漸漸's Profile

呢度環境裝潢係靚嘅，係適合打卡嘅少女cafe。知道嘅，得90分鐘用餐時間變咗落單都趕喉趕命，但我唔係食set，只係叫個cheese cake，一杯抹茶latte，點解我朋友個雞飯都就食完咁滯但我仲未有？我唔想催你㗎，但得90分鐘咋，去到60分鐘都仲未到咁我可以點？好啦，終於到咗，跟住食食吓話差唔多90分鐘⋯唔係呀嘛 🥹 仲趕過晏晝灣仔嘅茶餐廳 ，好彩佢哋俾我哋坐多陣，但⋯整體用餐感覺⋯好趕好趕，同埋好趕，至於好唔好食，我話一般啦，已經影響哂心情，都唔知點「享用」了。🥹…Read More

之前一路都係家嫂、牛站、富盈車輪轉…但自從發現火水爐呢片新大陸之後變左邊爐鐵竇，又無諗過作為我哋最後一根稻草嘅富盈最後都難逃要執的命運。🥹火水爐主打港式邊爐的小店，十幾張枱鋪仔細細，我鍾意佢地下無立黐黐（好重要），氣氛OK啦…牆上不停播住韓妹MV加gen Z pop…由裝修到員工都好本土港式…要俾like 😝食物方面——嗱，我哋唔係盲目追捧乜都話好，佢任食食材選擇唔多（比起家嫂/牛站無任食海鮮無任夾丸類架）😨，嘢飲都係得嗰三幾款咋（雖然我次次都係飲fruit punch）😬，醬汁配料都唔多架😟（係個自家製辣油比較出色）；佢講到明係主打手切牛肉同沙嗲架咋，但我哋就係buy佢哋嘅湯底同牛肉囉。湯底呢，我哋食嚟食去都係沙爹拼芫茜😅，沙嗲湯底非常濃味，用嚟淥牛肉同蘿蔔等佢索哂湯就最正，而最近佢哋响湯底入面加咗牛腩…又幾好味唧！如果你好鍾意芫茜的話咁你一要試佢個芫茜皮蛋湯，佢唔係清湯加兩條芫茜落去就算，係有濃縮嘅芫茜溶蓉，真係啖啖芫茜架！佢頭盤有酥炸小食有雞煲…炸午餐肉好特別可以一試…不過雞煲我哋次次都skip嘅😅…留肚食牛肉嘛！牛肉係手切牛肉，並唔係機切嘅燈影牛肉…我次次起碼都要食一兩盤封門柳架！另外有樣嘢好得我心嘅就係…鵝腸！我未試過有一間打邊爐嘅鵝腸淥完係爽脆嘅！我仲記得第一次食完之後好感動！🥹 而其餘可以推薦嘅有韮菜餃、黑毛豬、大大塊魚皮。價錢方面，唔係平架‼️不過俾幾舊水我想食到好嘅食材囉！佢社交平台話：「以人為本 —— 望食材與服務讓你們體現快樂」…佢哋食材係新鮮…連普通生菜都好fresh…佢新鮮嘅食材係我哋keep住幫襯嘅原因…~ 😎 …Read More

呢間鋪係排隊小店，我大大話話幫襯咗起碼十年，幾時想食都會特登搭車去食，我貪佢同南記、譚仔唔同，酸辣湯底夠濃夠味，嗰陣啲豬膶仲好大塊，炸魚蛋係另上，特別好食。仲記得疫情嗰陣我都keep住有幫襯 …我IG仲成日post佢地啲相添。呢排係少咗去，尋日再去返，唔知點解整體感覺好差。🙁首先，間嘢其實不嬲坐得好迫，走廊只夠一個人出入，如果你拎住一袋二袋就勸你唔好去食喇——因為無位俾你擺嘢，我尋日就係攬住個袋攬住件褸好辛苦咁食（因為坐得太迫+又熱+焗住同成餐飯無停過用鄉下話bilibala嘅優質食客搭枱），然後發覺食完見佢地抹枱係乜都掃落地下 🤢。講返食物先，我食親米線食嚟食去都係膽拖豬膶+韮菜，或者再加魚腐三個餸，尋日去食就唔知道佢地無魚腐，我就揀咗竹笙，跟手凍奶茶少甜。碗嘢嚟到…咦？點解我額外加嘅韮菜都係得幾條鋪响面？我問佢：呢啲韮菜少到呢！仲衰過配菜喎！佢之後就烚返一碗韮菜俾我…咁…咦？啲豬膶呢？以前係一塊塊撻响面架喎，而家呢？搵下啦，湯入面碎濕濕的確係有幾塊嘅… 😒杯奶茶唔駛講啦…有啲似我屋企飲剩兩啖奶茶跟住拎隻杯去浸咁樣囉。咁樣嘅用餐體驗，盛惠$71蚊…仲要，我發現我已經唔係佢哋嘅「目標客戶」，你明嗎？我其實寧願啲嘢「無咁好食」，我都會揀返乾淨好多、坐得舒服些少擺到嘢，仲要平些少的南記或譚仔囉。…Read More

