stewart's Profile

早幾日出去元朗飲飲食食，無端端比我搵到間好食又抵食既茶餐廳，就係今個網誌既呢一間嘞！下午茶時間去茶餐廳食 Tea，平就一定架啦，不過平得黎，既好食又抵食就真係唔係咁易撞到。而且地方乾淨、冷氣又夠。我食既係公司三文治，有蛋、火腿、蕃茄、芝士同埋叉燒。加埋好好味既凍奶茶一杯，埋單只係 $22！由於行到鬼死咁攰，又熱，呢杯好好味既凍奶茶好快就已經化為烏有。所以我叫多一個餐，三文治打包返屋企食，凍奶茶即刻對埋佢！所有圖片及文字來自：http://hk.myblog.yahoo.com/stewart-too/article?mid=4039…Read More

晚上到了一家裝修不錯的泰國菜館吃晚飯。一隻可愛小狗 Hero 伴著我們五人一起吃飯，為晚餐增加了不少趣味。餐廳名字是：Mint，薄荷葉。泰菜常用的其中一種香料。由於我跟黃老太早到，一於先來兩杯泰啤，濕一濕口唇，潤一潤喉嚨。在商量該點些什麼來下酒，侍應說「不如給你們來一客蝦片，免費的。」笑容便由這一刻開始直到作鳥獸散。《泰式生蝦》蝦新鮮，醬料美味。我們來了兩碟，五個人吃了廿四隻。《炒芥蘭苗》菜苗鮮甜，味道濃郁。《泰式拼盤》賣相美感十足，串燒入味非常，難得地保持美味的肉汁。香芧餅一般我是不吃的，這晚來了兩塊。炸春卷的皮比較厚，亦不是我愛吃的脆皮。老闆說這才是正宗的做法。《泰式炒通菜絲》難得在香港可以吃到需要非凡刀法才做得出的菜式。《咖哩大頭蝦》本來是想吃蟹的，可惜售罄。咖哩甜而不辣，蝦頭有不少膏，可惜蝦身太小，五個人根本不夠吃。《薄餅》咖哩伴侶怎麼能少？可惜不夠酥，餅身亦比較實。《冬陰功》沒有什麼材料在湯內。吃到差不多尾聲，侍應才問我們是否還未送湯來。是來得太晚，以至豐富的海鮮已經給其他人客吧。《蝦醬炒飯》賣相討好，味道及用料十足。《泰式燒雞》好吃，好在他們的香料完全融入雞肉，芳香噗鼻。雞肉嫩滑帶有肉汁。《炸魔鬼魚》有魚鮮味，脆脆的下酒一流。《生果盤》誠意十足，有士多啤梨、楊桃等等。沒有因為是送的而草草了事。是晚晚餐每人二百三十元，價錢不算貴，食物亦不是特別出色。但老闆跟伙計都很好人，每碟菜的賣相都有花過心思，就算是送的蝦片亦然。讓客人吃得開心也是留客之道。更多圖片及有關網誌：http://hk.myblog.yahoo.com/stewart-too/article?mid=2319…Read More

