至尊滿屋日本料理 (Closed)

好耐之前朋友幫左我忙，今晚慰勞下佢請佢食番餐勁嘅。食放題係最好不過，合乎預算食幾多都得。此食店已來過了幾次，最喜歡佢生熟食物同樣有質素，環境闊落侍應服務殷勤，食得開心自在。手卷細細條多料飯少，非常喜歡的比例，三款手卷有海膽、麻辣蜆肉和芝士飛魚籽。以海膽手卷最吸引，好creamy又唔腥，食完半打再半打，非常滿足。千島醬燒帝王蟹棒壽司都好正，醬汁甜美蟹棒厚身咬落彈牙好有質感。三文魚腩紋理好靚，甜蝦肉質彈牙，北海道帶子大粒厚肉，樣樣都好新鮮。芝麻雞翼外脆肉嫩，炸得香脆食得滋味，榴槤炸彈流心餡漿榴槤味濃郁芳香也是必食之選。鹽燒海蝦要脫殼食落唔係咁方便。鹽燒鯖魚都幾大份肉質嫩。燒羊架大件，燒得香口肉質軟身唔羶。麻辣鴨腎好薄惹味好爽口，食一碟係唔夠喉，又ENCORE。北海道焗廣島蠔蠔身細粒充滿芝士和洋蔥，食落非常美味。吉品鮑汁燴花膠盛宴，花膠大塊且厚身，而且花膠好淋食落唔腥。成件花膠填滿個口好正。牛肉火窩牛肉半生熟加入蛋汁又滑又香，最愛和金菇一起吃加份爽口感，湯底甜甜地相當味美。