平時打邊爐多，於是今次想食吓普通西餐，book咗呢間JUST’er⋯果然係，如果你問我對呢間餐廳嘅評價：就係，just…er… 😅我係帶openrice有唔少好評嘅心情去食，一入到餐廳，俾我最大嘅感覺係，有啲似家庭式經營嘅小餐廳。樓面唯一嘅小妹妹第一時間派menu，然後先旨聲明：「我哋餐廳用餐時間90分鐘，有最低消費」⋯唔知點解，呢個感覺麻麻地⋯我同朋友商量緊係咪要轉場⋯我哋仲一邊商量一邊book定第二間，不過睇咗menu後，覺得其實可以試一次，然後叫咗個chef lobster set。我都先旨聲明先，無論第一盤caesar salad、parma ham with fresh fruits仲有炸魷魚、龍蝦湯同埋個risotto，係幾好食嘅👍🏻，但個主角⋯龍蝦🦞⋯我無諗過係凍嘅（唔係凍盤嘅凍係攤凍咗嘅凍）⋯摵開啲殼好多水流出嚟…呢個係賣點嗎？又唔係唔好食⋯但我講唔出佢係好好食⋯我仲話（食到risotto）終於有熱嘢食喇，…最尾嘅和牛係有驚喜嘅👍🏻，但醬汁有啲偏甜⋯我哋額外叫咗嘢飲，蘋果玉桂茶同hazelnut latte算幾好飲⋯只不過去到埋單要俾成$900⋯我就覺得⋯嗯…呢個價錢值唔值就見仁見智⋯嗯⋯er⋯咁囉  😅…Read More

食生日飯，雖然唔係正日，但都想隆重其事 ，諗住食高級酒店buffet 豪一豪（好明顯自已大鄉里，我扮靚靚去食而人哋都係波衫短褲去食casual 到爆 😅）。之前research過幾間酒店，睇埋YouTube⋯最後揀咗Grand Hyatt Tiffin，好衰唔衰之前出現過食物中毒事件，雖然有一刻擔心過，但最後都決定照食。我哋book咗7點，今晚6:40左右已到，reception嘅同事帶我哋去一張好特別嘅枱，窗邊嘅，望到灣仔海旁嘅風景，我好開心😄。首先講食物，選擇surprisingly唔多，而細節已有YouTube嘅片已講得好清楚所以唔詳細講了，但我覺得今晚好似少咗嘢食嘅？BTW佢哋有一人一份龍蝦🦞，我叫咗半隻芝士半隻香草牛油，我哋係食咗一陣先送上，我就覺得好一般，無乜驚喜。首輪我係即刻食生蠔 🦪同螺同蟹腳，生蠔細隻咗少少，但好新鮮，好食😄！螺同蟹腳都好食。食咗兩round生蠔就食沙律，所有沙律菜都新鮮，基本👍🏻。跟住食熱嘢，整體上係好好食！無論魚、法國洋蔥湯、炸軟殼蟹、羊架（肉好鮮嫩！）都比較值得推薦（唔知點解無食到wellington beef 😅同埋另外個龍蝦湯好鹹😅）。甜品食咗火焰薄餅，非常好食！而個士多啤梨蛋糕就略嫌甜咗少少，後來嘅抹茶雪糕就劃上完美句號😁。講到氣氛，餐廳有live band ，音樂悅耳，氣氛好好！好耐無試過去有live band嘅餐廳，呢個非常加分😁。 好喇，文章核心嘅內圍係服務。我哋張枱「好特別」，位置「感覺上」係兩行枱最尾嘅中間臨時加開的（請參閱附圖），根本就响收碗碟corner通道嘅門口，我哋一邊食一邊會見到收碟的trolley不停進出，基本上都唔太影響食嘢既心情，直至食食吓發現上面相信係冷氣機倒汗水不停滴落嚟，一間高級酒店成千蚊一個人要受冷氣機滴水個感覺真係唔係幾好受，向員工反映後，其中一個「部長」話今晚無哂吉枱，不如將我哋調去出咗餐廳落樓梯出面嘅枱食😱，唔係呀嘩⋯要行過對面馬路出餐廳坐然後上上落落拎嘢食？我哋婉拒咗，然後諗住拉過啲枱櫈啦，問題係，拉過咗枱櫈就會塞住收碟trolley嘅進出嘅通道，有次有個相信係比較junior嘅員工成個trolley撞咗我椅背😓😓，有個senior少少嘅員工即刻喝住佢，嗯⋯我無出聲，隨之而嚟就係有不同進出收碟corner嘅員工撞到我張櫈——如果今日係生日正日我應該會勁黑面勁嬲㗎喇 😑 ⋯嘩乜Grand Hyatt咁搞呀，其實book枱嗰陣無哂枱唔緊要㗎，下次唔好咁搞喇，人哋唔會再嚟喇⋯ 😖 阿部長有offer送杯酒俾我哋，但因為我哋唔飲酒所以無接受呢個offer，好彩食到咁上下有人走有枱吉咗出嚟，搬咗過去之後好好多，跟住又發現隻side plate上有隻蟻🐜⋯應該就係好surprise嘅生日禮物喇～😅…Read More

