金峰靚靚粥麵 (Closed)

禮拜日一訓醒已經十一點幾，附近酒樓乜早茶優惠都無晒，又無乜胃口，想食清啲，最後同媽咪去到鰂魚涌睇下有乜好食。去到見平時排長龍既粥店無乜人係門口排隊喎，仲唔拿拿林去攞位咩。點知係假像黎，原來有啲人一早就攞左飛先再去行街買餸，等下等下果班人先慢慢出現返，結果要排成20 分鐘囉。入到去，見是日優惠係瘦肉粥，即刻落單，一碗瘦肉粥，一碗鯪魚球牛肉粥，一碟炒麵，一碟炸兩。先黎碟炒麵，心諗咁細碟邊夠我地食，但食落又有啲咬口，幾好味喎，怪唔知得枱枱都叫啦。之後黎碟炸兩，估佢唔到咁脆，咬落去卜卜聲，正 ! 最後黎兩碗粥，勁大碗，啲料又多又新鮮，勁多粒鯪魚球同牛肉，多到要分啲俾阿媽添，啲牛肉又滑啵，真係唔錯。但鯪魚球有少少魚骨，食果時要小心啲，但証明佢係新鮮魚肉黎，又唔鯹，抵讚 ! 兩個人食到飽到上心口，都只係八十幾蚊，抵到爛。