渡邊屋

Open Now

Now Closed

之前喺附近食廚師發辦嘅時候有同日藉老闆渡邊先生傾開偈，講起附近有間分店主打壽司刺身，早幾日經過見到個名就估到係呢間，可惜已經滿座，今日收早終於有機會。象拔蚌刺身用上超新鮮嘅九洲白象拔，經過師傅拍打令肉質更清爽彈牙，加入檸檬汁更加突顯出清甜嘅味道，非常推薦！蝦蛄壽司唔係度度有，難得仲要咁原整同新鮮彈牙，值得一試。八爪魚壽司同樣新鮮，初入口味道清淡，細細咀嚼之後慢慢感受到佢嘅鮮味，係先生嘅最愛。火炙壽司盛盒一客七件，件件新鮮，特別係火炙帶子同左口魚，前者肉質肥厚，味道鮮甜，後者入口係滿滿嘅魚油甘香，令人回味！牛油果芝士三文魚卷大大份，非常抵食，清淡嘅牛油果同新鮮三文魚配上惹味嘅鰻魚汁同cream cheese，一拍即合。餐廳店仔細細，座位亦唔多，但食物種類多，價錢亦合理，難怪咁多捧場客。如果想食高質嘅日本壽司同刺身，但budget又未去到食廚師發辦，呢間小小嘅居酒屋會係唔錯嘅選擇。