呢間野因為响正公司對面所以耐唔耐會買腸粉+魚旦+煎釀三寶食，又因為唔會成日食，只係有時為過下口癮就買黎食，所以只要味道ok我都接受得到。其實佢個鋪面前面永遠都係好污糟 🤢🤢🤢，永遠有幾攤污水，回南天（好似今日咁仲有一陣up味），不過我次次當睇唔到，都係買外賣啫，算啦！直至今日lunch time再落去買野食，今日鋪面陣up味再濃烈D，污水再多D咁樣，咁我因為想食魚旦+煎釀三寶所以都係諗住快快趣趣買完返上公司食，點知好衰唔衰俾我撞正佢整跌左一個桶 (類似裝冰的大保溫桶)，桶入面有個類似筆野的殼仔一併跌埋出黎，跌左响充滿污水的地下，個阿嬋係就。咁。放。返。個殼仔入個桶度… 🤢🤢🤢 唔知仲會唔會用添~ 🤮我希望佢係會洗返乾淨啦下… …Read More

當然不敢自稱邊爐達人，但對於成日打邊爐嘅人嚟講，對邊爐的性價比都叫做有D心得。今次係第一次食馬祖，因為好難book，難得有位就去試下，好喇，總結係：唔算好抵食…嗱！我無話唔好食呀！😂嗰日book咗7點半，但我哋早到咗，好可惜無得提早入去食…佢話兩人枱未有吉枱喎，無計，唯有等有枱。好喇，終於有得食，至於揀咗咩餐？我哋對牛肉都有D要求，覺得揀正價時段收$508呢個應該差不多了。餐前小食有碟薯條…？但呢D飽飽滯滯嘅嘢就無謂喇…  😅講返湯底，種類選擇係多嘅，平時食開嘅都有…我哋揀咗蟲草花膠，都算足料，打邊爐前飲啖湯先，係正嘅~ 😍到重點的牛肉喇…好彩唔係燈影牛肉，肉質係唔錯…比家嫂都仲要好！我哋都encore咗幾round…  😍另外，我其實好鍾意食蝦，但好可惜好可惜今次D蝦好唔新鮮（個menu仲夠膽自稱「生猛海蝦」真係好諷刺 😓），烚完隻蝦淋pat pat（人哋新鮮嘅蝦嘅肉係實的的架嘛！），我以為一兩隻先係咁，點知叫咗幾round都係好唔新鮮…富盈D蝦都新鮮過你…呢個係最大的敗筆！😓總括嚟講，menu簡單，嘢食選擇唔多，但整體好食—D牛肉好食 😋，D丸好食 😋 …除咗D蝦！嘢飲選擇唔多，服務一般般。兩個人埋單差不多成$1,200…就唔太抵囉。🤤…Read More

