張公子

Open Now

Now Closed

今日去觀塘同舊同事飲茶，佢帶路到這家中菜館飲茶，2個人都點了5款點心。百花釀魚肚熱辣辣，塊魚肚好厚入哂味，上面嘅蝦膠分量足，口感爽口彈牙，夾埋一齊咁食非常滿足。沙嗲牛柏葉份量好多，個沙嗲少少辣，好惹味，牛栢葉大件好爽口，仲有d生筋響底吸沙嗲汁，入晒味。鵝肝金荀咸水角外型可愛得意，做到好似紅蘿蔔，入面餡料都唔少，鵝肝油潤，仲有冬菇，蝦米肉碎，食落香口。金網香芒鮮蝦卷一碟有四件，金黃色的炸米網卷住好多爽口蝦同滑滑香甜芒果，芒果同蝦比例適中，配上有啲好似芥辣同檸檬味的沙律醬，醒胃又好味。張公子招牌腸個腸粉好大卷，腸粉皮薄滑，入面冇肉，有d沙葛，西芹，紅蘿蔔切粒，加上香脆可口的米網同埋芋頭絲。入口有d似炸兩，不過又冇咁油，又健康，個招牌腸唔錯。萬壽果糖水店員最後仲送我哋糖水，碗糖水好有誠意，料好足，木瓜香甜，雪耳大大件而且好多杏仁，糖水好清潤，最適合而家乾燥嘅天氣飲。總括而言，點心精緻，食得出點心師傅好用心整，我地食得開心又打卡打得好開心。而且，呢度嘅餐廳環境都幾舒服，窗外面有啲樹木，座位寬敞，坐得舒服。