今次我放入口既差不多全部都係海鮮同甜品；黃老太亦不甘後人，我見佢今次食既份量都唔少得過我好多。首先第一碟：生蠔 + 凍熟蝦「生蠔」好新鮮，海水味十足。不過係澳洲蠔，比較細隻。「凍蝦」亦都夠爽甜。當然又係我全程負責表演去蝦殼既時間喇。跟住又係海鮮：煙三文魚 + 凍蟹 + 刺身 + 壽司 + 翡翠螺 「煙三文魚」就一般啦，無咩特別。個刺身我無 Close Up，因為唔新鮮，「三文魚」旁邊既係「赤貝」，你睇個色都知咩料，所以不吃也罷。好大隻既螺，螺肉鮮、爽、甜，一流！挖出黎有成兩吋既肉身。必定要食呀老友！凍蟹好新鮮，蟹味亦十足。「吞拿魚壽司」又係好好味，加佐青瓜同芒果，感覺新鮮。跟住呢碟係黃老太既，我地食野既口味差唔多，佢呢碟有我未食既「加菲蟹」同「鰻魚壽司」。見佢食得咁開心，我都唔執輸，拎佐三份「加菲蟹」，再 Encore 蝦同螺。個「加菲蟹」既蟹味雖然唔夠越南蟹或者大閘蟹，但係個蟹身真係好鬼死多肉，有相為證架。我好少響街食蟹，因為好鬼煩。但係呢次唔同，用叉食就得嘞，優雅到不得了。跟仕又係蝦，不過係熱既「西芹蝦仁」。西芹我唔食，所以只拎蝦仁。大大隻，不過落得幾多粉去「那」佢，同埋我估佢地「啤」佐好多次水，所以爽就夠爽，不過蝦既鮮味就付諸流水了…成煲「冬菇炆花膠」，唔食真係對自己唔住。膠質呀膠質，無論皮膚同關節都好需要你，可惜發現得你太遲，之前食佐咁多野。依家食得七大舊咁少，我下次一定返黎搵你。等我…「紅酒煮鴨胸」難得唔係雪藏貨，鴨胸難入味，唔係煙既話就好考工夫點樣令到佢入味又唔「鞋」。呢間酒店做得唔錯。「海南雞飯」我只係拎佐兩件雞，無拎飯。但係呢個雞差到呢…鹹到我即刻要飲水！好懷念泰國水門既海南雞…今日一訓醒就去食，所以食唔到好多野。係時候開始食甜品喇！第一樣就梗係我最愛既「意大利芝士餅」啦。好味道！呢個「開心果芝士蛋糕」係一個驚喜！淡淡既芝士味，加開心果茸，仲有少少青檸既青香，我食佐兩件！「榛子果仁蛋糕」直情好似食緊金莎咁，面層既榛子又香又滑，個餅底又脆。好好味！可惜個甜品胃開得一半，食唔到多一件。如果佢早 D 出，我一定食佢起碼兩件呀！呢個「士多啤梨酥餅」好睇唔好食，酥餅結實過岩岩做完 GYM 既手臂！呢兩個係唔知咩名既甜品，黃老太拎既。左邊既佢食完話好似食緊「司各脫橙味魚肝油」咁喎。右邊呢個我試佐，好似雙皮奶凍咁，幾好。兩杯「芒果西米露」好好飲，芒果味香到呢… Yummy !!!「喳喳糖水」有好大粒好似西米咁既野，我成日都唔記得叫咩名。香滑又唔太甜。其實仲有其它野食，好似東風螺、燒牛肉、青口、咖哩呀咁，甜品亦都有七、八種蛋糕、 Hazzgen Dazs 雪糕，不過雪糕得四種好一般既味，所以我無食。我地由十二點一路嘆到去兩點半，佢地開咁耐我地就食足咁耐。好耐都無試過食得咁開心，絕大部份既野食都好好食，黃老太已經話要同佢既 Friend 再 Encore。我都係咁話。半價黎呢度食真係好抵！有折：每人$160！超抵呀！更多圖片及有關網誌：http://hk.myblog.yahoo.com/stewart-too/article?mid=2154…Read More

