C眼's Profile

諗住‘’路過行過唔好錯過‘’見冇咩人等就試吓你有幾底調嘅雞蛋仔，等嘅人唔多，我前面只係要等3個籌，我落咗單俾咗錢應該預計等一陣就輪到我76号架啦，等咗陣聽到下個叫号就到我，等吓又未叫我号碼等吓又未叫，叫到79都未叫我号碼，叫埋82都唔叫我号碼，唔對路，就問吓到我76未？！跟住佢話 ‘’未！就到！‘’:(，要我問至做我嗰份雞蛋仔，真離普，咁就唔好輪籌啦！仲要大熱天時喺到等你整咁耐，籌号碼到都唔做，要問至開始做。終於黃金雞蛋仔到手，食落口感係脆（係基本），唔過份甜，但佢用嘅係咸蛋黃粉，分佈唔均勻，可能因為佢用粉做喊蛋味嘅關系，大部分冇咸蛋味，有啲就太喊，唔似人哋舖做嘅會真正咸蛋黃做餡，價錢就真係唔值呢個價，所以試一次就夠，唔會再返轉頭食。…Read More

以往去咁多間有鰻魚炒飯嘅日式餐廳唔多，呢間我覺最好食，都已經食過好幾次，今次再去食，點知餐牌改哂，有好多款嘢食都cut咗，連我最想食嘅鰻魚炒飯都cut埋，以為佢唔再賣鰻魚啦！但其他鰻魚飯又有喎！咁唯有轉食咖哩豬排飯啦！落完單5分鐘轉頭又話冇咖哩，叫咩冇咩！再轉食湯烏東，湯味ok，但啲烏東咬落係硬硬地，好似煮唔夠熟咁，配菜昆布又浸唔夠，勁唔好食。另外，服務仲差過茶餐廳，坐底咁耐都冇兩杯水，要叫幾次至有，又要收加一，但有冇服務，咁一係就唔好收加一啦！…Read More

星期六中午搵食，還有10分鐘就係12點，見冇咩人排隊，就試吓啦，人剛坐下就即刻送上沙律之後先送上茶，單都未落再嚟個湯，服務非常快速，睇咗一陣餐牌，樣樣都好吸引，最終我叫咗個lunch set 十貫，即係十款唔同嘅壽司套餐，可能我較遲落單都等較耐時間才有得食，呢到嘅壽司全部都係得一個師傅手做，所以壽司餐等較耐。十貫套餐到，第一眼已吸精擺放好好，魚生望落好新鮮，跟住開始食壽司，飯嘅軟硬度好好，亦不會太大舊，味道不會太酸。魚生好新鮮，厚度適中，吞拿魚容份量十足，連下面舊飯都差啲承擔唔到，另外海擔同三文魚子比我想像中非常足夠，味道好鮮甜。下次我會晚餐時段會再嚟一次。…Read More

肚仔餓又近MTR就試吓，餐牌同其他拉麵店都差不多，見佢有蝦湯底試吓，我點了蝦味鹽湯底拉麵，可能下午茶時間所以冇咩人，落單後好快就有得食，碗拉麵嚟到即刻聞到好香嘅蝦味，拉麵整體外觀好靚，顏色吸引，望落啲餸好豐富，有用火熗燒過嘅五花腩兩片，溫泉蛋半隻，紫菜兩片，櫻花蝦、木耳絲、荀、芽菜、菜絲、洋蔥、蔥花（我叫走蔥）。首先飲一啖湯，蝦味湯底好濃，夠熱，鹹味適中，好適合配搭拉麵，每樣餸都獨立試咗一啖，除咗五花腩太多肥油（因為我唔太鍾意肥糕）同啲菜絲有重青味外，其他餸都好食，另外主角拉麵實在大殺風景，拉麵第一口食落麵質有啲硬，夾起拉麵太短太碎，冇拉麵感覺，好似食緊麵尾或者係廚房用淨嘅麵碎，真失敗一間拉麵店收咁貴價錢，應俾返啲有水準嘅拉麵俾客人食，除咗湯底好，拉麵唔得令人失望😞…Read More