Siam28係嗰晚諗住去銅鑼灣食飯又想食泰國嘢而响Openrice搵出嚟嘅餐廳。餐廳格局似小店，食物+整體感覺其實都係呢個level。😅我哋叫咗個小食層層架、三文魚沙律、炸女婿蛋、泰式海南雞、蒜蓉炒雜菜，最後加埋個芒果煎糯米飯。小食層層架（都係嗰啲嘢啦，不過個芝士蝦餅係爆漿芝士⋯我麻麻地，我寧願食返普通炸蝦餅）同三文魚沙律算中規中矩，炸女婿蛋一般，海南雞都算好食嘅（雞仔嘅級數），個蒜蓉炒雜菜略嫌頹咗啲（係一大pat漿浸住一堆菜咁樣），last but not least最好味嘅竟然係個芒果煎糯米飯！😃 叫做有啲驚喜⋯而杯凍泰式奶茶唔夠凍，要成$58就覺得貴咗少少。🥲兩個人食埋單要成$7xx，感覺唔太抵食，我好似係幫手俾緊租金咁樣。Overall OK⋯啦。😏…Read More

雖然呢排天氣好熱🥵，但無損我哋繼續打邊爐嘅興致，以前一路食開尖沙咀旺角不同嘅火鍋店，到發現有「家嫂」呢間火鍋店已經不時登門造訪，雖然貴少少，但整體上都覺得算抵食，加上旺角又有食開嘅淥鼎記嘅質素開始下降，見而家訂位容易咗，咁又食一次喇！家嫂一向都有頭盤小食（酸薑皮蛋、蝦多士、水煮魚都幾好食）、到刺身拼盤（好新鮮）、再嚟雞煲（個雞煲就較為一般般😏，可以唔駛食哂），咁上下就要留一留肚喇～ 到揀湯底嘅時候，本來揀咗個花膠湯底，後來有位侍應話有款新嘅冬瓜盅湯底，問我哋試唔試吓，我心諗冬瓜消暑都好喎，跟住叫咗嚟試！佢哋仲好好咁不停問個新出湯底好唔好食，我哋真心都覺得唔錯！值得推介！👍🏻到海鮮拼盤，有好多嘢食呀！有鮑魚、貴妃蚌（好味😋）、蟹🦀、蝦🦐、蠔🦪、蜆仔，都叫做好新鮮，而且可以不停refill！搞到我哋都掛住食海鮮而忘記去食肥牛🤣～ 最後，我再叫咗個椰皇，非常完滿！（其實啲丸呀菜呀都食唔哂）😃批評容易讚賞難。點解我今次都想讚一讚家嫂呢？可能真係因為其他火鍋店質素開始下降，例如前菜、任叫食材選擇少咗，員工服務差咗啦，而家嫂叫做keep住個質素，雖然埋單差唔多要400幾500一個，同埋醬料區地下有少少黐立立😅，但整個用餐體驗唔錯，值得一讚！👍🏻…Read More

疫情時係旺角光榮嘅常客，但而家好耐無去光榮，因為嘢食水準每況越下，真係越嚟越唔好食😓，差不多價錢嘅選擇响旺角或尖沙咀都仲有唔少，不過今日唔知撞咗咩邪，竟然夠膽死走入呢間挑戰食客EQ的垃圾餐廳。平時有食開光榮嘅都知佢都係得嗰幾樣嘢食，照計點叫都唔會容易出錯，如果你地都認為係咁，咁你就大錯特錯！😖入去的時候差不多full，但隔咗好一陣先有人招呼你坐低。幫我哋落單嘅係一個後生仔，面青口唇白無梳頭嗰種⋯anyway我哋叫咗三眼仔雞扒菜底，三眼仔（雞蛋）講明要太陽蛋，然後凍檸水走甜，仲有沙爹牛麵同凍奶茶。先嚟嘢飲，放低咗一杯熱檸水，我心諗三十幾度真係有人飲熱嘢？好啦，叫個侍應嚟，OK落錯單，咁換過囉，佢入返廚房（好明顯）將杯熱檸水倒落啲冰度，然後拎返出嚟嘅時候已經係無哂啲冰嘅暖檸水⋯唯有叫佢加返少少冰啦⋯到三眼仔嚟到，一見面頭嘅炒蛋，灰咗😓，叫返個面青口唇白侍應嚟，佢話落錯單，再整過，我話明明要太陽蛋點解咁樣？佢竟然回答話：我都係唔記得咗要太陽蛋啫！一啲歉意都無！OK，唯有再等，到拎返碟核突（自己睇相）嘢嚟嘅時候，掀起啲太陽蛋，發現下面嗰塊係豬扒唔係雞扒😤😤😤😤😤，我朋友嬲到…呢刻已經胃口盡失，無再食落去😓，但照俾錢，當買個教訓！兩個人叫少少嘢食竟然有三樣嘢錯，個侍應一係未瞓醒一係嗨咗嘢，無道歉而且態度輕挑，三條友挨挨憑憑掛住吹水，啲嘢又唔係特別好食，唔好扮黃喇，呢間咁嘅垃圾餐廳呢世唔會再去！！！！！！！！！！！！…Read More