今次都係去肥牛打邊爐，同上幾次食既野都係差唔多。不過今次既食材就「有喜亦有悲」。( 上一次去肥牛食既圖文：http://hk.myblog.yahoo.com/stewart-too/article?mid=1088 )喜既係，今次有一個新出既《招牌秘汁牛雜鍋》。望一望 D 料，嘩… 好多呀，有：牛膀、牛肺、牛肚、牛大腸、牛筋同埋牛粉腸。個汁就食唔出有幾咁「秘制」，不過都好好牛味。真係無諗過用牛雜料黎打邊爐，新鮮之餘亦都食出唔同感覺，好正！唯一美中不足既地方係，個湯底唔係好夠，只得半煲，加水之後既味道沖淡佐。牛脊肉依然出色，鬆化又甘香。三文魚都幾好。鯇魚片 Very Good !!! 一望都知，唔使多講。悲既係，蝦丸、手切肥牛、潮州魚蛋都差過以前。唔知係唔係「採購部」入既貨唔同佐呢？下次再去試下先至知。希望佢地係「偶有失手」啦。手切肥牛雖然好新鮮，但係今次既部位唔係咁得，唔知係唔係比佐牛蘿友比我地。潮州魚蛋無以前咁彈，不過都食得過既，因為魚味都幾香，同埋唔腥。墨魚丸併蝦丸，前者幾好幾彈牙，後者今次唔係好夠蝦肉。水魷係唯一一樣呢晚我食唔落口既野。個味怪怪地，應該就快壞。不過陳總舵主太愛佢既關係，唔理咁多，一個人隊佐大部份。飲佐十支八支大啤，加埋每人唔使$200。更多圖片及有關網誌：http://hk.myblog.yahoo.com/stewart-too/article?mid=3235…Read More

先到羅湖商業城二樓既《彩蝶軒酒家》飲茶吃個飽。由於太過肚餓的關係，叫得太多食物，結果飽到有佐四個月身己。《椒鹽炸豆腐》好味《山水豆腐花》好味《叉燒腸粉》好味《墨魚餅》可以唔食《炒陳村粉》唔夠三島口岸大酒樓既牛腩陳村粉好食《排骨蒸陳村粉》同上《煎蘿蔔糕》可以唔食《飽汁扣鳳爪》OK《白灼西生菜》OK但係多油《叉燒酥》好味《潮州粉果》朋友話 OK《蝦餃》好味《蘿蔔絲酥餅》好味，如果個皮再薄 D 就正啦！《鮮蝦春卷》好好味呀！《鮮竹牛肉球》朋友話 OK。《小籠飽》可以唔食《杏汁豬肺湯》好好味！四個人食咁多野都只係每人七十蚊，抵呀！更多圖片及有關網誌：http://hk.myblog.yahoo.com/stewart-too/article?mid=2517…Read More

上個月廿八號同好友 Sal 去食 Lunch。記得上次既《毓民牛肉麵》唔係好岩我口味，於是想搵返一間好味既台灣食肆試下。所以就黎佐呢間《士林台灣麵》。今次食神開眼，比我地搵到間好野。第一碟到既係滷水併盤，好好味既豆腐、雞中翼、豬耳、雞腎、蛋、鴨舌。全部都好入味，好好食。只係鴨舌如果再稔少少就真係一個字兩個音：Perfect 喇。跟住黎既香酥雞扒飯，嘩… D 雞扒多到不得了，而且好好食。食時又唔會成口油。仲有，超多肉燥，都只係 $27，好抵呀！最後黎既香酥排骨飯就差佐少少喇。雖然排骨都好多，唔算鞋口亦唔會食到成口油，但係唔夠味。唔知係因為食完雞扒同滷水野之後先至食佢，所以覺得唔夠味，定係佢就係唔記得落味呢？加埋兩杯飲野，一共 $117。好抵食！更多圖片及有關網誌：http://hk.myblog.yahoo.com/stewart-too/article?mid=3427…Read More

早幾日同小瑜去食 Lunch，原本諗住去食「士林台灣麵」，點知又係要排隊，條街又熱到死，所以是是旦旦搵一間搞掂個肚就算。抬頭一望，比我望到「泰式海南雞」呢幾個字，於是就決定去呢間「元朗鄉村小廚」。小瑜食既「三絲抄河」，佢話麻麻地，唔夠料。三十幾蚊。我既「泰式海南雞」，四十幾蚊。去骨既雞肉都算嫩滑。雖然雞味就一般，但係整體味道都唔錯。D飯亦夠味之餘又唔會好油，幾好。左邊既特制豉油，右邊既係辣雞醬。兩樣都幾好。下次想食「泰式海南雞」既話可以再黎呢間。更多圖片及網誌：http://hk.myblog.yahoo.com/stewart-too/article?mid=3680…Read More

