Olive Cafe (新領域廣場) (Closed)

今晚約左朋友食飯。去荃灣一間西餐廳Olive Cafe食，喺新領域廣場地下。平時去荃灣都唔會成經呢個廣場，但朋友話呢間餐廳好正就一於去「搵」食！總共嗌左四個餐：鮮蝦意粉配香辣茄汁、瑪格麗特薄餅，同埋石燒系列——美國金裝M9+和牛西冷200g同埋雜肉腸拼盤。鮮蝦意粉配香辣茄汁鮮蝦唔會鯹，肉質挺身，真係夠曬新鮮。意粉唔會腍，粉量都頗多。加埋幾粒煮左嘅蕃茄仔，茄汁都係用蕃茄仔製成，唔會用茄膏代替，真材實料！最特別嘅係個醬汁——「香辣茄汁」。食落有微微嘅辣味，但唔會辣到食唔到，因為蕃茄嘅甜味中和左d辣味。瑪格麗特薄餅用左薄身嘅餅底製成。雖然餅底薄但面頭嘅芝士煙韌，成功為薄餅添上口感！塊餅底新鮮製成，事關好軟熟，唔會硬。