圓山台灣料理 (Closed)

尖沙咀呢間圓山台灣料理，真係比我食到台灣嘅味道。睇吓有咩好食先。招牌極品流沙包，流沙包好多地方都做得好流，但呢度除咗流，係真係食到沙嘅，個奶黃餡起沙，真係超好食！甜酸炸雲吞，就算攤凍左一陣先食，個皮依然係脆卜卜，索索聲㗎。外婆蘿蔔糕，煎得唔錯，幾香口。雖然話係台灣料理，呢度都可以食到燒賣同小籠包。鮮姑魚肚扎，魚肚爽口彈牙。鳳梨酥，呢個要必食，熱呼呼嘅外皮，裏面酸甜適中嘅菠蘿餡料，食到幸福感呢！台式紅槽豬手，豬手炆得好淋，個醬汁味道有啲似南乳，豬手食落好有膠質，食完個嘴都有黏黏地。豉汁欖角蒸魚雲，個豆豉醬汁好濃郁，加埋滑滑嘅魚雲，正！薑茶湯圓，薑茶微辣好好飲，湯圓裏面係芝麻餡，皮薄餡靚。今餐又飽又滿足。