四個人之中有三個都食煙，所以佢地揀呢間餐廳，貪佢可以坐露天地方。雖然係露天，但係都有個伸縮頂，加埋燈飾，對住公園坐，環境都 OK。不過服務就真係麻麻。做野慢、無記性。不過今次因為好平，所以對服務無要求。泰式燒雞燒雞入味不過有少少鞋身。鹹蝦通菜通菜老佐少少，不過可以接受。泰式併盤﹝我覺得似越式併盤多 D﹞春卷：好好味，好多料，有冬菇、粉絲、蝦仁、豬肉碎同埋木耳。蝦餅：都唔錯，彈牙爽口。如果多少少蝦就仲正。魚餅：好有驚喜，係我食過咁多間最好食既。因為佢做得唔正宗，正宗既唔岩我口味。佢無 咩香矛同香料味，但係食落有好新鮮既魚肉味。炸紮肉：我食既時候已經凍佐，麻麻地，好多油。不過其中一個 C9 ﹝Fanny﹞話好食。斑腩豆腐煲豆腐一般，唔算好滑，外皮亦都唔夠味。不過斑腩就唔錯，起碼無雪味同腥味先。蒸倉魚條魚一上黎，我同 Fanny 都好奇怪，咁大條既？最少有斤半至兩斤！去街市買最少二十五蚊呀！﹝講緊元朗既街市，市區要成三十蚊都似。﹞點知原來唔新鮮既，肉質鬆散，又有少少腥味！叫侍應黎換過佢，佢地只係攞入去廚房加翻少少滾油淋面又攞返出黎！唉…大樹菠蘿冰一望就知，幾多大樹菠蘿！抵呀！是日晚餐：泰式燒雞﹝半隻﹞鹹蝦通菜泰式併盤﹝應該係大既併盤，因為都有唔少野﹞斑腩豆腐煲蒸倉魚大樹菠蘿冰一杯凍檸檬茶三杯白飯五碗埋單：$232每人消費：$58當唔計條魚，都好抵呀，食到飽晒都唔使 $60一個人！更多圖片於：http://hk.myblog.yahoo.com/jw!eHwR3q6BBBKaBVAE_KF.lwc05B1az4HCSCCRVYo-…Read More

五月尾同家姐去佐旺角食《毓民私房牛肉麵》，個人覺得《大婆》比較好食。雖然毓民的牛肉麵湯底真的是如其所說沒有味精，可惜，清湯底不論是配牛肉或牛腩都不是活活所喜愛的做法。《招牌牛肉麵》的拉麵及湯底的做法都不是我所喜歡的一種。牛肉做得不錯，蘿蔔亦炆得夠腍。《招牌牛肉飯》的汁是用湯底加粉打成，跟吃麵沒兩樣，而且沒有加入肉燥，有點失望。 《魯肉豆腐》的魯肉及豆腐都做得很正宗，可惜魯肉的纖維還未算軟化，只算合格。《鹽酥雞》跟在台灣吃到的一模一樣，值得一讚。 《百香果特飲》特別在有百香果的果肉和特別甜，加了一次冰和兩次水還是很甜。兩個人吃了一百七十元，食物尚算不錯，做法卻不對活活的胃口，除了外賣《鹽酥雞》之外，應該不會再幫襯了。更多的有關相片：http://hk.myblog.yahoo.com/jw!eHwR3q6BBBKaBVAE_KF.lwc05B1az4HCSCCRVYo-…Read More

