sommelier Pairing, 但已經好滿意sommelier挑選既每一杯酒, 價錢不貴但飲到高質既酒, 驚喜.同酒相比, 食物既表現就顯得中規中矩. 較為出色同有印象既係紅蝦, 主菜既八爪魚, 甜品同生日蛋糕.要上二三星, 食物方面仍需努力. 而且由年頭開始留意Petrus既菜單, 食材愈轉愈冇咁矜貴, 去到要食既月份, 難免有點失落.服務細心, waiter見到我地留意酒都會主動介紹餐廳既酒類活動.吸引到我再去多次既一定係酒. 好評都係比酒. …Read More

星期日 20:00去到, 餐廳入面坐無虛席, 等2張枱就有得入, 快.好多時去丼飯屋食野都抱住伏既心態, 所以一開始都警剔, 明明想食漬同溶都唔敢叫, 驚好似出面咁用冇咁新鮮既魚碎黎剝, 再加啲濃味去蓋過腥味.最後就比個機會自己點左漬吞拿魚丼飯（$148）同行就叫4式呑拿魚丼（$228）,試晒4款口味.上餐時見到吞拿魚粒一半赤身, 一半拖羅, 冇鋪滿個碗個下係有啲失落.但食落去就好有驚喜, 肉質新鮮, 魚油味好香, 停留係口腔好耐.同行叫既4式,其中一款係輕輕燒過既拖羅, 炙過既魚油香氣帶左出黎, 又係另一種風味, 讚.連去到最底既飯粒都沾有炙油香, 好味到扒晒成碗飯. 套餐裏面有樣都出色既係個茶碗蒸, 熟得岩岩好, 滑, 同埋食落去有好香既蛋黃味. 即係時間掌握得好, 有過西, 用靚蛋. 呢個價錢話平唔平, 但可以食到咁新鮮既吞拿魚就十分驚喜, 其他餐廳貴啲都未必食到. 即刻覺得性價比係返度. 淨係呢點都足以留住客仔返黎再食. 同埋餐廳出名食吞拿魚就緊係點吞拿魚, 唔好叫埋其他野食跟住話人地唔好食.唯一係返到屋企好口渴, 唔知邊樣出事...…Read More

屯馬線新開，宜家去九龍城都方便好多，唔洗轉小巴，B3出口向左行過兩條街去候王道就到。趕唔切2:00前食$34午餐，$55都要試下關注組推介過既沙嗲牛麵。另外再叫多個$70沙嗲牛湯轉星級牛肉，火鍋湯底。麵底炸得夠乾身夠脆，牛肉夠林冇筯，份量多，汁夠杰睇得出落夠花生醬，但味道爭點咸同惹味。如果能夠趕得切食$34，真係好抵食。火鍋湯底一樣濃身但爭啲味，星級牛肉係火鍋牛肉，較瘦，想佢咸多少少帶出牛味。沙嗲牛始終要用普通牛肉拿到佢林同入味先係食沙嗲牛。脆底麵好食過轉星級牛同火鍋湯。沙嗲牛黎講正常，可以再好味啲。$34就好抵食。老闆娘會同你吹下水，伙記服務正常。…Read More

星期六12:30去到，附近都係整車房，店面唔起眼，店仔細細，但內有乾坤。一行四人，除左我全部都係叫生炸雞脾飯，我就+$3轉撈丁，沙嗲汁。送到上黎真係比塊雞脾嚇親，係超級大塊。配飯就一碟過，仲有埋隻細煎蛋，撈丁就係雞脾分開上，見到撈丁比平時出去食份量少啲，轉頭你就知點解。望落去塊雞髀睇到炸得非常酥脆，咬落去亦都冇失望，色水都幾靚，雞肉嫩滑多汁好容易撕開，肉醃得入面都好夠味，而出面塊雞皮仍然保持脆身。咁大塊雞脾生炸入面都全熟，都真係唔易，因為有食過一係入面未熟仲有血水，一係炸得太柴，呢塊咁厚都熟又保持到肉汁。唯一係太油，可以乾身啲先上碟。女仔黎講都我都算大食，但就好後悔一啖麵一啖雞脾，因為食到後面根本食唔晒隻脾，同行3位男位都食唔晒。撈丁加$3跟熱飲埋單$51，大件夾抵食，飽到上心口，第二日想翻桌食，點知星期日唔開。下星期諗住試下2:30後下午茶$37生炸脾跟薯條先。…Read More

睇openrice評論唔錯，又比圖片吸引左，就試呢間。外賣叫左招牌巴東牛展肉飯同埋參峇醬炒蜆。牛展肉飯汁惹味，牛展炆得夠林，但份量較少，食完唔夠飽。跟著到碟炒蜆。一路食一路發現好幾隻仲未開殼，有啲崩殻，驚𠝹到嘴/咬崩牙/唔小心吞左，蜆又細隻冇肉食。有問題既蜆多到要數，結果係得6隻完整又開殼，8隻完整但未開殻，5隻開殻但碎，2隻未開加崩殼。少過3份1係食得，上菜前冇做好QC。憑呢次外賣經驗覺得試一次就夠。…Read More

假期經過銅鑼灣，見到門口多人排又排埋一份，好快等左10分鐘就入得。坐低叫左一碗蔥油炸豬扒$62同埋豬軟骨飯$60，+$5要多杯熱柚子蜜。打卡重點，塊豬扒當然係好大，咬落去，面頭都香脆，但食落有啲淋，望下點解中間有啲透明野？原來係粉漿未熟，即刻撩走晒層皮，淨係食入面塊豬扒，調味較淡。兩邊最邊邊位啲粉漿係熟，一到中間就出事。唔知係我呢塊咁唔好彩，定係太多客炸唔切，如果店鋪既招牌菜都可以煮到生，又繼續有咁多食客排隊，對面枱一路食一路讚好味，究竟香港人識唔識食，定係只滿足於打卡層面。$62一個飯一塊豬扒冇野飲跟餐，呢個價位一啲都唔平，得罪講句，茶餐廳都好味過呢間。寄望係碗豬軟骨可以力挽狂瀾，可惜蘿蔔蓮藕都係冇味，得兩舊豬軟骨，正常發揮。+5熱柑桔，一個杯仔唔係好夠喉。打卡定食好西，自己決定。我就冇下次。…Read More