CHEF STAGE de Eddy Chu (Closed)

今晚同朋友去到尖沙咀嘅CHEF STAGE de Eddy Chu 食晚餐敘舊。 我哋一人叫咗一個五道菜套餐，每人都有一個乳酪鮮蝦芒果沙律，鮮蝦鮮甜，芒果加乳酪令到成個沙律一啲都唔膩，估唔到前菜就已經咁高水準。我同朋友各人要咗一個湯，我要黑松露蘑菇湯，質感好豐富，每一啖都有蘑菇肉，亦有黑松露嘅香味。朋友要咗個南瓜蟹肉忌廉湯，佢對個湯讚口不絕，一飲就飲得出南瓜係自己磨，同蟹肉配合得好好。前菜仲有清酒蟹肉日本年糕，每一次都會點好多芝士海鮮汁襯托個年糕，而每一件年糕都好有咬口。我叫咗精選雜扒作為我嘅主菜，因為可以一次過食到晒美國肉眼扒，黑毛豬，大蝦同埋雞扒，全部肉類都好可口美味。但我亦都好鍾意佢嘅紫薯同埋蘆筍。我朋友就叫咗一個海鮮餐，有日本帶子，大蝦，鮑魚，鮮蜆，而佢最鍾意就係鮮魚柳，煎得啱啱好。而且佢哋仲有加咗白蘭地嘅燒汁，用心得來有創意。最後係甜品，一人一件芝士蛋糕。餐廳地方唔算大，但係個景好靚。服務態度好好，值得一提嘅係佢哋煮食份外用心，例如每一次上菜，碗碟都係熱嘅，令到食物溫度可以保持，係好細心嘅表現。今晚真係好難忘。