其實今次已經唔知係第幾黎食，搬佐入黎八鄉都已經十八個月，去呢間《龍華》最少都五六次，無論飲茶定係晚飯都覺得好抵食。不過因為次次都唔記得帶相機去，所以無影過相。:(錦田既《龍華》同沙田既《龍華》係兩間無關係既酒樓，不過大家都一樣係舊式酒樓、都係無咩裝修、衛生一般同埋服務一般。但係講到食，錦田《龍華》就抵食好多。而且又平 D，好味 D，大碟 D。但係如果住市區，就真係幾遠。燒鵝美道極佳，鵝皮燒得脆，鵝肉又入味又腍。係《天鴻》以外既平價之選。我地一坐低就叫佐燒鵝先，阿姐話賣晒，好在我已經訂檯時留起半隻。嘻嘻…﹝佢地既燒鵝一般七點半後就賣完，所以如果遲去就一定要預留。﹞豉椒鵝腸既鵝腸洗得好乾淨，可惜係跟住燒鵝上，覺得燒鵝留在口中既美味仍然蓋過了這個菜。:)蝦醬通菜既蝦醬味唔錯，通菜新鮮度一般。可能因為我地八點半先至去到，太夜了 。:(﹝上次食既芥蘭超好食，好少食到又爽脆又鮮甜既芥蘭，下次一定要食返佢。﹞砵仔蒸飯真係一定要食。D 飯蒸完出黎一粒粒已經好吸引，加埋附上既豬油同特制豉油，撈埋一齊，嘩…超正！是晚餐單：燒鵝 ﹝半隻﹞豉椒鵝腸蝦醬通菜砵仔蒸飯﹝兩份﹞凍檸檬茶﹝兩杯﹞泰象啤﹝兩支﹞埋單：$258所有飲食圖片可在本人的 Blog 內看到：http://hk.myblog.yahoo.com/stewart_too@ymail.com…Read More

日航 send o左個 message 比我，話我生日會有折，幾多歲就減多%，咁我三十七歲就減 37 %﹝即六三折﹞，仲要包一杯飲品。無理由唔去掛？所以一於約埋黃老太同陳總舵主去食佢地個 Lunch Buffet。由於本人太懶的關係，所以今次開始會用替評語，當然，有特色的還是會寫多一點。 = 倒貼也不吃= 不吃也罷 = 一試無妨 = 水準之作 = 超班馬！ Mortadella 腸仔片 Pastrami 牛肉片 Sausage Salad with Croutons & Crushed Cheese 腸仔沙律 + 麵包粒和碎芝士 ﹝自己配搭﹞ Roasted Chicken Chirashi 魚生飯 Salmon + Tuna Sashimi 三文魚+吞拿魚刺身 Baked Oyster with Cheese 芝士焗蠔 Roasted Shishamo Smelt with Salt 鹽燒多春魚 Japanese Dumpling 日式餃子 呢個真係好好味，外皮上軟下脆，餃內的豬肉有肉汁又份量十足！ Shrimps on Ice 凍蝦 D 蝦一 D 都唔爽！ Rotti Pratta 印度烤餅 Curry Chicken 印度咖哩雞 :咖哩汁 雞肉 薯仔 雞肉好鞋，咖哩都蓋唔到果陣雪味，薯仔又硬到好似未煮過咁！還好我主要只是用它的汁來伴 Rotti 吃。 Baby Rib 烤豬排﹝其實我唔知中文叫咩。哈哈…﹞ Mini Burger 迷你牛肉漢堡 日航應該係用七至八成牛肉加少少豬肉同埋 Mushroom 去整，食落個感覺幾好。 Squid Ink Pasta 墨汁意粉，要問陳總舵主好唔好食，因為我見個樣幾好所以影。 Shrimps with Squid Tube 蝦膠釀魷魚 其實日航無寫呢味菜係用蝦膠釀，不過食落去好多蝦肉。 Steamed Fish 蒸桂花魚 第一次蒸出黎既魚過熟，第二次既就生到骨肉相連，有無搞錯！？ Tiramisu 意大利芝士杯 (圖一) 呢個食完都唔知係咩，好似用 Vanilla 加 Custard 整既 Jelly。 (圖二) 呢個都係唔知咩，用 Cream 加 Custard 整既 Horn。 Fruit 生果 所有圖片可在我的 Blog 內看到：http://hk.myblog.yahoo.com/jw!eHwR3q6BBBKaBVAE_KF.lwc05B1az4HCSCCRVYo- …Read More