前身係Pacific Coffee舖位，以前我成日去食個Brunch 飲咖啡打發時間又可醫肚，而家轉咗間出名做Fluffy Pancakes，就去試吓。我已經等咗佢開幕好耐，裝修咗咁耐，終於等到。 新屎坑，第一日見餐廳有咁多位冇人坐，又唔係咁多人排隊，橫掂我又有時間，就去排隊等吓，點知都要等成45分鐘，等到本來食Lunch都變咗食Tea，明明入面大把枱都冇人坐，專登要班專貴客要排隊等，喺到制做人群同人龍。就算落咗單啲嘢食都要等得耐都好過罰企吖！真係企到腳軟可能新開張，排緊隊嘅時候有服務員派印有餐廳招牌甜品嘅布袋一個，白雪雪好靚好實用，另外仲派咗試飲杯size嘅橙汁，呢樣就好心做壞事，飲咗杯開胃橙汁又要我等咁耐，唔止腳軟，仲加埋胃酸增加胃痛。終於等到入去坐，應該有話事權嘅負責人帶入坐，我當然即是反映有咁多位都唔俾人入坐要排咁耐嘅問題啦！仲叫我坐底慢慢睇Menu,頭先排咁耐隊咩Menu都睇完啦！我先點餐後入坐，取餐取飲品咩都係一手一腳自己嚟，除咗有人帶位入坐俾杯水次後就No Service!我付出咁貴價錢去食嘢，都冇人送餐我點咗佢哋嘅招牌甜品Ricotta Cheese Fluffy Pancake 同埋Macchiato 。落咗單後10分鐘左右個取餐牌振，先取杯Macchiato ；外觀灰色細細杯配隻金色咖啡匙羹，望落好高尚；咖啡好香，飲落甘味中有輕微帶酸，可能係本身咖啡豆帶有酸味，正好配甜品。再等二十分鐘左右，主角Ricotta Cheese Fluffy Pancake 可自取了，外觀擺設都好好，三層Pancake厚度都好平均，唔會斜；有個糖漿同Cream跟，第一刀切落去一半都唔會散，面嘅牛油慢慢溶化由中間滲入；第一啖原味入口，好香蛋味，唔會太甜，中間心夠熟，質地俾我想像中實咗啲，因為第一次食呢類甜品，可能本來就係咁；入面好明顯會見到有大有細舊嘅Ricotta Cheese；分別配Cream同糖漿食，我自己唔喜歡太甜，所以覺得配Cream較好味。我一個人食哂，感覺有啲包，總體味道好好，下次可再食。Ricotta Cheese Fluffy Pancake 果然係招牌甜品，不過價錢有啲貴，另外就真係等得太耐了！又可能因為即叫即做嘅原因。…Read More

老公講過好多次呢間啲嘢唔好食，我係唔信，點都要親身試一次；簡咗位坐底就水都冇一杯就即刻有位姐姐企定定喺隔離等我落單，我話轉頭落單，我睇咗一陣再叫人嚟，今次係個肥叔叔，四萬咁嘅口問我想食咩，都係水都冇杯俾我，少少哋就試吓個下午茶，叫咗個XO醬金菇肥牛炒烏東下午茶餐，再加$6叫咗杯凍檸賓少冰；凍檸賓講明少冰，就同正常冰冇分別，即刻叫肥叔攞個杯仔俾我，又係四萬咁口攞嚟，拔咗細半杯冰出嚟，淨返大半杯檸賓飲；仲話係咪蹝嘢食店，真係配咩？！等一陣好快就有XO醬金菇肥牛炒烏東食，係我自己要走韮走蔥，所以成碟嘢都係黑墨墨嘅豉油色，香味就當然只有豉油香，完全冇XO香味，食落更加冇XO味，加幾辣椒絲就話會辣，辣都唔辣下，只得個咸字，仲話係少鹽少糖食店，真係一啲都唔配。肥牛份量一般，但金菇得一兩條，想搵多條都冇，烏東麵質太淋，如果炒嘅就唔應該太淋。整體嘢食唔值得再食，水吧先生沖嘢飲沖得太麻木喇，多啲留意火記寫客人嘅要求，樓面員工服務非常好，識對客人笑，只要記得客人入坐時係唔係都整杯水先實冇死。一間餐廳最緊要係啲嘢好食，有幾好嘅服務都係唔會發揮得到，有幾近民居都係冇用，啲嘢唔好食永遠都唔會有回頭客。…Read More

第一次用呢個app叫外賣自取，都算方便，原來對方（餐廳）都係第一次接呢個系統外賣自取。可能餐廳係因為第一次，我落單5分鐘左右即時有位餐廳職員打俾我確認訂單，我諗最重要一個問題係問我係咪已經俾咗錢，哈！咩系統冇顯示咩？！如果我未俾錢，咁個系統又會俾我落單嘅可能餐廳係第一次，餐廳不能於指定取餐時間完成，我準時到後都要等8分鐘才可取餐可能係餐廳第一次，我叫了炸牛扒定食當然有沙律、前菜、飯及主食炸牛扒，還有有豉油另上，咁個湯呢？！去咗邊？明明見人哋堂食有湯跟架！可能係餐廳第一次，我落單時已要求不要餐具，最終俾夠兩對快子我，另外已要求少飯，但仍然俾一大盒飯，始終我食唔哂，大哂鬼。炸牛排定食嘅食物味道：飯一睇就睇得出係溝珍珠米，軟硬適中，好食。沙律同前菜正常，主食炸牛排外賣算不錯，起碼外層仍脆；因為靚牛排係唔需要太多醃料，但面層洒鹽太多，有啲咸；可能因為堂食會有爐俾食客再加熱已切件嘅炸牛排，但外賣就冇爐，所以明顯用咗火熗燒熟牛排中心點，但反而令牛排冇哂肉汁，更有幾件牛排太乾，變咗牛肉乾。其實牛排質素係好，如果於堂食會好食好多，但始終覺得價錢調得太高。試過一次就夠，唔會有回頭客。…Read More

兩人最初食第1盆嘅牛肉肉質及等級符合$278水準，落第二轉4盆牛肉肉質及等級開始有編差，脂肪比例較多，差不多食完時再落單“4盆牛肉吖！唔該！”，侍應生只放一盆牛肉給我們，最重要係有“魚黑色”，已即時退回侍應生，侍應生回覆已是最後一盆，之後再追單，嚟再4盆是次等級牛肉，侍應生仲話係同一種牛肉，跟本食落口肉質大有分別，肉質極粗糙，又有“魚黑色”，越食越貨不對板…Read More