今次難得出街食lunch，諗住搵間坐得舒舒服服可以同同事傾下偈。因為我話想食麵所以同事book咗呢間。餐廳响大街角落，午餐時間人（竟然）唔多，雖然話係日式餐廳，但個vibe好明顯絕對係港式餐飲管理模式，嗱嗱臨叫你叫嘢咁樣，其實都ok，午飯時間嘛，好啦anyway$150食碗個湯完全無味的和牛烏冬係無問題的，而家响灣仔食嘢已經無乜要求，弊在侍應們不停——係不停——粗獷地拉櫈所發出的巨響嚴重影響我的用餐體驗，嘭嘭聲好大聲震到人耳都側，我唔會亦無法叫你動作優雅少少扮返正宗日本餐廳，但嗰一個鐘真係有啲難受，好掃興囉～ 😓…Read More

放工時間想响九龍灣求其醫肚，响大渣哥、光榮同時代三者間揀左呢間係因為未試過。雖然係茶餐廳，但仍需自己QR code落單，唔好處係類似「野飲要少甜」、「走飯改菜底」的額外要求係做唔到，下下都要唔太應你的侍應去同廚房講就比較麻煩。佢地無改菜底呢個option叫我地叫碟油菜，盛惠$22蚊，其實無所謂，但碟菜拎到黎的感覺令人無哂食慾…仲差過我屋企的廚餘！另外叫左個鐵板牛扒，我見到人地個個有張好似pepper lunch的紙圈圍住個鐵板，唯獨我嗰個無，不虞有詐，當你倒D汁落去個鐵板度之後，我發現我成身、成張櫈、手袋、外套都沾上佢彈出黎的一點點油漬！正如我朋友講，個雞扒係OK的，但第一碟上的「剩菜」實在令人反感！同個大媽侍應講，佢只係笑笑口然後行開左…服務簡直一流！…Read More

呢幾個月食左好多火鍋店，潮州鹵漢都食左好幾次…前兩日去發現所有優惠：1) like page第二個人半價；2) 信用卡7折都無哂…而且menu的ABCD餐都改左了。平時食開最貴的D餐通常$700埋單而家變左要成千銀先落到樓…感覺唔抵食…（你去創興任何一層都唔駛咁貴）。之前揀一個湯底唔駛加錢，而家變左好似個侍應話齋：「我地淨係俾個無味嘅湯你淥架咋，要有味的湯底要加$48。」食物質素都無乜唔同，海鮮係新鮮的，特色熱盤包括普寧豆腐係好食的 ，之不過鴨血就唔好食，想寫文章的最大原因係感到侍應們好大怨氣，放低食物的動作幾乎可以用「亨」落陋枱黎形容 :(，差D係車埋黎。我地食左咁多次最主要都係為左個滷水湯底而黎…今次的體驗好麻麻，下次黎唔黎會再考慮一下。 …Read More

其實要响荔枝角搵珍奶係好難，做野做得辛苦諗住搵杯珍奶氹自己開心，免為其難唯有試下，點知中伏！以我成日飲珍奶黎講，$25杯野咁細仲要一D都唔好飲（已經係普通珍奶連歇腳X, 貢X, 都可, 八方X集嗰陣味都整唔到）…呢間野仲生存到實屬奇蹟。…Read More

這餐廳在家附近，一直沒有去過，但每次路過都見有食客，以為沒差，昨晚心血來潮一試。我知道地區日本餐廳不會很正宗，但餐牌上價錢也沒有很便宜，覺得應該average吧還好吧。我非常喜歡吃chirashi，每次去新日本餐廳也會點，這個不用煮，中伏機會應該很小吧？覺得應該試一下。好了，飯來了，我一看到之後胃口盡丟…咁大個人吃了多次chirashi也未見過賣相差成這樣的…三文魚(其實不是三文魚，是好像惠康臨收鋪前將D切剩的三文魚邊魚腩超特價促銷那種)不是正常的橙色…是瘀瘀梅梅的，然後就是一堆剛從雪櫃拎出來的冷飯菜汁(因為仲好涷)…見到真係超超超超超超超超超超超超超超超失望。若你問我好不好吃，我會說飯是正常飯的味道。MENU寫$50，埋單收$57，我也懶得理論，付錢就走了。呢。世。唔。會。再。去。…Read More