龍朝酒家 (Closed)

金融海嘯威力有幾大依家仲未知，但對消費意慾就立竿見影。星期六放咗工約埋屋企人去佐敦食晏，見呢度幾企理又上嚟試吓。下午兩點幾下午茶時段以為會好多人點知一D都唔full，立即有位。地方唔大一眼睇晒，近窗邊係卡位，可以望到彌敦道，另一邊係貴賓房，中間大堂D檯都唔算逼。食咗生菜魚球粥，魚球幾多粒個粥底都OK、义燒包同雞包仔都幾好味，牛肉就好普通、牛腸D粉又厚又硬，沙律蝦卷就細條D但都幾香口，我認為至好係個西炒飯，雖然漏咗單等咗好耐至有但係炒得好乾身一D都唔會油。食物嘅水準未至於話好好但係絕對唔差，響佐敦呢一帶應該有得做。不過發現一樣幾奇怪嘅事，原來中午嚟食仲抵，有D特價點心竟然係$7.8比下午茶仲要平，有D炒粉麵都係好平，証明午市競爭好大。諗落唔係幾明但一落到街就明晒，由佐敦道至柯士甸道的一段彌敦道，原來有成十間酒樓，生意難做可想而知。希望今次個浪快D過，如果唔係好多食肆都會頂唔住。