今晚陳總舵主急 Call 話邀請我去九龍城食泰國菜，我問佢邀請既意思係咩先，原來係佢請客。哈哈…有好野就梗係叫埋黃老太喇，點知佢個電話一直都收唔到，整定今日無緣相見。真係多謝晒總舵主。好奇怪，唔知點解會預先送上一份兩件既「蒜蓉飽」，一問之下，原來送錯了檯。可惜，圖中左上角的怪手已經急不及待撕下了一角，所以到侍應發覺送錯的時候，已經淪為餓鬼肚中飽。「泰式抄芥蘭」麻麻地啦，未炒得熟晒，又好細碟。「冬陰功」個湯底幾好，夠酸又夠辣。可惜 D 蝦唔爽，如果唔係就一流！「泰式生蝦」夠晒新鮮，配埋個辣醬又係一絕。再跟埋脆炸蝦頭，成為今日既必食項目！「咖哩炒蟹」其實真係間間都差唔多。呢間隻蟹夠大隻又夠新鮮，不過一隻要 $280，唔算好抵食。「拼盤」$80，樣樣都幾好，總舵主話個「炸蝦餅」尤其出色。「泰式豬肉炒飯」呢碟野一送上黎我已經唔係幾想食佢。又濕又林咁，上檯又唔香。要問下陳總舵主先至知好唔好食。「椰汁西米糕」送既。係咪望黎望去都好似差咁 D 野呢？哈哈…唔知點解佢地無放粒「馬豆」響中間。我又係無食到，陳總舵主食埋我果份。 「蕃薯西米露」又係送既。話明係糖水，甜少少無咩所謂，而且佢地放佐都幾多料，有蕃薯，又有木爪，算係有誠意喇！呢餐有人請，食得特別開心。哈哈…所有圖片可以看我的 Blog：http://hk.myblog.yahoo.com/jw!eHwR3q6BBBKaBVAE_KF.lwc05B1az4HCSCCRVYo- …Read More

今晚和三位舊同事到西半山堅道試一間新開張一個月的泰國菜餐廳 ─ Sa Wat Dee Club。菜式很有泰國風味，因為大廚是泰國人，伴碟的手法很「泰國」！食物大至上都是我每次到泰國餐廳都會點的菜式。首先來的「冬蔭功」是我所喝過最『泰國』的一次。味道很正宗！最值得一讚的是有很多蝦，不但多，而且難得的爽口！「馬拉盞炒通菜」也不錯，可惜是先喝了「冬蔭功」，這個菜變得很清淡。「泰式拼盤」也做得很好。「柚子沙律」清新又帶點酸甜，值得推薦。「咖哩炒蟹」的汁與味都是上品，蟹亦夠新鮮。「蒜蓉包」當然是伴著「咖哩炒蟹」一起品嚐的首選食品！怎能少了它？我們還來了兩客呢！這個「蒜蓉炸軟殼蟹」弄得非常好，軟中帶脆但油份不多！有苦瓜跟番茄伴碟的「生蝦」。可能是因為泰國封鎖了機場的關係，生蝦不是最新鮮的上碟。只算是不過不失。「桂花糕」跟「大菜糕」都不太甜，但都香且爽。「芒果黑糯米」的糯米跟椰汁都不錯，可惜芒果不甜而且太少！更多的有關相片：http://hk.myblog.yahoo.com/jw!eHwR3q6BBBKaBVAE_KF.lwc05B1az4HCSCCRVYo- …Read More